Տեսանյութեր

Շիրակի  մարզը ընդունել է շուրջ 4000 արցախցու

100 հազարից ավելի հայրենազրկված արցախցիներ, բռնի տեղահանվելով հարազատ օջախներից, այսօր արդեն փորձում են նոր կյանք կառուցել մայր հայենիքի տարբեր հատվածներում;

Մյուս մարզերի նման Շիրակի մարզում էլ սիրով ընդունում են նրանց, տրամադրում սնունդ, առաջին անհրաժեշտության պարագաներ և իհարկե  կեցավայրեր, որոնցով արդեն ապահովվել է շուրջ 4000 արցախցի։

Մեզ հետ զրույցում արցախցի մեղվաբույծ պապիկը  ցավով էր պատմում  հայրենիքը թողնելու, գաղթի ճամփան բռնելու  և  Ստեփանակերտում տիրող իրավիճակի մասին;

Արցախցիներից ոմանց ուղղորդել են Գյումրի, որոշներն էլ իրենք են ցանկացել հենց այստեղ գալ։ Ասում են՝ ճանապարհը դժվար է էղել, կամաց֊կամաց հարմարվում են ՝չեն թաքցնում՝ մարզը գրկաբաց է ընդունել նրանց։

Մարզպետարանից տեղեկացնում են՝ Գյումրիում  ներհոսքից առաջացող խնդիրներ թույլ չտալու համար խոշորացված համայնքներում արդենիսկ ստեղծվել են հանձնաժողովներ՝ բռնի տեղահանված անձանց այդ շրջաններում պատշաճ տեղավորելու համար։

Փոխմարզպետ Աննա Մարտիկյանի խոսքով՝ դա նախևառաջ կարևոր  խթան է գուղատնտեսության զարգացման համար։

Գյումրու քաղաքապետարանն էլ իր հերթին այս օրերին աշխատում է 24 ժամյա ռեժիմով՝ ընդունում են արցախցիներին, հաշվառում, ապահովում անհրաժեշտ պարագաներով, տաք սնունդով  ու լուծում  նաև կեցության խնդիրը։

Քաղաքապետն ավելացրեց՝  օգնում են նրանց նաև աշխատանքի տեղավորվել;

Բռնի տեղահանված անձանց աջակցմանն են միացել նաև հասարակական տարբեր կառույցներ ու բազմաթիվ անհատներ;

Գյումրիում Էջմիածնի Հայորդաց տունն  անմասն չէ այդ գործընթացից։ Տնօրենի խոսքով՝ օգնություն ստացող շահառուների թիվը հատել է 1500֊ի շեմը։

Իրենց հայրենիքից բռնի տեղահանված արցախցիները, չնայած  նոր ժամանակների ՝ ամեն ինչ նոր էջից սկսելու պահանջին, կորսված հայրենիքի կարոտը սրտում՝ հույս են հայտնում՝ մի օր վերադառնալու են։

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Գրանադայում հնգակողմի փոխարեն կայացավ քառակողմ հանդիպում. ընդունվել է հայտարարություն

Հայաստանի վարչապետ Նիկոլ Փաշինյանը, Եվրոպական խորհրդի նախագահ Շառլ Միշելը, Ֆրանսիայի նախագահ Էմանյուել Մակրոնը և Գերմանիայի կանցլեր Օլաֆ Շոլցը այսօր Գրանադայում կայացած հանդիպման արդյունքում հայտարարություն են ընդունել, որում Լեռնային Ղարաբաղում տեղի ունեցածը բնորոշվում է զանգվածային տեղահանություն։ Հայտարարությունում Եվրոպական խորհրդի նախագահը, Ֆրանսիայի նախագահը և Գերմանիայի կանցլերն ընդգծում են «իրենց անսասան աջակցությունը Հայաստանի անկախությանը, ինքնիշխանությանը, տարածքային ամբողջականությանը և սահմանների անձեռնմխելիությանը»։ «Նրանք նաև իրենց աջակցությունը հայտնեցին ԵՄ-Հայաստան հարաբերությունների ամրապնդմանը՝ իր բոլոր չափումներով՝ հիմնված Հայաստանի Հանրապետության կարիքների վրա», – ասված է հայտարարությունում։ «Նրանք համաձայնեցին Հայաստանին հավելյալ մարդասիրական օգնություն տրամադրելու անհրաժեշտության շուրջ, քանի որ այն բախվում է Ղարաբաղի հայերի վերջին զանգվածային տեղահանության հետևանքներին։ Նրանք ընդգծեցին, որ այդ փախստականները պետք է ազատորեն օգտվեն իրենց տներ և իրենց բնակության վայրեր վերադառնալու իրավունքից՝ առանց որևէ պայմանների, միջազգային մոնիտորինգի ներքո և հարգելով իրենց պատմությունը, մշակույթը և մարդու իրավունքները», – նշված է քառակողմ հայտարարությունում։ «Նրանք հավատարիմ են մնում Հայաստանի և Ադրբեջանի միջև հարաբերությունների կարգավորմանն ուղղված բոլոր ջանքերին՝ հիմնված Հայաստանի (29 հազար 800 քկմ) և Ադրբեջանի (86 հազար 600 քկմ) ինքնիշխանության, սահմանների անձեռնմխելիության և տարածքային ամբողջականության փոխադարձ ճանաչման վրա, ինչպես նշված է նախագահ Միշելի հայտարարությունում։ 2023 թվականի մայիսի 14-ին և հուլիսի 15-ին նրանք կոչ են արել խստորեն պահպանել ուժի և ուժի սպառնալիքի չկիրառման սկզբունքը։ Նրանք ընդգծել են սահմանազատման ուղղությամբ աշխատելու հրատապ անհրաժեշտությունը՝ հիմնվելով ԽՍՀՄ Գլխավոր շտաբի ամենավերջին քարտեզների վրա, որոնք տրամադրվել են կողմերին և պետք է հիմք հանդիսանան նաև ուժերի միջև հեռավորություն պահպանելու, խաղաղության պայմանագիրը վերջնական տեսքի բերելու և հումանիտար բոլոր խնդիրների լուծման համար», – ասված է հայտարարությունում։ «Նրանք կոչ արեցին ավելի մեծ տարածաշրջանային համագործակցության և բոլոր սահմանների, այդ թվում՝ Հայաստանի և Թուրքիայի միջև սահմանների բացման, ինչպես նաև տարածաշրջանային կապերի բացման՝ երկրների ինքնիշխանության և իրավասության լիակատար հարգման, ինչպես նաև հավասարության և փոխադարձության սկզբունքների հիման վրա», – նշված է հայտարարությունում։ «Եվրոպացի առաջնորդները կոչ արեցին Հայաստանին և Ադրբեջանին ազատ արձակել բոլոր ձերբակալվածներին և համագործակցել անհետ կորածների ճակատագրին լուծում տալու և ականազերծման աշխատանքները հեշտացնելու համար», – ասված է քառակողմ փաստաթղթում։

Ազգային ժողովը վավերացեց Հռոմի ստատուտը

Ազգային ժողովը վավերացել է Հռոմի կանոնադրությունը (Հռոմի ստատուտ)։ Հռոմի ստատուտը վավերցանելու մասին նախագիծն ընդունվել է ԱԺ նիստում՝ ստանալով 60 կողմ, 22 դեմ, 0 ձեռնպահ ձայներ: «Հայաստան» և «Պատիվ ունեմ» խմբակցությունները դեմ են քվեարկել նախագծին։ Ավելի վաղ, Սահմանադրական դատարանը ճանաչել էր սահմանադրությանը համապատասխանող 1998 թվականի հուլիսի 17-ին ստորագրված՝ Միջազգային քրեական դատարանի Հռոմի կանոնադրությունում ամրագրված պարտավորությունները։ 2022 թվականին այս հարցով Սահմանադրական դատարան է դիմել Կառավարությունը։ Ավելի ուշ գործադիր մարմինը Միջազգային քրեական դատարանի Հռոմի կանոնադրությունն (Հռոմի ստատուտ) ուղարկել էր Ազգային ժողով՝ վավերացման: Ազգային ժողովի պետական-իրավական հարցերի մշտական հանձնաժողովն արդեն իսկ ընդունել է նախագիծ և այն ընդգրկվել է Ազգային ժողովի հերթական լիագումար նիստի օրակարգում։ Ազգային ժողովում վարչապետ Նիկոլ Փաշինյանը հայտարարել է, որ Հռոմի ստատուտը վավերացվելու է ամբողջությամբ։ Կառավարությունը կրկին վերադարձել է Հռոմի կանոնադրության ճանաչման հարցին, քանի որ, ըստ այս նախագծի հիմնավորման, հնարավորություն են տեսնում Ադրբեջանին պատասխանատվության կանչելու:

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

ԼՂ-ից բռնի տեղահանվածները ֆինանսական աջակցություն ստանալու համար պետք է բացեն քարտային հաշիվներ. վարչապետը խորհրդակցություն է անցկացրել

Լեռնային Ղարաբաղից յուրաքանչյուր բռնի տեղահանված, խոսքը վերաբերվում է և՛ երեխաներին, և՛ մեծահասակներին, ամեն անձի հաշվով կտրվի 100 հազար միանվագ դրամական աջակցություն, այսօր խորհրդակցության ժամանակ վերահաստատել է վարչապետ Նիկոլ Փաշինյանը: Վարչապետը խնդրեց բռնի տեղահանվածներին, ովքեր չունեն բանկային, քարտային հաշիվներ, մոտենան իրենց ամենամոտ, ամենահարմար բանկ և այնտեղ բացեն քարտային հաշիվ՝ հետագայում նաև բանկային քարտ ստանալու համար։ Հաշիվները կբացվեն արագ, և Կառավարությունը 100 հազարական դրամները միանվագ կփոխանցի այդ հաշիվներին, և մարդիկ արդեն իրենց անձնագրերով հասանելիություն կունենան դրանց, ասել է Փաշինյանը՝ շեշտելով՝ բանկային քարտեր ունեցողներին Կառավարությունը միանգամից առաջիկա շաբաթվա ընթացքում այդ գումարները կփոխանցի։ Իսկ փաստաթղթեր չունեցողներին վարչապետը հորդորեց համապատասխան տեղեկանք վերցնել Միասնական սոցիալական ծառայությունից։

https://www.primeminister.am/hy/press-release/item/2023/10/02/Nikol-Pashinyan-meeting/

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

ՀՀ կառավարությունը 1 մլրդ 800 մլն դրամ կհատկացնի քսան համայնքների երեսուն սուբվենցիոն ծրագրերի ֆինանսավորման համար

ՀՀ կառավարությունը գումար կհատկացնի ութ մարզպետների աշխատակազմերին՝ քսան համայնքների երեսուն սուբվենցիոն ծրագրեր ֆինանսավորելու համար: Որոշումն ընդունվել է ՀՀ կառավարության՝ սեպտեմբերի 22-ին գումարված նիստում: Հայաստանի տարածքային կառավարման և ենթակառուցվածքների նախարար Գնել Սանոսյանը, ներկայացնելով նախագիծը, շեշտել է՝ Արագածոտնի մարզի երկու ծրագրի համար նախատեսվում է տրամադրել 42 մլն դրամ, Արմավիրի մարզի երկու ծրագրի համար՝ 12,5 մլն դրամ, Գեղարքունիքի մարզի 4 ծրագրի համար՝ 307 մլն դրամ, Լոռու մարզի 6 ծրագրի համար՝ 347 մլն դրամ, Կոտայքի մարզի 8 ծրագրի համար՝ 503 մլն դրամ, Շիրակի մարզի երկու ծրագրի համար՝ 124 մլն դրամ, Սյունիքի մարզի երկու ծրագրի համար՝ 173 մլն դրամ և Տավուշի մարզի 4 ծրագրի համար՝ 289 մլն դրամ: «Նախագծի ընդունմամբ՝ հունվարի 1-ից սկսած ՀՀ կառավարությունը 17 մլրդ 116 մլն դրամ կվճարի սուբվենցիոն ծրագրերի համար»,-շեշտել է Սանոսյանը: ՀՀ վարչապետ Նիկոլ Փաշինյանը փաստել է, որ ծրագիրը մեկնարկում է Արագածոտնի մարզի Շամիրամ համայնքից, որը եզդիաբնակ է: Նա հիշեցրեց, որ փոփոխությունը սուբվենցիոն ծրագրերի բանաձևերում իրականացրել են, երբ ազգային փոքրամասնությամբ բնակչություն ունեցող համայնքներին ավելի մեծ չափով են ֆինանսավորում: Գնել Սանոսյանն էլ ընդգծել է, որ ՀՀ վարչապետի հանձնարարությամբ որոշակի ուղիղ ծրագրերի իրականացման ուղղությամբ աշխատում են, նախագծման որոշ աշխատանքներ են իրականացվում: Հայաստանի վարչապետը կարևորել է համայնքներում աշխատանքները, քանի որ համայնքների մեծ մասը չի խոշորացվել: Ըստ Փաշինյանի՝ սուբվենցիոն ծրագրերի հետ կապված նրանց կարողությունները էականորեն պակաս են, և պետք է աջակցել:

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Տարին ավարտվում է, իսկ Գյումրիի 2023 թվականի բյուջեում դեռ փոփոխություններ են կատարվում

Գյումրիի ավագանին արձակուրդից հետո այսօր գումարել է հերթական նստաշրջանի առաջին նիստը, օրակարգում ունենալով 39 հարց:

Տարին ավարտվում է, բայց համայնքապետարանը դեռ շարունակում է տեղական բյուջեում փոփոխություններ ու տեղաշարժեր կատարել: Ըստ քաղաքապետի խորհրդական Լենա Ջիլավյանի, իրենք իրավունք ունեն վարչական բյուջեից մինչև 15 տոկոս տեղափոխել ֆոնդային բյուջե, քաղաքի կապիտալ ծախսերը կատարելու համար: Առաջարկվեց մոտ 347 մլն դրամ ուղղել պահուստային ֆոնդ: Եթե գումարը  չծախսվի, ապա ըստ գլխավոր ֆինանսիստի, կուղղեն որպես հաջորդ տարվա ազատ միջոց և պահուստային ֆոնդ կստեղծեն:

Տեղական բյուջեի որոշ հոդվածների մասով ծախսերը պակասեցվեցին, առանձնացված մոտ 12 մլն դրամը կուղղվի Համահայկական խաղերի ժամանակ մրցանակներ ստացած գյումրեցի մարզիկների պարգևատրմանը:

Գյումրի քաղաքի 2024-26 թվականների միջնաժամկետ ծախսերի ծրագիրը հաստատելու վերաբերյալ հարցը հաջորդն էր: Ջիլավյանն ասաց, որ ինքը դեմ է այդ ծրագրերին, դրանք շատ սխալ են, բայց քանի իրենց պարտադրում են, որ միջնաժամկետ ծախսերի ծրագիր պետք է կազմեն ու ներկայացնեն, իրենք էլ պարտավոր են կազմել ու ներկայացնել:

«Մենք մի տարվա բյուջեն ենք անընդհատ փոխում, ուր մնաց, որ 2 տարի հետոյի բյուջե կազմենք, ներկայացնենք: Ամեն դեպքում, մենք կազմել, ներկայացրել ենք»,-ասում է Ջիլավյանը:

Կարծիք հնչեց, որ այդ ծրագրերը զուտ ձևական բնույթ են կրում, ինչին հակառակվեց Գյումրիի քաղաքապետ Վարդգես Սամսոնյանը:

Գյումրիի բազմաբնակարան շենքերում ձմռան նախապատրաստական աշխատանքների, տանիքների ու շքամուտքերի նորոգման համար 19 համատիրություններին քաղաքային բյուջեից հատկացվեց 32 մլն դրամ: «Գյումրի ավտոբուս» ընկերությանն էլ ավելի քան 7 մլն դրամ պարտքով հատկացվեց՝ քաղաքային երթուղիներում աշխատող միկրոավտոբուսների պարտադիր ապահովագրության համար: Պարտքը վերադարձնելու են տարեվերջին:

Ավագանին հավանություն տվեց նաև Գյումրիի գլխավոր հատակագծի որոշ դրույթներ փոփոխության ենթարկելու վերաբերյալ նախագծին:

Կարինե Կազարովա

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com