Կառավարությունը 2021-ի առաջին նիստն է գումարել
Այսօր կառավարությունը 2021-ի առաջին նիստն է գումարել։Նիստի մեկնարկին վարչապետ Նիկոլ Փաշինյանը գործադիրի անդամներին հաջողություն է մաղթել պարտականությունների կատարման ու երկիրը ճգնաժամից դուրս բերելու գործում։«Մեր առաջին նիստն է, ուզում եմ բոլորիս հաջողություն մաղթել այս դժվար ժամանակաշրջանում որպեսզի մեր պարտականությունները կարողանանք պատշաճ մակարդակով կատարել և երկիրը դուրս բերել ճգնաժամային իրավիճակից։ Սրա համար մեզ պետք է գործադրել առանձնահատուկ ջանքեր և առանձնահատուկ փոխհամագործակցություն և կառավարման նոր որակ բերել մեր երկրին, գործադիր մարմնին», – ասել է Փաշինյանը։ Կառավարության այսօրվա նիստում ՀՀ արդարադատության նախարար Ռուստամ Բադասյանը ներկայացրել է «Հայաստանի Հանրապետության դատական օրենսգիրք» սահմանադրական օրենքում փոփոխություններ և լրացումներ կատարելու մասին» սահմանադրական օրենքի և հարակից օրենքների նախագծերի փաթեթը: Նախարարի խոսքով՝ այս փաթեթով ներդրվում է երկու ենթամասնագիտացում՝ մինչդատական վարույթների նկատմամբ դատական վերահսկողություն իրականացնող մասնագիտացված դատավորների ինստիտուտը և կոռուպցիոն հանցագործությունների քննություն իրականացնող դատավորների մասնագիտացում: «Նախատեսում ենք դատավորների թվակազմի ավելացում, ընդհանուր թվով՝ մինչև 21 դատավորի հաստիք կլինի Առաջին ատյանի դատարանում ու 3 դատավորի հաստիք՝ Վերաքննիչ քրեական դատարանում», – նշել է Բադասյանը: Վարչապետ Նիկոլ Փաշինյանը նշեց, որ դատաիրավական համակարգի բարեփոխումների շատ էական փուլ են մտնում: Նրա խոսքով՝ առաջիկայում նախատեսվում է պարեկային ոստիկանության ձևավորում: «Կալանքի ու ձերբակալության հետ կապված հարցերի վերաբերյալ առանձնացնում ենք դատարանի որոշակի կազմ, որը կքննի միայն մինչդատական վարույթի վերաբերյալ գործերը: Ընդ որում, սա աշխարհում լայնորեն կիրառվող պրակտիկա է», – ասել է Փաշինյանը: Նա նշել է, թե դատավորների ընտրության ու նշանակման նոր պրոցեդուրա է կիրառվելու, որտեղ ամենակարևորը բարեվարքության ստուգումն է, որը շատ լայնորեն քննարկվում է:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru
«Ավետիսյանների ժառանգները պահանջում են վերանորոգել հայրական տունը»
Գյումրեցի Ավետիսյանների 7 հոգանոց ընտանիքի սպանությունից 6 տարի է անցել: Կորստյան վիշտն ու ցավը դեռ չեն ամոքվել: Հարազատներից զրկված քույրերն ամեն տարի նույն այսօրը գալիս են հայրական տուն, բացում լքված ու ավերված կառույցի դռներն ու կրկին վերապրում նույն սարսափելի մղձավանջը:
Ավետիսյանների դուստրերը շարունակում են պնդել, որ մինչ օրս սպանության գործը լիարժեք բացահայտված չէ: Հարազատներն այսօր էլ դեպքը որակում են, որպես առեղծվածային սպանություն:
Ինչուների շարքը դեռ երկար կտանջի ռուս զինվորականի ձեռքով սպանված Ավետիսյանների հարազատներին, բայց վերջիններս չեն դադարում հավատալ, որ մի օր իսկապես կբացահայտվի ճշմարտությունը:
Իրավահաջորդները Եվրոդատարան 4 տարի առաջ դիմել են, սակայն մինչ օրս ոչ մի պատասխան դեռ չեն ստացել, անգամ վստահ չեն, որ գործը վարույթ է ընդունվել, ուստի մտադիր են միջոցներ գտնելու դեպքում բոլոր փաստաթղթերն ապացույցների հետ անձամբ հասցնել եվրոպա:
Գյումրիում ռուսական ռազմաբազայում ընթացած դատավարությունն ըստ էության չտվեց այս հարցերի պատասխանը, կարծում են հարազատները, հետևաբար ցանկություն ունեն գործը կրկին վերաբացել:
Ճշմարտությունը բացահայտելուց բացի, Ավետիսյան քույրերը մեկ այլ պահանջ էլ ունեն
Տարիների ընթացքում տունը քայքայվել է, շարքից դուրս է եկել տանիքը, փտել են հատակի տախտակները, ինչը հնարավորություն չի տալիս անգամ ներս մտնել: խնդիրը կարգավորելու համար աղջիկները բազմից են դիմել տարբեր ատյաններին:
Քանի դեռ դեպքը թարմ էր, մեզ քչից շատից հիշում էին, վրդովված հայտարարում են Ավետիսյանների ժառանգները, բայց հիմա իրենց անտեսված են զգում:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru
Մեկնարկել է երեք երկրների ղեկավարների հանդիպումը. Պուտինը խոսել է ԼՂ-ում առկա իրավիճակի մասին
Ռուսաստանի Դաշնության մայրաքաղաքում մեկնարկել է Ռուսաստանի, Ադրբեջանի եւ Հայաստանի ղեկավարների հանդիպումը:Հանդիպումն անցկացվում է Կրեմլում, Պուտինի նախաձեռնությամբ։ Փաշինյանն ու Ալիևն այսօր առավոտյան են ժամանել Մոսկվա։ Նոյեմբերի 9-ին ստորագրված եռակողմ հայտարարության իրականացման ընթացքի շուրջ քիչ առաջ ելույթով հանդես է եկել ՌԴ նախագահ Վլադիմիր Պուտինը: Խոսելով Արցախում ստեղծված կայուն վիճակի, Հայաստանի եւ Ադրբեջանի խնդրանքով այնտեղ տեղակայված խաղաղապահների, Ղարաբաղ վերադարձած քաղաքացիների թվի եւ այլնի մասին՝ Պուտինը հայտարարել է. «Եռակողմ համաձայնագիրը հետեւողականորեն իրականացվում է: Մեր համոզմամբ, դա անհրաժեշտ նախադրյալներ է ստեղծում երկարամյա հակամարտության տեւական եւ լիարժեք կարգավորման համար՝ ի շահ ինչպես հայ, այնպես էլ ադրբեջանցի ժողովուրդների»։ՌԴ նախագահը խոսել է նաեւ Արցախում ենթակառուցվածքների վերականգնման, տարածքների ակազաներծման մասին: «Այս պահին իրավիճակը խաղաղ է տարածաշրջանում։ Ռուս խաղաղապահների ուղեկցությամբ արցախցիները վերադառնում են իրենց մշտական բնակության վայր։ Մինչ այսօր 48000 արցախցի է վերադարձել»,–ընդգծեց նա:Նրա խոսքով՝ Ռուսաստանի միջնորդությամբ կատարվել է գերիների եւ զոհվածների մարմինների փոխանակում: Բացի այդ, հաջողությամբ գործում է հումանիտար արձագանքման միջազգային կենտրոնը, որի շրջանակներում լուծվում են բնակավայրերի բնականոն կյանքի հաստատման, ավերված ենթակառուցվածքի վերակառուցման, պատմության, կրոնի եւ մշակույթի հուշարձանների պաշտպանության հետ կապված հրատապ հարցեր:«Կենտրոնի աշխատակիցները զբաղվում են էներգա եւ ջերմամատակարարման վերականգնմամբ։ Ռուսաստանից հակամարտության գոտի է հասցվել ավելի քան 800 տոննա շինանյութ եւ ավելի քան 1,5 մլն տոննա հումանիտար բեռ։ Բնակչությանը տրամադրվում է բժշկական օգնություն։ Ականներից մաքրվել է ավելի քան 479 հա տարածք, ստուգվել է 182 կմ ճանապարհ, 710 շենք եւ շինություն, հայտնաբերվել եւ ոչնչացվել է ավելի քան 22 հազար պայթյունավտանգ առարկա», -ասել է Վլադիմիր Պուտինը: Այնուհետեւ նա առաջարկել է քննարկել Լեռնային Ղարաբաղի հակամարտության կարգավորման առանցքային ուղղությունների վերաբերյալ նոր քայլերը:«Այսօր կարեւոր կլիներ նախ եւ առաջ նախանշել կարգավորման առանցքային ուղղություններով հետագա քայլերը, որոնք նախանշված էին նախորդ տարվա նոյեմբերի 9-ի համատեղ հայտարարության մեջ։ Նկատի ունեմ ռուսական խաղաղապահ զորախմբի գործունեության հետ կապված հարցեր, սահմանագծային գծերի հստակեցում, հումանիտար խնդիրների լուծում, մշակութային ժառանգության օբյեկտների պահպանություն», – ասել է Պուտինը։ՌԴ նախագահը նշեց, որ հատուկ ուշադրության է արժանի տարածաշրջանում տնտեսական, առեւտրային եւ տրանսպորտային կապերի ապաշրջափակման, սահմանների բացման խնդիրը: «Ենթադրվում է, որ այդ հարցերով կզբաղվի հատուկ եռակողմ աշխատանքային խումբը ՝ Ռուսաստանի, Ադրբեջանի եւ Հայաստանի փոխվարչապետների նախագահությամբ»,-ավելացրել է նա:Ավարտելով խոսքը՝ նա հույս է հայտնել, որ բանակցությունները կանցնեն գործնական մթնոլորտում եւ կծառայեն տարածաշրջանում կայուն խաղաղության, անվտանգության եւ սոցիալ-տնտեսական զարգացման ապահովմանը:
Աղբյուր՝ http://www.kremlin.ru/events/president/news/64877
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru
