Շիրակում իրականացվելու է բնակչության ազդարարման և տարահանման միջոցառում
Արտակարգ իրավիճակների նախարարության փրկարար ծառայության Շիրակի մարզային փրկարարական վարչությունից տեղեկացնում են, որ մարտի 4-ին ժամը 12-ից 13-ն ընկած ժամանակահատվածում Շիրակի մարզի Գետք համայնքում իրականացվելու է բնակչության ազդարարման և տարահանման միջոցառում, որի ժամանակ փորձաարկվելու են նաև համայնքնի էլեկտրաշչակները: Խնդրում ենք չանհանգստանալ։
Աղբյուր՝ https://cutt.ly/Tl2tKPO
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru
Ազգային ժողովն ընդունեց գերիների վերաբերյալ հայտարարության նախագիծը
ՀՀ Ազգային ժողովը շարունակում է հերթական քառօրյա նիստը: Ազգային ժողովն ընդունել է Ադրբեջանի վերահսկողության ներքո գտնվող ռազմագերիների և գերեվարված քաղաքացիական անձանց, այդ թվում՝ կանանց հայրենադարձումը խոչընդոտելու և անհարկի ձգձգելու Ադրբեջանի քաղաքականությունը դատապարտելու հայտարարության նախագիծը:Հեղինակներն են Ազգային ժողովի անկախ պատգամավորներ Աննա Գրիգորյանը, Թագուհի Թովմասյանը և Վարդան Աթաբեկյանը:Նախագծով առաջարկվում է դատապարտել Ադրբեջանում հայատյացության ու կազմակերպված թշնամանքի քաղաքականության պայմաններում Ադրբեջանի վերահսկողության ներքո գտնվող ռազմագերիների, պատանդների եւ պահվող այլ անձանց հայրենադարձմանը խոչընդոտելը եւ արձանագրել, որ գերիներին չվերադարձնելու Ադրբեջանի՝ այս բացարձակ անթույլատրելի վարքագիծը խախտում է միջազգային մարդասիրական իրավունքի անկյունաքարային դրույթները, կոպտորեն ոտնահարում Ադրբեջանի կողմից ստանձնած միջազգային պարտավորությունները՝ խաթարելով ժամանակակից միջազգային հարաբերությունների բուն էությունը եւ վտանգելով մարդու իրավունքների պաշտպանության միջազգային եւ տարածաշրջանային համակարգերի նկատմամբ վերաբերմունքը: Նախագիծն ընդունվել է 120 կողմ, 0 դեմ ձայների հարաբերակցությամբ: Հիշեցնենք, որ այս նախագիծը ԱԺ-ում քննարկվել է փակ ռեժիմով: Ազգային ժողովը երկրորդ ընթերցմամբ և ամբողջությամբ ընդունել է նաև ՀՀ դատական օրենսգիրք սահմանադրական օրենքում լրացում կատարելու մասին և հարակից օրենքների նախագծերի փաթեթը: Հեղինակը Կառավարությունն է: Նախագծի երկրորդ ընթերցմամբ քննարկման ժամանակ նախագծի հիմնական զեկուցող Ռուստամ Բադասյանը ասել էր, որ նախագծով առաջարկվում է կարգավորել «Ապօրինի ծագում ունեցող գույքի բռնագանձման մասին» օրենքի և «Սնանկության մասին» օրենքով սահմանված վարույթների հարաբերակցությունը: «Այսինքն՝ ինչ է տեղի ունենում, երբ ապօրինի ծագում ունեցող գույքի բռնագանձման մասին օրենքով գույքի բռնագանձումը որևէ կերպ առնչվում է սնանկության վարույթին, իրավասու մարմինը, տվյալ դեպքում՝ Գլխավոր դատախազությունը, սնանկության վարույթում ինչ իրավունքներ և պարտականություններ ունի, ինչպես է ներգրավվում վարույթին»: Նախագիծն ընդունվել է 97 կողմ, 20 դեմ, 3 ձեռնպահ ձայներով: ՊԵԿ որոշ աշխատակիցների մարտական զենք կտրամադրվի. Ազգային ժողովը երկրորդ ընթերցմամբ և ամբողջությամբ ընդունել է «Զենքի մասին» օրենքում լրացում կատարելու նախագիծը, որով առաջարկվում է ՊԵԿ որոշ աշխատակիցների մարտական զենք տրամադրել: Նախագծի հեղինակը Կառավարությունն է: Նախագծի երկրորդ ընթերցմամբ քննարկման ընթացքում ՊԵԿ նախագահի տեղակալ Արշակ Գասպարյանն ասել էր, որ ՊԵԿ օպերատիվ ստորաբաժանման աշխատակիցներին մի շարք օրենքներով թույլատրվում է իրականացնել օպերատիվ միջոցառումներ: «Զենքի մասին» ՀՀ օրենքի 5-րդ հոդվածի առաջին մասով հատուկ նշված են այն մարմինները, որոնք իրավունք ունեն օգտագործելու՝ կրելու մարտական զենք: Նշված ցուցակում ներառված չեն Պետական եկամուտների կոմիտեի համապատասխան աշխատակիցները»: Նախագիծն ընդունվել է 91 կողմ, 6 դեմ, 21 ձեռնպահ ձայների հարաբերակցությամբ: Հոկտեմբերի առաջին կիրակին կնշվի՝ որպես Ազգային փոքրամասնությունների օր. ԱԺ-ը երկրորդ ընթերցմամբ և ամբողջությամբ ընդունվել է «Տոների և հիշատակի մասին» օրենքում լրացում կատարելու նախագիծը, որով հոկտեմբերի առաջին կիրակին կնշվի՝ որպես Ազգային փոքրամասնությունների օր:Նախագծի հեղինակը «Իմ քայլը» խմբակցության պատգամավոր, ազգությամբ եզդի Ռուստամ Բաքոյանն է: Նախագծի առաջին ընթերցմամբ քննարկման ժամանակ նախատեսվում էր Ազգային փոքրամասնությունների օր հռչակել սեպտեմբերի վերջին շաբաթ օրը: Բաքոյանը, սակայն, երկրորդ ընթերցմամբ քննարկմանը ասել էր, որ 7 տարին մեկ սեպտեմբերի 27-ը կարող է համընկնել սեպտեմբերի վերջին շաբաթ օրվա հետ, դրանով էր պայմանավորված առաջարկվող փոփոխությունը: «Իսկ ՀՀ քաղաքացիները, այդ թվում՝ ազգային փոքրամասնությունների ներկայացուցիչները, երբեք չեն կարողանա նշել որպես տոն՝ մինչև մենք չունենանք համապատասխան հաղթանակ»:Նախագիծն ընդունվել է 115 կողմ, 0 դեմ ձայների հարաբերակցությամբ:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru
Ազգային ժողովը հետաձգել է Վճռաբեկ դատարանի դատավորի ընտրության հարցը։
Ազգային ժողովի նախագահ Արարատ Միրզոյանը հայտարարել է, որ երեք թեկնածուներից մեկը՝ Սամվել Գրիգորյանն ինքնաբացարկ է հայտնել։«ԲԴԽ-ն գրությամբ տեղեկացրել է, որ Սամվել Գրիգորյանն ինքնաբացարկ է հայտնել, ինչն անհնար է դարձնում հարցի քննարկումը, որովհետև Ազգային ժողովը երեք թեկնածուներից պետք է ընտրություն կատարի։ Թեկնածուին ներկայացնողը ևս չի եկել, ուստի կհետաձգվի հարցի քննարկումը», – ասել է Միրզոյանը։Նշենք, որ Բարձրագուն դատական խորհուրդը Վճռաբեկ դատարանի քաղաքացիական և վարչական պալատի դատավորի թափուր տեղի համար առաջադրել էր Սամվել Գրիգորյանի, Արմեն Հայկյանցի և Արսեն Մկրտչյանի թեկնածությունները: Վճռաբեկ դատարանի դատավորի թեկնածուի ընտրությունն Ազգային ժողովի այսօրվա նիստի օրակարգում էր։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru
ԳՅՈՒՄՐԻԻՑ ՄԻԱՑԱՆ ՎԱՐՉԱՊԵՏԻ ՀՐԱՎԻՐԱԾ ՀԱՆՐԱՀԱՎԱՔԻՆ ՈՒ ԵՐԹԻՆ
«Մարտի 1-ին, ժամը 18.30-ին Երևանի Հանրապետության հրապարակում հավաքվում ենք հանուն ժողովրդի իշխանության և օրինականության»: Անսալով վարչապետ Նիկոլ Փաշինյանի նախօրեին արած այս կոչին, արդեն 2-րդ անգամ Գյումրու Վարդանանց հրապարակում էին հավաքվել մարդիկ, ովքեր վստահ էին, որ , ինչպես իրենք են նշում,ևս մեկ անգամ մերժելու են նախկին ռեժիմի գործիքներին և կանխելու նրանց վերադարձի փորձերը:
Գյումրիից մայրաքաղաք մեկնողներին առաջնորդում էր ԱԺ-ի «Իմ քայլը» խմբակցության պատգամավոր Կարեն Սարուխանյանը: Ըստ նրա այստեղ են հավաքվել մարդիկ, ովքեր չեն ուզում նախկինների վերադարձը:
Իսկ ինչպես է վերաբերվում շիրակցի պատգամավորը «Լուսավոր Հայաստան կուսակցության» կողմից առաջարկված, ստեղծված իրավիճակից դուրս գալու լուծման տարբերակին, որով վերջինս առաջարկում է հուշագիր ստորագրել և վարչապետի հրաժարականի պարագայում գնալ խորհրդարանական ընտրությունների:
Անդրադառնալով Նախագահ Արմեն Սարգսյանի կողմից ԶՈՒ գլխավոր շտաբի պետին պաշտոնից ազատելու հրամանագրի նախագիծը առարկություններով վերադարձնելու հարցին, Կարեն Սարուխանյանը, ևս իր գործընկերոջ, Պետական-իրավական հարցերի մշտական հանձնաժողովի անդամ Վահագն Հովակիմյանի պես համոզված է , որ առերևույթ հիմքեր կան Արմեն Սարգսյանի պաշտոնանկության գործընթաց սկսելու համար:
Երկրում ստեղծված իրավիճակի կարգավորմանն այսօրվա հանրահավաքը բեկումնային ընթացք է ապահովելու, վստահեցնում էին Գյումրիից մայրաքաղաք մեկնողները և համոզված, որ խորհրդանշական այս օրը կավարտվի առանց լուրջ բախումների։
Կարճ դադարից հետո, Գյումրու Վարդանանց հրապարակից գյումրեցիներն ավտոերթով շարժվեցին Երևան` Հանրապետության հրապարակ` մասնակցելու Վարչապետ Նիկոլ Փաշինյանի հրավիրած հանրահավաքին և երթին։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru
Այսօր լրանում է Մարտի 1-ի ողբերգության 13-րդ տարին
Այսօր լրանում է մարտիմեկյան արյունալի իրադարձությունների 13-րդ տարին։ 2008 թվականի մարտի 1-ին վաղ առավոտյան ոստիկանները հարձակվեցին Երևանի Ազատության հրապարակում գիշերող ընդդիմադիր ցուցարարների վրա, ովքեր իրենց բողոքն էին հայտնում նախագահական ընտրությունների պաշտոնական արդյունքների դեմ: Նույն օրն ավելի ուշ Ալեքսանդր Մյասնիկյանի արձանին հարող հրապարակում և դրա մերձակայքում ցուցարարների և ուժայինների միջև սկիզբ առած բախումների հետևանքով տասը մարդ զոհվեց, հարյուրավոր մարդիկ վիրավորվեցին: 2008-ի հետընտրական արյունալի իրադարձություններից 13 տարի է անցել, բայց 10 զոհերի մահվան հանգամանքները ցայսօր պարզված չեն: Նշենք, որ ամեն տարի այս օրը Մարտի 1-ի զոհերի հիշատակին նվիրված երթ է անցկացվում Երևանում։ Նախորդ տարի, սակայն, երթը չեղարկվեց՝ կապված Հայաստանում գրանցված կորոնավիրուսով հիվանդացության առաջին դեպքի հետ: Հիշեցնենք, որ այսօր Հայաստանի վարչապետը հրավիրել է է հանրահավաքի և երթի: «Երկուշաբթի օրը, մարտի 1-ին, ժամը 18.30-ին բոլորիդ հրավիրում եմ Երևանի Հանրապետության հրապարակ՝ հանրահավաքի և երթի», – ֆեյսբուքյան էջում գրել է Նիկոլ Փաշինյանը։ Վարչապետի հրաժարականը պահանջող «Հայրենիքի փրկության շարժումը» ևս, այսօր ժամը հանրահավաք է հրավիրել՝ Բաղրամյան պողոտայում, Ազգային ժողովի շենքի դիմաց:
Աղբյուր՝ https://progressgyumri.am/
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru
Շիրակի մարզում անչափահասների կողմից հանցագործությունների կանխարգելիչ աշխատանքների հարցով դատախազը դիմել է պատկան մարմիններին
2021թ.-ի հունվարին Գյումրիում արձանագրվել է անչափահասների կողմից կամ մասնակցությամբ հանցագործության կատարման երկու դեպք: Այս մասին հաղորդագրություն է տարածել ՀՀ գլխավոր դատախազությունը. «Մասնավորապես, ըստ դրանց առթիվ նախպատրաստված նյութերի՝ մի դեպքում Գյումրու Խաղաղության օղակի այգում 15-16 տարեկան մի խումբ դեռահասների միջև ծագած վիճաբանության և փոխադարձ հայհոյանքներ հնչեցրելու արդյունքում 4 դեռահասներ ձեռքերով հարվածներ են հասցրել իրենց տարեկցի մարմնի տարբեր մասերին, նրա գլխին հարվածել փայտով, ինչի հետևանքով դեռահասի առողջությանը հասցվել է թեթև վնաս՝ առողջության կարճատև քայքայումով: Մյուս դեպքում, որը տեղի է ունեցել «Գյումրու օլիմպիական հերթափոխի պետական մարզական քոլեջ» ՊՈԱԿ-ում, 9-րդ դասարանի երկու աշակերտի միջև բջջային հեռախոսից օգտվելու հարցի շուրջ ճագած վիճաբանության ընթացքում նրանցից մեկը մյուսի դեմքին՝ աջ աչքի շրջանում, հարվածել է բռունցքով, ինչի հետևանքով տուժած անձը ստացել է գլխուղեղի ցնցում, նրա առողջությանը պատճառվել է թեթև վնաս՝ առողջության կարճատև քայքայումով: Հաշվի առնելով, որ իրենց տարեկիցներին ծեծի ենթարկած դեռահասները խոստովանել են արարքը, զղջացել, խնդրել իրենց չենթարկել պատասխանատվության, որոշումներ են կայացվել քրեական գործ հարուցելը մերժելու մասին՝ առաջին դեպքում հանցակազմի բացակայության և անձանց արարքը կատարելու պահին քրեական պատասխանատվության ենթարկելու օրենքով նախատեսված տարիքին հասած չլինելու հիմքերով, իսկ երկրորդի դեպքում՝ դիմողի բողոքի բացակայության հիմքով: Շիրակի մարզի դատախազությունում կատարված ուսումնասիրությամբ պարզվել է, որ 2020թ.-ին մարզի տարածքում փաստացի արձանագրվել է 19 անչափահասի կողմից կատարված հանցագործության 24 դեպք։ 2019թ.-ի համեմատ հանցագործություն կատարած անչափահաս անձանց թիվը նվազել է 2-ով, սակայն դեպքերի քանակն ավելացել է 8-ով: Ընդ որում, 2020թ.-ի ընթացքում հանցագործություն կատարած անչափահասներից 1-ը, ով 2 անգամ կատարել է հափշտակություններ, հանցանքները կատարելու պահին գտնվել է հաշվառման մեջ: Մտահոգիչ է հատկապես այն հանգամանքը, որ 2020թ.-ին արձանագրվել էր անչափահասի կողմից կատարված առանձնապես ծանր հանցագործություն՝ սպանություն: Այս քրեական գործով կալանավորվել է 17 ամյա անչափահաս, քրեական գործը մեղադրական եզրակացությամբ ուղարկվել է դատարան: Նշված դեպքն առանձնանում է նրանով, որ դրա առաջացմանն էականորեն նպաստել էր ՀՀ-ում արտակարգ դրություն հայտարարված լինելու պայմաններում 2 գյուղերի ֆուտբոլային թիմերի միջև խաղի կազմակերպումը և անցկացումը, որը դուրս է մնացել ոստիկանության համապատասխան աշխատակիցների վերահսկողությունից: Չնայած անչափահասների կողմից հանցագործությունների կանխարգելման ուղղությամբ կիրառվել են ներգործության միջոցներ, այդ թվում նաև՝ դատախազական, սակայն հատկապես 2020թ.-ին արձանագրված վիճակի խորապատկերին 2021թ.-ի հունվարին անչափահասների կողմից կատարված հանցագործության միանգամից 2 դեպքերը փաստում են, որ նրանց շրջանում հանցագործությունների նախականխման, խափանման ուղղությամբ ձեռնարկված միջոցները չեն տվել ցանկալի արդյունքները: Ելնելով պետական և հասարակական մարմինների հետ այդ ուղղությամբ աշխատանքներն ակտիվացնելու, առանց հսկողության թողնված անչափահասների, ինչպես նաև հաշվառման մեջ գտնվող անչափահասների կողմից կատարվող հանցագործությունները կանխելու անհրաժեշտությունից, հաշվի առնելով, որ հանցավոր դեպք է արձանագրվել նաև ուսումնական հաստատության տարածքում՝ ըստ էության, դաստիարակչական գծով աշխատանքներ իրականացնող մանկավարժների հսկողությունից դուրս մնալու հետևանքով՝ ՀՀ Շիրակի մարզի դատախազ Գուրգեն Գրիգորյանը միջնորդագրեր է հասցեագրել ՀՀ կրթության, գիտության, մշակույթի և սպորտի նախարարին և ՀՀ ոստիկանության Շիրակի մարզային վարչության պետին: Միջնորդագրերով բարձրացվել է ՀՀ ոստիկանության մարզային վարչության բաժիններում անչափահասների գործերով և ընտանիքում բռնության կանխարգելման բաժանմունքի աշխատակիցների կողմից տարվող կանխարգելիչ աշխատանքներն ամբողջ ծավալով իրականացնելու, իրենց աշխատանքում թերացած պաշտոնատար անձանց կողմից թույլ տրված թերացումները մանրամասն վեր հանելու և գնահատաելու խնդիրը: Նախարարին ուղղված միջնորդագրով անհրաժեշտ է համարվել «Գյումրու օլիմպիական հերթափոխի պետական մարզական քոլեջ» ՊՈԱԿ-ում նմանատիպ դեպքերը բացառելու, անչափահասներին ոչ իրավաչափ վարքագիծ դրսևորելուց զերծ պահելու, դպրոցների տնօրինության և ոստիկանության տարածքային ստորաբաժանման անչափահասների գործերով և ընտանիքում բռնության կանխարգելման խմբի աշխատակիցների միջև աշխատանքային գործուն կապերի ապահովումը և համատեղ միջոցառումների իրականցումը: Մարզի դատախազությունն արդեն իսկ պլանավորել է ընթացիկ տարում ուսումնական և այլ սոցիալական հաստատություններ այցելությունների, հանդիպումների միջոցով առավել ինտենսիվ դարձնել անչափահասների հետ պրոֆիլակտիկ աշխատանքների իրականացումը»,- ասված է հաղորդագրության մեջ:
Աղբյուր՝ https://www.prosecutor.am/am/mn/8105/
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru
ՀՀ ՊՆ-ն հայտարարություն է տարածել
ՀՀ ՊՆ-ն հայտարարում է, որ Հայաստանի զինված ուժերը լիարժեք և պատասխանատվությամբ կատարում են երկրի անվտանգության ապահովման իրենց գործառույթները և, անկախ քաղաքական գործընթացներից, շարունակում են իրենց ծառայությունը հանուն պետության եւ ժողովրդի անվտանգության ապահովման։ Պահանջում ենք զերծ մնալ զինված ուժերի անունից հայտարարություններ անելուց, բանակը չներքաշել քաղաքական պրոցեսների մեջ, երկրի անվտանգությունը չստորադասել սեփական քաղաքական շահերին։ Սիրելի հայրենակիցներ, պաշտպանության նախարարությունը, զինված ուժերը դուրս են քաղաքականությունից եւ հետեւողականորեն շարունակելու են բարեփոխումների իրականացմանն ու պաշտպանության բնագավառի արդիականացմանն ուղղված քայլերը։
Աղբյուր՝ https://www.mil.am/hy/news/8987
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru
Գյումրիում էր Ճապոնիայի արտակարգ և լիազոր դեսպան Ջուն Յամադան
Աշխատանքային այցով այսօր Շիրակի մարզում էր ՀՀ-ում Ճապոնիայի արտակարգ և լիազոր դեսպան Ջուն Յամադան: Դեսպանի առաջին կանգառը Շիրակի մարզպետարանում էր:
Շիրակի մարզպետ Հովհաննես Հարությունյան ողջունեց հյուրին՝ նշելով, որ տեղյակ է դեսպանության կողմից մարզում իրականացվող ծրագրերի մասին ու կարևորում է դրանք․ «Ողջունում եմ Շիրակի մարզի լավ բարեկամին, պարոն Յամադա, ուրախ ենք ձեզ Շիրակում հյուրընկալելու։ Մեզ համար կարևոր է համագործակցությունն ու երկու բարեկամ երկրների միջև հաստատված կապերի ամրապնդումը։ Ինձ համար ուրախալի է, որ ձեր կողմից Շիրակի մարզում մի շարք ծրագրեր են իրականացվում, մասնավորապես, սոցիալական, էներգաարդյունավետության բարձրացմանն ուղղված նախաձեռնությունների մասին է խոսքս։ Մենք միանշանակ պատրաստակամություն ենք հայտնում համագործակցելու և ամեն ինչ կանենք հնարավորությունների սահմաններում աջակցելու, նոր ձեռնարկներ կյանքի կոչելու համար»։ Կողմերնն այնուհետ մտքեր փոխանակեցին նոր ծրագրերի իրականացման, զբոսաշրջության, սոցիալական ու մշակութային կապերի ամրապնդմանը միտված ձեռնարկների իրականացման առնչությամբ։
Դեսպանին այոնւհետ ընդունեց Գյումրու քաղաքապետ Սամվել Բալասանյանը: Խոսվեց վերջին տարիներին Գյումրիում իրականացված և այս պահին ընթացքի մեջ գտնվող ծրագրերի, զբոսաշրջության ոլորտում ունեցած ակտիվության, այս ոլորտի վրա համավարակի ունեցած բացասական ազդեցության և մի շարք այլ հարցերի մասին:
Ջուն Յամադան եղավ նաև Գյումրու պատմության թանգարանում:
Դեսպանին նաև սպասում էին Հայկական Կարիտասի Գյումրու մասնաճյուղի տարեցների ցերեկային խնամքի կենտրոնում: Այստեղ ՀՀ-ում Ճապոնիայի արտակարգ և լիազոր դեսպան Ջուն Յամադան մասնակցեց «Գյումրիի եւ Տաշիրի տարեցների ցերեկային խնամքի կենտրոնների վերանորոգման աշխատանքներ» ծրագրի պաշտոնական փակման արարողությունը:
Եւս մեկ կարևոր ծրագիր էլ դեսպանի մասնակցությամբ փակվեց Շիրակի թեմի սոցիալ-կրթական կենտրոնում: Կենտրոնի տնօրեն Կարինե Գյադուկյանը նշեց, որ «Մասնագիտական ուսուցումներ Շիրակի մարզի գործազուրկների համար» ծրագիրը, որն իրականացվել է 2019-2020թթ՝ Ճապոնիայի կառավարության և դեսպանության միջոցով, խիստ կարևոր ներդրում է Ճապոնիայի կառավարության և դեսպանության կողմից: Ծրագրի նպատակն է եղել նպաստել Շիրակի մարզի և Գյումրու առավել խոցելի ընտանիքների գործազուրկ կանանց և տղամարդկանց հնարավորությունների և ներուժի զարգացմանը՝ մասնագիտական և արհեստագործական դասընթացների անցկացման և զբաղվածության ապահովման միջոցով:
26.923 ԱՄՆ դոլար արժողությամբ դրամաշնորհային ծրագրի շրջանակներում վերանորոգվել է, ժամանակակից տեխնիկայով և սարքավորումներով կահավորվել են կենտրոնի դիմահարդարման, վարսահարդարման, մատնահարդարման, թխվածքների պատրաստման և ձևավորման, խոհարարության դասընթացների համար նախատեսված տարածքները:
Ջուն Յամադան նշեց, որ Ճապոնիան բարձր է գնահատում ենթակառուցվածքների բարելավումը տնտեսական աճի և զարգացման համար: Այս օժանդակությունն իրենց շարունակական քայլերից մեկն է առաջնային մակարդակում աշխարհը զարգացման ավելի կայուն ուղու վրա դնելու համար: Ըստ դեսպանի, ցանկացած երկրի սոցիալ-տնտեսական առաջընթացի գրավականը հենց մասնագիտական կրթությունն է: Այցի ավարտին Շիրակի թեմի առաջնորդ Միքայել արքեպիսկոպոս Աջապահյանն ու դեսպանը հայ-ճապոնական բարեկամությունը խորհրդանշող տորթ կտրեցին:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru