Լրահոս

Քննարկվել են բյուջետային հատկացումները ԱԳՆ-ի եւ միջազգային կազմակերպություններին անդամակցելու վճարումների մասով

Ազգային ժողովի արտաքին հարաբերությունների ու ֆինանսավարկային եւ բյուջետային հարցերի մշտական հանձնաժողովների համատեղ նիստում նոյեմբերի 5-ին Ռուբեն Ռուբինյանի եւ Արկադի Խաչատրյանի նախագահությամբ քննարկվել են «ՀՀ 2021թ. պետական բյուջեի մասին» ՀՀ օրենքի նախագծում նախատեսված եկամուտները եւ ծախսերը` արտաքին գործերի նախարարության, միջազգային կազմակերպություններին անդամակցելու վճարումների մասով:ՀՀ արտաքին գործերի նախարար Զոհրաբ Մնացականյանն անդրադարձել է կոնկրետ ծրագրերին, նախատեսված հատկացումների նպատակային օգտագործմանը: 2020-2021 թթ. համար հիմնական ուղղություններն ու գերակայություններն են՝ գլոբալ եւ տարածաշրջանային անվտանգություն, Հայաստանի բարեփոխումների, տնտեսական եւ ենթակառուցվածքային զարգացման աջակցություն, պատմության եւ արտերկրում Հայաստանի կերպարի ներկայացում: Նախարարի համոզմամբ՝ այս երկու տարիներին շարունակվել եւ շարունակվում է բարեփոխումների գործընթացը, որի նպատակը մասնագիտական եւ պրոֆեսիոնալ կարողությունների ամրապնդումն է, արտաքին գերատեսչության եւ նրա գործունեության հիմնումը մեր ազգային ռեսուրսի վրա՝ համադրելով կուտակված ինստիտուցիոնալ փորձը, նոր կադրային կարողությունների ամրապնդում եւ համագործակցություն միջազգային գործընկերների հետ: Զոհրաբ Մնացականյանը հավաստիացրել է, որ այս գործընթացը շարունակական է եւ այժմ մի փուլում ենք, երբ բարեփոխումների արդյունքները հնարավորություն են տալիս ավելի կանոնավորելու ծրագրված բարեփոխումների աշխատանքը: Արտաքին գերատեսչությունը նպատակ ունի ընդլայնել մեր ներկայացուցչություններն աշխարհի տարբեր հատվածներում: Այս առումով նախարարը նշել է, որ որոշ շտկումներ են մտցվել այդ օրակարգում՝ հաշվի առնելով 2020թ. իրողությունները: Բանախոսի խոսքով՝ Կառավարության եւ վարչապետի ուղղորդմամբ փորձ է արվել պահպանել նպատակները 2021թ. համար, նախատեսվում է բյուջեի լրացուցիչ հատկացում:
«Մեր նպատակն է Հայաստանի դիվանագիտական ներկայացուցչությունների պահպանման ծախսերն իրականացնել բացառապես բյուջեի միջոցներով եւ բացառել այլ միջոցները, որոնք բյուջեից դուրս են եւ վերաբերում են անմիջապես դիվանագիտական գործունեության իրականացման նպատակներին»,-ասել է Զոհրաբ Մնացականյանը՝ հավելելով, որ հաշվարկվել են առաջնային խնդիրները, ներկայացվել առաջարկներ: Նշվել է, որ նախատեսվել է բյուջեի համալրում 476 մլն դրամի չափով:
Նախարարի գնահատմամբ՝ իրականացվել են բարեփոխումներ, որոնք միջազգային եւ ազգային փորձի հիման վրա հնարավորություն են տալիս վերադասավորել դիվանագիտական ներկայացուցչություններում մեր փոխհատուցումների համակարգը, որ կարողանանք ավելի բալանսավորել եւ ճշգրիտ համակարգ ներդնել: Նշվել է, որ սա առաջին հերթին կարողությունների հավասարաչափ զարգացման համատեքստում է իրականացվում եւ ներկայացուցչությունների բալանսավորումը մեր կարեւոր նպատակներից է:
Հաջորդ կարեւոր նպատակը դիվանագիտական ներկայացուցչությունների կարողություններն ուժեղացնելն է՝ նաեւ մարդկային ռեսուրսի ավելացման առումով: Նախարարը ճշգրտել է, որ երկար ժամանակ եղել են իրավիճակներ, երբ մեր ներկայացուցչությունները նվազագույն կազմով են համալրված եղել, ինչն անմիջական ազդեցություն է ունեցել աշխատանքի որակի վրա: Զեկուցողի գնահատմամբ՝ սա ոչ թե առանձին տեղերում հարցեր լուծել է, այլ ընդհանուր համակարգում խնդիրը դիտարկելը, այնպիսի գործողությունների իրականացումը, որի ազդեցությունը ողջ համակարգին է վերաբերում:
Հաջորդ կարեւոր ուղղությունը դիվանագիտության ոլորտում մասնագետների պատրաստման եւ վերապատրաստման համակարգի ամրապնդումն է՝ ազգային պլատֆորմի հիման վրա:Նախարարը հիշեցրել է, որ 2020թ. ծայրահեղ ծանրաբեռնված եւ լարված տարի էր. հենց տարվա սկզբից համավարակի ազդեցությունը մեծ էր, ինչի հետ կապված համապատասխան մեծածավալ աշխատանք է իրականացրել արտաքին գերատեսչությունը: Տարվա ընթացքում եղել են զարգացումներ, որոնք ուղղակի ազդեցություն են ունեցել մեր անվտանգային միջավայրի վրա: Նա ընդգծել է, որ այժմ արտաքին ոլորտում աշխատանքներն ամբողջովին թելադրված են ստեղծված պատերազմական իրադրությամբ եւ հավելել, որ ներկա պայմաններում աշխատանքները համակարգված են թե ՀՀ կառավարության ներսում եւ թե գործընկերների միջեւ: Նախարարը երախտագիտություն է հայտնել նաեւ ԱԺ պատգամավորներին արդյունավետ համագործակցության համար:Զոհրաբ Մնացականյանը, արձագանքելով պատգամավորների այն մտահոգությանը, թե արտաքին դիվանագիտության ոլորտում իրականացված աշխատանքը միգուցե քիչ է եղել եւ դրանով է պայմանավորված այս պատերազմական իրավիճակում միջազգային գործընկերների մասով ստեղծված իրադրությունը, նշել է. «Մենք բարեկամների պակաս չունենք աշխարհում: Մենք համագործակից պետություն ենք տարբեր հարթակներում, տարբեր ուղղություններով: Մենք շատ հստակ ենք մեր արտաքին քաղաքականության գերակայությունների ձեւավորման տրամաբանության առումով: Այդ տրամաբանությունը կառուցված է մեր ազգային շահերի հետապնդման գերակա նպատակի վրա, մեր ազգային անվտանգության ճարտարապետությունը կառուցված է գիտակցաբար, որպեսզի դա լինի համալրված: Մենք այսօր ունենք լրջագույն մարտահրավեր մեր առջեւ, որն արտահայտում է նաեւ աշխարհաքաղաքական որոշ իրողություններ տարածաշրջանային առումով, իրողություններ, որոնք մարտահրավեր են ոչ միայն Հայաստանի համար. դա վերաբերում է այն ագրեսիվ քաղաքականությանը, որը վարում է Թուրքիան»:
Նախարարը հանգամանալի պատասխանել է նաեւ պատգամավորների մյուս հարցերին:

Աղբյուր՝  http://www.parliament.am/news.php?cat_id=2&NewsID=13451&year=2020&month=11&day=05&lang=arm

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru

Հայաստանի ՔՀԿ-ները նամակով դիմել են ՄԱԿ-ի՝ ֆիզիկական և հոգեկան առողջության առավելագույն հասանելի չափանիշին հասնելու իրավունքի հարցերով հատուկ զեկուցողին

Հայաստանի քաղաքացիական հասարակության կազմակերպությունները նամակով դիմել են ՄԱԿ-ի՝ ֆիզիկական և հոգեկան առողջության առավելագույն հասանելի չափանիշին հասնելու իրավունքի հարցերով հատուկ զեկուցողին՝ պահանջելով հնարավորինս արագ երկխոսություն սկսել Ադրբեջանի կառավարության հետ՝ վերջ տալու վերջինիս կողմից Արցախի խաղաղ բնակչության թիրախավորմանը և այդ թիրախավորման արդյունքում Արցախի ու Հայաստանի բնակչության առողջության վրա վնասակար ազդեցությանը:

Armenian civil society organizations request that the UN Special Rapporteur on the Right of Everyone to the Enjoyment of the Highest Attainable Standard of Physical and Mental Health engage with the government of   #Azerbaijan  as soon as possible to call an end to the targeting of civilian populations in   #Artsakh and the consequent detrimental effects on the health of civilians in Artsakh and #Armenia.

Հստակեցվել են ռազմական դրության օրերին ՏԻՄ ղեկավարների տեղակալների գործառույթները

ՀՀ ազգային ժողովը երկրորդ ընթերցմամբ և ամբողջությամբ ընդունեց «Տեղական ինքնակառավարման մասին» Հայաստանի Հանրապետության օրենքում փոփոխություն կատարելու մասին օրենքի նախագիծը, որով նախատեսվում էր հստակեցնել ռազմական դրության ընթացքում քաղաքային և գյուղական համայնքների ղեկավարների տեղակալների գործառույթները: Կառավարության ներկայացրած օրինագիծն ընդունվել է միաձայն` 73 «կողմ» ձայներով:Նախագծով հստակեցվում է ռազմական դրության ընթացքում համայնքի ղեկավարի տեղակալի հանձնառությունները: Տեղակալը կփոխարինի համայնքի ղեկավարին վերջինիս բացակայության ժամանակ: Օրենքի նախագծով կհստակեցվեն տեղակալի գործառույթները ռազմական դրության հետ կապված կոնկրետ իրավիճակներում, կձևակերպեն նրա պարտականություններն աշխարհազորային աշխատանքների կազմակերպման և իրականացման համատեքստում:Օրենքի միջոցով կլուծվի համայնքներում ղեկավարի տեղակալի հաստիքի պարտադիր առկայության հարցը, ինչը հնարավորություն կտա ռազմական դրության պայմաններում համայնքներում պաշտպանունակության ամրապնդմանը, պաշտպանության կազմակերպմանը:

Աղբյուր՝  http://www.parliament.am/news.php?cat_id=2&NewsID=13445&year=2020&month=11&day=03&lang=arm

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru

Աշխարհազորայինի հավաքագրման հիմքը նրա հետ կնքված պայմանագիրն է

Դեռ օգոստոսի 25-ին ՀՀ պաշտպանության նախարարությունը հանրային քննարկման էր ներկայացրել օրենքի նախագծեր, որոնցով առաջարկվում է Հայաստանի ամբողջ տարածքում ստեղծել աշխարհազոր։ Ըստ նախագծի՝ աշխարհազորը ՀՀ վրա զինված հարձակման, դրա անմիջական վտանգի առկայության կամ ռազմական գործողությունների պայմաններում ՀՀ զինված պաշտպանությանը կամավորության սկզբունքով քաղաքացիների մասնակցության համակարգ է: Նախատեսվում է ստեղծել առանձին ստորաբաժանումներ, որոնք ղեկավարելու են քաղաքային և գյուղական համայնքների ղեկավարի տեղակալները:

Հանրային քննարկման ընթացքում մի շարք առաջարկություններ ներկայացրին քաղաքացիները: Մասնավորապես, առաջարկվում էր զերծ մնալ տեղական ինքնակառավարման և տարածքային կառավարման մասին օրենքներում փոփոխություններ կատարելուց:

Խորհրդարանը 2-րդ ընթերցմամբ եւ ամբողջությամբ ընդունեց «Պաշտպնության մասին» ՀՀ օրենքում լրացումներ կատարելու մասին օրինագիծը:

Նիստի ընթացքում ՀՀ պաշտպանության նախարարի տեղակալ

Գաբրիել Բալայանը տեղեկացրեց, որ աշխարհազորը գործելու է տարածքային սկզբունքով և ըստ ՀՀ վարչատարածքային բաժանման, պայմանականորեն բաղկացած կլինի զորամիավորումներից, դրանց ենթակա բրիգադներից և գումարտակներից:

Աշխարհազորի ընդհանուր ղեկավարումն իրականացնելու է Զինված ուժերի գլխավոր շտաբի պետը աշխարհազորային շտաբի միջոցով: Աշխարհազորային զորամիավորումը ղեկավարելու է համապատասխան տարածքային կառավարման մարմնի ղեկավարի տեղակալը, Երևանում՝ քաղաքապետի տեղակալը:

Աշխարհազորայինի հետ կնքվում է պայմանագիր, նրան ամրակցվում է զենք, հատկացվում է համազգեստ: Գ.Բալայանը նշեց, որ աշխարհազորը բացառապես կամավորության սկզբունքի հիման վրա է: Աշխարհազորի կազմ կարող են ընդգրկվել պահեստազորում հաշվառված, բայց կցագրում չունեցող քաղաքացիները:

«Պաշտպանության մասին» Հայաստանի Հանրապետության 2017 թվականի նոյեմբերի 15-ի ՀՕ-196-Ն օրենքի 3-րդ հոդվածի 1-ին մասի 5-րդ կետում «պետական մարմնի ուժերի» բառերից հետո լրացվում է «աշխարհազորի,» բառը, իսկ 9.1-ին կետը լրացվել է հետեւյալ բովանդակությամբ. «աշխարհազոր` քաղաքացիների կամավորության եւ տարածքային սկզբունքով զինված ուժերի գլխավոր շտաբի ենթակայությամբ գործող ստորաբաժանումների համալիր, որում ընդգրկված քաղաքացիները մասնակցում են Հայաստանի Հանրապետության զինված պաշտպանությանը.»:

Աշխարհազորը Հայաստանի Հանրապետության վրա զինված հարձակման, դրա անմիջական վտանգի առկայության կամ ռազմական գործողությունների պայմաններում Հայաստանի Հանրապետության զինված պաշտպանությանը կամավորության սկզբունքով քաղաքացիների մասնակցության համակարգ է:

Աշխարհազորի նպատակներն են`

1) Հայաստանի Հանրապետության պաշտպանությանը համընդհանուր եւ համազգային բնույթ հաղորդելը.

2) հակառակորդի դիվերսիոն կամ ահաբեկչական կամ հետախուզական կամ հատուկ օպերացիաների ուժերի եւ այլ գործողություններից Հայաստանի Հանրապետության տարածքի, բնակչության եւ ենթակառուցվածքների պաշտպանության պլանավորված միջոցառումների իրականացմանն աջակցությունը.

3) Հայաստանի Հանրապետության զինված ուժերի եւ այլ զորքերի կիրառման, տարածքային կառավարման եւ տեղական ինքնակառավարման մարմինների ու հատուկ եւ կարեւորագույն նշանակության օբյեկտների կենսագործունեության ապահովմանն աջակցությունը:

Աշխարհազորի կիրառումը ներառում է`

1) մասնակցությունը Հայաստանի Հանրապետության սահմանների կամ հակառակորդի հետ շփման գծի վտանգված հատվածների զինված պաշտպանությանը.

2) մասնակցությունը հակառակորդի դիվերսիոն կամ ահաբեկչական կամ հետախուզական կամ հատուկ օպերացիաների ուժերի եւ այլ գործողությունների դեմ պայքարին.

3) մասնակցությունը հատուկ եւ կարեւորագույն նշանակության օբյեկտների զինված պաշտպանությանը.

4) մասնակցությունը զորքերի եւ բնակչության զանգվածային տեղաշարժի կենտրոնական երթուղիների զինված պահպանությանը եւ պաշտպանությանը.

5) մասնակցությունը քաղաքացիական պաշտպանությանը:

Աշխարհազորի համակարգը գործում է տարածքային սկզբունքով, եւ ըստ Հայաստանի Հանրապետության վարչատարածքային բաժանման` պայմանականորեն բաղկացած է զորամիավորումներից եւ դրանց ենթակա բրիգադներից ու գումարտակներից: Աշխարհազորի կառուցվածքը, պատրաստության եւ կիրառման պլանները հաստատվում են Հայաստանի Հանրապետության զինված ուժերի գլխավոր շտաբի պետի հրամանով:

Աշխարհազորի ընդհանուր ղեկավարումն իրականացնում է Հայաստանի Հանրապետության զինված ուժերի գլխավոր շտաբի պետը` զինված ուժերի պատրաստության գլխավոր վարչությունում ձեւավորված աշխարհազորային շտաբի միջոցով:

Աշխարհազորային զորամիավորման ղեկավարը (հրամանատարը) խաղաղ եւ պատերազմի ժամանակ համապատասխան տարածքային կառավարման մարմնի ղեկավարի տեղակալն է, իսկ Երեւան քաղաքում` Երեւանի քաղաքապետի տեղակալը:

Աշխարհազորային բրիգադի ղեկավարը (հրամանատարը) խաղաղ եւ պատերազմի ժամանակ համապատասխան քաղաքային բնակավայր ընդգրկող կամ միավորված համայնքի ղեկավարի տեղակալն է, իսկ Երեւան քաղաքի վարչական շրջաններում` վարչական շրջանի ղեկավարի տեղակալը:

Աշխարհազորային գումարտակի ղեկավարը (հրամանատարը) խաղաղ եւ պատերազմի ժամանակ գյուղական բնակավայրեր ներառող չմիավորված համայնքի ղեկավարի տեղակալն է կամ միավորված համայնքի կազմում ներառված բնակավայրի վարչական ղեկավարը:

Սահմանված աշխարհազորային զորամիավորումների եւ դրանց ենթակա բրիգադների ու գումարտակների ղեկավարումն իրականացվում է աշխարհազորի պատրաստության ու կիրառման պլանների համաձայն:

Աշխարհազորային պայմանական բրիդադների եւ գումարտակների համալրումն աշխարհազորայիններով (այսուհետ նաեւ` աշխարազորայինի հավաքագրում) տարածքային սկզբունքով իրականացնում են Հայաստանի Հանրապետության պաշտպանության նախարարության զորակոչային եւ զորահավաքային համալրման տարածքային ստորաբաժանումները` պահեստազորում հաշվառված եւ պատերազմական ժամանակի հաստիքների չկցագրված քաղաքացիներից, ինչպես նաեւ տեղական ինքնակառավարման մարմինները` համապատասխան համայնքում (Երեւան քաղաքում` ըստ վարչական շրջանների) հաշվառված քաղաքացիներից:

Աշխարհազորայինի հավաքագրման հիմքը նրա հետ կնքված պայմանագիրն է: Պայմանագիր չի կարող կնքվել այն քաղաքացու հետ`

1) ով ենթակա է պարտադիր զինվորական ծառայության.

2) ով հանդիսանում է զինծառայող կամ ոստիկանության ծառայող կամ փրկարար ծառայող կամ քրեակատարողական ծառայող կամ հարկադիր ծառայող,

3) որը պատիժ է կրում ազատազրկման կամ կալանքի ձեւով, կամ որի նկատմամբ իրականացվում է քրեական հետապնդում:

Հավաքագրված աշխարհազորայինների անվանացուցակները եւ կնքված պայմանագրերը ներկայացվում են աշխարհազորային շտաբ: Աշխարհազորայինին ամրակցվում է զենք, հատկացվում է զինվորական համազգեստ եւ աշխարհազորայինը նշանակվում է համապատասխան պաշտոնի` աշխարհազորային շտաբի ղեկավարի (պետի) հրամանով: Աշխարհազորայիններին զենքի ամրակցման եւ պահպանման կարգը, կնքվող պայմանագրի օրինակելի ձեւը սահմանվում են Հայաստանի Հանրապետության պաշտպանության նախարարի հրամանով:

Աշխարհազորայինների պատրաստությունն իրականացվում է պատրաստության պլանների համաձայն անցկացվող պարապմունքների եւ վարժանքների միջոցով` աշխարհազորային շտաբի ղեկավարի (պետի) հրամանով: Աշխատող աշխարհազորայինների պատրաստության եւ կիրառման գործընթացի վրա տարածվում են Հայաստանի Հանրապետության աշխատանքային օրենսգրքի 124-րդ հոդվածի 3-րդ եւ 4-րդ մասերի պահանջները: Աշխարհազորայինները պատրաստության եւ կիրառման ընթացքում ապահովվում են անվճար սննդով` զինծառայողների համար սահմանված կարգով:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru