Նորություններ

Գյումրու երկու փոխքաղաքապետերի անունները հայտնի են

Գյումրու երկու փոխքաղաքապետերի անունները հայտնի են Կայացել է Գյումրու ավագանու արտահերթ նիստը: Այսօրվա նիստում ընտրվել են քաղաքապետի 2 տեղակալներ և ավագանու մշտական հանձնաժողովների նախագահներ ու տեղակալներ։ Քաղաքապետի առաջին տեղակալ է ընտրվել Արթուր Պապիկյանը, մյուս տեղակալ է ընտրվել ՔՊ-ական Դավիթ Առուշանյանը։ Գյումրու 2 փոխքաղաքապետերի ընտրությանը կողմ են քվեարկել միայն «Բալասանյան դաշինք» ու «Քաղաքացիական պայմանագիր» կուսակցությունները։ Մյուս խմբակցություններից «Զարթոնքն» ու «Ապրելու երկիրը» ձեռնպահ են եղել, իսկ ՀՀԿ-ն՝ դեմ։ Ըստ Գյումրու ավագանու կանոնակարգի ընտրվել են մշտական հանձնաժողովների նախագահներն ու տեղակալները։ Չորս հանձնաժողովներից երկուսը կղեկավարեն «Բալասանյան դաշինքի» ավագանիները, երկուսը՝ ՔՊ-ականները։ Ըստ այդմ, Գյումրու ավագանու ֆինանսավարկային և տնտեսական հարցերի մշտական հանձնաժողովի նախագահ է ընտրվել «Բալասանյան դաշինք»-ից Լուսինե Սանոյանը, ով քաղաքապետի նախկին տեղակալ Ռուբեն Սանոյանի դուստրն է, ավագանու իրավական հարցերի մշտական հանձնաժողովն էլ կղեկավարի նույն խմբակցությունից Մխիթար Սահակյանը։ Ավագանու մշակույթի, կրթության, սպորտի և սոցիալական հարցերի մշտական հանձնաժողովը կղեկավարի ՔՊ-ական Լիլիթ Մուրադյանը, քաղաքաշինության և հողօգտագործման հարցերի մշտական հանձնաժողովն էլ՝ Հարություն Նիկողոսյանը՝ ՔՊ-ից։ Քաղաքապետ Վարդգես Սամսոնյանը նշել է, որ նորանշանակ տեղակալներից ակնկալում է կառուցողական և ապաքաղաքականացված աշխատանք։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru

 

 

Գյումրու համար ձեռք կբերվի 63 միկրոավտոբուս․ ՀՀ կռավարությունը գումար է հատկացրել

Գյումրու համար ձեռք կբերվի 63 միկրոավտոբուս․ ՀՀ կռավարությունը գումար է հատկացրել ՀՀ կառավարությունն այսօրվա հերթական նիստում շուրջ 462 մլն դրամ է հատկացրել Արագածոտնի, Գեղարքունիքի, Լոռու և Շիրակի մարզերում սուբվենցիոն ծրագրերի համար: «Նախագծով ներկայացվում է համայնքների տնտեսական և սոցիալական ենթակառուցվածքների զարգացմանն ուղղված սուբվենցիոն ծրագրերի շրջանակներում 2021 թ-ին հավանություն ստացած, իրականացված կամ իրականացվող չորս մարզի չորս համայնքի չորս ծրագիր: Առաջարկում ենք պետական բյուջեից հատկացնել 462 միլիոն 256 հազար դրամ: Համայնքներն իրենց մասնաբաժինը կատարել են, հիմա պետական մասնաբաժնի իրականացման հերթն է»,- ասել է ՀՀ տարածքային կառավարման և ենթակառուցվածքների նախարար Գնել Սանոսյանը: «Արագածոտնում մեկ ծրագիր է՝ 5 մլն արժողությամբ, Գեղարքունիքում՝ մեկ ծրագիր՝ 7 մլն արժողությամբ, Լոռու մարզում՝ մեկ ծրագիր՝ 5,2 մլն և Շիրակի մարզում՝ մեկ ծրագիր՝ 441 մլն։ Սա վերաբերում է Գյումրի քաղաքին, և ծրագիրն ընդհանուր առմամբ 887 մլն արժողություն ունի։ Գյումրիում ձեռք է բերվում 63 միկրոավտոբուս, որ ներքաղաքային ամբողջ տրանսպորտային պարկը թարմացնենք։ Միկրոավտոբուսների մի մասը նաև հարմարեցված է հաշմանդամություն ունեցող հայրենակիցների համար համապատասխան հարմարություններով։ Մրցույթի արդյունքում ընդհանուր գումարը 882 միլիոն դրամ է կազմել, որի 50 տոկոսը վճարում է Գյումրիի համայնքապետարանը, մյուս 50 տոկոսը՝ Կառավարությունը»,- հայտնել է ՏԿԵ նախարարը։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru

 

«Անկախ դիտորդի» հայտարարությունը 2021 թ․ նոյեմբերի 14-ի ՏԻՄ ընտրությունների վերաբերյալ

2021 թ. նոյեմբերի 14-ին տեղական ինքնակառավարման մարմինների ընտրություններ անցկացվեցին Կապան, Իջևան, Ստեփանավան, Լերմոնտովո և Արզնի համայնքներում:

«Անկախ դիտորդ» հասարակական դաշինքը հետևեց ընտրությունների ընթացքին նախընտրական քարոզչության ընթացքում և քվեարկության օրը՝ 32 տեղամասերում և 3 Տարածքային ընտրական հանձնաժողովներում: Դիտորդական առաքելությունն իրականացվել է 8 երկարաժամկետ դիտորդների, 88 կարճաժամկետ  դիտորդների, այդ թվում՝ 10 շրջիկ խմբերի, 4 իրավաբանների, 5 տեղեկատվության մուտքագրողների, դիտորդների 5 համակարգողների և  համակարգող թիմի, ինչպես նաև հաղորդակցության թիմի կազմով: 

Համամասնական ընտրակարգով Կապան և Իջևան համայնքներում առաջադրվել էր երկու ուժ, իսկ Ստեփանավան համայնքում՝ 3 ուժ։ Ընտրական օրենսգրքի կարգավորումների համաձայն` եթե ՏԻՄ ընտրություններում անցողիկ շեմը չի հաղթահարում երեք ուժ, ապա առավելագույն քվեներ ստացած երրորդ ուժը ևս մասնակցում է մանդատների բաշխմանը։ Ըստ այդմ, բոլոր երեք համայնքներում առաջադրված կուսակցությունները և դաշինքները ընդգրկված կլինեն ավագանու կազմում:

 

Համայնք Առաջադրված կուսակցություններ Մասնակցություն Արդյունքներ
Ստեփանավան 1.«Բարգավաճ Հայաստան» կուսակցություն

2.«Հայ ազգային կոնգրես» կուսակցություն

3.«Քաղաքացիական պայմանագիր» կուսակցություն

38․30% 3․«Քաղաքացիական պայմանագիր» կուսակցություն – 81%

1․ «Բարգավաճ Հայաստան» կուսակցություն – 14%

2․ «Հայ ազգային կոնգրես» կուսակցություն – 4%

Կապան 1.«Շանթ» դաշինք ազգայնական կուսակցություն

2.«Քաղաքացիական պայմանագիր» կուսակցություն

63.48% 1․ «Շանթ» դաշինք ազգայնական կուսակցություն – 71%

2․«Քաղաքացիական պայմանագիր» կուսակցություն – 29%

Իջևան 1.«Հայ Յեղափոխական դաշնակցություն» կուսակցություն

2.«Քաղաքացիական պայմանագիր» կուսակցություն

37.43% 2․ «Քաղաքացիական պայմանագիր» կուսակցություն -84%

1․«Հայ Յեղափոխական դաշնակցություն» կուսակցություն – 16%

 

Մեթոդաբանություն

 

«Անկախ դիտորդ» դաշինքը 2021 թ․ նոյեմբերի 14-ին տեղի ունեցած տեղական ընտրությունների դիտորդական առաքելության շրջանակներում հոկտեմբերի 23-ից սկսած 8 երկարաժամկետ դիտորդների միջոցով իրականացրել է երկարաժամկետ դիտարկում: Երկարաժամկետ դիտարկման ընթացքում իրականացվել է 33 քարոզչական հանդիպումների դիտարկում, որոնց ընթացքում անցկացվել են հարցազրույցներ հավաքի 44 մասնակիցների հետ: Հարցազրույց է իրականացվել ավագանու 16 թեկնածուների հետ, ինչպես նաև ընտրությունները կազմակերպող Տարածքային ընտրական հանձնաժողովների նախագահների և քարտուղարների, տեղամասային ընտրական հանձնաժողովների 18 նախագահների, քարտուղարների և անդամների հետ։

 

Նախընտրական քարոզչության դիտարկման արդյունքներ

 

Երկարաժամկետ դիտարկումը ցույց է տալիս, որ դիտարկվող երեք համայնքներում նախընտրական քարոզարշավը, համամասնական ընտրակարգով պայմանավորված, ունեցել է կրկնվող հատկանիշներ.

 

– ավագանու կազմում երաշխավորված ընդգրկվելու պայմաններում կուսակցությունները հանդես են եկել իրարից տարբերվող քաղաքական տեսլականներով և չեն ապավինել միայն բարեկամական կամ տնտեսական կապերին,

– չնայած համայնքային այս ընտրություններին նախկին համայնքային իշխանությունների ունեցած ազդեցությանը՝ ընտրողների կարծիքի ձևավորման վրա էական ազդեցություն ունեցան առաջադրված ուժերի քարոզարշավի քաղաքական հիմնական դրույթները:

 

Միևնույն ժամանակ, չնայած երեք համայնքներում տեղական ընտրություններն անցկացվեցին համամասնական ընտրակարգով, որն ակնհայտ նպաստեց ընտրությունների քաղաքական բովանդակության ձևավորմանը, այնուամենայնիվ, ընտրական խախտումներում դրսևորվեցին տեղական գործոնները, և այս պատկերը բնորոշ էր ինչպես կառավարող, այնպես էլ որպես ընդդիմություն ներկայացող քաղաքական ուժերին:

 

Իջևան և Ստեփանավան համայնքներում քարոզարշավը, ընդհանուր առմամբ, պասիվ է ընթացել։ Երկու համայնքներում էլ իշխող ուժի կողմից քարոզարշավին լայնորեն ներգրավված են եղել ՊՈԱԿ-ների, դպրոցների տնօրեններ, սոցիալական ծառայության ղեկավարներ։ Կապան համայնքում նախընտրական քարոզարշավն առավել ակտիվ ու մրցակցային է եղել, որը նախընտրական քարոզչության ժամանակահատվածում արտահայտվել է մրցակիցների կիրառած ոչ բարեկիրթ բառամթերքով։ Այս համայնքում վարչական ռեսուրսների չարաշահման միտումը և դրա վերաբերյալ մեղադրանքները եղել են փոխադարձ։ «Շանթ դաշինք» կուսակցության կողմից ահազանգեր են հնչեցվել նաև իրենց թեկնածուների նկատմամբ ճնշումների վերաբերյալ, որոնք, սակայն, լրացուցիչ դիտարկումներով չեն հիմնավորվել։ Համայնքում ընտրությունների համատեքստը որոշակիորեն պայմանավորված էր նաև անվտանգային բարդ միջավայրով՝ համայնքի բնակավայրերը կապող ուղիները նախորդող ամիսներին մասամբ անցել էին Ադրբեջանի ԶՈՒ տիրապետության տակ, իսկ քվեարկության նախորդ երեկոյան ադրբեջանական ԶՈՒ ստորաբաժանումներ էին հայտնվել Կապան-Ճակատեն հատվածում:

 

Այնուամենայնիվ, ինչպես երկարաժամկետ, այնպես էլ կարճաժամկետ դիտորդության արդյունքները ցույց են տալիս, որ անվտանգության հարցի ազդեցությունը չափազանցեցված է արտաքին հայացքի համար և չէր հանդիսանում քաղաքական ջրբաժան համայնքի ընտրողների համար:

 

Դիտորդական առաքելությունը գտնում է, որ համայնքներում կառավարության  ֆինանսավորմամբ իրականցվող սուբվենցիոն ծրագրերն օգտագործվել են որպես քարոզչական գործիք, քանի որ նման ծրագրերն առավել լայն սկսում են լուսաբանվել  այն համայնքներում, որտեղ տեղի են ունենում տեղական ընտրություններ։ Հանրային հեռուստատեսությամբ լուսաբանման ընթացքում հստակ քարոզչական երանգներով ընդգծվել է իշխող «Քաղաքացիական պայմանագրի» թեկնածուի անմիջական մասնակցությունն այդ ծրագրերում՝ նվազեցնելով ընդդիմադիր ուժերին ներկայացնող տեղական իշխանությունների դերը: Կապանում, սակայն, ընդդիմադիր «Շանթ դաշինքը» ջանք չէր խնայում ընդգծելու, որ սուբվենցիոն ծրագրերով իրականացված աշխատանքները բացառապես իրենց ջանքերի արդյունքն են:

 

Թեև Ընտրական օրենսգրքի փոփոխություններով ընդլայնվել են նախընտրական քարոզչության ընթացքում իրականացվող ծախսերի, այդ թվում՝ նախընտրական շտաբների վարձակալության և քարոզչության իրականացման հետ կապված ծախսերի վերաբերյալ հաշվետվողականության պահանջները, սակայն դրանց իրականացման ապահովումը դեռևս անարդյունավետ է, քանի որ ընտրական քարոզչական շտաբների զգալի մասը պաշտոնապես չի ներկայացվում որպես այդպիսին և տեսանելի չէ օրենքի համար։ Ավելին՝ թե՛ այդ, թե՛ պաշտոնական շտաբների աշխատանքներում, դիտորդների տեղեկություններով, վճարովի հիմունքներով ներգրավված անձինք ներկայացվում են որպես կամավորներ, ինչի միջոցով կուսակցությունները խուսափում են այդ աշխատանքների հետ կապված ծախսերը հայտարարագրելուց։ Նշված երևույթը կրում է համատարած բնույթ։

 

Առավել տարածված խախտումներն են քարոզչական պաստառներին առնչվող խնդիրները՝ պաստառները չսահմանված վայրերում փակցնելը, ինչպես նաև դրանք վնասելը։

 

Դիտարկման ընթացքում արձանագրվել են դեպքեր, երբ առանց անձի կարծիքը հարցնելու նրան ներառել են ընտրական հանձնաժողովների աշխատանքներում և ընտրական ցուցակներում։

 

Նախընտրական քարոզչության ընթացքում Հանրային հեռուստատեսությունը մի շարք փորձեր է կատարել Կապան համայնքի մրցապայքարին մասնակցող թեկնածուների հեռուստաբանավեճի կազմակերպման համար, այդուհանդերձ այդ առաջարկները մերժվել են «Շանթ դաշինքի» կողմից՝ մեկնաբանվելով որպես անկարևոր։

 

Քվեարկության օրն արձանագրված հիմնական խախտումները

 

Կարճաժամկետ առաքելության կողմից 2021 թ․ նոյեմբերի 14-ի առավոտյան 07:00-ից մինչև քվեարկության արդյունքների ավարտը մշտական դիտարկում է իրականացվել վերոնշյալ համայնքներում ձևավորված 99 տեղամասերից 32-ում: Այդ համայնքների տարածքում գործել են դիտորդների 10 շրջիկ խմբեր: Քվեարկության ընթացքում շրջիկ խմբերն այցելել և դիտարկել են 72 տեղամասային կենտրոններ։ Երեկոյան Ժամը 20:00-ից հետո դիտարկվել է նաև վերոնշյալ համայնքների ընտրությունները սպասարկող 3 Տարածքային ընտրական հանձնաժողովների աշխատանքը:

 

Երկարաժամկետ և կարճաժամկետ դիտարկումներն իրականացվել են ընտրական օրենսդրության կարգավորումների կիրառումը գնահատող հարցաշարերի հիման վրա։

 

Քվեարկության օրը 35 տեղամասային ընտրական հանձնաժողովների նիստերի դիտարկման ընթացքում արձանագրվել են առանձին խախտումներ։ Այս փուլի վերաբերյալ «Անկախ դիտորդի» եզրակացություններն ամփոփվել են նոյեմբերի 14-ին հրապարակված՝ ժամը 12-ի և քվեարկության ընթացքի վերաբերյալ՝ ժամը 18։00-ի դրությամբ իրավիճակը ներկայացնող տեղեկանքներում։

 

Քվեարկության ընթացքում դիտարկվող տեղամասերում դիտորդների կողմից արձանագրված հիմնական խախտումները վերաբերել են քվեախցիկից դուրս քվեարկությանը: Մասնավորապես, քվեարկության ընթացքում դիտարկված 32 տեղամասերից 19-ում (60%) արձանագրվել են քվեաթերթիկները քվեախցիկից դուրս ծրարի մեջ դնելու դեպքեր, ինչն էականորեն գերազանցում է մինչ այս դիտարկած ընտրությունների ընթացքում արձանագրված միտումը։ Հարկ է նշել, սակայն, որ դիտորդներն արձանագրել են, որ սա հիմնականում չիմացության հետևանքով տեղի ունեցած խախտում է եղել։ Մեկից ավելի անձանց մուտք քվեախցիկ արձանագրվել է դիտարկված տեղամասերի 25%-ում (8 տեղամաս)։ Նշված բոլոր տեղամասերում արձանագրվել են եզակի դեպքեր, և ըստ դիտարկումների՝ դրանք ևս եղել են չիմացության հետևանք: Միաժամանակ, նախորդ ընտրությունների համեմատ, բավականին ցածր է եղել օգնությամբ ընտրողների թիվը՝ հիմնականում չգերազանցելով 2%-ը:

 

Հարկ է նշել, սակայն, որ թեև ակնհայտ է, որ ընտրողների համար առավել հեշտ է եղել քիչ թեկնածուներ պարունակող քվեաթերթիկներով քվեարկելը, այնուամենայնիվ, ընտրողները կարիք են ունեցել քվեախցիկից դուրս ավելի ազատ քվեարկելու, ինչը կարող է պայմանավորված լինել տեսողության խնդիրներով։ Մինչդեռ տեղամասային ընտրական հանձնաժողովներին չէին տրամադրվել խոշորացույցներ, որոնք կարող էին օգնել ընտրողներին առավել հանգիստ քվեարկել առկա լուսավորության պայմաններում։

 

Դիտարկված տեղամասերից 6-ում քվեասենյակ մուտք գործելու փորձ են կատարել կուսակցությունների երկրորդ կամ ավելի վստահված անձինք։ 3 դեպքում դրանք եղել են «Քաղաքացիական պայմանագիր» կուսակցության, 2 դեպքում «Շանթ դաշինք» կուսակցության և 1 դեպքում «Բարգավաճ Հայաստան» կուսակցության ներկայացուցիչներ։ Վերոնշյալ դեպքերում ներկա գտնվելու իրավունք չունեցող անձինք հեռացվել են նախագահի կողմից՝ հիմնականում դիտորդների միջամտության արդյունքում։

 

Դիտարկված տեղամասերից 4-ի շրջակայքում եղել են քարոզչական պաստառներ, իսկ Իջևան համայնքի 38/29 և 38/11 տեղամասային կենտրոնների մոտակայքում դիտորդներն արձանագրել են, որ համայնքային պաշտոնյաներն ուղղորդում են ընտրողներին։

 

Դիտարկված տեղամասերից 10-ի մոտակայքում՝ դեպի տեղամասային կենտրոն տանող ճանապարհին, նկատվել են մարդկանց կուտակումներ: Գրեթե բոլոր դեպքերում դրանք պարբերական բնույթ են կրել և վերացվել են ոստիկանների միջամտությամբ:

 

Ընտրողների կազմակերպված տեղափոխություն դիտարկվել է միայն Իջևան համայնքի 38/29 տեղամասում, որտեղ կազմակերպվել է մոտակա Կայան բնակավայրի ընտրողների քվեարկությունը։ Այդ ընտրողների տեղափոխության վերաբերյալ ստացված թերի տեղեկատվության համաձայն՝ այն կազմակերպվել էր «Քաղաքացիական պայմանագիր» կուսակցության թեկնածուի կողմից կամ նրան աջակցելու նպատակով։

 

Ինչ վերաբերում է քվեարկության արդյունքների ամփոփման նիստի ժամանակ արձանագրված խախտումներին, ապա դիտարկված 41 տեղամասերում ձայների հաշվարկի գործընթացը հիմնականում ընթացել է առանց խախտումների, սակայն տեղամասերից 2-ում ներկա են գտնվել վկայականը տեսանելի չկրող անձինք՝ վստահված անձինք: Օրվա ընթացքում դիտարկվել են գտնվելու իրավունք չունեցող անձանց՝ քվեարկության սենյակ մուտք գործելու դեպքեր, սակայն բոլորը կանխվել են հանձնաժողովների նախագահների կողմից․ հիմնականում խոսքը գնում է վստահված անձանց և թեկնածուների մասին, իսկ փորձերի կանխման հիմք էր հանդիսանում դիտորդների կողմից խնդրի մասին բարձրաձայնումը:

 

Վիճաբանություն գրանցվել է դիտարկված տեղամասերից ընդամենը 3-ում: Մեկ դեպքում վիճաբանությունը եղել է հանձնաժողովի նախագահի և Yerevan.Today-ի լրագրողների միջև՝ իբրև չհավատարմագրված ԶԼՄ ներկայացուցիչ լինելու պատճառով, մյուսում վիճաբանությունը տեղի է ունեցել ընտրողների՝ դիմակ կրելու պահանջով պայմանավորված, ևս մեկում հանձնաժողովի քարտուղարը վիճաբանության մեջ է մտել միջազգային հասարակական կազմակերպության ներկայացուցիչ հանդիսացող այցելուի հետ՝ ընթացակարգային հարցերի հետ կապված:

 

Քվեարկության օրն առաքելության կողմից ներկայացվել է մեկ դիմում վարչական իրավախախտման փաստն արձանագրելու վերաբերյալ, որն առնչվել է Ստեփանավան համայնքում քարոզչական պաստառներով ավտոմեքենաների կուտակմանը։ Մեքենաներն ուղեկցել են «Կենտրոն» հեռուստաընկերության նկարահանող խմբին, ինչը վկայել է նրանց գործողությունների կազմակերպված քարոզչական բնույթի մասին։

 

Օրվա ընթացքում առաքելության կողմից տարածվել է հայտարարություն Ստեփանավան համայնքում «Քաղաքացիական պայմանագիր» կուսակցության թեկնածուի կողմից հանձնաժողովների անդամների համար սուրճի ընդմիջում կազմակերպելու վերաբերյալ, ինչն առաքելությունը գնահատում է որպես միջամտություն հանձնաժողովի անաչառությանը։

Եզրահանգումներ

2021 թ․ նոյեմբերի 14-ին անցկացված ՏԻՄ ընտրությունները երկրորդն էին, որոնք իրականացվեցին ՏԻՄ փոփոխված ընտրակարգով:

 

Գտնում ենք, որ արձանագրված խախտումները էական ազդեցություն չեն ունեցել ընտրողների կամքի ազատ արտահայտման վրա, արտացոլում են ընտրողների կամքը, և ընտրությունները համապատասխանում են ազատ և արդար ընտրությունների չափանիշներին։

 

Այդուհանդերձ, ընտրական ավանդույթներն էական բարելավման ճանապարհ պետք է անցնեն՝ քաղաքական բանավեճերի խթանման, երկխոսության ձևավորման և հակադիր ուժերի միջև փոխադարձ հարգանքի մթնոլորտի ձևավորման առումով։

 

Ընտրական օրենսդրության փոփոխությունների ամբողջական ազդեցությունը և հետագա անհրաժեշտ բարեփոխումներն ամբողջությամբ հնարավոր կլինի գնահատել դեկտեմբերի 5-ին 38 համայնքում տեղի ունեցող ՏԻՄ ընտրություններից հետո, սակայն արդեն իսկ ակնհայտ է, որ օրենսդրական բացերը կիրառվում են մրցակից կուսակցությունների կողմից, իսկ նոր կարգավորումների կիրառման նկատմամբ դեռևս պատշաճ վերահսկողություն չի իրականացվում։

 

«Անկախ դիտորդ» առաքելություն, ի դեմս՝

 

Հելսինկյան քաղաքացիական ասամբլեայի Վանաձորի գրասենյակի

«Իրազեկ քաղաքացիների միավորման»

«Գյումրու առաջընթաց» ՔՀԶԿ֊ի

«Կանանց իրավունքների տուն» ՀԿ-ի

«Գյումրու ռեստարտ նախաձեռնությունների կենտրոն» ՀԿ-ի

«Ուղղակի ժողովրդավարություն» ՀԿ-ի

«Գորիսի մամուլի ակումբ» ՀԿ-ի

 

Read more https://hcav.am/ind-observer-final-nov-14/

 

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru

 

Գյումրու անօթեւանների համար բնակարանները կկառուցվեն

Գյումրիում 12 բնակարան կկառուցվի տնակում բնակվող անթեւան ընտանիքների համար. անօթեւանության խնդրի լուծման նպատակով ԱՌՔ բարեգործական հիմնադրամն ու Գյումրու համայնքապետարանը նոր ծրագիր են մեկնարկում: Գյումրի Համայնքի նորընտիր ղեկավար Վարդգես Սամսոնյանն այսօր՝ նոյեմբերի 10-ին, ընդունել է «ԱՌՔ» բարեգործական հիմնադրամի հիմնադիր նախագահ Հրաչ Հակոբյանին և հիմնադրամի տնօրեն Հրահատ Ստեփանյանին: Ծրագրի իրականացման համար Գյումրու ավագանին հիմնադրամին անհատույց օգտագործման է հատկացրել հողատարածք՝ կիսակառույց շենքերի հիմքերով։ Շենքը կառուցվելու է Անի թաղամասի սկզբնամասում՝ Մ․Խորենացի փողոցի 46 հասցեում։ Կառուցվող շենքը լինելու է քարաշեն, քառահարկ, ներքին հարդարմամբ։ Ներկայում ընթանում է նախագծանախահաշվային գործընթացը։ Բնակարանները կառուցվելու են՝ ըստ շահառուների պահանջված թվի։ Բնակարանի շահառու կարող է լինել տնակում բնակվող անօթեւան ընտանիքը․ բնակարանների սենյակների թիվը որոշվելու է՝ հաշվի առնելով անօթեւան ընտանիքի պահանջարկը.բնակարանի ծախսերի 50 տոկոսը 10 տարում փակելու է անօթեւան ընտանիքը։ Նախատեսված բնակարանների կառուցման, ներքին հարդարման համար նախատեսվում է ծախսել 240-280 հազար ԱՄՆ դոլար։ Գյումրի համայնքը շենքի կառուցման ընթացքում լուծելու է ենթակառուցվածքների խնդիրները։ Գումարի չափը կախված է բնակելի մակերեսից։ Նախատեսվում է ձեւավորել հանձնաժողով, մշակել ծրագրի շահառուների չափորոշիչները, ծրագրի շահառուների հավաքագրման նպատակով հայտարարություն հրապարակել, ընտրել շահառուներին, ապա նոր կառուցել շենքը։ Շենքի կառուցումը նախատեսվում է հաջորդ տարվանից։ Մեկ բնակարանի ծախսի գումարի 50 տոկոսը տասը տարում փակելու է բնակիչը, որից հետո բնակարանի սեփականատեր է դառնալու։ Բնակչի ներդրած 50 տոկոս գումարով հիմնադրամը շարունակելու է ծրագիրը՝ ընդգրկելով նոր շահառուների։

254077311_2757754554529653_5622184656974504530_n

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru

ՀՀ տարածքային կառավարման և ենթակառուցվածքների նախարար Գնել Սանոսյանը ներկայացրել է Շիրակի մարզպետին

ՀՀ տարածքային կառավարման և ենթակառուցվածքների նախարար Գնել Սանոսյանն ու նախարարի տեղակալ, Շիրակի նախկին մարզպետ Հովհաննես Հարությունյանն այսօր Շիրակի մարզպետարանի աշխատակազմին, համայնքապետերին, հանրապետական գործադիր մարմինների տարածքային կառույցների ղեկավարներին պաշտոնապես ներկայացրել են Շիրակի նորանշանակ մարզպետ Նազելի Բաղդասարյանին: ՀՀ տարածքային կառավարման և ենթակառուցվածքների նախարարը նախ շնորհակալություն է հայտնել նախորդ մարզպետ Հովհաննես Հարությունյանին բարեխիղճ աշխատանքի համար, իսկ նորանշանակ մարզպետին մաղթել հաջողություններ նոր պաշտոնում․ «Պարոն Հարությունյանը շատ բարդ շրջանում ստանձնեց պաշտոնը, հետպատերազմյան այդ ծանր ժամանակահատվածում կարողացավ աշխատել և հիմա ուրախ եմ արձանագրելու, որ աշխատանքը շարունակելու է մեզ հետ։ Տիկին Բաղդասարյան, շնորհավորում եմ Ձեզ չափազանց կարևոր ու պատասխանատու աշխատանքի անցնելու առթիվ։ Շատ ուրախ եմ, որ մարզին քաջածանոթ եք և պատգամավոր աշխատած ժամանակահատվածում էլ բարձրացրել եք մարզին հուզող հիմնախնդիրները։ Հիմա Ձեզ հաջողություններ եմ մաղթում և նոր ձեռքբերումներ»։ Շիրակի մարզպետը շնորհակալություն է հայտնել վստահության և մաղթանքների համար և նշել, որ մեծ պատասխանատվությամբ է ստանձնում նոր պաշտոնը․ «Ինձ համար մեծ պատասխանատվություն է ստանձնել Շիրակի մարզպետի պատվաբեր պաշտոնը։ Ես կարծում եմ, որ յուրաքանչյուր մարդ, որ կստանձնի այս պաշտոնը պետք է կարողանա ըստ արժանվույն ծառայել և այդ ծառայությունը կլինի անկեղծության հենքով և ազնիվ աշխատանքով։ Շնորհակալ եմ պարոն Հարությունյանին այս ամիսների ընթացքում հետևողական և նվիրված աշխատանքի համար, մենք միշտ համագործակցել ենք և լիահույս եմ, որ առաջիկայում էլ կշարունակենք մեր համատեղ աշխատանքը։ Ես գիտակցել եմ, որ գալիս եմ խնդրաշատ մարզ և այդ խնդիրների լուծմանը պետք է միտված լինեն իմ ջանքերը։ Ես վստահեցնում եմ, որ հետևողական աշխատանքով կկարողանամ մարզի բնակչության առջև ներկայանալ։ Միայն նվիրումն ու հետևողական աշխատանքը կբերի մեզ արդյունքների»։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru

Ամանորյա տոներին ոչ աշխատանքային կմնա նաև հունվարի 2-ը. նախագծում է կատարվել

ՀՀ ազգային ժողովի պետաիրավական հարցերի մշտական հանձնաժողովը երկրորդ ընթերցմամբ հավանություն է տվել կառավարության ներկայացրած «ՀՀ տոների եւ հիշատակի օրերի մասին» Հայաստանի Հանրապետության օրենքում փոփոխություններ կատարելու մասին օրենքի նախագծին, որում կատարվել են փոփոխություններ և սահմանվել է, որ ամանորյա տոներին ոչ աշխատանքային օրեր կլինեն դեկտեմբերի 31-ից հունվարի 2-ը ներառյալ և հունվարի 6-ը: Հանձնաժողովի նիստում նախագիծը ներկայացրել էՀՀ էկոնոմիկայի նախարար Վահան Քերոբյանը: Այսպիսով` Ամանորի և Սուրբ Ծննդյան տոներին ոչ աշխատանքային կլինեն դեկտեմբերի 31-ից հունվարի 2-ը ներառյալ, նաև հունվարի 6-ը: «Հայաստան» դաշինքից Աղվան Վարդանյանը հիշեցրել է, որ իրենց խմբակցությունն առաջարկել էր հունվարի 2-ը և 7-ը թողնել ոչ աշխատանքային՝ նշելով, որ նախարարի խոսքում չլսեց որևէ գնահատական, կարծիք: Պատգամավորը նաև հիշեցրել է, որ Մայր Աթոռը ևս առաջարկել էր ոչ աշխատանքային թողնել նաև հունվարի 5-ը և 7-ը: Նա հետաքրքրվեց այս առաջարկի առնչությամբ կառավարության արձագանքով, վերաբերմունքով: Նախարարը վստահեցրել է, որ ընդհանուր դիրքորոշումը ձևավորելիս հաշվի են առնում առաջարկները: Անդրադառնալով Մայր Աթոռի առաջարկներին՝ նախարարն ասել է, որ դա ևս մանրամասն քննարկել են: «Էկոնոմիկայի նախարարությունը նաև շատ կարևորում է պետություն-մասնավոր երկխոսությունը, և նախագիծը քննարկվել է նախարարության ՓՄՁ ենթախորհրդում, բազմաթիվ ասոցիացիաների հետ հանդիպումների ընթացքում: Այնուամենայնիվ, հաշվի առնելով, այն փիլիսոփայությունը, որ դրել ենք այս օրենքի փոփոխության մեջ, որոշում է կայացվել այսպիսի տարբերակով առաջ գնալ»,-ասել է Քերոբյանը՝ հիշեցնելով, որ հանձնաժողովում առաջարկները պետք է քննարկվեն և քվեարկվեն:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru

ՀՀ 7-րդ գումարման Ազգային ժողովի՝ Շիրակի մարզից ընտրված պատգամավորների գործունեության մոնիտորինգ

#Ասուլիս

Գյումրու ավագանու 2020 թ. աշնանային եւ 2021 թվականի գարնանային նստաշրջաններում իրականացված գործունեության ուսումնասիրություն
——————————————-
ՀՀ 7-րդ գումարման Ազգային ժողովի՝ Շիրակի մարզից ընտրված պատգամավորների գործունեության մոնիտորինգ

Ուղիղ հեռարձակում

#parliament #monitoring

ℹ Բանախոսներ՝
➡Հասմիկ Մխիթարյան – Գյումրու առաջընթաց ՔՀԶԿ նախագահ, ծրագրի ղեկավար
➡ Լևոն Բարսեղյան` Ժուռնալիստների «Ասպարեզ» ակումբի նախագահ, Գյումրու ավագանու գործունեության մոնիտորինգի փորձագետ
➡Սեյրան Մարտիրոսյան՝ Ա.Դ. Սախարովի անվան իրավապաշտպան կազմակերպության Շիրակի մարզի ղեկավար, Շիրակի մարզից ընտրված ԱԺ պատգամավորների գործունեության մոնիտորինգի փորձագետ

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru

«Շատ դժվար է օրենսդիր մարմնից տեղափոխվել գործադիր մարմին». Նազելի Բաղդասարյանը նշանակվել է Շիրակի մարզպետ

Կառավարության որոշմամբ՝ «Քաղաքացիական պայմանգիր» խմբակցության՝ արդեն նախկին քարտուղար Նազելի Բաղդասարյանը նշանակվել է Շիրակի մարզպետ: Աշխատանքային առաջին օրը Շիրակի նորանշանակ մարզպետը հանդիպել է ԶԼՄ-ների ներկայացուցիչների հետ և նշել, որ կարևորում է բաց և թափանցիկ աշխատանքը․ «Լրատվամիջոցների կարևորությունն ու դերը միշտ նշանակալից է։ Ձեզանից մեկն եմ եղել, հանգամանքների և իրողությունների բերումով հիմա այլ կարգավիճակ եմ զբաղեցնում, որը ոչ պակաս պատասխանատու է։ Լիահույս եմ, որ մեր համագործակցությունը կլինի արդյունավետ։ Ես պատրաստ եմ բաց ու թափանցիկ աշխատանքի, մարզպետարանի դռները բաց են», -նշել է նա: Շիրակի մարզպետի պաշտոնի ստանձման առաջարկությունը եղել է կառավարությունից։ «Կարծել եմ, որ պետք է պատվով շարունակել այն գործը, որը իմ գործընկերները սկսել են եւ պետք է հնարավորինս կարողանամ կառավարության իրականացրած ծրագրերը, նախանշված այն անելիքները, որոնք կապված են մարզի հետ, արդյունավետ կերպով ներկայացնեմ եւ նպաստեմ դրանց իրագործմանը։ Շիրակի մարզպետի պաշտոնի ստանձնումը պատասխանատու է։ Ընդունելով վարչապետի առաջարկը՝ այս ծանր եւ դժվարին փուլում որոշել եմ վերադառնալ մարզ, գիտակցելով Շիրակի մարզի խնդիների եւ բարդությունների ամբողջ սպեկտրը, հասկանալով, որ բազմաթիվ խնդիրներ կան ծառացած, որոնք պետք է լուծել»,-ասել է նա՝ հավելելով՝ առաջիկայում հայեցողական պաշտոնները կհամալրվեն քաղաքի պիտանի եւ նվիրված մարդկանցով. այս պահին մարզպետարաններում հաստիքների կրճատման գործընթաց չկա։ «Այս պահին ունենք խոշորացման փուլը, որից հետո պարզ կդառնա, թե տարածքային գործադիր մարմիններն ինչպիսի գործառույթ ունեն, կամ ինչպիսի առաքելություն են ստանձնելու։ Այս պահին կրճատումների մասին որեւէ խոսք չի կարող լինել»,- նշել է նա: Նորանշանակ մարզպետը վստահեցրել է, որ աշխատանքում կլինի հոգատար, պատասխանատվության չափը գիտակցելով է ստանձնել պաշտոնը, Շիրակի մարզի հիմնախնդիրներին ու հոգսերին էլ բավականաչափ տեղեկացված է․ «Այս ծանր ու դժվար փուլում խնդիրների ու բարդությունների ամբողջ սպեկտրը գիտակցելով եմ անցել աշխատանքի, հույս ունեմ, որ նվիրումով աշխատանքն ու գիտելիքների համեստ պաշարը, որ ունեմ, կկարողանամ ծառայեցնել հօգուտ Շիրակի մարզի»։ Ըստ Նազելի Բաղդասարյանի, դժվար է օրենսդիր մարմնից տեղափոխվել գործադիր մարմին, եթե Աստծո կամոք հաջողի նաև այս ոլորտում՝ կլինի մարզի բոլոր բնակիչների հաջողությունը, որովհետև ինչ անելու է՝ անելու է մարզի ու երկրի համար։ Շիրակի մարզպետն անդրադարձել է գերիների վերադարձման խնդրին՝ նշելով, որ գործընթացը կրում է շարունակական բնույթ և վստահեցրել, որ ամեն ինչ արվում է խնդրի վերջնական լուծման համար։ Ակտիվ գործընթացներ են տարվում մյուսներին վերադարձնելու համար։ Չեմ թաքցնի՝ պատգամավորի կարգավիճակում լիազորություների ավելի լայն սպեկտոր ունեի, մասնավորապես, խորհրդարանական դիվանագիտությունն օգտագործելով։ Վերջին շրջանում Եվրոպայի խորհրդի խորհրդարանական վեհաժողովում հենց ընդգրկված եմ եղել այս կարեւոր գործառույթը ստանձնելու համար։ ԵԽԽՎ-ի մեր վերջին բանաձեւում պնդել եմ հատուկ գերիների վերադարձի հետ կապված որոշակի դրույթներ, մասնավորապես, առանձնացնելով Խծաբերդի գերիները, իրենց կարգավիճակային հարցը»,- ասել է նա։ Նազելի Բաղդասարյանը հավաստել է, որ հետևողական է լինելու մարզի ազգաբնակչության առջև ծառացած հիմնահարցերի լուծմանը, Շիրակի մարզի զարգացումը լինելու է մարզպետի աշխատանքի առանցքը։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru

ԽԱՉՔԱՐ-ՀՈՒՇԱՂԲՅՈՒՐ` ՆՎԻՐՎԱԾ 44-ՕՐՅԱ ՊԱՏԵՐԱԶՄԻ ՆԱՀԱՏԱԿՆԵՐԻՆ

Տղերքը չկան, նրանք զոհվեցին, որ մենք ապրենք: Արցախյան 44-օրյա պատերազմին զոհված զինծառայողներից 5-ի հիշատակն հավերժացնող խաչքար –հուշաղբյուրը, որը բացվեց ու օծվեց Մուշ թաղամասում, համալրեց այն ուխտատեղիների շարքը, որոնք մշտապես հիշեցնելու են մեր քաջ մարտիկների կատարած սխրագործությունների մասին:

Թալիշի 156 մարտական դիրքի տղաներին նվիրված խաչքարը կանգնեցնել նախաձեռնել է նրանցից մեկի` Դավիթ Համբարյանի հայրը, քաջ գիտակցելով, որ պատմության մեջ իրենց որդիները կմնան որպես հայրենիքի համար ամենաթանկը տված նահատակներ:

Տարբեր քաղաքներում ծնված ու մեծացած ժամկետային զինծառայող տղաներին միավորել էր ծառայության վայրը` Մատաղիսը, մարտական հենակետն ու հանուն հայրենի հողի մղվող պայքարի ոգին:

Հուշապուրակի բացման հանդիսավոր արարողությունը միավորել էր ոչ միայն թաղի բնակիչներին, այլ նաև զոհված զինվորների հարազատներին, այժմ նրանք, անկախ բնակության վայրից, միասին են կիսում իրենց վիշտը:

Իրենց առջև դրված մարտական առաջադրանքը փառքով ու պատվով կատարած այս տղաները  հետմահու պարգևատրվել են «Մարտական ծառայության» մեդալով: Իսկ գյումրեցի Դավիթ Համբարյանը, լինելով մարտական դիրքի ավագ, հետմահու պարգևատրվել  է նաև «Անձնուրաց պաշտպան» մեդալով:

Մամիկոնի ընտանիքը վեց տարի առաջ էր տեղափոխվել ՌԴ բնակության, բայց Դավիթը, մարզական ոլորտում ունենալով բազմաթիվ հաջողություններ, առանց երկմտելու  վերադարձել էր հայրենիք` ծառայության անցնելու նպատակով: Սիրով էր կատարում իր պարտքը, մտադիր էր ծառայությունն ավարտելուց հետո մնալ զինված ուժերում, նշում է հայրը: Ցավոք , Դավիթի  զոհվելուց հետո հայրը երկար ժամանակ չի կարողացել գտնել որդու դին:

Հիմա արդեն հերոս զինվորների  մասին կպատմեն նաև այս նորատունկ ծառերը, որոնք անվանական են և կրում են Թալիշի 156 մարտական դիրքի տղաների անունները:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru

 

 

 

 

Գյումրիում 2022 թվականին խոշոր ծրագրեր են նախատեսված

ԱԺ մշտական հանձնաժողովների համատեղ նիստում 2022-ի բյուջեի նախագծի քննարկման ժամանակ ՀՀ տարածքային կառավարման և ենթակառուցվածքների նախարար Գնել Սանոսյանը թվարկել է այն ծրագրերը, որոնք կիրականացվեն մարզերում 2022 թվականին: 2022 թվականի պետական բյուջեից ՀՀ տարածքային կառավարման և ենթակառուցվածքների նախարարությանը կհատկացվի 335 միլիարդ 257 միլիոն դրամ: «Միայն 209 միլիարդ 594 միլիոնը կապիտալ բնույթի ծախսեր են, 125 միլիարդ 663 միլիոնը՝ ընթացիկ բնույթի»,- հայտարարել է նախարար Գնել Սանոսյանը: Նա նշել է, որ տարածքային կառավարման մասով 8 խոշոր ծրագիր է իրականացվելու, որոնց մեջ ներառված է 131 միլիարդ 40 միլիոն դրամ: Սահմանամերձ համայնքներին պետական աջակցության համար կհատկացվի 1 միլիարդ 155 միլիոն դրամ. նախատեսված է ՀՀ 5 մարզի 23 համայնքի 81 բնակավայրի աջակցություն ցուցաբերել: «Ենթակառուցվածքների զարգացման նպատակով մարզերին սուբվենցիա է տրամադրվելու. նախատեսված է շուրջ 18 միլիարդ դրամ հատկացնել», – ասել է նախարարը: Նրա խոսքով՝ Գյումրիում էլ խոշոր ծրագրեր ունեն. Գյումրու քաղաքային ճանապարհների ծրագրի համար նախատեսված է 2,5 միլիարդ դրամ: Տարածքային կառավարման և ենթակառուցվածքների նախարարի խոսքով՝ խոշոր ծրագիր ունեն նաև Կապան քաղաքում. 750 միլիոն դրամ կհատկացվի 151 բազմաբնակարան շենքում էներգաարդյունավետության ու էներգախնայողության ծրագերի համար, դպրոցների սեյմսիկ անվտանգության մակարդակի բարձրացման ծրագրի համար էլ նախատեսված է հատկացնել 6 միլիարդ 192 միլիոն դրամ. 17 դպրոցի կառուցման, վերակառուցման աշխատանքներ կիրականացվեն:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru