Տեսանյութեր

Շիրակում 2 հրշեջ-փրկարարական ջոկատի մասնաշենք է կառուցվում

Տարվա կեսին Գյումրիի թիվ 2 և Ախուրյանի թիվ 53 հրշեջ-փրկարարական ջոկատների շենքերն ամբողջությամբ պատրաստ կլինեն: Շինարարությունն իրականացվում է ԱՄՆ կառավարության ֆինանսավորմամբ: ՀՀ Արտակարգ իրավիճակների նախարար Անդրանիկ Փիլոյանը ծանոթացել է իրականացվող շինարարության ընթացքին՝նոր աշխատանքային տարվա օրակարգում շարունակելով պահել մարզային փրկարարական ջոկատների խնդիրները:Նախարարի վերջին այցերը եղել են Շիրակի, Արագածոտնի, Գեղարքունիքի, Կոտայքի մարզային փրկարարական վարչություններ։ Անդրանիկ Փիլոյանը շրջել է ջոկատներում, Ճգնաժամային կառավարման մարզային կենտրոններում։ Նախարարը ներկա է գտնվել մարտական հաշվարկների կանչի վայր մեկնելու գործընթացին։ Նրան զեկուցվել են առկա խնդիրները. հիմնականում տեխնիկայի համալրման վերաբերյալ հարցեր են բարձրացվել: Նախարարը վստահեցրել է, որ կարճ ժամանակում խնդիրներին լուծումներ կտրվեն: Անդրանիկ Փիլոյանը կարևորել է փրկարարների ֆիզիկական պատրաստվածության մակարդակի բարձրացումը։ Նրա հանձնարարությամբ հաճախակի մարզական ստուգարքներ կանցկացվեն։Նախարարն ընդգծել է՝ պահանջում է, որպեսզի բոլորը պարտականությունները բարեխղճորեն և ազնվորեն կատարեն՝ նպաստելով համակարգի զարգացմանը։

Աղբյուր՝  http://mes.am/hy/news/item/2021/01/18/1532/

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru

Մեկնարկել է ԱԺ 7-րդ գումարման 6-րդ նստաշրջանը

Այսօր մեկնարկել է 7-րդ գումարման Ազգային ժողովի 6-րդ նստաշրջանը։Խորհրդարանում բուռն քննարկման է արժանացել այն հարցը, թե մինչ օրս պատշաճ լուծումտրված չէ գերիների վերադարձի հարցին: Նիստի ընթացքում քննարկվել է նաև «Լուսավոր Հայաստան» խմբակցության ներկայացրած նախագիծը, որի առաջին կետով սահմանվում է, որ Նիկոլ Փաշինյանը պետք է հրաժարական ներկայացնի։ Հաջորդ կետով ԼՀԿ-ն առաջարկում է ապահովել հայ-ռուսական բարձր մակարդակի հարաբերություններ։ Իշխող ուժը դեմ է արտահայտվել նախագծին։ ԼՀ խմբակցության ղեկավար Մարուքյանը ելույթում շեշտել է. «Իշխանությունը դասեր չի քաղել կատարվածից և գնալով ավելի վատն է դառնում»։ Նա 20 րոպե ընդմիջում խնդրեց՝ «Իմ քայլի» հետ բանակցելու համար։ Հենց նիստերի դահլիճում երկու խմբակցությունների պատգամավորները բանավիճել են նախագծի շուրջ։ Ընդմիջումից հետո «Իմ քայլը» խմբակցության ղեկավար Լիլիթ Մակունցը հայտնել է , որ դեմ են քվեարկելու նախագծի՝ ԱԺ նիստերի օրակարգ ներառվելու հարցին։ Քվեարկության արդյունքում նախագիծը չի ընդգրկվել լիագումար նիստերի օրակարգ։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru

Կառավարությունը 2021-ի առաջին նիստն է գումարել

Այսօր կառավարությունը 2021-ի առաջին նիստն է գումարել։Նիստի մեկնարկին վարչապետ Նիկոլ Փաշինյանը գործադիրի անդամներին հաջողություն է մաղթել պարտականությունների կատարման ու երկիրը ճգնաժամից դուրս բերելու գործում։«Մեր առաջին նիստն է, ուզում եմ բոլորիս հաջողություն մաղթել այս դժվար ժամանակաշրջանում որպեսզի մեր պարտականությունները կարողանանք պատշաճ մակարդակով կատարել և երկիրը դուրս բերել ճգնաժամային իրավիճակից։ Սրա համար մեզ պետք է գործադրել առանձնահատուկ ջանքեր և առանձնահատուկ փոխհամագործակցություն և կառավարման նոր որակ բերել մեր երկրին, գործադիր մարմնին», – ասել է Փաշինյանը։ Կառավարության այսօրվա նիստում ՀՀ արդարադատության նախարար Ռուստամ Բադասյանը ներկայացրել է «Հայաստանի Հանրապետության դատական օրենսգիրք» սահմանադրական օրենքում փոփոխություններ և լրացումներ կատարելու մասին» սահմանադրական օրենքի և հարակից օրենքների նախագծերի փաթեթը: Նախարարի խոսքով՝ այս փաթեթով ներդրվում է երկու ենթամասնագիտացում՝ մինչդատական վարույթների նկատմամբ դատական վերահսկողություն իրականացնող մասնագիտացված դատավորների ինստիտուտը և կոռուպցիոն հանցագործությունների քննություն իրականացնող դատավորների մասնագիտացում: «Նախատեսում ենք դատավորների թվակազմի ավելացում, ընդհանուր թվով՝ մինչև 21 դատավորի հաստիք կլինի Առաջին ատյանի դատարանում ու 3 դատավորի հաստիք՝ Վերաքննիչ քրեական դատարանում», – նշել է Բադասյանը: Վարչապետ Նիկոլ Փաշինյանը նշեց, որ դատաիրավական համակարգի բարեփոխումների շատ էական փուլ են մտնում: Նրա խոսքով՝ առաջիկայում նախատեսվում է պարեկային ոստիկանության ձևավորում: «Կալանքի ու ձերբակալության հետ կապված հարցերի վերաբերյալ առանձնացնում ենք դատարանի որոշակի կազմ, որը կքննի միայն մինչդատական վարույթի վերաբերյալ գործերը: Ընդ որում, սա աշխարհում լայնորեն կիրառվող պրակտիկա է», – ասել է Փաշինյանը: Նա նշել է, թե դատավորների ընտրության ու նշանակման նոր պրոցեդուրա է կիրառվելու, որտեղ ամենակարևորը բարեվարքության ստուգումն է, որը շատ լայնորեն քննարկվում է:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru

«Ավետիսյանների ժառանգները պահանջում են վերանորոգել հայրական տունը»

Մեկնարկել է երեք երկրների ղեկավարների հանդիպումը. Պուտինը խոսել է ԼՂ-ում առկա իրավիճակի մասին

Ռուսաստանի Դաշնության մայրաքաղաքում մեկնարկել է Ռուսաստանի, Ադրբեջանի եւ Հայաստանի ղեկավարների հանդիպումը:Հանդիպումն անցկացվում է Կրեմլում, Պուտինի նախաձեռնությամբ։ Փաշինյանն ու Ալիևն այսօր առավոտյան են ժամանել Մոսկվա։ Նոյեմբերի 9-ին ստորագրված եռակողմ հայտարարության իրականացման ընթացքի շուրջ քիչ առաջ ելույթով հանդես է եկել ՌԴ նախագահ Վլադիմիր Պուտինը: Խոսելով Արցախում ստեղծված կայուն վիճակի, Հայաստանի եւ Ադրբեջանի խնդրանքով այնտեղ տեղակայված խաղաղապահների, Ղարաբաղ վերադարձած քաղաքացիների թվի եւ այլնի մասին՝ Պուտինը հայտարարել է. «Եռակողմ համաձայնագիրը հետեւողականորեն իրականացվում է: Մեր համոզմամբ, դա անհրաժեշտ նախադրյալներ է ստեղծում երկարամյա հակամարտության տեւական եւ լիարժեք կարգավորման համար՝ ի շահ ինչպես հայ, այնպես էլ ադրբեջանցի ժողովուրդների»։ՌԴ նախագահը խոսել է նաեւ Արցախում ենթակառուցվածքների վերականգնման, տարածքների ակազաներծման մասին: «Այս պահին իրավիճակը խաղաղ է տարածաշրջանում։ Ռուս խաղաղապահների ուղեկցությամբ արցախցիները վերադառնում են իրենց մշտական բնակության վայր։ Մինչ այսօր 48000 արցախցի է վերադարձել»,–ընդգծեց նա:Նրա խոսքով՝ Ռուսաստանի միջնորդությամբ կատարվել է գերիների եւ զոհվածների մարմինների փոխանակում: Բացի այդ, հաջողությամբ գործում է հումանիտար արձագանքման միջազգային կենտրոնը, որի շրջանակներում լուծվում են բնակավայրերի բնականոն կյանքի հաստատման, ավերված ենթակառուցվածքի վերակառուցման, պատմության, կրոնի եւ մշակույթի հուշարձանների պաշտպանության հետ կապված հրատապ հարցեր:«Կենտրոնի աշխատակիցները զբաղվում են էներգա եւ ջերմամատակարարման վերականգնմամբ։ Ռուսաստանից հակամարտության գոտի է հասցվել ավելի քան 800 տոննա շինանյութ եւ ավելի քան 1,5 մլն տոննա հումանիտար բեռ։ Բնակչությանը տրամադրվում է բժշկական օգնություն։ Ականներից մաքրվել է ավելի քան 479 հա տարածք, ստուգվել է 182 կմ ճանապարհ, 710 շենք եւ շինություն, հայտնաբերվել եւ ոչնչացվել է ավելի քան 22 հազար պայթյունավտանգ առարկա», -ասել է Վլադիմիր Պուտինը: Այնուհետեւ նա առաջարկել է քննարկել Լեռնային Ղարաբաղի հակամարտության կարգավորման առանցքային ուղղությունների վերաբերյալ նոր քայլերը:«Այսօր կարեւոր կլիներ նախ եւ առաջ նախանշել կարգավորման առանցքային ուղղություններով հետագա քայլերը, որոնք նախանշված էին նախորդ տարվա նոյեմբերի 9-ի համատեղ հայտարարության մեջ։ Նկատի ունեմ ռուսական խաղաղապահ զորախմբի գործունեության հետ կապված հարցեր, սահմանագծային գծերի հստակեցում, հումանիտար խնդիրների լուծում, մշակութային ժառանգության օբյեկտների պահպանություն», – ասել է Պուտինը։ՌԴ նախագահը նշեց, որ հատուկ ուշադրության է արժանի տարածաշրջանում տնտեսական, առեւտրային եւ տրանսպորտային կապերի ապաշրջափակման, սահմանների բացման խնդիրը: «Ենթադրվում է, որ այդ հարցերով կզբաղվի հատուկ եռակողմ աշխատանքային խումբը ՝ Ռուսաստանի, Ադրբեջանի եւ Հայաստանի փոխվարչապետների նախագահությամբ»,-ավելացրել է նա:Ավարտելով խոսքը՝ նա հույս է հայտնել, որ բանակցությունները կանցնեն գործնական մթնոլորտում եւ կծառայեն տարածաշրջանում կայուն խաղաղության, անվտանգության եւ սոցիալ-տնտեսական զարգացման ապահովմանը:

Աղբյուր՝  http://www.kremlin.ru/events/president/news/64877

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru

ԱԺ-ն Նաիրա Զոհրաբյանին զրկեց ԱԺ Մարդու իրավունքների մշտական հանձնաժողովի նախագահի պաշտոնից.

