Քննարկվեց, բայց օրակարգ չմտավ կառավարությանը դատական հայց ներկայացնելու հարցը
Գյումրու ավագանու հերթական նիստի գլխավոր հարցը վերաբերում էր ՀՀ կառավարությանը դատական հայց ներկայացնելու քաղաքապետարանի նախագծին։ Քաղաքապետ Վարդան Ղուկասյանը տեղեկացրեց, որ մտադիր են մի քանի հայցերով դիմել սահմանադրական դատարան։ Հայցերից մեկով, պահանջ է ներկայացվում կառավարությանը․ գյումրեցիների կողմից պետական բյուջե մուտքագրվող շահութահարկից և եկամտահարկից մասհանումներ արվեն տեղական բյուջե։
Ըստ Ղուկասյանի, փաստացի, պետությունը քաղաքից տանում է շուրջ 90 մլրդ դրամ գումար, սակայն քաղաքին վերադարձնում է դրա աննշան մասը։ Նրա տեղեկացմամբ, տնտեսագետ Հրանտ Բագրատյանի գլխավորությամբ տնտեսագետների հատուկ խումբ է ստեղծվել, ուսումնասիրություններ են արել, համաձայն որոնց՝ Գյումրի քաղաքից տարեկան հավաքագրվում է 85 մլրդ դրամ, բայց քաղաքապետարանին տրվում է ընդամենը 4 մլրդ դրամ դոտացիա։ Ղուկասյանի դիտարկմամբ, մարդիկ դիմում են համայնքապետարաններին, բայց տեղական իշխանությունները ունեցած բյուջեներով չեն կարողանում նույնիսկ նրանց նվազագույն հարցերը լուծել։
Պետական բյուջե մուտքագրվող հարկերից տեղական բյուջե մասհանումներ կատարելու դեպքում, քաղաքապետարանը պատրաստ է գյումրեցի թոշակառուների, բուժաշխատողների, մանկավարժների և այլ կառույցների աշխատակիցների աշխատավարձերը կրկնակի, անգամ եռակի ավելացնել, նաև պարտավորվում է տնակներում բնակվողների օթևանության խնդիրը լուծել տեղական բյուջեի հաշվին։
Հաշվարկների համաձայն, Գյումրու դոտացիան պետք է ոչ թե 4 մլրդ լիներ, այլ 27 մլրդ 500 մլն դրամ։ Ղուկասյանի կարծիքով, սոցիալապես ամենաանապահով խավը Գյումրիում է ապրում, կենտրոնական իշխանությունը բացի ասֆալտից, այլ գործ չի արել քաղաքում։ Չնայած քաղաքապետը կարող էր դատարան դիմել առանց ավագանու քվեարկությանը ներկայացնելու, սակայն հարցը օրակարգ չմտավ։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Եկամուտների հայտարարագրերը նախալրացնելու է ՊԵԿ-ը, չլրացնելու համար քաղաքացին պատասխանատվության չի ենթարկվի
Գործադիրն այսօր հավանություն տվեց եկամուտների հայտարարագրման գործընթացի փոփոխությունների մասին ԱԺ ՔՊ խմբակցության հեղինակած նախագիծը։
Նախագծի հիմնական փոփոխություններով, ինչպես ներկայացրեց ֆինանսների նախարարի տեղակալ Արման Պողոսյանը, նախատեսվում է հայտարարագրերը նախագծելու կամ նախալրացնելու է ՊԵԿ-ը, հայտարարատուներին տրամադրվելու է բավական ժամանակ՝ մուտք գործելու ՊԵԿ համակարգ եւ ստուգելու հայտարարագրի ամբողջականությունն ու ճշտությունը եւ ըստ անհրաժեշտության կատարելու անհրաժեշտ լրացումներ կամ փոփոխություններ։
Ըստ փոխնախարարի՝ եթե չկա փոփոխությունների եւ լրացումների անհրաժեշտություն, ապա հայտարարագրի ներկայացման վերջնաժամկետին, որը սովորական կանոնի համաձայն՝ հաշվետու տարվան հաջորդող տարվա հուլիսի 1-ն է, հայտարարագիրը կհամարվի ներկայացված։
Պողոսյանի խոսքով․«Քանի որ մենք գործնականում չենք ունենալու հայտարարագրի չներկայացման դեպք, նախատեսվում է Վարչական իրավախախտումների վերաբերյալ ՀՀ օրենսգրքից հանել հայտարարագիրը սահմանված ժամկետում չներկայացնելու համար նախատեսված պատասխանատվության միջոցը, որն առաջին դեպքում նախազգուշացում էր, երկրորդ դեպքում՝ տուգանք։ Բայց բոլոր այն հայտարարատուները, որոնք ունեն առողջապահության կամ կրթության գծով սոցիալական ծախսեր հետ ստանալու իրավունք եւ ցանկություն ունեն իրացնել իրենց այդ իրավունքը, պետք է մուտք գործեն էլեկտրոնային կառավարման համակարգ եւ էլեկտրոնային ստորագրությամբ վավերացնեն իրեն համար նախագծված հայտարարագիրը»։
Այս գործընթացում որպեսզի հարկային մարմինը կարողանա հնարավորինս ամբողջական եւ որակյալ տեղեկատվություն զետեղել հայտարարագրի նախագծում, ըստ Պողոսյանի, նախատեսվում է ընդլայնել երրորդ անձանց կողմից հարկային մարմին ներկայացվող տեղեկատվության շրջանակը․«Խոսքն այստեղ կարող է լինել օրինակ բնակչության պետական ռեգիստրի կողմից ներկայացվող տեղեկատվությանը կամ ֆիզիկական անձի սահմանահատման կամ Հայաստանում գտնվելու օրերի քանակի մասին։ Ինչո՞ւ, որովհետեւ միայն ռեզիդենտներն են, որոնք ներկայացնում են հայտարարագիր։ Եվ այստեղ կարիք կա պարզելու, արդյոք նա 183 օր տարվա ընթացքում գտնվել է ՀՀ-ում»։
Նա ասաց, որ նաև նախատեսվում է կառավարությանն իրավասություն վերապահել որոշ եկամտատեսակներ սահմանելու համար, այն եկամտատեսակների, որոնք հայտարարագրման ենթակա չեն լինի կամ եկամտատեսակներ, որոնք հայտարարագրման ենթակա կլինեն որոշակի շեմը գերազանցելու դեպքում միայն․«Ադպիսի եկամուտները կարող են լինել, օրինակ, ներգրավված միջոցները՝ փոխառությունների, վարկերի տեսքով եւ այլն»։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Ազգային անվտանգության ծառայությունը հայտարարություն է տարածել
«Բնակչության շրջանում համացանցային հարթակների թիրախավորմամբ քաղաքացիների համակարգչային տվյալներն առանց օրենքով կամ պայմանագրով կամ իրավաչափ այլ հիմքով նախատեսված թույլտվության մուտքագրելու, փոփոխելու, ոչնչացնելու, ուղեփակելու (մեկուսացնելու) կամ համակարգչի, համակարգչային համակարգի կամ համակարգչային ցանցի աշխատանքի նկատմամբ որևէ այլ եղանակով ներգործելու միջոցով հարձակման դեպքերը վերջին ժամանակահատվածում ստացել են տարածում:
Մասնավորապես բնակչությունից խաբեության կամ վստահությունը չարաշահելու եղանակով հափշտակություն կատարելու, բանկային գաղտնիք կազմող տեղեկություններին ապօրինի տիրանալու, ինչպես նաև տարբեր պետական հաստատությունների աշխատակիցներին, իշխանական կամ ծառայողական լիազորությունները կամ դրանցով պայմանավորված ազդեցությունն ի վնաս պետական կամ ծառայողական շահերի օգտագործելու, իրենց ծառայողական լիազորություններից բխող գործողություն կամ անգործություն կատարելուն հարկադրելու և այդ կերպ տեղեկություններ ստանալու դիտավորությամբ տարբեր պաշտոնատար անձանց անվամբ հերթական բացված տարբեր ինտերնետային հաղորդակցման հավելվածներով (հատկապես WhatsApp հավելվածով) տարվում է տարաբնույթ, իրականությանը չհամապատասխանող գրագրություն։
Նմանօրինակ զեղծարարություններից խուսափելու նպատակով հորդորում ենք դրսևորել զգոնություն։
Նմանատիպ դեպքերը գտնվում են ՀՀ ԱԱԾ մշտադիտարկման տիրույթում, և ենթադրյալ հանցանք կատարած անձանց հայտնաբերելու և օրենքով սահմանված պատասխանատվության ենթարկելու համար իրականացվում են համապատասխան միջոցառումներ»:
Ավելի վաղ ԱՍՀ նախարար Արսեն Թորոսյանը սոցցանցի էջում տեղեկացրել էր իր անվամբ բացված կեղծ օգտահաշվի մասին:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Վերաբացվել է Հայկական կարմիր խաչի ընկերության Գյումրու շուրջօրյա խնամքի կենտրոնը
Կայացել է Հայկական կարմիր խաչի ընկերության Գյումրու շուրջօրյա խնամքի կենտրոնի պաշտոնական բացումը, որին ներկա էին ՀՀ Աշխատանքի և Սոցիալական հարցերի նախարար պարոն Արսեն Թորոսյանը, ՀՀ-ում դիվանագիտական առաքելություն իրականացնող տարբեր երկրների դեսպաններ, Շիրակի ու Լոռու մարզպետները, ԱԺ պատգամավորներ։
2020 թվականից Հայկական Կարմիր խաչի ընկերությունը՝ ՀՀ Կառավարության որոշմամբ ստանձնեց Գյումրու տուն-ինտերնատի կառավարումը։ Ի սկզբանե հուշագրի շրջանակներում ազգային ընկերությունը պարտավորվել էր կատարել մոտ 270 մլն․ դրամ ներդրում, բայց միայն բնաիրային ձեռքբերումների, վերանորոգման, կահավորման աշխատանքների համար կատարել է ավելի քան 600 մլն․ ՀՀ դրամ ներդրում։
ՀՀ Աշխատանքի և Սեցիալական հարցերի նախարար պարոն Թորոսյանն իր ելույթում շնորհակալություն հայտնեց Հայկական Կարմիր խաչի ընկերությանն արդյունավետ գործակցության համար ընդգծելով նաև ՀԿԽԸ գործընկերների կարևորությունը։ ՀԿԽԸ նախագահ Դավիթ Ներսիսյանն էլ անդրադարձավ վերջին տարիների արված աշխատանքներին՝ նշելով, որ կենտրոնում բոլոր փոփոխությունները միտված են շահառուների բարեկցությանն ու ապահովությանը։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Գյումրի համայնքի սեփական եկամուտները կատարվել են 75.3 տոկոսով
Տեղի է ունեցել մարզխորհրդի հերթական նիստը։ Օրակարգային առաջին հարցով քննարկվել են մարզի համայնքների բյուջեների սեփական եկամուտների 2025 թվականի 3-րդ եռամսյակի կատարման ցուցանիշները։ Ֆինանսական վարչության պետ Լիպարիտ Մարտիրոսյանի զեկույցի համաձայն, հոկտեմբերի 1-ի դրությամբ համայնքների բյուջեների սեփական եկամուտները կատարվել են 79,5 տոկոսով, սեփական եկամուտների հավաքագրման ամենացածր ցուցանիշը գրանցվել է Ախուրյան համայնքում` 71.8 տոկոս, Գյումրի համայնքը ևս չի ապահովել մարզի միջին ցուցանիշը, սեփական եկամուտները կատարել է 75.3 տոկոս:
Շիրակի մարզպետը եկամուտների հավաքագրման ցուցանիշը ոչ միայն գոհացուցիչ չի համարել, այլև մտահոգող է որակել՝ նշելով, որ համայնքների ղեկավարները հստակ անելիք ունեն առաջիկա երկուսուկես ամիսը։ Մարզպետը անդրադարձել է նաև քամու հետևանքով վնասներ կրած համայնքների բնակիչներին տրված փոխհատուցումների բաշխմանը և համայնքների ղեկավարներին հանձնարարել ուշադրություն դարձնել համատիրությունների աշխատանքին՝ թերացումները բացառելու և բնակիչների դժգոհություններից զերծ մնալու համար։
Օրակարգային հաջորդ հարցն առնչվել է մարզում իրականացվող կապիտալ շինարարության ծրագրերին։ Քաղաքաշինության, հողաշինության և ենթակառուցվածքների կառավարման վարչության պետի պարտականությունները կատարող Էմիլ Պետրոսյանի ներկայացրած տվյալներով, Հայաստանի տարածքային զարգացման հիմնադրամի պատվիրատվությամբ մարզում իրականացվում են 11 դպրոցների և 2 մանկապարտեզների կառուցման աշխատանքներ՝ ընդհանուր 20 մլրդ 674 մլն 272 հազար դրամ արժեքով։ Հայաստանի տարածքային զարգացման հիմնադրամի պատվիրատվությամբ ավարտին են մոտենում 27 դպրոցների վերանորոգման աշխատանքներ։
Ընդհանուր 6 մլրդ 109 մլն 563 հազար դրամ արժեքով։ ՀՀ Շիրակի մարզպետի աշխատակազմի պատվիրատվությամբ «Մինչև 2026 թվականը կառուցվող, հիմնանորոգվող կամ վերակառուցվող 500 մանկապարտեզներ» ծրագրի շրջանակներում նախատեսվում են իրականացնել Գյումրու «Լապտերիկ», «Արևիկ» և Անի համայնքի Սառնաղբյուրի մանկապարտեզների վերանորոգման աշխատանքները։ «Պարբերաբար խոսվում է համայնքների ֆինանսավորման մասին, մասնավորապես Գյումրու, ես ինքս էլ համաձայն եմ, որ այն գումարները, որոնք Կառավարությունն ու համայնքային բյուջեն հատկացնում են Գյումրուն՝ նրա առջև ծառացած խնդիրների լիարժեք լուծման առումով բավարար չեն, բայց քիչ էլ չեն։
2018-2025 թթ․ 45 մլրդ 700 մլն կապիտալ շինարարություն է իրականացվել Գյումրիում, իսկ ընդհանուր մարզում 75 մլրդ-ից ավել դրամի կապիտալ շինարարություն է իրականացվել, 27 մլրդ 600 մլն-ից ավել էլ սուբվենցիոն ծրագրեր են կյանքի կոչվել։ Բնականաբար այս թվերը խոսում են կրկնակի ու եռակի աճի մասին, բայց այն խնդիրները, որոնք կուտակվել են տասնամյակների ընթացքում մեր համայնքներում, բնականաբար ամբողջական լուծման համար շատ ավելի շատ միջոցներ են պետք»։
Զարգացման ծրագրերի մշակման և իրականացման բաժնի պետ Կարեն Բադիշյանը ներկայացրել է համայնքներում 2025 թվականին նախատեսված տնտեսական և սոցիալական ենթակառուցվածքների զարգացմանն ուղղված սուբվենցիոն ծրագրերի ընթացքի մասին՝ նշելով, որ 2025 թվականին ներկայացվել է 38 ծրագիր 132 ենթածրագրերով, ծրագրերի ընդհանուր արժեքը կազմել է 11 մլրդ 933 մլն 561 հազար դրամ, որից Կառավարության համամասնությունը 53.6 տոկոս է։ Հաստատվել է 18 ծրագիր 80 ենթածրագրերով։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Ուսուցիչների հետ հերթական անգամ քննարկվել են ոլորտային հարցեր
ՀՀ կրթության, գիտության, մշակույթի և սպորտի նախարար Ժաննա Անդրեասյանը հերթական հանդիպումն է ունեցել ուսուցիչների հետ՝ քննարկելու ոլորտային խնդիրները և լսելու նրանց դիտարկումներն ու առաջարկները:
Մանկավարժներն առանձնակի անդրադարձել են տնօրենի, ուսուցչի թափուր տեղի և «Տարվա լավագույնները» մրցույթների կարգերին, վերջինիս հայտերի ներկայացման ընթացքին՝ դրանց շուրջ ներկայացնելով իրենց դիտարկումներն ու հուզող հարցերը:
Մանկավարժներին հետաքրքրել են նաև ավարտական և միասնական քննությունների առաջիկա ձևաչափը և բովանդակությունը: Նախարարի խոսքով՝ դրանք նախատեսվում է փոփոխել միայն բովանդակության առումով՝ համապատասխանեցնելով հանրակրթության նոր չափորոշչի պահանջներին. գործընթացի վերաբերյալ կիրականացվի պատշաճ իրազեկում:
Մանկավարժները դրական են արձագանքել դպրոցական բաժանորդային ծրագրին՝ ընդգծելով, որ դպրոցներն առավելագույնս օգտվում են ծրագրից, և երեխաները բավականաչափ հետաքրքրված են:
Հանդիպման առանցքում էին նաև կամավոր ատեստավորմանը վերաբերող հարցերը: Անդրադարձ է եղել հոգեբանների համար նախատեսված գրականության ցանկին, դրույքաչափին, «Ֆիզկուլտուրա» առարկայի հարցաշարին: Քննարկվել են նաև համայնքային, մարզային մրցաշարերում դպրոցական թիմերին ավելի շատ խրախուսելու հնարավորությունները:
Նախարարը շնորհակալություն է հայտնել մանկավարժներին կատարած աշխատանքի համար և նշել, որ նրանց դիտարկումներն ու առաջարկները մեծապես նպաստում են ոլորտի բարելավմանը և կրթական համակարգի զարգացմանը:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Դատախազության հայցն ընդդեմ ՀՀ մշակույթի նախկին նախարար Հասմիկ Պողոսյանի բավարարվել է. հօգուտ ՀՀ-ի կբռնագանձվի շուրջ 25 միլիոն դրամ
ՀՀ մշակույթի նախկին նախարար Հասմիկ Պողոսյանից հօգուտ ՀՀ-ի կբռնագանձվի ավելի քան 25 մլն դրամ՝ Քոբայրավանք վանական համալիրում վերականգնման աշխատանքներ իրականացնելու նպատակով «Հուշարձանների վերականգնում ծրագրով» 2007 և 2008 թվականին կնքված պայմանագրերի ոչ պատշաճ կատարման համար․ հայտնում են Հակակոռուպցիոն դատարանից։
«Հակակոռուպցիոն դատարանը, թիվ ՀԿԴ/0007/02/22 քաղաքացիական գործի նոր քննության արդյունքում (Վճռաբեկ դատարանը 2024 թվականի նոյեմբերի 27-ի որոշմամբ բավարարել էր Գլխավոր դատախազության բողոքը և բեկանել Վերաքննիչ հակակոռուպցիոն դատարանի 2024 թվականի փետրվարի 29-ի որոշումը՝ գործն ուղարկելով Հակակոռուպցիոն դատարան՝ նոր քննության), 2025 թվականի հոկտեմբերի 7-ի վճռով բավարարել է Գլխավոր դատախազության հայցն ընդդեմ ՀՀ մշակույթի նախկին նախարար Հասմիկ Պողոսյանի. հօգուտ Հայաստանի Հանրապետության կբռնագանձվի 25 միլիոն 252 հազար դրամ՝ որպես պետությանը պատճառված վնաս։
Ըստ գործի փաստական հանգամանքների՝ վնասը պատճառվել է ՀՀ մշակույթի նախկին նախարար Հասմիկ Պողոսյանի և «Գուգարք» ընկերության միջև Քոբայրավանք վանական համալիրում վերականգնման աշխատանքներ իրականացնելու համար «Հուշարձանների վերականգնում ծրագրով» 2007 և 2008 թվականին կնքված պայմանագրերի ոչ պատշաճ կատարման հետևանքով:
Դատարանը հիմնավոր է համարել Հասմիկ Պողոսյանի կողմից երկու պայմանագրերի կապակցությամբ հակաիրավական վարքագծի առկայության վերաբերյալ Դատախազության փաստարկները և բավարարել է հայցը»,- ասված է հաղորդագրությունում։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Արդարադատության նախարարն «Արթիկ» ՔԿՀ-ում ծանոթացել է շենքային նոր վերանորոգված պայմաններին
Արդարադատության նախարար Սրբուհի Գալյանը Շիրակի մարզ կատարած այցի շրջանակներում այցելել է «Արթիկ» քրեակատարողական հիմնարկ։ Նախարարը ծանոթացել է դատապարտյալների պահման պայմաններին, նոր վերանորոգված մարզասենյակին, գրադարանին, հանգստի սենյակին, խցերին։
Նախարարը զրուցել է դատապարտյալների հետ, լսել նրանց մտահոգություններն ու առաջարկները։ Նախարարն այցելել է նաև կարանտինային մասնաշենք, ինչպես նաև ծանոթացել կարճատև և երկարատև տեսակցության սենյակային պայմաններին, մանկական խաղասենյակին։
Արդարադատության նախարարությունը հետամուտ է քրեակատարողական ոլորտի բարեփոխումների լիարժեք իրականացմանը։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Շարունակվում է ԼՂ-ից բռնի տեղահանվածների բնակարանային ապահովման առցանց դիմումների ընդունումը․ ԱՍՀՆ
Ղարաբաղից բռնի տեղահանված ընտանիքների բնակարանային ապահովման պետական աջակցության ծրագրի շրջանակում առցանց դիմումների ընդունման գործընթացը շարունակվում է։
Ծրագրի շրջանակում այս պահի դրությամբ հավաստագիր է ստացել 3020 ընտանիք, որից 1044-ն արդեն իրացրել են հավաստագիրը։ Այդ մասին տեղեկացնում են աշխատանքի և սոցիալակաան հարցերի նախարարությունից։
«Հիշեցնենք, որ միջոցառումն իրականացվում է աջակցության հետևյալ եղանակներից որևէ մեկի ձևով՝
• բնակարանի (կառուցվող շենքից բնակարան գնելու իրավունքի) կամ անհատական բնակելի տան ձեռքբերման հավաստագրի տրամադրում.
• անհատական բնակելի տան կառուցման հավաստագրի տրամադրում,
• գործող հիփոթեքային վարկի մարման աջակցություն։
Ծրագրի շրջանակում աջակցությունը տրվում է ընտանիքի յուրաքանչյուր անդամի՝ 3-5 մլն դրամի շրջանակում։
Դիմումներն ընդունվում են https://housing.socservice.am/ հարթակում»,- նշվում է հաղորդագրությունում:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Շիրակի պարեկները 31-ամյա երիտասարդի մոտ մարիխուանա են հայտնաբերել
Պարեկային ծառայության Շիրակի մարզի գումարտակի 1-ին դասակի ծառայողները հոկտեմբերի 6-ին Շիրակացու փողոցում հայտնաբերել, ապօրինի թմրամիջոց ձեռք բերելու և պահելու կասկածանքով ձերբակալել և Համայնքային ոստիկանության Մուշի բաժին են ներկայացրել Ախուրյան գյուղի 31-ամյա մի բնակչի։ Նրա անձնական խուզարկությամբ հայտնաբերվել է ավելի քան 22 գրամ դեղնականաչավուն զանգվածով փաթեթ։
Երիտասարդը հայտնել է, որ փաթեթում մարիխուանա է, պատրաստել է վայրաճ կանեփի թփերից:
31-ամյա ախուրյանցին և կազմված փաստաթղթերը ներկայացվել են նախաքննական մարմին։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com