Վերականգնվել է պետությանը պատճառված վնասից 205 մլն դրամը
ՀՀ քննչական կոմիտեի հատկապես կարևոր գործերի քննության գլխավոր վարչության կիբեռհանցագործությունների և բարձր տեխնոլոգիաների ոլորտում կատարված հանցագործությունների քննության վարչությունում շարունակվում է հանցավոր կազմակերպության անդամների կողմից ներդրումային խարդախություններով զբաղվելու, փողերի լվացում կատարելու, առանձնապես խոշոր չափերով թմրամիջոց իրացնելու, ձեռք բերելու և պահելու, ապօրինի գործունեություն իրականացնելու և առանձնապես խոշոր չափերով վնաս պատճառելու դեպքերի առթիվ նախաձեռնված քրեական վարույթի նախաքննությունը:
Քրեական վարույթի նախաքննության ընթացքում պետական բյուջե է վերականգնվել 205 մլն ՀՀ դրամ գումար:
Նախաքննությունը շարունակվում է։
Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ Քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
Քննարկվել են ԵՄ վիզաների ազատականացման գործընթացի շրջանակում իրականացվող աշխատանքները․ ՆԳ նախարարն ընդունել է ԵՄ պատվիրակության ղեկավարին
Հունիսի 2-ին Ներքին գործերի նախարար Արփինե Սարգսյանն ընդունել է Հայաստանում Եվրոպական միության պատվիրակության ղեկավար, արտակարգ և լիազոր դեսպան Վասիլիս Մարագոսին, հայտնում են ՆԳՆ-ից։
«Նախարար Սարգսյանը ողջունել է դեսպան Մարագոսին՝ ընդգծելով երկկողմ սերտ և արդյունավետ համագործակցությունը, ինչը շարունակաբար ընդլայնվում է տարբեր ոլորտներում։
Դեսպան Մարագոսը շնորհակալություն է հայտնել ջերմ ընդունելության համար՝ վերահաստատելով Եվրոպական միության աջակցությունը բարեփոխումներին։
Հանդիպման ընթացքում քննարկվել են ԵՄ վիզաների ազատականացման գործընթացի շրջանակում իրականացվող աշխատանքները՝ ներառյալ օրենսդրական բարեփոխումների և բիոմետրիկ անձնագրերի ներդրման ընթացքը։
Քննարկվել են նաև նախարար Սարգսյանի առաջիկա այցը Բրյուսել և այն օրակարգային հարցերը, որոնք նախատեսվում է քննարկել այցի ընթացքում։
Կողմերն անդրադարձել են նաև ոստիկանության և փրկարար ծառայության ոլորտներում համագործակցության ընթացիկ ծրագրերին ու ԵՄ նոր աջակցության տրամադրմանը»,-ասված է հաղորդագրության մեջ։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
Հայաստանի և Ադրբեջանի անհայտ կորածների հարցերով զբաղվող հանձնաժողովների ներկայացուցիչները հանդիպել են
Տեղի է ունեցել Հայաստանի և Ադրբեջանի անհայտ կորածների հարցերով զբաղվող հանձնաժողովների ներկայացուցիչների հանդիպում։ Քննարկման ընթացքում կողմերն անդրադարձել են հակամարտության ընթացքում անհայտ կորած անձանց ճակատագրի պարզաբանմանն առնչվող հումանիտար հարցերին։
Հանդիպման շրջանակում դիտարկվել են տեղեկատվության փոխանակման, ինչպես նաև որոնողական աշխատանքների կազմակերպման և համակարգման հնարավորությունները։
Կողմերը շեշտել են հումանիտար ոլորտում շարունակական երկխոսության կարևորությունը և վերահաստատել իրենց պատրաստակամությունը՝ շարունակելու շփումները՝ ի շահ անհայտ կորած անձանց ընտանիքների։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
Գլխավոր դատախազությունը պահանջում է ՊԵԿ նախկին պաշտոնյա Հայկազ Մկրտչյանից բռնագանձել անշարժ գույքեր, դրամական միջոցներ
Հակակոռուպցիոն դատարանը վարույթ է ընդունել Գլխավոր դատախազության՝ ապօրինի ծագում ունեցող գույքի բռնագանձման վերաբերյալ հերթական հայցադիմումը:
ՀՀ գլխավոր դատախազության ապօրինի ծագում ունեցող գույքի բռնագանձման գործերով վարչությունը պահանջ է ներկայացրել դատարանին ՀՀ պետական եկամուտների կոմիտեի համալիր հարկային ստուգումների վարչության պետի նախկին տեղակալ Հայկազ Յուրիկի Մկրտչյանից և վերջինիս փոխկապակցված անձանցից հօգուտ Հայաստանի Հանրապետության բռնագանձել՝
- Երևան քաղաքում գտնվող 2 անշարժ գույք.
- 1 շարժական գույք.
- 1 իրավաբանական անձում մասնակցության իրավունք.
- 1 գնման իրավունք.
- 38 միլիոն 118 հազար դրամ՝ որպես ապօրինի եկամուտների և միջոցների մնացորդ.
- 5 միլիոն 255 հազար դրամ, որը չի հիմնավորվում անձի օրինական եկամուտներով, ունի ապօրինի ծագում, 2004-2023 թվականների ընթացքում փոխանցվել է բարեխիղճ ձեռք բերողի կամ հնարավոր չէ նույնականացնել և բռնագանձել՝ հիմք ընդունելով «Ապօրինի ծագում ունեցող գույքի բռնագանձման մասին» ՀՀ օրենքի 20-րդ հոդվածի 4-րդ մասի իրավակարգավորումը:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
Արմեն Գևորգյանը մեղադրվում է շուրջ 5 մլրդ դրամի փողերի լվացման համար. նրա վերաբերյալ քրեական վարույթով նախաքննությունն ավարտվել է
«Նախաքննությամբ պարզվել է, որ վերը նշված բարձրաստիճան պաշտոնատար անձի և վերջինիս մերձավոր ազգականների անվամբ 2004-2018 թվականների ընթացքում գրանցվել է Երևան քաղաքում և ՀՀ մարզերում գտնվող՝ հիշյալ պաշտոնյային փաստացի պատկանող ընդհանուր 39 անշարժ գույքերի նկատմամբ սեփականության իրավունքը։ Մասնավորապես, Երևան քաղաքում և ՀՀ մարզերում գտնվող անշարժ գույքերի պայմանագրային արժեքը կազմել է 751.268.208 ՀՀ դրամ, մինչդեռ նույն անշարժ գույքերի միջին շուկայական արժեքը գործարքի կատարման ժամանակ ընդհանուր կազմել է ավելի քան 4.843.530.000 ՀՀ դրամ: Բարձրաստիճան պաշտոնյայի հետ փոխկապակցված անձանց անվամբ Չեխիայի Հանրապետությունում գտնվող ևս 10 անշարժ գույքերի ընդհանուր շուկայական արժեքը կազմել է 391.920.000 ՀՀ դրամին համարժեք 920.000 ԱՄՆ դոլար։
Բացի դրանից՝ պարզվել է, որ նշված անձինք բանկային գործարքների եղանակով շրջանառել են դրամական միջոցներ, սակայն ինչպես գնված անշարժ գույքերի շուկայական արժեքների, այնպես էլ շրջանառված դրամական միջոցների հարաբերակցությունն էականորեն տարբերվել է նրանց կողմից ստացված եկամուտներից։
Հանցավոր ճանապարհով ձեռք բերված առանձնապես խոշոր չափերով գույքն օրինականացնելու (փողերի լվացման) համար ՀՀ նախկին բարձրաստիճան պաշտոնատար անձին մեղադրանք է ներկայացվել 2003 թվականի ապրիլի 18-ին ընդունված ՀՀ քրեական օրենսգրքի 190-րդ հոդվածի 3-րդ մասի 1-ին և 3-րդ կետերով։
Քրեական վարույթով նախաքննությունն ավարտվել է: Վարույթի նյութերը մեղադրական եզրակացությամբ հանձնվել են հսկող դատախազին՝ այն հաստատելու և դատարան ուղարկելու միջնորդությամբ»,- նշված է հաղորդագրության մեջ:
Ծանուցում. Հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
Ոստիկանապետն ազատվել է զբաղեցրած պաշտոնից
ՀՀ վարչապետ Նիկոլ Փաշինյանի որոշմամբ ՀՀ ՆԳ նախարարի տեղակալ, ոստիկանության պետ Արամ Հովհաննիսյանը ազատվել է զբաղեցրած պաշտոնից: «Ղեկավարվելով «Ոստիկանությունում ծառայության մասին» օրենքի 13-րդ հոդվածի 2-րդ մասով, 45-րդ հոդվածի 1-ին մասի 1.1-ին կետով և 2-րդ մասով, ինչպես նաև «Հանրային ծառայության մասին» օրենքի 9-րդ հոդվածի 7-րդ մասով՝ Արամ Հովհաննիսյանին ազատել ոստիկանության պետ-ներքին գործերի նախարարի տեղակալի պաշտոնից և ոստիկանությունում ծառայությունից»,- ասված է որոշման մեջ:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
Ֆրանսիայի պատվո հյուպատոսությունը Գորիսում
Ֆրանսիայի պատվո հյուպատոսության գրասենյակի բացման հանդիսավոր արարողությանը մասնակցել են Հայաստանի արտաքին գործերի նախարարի տեղակալ Վահան Կոստանյանը, ՀՀ տարածքային կառավարման և ենթակառուցվածքների նախարար Դավիթ Խուդաթյանը, Ֆրանսիայում Հայաստանի դեսպան Արման Խաչատրյանը, Հայաստանում Ֆրանսիայի դեսպան Օլիվիե Դըկոտինյին, Հայաստանի Ազգային ժողովի պատգամավոր Վլադիմիր Վարդանյանը, Գորիսում Ֆրանսիայի պատվո հյուպատոս Կարմեն Ափունցը, Սյունիքի մարզպետ Ռոբերտ Ղուկասյանը, Շիրակի մարզպետ Դավիթ Առուշանյանը։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
Երկրաշարժ Լոռու մարզի Սպիտակ քաղաքից 11 կմ հարավ-արևելք
ՆԳՆ Սեյսմիկ պաշտպանության տարածքային ծառայության սեյսմոլոգիական ցանցի կողմից գրանցվել է հյուսիսային լայնության 40.79⁰ և արևելյան երկայնության 44․39⁰ աշխարհագրական կոորդինատներով Հայաստան՝ Լոռու մարզի Սպիտակ քաղաքից 11 կմ հարավ-արևելք, օջախի 10 կմ խորությամբ, 3․0 մագնիտուդով երկրաշարժ։ Փրկարար ծառայությունից հայտնում են, որ էպիկենտրոնային գոտում ստորգետնյա ցնցման ուժգնությունը կազմել է 4 բալ: Երկրաշարժը զգացվել է Լոռու մարզի Սպիտակ, Վանաձոր քաղաքներում, ինչպես նաև Արևաշող և Լեռնապատ գյուղերում՝ 3 բալ ուժգնությամբ։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
Գյումրու պատմական կառույց «Ճերմակ հիվանդանոցի» շենքը չի վաճառվի.տեղի է ունեցել Գյումրու ավագանու արտահերթ նիստը
Գյումրու ավագանին այսօր արտահերթ նիստ է գումարել։ Օրակարգում ընդգրկված էին համայնքի ղեկավարին կից հասարակական կարգով գործող խորհրդակցական մարմիններ ձևավորելու և դրանց կազմերը համալրելու մասին հարցերը, ինչպես նաև սուբվենցիոն և քաղաքաշինական այլ ծրագրերին առնչվող հարցեր։
Ընդդիմադիր «Քաղաքացիական պայմանագիր» խմբակցությունը գրեթե բոլոր հարցերին կողմ է քվեարկել։ Ձեռնպահ է եղել միայն Գյումրու նախկին «Ճերմակ հիվանդանոցի» շենքի վաճառքը չեղարկող հարցին։ Այս շենքը վաճառքի էր հանվել ՔՊ-ի և «Բալասանյան դաշինքի» կոալիցիոն կառավարման օրոք։ Ըստ Վարդան Ղուկասյանի, այն պետք է վերականգնվի և որպես հիվանդանոց ծառայի քաղաքին, որ Գյումրին 2-րդ հիվանդանոց ունենա։
Ավագանու որոշմամբ, շենքը չի վաճառվի։
«Քաղաքացիական պայմանագիր» խմբակցության ավագանու անդամ Քնարիկ Հարությունյանը ողջունեց որոշ գույքեր համայնքին վերադարձնելու քաղաքապետի քայլը և առաջարկեց, որ Վարդան Ղուկասյանն էլ վերադարձնի օրինակ` Գյումրու դատարանի նախկին շենքը, Կենտրոնական զբոսայգու այն 5 հողակտորները, որոնք օտարվել են և դարձել իր ընտանիքի սեփականությունը:
Ի դեպ, դատախազությունը պահանջում է Վարդան Ղուկասյանից բռնագանձել 17 անշարժ գույք, 1 ավտոմեքենա, մոտ 223 մլն դրամ:
Կառավարությունը մինչև մայիսի 25-ն է ժամկետ տվել Գյումրու համայնքապետարանին, սուբվենցիոն ծրագրերի հայտեր ներկայացնելու համար։ Այսօրվա նիստի ժամանակ նշվեց, որ սուբվենցիոն ծրագրերով Գյումրիում 18 փողոցների հիմնանորոգում է կատարվելու, ընդհանուրը 2 մլրդ 251 մլն դրամ արժեքով։ Գումարի 55 տոկոսը տրամադրվելու է համայնքային բյուջեից, իսկ 45 տոկոսը՝ մոտ 1 մլրդ դրամ, պետական բյուջեի համաֆինանսավորումն է լինելու։
ՔՊ-ական ավագանու անդամ Սարիկ Մինասյանն առաջարկեց, որ ավագանու անդամներից հանձնաժողով կազմեն ու վերահսկեն փողոցաշինության ընթացքը, որպեսզի նախկինում արված անորակ շինարարությունը չշարունակվի։
Վարդան Ղուկասյանը համաձայն էր առաջարկի հետ, նշեց, որ նախկինում, իր պաշտոնավարման ժամանակ, երաշխիքային ժամկետը 3 տարի էր, հիմա 1 տարի է։ Փոխելու են պայմանագրերը, երաշխիքային ժամկետները 3 տարի են դարձնելու։
ՔՊ-ական ավագանու անդամներից մեկը նշեց, որ «Բալասանյան դաշինքի» իշխանության տարիներին սուբվենցիոն ծրագրով, 800 մլն դրամով արևային կայաններ են ձեռք բերվել ու տեղադրվել համայնքային ենթակայության հաստատությունների տանիքներին՝ էներգիա տնտեսելու նպատակով։ Բայց, ըստ ավագանու անդամի, այդ համակարգերի մի մասը նախատեսված հզորության միայն 30 տոկոսի չափով է աշխատում, որոշներն ընդհանրապես չեն աշխատում, ուղղակի հարմարեցվել են շենքերի տանիքներին։
Վարդան Ղուկասյանը հայտնեց, որ խնդիրը խորքային ուսումնասիրելու են, առայժմ իրենց ուժերով են փորձում հասկանալ իրավիճակը, եթե տեսնեն չի ստացվում, ապա անկախ աուդիտի կհրավիրեն։
Ավագանու նիստից հետո Վարդան Ղուկասյանը պատասխանեց լրագրողների հարցերին։ Նշեց, որ քաղաքապետարանում քաղաքաշինական հարցերով հսկայական դիմումներ են կուտակվել քաղաքացիներից, որոնք ընթացք չեն ստանում թղթաբանության պատճառով։ Ըստ նրա, մինչև թղթաբանությունը չթեթևացվի, վիճակը չի բարելավվի։
«Ես ասում էի, որ Գյումրու քաղաքապետի որոշումները 3 տեղ էին պտտվում, ցավոք սրտի 12 տեղ են պտտվում, հիմա որ նայում ենք, ինձանից հետո ավելի են ավելացրել»,- նշեց նա։
Վարդան Ղուկասյանի խոսքով, օտարված կամ վաճառքի հանձնված մի քանի տարածք համայնքին է վերադարձվելու։ Կարծիք հայտնեց նաև «Սև Բերդ» ամրոցի վերաբերյալ։ Հիշեցնենք, այն պատկանում է նախկին քաղաքապետ Սամվել Բալասանյանի ընտանիքին։
Ղուկասյանը նշեց․ «Ես Բալասանյան Սամվելին չեմ հարգում, բայց Սև Բերդը ինքը սարքել է, ինչ որ ճիշտ է, ճիշտ է, էդ ավերածությունը ինքը սարքել է։ Ես իրեն չեմ ընդունում, չեմ հարգում, բայց նմանատիպ կառույց, որ կառուցել է, հանրապետությունում չկա»։
Ըստ Վարդան Ղուկասյանի, 1 ամսից 20-30 տոկոս բարձրանալու են համայնքապետարանի աշխատակազմի և ենթակայության կառույցների աշխատակիցների աշխատավարձերը։ Ղուկասյանը դատապարտեց իր նախկին մամուլի խոսնակ Լիլիթ Աղեկյանի նկատմամբ ոստիկանության ցուցաբերած գործողությունները։
Հեռ. ՝ +37498 691-690; Էլ. Փոստ ՝ progressgyumringo@gmail.com
Ընտրության ժամանակ բարեգործության արգելքը խախտելու մեջ մեղադրվող 3 անձանց վերաբերյալ քրեական վարույթի նյութերն ուղարկվել են դատարան
ՀՀ ՆԳՆ քրեական ոստիկանությունից և Ազգային անվտանգության ծառայությունից ստացված հաղորդումների հիման վրա ՀՀ հակակոռուպցիոն կոմիտեում նախաձեռնված քրեական վարույթով պարզվել է, որ 2025 թվականի մարտի 30-ին նշանակված՝ Գյումրի համայնքի ավագանու արտահերթ ընտրությանը մասնակցող կուսակցությունների դաշինքներից մեկի կողմից առաջադրված թեկնածուի ազգականը և նշված դաշինքի ավագանու երկու թեկնածուները նախնական համաձայնությամբ, խմբի կազմում, բարեգործության անվան տակ ընտրողներին մատուցել են ծառայություններ և բարեգործության հետ միաժամանակ իրականացրել նախընտրական քարոզչություն: Մասնավորապես՝ Գյումրի համայնքի փողոցներում կատարել են հարթեցման և խճապատման աշխատանքներ, որոնք ներկայացվել են որպես ընտրողների շրջանում ծառայությունների մատուցում, ընտրողի խնդրանքի կատարում՝ փաստացի իրականացնելով նախընտրական քարոզչություն։
Այդ կերպ վերը նշված երեք անձինք ընտրությունների նշանակման որոշումն ուժի մեջ մտնելու օրվանից մինչև ընտրությունների արդյունքների ամփոփումը բարեգործության անվան տակ, նախընտրական քարոզչություն իրականացնելով զուգորդված, ընտրողների համար անհատույց ծառայություններ մատուցելու եղանակով խախտել են ընտրության ժամանակ բարեգործության արգելքը, որի համար նրանց մեղադրանք է առաջադրվել ՀՀ քրեական օրենսգրքի 221-րդ հոդվածի 1-ին մասով:
Մեղադրյալների նկատմամբ համակցված կիրառվել են վարչական հսկողությունն ու բացակայելու արգելք խափանման միջոցները։
Քրեական վարույթով նախաքննությունն ավարտվել է, և վարույթի նյութերը մեղադրական եզրակացությամբ ուղարկվել են ՀՀ հակակոռուպցիոն դատարան:
Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com