Ազգային ժողովում շարունակվում է արտահերթ նիստը. Խորհրդարանը փակ-գաղտնի քվեարկությամբ կողմ է քվեարկել «Բարգավաճ Հայաստան» խմբակցության պատգամավոր Նաիրա Զոհրաբյանին ԱԺ Մարդու իրավունքների և հանրային հարցերի մշտական հանձնաժողովի նախագահի պաշտոնից: Այս մասին ԱԺ արտահերթ նիստում հայտնեց «Իմ քայլը» խմբակցության պատգամավոր Վահագն Հովակիմյանը: Զոհրաբյանի լիազորությունների դադարեցման օգտին կողմ է քվեարկել 78, դեմ` 4 պատգամավոր:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru

Մեկնարկել է ԱԺ արտահերթ նստաշրջանը

Ազգային ժողովում մեկնարկել է արտահերթ նստաշրջանը:Ի թիվս այլ հարցերի Ազգային ժողովը քննարկում է նաև «Հայաստանի Հանրապետության պաշտպանության ժամանակ զինծառայողների կյանքին կամ առողջությանը պատճառված վնասների հատուցման մասին» Հայաստանի Հանրապետության օրենքում լրացումներ և փոփոխություններ կատարելու մասին, Հայաստանի Հանրապետության քաղաքացիական օրենսգրքում լրացում և փոփոխություն կատարելու մասին, «Կոռուպցիայի կանխարգելման հանձնաժողովի մասին» Հայաստանի Հանրապետության օրենքում լրացումներ և փոփոխություններ կատարելու մասին օրենքների նախագծերն ու փաթեթները: Ազգային ժողովի օրակարգում է նաև ԲՀԿ-ական պատգամավոր Նաիրա Զոհրաբյանին Մարդու իրավունքների պաշտպանության և հանրային հարցերի մշտական հանձնաժողովի նախագահի պաշտոնից ազատելու հարցը:Նախաձեռնությունն Ազգային ժողովի «Իմ քայլը» խմբակցության պատգամավորներինն է։ Որպես հիմնավորում, «Իմ քայլի» նախագծում նշված է, որ նման բառապաշարով հանդես եկող անձը չի կարող կատարել Մարդու իրավունքների պաշտպանության և հանրային հարցերի մշտական հանձնաժողովի նախագահի պարտականությունները։ Իմքայլականները մասնավորապես մեջբերում են Նաիրա Զոհրաբյանի՝ օրերս ֆեյսբուքում կատարած հետևյալ գրառումը․ – «Ես ժեխին հայրենիք չեմ տալու։ Ժեխն իմ երկրում այլևս ոչինչ չի որոշելու: Ու եթե պետք լինի, այո, մինչև կրթական որոշակի ցենզի հասնելը, ժեխին պիտի զրկել որևէ կարգի որոշում կայացնելու և առաջին հերթին՝ ընտրելու իրավունքից: Ու բռնի ուժով տանել կրթելու: Սա այլևս տեսակի կռիվ է՝ ժողովրդի ու ժեխի կռիվ. Ո՞ր տեսակը կհաղթի՝ էնպիսի պետություն էլ կունենանք»։ Նաիրա Զոհրաբյանը չի ընդունում մեղադրանքներն՝ ընդդծելով՝ սա քաղաքական հետապնդում է անձամբ Նիկոլ Փաշինյանի կողմից։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru

Նախագահ Արմեն Սարգսյանն այցելել է Գյումրի

Հայաստանի Հանրապետության նախագահ Արմեն Սարգսյանն աշխատանքային այց է կատարել Գյումրի: Այս մասին տեղեկացնում է ՀՀ նախագահի աշխատակազմի հասարակայնության հետ կապերի վարչությունից: Հայ առաքելական եկեղեցու Շիրակի թեմի առաջնորդարանում նախագահ Սարգսյանը հանդիպել է թեմի առաջնորդ Գերաշնորհ Տ. Միքայել արքեպիսկոպոս Աջապահյանի հետ:Հանրապետության նախագահը և Շիրակի թեմի առաջնորդն անդրադարձել են պատերազմի ընթացքում մեր կրած ցավալի կորուստներին և երկրում ստեղծված ճգնաժամային իրավիճակին՝ համակարծիք լինելով, որ, որպես ժողովուրդ և պետություն, մենք այլ ընտրություն չունենք, քան միասնական ուժերով ոտքի կանգնելը:Նշելով, որ իրավիճակը շարունակում է մնալ ծանր՝ զրուցակիցներն իրենց մտահոգությունն ու անհանգստությունն են հայտնել երկրի առջև ծառացած լրջագույն ու բազմաբնույթ մարտահրավերների ու խնդիրների առնչությամբ, անդրադարձել դրանց հաղթահարման ուղիներին:Նրանք հատկապես կարևորել են պետության սահմանների ու սահմանամերձ համայնքների անվտանգությունն ու պաշտպանությունը, գերիների, պատանդների վերադարձի և անհայտ կորածների հայտնաբերման հետ կապված խնդիրների լուծումը:Հանրապետության նախագահը Շիրակի թեմի առաջնորդի ուղեկցությամբ այցելել է Գյումրիի Սուրբ Ամենափրկիչ եկեղեցի։Նախագահ Սարգսյանը հանդիպումներ է ունեցել նաև Շիրակի մարզպետ Տիգրան Պետրոսյանի և Գյումրիի քաղաքապետ Սամվել Բալասանյանի հետ:

Աղբյուր՝  https://www.president.am/hy/press-release/item/2020/12/25/President-Armen-Sarkissian-visited-Gyumri/

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru

Հայտարարվում է ՀՀ ԶՈՒ պահեստազորի բժիշկ-մասնագետների պարտադիր զինծառայության զորակոչ. ՀՀ կառավարության նիստը

Կառավարությունը հավանություն է տվել որոշման նախագծին, որով չեղարկվում են Ադրբեջանի կողմից սանձազերծված ռազմական գործողությունների հետևանքով ՀՀ և Արցախի քաղաքացիների կողմից սեպտեմբերի 27-ից մինչեւ դեկտեմբերի 27-ը Ճանապարհային երթևեկության անվտանգության բնագավառի օրենսդրության մի շարք հոդվածների խախտումների համար սահմանված վարչական տույժերը: Փոխոստիկանապետ Արա Ֆիդանյանը նշեց, որ առաջարկվում է 2 կարգավորում: «Առաջինը մի շարք խախտումների համար կիրառված վարչական տույժերի համաներման մասին օրենքի ընդունումն է, որի նախագիծն արդեն պատրաստ է: Երկրորդ կարգավորումն այն է, որ Վարչական իրավախախտումների մասին օրենսգրքում արդեն իսկ առկա հոդված 17-ով կարգավորվող ծայրահեղ անհրաժեշտությամբ պայմանավորված կիրառումն է: Դրա դրույթները կարող ենք կիրառել այս դեպքում: Այս երկու տարբերակներից որն էլ կիրառելի լինի, պատրաստ ենք դրա կատարմանը»,- ասել է նա: Կառավարությունը հավանություն է տվել նաև Քաղաքացիական օրենսգրքում և Հայաստանի Հանրապետության պաշտպանության ժամանակ զինծառայողի կյանքին ու առողջությանը պատճառված վնասի հատուցման մասին օրենքում փոփոխությունների փաթեթին: Արդարադատության նախարար Ռուստամ Բադասյանը նշել է, որ փոփոխությունները հնարավորություն կտան մարտական գործողություններին մասնակցած մեր հայրենակիցներին հատուցում ստանալ Զինծառայողների ապահովագրության հիմնադրամից: «Մասնավորապես, կարգավորել ենք հետևյալը. հիմա անհայտ բացակայող ճանաչելու համար պետք է, որ մեկ տարի անձի գտնվելու վայրի մասին տեղեկություններ չլինեն: Մենք բացառություն կամ հատուկ կարգավորում ենք սահմանում զինծառայողների համար ռազմական գործողություններով պայմանավորված ու այդ ժամկետը կրճատում ենք դարձնելով երեք ամիս: Այն տարածվելու է սեպտեմբերի 27-ից հետո ծագած հարաբերությունների վրա: Սա նշանակում է, որ ընտանիքի անդամները կարող են դիմել դատարան անձին անհայտ բացակայող ճանաչելու համար, եւ դատական ակտը օրինական ուժի մեջ մտնելուց հետո դիմել հիմնադրամ անհայտ բացակայող ճանաչելու փաստի հիման վրա հատուցում ստանալու նպատակով»,- ասել է նախարարը: 2020 թվականի դեկտեմբերի 25-ից մինչև 2021 թվականի հունվարի 20-ը ներառյալ կհայտարարվի Հայաստանի Հանրապետության զինված ուժերի պահեստազորի սպայական կազմում հաշվառված՝ մինչև 35 տարեկան արական սեռի բժիշկ-մասնագետների պարտադիր զինվորական ծառայության զորակոչ՝ ծառայության ժամկետը սահմանելով երկու տարի. որոշումն ընդունվեց կառավարության նիստում:Որոշմամբ կսահմանվի պահեստազորի սպայական կազմի զորակոչի ենթակա անձանց թվաքանակը՝ մինչև 70 բժիշկ-մասնագետ:Պահեստազորի սպայական կազմի զորակոչի շրջանակներում մինչև 2020 թվականի դեկտեմբերի 31-ը ներառյալ կզորացրվեն «Զինվորական ծառայության և զինծառայողի կարգավիճակի մասին» օրենքով սահմանված ժամկետում պահեստազորի սպայական կազմի պարտադիր զինվորական ծառայություն անցած զինծառայողները:Հայաստանի Հանրապետության պաշտպանության նախարարն օրենքի 19-րդ հոդվածի 6-րդ մասի համաձայն սույն որոշումն ուժի մեջ մտնելուց հետո յոթնօրյա ժամկետում կընդունի պահեստազորի սպայական կազմի բժիշկ-մասնագետների պարտադիր զինվորական ծառայության 2020 թվականի զորակոչի անցկացման և օրենքով սահմանված ժամկետում պահեստազորի սպայական կազմի պարտադիր զինվորական ծառայություն անցած զինծառայողներին զինվորական ծառայությունից արձակելու մասին հրաման:Պահեստազորի սպայական կազմի զորակոչից խուսափող քաղաքացիների տվյալները կուղարկվեն Հայաստանի Հանրապետության ոստիկանության համապատասխան կառուցվածքային ստորաբաժանումներ, իսկ զորակոչի ավարտից հետո` նրանց վերաբերյալ կազմված նյութերը Հայաստանի Հանրապետության քննչական կոմիտեի զինվորական քննչական գլխավոր վարչության համապատասխան կայազորային քննչական բաժիններ:Առաջարկվել է Հայաստանի Հանրապետության գլխավոր դատախազին շարունակել պահեստազորի սպայական կազմի զորակոչից խուսափող քաղաքացիների նկատմամբ օրենքով սահմանված կարգով քրեական հետապնդում հարուցելու, ինչպես նաև այդ բնույթի գործերով մինչդատական քրեական վարույթի օրինականության նկատմամբ հսկողություն իրականացնելու ուղղությամբ աշխատանքների կազմակերպումը:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru