Yearly Archives:2021

Բնակֆոնդի ապահովման նոր ծրագրեր կան. փոխվարչապետ Երկրաշարժի 33-րդ տարելիցի օրը Գյումրի բարձրաստիճան պաշտոնյաները՝ ՀՀ փոխվարչապետ Համբարձում Մաթևոսյանի գլխավորությամբ, դիվանագիտական ու ուժային կառույցների ներկայացուցիչները, հարյուրավոր գյումրեցիներ ծաղիկներ խոնարհեցին անմեղ զոհերի հիշատակը հավերժացնող «Անմեղ զոհերին, բարեգութ սրտերին» հուշակոթողին և մեկ րոպե լռությամբ հարգել նրանց հիշատակը: Այնուհետև Շիրակի թեմի առաջնորդ Միքայել Արքեպիսկոպոս Աջապահյանի ձեռամբ հոգեհանգստի կարգ է մատուցվել անմեղ զոհերի հիշատակին: «Երկրաշարժից 33 տարի անց Գյումրիում դեռ անելիքներ կան»,-լրագրողների հետ զրույցում նշել է նորանշանակ փոխվարչապետ Համբարձում Մաթևոսյանը՝ անդրադառնալով լրագրողների այն հարցին, թե երկրաշարժից 33 տարի անց դարձյալ օրակարգային է Գյումրիում անօթևանության հիմնախնդիրը, ենթակառուցվածքների վերանորոգումը: Նա նշել է, թե վերջին երեք տասնյակ տարիների ընթացքում աղետալի երկրաշարժի հետևանքները դեռ չեն վերանում քաղաքից և առհասարակ աղետի գոտուց, բայց վերջին տարիների ընթացքում քաղաք Գյումրիում, Շիրակի մարզում, Լոռիում իրականացվել են մի շարք ծրագրեր։ Նախատեսված է, որ 2022 թվականին դրանք ունենալու են շարունակական բնույթ: «Շիրակի մարզում այս երեք տարիներ 8 միլիարդ դրամի շրջանակներում իրականացվել են սուբվենցիոն ծրագրեր»,-ասել է փոխվարչապետը: Նա նշել է, որ սուբվենցիոն ծրագրերն իրականացվել են կառավարության համաֆինանսավորմամբ, մոտ 60 տոկոսը՝ բյուջեի հաշվին։ Իսկ կառավարության ուղղակի ֆինանսավորմամբ իրականացվում են փողոցաշինական, ջրագծերի փոփոխման աշխատանքներ, լուսավորության խնդիր է այս պահին լուծվում։ «Պետք է ևս մենք անգամ պարտավորվենք, որ առաջիկա տարիների ընթացքում անելու ենք հնարավորինս, որպեսզի օր առաջ լուծենք Շիրակում՝ հատկապես երկրաշարժի հետևանքով ծառացած խնդիրները»,- հավելել է ՀՀ փոխվարչապետ Համբարձում Մաթևոսյանը՝ վստահեցնելով, որ բնակարանաշինական խնդիրների հետ կապված ծրագրերի մասին ավելի ստույգ կհայտարարվի առաջիկայում՝ ՀՀ կառավարության՝ ՀՀ քաղաքաշինական կոմիտեի հետ նախատեսվող նիստից հետո: «Բնակֆոնդի ապահովման համար նախաձեռնած ծրագրեր կան՝ 2021-2022 թվականներին»,- ընդգծել է փոխվարչապետը։

Հանցավոր 12 ընտրախախտում՝ Շիրակի մարզի ՏԻՄ ընտրություններում. 4-ով նախապատրաստվում են նյութեր ՀՀ գլխավոր դատախազությունը շարունակում է ըստ մարզերի հրապարակել 2021թ. դեկտեմբերի 5-ին հանրապետության մի շարք մարզերում կայացած տեղական ինքնակառավարման մարմինների ընտրություններում առերևույթ ընտրական հանցագործության դեպքերի, դրանց տեսակների, իրավապահ մարմինների կողմից դրանց առթիվ ձեռնարկված միջոցների վերաբերյալ հանրության իրազեկման գործընթացը: «Մասնավորապես, դեկտեմբերի 5-ին Շիրակի մարզի Ախուրյան, Ամասիա, Աշոցք, Արթիկ համայնքներում ևս կայացել են ՏԻՄ ընտրություններ: Վերջիններիս նախընտրական քարոզարշավի շրջանի վերաբերյալ ստացվել է ընտրական բնույթի 4, իսկ բուն քվեարկության օրվա և գործընթացի հետ կապված՝ 8 առերևույթ հանցավոր խախտումների վերաբերյալ հաղորդում, ահազանգ»,- հայտնում են Գլխավոր դատախազությունից: Նշված ընդհանուր 12 հաղորդում-ահազանգերից 4-ը ՀՀ գլխավոր դատախազությունում իրականացվող մշտադիտարկման արդյունքում վեր հանված ԶԼՄ հրապարակումներ են, 3-ը՝ ֆիզիկական անձանց կողմից տրված հաղորդումներ, 5-ը՝ ոստիկանության աշխատակիցների կողմից ստացված օպերատիվ տվյալներ և ներկայացված զեկուցագրեր: Ստացված հաղորդումներից և ահազանգերից 1-ը վերաբերում է ենթադրաբար ընտրակաշառք տալուն, ստանալուն կամ ընտրակաշառքի միջնորդությանը, 3-ը՝ Ախուրյան, Արթիկ խոշորացված համայնքներում առերևույթ ընտրողների ուղղորդման միջոցով առերևույթ ընտրողների ազատ կամքի իրականացմանը խոչընդոտելուն, 1-ը՝ Ախուրյան խոշորացված համայնքում քաղաքացու կողմից ընտրական իրավունքի իրականացմանն առերևույթ խոչընդոտելուն, 1-ը՝ Արթիկ խոշորացված համայնքում քարոզչական պաստառների տեղադրմանը խանգարելու միջոցով քարոզչության անցկացմանը խոչընդոտելուն, 2-ը՝ Ախուրյան խոշորացված համայնքի ընտրություններում ենթադրաբար քվեաթերթիկը կամ ծրարը ընտրատեղամասերից դուրս տանելու հանգամանքներով պայմանավորված առերևույթ քվեարկության գաղտնիությունը խախտելուն, 2-ը՝ Արթիկ խոշորացված համայնքի տարբեր ընտրատեղամասերում առերևույթ կրկնաքվեարկության փորձեր կատարելուն, 1-ը՝ Ամասիա համայնքում ընտրատեղամասերից մեկում լույսերի անջատմամբ պայմանավորված՝ ենթադրաբար քվեարկության արդյունքները կեղծելու փորձին, 1-ը՝ այլ բնույթի: Վերացական և ընդհանրական բնույթի ենթադրյալ ընտրական իրավախախտումների վերաբերյալ 8 հաղորդումների առնչությամբ ՀՀ Ոստիկանության մարզային բաժիններին դատախազության կողմից հանձնարարվել է սկսել անհրաժեշտ ստուգողական գործողություններ: Արդյունքում, դրանցից 3-ը թողնվել են անհետևանք, քանի որ ներկայացված տվյալները ձեռնարկված օպերատիվ-հետախուզական միջոցառումներով չեն հաստատվել, կամ նշվածները չեն համապատասխանել իրականությանը, իսկ 5 ահազանգերի կապակցությամբ ստուգողական գործողությունները շարունակվում են: Իսկ 4 հաղորդում ուղարկվել է նախաքննության մարմին՝ ՀՀ քրեական դատավարության օրենսգրքի 180-181-րդ հոդվածներով սահմանված կարգով նյութեր նախապատրաստելու նպատակով, որոնցով գործընթացը շարունակվում է՝ հանգամանքների պարզման, քրեական գործ հարուցելու հիմքերի ստուգման նպատակով: