Yearly Archives:2023

Շիրակի մարզպետարանի ենթակայության կառույցներում հայտնաբերվել են մի շարք խախտումներ

Մի շարք քաղաքացիների արձագանքների և նրանցից ստացված դժգոհությունների հետքերով, Շիրակի մարզպետ Նազելի Բաղդասարյանի որոշմամբ ստեղծված հանձնաժողովը ավելի քան 1 ամիս մշտադիտարկում է անցկացրել մարզպետարանի ենթակայության կառույցներում՝ դպրոցներ, պոլիկլինիկաներ, հիվանդանոցներ, մշակութային, սպորտային հաստատություններ: Հանձնաժողովը փորձում է հասկանալ, թե ինչպես է տեղի ունենում կառավարումն այդ կառույցներում, ինչպես են քաղաքացիներին ծառայությունները տրամադրվում:

Մարզպետի խորհրդական Արթուր Նաջարյանի հավաստմամբ, այս այցերի շրջանակներում իրենք շատ ավելին են բացահայտել, քան սպասում էին:

«Պոլիկլինիկաներում անցկացված մոնիտորինգի ժամանակ ակնհայտ դարձավ, որ շատ տեղերում աշխատանքի համատեղության արդյունքում, բժիշկները սահմանված ժամանակահատվածում  չեն լինում աշխատավայրում, իսկ դա լուրջ դժգոհություն է առաջացնում: Բողոքողների մեծ մասը գյուղական համայնքների բնակիչներն են, ովքեր հաշվառված են քաղաքային պոլիկլինիկաներում: Այցելում են, բժիշկը կամ տեղում չէ, կամ ընդհանրապես չի գալիս ու քաղաքացիների կուտակումներ են տեղի ունենում»,-ասում է Արթուր Նաջարյանն ու ավելացնում,- «Պետք է բոլոր կաբինետների մոտ փակցված լինեն ցուցանակներ, որտեղ նշված լինեն բժշկի անուն-ազգանունը, նեղ մասնագիտացումը և ժամատախտակը, թե ո՛ր օրը, ո՛ր ժամին է աշխատում, որպեսզի քաղաքացիները տեղյակ լինեն: Սակայն, դա բացակայում էր գրեթե բոլոր պոլիկլինիկաներում, ինչը խնդիր է»:

Քաղաքային որոշ պոլիկլինիկաներում քաղաքացիները փաստեցին, որ միջանցքներում ցուրտ է, հնարավոր չէ երկար սպասել: Մարդիկ ասում են, որ մրսում են, քանի որ բուժհաստատությունները լավ չեն ջեռուցվում: Ըստ Արթուր Նաջարյանի, իրենք նույնպես պոլիկլինիկաներում արձանագրել են ջեռուցման հետ կապված խնդիրներ:

«Ուսումնասիրությունների արդյունքում խնդիրներ ենք բացահայտել նաև  պոլիկլինիկաների աշխատողների հաստիքացուցակներում: Եղել են գրանցված մարդիկ, որոնք աշխատանքի չեն ներկայացել, կամ՝ աշխատանքային տաբելներում, որտեղ հաշվառում պետք է լինի ամենօրյա կտրվածքով, բայց, մարդիկ անգամ 2 շաբաթ հետոյի ստորագրություններ ունեն: Սա լուրջ խնդիր է, ի սկզբանե, մենք նկատի չենք էլ ունեցել, որ այսպիսի խնդիր կունենանք»,-ընդգծում է մարզպետի խորհրդականը:

Դպրոցներում, կրթական այլ հաստատություններում, որոշ մարզադպրոցներում մարզպետարանի հանձնաժողովն հայտնաբերել է դեպքեր, երբ  կանոնադրությամբ տվյալ հաստիք սահմանված չի եղել, բայց 15 տարուց ավելի այդ հաստիքը գործել է և այն մարդիկ են զբաղեցրել:

«Որոշ թանգարաններում տոմսերի վաճառքը գրանցված չի եղել, հաշվառման մատյաններում գրված չի եղել իրական այցելուների քանակը: Սա որոշակի ստվերային հարցեր է առաջ բերում»,-ասում է Արթուր Նաջարյանը:

«Այս մոնիտորինգային այցն իր մասշտաբայնությամբ ու խորքայնությամբ առաջինն է մարզում, ուստի կարծում եմ, դրանով էր պայմանավորված, որ շատ կառույցներ, երևի մատների արանքով էին նայում, կամ չէին հասկանում հարցի լրջությունը»,-նշում է նա և հայտնում. «Նպատակն ավելի շատ տեղում խնդիրները բացահայտելն ու աջակցելու փորձ անելն է, որպեսզի դրանք կարգավորվեն: Միտում չկա ինչ-որ մեկին պատժելու, չնայած որ, չի բացառվում, եթե լուրջ խախտումներ ի հայտ գան, ապա աշխատանքից հեռացնելու դեպքեր էլ կլինեն, և միգուցե դրանք ունենան իրավական հետևանքներ ևս»:

Ըստ Արթուր Նաջարյանի, մոնիտորինգի արդյունքները վերլուծվելու են և այն կառույցները, որոնցում խախտումներ են հայտնաբերվել, բացատրություն են տալու: Դրանց հիման վրա մարզպետարանի հանձնաժողովը կդիտարկի և արդեն կհասկանա, թե հետևանքները որոնք են լինելու:

Քաղաքացիները, ըստ Արթուր Նաջարյանի, բողոքում են հիմնականում ծառայություն մատուցողների ոչ թե մասնագիտական գիտելիքներից, այլ իրենց հանդեպ ոչ լավ վերաբերմունքից ու անբարեխիղճ աշխատանքից:

«Գյուղական համայնքների ամբուլատորիաներում շատ հետաքրքիր պատկերներ են եղել, որ առհասարակ բժիշկ չի եղել, իսկ դա տարիներ ի վեր ընդունված պրակտիկա է, որ եթե որևէ մեկը առողջական խնդիր ունի, կզանգահարի, ինչ որ մեկը կմոտենա: Բայց իրենք ստանում են աշխատավարձ և պարտավոր են աշխատանքի ժամին լինել աշխատավայրում, եթե վերադասի հանձնարարությամբ կամ թույլտվությամբ որոշակի գործառույթներով գործուղման մեջ չեն»,-ավելացնում է Արթուր Նաջարյանը:

Ըստ նրա, մարզպետարանը բողոքներ ստանում է ոչ միայն քաղաքացիներից, այլ նաև կառույցների աշխատողներից: Դրանց մասին իրենք իմանում են սոցիալական հարթակներում քաղաքացիների բարձրաձայնումներից և մարզպետարան ընդունելության եկած քաղաքացիներից: Հաճախակի են նաև այն դեպքերը, երբ կառույցների աշխատակիցները բողոքում են վերադասի կառավարումից, իրենց հանդեպ սուբյեկտիվ վերաբերմունքից, որոշակի այլ կազմակերպչական գործառույթներ վատ իրականացնելուց և այլն:

Այս բացահայտումները կորակվե՞ն արդյոք չարաշահումներ: Արթուր Նաջարյանը կարծում է, որ խնդիրը մարդկանց կողմից տարիներ շարունակ եղել է: Ոչ ճիշտ կառավարչական հմտություններ ունենալը և, այսպես ասած, պաշտպանված կամ երբեմն  իրենց արտոնյալ զգալով, ղեկավարները որոշակի գործառույթներ են թույլ տվել: Ու այս միջավայրում տվյալ տնօրենն իր աշխատանքային պարտականությունը չի իրականացրել: Երբեմն ոչ թե չի ցանկանում դա անել, այլ ինքը չի էլ պատկերացնում, թե դա ինչպես պետք է անել:

«Իսկ սա խնդիր է, ստացվում է, մենք ունենք հաստատություն, որտեղ կառավարում իրականացնող անձինք այնքան էլ կոմպետենտ չեն, կամ պարզապես, եթե կոմպետենտ են, ապա ավելի խորը ուսումնասիրություն պիտի կատարվի, հասկանալու համար, թե միտումնավոր շահագրգռությա՞մբ են պայմանավորված խախտումները, թե՞ պարզապես անփութության արդյունք են»,-ընդգծում է Արթուր Նաջարյանը:

Ասում է, մարզի կրթական հաստատություններում հաստիքների չարաշահումներ էլ կան, օրինակ, մեկ անձը տարբեր տեղեր է աշխատում տարբեր ազգանուններով՝ օրիորդական, ամուսնական: Հովանավորչությունը, ծանոթ-բարեկամի աշխատելը, ըստ Արթուր Նաջարյանի, ամենաշատ աչքի ընկնող և ամենատարածված խնդիրը չէ այս բացահայտումներում:

Դրանք արձանագրելն ու հնարավորինս լուծում տալն է լինելու հանձնաժողովի հետագա գործառույթը: Բայց որոշ խնդիրների լուծումն արագ չի լինի: Օրինակ, նեղ մասնագետ բժիշկների կամ հեռավոր սահմամերձ գյուղերում ուսուցիչների պակասը լրացնելու համար տարիներ են պետք:

«Հիմա էս մասով նախարարություններում քննարկում է գնում, մարզպետարանի կողմից էլ ուղիղ ձևով հարցը բարձրացվել է, որ պետք է նպատակային ծրագիր բացվի, որպեսզի մարզի շրջանավարտները սովորելուց հետո վերադառնան ու տեղում աշխատեն: Սպասում ենք հարցի հաջորդիվ զարգացումներին»,-հավաստեց պատասխանատուն:

Շիրակի մարզպետարանը մեկ այլ՝ իրավական հսկողությամբ ևս խախտումներ է հայտնաբերել, այս անգամ մարզի համայնքապետարաններում: Խոսքը ՀՀ տարածքային կառավարման և ենթակառուցվածների նախարարի հրամանով հաստատված տեղական ինքնակառավարման մարմինների սեփական լիազորությունների իրականացման նկատմամբ իրավական հսկողության մասին է: 2022 թվականի համապատասխան եռամսյակների համար ուսումնասիրվել են Անի, Արթիկ, Գյումրի, Ամասիա, Աշոցք, Ախուրյան համայնքների տեղական ինքնակառավարման մարմինների լիազորությունների իրականացման օրինականությունը ֆինանսների, քաղաքաշինության, կոմունալ տնտեսության, հողօգտագործման, արտակարգ իրավիճակների և քաղաքացիական պաշտպանության, տրանսպորտի, առևտրի և ծառայությունների, կրթության, մշակույթի, երիտասարդության հետ տարվող աշխատանքների, ֆիզիկական կուլտուրայի և սպորտի, առողջապահության, սոցիալական պաշտպանության, գյուղատնտեսության, անասնաբուժության և բուսասանիտարիայի, շրջակա միջավայրի պահպանության և զբոսաշրջության բնագավառներում:

Մարզպետարանի աշխատանքային խմբերը իրավական հսկողության ընթացքում հայտնաբերել են մի շարք խախտումներ և թերություններ, որոնք սահմանված ժամկետներում վերացնելու նպատակով համայնքների ղեկավարներին գրավոր առաջարկություններ են ներկայացվել։ Ըստ մարզպետարանի տեղական ինքնակառավարման և հանրապետական գործադիր մարմինների հարցերով վարչության պետ Արամ Անտոնյանի, ընդհանուր առմամբ չեն ապահովվել  բյուջեների հաշվետվողականության, բյուջետային մուտքերի կանխատեսումների և բյուջետային ելքերի նախահաշիվների հիմնավորվածության վերահսկողությունը ավագանու անդամների կամ աուդիտորական մասնագիտացված կազմակերպությունների միջոցով, թերի են բյուջետային ուղերձներում ներառվող համապատասխան տեղեկատվությունները։  Չեն հաստատվել կամ թերություններով է կատարվել առևտրի, ծառայությունների, զբոսաշրջության բնագավառներին վերաբերող՝ օրենքով նախատեսված թույլտվությունների տրամադրման կարգերի հաստատման գործընթացը։

«Ամասիա, Աշոցք, Գյումրի, Արթիկ համայնքներում նախադպրոցական հաստատություններում սահմանված չեն եղել առանձին հաստիքներ։ Բացի այդ, մարզի թվով 58 նախադպրոցական հաստատություններից մինչև օրս լիցենզավորված են թվով 44- ը։ Նոր միավորված բոլոր 4 համայնքներում օրենքով սահմանված ժամկետի խախտմամբ է հաստատվել համայնքի զարգացման հնգամյա ծրագիրը»,-ասում է Արամ Անտոնյանն ու ավելացնում. «Բոլոր համայնքներում չեն ապահովվել բյուջեի սեփական եկամուտների ամբողջական հավաքագրումները»:

Ավագանիները վերահսկողական բավականին մեծ լիազորություններ ունեն համայնքներում, բայց անգործության են մատնված ու չեն աշխատում: Ըստ Արամ Անտոնյանի, համայնքի ավագանին երբ ուզենա, կարող է հանձնաժողով ստեղծել և վերահսկել այս կամ այն ոլորտի աշխատանքը, ինչը, սակայն, չի անում:

Մյուս խնդիրն էլ այն է, որ մարզի համայնքապետարաններում և համայնքային ենթակայության ոչ բոլոր օբյեկտներում են առկա տարահանման սխեմաները, հակահրդեհային անկյունները, վահանակները և վարքականոնի վերաբերյալ տեղեկատվական նյութերը: Բավարար աշխատանքներ չեն տարվում նաև պատսպարման վայրերը պատրաստ վիճակի բերելու և ազդարարման համակարգերի ձեռքբերման ուղղությամբ։  Արձանագրված առանձին թերությունների վերացման համար նախատեսված են ավելի երկար ժամկետներ։

Շիրակի մարզպետարանի արձանագրած այս խախտումների հետ կապված, Ախուրյանի համայնքապետի տեղակալ Վարդան Իկիլիկյանն իր մեկնաբանություններն ունի: Ասում է, մանկապարտեզների լիցենզավորման խնդիրը պայմանավորված է նրանով, որ նախադպրոցական շատ հաստատությունների շենքերը տիպային չեն, հարմարեցված կառույցներ են, 1 երեխային բաժին ընկնող մակերեսը սահմանվածից պակաս է: Ասում է, թեկուզ վատը, բայց լավ է, որ գյուղերում մանկապարտեզ է բացվել, հիմա աշխատանքներ են տանում դրանք ընդլայնելու և տիպային շենքեր ունենալու ուղղությամբ:

Արթիկ խոշորացված համայնքի աշխատակազմի քարտուղար Արա Սուքիասյանը փոխանցեց, որ Արթիկի բնակավայրերում նույնպես որոշ մանկապարտեզներ դպրոցական շենքերում են ժամանակավորապես տեղակայված, բավականին մեծ աշխատանքներ պետք է տարվեն նոր շենքեր կառուցելու համար:

Ինչ վերաբերում է ավագանիների անգործությանը, Վարդան Իկիլիկյանը գտնում է, որ ավագանու ինստիտուտն է չկայացած և մինչև  ավագանու աշխատանքը չֆինանսավորվի, կառույցի գործունեությունը լիարժեք չի լինի:

Արա Սուքիասյանի դիտարկմամբ էլ, Եվրոպական ոչ մի երկրում ավագանին աշխատավարձ չի ստանում, պիտի օրենքում փոփոխություններ կատարվեն, որ ավագանին աշխատի:

Պատշաճ պատսպարման վայրեր չունենալու հետ կապված, ըստ Վարդան Իկիլիկյանի, խնդիրը երկար տարիներ անտեսվել էր, բնակիչները շենք-շինությունների նկուղները աղբանոցների են վերածել: Նաև պետական մոտեցում չի ցուցաբերվում խնդրին: Օրինակ է բերում, Ազատանում նոր դպրոց կառուցվեց, որի շինարարության ժամանակ, նախագծով չնախատեսվեց նկուղի կառուցում, հիմքից դուրս բերված հողը նորից ետ լցվեց: Ըստ նրա, պետք է շինությունների նախագծերում պատսպարաններ նախատեսվեն ու առանց դրանց, նախագծերը փորձաքննություն չանցնեն:

Արա Սուքիասյանի հավաստմամբ, որոշ շինություններում նախատեսվում են պատսպարման վայրեր, որոշներում՝ ոչ: Օրինակ, Արթիկ քաղաքում 144 երեխայի համար մանկապարտեզ է կառուցվելու, որի նկուղային հարկում 200 մարդու պատասպարման վայր է նախատեսված: Նաև, ըստ Արթիկի համայնքապետարանի աշխատակազմի քարտուղարի, պետք է հսկողություն տարվի, որ շինությունների նկուղները բնակիչները բաց պահեն, ոչ թե դրանք ամենքն իրենով անի, դուռը փակի ու անհետանա:

Հետգրություն: Վերոհիշյալ հարցազրույցները տեղի են ունեցել Շիրակի նախկին մարզպետ Նազելի Բաղդասարյանի հրաժարականից 2 օր առաջ:

Կարինե Կազարովա

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com; progressgyumri@mail.ru

Նազելի Բաղդասարյանը հրաժարականի դիմում է ներկայացրել

Շիրակի մարզպետ Նազելի Բաղդասարյանը հայտնել է, որ հրաժարականի դիմում է ներկայացրել: Այդ մասին նա տեղեկացրել է «Ֆեյսբուք»-ի իր էջում: «Սիրելի՛ շիրակցիներ, հարգելի՛ հայրենակիցներ, այսօր վարչապետ Նիկոլ Փաշինյանին եմ ներկայացրել Շիրակի մարզպետի պաշտոնից հրաժարականի իմ դիմումը։ Շնորհակալություն եմ հայտնում վարչապետին բարձր վստահության, գործադիր եւ օրենսդիր մարմնի գործընկերներին, ինչպես նաեւ դիվանագիտական եւ միջազգային կառույցների ներկայացուցիչներին՝ արդյունավետ համագործակցության համար։ Որքան էլ Շիրակի մարզպետի պաշտոնը պատասխանատու էր, նույնքան՝ պատվաբեր։ Վստահեցնում եմ, որ իմ պաշտոնավարման ժամանակահատվածում մարզի խնդիրների եւ հոգսերի լուծման համար մեկտեղել եմ իմ ջանքերն ու գիտելիքները։ Սակայն պետք է արձանագրեմ, որ որեւէ անհատ կամ պաշտոնյա չի կարող հաջողել իր գործում, եթե չունենա գիտակ թիմ եւ փորձառու համախոհներ։ Շնորհակալություն եմ հայտնում Շիրակի մարզպետի աշխատակազմին՝ ցուցաբերած բարձր արհեստավարժության եւ հետեւողական աշխատանքի համար։ Կատարված աշխատանքի լավագույն ցուցիչը ժողովրդի գնահատականն ու վերաբերմունքն է, որն օր օրի ավելանալով էլ ավելի էր պարտավորեցրել ինձ՝ որպես մարզպետի։ Յուրաքանչյուր շիրակցու խնդիրն ու հոգսը համարելով իմը՝ սրտացավորեն փորձել եմ օր առաջ լուծում տալ։ Իմ աշխատանքում որդեգրած անաչառությունը, արդարամտությունը, պետական մտածողությունը լիահույս եմ, որ հետայսու էլ կլինեն նշաձող Շիրակի մարզպետարանի համար։ Հրաժեշտ տալով իմ հարազատ մարզին՝ մաղթում եմ առաջընթաց եւ զարգացում։ Հարգանքով՝ Նազելի Բաղդասարյան»,- գրել է նա:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru

Գյումրիի մանկապարտեզների վարձավճարները 50 տոկոսով նվազել են միայն գյումրեցի երեխաների համար

Գյումրիի ավագանու որոշմամբ, փոփոխության են ենթարկվել տնտեսվարող սուբյեկտներից գանձվող տեղական տուրքերից մի քանիսի դրույքաչափերը, նաև համայնքային ենթակայության որոշ հաստատությունների համար սահմանված վարձավճարները:  Փոփոխություններից թերևս ամենագլխավորը, Գյումրիի մանկապարտեզներ հաճախող երեխաների վարձավճարի չափը 50 տոկոսով նվազեցնելն է: 2023 թվականից այն կկազմի 4000 դրամ, 8000 դրամի փոխարեն:

Գյումրի համայնքի ղեկավարի գլխավոր խորհրդական Հայկ Սուլթանյանի փոխանցմամբ, համայնքային ենթակայության 24 մանկապարտեզ է գործում քաղաքում, որտեղ մոտ 2300 երեխա է հաճախում: Ըստ նրա, սոցիալական այս պայմաններում ծնողների համար խնդիր է մանկապարտեզի վարձերի վճարումը, այդ իսկ պատճառով, համայնքապետարանը որոշել է մատչելի դարձնել երեխաների նախադպրոցական կրթությունը, վարձավճարի կեսը համայնքային բյուջեից փոխանցելով: Այս ծախսը տեղական բյուջեից կպահանջի մոտ 103 մլն դրամ: Ըստ Հայկ Սուլթանյանի, նախկինում գործող զեղչերի համակարգը պահպանվելու է: Վարձավճարի զեղչերից մոտ 400 երեխա է օգտվում:

Քաղաքապետի գլխավոր խորհրդականի տեղեկություններով, այժմ Գյումրիի համայնքապատկան նախակրթարաններ հաճախում է մանկապարտեզի տարիքի երեխաների միայն 45 տոկոսը: Նա դժվարացավ նշել, թե մյուս երեխաներից քանիսն են մասնավոր մանկապարտեզներ ու զարգացման կենտրոններ հաճախում, քանիսը նախադպրոցական կրթություն ստանալու հնարավորություն չունի և քանիսն են բացակայում քաղաքից: Ուստի, համայնքապետարանը չի կարողանա կանխատեսել, թե մանկապարտեզ հաճախող երեխաների թիվը որքանո՞վ կավելանա այս փոփոխությունից հետո:

Ի դեպ, Գյումրիում նախադպրոցական կրթությունն անվճար դարձնելու առաջարկներ համայնքի ավագանին բազմիցս է արել: Առաջին նախաձեռնողը ավագանու ԳԱԼԱ խմբակցությունն էր, որի անդամները 5 տարի առաջ էին խնդիրը բարձրաձայնել և պահանջել, որ Երևանի օրինակով, Գյումրիում նույնպես նախակրթարանների հաճախումները դառնան անվճար: Բայց առաջարկը մերժվել էր:

«Բալասանյան դաշինք» խմբակցության ավագանու անդամ Լուսինե Սանոյանը մեզ փոխանցեց, որ խմբակցության նիստին առաջարկվել է մանկապարտեզների վարձավճարները նվազեցնել 100%-ով։ Հարցը քննարկվել է Գյումրիի համայնքապետի հետ, լսել են նաև համապատասխան բաժնի աշխատակիցների կարծիքները։

«Ֆինանսական բաժնի կարծիքը և բյուջեի հմարավորությունները գնահատելով՝ առաջարկվել է այս պահին վարձավճարները նվազեցնել միայն 50%-ով, ինչը ընդունվել է ավագանու կողմից»,-ասում է Լուսինե Սանոյանը։

«Զարթոնք» խմբակցության ավագանու անդամ Վարդևան Հակոբյանն էլ հայտնեց, որ անցած տարի իրենց խմբակցությունը նույնպես հայտարարությամբ հանդես է եկել, որ ավագանին զիջումների գնա և մանկապարտեզները դառնան անվճար, քանի որ Գյումրին սոցիալական քաղաք է:

Գյումրիի ավագանու ՀՀԿ խմբակցության ավագանու անդամ Նարեկ Միրզոյանը նշեց, որ իրենց կուսակցությունը նույնպես իր առջև խնդիր է դրել մանկապարտեզների վարձավճարները 0-ական դարձնել:

Ի դեպ, մանկապարտեզների վարձավճարները կիսով չափ կնվազեցվեն միայն Գյումրիում հաշվառված ծնողների երեխաների համար, այլ բնակավայրերի հաշվառում ունեցողներին դա չի վերաբերվի:

Հաջորդ փոփոխությունը, ըստ Գյումրիի քաղաքապետի գլխավոր խորհրդականի, առնչվում է Գյումրիի բաղնիքների ու սաունաների աշխատանքին: Ժամը 24.00-ից հետո աշխատելու թույլտվություն ստանալու համար բաղնիքներն ու սաունաները տարեկան պետք է վճարեն  300 հազար դրամ՝ նախկին 500 հազարի փոխարեն։ Բայց ըստ Հայկ Սուլթանյանի, նման գործունեություն իրականացնող ոչ մի տնտեսվարող իրենց դեռ չի դիմել:

Իսկ համայնքի վարչական տարածքում անցկացվող տոնավաճառների յուրաքանչյուր մասնակից զբաղեցրած մեկ քառակուսի մետր տարածքի համար պետք է վճարի 200 դրամ`գործող 150 դրամի փոխարեն:
«Այս տարի տեղական տուրքերի և վճարների դրույքաչափերը սահմանելիս տվյալ օբյեկտին հարակից ընդհանուր օգտագործման տարածքներում հանրային սննդի ծառայության կազմակերպման թույլտվության համար առաջարկվել է հաշվի առնել ամառային և ձմեռային սեզոնները»,-ասում է Լուսինե Սանոյանը։

Ըստ այդմ էլ, տվյալ օբյեկտին հարակից ընդհանուր օգտագործման տարածքներում, ամառային սեզոնին հանրային սննդի ծառայություն կազմակերպելու թույլտվության համար՝ ամեն քառակուսի մետրի դիմաց սահմանվել է 15 հազար դրամ տեղական տուրք, իսկ ձմեռային սեզոնին՝ 10 հազար դրամ:

Ըստ Հայկ Սուլթանյանի, այս փոփոխությունները քաղաքացիների համար հարկային բեռ չեն ավելացնի, քանի որ հիմնականում պայմանավորված են զբոսաշրջիկների հոսքով, իսկ հոսքը կա:

Վարդևան Հակոբյանը նշեց, որ տեղական տուրքերի դրույքաչափերը սովորաբար պետք է հետաքրքրեն այդ տուրքերը վճարող տնտեսվարողներին: Բայց նրանցից և ոչ մեկը երբևէ չի ներկայանում այդ տուրքերի դրույքաչափերը սահմանելուց առաջ տեղի ունեցող հանրային լսումներին:

«Հանրային քննարկումները շատ պասիվ են անցնում, տնտեսվարողները կամ տեղական իշխանություններին շատ են վստահում, ինչը կասկածելի է, կամ ընդհանրապես չեն վստահում, կամ էլ ոչ մեկին չի մտահոգում, թե ինչ հարկեր կսահմանվեն: Այնինչ, հենց իրենք պետք է առաջարկներ ներկայացնեն, թե ինչքանով են իրատեսական սահմանված տուրքերի դրույքաչափերը»,-ասում է Վարդևան Հակոբյանը:

Շինթույլտվությունների վերաբերյալ տեղական տուրքերի դրույքաչափերն այս տարի չեն փոխվել: Հիշեցնենք, դրանք անցած տարի եռապատկվել էին: Օրինակ՝ 100 հազար դրամ տուրքը դարձել էր 300 հազար դրամ: Գյումրիի ավագանու անդամ Նարեկ Միրզոյանի խոսքով, դրույքաչափերը բարձր լինելու և դրանք վերանայելու հետ կապված դիմումներ քաղաքացիներից իրենց խմբակցությունը չի ստանում, ավելի շատ մարդիկ բողոքում են շինթույլտվությունների տրամադրման ժամկետներից: Դրանք շատ են ձգձգվում:

«Եղել են քաղաքացիներ, ովքեր ամռանը դիմել են Գյումրիի քաղաքապետարան ավտոտնակ կառուցելու թույլտվություն ստանալու համար, բայց շինթույլտվությունը ձմռանն են տվել»,-ասում է Նարեկ Միրզոյանն ու ավելացնում. «Խնդրով ,մշտապես քննարկումներ ենք ունեցել ավագանու խմբակցությունների հետ, բարձրաձայնել ենք, որ քաղշին ոլորտում ընթացակարգերի պարզեցման անհրաժեշտություն կա, խնդիրը կազմակերպչական գործառույթների մեջ է: Պարտավոր ենք այնպես անել, որ ավելի արագանան այդ գործերը և քաղաքացիները ազատվեն քաշքշուքներից»,-ասում է ավագանու անդամը: Ըստ նրա, խնդիրը ոչ միայն դիմումների մեծ թիվն է, այլ նաև շատ թղթաբանությունը:

Այս ոլորտը վաղուց բարեփոխումների կարիք ունի: Խնդիրը նոր չէ, շինթույլտվությունների ձգձգումները կանոնակարգել փորձել են նաև նախկին իշխանությունները, բայց արդյունք չի եղել:

Կարինե Կազարովա