Լրահոս

Հաղթանակ բնակավայրում խուլիգանական արարքների կատարման համար մեղադրվող 4 անձանցից 3-ը կալանավորվել են

Ապրիլի 21-ին Հայաստան-Վրաստան միջպետական ճանապարհը փակելու գործով խուլիգանական արարքների կատարման համար 4 մեղադրվողներից ևս երկուսը կալանավորվել են, տեղեկացնում է Քննչական կոմիտեն։ Ավելի վաղ կալանավորվել էր նրանցից ևս մեկը՝ «Մարտական եղբայրության» անդամ Արման Պետրոսյանը։ Ըստ ՔԿ-ի՝ նա խոչընդոտել է փակված փողոցում ԵԿՄ-ի «Ուազ»-ի տեղաշարժը: Քննչական կոմիտեի այսօրվա հաղորդագրության մեջ նշվում է, որ Այրում բնակիչը միջպետական ճանապարհը փակած քաղաքացիներից պահանջել է բացել ճանապարհը և իր վարած «ՈՒԱԶ» ավտոմեքենայով առաջ ընթացել, սակայն մի խումբ անձինք խոչընդոտել են մեքենայի ընթացքը։

«Անտեսելով ակցիայի վայրում ծառայություն իրականացնող ոստիկանների՝ առերևույթ խուլիգանական արարքները դադարեցնելու մասին պահանջները՝ նշված անձինք հարձակվել են «ՈՒԱԶ»-ի վրա, ձեռքերով ու ոտքերով բազմաթիվ հարվածներ հասցրել մեքենային՝ վնասելով դրա տարբեր հատվածները և կոտրելով դիմապակին։ Բացի այդ, նշված անձանցից մեկը կտրող-ծակող առարկայով վնասել է «ՈՒԱԶ»-ի անվադողը», – նշում է իրավապահ կառույցը: Իր հերթին, «Մարտական եղբայրություն»-ից ավելի վաղ պնդել են՝ սա քաղաքական հետապնդում է, իրենք Տավուշ էին մեկնել տեղաբնակների խնդրանքով նրանց սատարելու և մասնակցել են խաղաղ ակցիայի։ Կազմակերպության անդամները պնդում են, որ իրավապահները պետք է սլաքներն ուղղեն Երկրապահ կամավորականների անդամների ուղղությամբ, որոնք, նրանց փոխանցմամբ, «սադրել, ահաբեկել են խաղաղ ցուցարարներին»։

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Ցեղասպանության շարունակական վտանգն աշխարհում դեռ առկա է. ՀՀ ԱԳՆ

Չնայած գործադրվող ջանքերին՝ ցեղասպանության շարունակական վտանգն աշխարհում դեռ առկա է։ Այս մասին ասված է Հայաստանի Հանրապետության արտաքին գործերի նախարարության տարածած հայտարարության մեջ: «Ապրիլի 24-ին մենք ոգեկոչում ենք և գլուխ ենք խոնարհում 20-րդ դարի սկզբին Օսմանյան կայսրությունում իրագործված Հայոց ցեղասպանության նահատակների հիշատակի առջև: 1915թ․ սկսած՝ երիտթուրքական կառավարության իրականացրած մարդկության դեմ հանցագործության հետևանքով շուրջ 1,5 միլիոն հայ, այդ թվում՝ երեխաներ, կանայք և ծերեր, սպանվեցին միայն իրենց ազգային պատկանելիության՝ հայ լինելու հիմքով:

Միլիոնավոր հայեր զրկվեցին իրենց սեփականությունից և պատմամշակութային ու հոգևոր նյութական արժեքներից: Հայության դեմ իրականացված այս ոճրագործությունը հետագայում հիմք դարձավ «Ցեղասպանության հանցագործությունը կանխարգելելու և պատժելու մասին» միջազգային կոնվենցիայի սահմանման համար։ Ցավալիորեն, չնայած գործադրվող ջանքերին, ցեղասպանության շարունակական վտանգն աշխարհում դեռ առկա է։ Արդեն 21-րդ դարում՝ 2020-2023 թթ., մենք ականատես եղանք հերթական էթնիկ զտման քաղաքականության ու դրա հետևանքներին. 150 հազարից ավել հայ պատերազմի, այլատյացության, ինքնության հիման վրա հանցագործությունների, պաշարման և բնակչության նկատմամբ ահաբեկման հետևողական գործողությունների հետևանքով բռնի տեղահանվեց և ստիպված եղավ լքել իր պատմական հայրենիքը։

Հաշվի առնելով ժամանակակից աշխարհում ցեղասպանության ռիսկերն ու արձանագրվող դեպքերը, մարդու իրավունքների և միջազգային մարդասիրական իրավունքի կոպիտ խախտումների բազմաթիվ այլ օրինակները՝ Հայաստանը միջազգային հարթակներում շարունակում է ակտիվ ներգրավվածությունը ցեղասպանության հանցագործության դեմ պայքարում ջանքերի համադրման, նոր ցեղասպանությունների և մարդկության դեմ հանցագործությունների կանխարգելման և զոհերի իրավունքների պաշտպանության նպատակով»,- ասված է Հայոց ցեղասպանության 109-րդ տարելիցի կապակցությամբ հրապարակված ԱԳՆ հայտարարության մեջ:

https://www.mfa.am/hy/interviews-articles-and-comments/2024/04/24/Statement_Armenian_Genocide/12612

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Հայաստանի և Ադրբեջանի սահմանին երկու երկրների փորձագիտական խմբերը սկսել են կոորդինատների ճշտման գործընթացը. ՀՀ կառավարություն

Հայաստանի Հանրապետության և Ադրբեջանի Հանրապետության միջև պետական սահմանի սահմանազատման ու սահմանային անվտանգության հարցերով հանձնաժողովի և Ադրբեջանի Հանրապետության և Հայաստանի Հանրապետության միջև պետական սահմանի սահմանազատման պետական հանձնաժողովի 8-րդ հանդիպման արդյունքներով ձեռք բերված պայմանավորվածությունների համաձայն՝ 2024 թվականի ապրիլի 23-ին Հայաստանի Հանրապետության և Ադրբեջանի Հանրապետության սահմանին երկրների փորձագիտական խմբերը սկսել են կոորդինատների ճշտման գործընթացը՝ հիմնվելով տեղում գեոդեզիական չափումների վրա։ Այս մասին հաղորդագրություն է տարածել ՀՀ կառավարությունը։

https://www.gov.am/am/news/item/1586

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

ԵՄ-ն լիովին աջակցում է 1991թ․ Ալմա-Աթայի հռչակագրի հիման վրա սահմանազատման գործընթացի մեկնարկի պայմանավորվածությանը․ Կլաար

Վարչապետ Նիկոլ Փաշինյանն ընդունել է Հարավային Կովկասի ու Վրաստանի ճգնաժամի հարցերով Եվրոպական միության հատուկ ներկայացուցիչ Տոյվո Կլաարին․ տեղեկացնում են ՀՀ վարչապետի աշխատակազմից։ Հանդիպմանը մասնակցել է նաև Հայաստանի Հանրապետությունում ԵՄ պատվիրակության ղեկավար, դեսպան Վասիլիս Մարագոսը: Անդրադարձ է կատարվել տարածաշրջանային իրավիճակին, Հայաստանի և Ադրբեջանի միջև խաղաղության պայմանագրի շուրջ բանակցություններին, սահմանազատման գործընթացին: Քննարկվել են Հայաստան-Եվրոպական միություն համագործակցությանն ու դրա հետագա զարգացմանը վերաբերող հարցեր: Տոյվո Կլաարը ևս մեկ անգամ նշել է, որ ԵՄ-ն լիովին աջակցում է Հայաստան-Ադրբեջան բանակցային գործընթացին՝ համապարփակ ու տևական կարգավորման նպատակով, ինչպես նաև 1991թ․ Ալմա-Աթայի հռչակագրի հիման վրա սահմանազատման գործընթացի մեկնարկի պայմանավորվածությանը:

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Սահմանազատման հանձնաժողովին կից աշխատանքային խմբեր կստեղծվեն. ՀՀ կառավարություն

ՀՀ վարչապետ Նիկոլ Փաշինյանը Հայաստանի Հանրապետության և Ադրբեջանի Հանրապետության միջև պետական սահմանի սահմանազատման և սահմանային անվտանգության հարցերով հանձնաժողովին կից աշխատանքային խումբ ստեղծելու մասին որոշում է ստորագրել։ Հիմք ընդունելով «Կառավարության կառուցվածքի և գործունեության մասին» Հայաստանի Հանրապետության օրենքի 7-րդ հոդվածի 5-րդ մասը, ինչպես նաև հաշվի առնելով Հայաստանի Հանրապետության վարչապետի 2022 թվականի մայիսի 23-ի «Հայաստանի Հանրապետության և Ադրբեջանի Հանրապետության միջև պետական սահմանի սահմանազատման և սահմանային անվտանգության հարցերով հանձնաժողով ստեղծելու մասին» N 570-Ա որոշումը՝

1. Բաղանիս (ՀՀ) – Բաղանիս Այրում (ԱՀ), Ոսկեպար (ՀՀ) – Աշաղը Ասկիպարա (ԱՀ), Կիրանց (ՀՀ) – Խեյրումլի (ԱՀ) և Բերքաբեր (ՀՀ) – Կըզըլ Հաջիլի (ԱՀ) բնակավայրերի միջև սահմանագծի համապատասխան հատվածների՝ տեղանքում գեոդեզիական չափումների արդյունքում կոորդինատները հստակեցնելու և համապատասխան Արձանագրություն-նկարագրության նախագիծ կազմելու նպատակով ստեղծել Հայաստանի Հանրապետության և Ադրբեջանի Հանրապետության միջև պետական սահմանի սահմանազատման և սահմանային անվտանգության հարցերով հանձնաժողովին կից աշխատանքային խումբ:

2. Աշխատանքային խմբի աշխատանքները կազմակերպելու նպատակովներգրավել ոլորտային մասնագետներ՝ գեոդեզիստներ և քարտեզագիրներ։

3. Հաստատել աշխատանքային խմբի անհատական կազմը՝ համաձայնհավելվածի: 4. Հանձնարարել Պաշտպանության նախարարին, Տարածքային կառավարման և ենթակառուցվածքների նախարարին, Կադաստրի կոմիտեի ղեկավարին և Ազգային անվտանգության ծառայության տնօրենին՝ անհրաժեշտ օժանդակություն ապահովել խմբի աշխատանքներին: ՀՀ վարչապետ Նիկոլ Փաշինյանի մեկ այլ որոշմամբ՝ ՀՀ և Ադրբեջանի Հանրապետության միջև պետական սահմանի սահմանազատման և սահմանային անվտանգության հարցերով հանձնաժողովին կից աշխատանքային խումբ կստեղծվի:

«Հիմք ընդունելով «Կառավարության կառուցվածքի և գործունեության մասին» Հայաստանի Հանրապետության օրենքի 7-րդ հոդվածի 5-րդ մասը, ինչպես նաև հաշվի առնելով Հայաստանի Հանրապետության վարչապետի 2022 թվականի մայիսի 23-ի «Հայաստանի Հանրապետության և Ադրբեջանի Հանրապետության միջև պետական սահմանի սահմանազատման և սահմանային անվտանգության հարցերով հանձնաժողով ստեղծելու մասին» N 570-Ա որոշումը՝ 1. Բաղանիս (ՀՀ) – Բաղանիս Այրում (ԱՀ), Ոսկեպար (ՀՀ) – Աշաղը Ասկիպարա (ԱՀ), Կիրանց (ՀՀ) – Խեյրումլի (ԱՀ) և Բերքաբեր (ՀՀ) – Կըզըլ Հաջիլի (ԱՀ) բնակավայրերի միջև սահմանագծի համապատասխան հատվածների՝ տեղանքում գեոդեզիական չափումների արդյունքում կոորդինատները հստակեցնելու և համապատասխան Արձանագրություն-նկարագրության նախագիծ կազմելու նպատակով ստեղծել Հայաստանի Հանրապետության և Ադրբեջանի Հանրապետության միջև պետական սահմանի սահմանազատման և սահմանային անվտանգության հարցերով հանձնաժողովին կից աշխատանքային խումբ։ 2. Հաստատել աշխատանքային խմբի անհատական կազմը՝ համաձայն հավելվածի»,- ասված է որոշման մեջ: Աշխատանքային խմբում ընդգրկվել են Տավուշի մարզի մի շարք բնակավայրերի վարչական ղեկավարներ, ինչպես նաև Տավուշի մարզպետ Հայկ Ղալումյանը։

https://www.e-gov.am/decrees/item/26921/

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Ադրբեջանն ամբողջությամբ ավերել է Արցախի Քարին տակ գյուղը

Արցախը էթնիկ զտման ենթարկելուց հետո Ադրբեջանը շարունակում է հայկական հետքերի ոչնչացման պետական քաղաքականությունը։ Բաքուն ամբողջությամբ քանդել է հայկական Քարին տակ գյուղը։ Համացանցում տարածվում են արբանյակային լուսանկարները, որոնք ցույց են տալիս՝ գյուղն այլևս գոյություն չունի։ Հիշեցնենք՝ 44-օրյա պատերազմի հետևանքով գյուղն ամբողջությամբ հայաթափվել ու անցել էր Ադրբեջանի վերահսկողության տակ։ Ավելի վաղ ադրբեջանցիները քանդել էին գյուղի գերեզմանոցը։ Ավելի վաղ էլ արբանյակային լուսանկարները փաստել էին, որ 2024 թվականի փետրվարին Ադրբեջանը հողին է հավասարեցրել Շուշիի Կանաչ ժամ (Սուրբ Հովհաննես Մկրտիչ) եկեղեցին։

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Տավուշում միջադեպերի առնչությամբ «Մարտական եղբայրության» 7 անդամ է ձերբակալվել. ՔԿ

«Մարտական եղբայրություն» ՀԿ-ի յոթ անդամ է ձերբակալվել Տավուշի մարզում միջպետական ավտոճանապարհը փակելու ընթացքում առերևույթ խուլիգանական արարքների կատարման մեջ մասնակցության կասկածանքով, հաղորդում է Քննչական կոմիտեն։ Ապրիլի 21-ին՝ ժամը 15:50-ի սահմաններում, Հաղթանակի «Վոդխոզ» կոչվող հատվածում՝ դեպի Բագրատաշեն բնակավայրի ուղղությամբ, «Մարտական եղբայրություն» կազմակերպության 3 անդամներ և մի խումբ այլ քաղաքացիներ փակել են միջպետական ավտոճանապարհը։ Մեկ այլ բնակիչ պահանջել է բացել այն, որից հետո իր «ՈՒԱԶ» ավտոմեքենայով առաջ է ընթացել, սակայն քաղաքացիները, ըստ Քննչականի, խոչընդոտելով տրանսպորտային միջոցների ընթացքին՝ չեն թույլատրել: Ըստ հաղորդագրության՝ մի խումբ քաղաքացիներ ձեռքերով հարվածել և կոտրել են ավտոմեքենայի դիմապակին, ապա դիմել են փախուստի: Իսկ արդեն ճանապարհի բացվելուց հետո Մ․ Ա․-ն վիճաբանության մեջ է մտել ԱԺ «Հայաստան դաշինք» խմբակցության պատգամավոր Գառնիկ Դանիելյանի հետ, ձեռքով հարվածել նրան և պատճառել մարմնական վնասվածք։ Նախաձեռնվել է քրեական վարույթ:

https://www.investigative.am/news/tavoushi-marzoum-mijpetakan-avtochanaparhy-pakelou-yntacqoum-arerevouyt-xouliganakan-ararqneri-katarman-mej-masnakcoutyan-kaskacanqov-7-andz-e-dzerbakalvel

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Գյումրիի համայնքապետարանի աստիճաններին ավտոմեքենայով բարձրացած վարորդը ձեռբակալվել է

Այսօր  առավոտյան  միջադեպ է տեղի ունեցել   Գյումրիի համայնքապետարանի վարչական շենքի մոտ: «Վարդանանց»  հրապարակում  Մերսեդես մակնիշի ավտոմեքենայի վարորդը  մեքենան անկանոն վարելուց հետո, դուրս է եկել երթևեկելի գոտուց , մեքենայով  բարձրացել ու կայանել   է Գյումրիի  համայնքապետարանի վարչական շենքի աստիճանների վրա: Ըստ  ականատեսների, մեքենայի վարորդը  ձեռքին  ունեցել է դրոշ և  մեքենայով քաղաքապետարանի շենք բարձրանալը եղել է   բողոքի ակցիա՝ ուղղված Գյումրիի համայնքապետ Վարդգես Սամսոնյանի դեմ:

Ըստ տարածված տեղեկությունների, վարորդը Մուշ  թաղամասի բնակիչ, գործարար Էմին Ոսկանյանն է, ով  վիճելի հարց ունի համայնքապետարանի հետ և տևական ժամանակ է, չի լուծվում հողհատկացման հետ կապված  խնդիրը:Այս կերպ նա ցանկացել է իր դժգոհությունը հայտնել  համայնքի ղեկավարի  դեմ: Վարորդը երկար ժամանակ փակվել էր մեքենայում  և հրաժարվում էր դուրս գալ, նրա հետ բանակցում էին Շիրակի մարզի ոստիկանապետը,  Գյումրիի պարեկային ծառայության   հրամանատարն ու   աշխատակիցները: Չնայած  օրը կիրակի էր ու ոչ աշխատանքային, բայց  վարորդը պահանջում էր  հանդիպում  Վարդգես Սամսոնյանի հետ:

Միջադեպից մոտ  մեկ ժամ   անց,  ոստիկանության ու պարեկային ծառայության աշխատակիցներին հաջողվեց   վարորդին դուրս բերել մեքենայից, նա այժմ   ձերբակալված է  ու գտնվում է ոստիկանության բաժանմունքում: Արտառոց միջադեպից հետո  Գյումրի համայնքի ղեկավար Վարդգես Սամսոնյանը համայնքապետարանի շենքի մոտ հանդիպել է լրագրողներին ու  նշել, որ անկախ քաղաքացու  և համայնքապետարանի միջև եղած տարաձայնություններից, կատարվածն անընդունելի է ու  վարորդը պետք է պատժվի օրենքի ամբողջ խստությամբ, որպեսզի   նմանատիպ  միջադեպերի կրկնությունը  հաջորդիվ բացառվի: Իսկ թե ինչ՞ խնդիրներ է ունեցել քաղաքացին համայնքապետարանի հետ և ինչու՞ նրան հողհատկացում չի կատարվել, Վարդգես Սամսոնյանը չի մանրամասնել:  Ըստ  շրջանառվող լուրերի, ավտմեքենայով   համայնքապետարանի աստիճանների   վրա բարձրացած ու բողոքի ակցիա անող  վարորդը Գյումրիի համայնքապետարանի «Կոմունալ ծառայություն» ՀԲԸ-ի ղեկավար Արտավազդ  Ոսկանյանի եղբայրն է:

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com