Լրահոս

Քննարկվել են ՀՀ արդարադատության նախարարի թեկնածություններ

Հոկտեմբերի 1-ին տեղի է ունեցել «Քաղաքացիական պայմանագիր» կուսակցության վարչության նիստ, որը վարել է վարչության նախագահ, ՀՀ վարչապետ Նիկոլ Փաշինյանը։ Այս մասին հայտնում են ՔՊ գրասենյակից։

Քննարկվել են ՀՀ արդարադատության նախարարի թեկնածություններ։ Մտքեր են փոխանակվել կուսակցական և քաղաքական բնույթի հարցերի շուրջ։

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Արդարադատության նախարար Գրիգոր Մինասյանը հրաժարական է ներկայացրել

Արդարադատության նախարար Գրիգոր Մինասյանը հրաժարական է ներկայացրել:

Այս մասին Մինասյանը գրել է ֆեյսբուքյան իր էջում:

«Այսօր որոշեցի ես էլ միանամ իմ պաշտոնավարման դեմ ստորագրահավաքին: Վարչապետին ներկայացրեցի իմ հրաժարականի դիմումը:

Խորհրդարանական կառավարման համակարգում դժվար կլինի նախարարի պաշտոն զբաղեցնելը, եթե նույնիսկ մեկ պատգամավորի հետ դրական համագործակցություն չունենաս: Ես տեղեկացա, որ խնդիր ունեմ «Քաղաքացիական պայմանագիր» խմբակցության շուրջ երկու տասնյակ պատգամավորների հետ:

Մեծապես շնորհակալ եմ և միշտ ջերմությամբ կհիշեմ ինձ բարությամբ ընդունած և աջակցած բոլոր մյուս պատգամավորներին, ընկեր դարձած կառավարության բոլոր գործընկերներին և, իհարկե, ինձ մեծագույն հնարավորություն տված վարչապետ Նիկոլ Փաշինյանին:

Արդարադատության ոլորտի բարեփոխման համար նրանց հետ և նրանց օգնությամբ շատ բան ենք արել նաև այս վերջին երկու տարիներին: Կառավարության ծրագիրը մեր մասով հաստատ գերակատարված է միջոցառումների քանակի և որակի առումով: Կառուցված ճանապարհն ու դպրոցը մարդիկ միանգամից են տեսնում և վայելում, բայց նոր արբիտրաժային համակարգի, հարկադիր կատարման վերափոխված ծառայության, թվայնացված քաղաքացիական դատավարության, կայացած պրոբացիայի ծառայության և բազմաթիվ այլ բարեփոխումների կամ հարյուրավոր օրենսդրական ու ռազմավարական փոփոխությունների արդյունքները բոլորս կվայելենք որոշ ժամանակ անց:

Մարդիկ արդարադատության նախարարներից միշտ սպասել են արդարության արագ և անմիջական վերականգնում: Դա նախարարի գործառույթ չէ: Դա վերապահված է իրավապահներին ու դատարաններին:

Մենք քաղաքականություն մշակողն ենք և ինստիտուցիոնալ համակարգը բարելավողը: Երկու ուղղությամբ էլ շատ բան է արվել արդեն: Պտուղները կլինեն շուտով, բայց արդեն հաջորդ նախարարների օրոք:

Իհարկե, կարելի էր ավելի համբերատար լինել, մնալ և պայքարել այս ամենի համար և շարունակել հանգիստ ներկայացնել կատարված հսկայածավալ աշխատանքը, բայց ես որոշեցի վերադառնալ ինձ ավելի հարազատ միջավայր: Արդարադատության ոլորտին կարելի է նպաստել նաև մասնավոր հատվածում»,-գրել է նա:

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

20-ամյա երիտասարդը վիճաբանության ժամանակ դանակահարել էր համաքաղաքացուն

ՆԳՆ ոստիկանությունից տեղեկացնում են, որ սեպտեմբերի 27-ին՝ ժամը 23.31-ին, ՆԳՆ ոստիկանության Լոռու մարզի օպերատիվ կառավարման կենտրոն «Վանաձոր» բժշկական կենտրոնից հաղորդել են, որ շտապօգնության խումբը Վանաձոր քաղաքի մշակույթի տան մոտից կրծքավանդակի ձախ կեսի և ազդրի կտրած-ծակած վերքերով բուժօգնության է տեղափոխել ինքնությունը չպարզված երիտասարդի:

«Ոստիկանության Տարոնի բաժնի քրեական հետախույզների ձեռնարկած օպերատիվ-հետախուզական միջոցառուների արդյունքում պարզվել է, որ հիվանդանոց տեղափոխվածը Վանաձոր քաղաքի 26-ամյա բնակիչ Տիգրան Կ.-ն է: Պարզվել է նաև, որ ժամը 22:40-ի սահմաններում Տիգրան Մեծի պողոտայի հասցեներից մեկի մոտ տեղի ունեցած վիճաբանության ժամանակ նրան դանակով հարվածներ էր հասցրել համաքաղաքացի 20-ամյա երիտասարդը:

Ձեռնարկված միջոցառումների և բացատրական աշխատանքի շնորհիվ սեպտեմբերի 28-ի գիշերը՝ ժամը 3:20-ին, նա ներկայացել է Տարոնի բաժին և խոստովանել, որ վիճաբանության ժամանակ ինքն է ծալովի դանակով հարվածներ հասցրել Տիգրան Կ.-ին՝ պատճառելով մարմնական վնասվածքներ: Հայտնել է նաև, որ դանակն այնուհետև նետել է Փամբակ գետը:

20-ամյա երիտասարդը ձերբակալվել և կազմված փաստաթղթերի հետ ներկայացվել է Լոռու մարզի քննչական վարչություն»,- ասված է հաղորդագրության մեջ:

© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com

Խնդիր ենք դրել առաջիկա տարիներին ՀՀ-ի և ԻԻՀ-ի ապրանքաշրջանառության ծավալը հասցնել 1 մլրդ դոլարի. Պապոյան

Նախարար Գևորգ Պապոյանը Երևանում անցկացվող Եվրասիական տնտեսական երրորդ համաժողովի շրջանակում մասնակցել է «ԵԱՏՄ-Իրան գործարար երկխոսություն» պանելային քննարկմանը։

Մասնակիցներն անդրադարձել են առևտրատնտեսական հարաբերությունների հաջող զարգացմանն ուղղված մի շարք օրակարգային հարցերի, ներառյալ ԵԱՏՄ-ի և Իրանի միջև համագործակցության խորացումը, ԵԱՏՄ-ի և Իրանի միջև ազատ առևտրի գոտու ձևավորումը, կայուն ենթակառուցվածքների ստեղծումը և Հյուսիս-հարավ միջանցքին առնչվող հարցերը։

«Հայաստանի վիճակագրական կոմիտեի տվյալներով՝ 2023 թվականին Հայաստանի և Իրանի միջև ապրանքաշրջանառությունը կազմել է 692,4 մլն ԱՄՆ դոլար։ Միաժամանակ Հայաստանից դեպի Իրան արտահանումը կազմել է 94,5 մլն դոլար, իսկ ներմուծումը՝ 597,9 մլն դոլար։ Այս ցուցանիշները վկայում են մեր երկրների տնտեսական հարաբերությունների դրական դինամիկայի մասին։ Կարևոր ոլորտները, ինչպիսիք են գյուղատնտեսությունը, սննդի վերամշակումը և արտադրական ապրանքները, արդեն իսկ կազմում են մեր առևտրաշրջանառության զգալի մասը։

Այնուամենայնիվ, մեր նպատակները շատ ավելին են, քան արդեն իսկ ձեռք բերվածը։ Ղեկավարվելով Հայաստանի վարչապետի և Իրանի նախագահի պայմանավորվածությամբ՝ մենք մեր առաջ խնդիր ենք դրել առաջիկա տարիներին փոխադարձ ապրանքաշրջանառության ծավալը հասցնել 1 միլիարդ դոլարի, իսկ ապագայում՝ 3 միլիարդ դոլարի։ Սա հավակնոտ նպատակ է, և դրան հասնելու համար անհրաժեշտ է կենտրոնացնել ջանքերը՝ ապրանքների տեսականու ընդլայնման, լոգիստիկ ենթակառուցվածքի բարելավման և նոր առևտրային ուղիների ակտիվացման ուղղությամբ»,- նշել է Գևորգ Պապոյանը։

Կարմիր գորգ, կրքեր ու «Խելահեղ Seance»․ բացվեց Գյումրու դրամատիկականի 159-րդ թատերաշրջանը

Մինչ սպասված թատերաշրջանի բացումն ազդարարող ներկայացումը, տոնական երեկոն մեկնարկեց նորաստեղծ Folkastic Band-ի հետ ճամփորդությամբ դեպի աշխարհի տարբեր երկրների ֆոլկ երաժշտություններ։

Գյումրու դրամատիկական թատրոնը  թատերաշրջանը բացեց Նոել Քոուարդի «Խելահեղ Seance» լիրիկական կատակերգությամբ,  որի ռեժիսորը, բեմադրության եւ երաժշտության հեղինակը երիտասարդ ռեժիսոր Ռաֆայել Ասատրյանն է։  Ռաֆայել Ասատրյանն է։ Թատրոնի գեղարվեստական ղեկավար Լյուդվիգ Հարությունյանի խոսքով՝  ստեղծագործությունը խորը փիլիսոփայական կամ բարոյահոգեբանական աշխատանք չէ, բայց տրամադրություն ստեղծող է։ «Վերանայելով խաղացանկը, մենք հասկացանք, որ հիմնականում ծանր ներկայացումներ են եղել, և թատրոնին պակասում են կատակերգությունները: Այս անգամ որոշեցինք թատերաշրջանը բացել գունեղ ու պոզիտիվ լիցքերով։ Հանդիսատեսը բեմում կտեսնի նոր երիտասարդական խմբի՝ դերասանների, ովքեր առաջին անգամ են խաղում, և նրանց հետ հանդես կգան մեր փորձառու դերասանները։ Ես այս ներկայացումն առանձնացնում եմ նրանով, որ նոր դեմքեր կան, երիտասարդական  ստեղծագործական նոր կազմ, նոր նկարիչ»,- ասաց Հարությունյանը։

Դերերում են՝ ՀՀ վաստակավոր արտիստ Տիգրան Գաբոյանը, Հասմիկ Սուվարյանը, Լիլիթ Խառատյանը, Արկադի Ղարագուլյանը, ՀՀ վաստակավոր արտիստ Ռաֆիկ Խառատյանը, Ադելինա Հարությունյանը, Ասպրամ Բաղդասարյանը, Սոֆյա Սարգսյանը, Սեդա Մկրտչյանը։

«Խելահեղ Seance»-ի սցենարի հիմքը կինն է ու կնոջ հավերժական, երբեմն նաև վտանգավոր դարձող սերը։

Ներկայացման ռեժիսոր Ասատրյանի խոսքով ներկայացումը նաև փոթորիկներով լեցուն կյանքի մասին է:  «Այս ներկայացման մեջ անգամ մահվանից հետո կինը հանգիստ չի տալիս ամուսնուն։ Ուղերձը հետևյալն է՝ եթե կինը սիրում է, նա միշտ, ամեն գնով է իր  ամուսնու կողքին, անգամ մահից հետո և սիրող կինը կարող է շրջանցել կյանքի ու մահվան սահմանները, վերադառնալ ու մնալ ամուսնու կողքին։ Ներկայացումը փոթորիկ է մտցնելու մեր հանդիսատեսի կյանքում, և այս ներկայացումով խորհուրդ ենք տալիս գնահատել այն արևածագն ու առավոտները, որ ունեք և երբեք կյանքում չկորցնեք փոթորիկները, ձեր գույները, որոնք ունեք»,- նշեց Ռաֆայել Ասատրյանն ու հավելեց ` երկրային կյանքը լքած Էլվիրան վերադառնում է ու  հայտարարում. «Այս տանը մեկ կին պետք է լինի և դա ես եմ»։

Իսրայելը հայտարարել է «Հըզբոլլահի» ևս մեկ հրամանատարի ոչնչացման մասին

Իսրայելի պաշտպանության բանակը (ՑԱՀԱԼ) հայտարարել է լիբանանյան «Հըզբոլլահ» շարժման կանխարգելիչ անվտանգության ստորաբաժանման հրամանատար Նաբիլ Կաուկի ոչնչացման մասին:

«Երեկ ՑԱՀԱԼ-ը ոչնչացրել է ահաբեկիչ Նաբիլ Կաուկին՝ «Հըզբոլլահ»-ի կենտրոնական խորհրդի անդամին և կանխարգելիչ անվտանգության ստորաբաժանման հրամանատարին»,- ասված է ՑԱՀԱԼ-ի մամուլի հաղորդագրության մեջ։

Կաուկը համարվել է շարժման բարձրագույն ղեկավարությանը մոտ կանգնած անձանցից մեկը:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Մեկնարկել է Մայր տաճարի վերաօծման արարողությունը. ՀՀ վարչապետը ներկա է Հայրապետական Սուրբ պատարագին

Այսօր՝ Վարագա Սուրբ խաչի տոնին, Ամենայն հայոց կաթողիկոս Գարեգին Երկրորդի ձեռամբ օծվելու է Սուրբ Էջմիածնի Մայր տաճարի սուրբ սեղանը և մատուցվելու է Հայրապետական Սուրբ Պատարագ:

2017 թվականից սկսվել էին Մայր տաճարի հիմնանորոգման աշխատանքները:

Շուրջ 7 տարի տևած աշխատանքների ընթացքում ամբողջությամբ ամրակայվել է Մայր տաճարը, վերանորոգվել մեծ գմբեթը, Կաթողիկեն, տանիքը, մեծ և փոքր զանգակատները: Առաջին անգամ Մայր տաճարում ներդրվել է օդափոխության համակարգ, հատակը ծածկվել նոր մարմարե մեծադիր սալիկներով, տեղադրվել են լուսասարքեր, ողջ ծավալով վերականգվել որմնանկարները:

Ուշագրավ է, որ այդ աշխատանքների ընթացքում ի հայտ են եկել որմնանկարչական մի քանի հիմնաշերտեր:

Մայր տաճար են ժամանել ՀՀ վարչապետ Նիկոլ Փաշինյանը տիկնոջ՝ Աննա Հակոբյանի հետ, ՀՀ նախագահ Վահագն Խաչատուրյանը, ԱԺ նախագահ Ալեն Սիմոնյանը, պաշտոնատար անձինք:

Հիշեցնենք՝ երեկ՝ Սուրբ Գևորգ քաջամարտիկ զորավարի հիշատակության օրը, Գարեգին Երկրորդի հանդիսապետությամբ, Մայր Աթոռ Սուրբ Էջմիածնում տեղի էր ունեցել Սրբալույս Մյուռոնի օրհնությունը:

Մյուռոնօրհության սրբազան արարողությանը ներկա էին եղել նվիրապետական աթոռների ներկայացուցիչներ, Մայր Աթոռում պաշտոնավարող եպիսկոպոսներ, Հայ եկեղեցու թեմակալ առաջնորդներ, թեմական պատվիրակություններ, Գերագույն հոգևոր խորհրդի անդամներ, ՀՀ ԱԺ պատգամավորներ, ՀՀ կառավարության անդամներ, պետական այրեր, ազգային բարերարներ, մշակույթի, գիտության, հասարակական և քաղաքական գործիչներ:

Մայր Աթոռի Սուրբ Տրդատի բաց խորանում կատարվել է Սրբալույս Մյուռոնի օրհնություն

Սեպտեմբերի 28-ին՝ Սուրբ Գևորգ քաջամարտիկ զորավարի հիշատակության օրը, Մայր Աթոռի Սուրբ Տրդատի բաց խորանում կատարվել է Սրբալույս Մյուռոնի օրհնություն՝ ձեռամբ Ն.Ս.Օ.Տ.Տ. Գարեգին Երկրորդ Ծայրագույն Պատրիարք և Ամենայն Հայոց Կաթողիկոսի։

ՑԱՀԱԼ-ը հայտնել է «Հըզբոլլահի» ղեկավար Հասան Նասրալլայի սպանության մասին

Բեյրութում երեկ տեղի ունեցած ավիահարվածի ժամանակ սպանվել է «Հըզբոլլահի» ղեկավար Հասան Նասրալլան։ Այդ մասին հայտել է The Times of Israel լրատվական գործակալությունը՝ վկայակոչելով Իսրայելի պաշտպանության բանակի հայտարարությունը։

Ավելի վաղ իրանական և արևմտյան մի շարք ԶԼՄ-ներ հերքել էին այդ տեղեկությունը: Լուրեր են շրջանառվում Նասրալլայի դստեր մահվան մասին:

ՑԱՀԱԼ-ը հայտնել է նաև «Հըզբոլլահի» հրթիռային ստորաբաժանման հրամանատար Մուհամմադ Ալի Իսմայիլի, նրա տեղակալ Հուսեյն Ահմադ Իսմայիլի և շարժման այլ ներկայացուցիչների չեզոքացման մասին:

Վեդիի դպրոցում վնասվածքներ ստացած ու կոմայի մեջ հայտնված 9-ամյա աղջիկը մահացել է

Սեպտեմբերի 28-ին Երևանի «Սուրբ Աստվածամայր» բժշկական կենտրոնում, գիտակցության չգալով, մահացել է Արարատի մարզի բնակիչ 9-ամյա Էլեն Շ․-ն։

Ինչպես հայտնում է Shamshyan.cօm-ը, երեխան նշված բժշկական կենտրոն էր տեղափոխվել «ծայրահեղ ծանր» ախտորոշմամբ` Վեդի քաղաքի «Վեդի» բժշկական կենտրոնից։

Հիշեցնենք՝ Արարատի մարզի բնակիչ 10-ամյա աղջնակը՝ Է․ Շ․-ն, մի քանի օր գտնվում էր «Սուրբ Աստվածամայր» բժշկական կենտրոնի վերակենդանացման բաժանմունքում։ Երեխան նշված բժշկական կենտրոն էր տեղափոխվել Վեդիի բժշկական կենտրոնից, իսկ մարմնական վնասվածքը ստացել էր Վեդիի թիվ 2 միջնակարգ դպրոցում։

Կոմայի մեջ հայտնված աղջնակի հարազատներն էլ սեպտեմբերի 24-ին՝ ժամը 10:50-ի սահմաններում, Երևան-Երասխ ավտոճանապարհի Փոքր Վեդիի վարչական տարածքում ավտովթարի էին ենթարկվել։ Նրանք մեկնում էին  աղջկան տեսակցության։

9-ամյա աշակերտուհու հետ տեղի ունեցած դեպքի առթիվ քրեական վարույթ է նախաձեռնվել անզգուշությամբ առողջությանը ծանր վնաս պատճառելու հոդվածով։