ԴԱՀԿ-ն կալանք է դրել Գյումրի համայնքի գույքի վրա

Ս.Բալասանյանի տեղակալ Վաղարշակ Մխիթարյանը երեկ հրավիրած ասուլիսի ընթացքում ներկայացավ հայտարությամբ եւ հայտնեց քաղաքի համար վատ լուրը` ԴԱՀԿ ծառայության Շիրակի մարզային բաժնի կողմից հոկտեմբերի 19-ին կայացվել է 2 որոշում եւ կալանք է դրվել Գյումրի համայնքի գույքի վրա. որոշումներն ուղարկվել են ՀՀ կառավարության առընթեր անշարժ գույքի կադաստրի պետական կոմիտեի Շիրակի տարածքային ստորաբաժանում:

Կալանք դրվելու հիմք է հանդիսացել դատարանի վճիռը. այն է` Գյումրի համայնքից հօգուտ  Տարոն Գասպարյանի բռնագանձել 745 000 ՀՀ դրամ` որպես դատական ծախսերի փոխհատուցում:

Դեռեւս 2009-2011 թթ-ին,  Գյումրու քաղաքապետարանը քաղաքացի Տարոն Գասպարյանի հետ 99 տարի ժամանակով թվով 15 պայմանագրեր էր կնքել Գյումրու Վարդանանց հրապարակի, քաղաքի կենտրոնական եւ այլ փողոցներում կառուցապատման նպատակով տարածքներ տրամադրվելու մասին` ավտոկայանատեղիների կազմակերպելու համար: Նշված պայմանագրերը լուծելու պահանջով Գյումրու քաղաքապետարանը մոտ 1 տարի առաջ քաղհայց էր ներկայացրել Շիրակի մարզի ընդհանուր իրավասության դատարան` պատճառաբանելով, որ նշված պայմանագրերի չլուծելու պայմաններում Գյումրի համայնքի բյուջեն կայանատեղիներից գանձվող գումարներ մուտքագրելու փոխարեն անհատ անձն է այդ հավաքագրված գումարները տնօրինում, սակայն անհատը ընդամենը հողամասերի տարեկան չնչին գումարներ է վճարում համայնքի բյուջե, իսկ ավտոկայանատեղիների կազմակերպման դիմաց հավաքագրված գումարները, որոնք տեղական տուրքեր են, օրենքով սահմանված կարգով, բյուջե չեն մուտքագրվում: Շուրջ մեկ տարի դատական տարբեր ատյաններում այս գործը չարչարկվելուց հետո, դատարանը որոշում է կայացրել հօգուտ քաղաքացի տարոն Գասպարյանի, իսկ ԴԱՀԿ-ն, դատարանի վճռի համաձայն, կալանք է դրել: Քաղաքապետարանի հայտարարության համաձայն` իրենք չեն խուսափում բռնագանձվող 745 000 ՀՀ դրամը մուծելուց եւ տեղեկացնում են, որ ԴԱՀԿ-ի` կալանքի կիրառումը, այս  ծայրահեղ դեպքի գնալը, մեղմ ասած, սխալ է: Քաղաքապետարանը նույն այս գործով շարունակելու է դիմել դատական ատյաններ:

Գյումրու նախկին քաղաքապետ Վարդան Ղուկասյանի ղեկավարման ընթացքում տարաբնույթ կառույցների հետ կնքված պայմանագրերի, համայնքի բյուջե չմուտքագրվող գումարների ծավալներին, դատական տարբեր գործերով պահանջվող միլիոններին եւս անդրադարձան քաղաքապետարանի պաշտոնյաները. այս մասին մեր հրապարակումը կարդացեք առաջիկայում:

Ա.Մկրտչյան asparez.am