Նորություններ

ԵՄ-ն կրկնապատկել է ՀՀ-ին մարդասիրական օգնությունն ու քաղաքացիական պաշտպանության մեխանիզմը. Բորել

ԵՄ-ն կրկնապատկել է մարդասիրական օգնության փաթեթը՝ հասցնելով 10,45 միլիոն եվրոյի, ինչպես նաև Հայաստանի խնդրանքով ակտիվացրել է ԵՄ քաղաքացիական պաշտպանության մեխանիզմը։ Այս մասին ասվում է ԵՄ անվտանգության և արտաքին քաղաքականության հարցերով բարձր ներկայացուցիչ Ժոզեպ Բորելի հայտարարությունում։ «15 միլիոն եվրո բյուջետային աջակցություն կտրամադրվի Հայաստանին՝ սոցիալ-տնտեսական կարիքները հոգալու և սննդամթերքի ու վառելիքի ֆինանսավորման համար: Հետագա գործողություններ են նախապատրաստվում կարճաժամկետ օգնություն տրամադրելու, ինչպես նաև Հայաստանի անվտանգությանն ու դիմադրությանը, ինչպես նաև նրա ժողովրդավարական ինստիտուտների կայունությանն աջակցելու համար, այդ թվում՝ Տնտեսական և ներդրումային ծրագրի շրջանակում»,- ասվում է հայտարարության մեջ։ Նշվում է նաև, որ ԵՄ-ն լիովին հավատարիմ է մնում և շարունակում է ջանքերը՝ աջակցելու Հայաստանի և Ադրբեջանի միջև բանակցությունների անհապաղ վերսկսմանը՝ նկատի ունենալով խաղաղության պայմանագրի կնքումը։ Միաժամանակ, Բորելը հերթական անգամ դատապարտել է սեպտեմբերին Արցախի դեմ Ադրբեջանի ռազմական գործողությունները։ «ԵՄ-ն դատապարտել է 2023 թվականի սեպտեմբերի 19-20-ին Ադրբեջանի ռազմական գործողությունը, որը հանգեցրել է Ղարաբաղի ավելի քան 100,500 հայերի զանգվածային արտագաղթի։ ԵՄ-ի առաջնահերթությունն է՝ երաշխավորել շարունակական մարդասիրական մուտքն ու օգնությունը Լեռնային Ղարաբաղում մնացած և Հայաստանում տեղահանված մարդկանց։ ԵՄ-ն Ադրբեջանին կոչ է արել ապահովել Ղարաբաղի հայերի իրավունքներն ու անվտանգությունը, ներառյալ՝ տեղահանվածների վերադարձի իրավունքը, ինչպես նաև թույլ տալ տեղում իրավիճակի մշտական անկախ մոնիթորինգ՝ ի հավելումն ՄԱԿ-ի առաքելությունների այցերի»,- ասվում է Բորելի հայտարարությունում։

https://www.europarl.europa.eu/doceo/document/E-9-2023-002520-ASW_EN.pdf

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Շիրակի մարզում բնակություն է հաստատել արցախցի 1050 ընտանիք

Շիրակի մարզում նոյեմբերի 15-ի դրությամբ ապաստան է գտել Լեռնային Ղարաբաղից բռնի տեղահանված 4148 քաղաքացի՝ 1050 ընտանիք։ Այսօր տեղի ունեցած մարզխորհրդի հերթական նիստում այս մասին տեղեկացրել է Շիրակի մարզպետի տեղակալ Աննա Մարտիկյանը:
«Այս պահին Շիրակի մարզի հյուրանոցներում և պետական համայնքային տարածքներում հիմնականում այն ընտանիքներն են, որոնք դժվարանում են վարձով բնակարան գտնել և տեղափոխվել, քանի որ ընտանիքի կազմը բաղկացած է 1 կամ 2 անձից և տրամադրված գումարը չի բավարարի տան վարձակալության համար»,-ասել է Աննա Մարտիկյանը։ Նա նաև նշել է, թե կեցության համար հարմարեցված ընդհանուր տարածքներում տեղակայվել են բռնի տեղահանված 67 քաղաքացի։ Փոխմարզպետի տեղեկացմամբ, Շիրակի մարզի դպրոցներում ուսումը շարունակում է 687 աշակերտ, բուհերում՝ 45 ուսանող, որոնցից 38-ը Շիրակի պետական համալսարանում։
Աննա Մարտիկյանն անդրադարձել է նաև արցախցիների աշխատանքի տեղավորմանը։ Նրա տեղեկացմամբ՝ մարզի բուժհաստատություններում աշխատանքի է ընդունվել 5 բուժաշխատող, ևս 2-ը անցնում են փորձաշրջան։ 5 արցախցիներ աշխատանքի են ընդունվել դպրոցներում, 32-ը ցանկություն է հայտնել կրթական հաստատություններում աշխատելու։ «Մարզում այս պահի դրությամբ ժամանակավոր և մշտական աշխատանքի է տեղավորվել Լեռնային Ղարաբաղից բռնի տեղահանված 62 քաղաքացի, ինչպես նաև առաջարկվել են 71 թափուր աշխատատեղեր», -ասել է Մարտիկյանը։ Կառավարության 4 որոշումներով Շիրակի մարզպետի աշխատակազմին հատկացվել է 170 մլն․ դրամ, որից 80 մլն․-ը հյուրանոցային ծառայությունների, 70 մլն․-ը սննդին և 20 մլն․-ը հրատապ օգնություն տրամադրելու նպատակով։ Փոխմարզպետի խոսքով՝ այսօրվա դրությամբ ծախսվել է շուրջ 155 մլն 327 հազար դրամ, որից շուրջ 75 մլն․ 742 հազար դրամը հյուրանոցային ծառայությունների, շուրջ 68 մլն․ 285 հազար դրամը սննդի և շուրջ 11 մլն․ 300 հազար դրամը այլ նպաստների (հրատապ օգնություն տրամադրելու) համար։
Շիրակի մարզպետի աշխատակազմի առողջապահության և սոցիալական ոլորտի հարցերի վարչության կողմից իրականացվել է Լեռնային Ղարաբաղից բռնի տեղահանված 220 ընտանիքի 667 մարդու կարիքների գնահատում: Առանձնացվել են առաջնային կարիքները և դրանց բավարարման համար բռնի տեղահանվածներն ուղղորդվել են պետության կողմից պատվիրակված ծառայություն մատուցող կազմակերպություններ։
Համայնքների բյուջեների սեփական եկամուտների կատարման ընթացքի մասին է զեկուցել ֆինանսական վարչության գլխավոր մասնագետ Արմեն Համբարձումյանը՝ նշելով, որ սեփական եկամուտները կատարվել են 89.7 տոկոսով։
Շիրակի մարզի համայնքներում 2023 թվականի տնտեսական և սոցիալական ենթակառուցվածքների զարգացմանն ուղղված սուբվենցիոն ծրագրերի ընթացքի, ՀՀ կառավարության 2006 թվականի նոյեմբերի 16-ի թիվ 1708-Ն որոշման մեջ կատարված փոփոխությունների և լրացումների մասին է զեկուցել Զարգացման ծրագրերի մշակման և իրականացման բաժնի պետ Կարեն Բադիշյանը։ Ըստ այդմ, ՀՀ տարածքային կառավարման և ենթակառուցվածքների նախարարություն է ներկայացվել տնտեսական և սոցիալական ենթակառուցվածքների զարգացմանն ուղղված 32 սուբվենցիոն ծրագրի ամբողջական փաթեթ՝ 130 ենթածրագրերով, որից հաստատվել է 27 ծրագիր՝ 108 ենթածրագրերով։

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Հայաստանը պաշտոնապես դարձավ Միջազգային Քրեական դատարանին միացած 124-րդ երկիրը

Միավորված ազգերի կազմակերպության Իրավական հարցերի գրասենյակի Պայմանագրային բաժնում տեղի ունեցած արարողության ժամանակ ի պահ է հանձնվել Հայաստանի կողմից Միջազգային քրեական դատարանի Հռոմի ստատուտի վավերացման փաստաթուղթը։ Այս մասին հայտնում է ՄԱԿ-ում ՀՀ մշտական ներկայացուցչությունը։ Կառույցում Հայաստանի մշտական ներկայացուցիչ Մհեր Մարգարյանը վավերացման փաստաթուղթը ներկայացրել է Միավորված ազգերի կազմակերպության Իրավական հարցերի գրասենյակի Պայմանագրի բաժնի տնօրենին՝ որպես Հռոմի կանոնադրության պահապան ի պահ հանձնելու ՄԱԿ-ի Գլխավոր քարտուղարին: «Վավերացման փաստաթուղթն ի պահ հանձնելով, որը նշում է Հռոմի ստատուտին միանալու գործընթացի վերջին քայլը, Հայաստանը դառնում է Միջազգային քրեական դատարանի 124-րդ մասնակից պետությունը», – ասվում է հայտարարության մեջ։ Հիշեցնենք, որ ՀՀ նախագահ Վահագն Խաչատուրյանը հոկտեմբերի 13-ին ստորագրել էր 1998 թվականի հուլիսի 17-ին ստորագրված Միջազգային քրեական դատարանի Հռոմի կանոնադրությունը վավերացնելու և կանոնադրության 12-րդ հոդվածի 3-րդ մասի հիմքով «Հայաստանի Հանրապետության կողմից միջազգային քրեական դատարանի իրավազորությունը հետադարձորեն ճանաչելու մասին» հայտարարություն ընդունելու մասին օրենքը: Ազգային ժողովը հոկտեմբերի 3-ին 60 կողմ, 22 դեմ ձայներով ընդունել էր Միջազգային քրեական դատարանի Կանոնադրությունը վավերացնելու և հետադարձ ուժով իրավազորությունը ճանաչելու մասին հայտարարության օրենքի նախագիծը:

https://un.mfa.am/en/news/2023/11/14/armenia%E2%80%99s-instrument-of-ratification-of-the-icc-rome-statute-deposited-at-the-un/12260

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Հայաստանի ռազմավարական ապագան ԵՄ լիիրավ անդամակցությունն է. հռչակագիր

Բրյուսելում «ԵՄ-Հայաստան հարաբերությունների խորացում. նոր մարտահրավերներ և անսահմանափակ հնարավորություններ» կարգախոսի ներքո օրերս կայացած Հայաստան-Եվրոպա առաջին համաժողովում Հռչակագիր է ընդունել : Հռչակագրի տեքստը ներկայացնում ենք ստորև. «Մենք, «Հայաստանի ռազմավարական ապագան» Հայաստան-Եվրոպա համաժողովի մասնակիցներս Հայաստանի Հանրապետության Եվրոպային ինտեգրվելու հեռանկարը հռչակո՛ւմ ենք ռազմավարական։ Մենք ջատագովելու ենք Եվրամիությանը Հայաստանի համապարփակ ինտեգրմանը, առաջատար նորարարական տեխնոլոգիաների երկուստեք եւ փոխշահավետ փոխանակմանն ու զարգացմանը, տնտեսվարման մշակույթի, փորձի եւ հմտությունների փոխառմանը, եվրոպական շուկաներ Հայաստանի արտադրողների մուտք գործելուն եւ դեպի Հայաստան եվրոպական ներդրումների հոսքի ծավալմանը։ Մենք նաեւ հետամուտ ենք լինելու, որպեսզի Հայաստանի իշխանությունները շարունակեն եվրաինտեգրմանը միտված քաղաքականությունը՝ իրականացնելով մարդու հիմնարար իրավունքների և ազատությունների գերակայության վրա հիմնված ժողովրդավարական բարեփոխումներ։ Ժողովրդավարության, խոսքի ազատության, կոռուպցիայի դեմ պայքարի մասով Հայաստանի ունեցած այսօրվա բարձր ցուցանիշները պետք է համարվեն մեկնակետ։ ՀԸԳՀ-ն (CEPA)-ն անհրաժեշտ է օր առաջ ամբողջապես կիրարկել եւ ձգտել ավելիին՝ ԵՄ ավելի խորը ինտեգրման հաջորդ փուլերին՝ ընդհուպ մինչև ԵՄ անդամությանը։ Այդ առումով առաջնային կարեւորություն ունեն դատաիրավական բարեփոխումները, համապարփակ եւ ամբողջական լյուստրացիան եւ վեթինգը, ինչպես նաեւ արտաքին առեւտրային կապերի դիվերսիֆիկացիան, ինստիտուտների ամբողջական համապատասխանեցումը ժողովրդավարության պահանջներին։ Հայաստանը պետք է ԵՄ-ի հետ օր առաջ կնքի առանց վիզային ռեժիմի մասին համաձայնագիրը, ինչը հնարավորություն կտա նաեւ Հայաստանից Ռուսաստանում արտագնա աշխատող ՀՀ քաղաքացիներին ուղղորդել դեպի ԵՄ։ Անվտանգային ասպարեզում Հայաստանի ուղին եվրատլանտյան ինտեգրումն է, ՆԱՏՕ-ի երկրների, ինչպես նաեւ Հնդկաստանի հետ երկկողմ կամ բազմակողմ անվտանգային եւ ռազմական համապարփակ համագործակցության ծավալումը։ Այդ առումով, մենք ողջունում ենք արդեն հիմնադրված ռազմական եւ անվտանգային համագործակցությունը Ֆրանսիայի, Գերմանիայի, Նիդերլանդների, Լիտվայի, Չեխիայի հետ, ինչպես նաեւ ժողովրդավարական արժեքներ դավանող այլ երկրների հետ, որոնց թվում՝ Հնդկաստանի, Հարավային Կորեայի, Ճապոնիայի եւ այլն։ Մենք քաջ գիտակցում ենք, որ Հայաստանը թիրախավորվել է բռնապետությունների կողմից՝ ժողովրդավարական ճանապարհի իր ընտրության, ազատ եւ ինքնիշխան ապրելու իր կամքի համար։ Սակայն Հայաստանի քաղաքակրթական ապագան ժողովրդավար եւ մարդասիրական արժեքներ դավանող երկրների ընտանիքում է եւ մենք լի ենք վճռականությամբ՝ պայքարել այդ ապագայի համար։ Համաժողովում հավաքվածները հռչակում են իրենց կամքը՝ նպաստելու, որպեսզի Հայաստանի քաղաքական դաշտում գերակշռեն ժողովրդավար, հանուն Հայաստանի ինքնիշխանության պաշտպանության պայքար մղելու կամք ցուցաբերող եւ Ռուսաստանի բռնաճնշումների թոթափմանը ջատագով ուժերը։ Մենք զորակցություն ենք հայտնում Արցախից (Լեռնային Ղարաբաղից) բռնի տեղահանված, հայրենազրկված արցախահայությանը եւ պահանջում ենք Ալիեւի բռնապետական ռեժիմից անհապաղ ապառազմականացնել Արցախը, թույլ տալ այնտեղ ՄԱԿ մանդատ ունեցող խաղաղարար ուժերի եւ միջազգային կազմակերպությունների գրասենյակների տեղակայում, եւ Արցախի հայերի լիարժեք ինքնավարության իրավունքի ճանաչում, որից հետո հնարավոր կդառնա մարդկանց վերադարձը իրենց պատմական բնօրրան։ Մենք դատապարտում ենք Ռուսաստանի ռազմական ներխուժումը Ուկրաինայի ինքնիշխան տարածքներ, պահանջում ենք դադարեցնել ինքնիշխան երկրի դեմ Կրեմլի սանձազերծած պատերազմը եւ դուրս բերել նրա տարածքից օկուպացիոն զորքերը։ Կոչ ենք անում Հայաստանի իշխանություններին՝ միանալ Ղրիմի պլատֆորմին։ Մենք պահանջում ենք Հայաստանի իշխանություններին դուրս բերել Հայաստանը ՀԱՊԿ-ից, ԵԱՏՄ-ից, ԱՊՀ-ից, իսկ Ռուսաստանի հետ հարաբերությունները շարունակել բացառապես երկկողմ ձեւաչափով: Պահանջում ենք նաեւ անզիջում, համարժեք եւ վճռական պայքար տանել Հայաստանի ինքնիշխանության եւ ժողովրդավարության դեմ Կրեմլից եւ կրեմլահպատակ ուժերի կողմից տարվող պրոպագանդիստական արշավը խափանելու նպատակով: Կոչ ենք անում Եվրոպական Միությանը ականջալուր լինել Հյաստան-Եվրոպա համաժողովի մշակած առաջարկություններին, որոնք ամբողջական տեսքով կուղարկվեն Եվրոպական հանձնաժողովի եւ Եվրոպական խորհրդարանի համապատասխան հանձնաժողովներին։ Միաժամանակ կոչ ենք անում Եվրոպական Միությանը՝ հետեւողական եւ պահանջատեր լինել ՀՀ իշխանությունների՝ ԵՄ հետ պարտավորությունների կատարման հարցում: Մենք մտադիր ենք Հայաստան-Եվրոպա համաժողովը դարձնել Հայաստանի եւ Եվրոպայի քաղաքական ուժերի եւ պետական պաշտոնյաների, քաղաքացիական դերակատարների եւ փորձագիտական հանրության հանդիպման եւ երկխոսության մշտական գործող հարթակ։ Ուստիեւ՝ Հայաստանի ռազմավարական ապագան Եվրոպական Միությանը լիիրավ անդամակցությունն է․ Հայաստանի ռազմավարական ապագան եվրատլանտյան անվտանգային համակարգին ինտեգրումն է․ Հայաստանի ռազմավարական ապագան ժողովրդավարության զարգացումն է եւ պաշտպանված մարդու հիմնարար իրավունքները․ Հայաստանի ռազմավարական ապագան քաղաքակիրթ ազգերի ընտանիքին մաս կազմելն է»։ 10 նոյեմբերի 2023թ․, Բրյուսել

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com