2026-ից՝ նոր կենսաչափական անձնագրեր․ ինչ է փոխվելու Հայաստանում
Վարչապետ Նիկոլ Փաշինյանը Ներքին գործերի նախարար Արփինե Սարգսյանի հետ ունեցել է աշխատանքային քննարկում, որի ընթացքում ներկայացվել են Հայաստանի Հանրապետությունում կենսաչափական անձնագրերի ու նույնականացման քարտերի նոր համակարգի ներդրման ուղղությամբ իրականացված աշխատանքները:
Վարչապետ Փաշինյանն իր ներածական խոսքում նշել է, որ ավարտական փուլում է գտնվում կենսաչափական անձնագրերի և նույնականացման քարտերի ներդրման գործընթացը և դրանք քաղաքացիների համար հասանելի կլինեն 2026 թվականի աշնանից։
Արփինե Սարգսյանն ընդգծել է, որ նոր համակարգի ներդրման նպատակն է ապահովել անձը հաստատող փաստաթղթերի համապատասխանությունը միջազգային բարձր չափանիշներին, մասնավորապես՝ Քաղաքացիական ավիացիայի միջազգային կազմակերպության (ICAO) պահանջներին։ ՆԳ նախարարի խոսքով, այն կբարձրացնի փաստաթղթերի վստահելիությունը, կդյուրացնի սահմանային անցումները և կնպաստի քաղաքացիների ազատ տեղաշարժին, այդ թվում՝ Եվրոպական միության հետ վիզաների ազատականացման գործընթացում։
Նշվել է, որ նոր համակարգի ներդրման շրջանակում ստեղծվում են ժամանակակից ենթակառուցվածքներ։ Նախագիծն իրականացվում է պետություն-մասնավոր համագործակցության ձևաչափով։ Նոր անձնագրերը կունենան բարձր մակարդակի պաշտպանական մեխանիզմներ՝ ներառյալ անվտանգային բաղադրիչներ, այդ թվում՝ ուլտրամանուշակագույն շերտեր։
Միաժամանակ ընդգծվել է, որ փաստաթղթի ձևավորման մեջ արտացոլված են հայկական ինքնությունը, պատմամշակութային ժառանգությունն ու պետականության խորհրդանիշները։ Ըստ այդմ՝ նախ արտացոլված է Հայաստանի Հանրապետության ուրվագծային քարտեզը, Մեսրոպ Մաշտոցի ստեղծած այբուբենը և առաջին հայատառ նախադասությունը՝ «Ճանաչել զիմաստություն և զխրատ, իմանալ զբանս հանճարոյ»: Վարչապետն ընդգծել է, որ որոշ տառեր ավելի մեծ են արտացոլված և որոշակի միտք ու տրամաբանություն կա դրա մեջ դրված. «Մասնավորապես՝ «Ա» տառը՝ նկատի ունենալով ազատություն, անկախություն, «Ե» տառը՝ երջանկություն, «Է» տառը՝ նկատի ունենալով, որ գրաբարում «Է»-ն Աստված է նշանակում, Աստծուն ընդգծելով, «Ժ» տառը՝ ժողովրդին ընդգծելով, «Ի» տառը՝ ինքնիշխանությունն ընդգծելով, «Խ» տառը՝ խաղաղությունը, «Կ» տառը՝ կյանք, «Հ»-ն՝ Հայաստան, «Մ»-ն մարդ, «Ջ»-ն՝ ջուրն ենք ցանկացել ընդգծել նաև որպես կյանքի խորհրդանիշ, «Ո» տառը, քանի որ նախնական տարբերակում «Օ» տառ չի եղել, նկատի ենք ունեցել օրենքը, օրինականությունը, «Պ» տառը՝ նկատի ենք ունեցել պետությունը, «Ս» տառը՝ նկատի ենք ունեցել սերը, «Ք» տառը՝ Քրիստոսին, որպես առաջինը քրիստոնեություն ընդունած պետություն: Իհարկե բոլոր տառերով էլ կարելի էր այս ընդգծումներն անել, բայց ընդհանուր առմամբ մտածել ենք, որ այսպիսի ընդգծումները գուցե նաև մեր ռազմավարությունները, ընկալումները, ձգտումները և մեր պատկերացումներն էականորեն կընդգծեն, նաև դիզայնի որոշակի էլեմենտ ավելացնեն»:
Շարունակելով ներկայացնել փաստաթղթի տարբեր էջերում զետեղված պատկերները՝ նշվել է, որ այն սկսվում է հայի ծագումնաբանությամբ՝ Հայկ Նահապետի պատկերով և Գեղամա լեռներում և Ուխտասարում հայտնաբերված ժայռապատկերներով, որոնք բավական հին պատմություն ունեն: Ներկայացված է նաև պատմության հաջորդ կարևոր հանգրվանը՝ Երևանի հիմնադրման սեպագիր արձանագրությունը, որը հայի ինքնության և պատմության շատ կարևոր մասն է: Ընդգծվել է, որ Էրեբունի ամրոցի պատկերը վերականգնված է գիտնականների կողմից: Հաջորդիվ՝ ներկայացված են Արտաշեսյան ժամանակաշրջանի սահմանաքարերը, որոնց վրա արամեերեն արձանագրություններ են: Սահմանաքարի տեղադրման ձևը և դիրքը նույնպես գիտնականների հետ խորհրդակցությունների արդյունքում է ձևավորվել, տվյալ ժամանակաշրջանի կենցաղավարությունը և գյուղատնտեսությունը պատկերող վիզուալիզացիա են: Ընդգծվել է, որ սահմանաքարի ընտրությունը պատահական չէ, այն պետական և իրավական շատ կարևոր գործիք է հանդիսացել նույնիսկ այն ժամանակահատվածում, որովհետև ցույց է տվել պետության գոյությունը, պետական կառավարման էությունը և նաև հողային բարեփոխումները, որոնք տեղի են ունեցել այդ ժամանակահատվածում:
Հաջորդ էջում ներկայացված է Մայր Աթոռ Սուրբ էջմիածինը, որը խորհրդանշում է քրիստոնեությունը՝ որպես պետական կրոն ընդունելու փաստը 301 թվականին: Ընդգծվել է հենց քրիստոնեության ընդունման տարեթիվը՝ որպես մեր ինքնության և պատմության առանցքային հատվածներից։
Արարողակարգային ավագության տրամաբանությամբ ներկայացված են ժամանակակից պետականության խորհրդանիշները՝ Հայաստանի Հանրապետության նախագահի նստավայրը, Կառավարության շենքը, Ազգային Ժողովի շենքը, Սահմանադրական դատարանի շենքը: Պատկերվել են նաև Երևանի Կասկադը և Ալեքսանդր Թամանյանը՝ որպես ժամանակակից քաղաքաշինության նահապետ:
Անդրադարձ կա նաև մարզերին. այբբենական կարգով ներկայացված են Արագածոտնի մարզը՝ Արագած լեռն ի չորս գագաթներով, Արարատի մարզը՝ Խոր Վիրապով, որպես քրիստոնեության կարևորագույն կենտրոններից մեկը, Արմավիրի մարզը՝ լավաշի թխման գործընթացով, Արմավիրի մարզի այգիներով ու պտուղներով, Գեղարքունիքի մարզը՝ Սևանա լճով և 10-րդ դարի Բերդկունք ամրոցով, Կոտայքի մարզը՝ Գառնու հեթանոսական տաճարով, Լոռու մարզը՝ Լոռի բերդ ամրոցով, Շիրակի մարզը՝ Գյումրիի պատմական կենտրոնի փողոցով և հայտնի Ֆայտոնի տեսարանով, Սյունիքի մարզը՝ Բաղաբերդ ամրոցով, Տավուշի մարզը՝ Սրանոցի կամրջով, Վայոց Ձորի մարզը՝ Ջերմուկի ջրվեժով և Ջերմուկի հայտնի խորհրդանիշ եղնիկով: Վարչապետն ընդգծել է, որ այս բոլոր պատմամշակութային հուշարձանների միջոցով փորձ է արվել ապահովել Հայաստանի դիմանկարի բազմազանությունն ու բազմաշերտությունը:
Շեշտվել է, որ կենսաչափական անձնագրի ներդրմանը զուգահեռ նախատեսվում է նաև սահմանային անցակետերում ներդնել ավտոմատ, առանց մարդկային շփման անցման համակարգեր, ինչն էապես կհեշտացնի և կարագացնի քաղաքացիների տեղաշարժը։
Ամփոփելով անձնագրի ներկայացումը՝ երկրի ղեկավարը նշել է, որ այս քայլով Հայաստանը կատարում է կարևոր քայլ՝ ժամանակակից, անվտանգ և միջազգային չափանիշներին համապատասխան անձնագրային համակարգ ունենալու ուղղությամբ։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Կարսում մեկնարկել է նոր գործընթաց․ ԱՄՆ դեսպանությունը ընդգծում է «պատմական առաջընթացը»
ՀՀ-ում ԱՄՆ դեսպանությունն անդրադարձել է Կարսում տեղի ունեցած՝ հայ և թուրք պաշտոնյաների հանդիպմանը՝ նշելով, որ պատմական առաջընթաց է խաղաղ ու բարգավաճ Հարավային Կովկասի կերտման ճանապարհին:
«Պատմական առաջընթաց` խաղաղ ու բարգավաճ Հարավային Կովկասի կերտման ճանապարհին։
Այսօր Կարսում տեղի ունեցավ հայ և թուրք պաշտոնյաների հանդիպումը՝ ձևավորելու Կարս-Գյումրի երկաթգծի վերակառուցման հարցերով համատեղ աշխատանքային խումբ։ Հայաստանի և Թուրքիայի միջև այս առանցքային օղակի վերականգնումը տարածաշրջանային կապուղիների բացման և տարածաշրջանային կայունության ապահովման կարևոր քայլ է։ Այսօրինակ շրջադարձային զարգացումների համար հիմքեր էին նախապատրաստվել օգոստոսի 8-ին նախագահ Թրամփի հյուրընկալած Վաշինգտոնի գագաթնաժողովում։
ՀՀ-ում ԱՄՆ դեսպանությունը ողջունում է Հայաստանի և Թուրքիայի միջև տասնամյակներ շարունակ փակված տնտեսական ու հասարակական կապերի վերաբացման ուղղությամբ այս կոնկրետ քայլերի ձեռնարկումը»,- ասվում է հաղորդագրությունում։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
«2026-ի խորհրդարանական ընտրություններին ընդառաջ»
«2026-ի խորհրդարանական ընտրություններին ընդառաջ»
Ի՞նչ փոփոխություններ են կատարվել ՀՀ ընտրական օրենսգրքում
Ինչպիսի՞ ազդեցություն կունենան այդ փոփոխությունները ընտրական գործընթացի արդյունավետության վրա Որքանո՞վ են պատրաստ տեղամասային ընտրական կենտրոնները առաջիկա ընտրություններին
Ուղիղ եթեր 
YouTube
Բանախոսներ՝
Տիգրան Ղազարյան – Գյումրու թիվ 31 ընտրատարածքային ընտրական հանձնաժողովի նախագահ Արաքսյա Կիրակոսյան – Գյումրու թիվ 30 ընտրատարածքային ընտրական հանձնաժողովի նախագահ Արինա Մեծոյան – «Գյումրու առաջընթաց ՔՀԶԿ» ՀԿ դիտորդական առաքելության համակարգող, փաստաբան Գայանե Գևորգյան – փաստաբան
Համակարգող՝ Լուսինե Մովսիսյան
English Ahead of the 2026 Parliamentary Elections What changes have been made to the Electoral Code of Armenia What impact will these changes have on the effectiveness of the electoral process How prepared are polling stations for the upcoming elections Additional related topics will also be discussed. Speakers: Tigran Ghazaryan – Chair of Precinct Electoral Commission No. 31 (Gyumri) Araxya Kirakosyan – Chair of Precinct Electoral Commission No. 30 (Gyumri) Arina Metsoyan – Observer Mission Coordinator, “Progress of Gyumri” CSO, Lawyer Gayane Gevorgyan – Lawyer Moderator: Lusine Movsisyan
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
2026 թվականի ապրիլի 24-ին, հայ ժողովուրդը ոգեկոչում է Հայոց ցեղասպանության 111-րդ տարելիցը
1915 թվականի այս օրը սկսվեց Օսմանյան կայսրությունում հայերի կազմակերպված բնաջնջումը, որի հետևանքով զոհ գնաց շուրջ 1.5 միլիոն մարդ։ Ապրիլի 24-ը սգի, հիշողության և պահանջատիրության օր է։
Ամեն տարի հազարավոր մարդիկ այցելում են Ծիծեռնակաբերդ՝ հարգանքի տուրք մատուցելու անմեղ զոհերի հիշատակին։ 111 տարի անց հիշում ենք՝ որպեսզի չկրկնվի։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
ԵԱՀԿ/ԺՀՄԻԳ դիտորդական առաքելության պատվիրակությունը հյուրընկալվել է ԿԸՀ-ում
ՀՀ կենտրոնական ընտրական հանձնաժողովն ապրիլի 23-ին հյուրընկալել է ԵԱՀԿ/ԺՀՄԻԳ դիտորդական առաքելության պատվիրակությանը։ ԿԸՀ նախագահ Վահագն Հովակիմյանը ողջունել է հյուրերին և մաղթել համատեղ արդյունավետ գործակցություն։
Պատվիրակության ղեկավար Յանես Լենարչիչը հայտնել է, որ դիտորդական առաքելությունը դիտարկելու է ընտրությունների բոլոր փուլերը և միջանկյալ զեկույց է հրապարակելու փաստական տվյալներով։ Այնուհետև ԵԱՀԿ/ԺՀՄԻԳ-ը հրապարակելու է երկու գնահատողական զեկույց՝ առաջինը ընտրությունների հաջորդ օրը, երկրորդը՝ ընտրություններից մի քանի ամիս անց։ Դիտորդական առաքելությունը նախատեսում է ՀՀ գործուղել մինչև 250 կարճաժամկետ և 30 երկարաժամկետ դիտորդ։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
ԱԺ հերթական ընտրություններին մասնակցելու համար առաջադրվել է 19 քաղաքական ուժ
2026 թվականի հունիսի 7-ի Ազգային ժողովի հերթական ընտրություններին ՀՀ Կենտրոնական ընտրական հանձնաժողով առաջադրման հայտ է ներկայացրել 19 քաղաքական ուժ։ Կուսակցությունների, կուսակցությունների դաշինքների ընտրական ցուցակների գրանցման վերջնաժամկետը մայիսի 3-ն է։
Ցանկը ներկայացնում ենք ըստ ԿԸՀ առաջադրման հայտ ներկայացնելու հերթականության։
«ՔԱՂԱՔԱՑԻԱԿԱՆ ՊԱՅՄԱՆԱԳԻՐ» ԿՈՒՍԱԿՑՈՒԹՅՈՒՆ
- Փաշինյան Նիկոլ Վովայի
- Միրզոյան Արարատ Սամվելի
- Ավանեսյան Անահիտ Թորգոմի
«ԲԱՐԳԱՎԱՃ ՀԱՅԱՍՏԱՆ» ԿՈՒՍԱԿՑՈՒԹՅՈՒՆ
- Ծառուկյան Գագիկ Կոլյայի
- Թեւանյան Անդրանիկ Նորիկի
- Սարգսյան Լուիզա Աշոտի
ՀԱՅԱՍՏԱՆԻ ՇՆՈՐՀԱՊԵՏԱԿԱՆ ԿՈՒՍԱԿՑՈՒԹՅՈՒՆ
- Սիմոնյան Գուրգեն Էդմոնի
- Անտինյան Էդվարդ Արմենակի
- Մկրտչյան Լուսինե Մարտիկի
«ԲՈԼՈՐԻՆ ԴԵՄ ԵՄ» ԺՈՂՈՎՐԴԱՎԱՐԱԿԱՆ ԿՈՒՍԱԿՑՈՒԹՅՈՒՆ
- Կյուրեղյան Սպարտակ Տիգրանի
- Գեւորգյան Իշխան Սամվելի
- Կարապետյանց Նինա Տիգրանի
«ՈՒԺԵՂ ՀԱՅԱՍՏԱՆ» ԴԱՇԻՆՔ (կազմում՝ «ՈՒԺԵՂ ՀԱՅԱՍՏԱՆ» ԿՈՒՍԱԿՑՈՒԹՅՈՒՆ, «ՆՈՐ ԴԱՐԱՇՐՋԱՆ» ԿՈՒՍԱԿՑՈՒԹՅՈՒՆ,«ՄԻԱՎՈՐՎԱԾ ՀԱՅԵՐ» ԿՈՒՍԱԿՑՈՒԹՅՈՒՆ)
- Կարապետյան Նարեկ Կարենի
- Վարդեւանյան Արամ Պողոսի
- Մելոյան Գոհար Գագիկի
«ԺՈՂՈՎՐԴԱՎԱՐԱԿԱՆ ՀԱՄԱԽՄԲՈՒՄ» ԿՈՒՍԱԿՑՈՒԹՅՈՒՆ
- Պետրոսյան Սուրեն Ռաֆիկի
- Այվազյան Վարդան Նորիկի
- Գաբրիելյան Հասմիկ Արմենի
«ՄԻԱՍՆՈՒԹՅԱՆ ԹԵՎԵՐ» ԿՈՒՍԱԿՑՈՒԹՅՈՒՆ
- Թաթոյան Արման Հակոբի
- Անանյան Դավիթ Սանասարի
- Մատինյան Աստղիկ Համլետի
«ԼՈՒՍԱՎՈՐ ՀԱՅԱՍՏԱՆ» ԿՈՒՍԱԿՑՈՒԹՅՈՒՆ
- Մարուքյան Էդմոն Հրաչիկի
- Փաշոյան Կարպիս Ռուբիկի
- Ավագյան Շուշանիկ Սուրենի
«ԱԶԳԱՅԻՆ ԺՈՂՈՎՐԴԱՎԱՐԱԿԱՆ ԲԵՎԵՌ» ՀԱՄԱՀԱՅԿԱԿԱՆ ԿՈՒՍԱԿՑՈՒԹՅՈՒՆ
- Կարապետյան Գեւորգ Ռոբերտի
- Սաֆարյան Գեւորգ Վիտալիկի
- Սախոյան Արմենուհի Լիպարիտի
ՀԱՅԱՍՏԱՆ ԿՈՒՍԱԿՑՈՒԹՅՈՒՆՆԵՐԻ ԴԱՇԻՆՔ կազմում՝«ՀԱՅ ՅԵՂԱՓՈԽԱԿԱՆ ԴԱՇՆԱԿՑՈՒԹՅՈՒՆ» ԿՈՒՍԱԿՑՈՒԹՅՈՒՆ, «ԱՌԱՋ» ԱՋԱԿԵՆՏՐՈՆ ԿՈՒՍԱԿՑՈՒԹՅՈՒՆ
- Քոչարյան Ռոբերտ Սեդրակի
- Սաղաթելյան Իշխան Վաչիկի
- Գրիգորյան Աննա Արամի
ՔՐԻՍՏՈՆԵԱ-ԺՈՂՈՎՐԴԱՎԱՐԱԿԱՆ ԿՈՒՍԱԿՑՈՒԹՅՈՒՆ
- Շիրինյան Լեւոն Ղազարի
- Թադեւոսյան Արգիշտ Ռաֆիկի
- Սահակյան Սիլվա Սերյոժայի
ՀԱՅ ԱԶԳԱՅԻՆ ԿՈՆԳՐԵՍ ԿՈՒՍԱԿՑՈՒԹՅՈՒՆ
- Զուրաբյան Լեւոն Արամի
- Մանուկյան Արամ Վիգենի
- Զորյան Տաթեւիկ Արարատի
«ՆՈՐ ՈՒԺ» ՌԵՖՈՐՄԻՍՏԱԿԱՆ ԿՈՒՍԱԿՑՈՒԹՅՈՒՆ
- Մարության Հայկ Հրաչյայի
- Կարապետյան Հակոբ Մանվելի
- Արամյան Նարինե Միքայելի
«ՀԱՆՐԱՊԵՏՈՒԹՅՈՒՆ» ԿՈՒՍԱԿՑՈՒԹՅՈՒՆ
- Սարգսյան Արամ Զավենի
- Ադամյան Անահիտ Հրանտի
- Մխիթարյան Ռոմիկ Կառլենի
«ԱԼՅԱՆՍ» ԱՌԱՋԱԴԻՄԱԿԱՆ ՑԵՆՏՐԻՍՏԱԿԱՆ ԿՈՒՍԱԿՑՈՒԹՅՈՒՆ
- Ուրիխանյան Տիգրան Խաչատուրի
- Գալստյան Աշոտ Վարազդատի
- Հովհաննիսյան Գոհար Լեւոնի
ՌԵՖՈՐՄԻՍՏՆԵՐԻ ԿՈՒՍԱԿՑՈՒԹՅՈՒՆ
- Հարությունյան Վաղարշակ Վարնազի
- Բաբայան Վահան Շոթայի
- Ներկարարյան Անի Լեւոնի
ԴԵՄՈԿՐԱՏԻԱ ՕՐԵՆՔ ԿԱՐԳԱՊԱՀՈՒԹՅՈՒՆ ԿՈՒՍԱԿՑՈՒԹՅՈՒՆ
- ՂՈՒԿԱՍՅԱՆ ՎԱՐԴԱՆ ՅՈՒՐԻԿԻ
- ԲԱՂԴԱՍԱՐՅԱՆ ԼԵՎՈՆ ՍՈԽԱԿԻ
- ՂՈՒԿԱՍՅԱՆ ԱՆՆԱ ՎԱԶԳԵՆԻ
ՔՈՉԱՐԻ ԱԶԳԱՅԻՆ ՎԵՐԱԾՆՈՒՆԴ ԵՎ ԱԶԳԻ ԶԱՐԹՈՆՔ ԿՈՒՍԱԿՑՈՒԹՅՈՒՆ
- ՍԱՐԳՍՅԱՆ ԱՐՏԱԿ ԳՈԴԵՐԶԻՆԻ
- ՀՈՎՀԱՆՆԻՍՅԱՆ ՀՄԱՅԱԿ ԿՈՆՍՏԱՆՏԻՆԻ
- ԿՈՒՋՈՅԱՆ ԼԻԼԻԹ ՍԵՅՐԱՆԻ
ՀԱՆՈՒՆ ՀԱՆՐԱՊԵՏՈՒԹՅԱՆ ԺՈՂՈՎՐԴԱՎԱՐՈՒԹՅԱՆ ՊԱՇՏՊԱՆՆԵՐԻ ԴԱՇԻՆՔ» ԿՈՒՍԱԿՑՈՒԹՅՈՒՆ
- ԲԱԲԱՋԱՆՅԱՆ ԱՐՄԱՆ ՇԱՄԻՐԻ
- ՄԵՀՐԱԲՅԱՆ ՌՈՒԲԵՆ ՀԵՆՐԻԿԻ
- ԶԵՅՆԱԼՅԱՆ ԼՈՒՍԻՆԵ ՆԵՐՍԵՍԻ
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Անօրինական միգրացիա՝ 42 հզր դոլարի դիմաց. քրեական վարույթի նախաքննությունն ավարտվել է
ՀՀ քննչական կոմիտեի և ՀՀ ազգային անվտանգության ծառայության աշխատակիցների կողմից ձեռնարկված համատեղ քննչական և օպերատիվ-հետախուզական միջոցառումների արդյունքում պարզվել է, որ ՀՀ քաղաքացիներ Ա.Ա․-ն, Կ.Ե․-ն և Հ.Թ․-ն նախնական համաձայնությամբ խմբի կազմում, կեղծ փաստաթղթերի և տեղեկությունների օգտագործմամբ՝ 42 հզր ԱՄՆ դոլար գումարի դիմաց կազմակերպել են Ս.Յ․-ի և Ա.Յ․-ի ելքը Հայաստանի Հանրապետությունից, օտարերկրյա պետություն մուտքը և օտարերկրյա պետությունում գտնվելը:
Մասնավորապես՝ Ա.Ա․-ն, Կ.Ե․-ն և Հ.Թ․-ն կեղծ փաստաթղթերի հիման վրա կազմակերպել են Ս.Յ․-ի և Ա.Յ․-ի կողմից «Շենգենյան համաձայնության երկրներ» մուտքի թույլտվության ստացումը։
Այնուհետև, Ա.Ա․-ի, Կ.Ե․-ի և Հ.Թ․-ի կազմակերպմամբ Ս.Յ․-ն և Ա.Յ․-ն ԱՄՆ հասնելու նպատակով մեկնել են Իտալիա, այնուհետև՝ Բրազիլիա, Պանամա, Նիկարագուա, Հոնդուրաս, Գվատեմալա, Մեքսիկա։ Վերջիններս Մեքսիկայից 4–րդ փորձից միայն կարողացել են մուտք գործել ԱՄՆ, որտեղ ամիսներ շարունակ մնալով տարբեր քրեակատարողական հիմնարկներում՝ վերադարձել են Հայաստանի Հանրապետություն։
Դեպքի առթիվ ՀՀ քննչական կոմիտեի պետության, սահմանադրական կարգի հիմունքների և հասարակական անվտանգության դեմ ուղղված հանցագործությունների քննության գլխավոր վարչությունում քննվող քրեական վարույթի շրջանակում Ա.Ա.-ի, Կ.Ե.-ի և Հ.Թ.-ի նկատմամբ հարուցվել է հանրային քրեական հետապնդում՝ Քրեական օրենսգրքի 470-րդ հոդվածի 3-րդ մասի 1-ին կետով (մի խումբ անձանց կողմից նախնական համաձայնությամբ անօրինական միգրացիայի կազմակերպումը):
Նրանց նկատմամբ որպես խափանման միջոց կիրառվել է կալանքը:
Քրեական վարույթը մեղադրական եզրակացությամբ ուղարկվել է հսկող դատախազին:
Քրեական վարույթի նախաքննության ընթացքում նաև պարզվել է, որ վերջիններս նախկինում նույնպես կատարել են նույնաբնույթ հանցանքներ, մասնավորապես՝ Հ.Թ․-ն նախաքննության փուլում գտնվող այլ քրեական վարույթով, իսկ Ա.Ա․-ն և Կ.Ե․-ն՝ դատաքննության փուլում գտնվող քրեական գործով ունեն մեղադրյալի կարգավիճակ։
ՀՀ քաղաքացիներին հորդորում ենք՝ անօրինական միգրացիայի զոհ չդառնալու համար զերծ մնալ գումարի դիմաց կեղծ փաստաթղթերի պատրաստմամբ՝ ԱՄՆ կամ այլ երկրներ մեկնելու խոստումներ տվող անձանց դիմելուց և այդ եղանակով մեկնելու փորձերից:
ՀՀ իրավապահ մարմինները մշտապես հետևողական աշխատանքներ են տանում նմանատիպ դեպքերի բացահայտման և հանցանք կատարած անձանց քրեական պատասխանատվության ենթարկելու ուղղությամբ։
Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ Քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Նոր կարգավորում․ 16 տարեկանից՝ պարտադիր ID քարտ
Նոր կարգավորում․ 16 տարեկանից՝ պարտադիր ID քարտ ՀՀ կառավարությունը հավանություն է տվել «Անձը հաստատող փաստաթղթի մասին» օրենքի և հարակից նախագծերի փաթեթին՝ այն համարելով անհետաձգելի։ Ներքին գործերի նախարար Արփինե Սարգսյանի խոսքով՝ նախաձեռնության նպատակը կենսաչափական նոր համակարգի ներդրմանն համապատասխան օրենսդրական դաշտի ձևավորումն է։
Նախագծով առաջարկվում է 16 տարին լրացած անձանց համար նույնականացման քարտ ունենալը դարձնել պարտադիր։ Միայն նույնականացման քարտ ունենալու դեպքում քաղաքացիները կկարողանան ստանալ կենսաչափական անձնագիր։ 6-16 տարեկանների համար նախատեսվում է կամավորության սկզբունքով նույնականացման քարտ ունենալու հնարավորություն, իսկ մինչև 6 տարեկանների դեպքում անձը հաստատող փաստաթուղթ կդիտարկվի ծննդյան վկայականը։
Նախատեսվում է նաև, որ բոլոր ճամփորդական փաստաթղթերը կհամապատասխանեցվեն Քաղաքացիական ավիացիայի միջազգային կազմակերպության (ICAO) ստանդարտներին։ Ըստ նախարարի՝ նույնականացման քարտը կդառնա հիմնական փաստաթուղթ ներպետական գործառույթների համար, իսկ անձնագիրը կդիտարկվի որպես ճամփորդական փաստաթուղթ։ Փոփոխություններով կենսաչափական կդառնան նաև օտարերկրացիների, փախստականների և քաղաքացիություն չունեցող անձանց փաստաթղթերը։
Բացի այդ, կարգավորվում է պետություն-մասնավոր համագործակցության շրջանակը՝ սահմանելով, որ մասնավոր գործընկերը վարչարարական որոշումներ չի կայացնելու, իսկ գործընթացը կմնա պետության լիազորությունների շրջանակում։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Նիկոլ Փաշինյանը դպրոցաշինության ծրագրերով շրջայց է կատարել մարզերում
Վարչապետ Նիկոլ Փաշինյանը այցելել է Արագածոտնի և Շիրակի մարզեր՝ ծանոթանալու դպրոցաշինության և կրթական ենթակառուցվածքների զարգացման ծրագրերին։ Այցի ընթացքում նա եղել է մի շարք նորակառույց և վերանորոգված դպրոցներում, որտեղ ներկայացվել են իրականացված աշխատանքներն ու ստեղծված պայմանները։ 
Ծրագրերը իրականացվում են կառավարության «300 դպրոց» նախաձեռնության շրջանակում։ Վարչապետը նշել է, որ կրթությունը երկրի զարգացման առանցքային հիմքն է՝ ընդգծելով, որ դպրոցները պետք է դառնան համայնքների կյանքի կենտրոններ։ Շիրակի մարզում վարչապետը այցելել է նաև Գյումրիի,և Ախուրյանի դպրոցներ՝ ծանոթանալով վերանորոգման աշխատանքներին և պայմաններին։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Նվազեցվել են նոր սպառման համակարգերի բաշխման ցանցին միացման վճարները
Սույն թվականի ապրիլի 22-ի ՀՀ հանրային ծառայությունները կարգավորող հանձնաժողովի նիստում քննարկվել է նոր սպառման համակարգերի՝ բաշխման ցանցին միացման վճարների նվազեցման հարցը։ Էլեկտրաէներգետիկական շուկայի բաշխման ցանցային կանոններով սահմանվեցին բաշխման ցանցին միացման նոր սակագները՝ 0.22 կՎ և 0.4 կՎ լարմամբ առանձնատների և առանձին շինություններում գտնվող դիմող անձանց, ինչպես նաև բազմաբնակարան շենքերի կառուցապատողների կողմից վճարվող համապատասխան միացման վճարները։
0.22 կՎ լարմամբ միացող առանձնատների և առևտրային սպառողների ստանդարտ միացման վճարը՝
10 կՎԱ հզորության համար Երևան քաղաքում նվազեցվեց շուրջ 40%-ով՝ սահմանելով 166 հազար դրամ, գործող 277 հազար դրամի փոխարեն, իսկ հանրապետության մյուս տարածքներում՝ շուրջ 46%-ով՝ սահմանելով 124 հազար դրամ՝ գործող 229 հազար դրամի փոխարեն,
14 կՎԱ հզորության համար Երևան քաղաքում նվազեցվեց շուրջ 34%-ով՝ սահմանելով 199 հազար դրամ, գործող 300 հազար դրամի փոխարեն, իսկ հանրապետության մյուս տարածքներում՝ շուրջ 40%-ով՝ սահմանելով 140 հազար դրամ՝ գործող 234 հազար դրամի փոխարեն,
0.4 կՎ լարմամբ միացող առանձնատների և առևտրային սպառողների ստանդարտ միացման վճարի հաստատուն բաղադրիչը նվազեցվեց շուրջ 24%-ով՝ սահմանելով 229 հազար դրամ, գործող 300 հազար դրամի փոխարեն, իսկ փոփոխական ծախսերի մեծությունը Երևան քաղաքի համար՝ շուրջ 65%-ով՝ սահմանելով 16 հազար դրամ՝ գործող 46 հազար դրամի փոխարեն, հանրապետության մյուս տարածքների համար՝ շուրջ 55%-ով՝ սահմանելով 9 հազար դրամ՝ գործող 20 հազար դրամի փոխարեն։
- Բազմաբնակարան շենքերի միացման վճարի հաշվարկում միաֆազ միացման դեպքում՝
10 կՎԱ հզորության համար Երևան քաղաքում նվազեցվեց շուրջ 40%-ով՝ սահմանելով 406 հազար դրամ, գործող 672 հազար դրամի փոխարեն, իսկ հանրապետության մյուս տարածքներում՝ շուրջ 39%-ով՝ սահմանելով 275 հազար դրամ՝ գործող 448 հազար դրամի փոխարեն,
14 կՎԱ հզորության համար Երևան քաղաքում նվազեցվեց շուրջ 45%-ով՝ սահմանելով 424 հազար դրամ, գործող 769 հազար դրամի փոխարեն, իսկ հանրապետության մյուս տարածքներում՝ շուրջ 39%-ով՝ սահմանելով 318 հազար դրամ՝ գործող 520 հազար դրամի փոխարեն։
- 0.4 կՎ (եռաֆազ) լարմամբ միացման դեպքում հաստատուն բաղադրիչը նվազեցվեց շուրջ 24%-ով՝ սահմանելով 229 հազար դրամ, գործող 300 հազար դրամի փոխարեն, իսկ փոփոխական ծախսերի մեծությունը Երևան քաղաքի համար՝ շուրջ 31%-ով՝ սահմանելով 61 հազար դրամ՝ գործող 89 հազար դրամի փոխարեն, հանրապետության մյուս տարածքների համար՝ շուրջ 33%-ով՝ սահմանելով 28 հազար դրամ՝ գործող 42 հազար դրամի փոխարեն։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com