Լրահոս

Սուբվենցիոն ծրագրերին՝ ավելի քան 1 մլրդ դրամ պետական աջակցություն

ՀՀ համայնքներից ստացված տնտեսական և սոցիալական ենթակառուցվածքների զարգացմանն ուղղված ծրագրերի արդյունավետ իրականացման ապահովման անհրաժեշտությամբ պայմանավորված՝ գործադիրն ընդունել է որոշում: Ըստ այդմ՝ ՀՀ մարզպետների աշխատակազմերին կհատկացվի 1,059,877.9 հազար դրամ՝ համապատասխան շինարարական կազմակերպությունների նկատմամբ ֆինանսական պարտավորությունները կատարելու համար:

Վարչապետը ներկայացրել է որոշմամբ ֆինանսավորվող ծրագրերը։

Արագածոտնի մարզում՝ Թալին համայնքի Թալին բնակավայրի թիվ 2 մանկապարտեզի վերակառուցում, աշխատանքների 75%-ն իրականացված է, նախատեսված է 150 սանի համար:

Արարատի մարզում՝ Արտաշատ համայնքի Արտաշատ բնակավայրի գազաֆիկացման աշխատանքներ, ավարտված են աշխատանքները, կառուցվել է 400 գծմ երկարությամբ գազատար, շահառուները՝ 15 տնային տնտեսություն:

Արարատ համայնքի Արմաշ բնակավայրի ճանապարհների վերանորոգում ասֆալտապատմամբ-2-րդ փուլ, կատարված է շինարարական աշխատանքները՝ 45 %-ը, ասֆալտապատվել է 1 կմ ընդհանուր երկարությամբ ճանապարհ:

Արարատ համայնքի Արարատ բնակավայրի մշակույթի տան վերանորոգում և հարակից այգու բարեկարգում-1-ին փուլ, ավարտված է, վերանորոգվել է մշակույթի տունը՝ կառուցվել է ջեռուցման համակարգ և բարեկարգվել է հարակից այգին:

Արմավիրի մարզում՝ Արաքս համայնքի Հայկաշեն բնակավայրի մշակույթի տան նորոգում, ավարտական փուլում է աշխատանքները, 312քմ մակերեսով և 150 նստատեղ ունեցող դահլիճով շենքը:

Արաքս համայնքի Գայ բնակավայրի Իսահակյան և Սարյան կենտրոնական ճանապարհի մայթեզրերի կառուցման և սալարկման աշխատանքներ, ավարտական փուլում է գտնվում, տուֆով սալարկվել են 1,5 կմ երկարությամբ ճանապարհի մայթեզրերը:

Արմավիր համայնքի Արմավիր բնակավայրի թիվ 11 մսուր-մանկապարտեզի շենքի հիմնանորոգում, կատարված է աշխատանքների 87 %-ը, նախադպրոցական հաստատությունը նախատեսված է 165 սանի համար:

Արմավիր համայնքի Արմավիր բնակավայրի Սայաթ-Նովա փողոցի Արարատյան-Սայաթ-Նովա 5Ա բազմաբնակարան բնակելի շենք հատվածի խմելու ջրամատակարարման նոր համակարգի կառուցում, որն ավարտված է, կառուցվել է 1․2 կմ երկարությամբ ջրագիծ, շահառուները՝ 89 տնային տնտեսություն:

Մեծամոր համայնքի Մեծամոր բնակավայրի Մ. Միքայելյան, Հ. Թումանյան, Վ.Տերյան և Կոմիտաս փողոցների ջրագծերի փոխարինում, աշխատանքներն ավարտված է, կառուցվել է 3․5 կմ երկարությամբ ջրագիծ, շահառուները՝ 1077 տնային տնտեսություն:

Վաղարշապատ համայնքի Շահումյան բնակավայրի Ի. Հարությունյան և Մ-3 միջպետական ճանապարհից մինչև Շահումյանի միջնակարգ դպրոցի ետնամաս տանող ճանապարհի ասֆալտապատում և մայթի կառուցում, որն ավարտված է, ասֆալտապատվել է 1․1 կմ երկարությամբ ճանապարհ:

Վաղարշապատ համայնքի Էջմիածին բնակավայրի թիվ 6 «Արևիկ» մանկապարտեզի հիմնանորոգում և նոր մասնաշենքի կառուցում, ավարտված են աշխատանքները, նախադպրոցական հաստատությունը նախատեսված է 320 սանի համար:

Բաղրամյան համայնքի Արգինա բնակավայրի ոռոգման 1000 մ երկարությամբ ներտնային ցանցի կառուցում, աշխատանքներն ավարտված են, կառուցվել է 1 կմ երկարությամբ ոռոգման ներտնտեսային ցանց, որի արդյունքում ոռոգելի հողատարածքները կավելանան 80-100 հա-ով, շահառուները՝ 45 տնային տնտեսություն:

Գեղարքունիքի մարզում՝ Մարտունի համայնքի Մարտունի բնակավայրի Երևանյան և Մյասնիկյան փողոցների լուսավորության ցանցի վերակառուցում, կատարված է շինարարական աշխատանքների 95 %-ը, կառուցվել է 1,8 կմ երկարությամբ լուսավորության համակարգ, տեղադրվել է 67 հենասյուն ու 134 լեդ լուսատու:

Կոտայքի մարզում՝ Աբովյան համայնքի Բալահովիտ բնակավայրի 7-րդ փողոցի 1-ին նրբանցքի, 1-ին թաղամաս 1-ին և 2-րդ փողոցների, Ծաղկունք թաղամասի 3-րդ փողոցի և 3-րդ փողոց 5-րդ նրբանցքի 1-ին փակուղու գազաֆիկացման աշխատանքներ, որոնք ավարտված են, կառուցվել է 2․5 կմ երկարությամբ գազատար, շահառուները՝ 104 տնային տնտեսություն:

Շիրակի մարզում՝ Գյումրի համայնքի աղբահանության ծառայությունների մատուցման համար աղբատար մեքենայի ձեռքբերում, ձեռք է բերվել մեկ աղբատար մեքենա և տրամադրվել համայնքին:

Աշոցք համայնքի Թավշուտ բնակավայրում ոռոգման համակարգի կառուցման աշխատանքներ, որը ավարտական փուլում է, կառուցվել է 2.7 կմ երկարությամբ ոռոգման համակարգ, ոռոգելի հողատարածքը 195 հա, շահառուները՝ 68 տնային տնտեսություն:

Սյունիքի մարզում՝ Կապան համայնքի Գեղանուշ-Գոմարան բնակավայրերի գյուղամիջյան ճանապարհի նորոգում և ասֆալտապատում, ավարտված են աշխատանքները, ասֆալտապատվել է 1․8 կմ երկարությամբ ճանապարհ:

Տավուշի մարզում՝ Իջևան համայնքի Այգեհովիտ բնակավայրի 45 փող․ 1 փակուղի թիվ 1 բազմաբնակարան բնակելի շենքի էներգաարդյունավետ արդիականացում, կատարված է աշխատանքների 70 %-ը, հիմնանորոգվել է 2428 քմ մակերեսով տարածք:

Իջևան համայնքի Իջևան բնակավայրի Ազատամարտիկների և Թատերական փողոցների մայթերի, Թատերական փող. 3, Մայիսի 28 փող․ 41 շենքերի բակերի, կենցաղի տան շրջակայքի և Աբովյան 18 շենքից Անկախության փողոց տանող ճանապարհ բազմաբնակարան շենքերի բակերի հիմնանորոգում և ասֆալտապատում, կատարված է աշխատանքների 80 %-ը, ասֆալտապատվել է 4276 քմ մակերեսով բակային տարածք:

Իջևան համայնքի Լուսաձոր բնակավայրի 2-րդ փողոց, Գետահովիտ բնակավայրի 5-րդ փողոց, Գանձաքար բնակավայրի 36-րդ փողոց, Ակնաղբյուր 5-րդ փողոց 1-ին փակուղի ճանապարհների հիմնանորոգում և սալարկում տուֆ քարով, կատարված է աշխատանքների 70 %-ը, սալարկվել է 4․3 կմ երկարությամբ ճանապարհ:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Գյումրիում մեծ համերգ՝ Մակրոնի մասնակցությամբ. Կառավարությունը հատկացրել է շուրջ 393 մլն դրամ

Մայիսի 5-ին Գյումրիում նախատեսվում է անցկացնել «Երաժշտական կամուրջ» խորագրով համերգ՝ նվիրված Հայաստանի և Ֆրանսիայի բարեկամությանը, որին ՀՀ վարչապետ Նիկոլ Փաշինյանի հետ ներկա է գտնվելու պետական այցի շրջանակում Հայաստանում գտնվող Ֆրանսիայի նախագահ Էմանուել Մակրոնը։

Կառավարության այսօրվա որոշմամբ, Գյումրիում կայանալիք միջոցառումը պատշաճ իրականացնելու համար տարմադրվել է 392 մլն 897 հազար դրամ գումար։

Գյումրիում միջազգային մակարդակի մշակութային միջոցառումն իրականացվում է մայիսի 3–5-ը Երևանում կայանալիք եվրոպական երկրների ղեկավարների գագաթաժողովի շրջանակում։
Համերգային ծրագրում հնչելու են հայկական և ֆրանսիական թեմատիկ երգեր, որոնք կներկայացնեն հայ և ֆրանսիացի անվանի արտիստներ՝ Հայաստանի պետական սիմֆոնիկ նվագախումբի նվագակցությամբ։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Ֆրանսիայի Հանրապետության նախագահ Էմանուել Մակրոնը մայիսի 3-5-ը կժամանի Հայաստանի Հանրապետություն

Այցի շրջանակում Ֆրանսիայի նախագահը նախ կմասնակցի Երևանում կայանալիք Եվրոպական քաղաքական համայնքի գագաթնաժողովին:

Մայիսի 5-ին կմեկնարկի Էմանուել Մակրոնի պետական այցը Հայաստանի Հանրապետություն: Տեղի կունենա ՀՀ վարչապետ Նիկոլ Փաշինյանի և Ֆրանսիայի նախագահի առանձնազրույցը, որին կհաջորդի երկու երկրների առաջնորդների ընդլայնված կազմով հանդիպումը: Փաստաթղթերի ստորագրման արարողությունից հետո Նիկոլ Փաշինյանը և Էմանուել Մակրոնը հանդես կգան ԶԼՄ-ների համար հայտարարություններով:

Նախագահ Մակրոնը Ծիծեռնակաբերդի հուշահամալիրում հարգանքի տուրք կմատուցի Հայոց ցեղասպանության զոհերի հիշատակին, ինչպես նաև կայցելի Մատենադարան: Տեղի կունենա նաև ՀՀ նախագահ Վահագն Խաչատուրյանի և Ֆրանսիայի նախագահ Էմանուել Մակրոնի հանդիպումը:

Պետական այցի շրջանակում Ֆրանսիայի նախագահը ՀՀ վարչապետի ուղեկցությամբ կայցելի Գյումրի, որտեղ հարգանքի տուրք կմատուցի 1988 թվականի երկրաշարժի զոհերի հիշատակին: Նիկոլ Փաշինյանը և Էմանուել Մակրոնը Գյումրիում ներկա կգտնվեն «Երաժշտական կամուրջ. Հայաստան-Ֆրանսիա» խորագրով համերգին:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Հրապարակվել են ընտրողների նախնական ցուցակները

Ներքին գործերի նախարարության elections.mia.gov.am հարթակում արդեն հրապարակված են 2026 թվականի հունիսի 7-ին կայանալիք Ազգային ժողովի հերթական ընտրություններին մասնակցող ընտրողների նախնական ցուցակները՝ որոնման և ներբեռնման հնարավորությամբ։

Որոնման համակարգում ընտրողը կարող է մուտքագրել իր անունը և ազգանունը՝ գտնելու համար այն ընտրական տեղամասը, որտեղ պետք է կատարի քվեարկությունը։ Ավելի ճշգրիտ արդյունք ստանալու համար հնարավոր է լրացնել նաև ծննդյան օրը, ամիսը և տարեթիվը։

Հարթակում, ներբեռնման հնարավորությամբ, հասանելի են նաև ընտրողների նախնական ցուցակները՝ ըստ համայնքների և տեղամասերի։

Ընտրելու իրավունք ունեցող անձինք կարող են որոնել իրենց տվյալները՝ մուտք գործելով elections.mia.gov.am կայքի «ԱԺ ընտրություններ» բաժին կամ ներբեռնել ցուցակները՝ անցնելով «Ըստ տեղամասերի» բաժինը։

Հայաստանյան նախընտրական խճանկար

Հայաստանը կրկին նախընտրական թոհուբոհի մեջ է, ընդ որում՝ քաղաքական շատ յուրահատուկ, գործող ուժերի և միավորների՝ դաշտում տեղաբաշխվածության առանձնակի խայտաբղետ իրավիճակում։

Ի տարբերություն նախորդ երկու խորհրդարանական ընտրությունների, որոնք արտահերթ էին՝ պայմանավորված ներքաղաքական իրավիճակով ու գործընթացներով, այս տարվա ընտրությունները հերթական են։

ԱԺ նախորդ երկու ընտրությունները տեղի էին ունեցել 2018 թվականի, այսպես ասած, հեղափոխական իրադարձություններից հետո։ Ընդ որում՝ եթե 2018 թվականինը անցկացվեցին հետհեղափոխական տրամադրությունների ու ոգևորության մթնոլորտում, ապա 2021-ինը՝ հետպատերազմական իրավիճակում և պատերազմի պարտության ողբերգական հետևանքների ու հուսալքության պայմաններում։ Հատկանշական է, որ երկու դեպքում էլ հաղթել էր գործող վարչապետի կուսակցությունը։

Եթե 2018 թվականի ընտրությունների պարագայում այդ հաղթանակը բնական ու հասարակաքաղաքական տեսանկյունից խիստ տրամաբանական էր, ապա 2021-ի դեպքում, եթե չասենք անսպասելի, բայց ազգային-քաղաքական ու մարդկային մտածողության առումով որոշակի հարցեր էր առաջացնում։

Չնայած ընտրությունների պաշտոնական քարոզարշավը դեռ չի մեկնարկել (ոչ պաշտոնականը, իհարկե, վաղուց սկսված է), սակայն արդեն այսօր կարելի է որոշ դիտարկումներ անել առաջադրված ուժերի, դերակատարների, դաշտի տեղաբաշխվածության, գործող միավորների՝ քաղաքական հնարավոր առնչությունների և կուսակցությունների մասնակցության համեմատական վիճակագրության վերաբերյալ։

2018 թվականի խորհրդարանական արտահերթ ընտրություններին մասնակցել էին 11 քաղաքական ուժ՝ 9 կուսակցություն և 2 կուսակցությունների դաշինք։ 2021 թվականի Ազգային ժողովի արտահերթ ընտրություններին, ի համեմատություն նախորդի, մասնակիցների թիվը առավել քան կրկնապատկվել էր՝ 24 քաղաքական ուժ՝ 22 կուսակցություն և 4 կուսակցությունների դաշինք։ Այս տարվա ընտրություններին առաջադրվել է 19 քաղաքական ուժ՝ 17 կուսակցություն ու 2 դաշինք։

Ինչպես նկատելի է, քաղաքական ուժերի մասնակցության քանակական տեսանկյունից այս տարվա ընտրություններն առավել առնչություն ունեն 2021-ի ընտրությունների հետ։ Սա, թերևս, բացատրվում է այն հանգամանքով, որ 2018-ի ընտրություններն ընթացան հեղափոխությունից անմիջապես հետո ու դրա անմիջական տրամադրությունների ներքո, և բնական է, որ քաղաքական դաշտի դերակատարները ոչ ամբողջությամբ էին պատրաստ այդ ընտրություններին, ինչպես նաև, հասկանալի պատճառներով, նվազ հնարավորություններ ունեին հաջողության հասնելու համար։ Չնայած 2021 թվականի ընտրությունները ևս արտահերթ էին, սակայն, ի տարբերություն 2018-ի, այդ ժամանակամիջոցում քաղաքական իրադարձությունները զարգանում էին այնպիսի տրամաբանությամբ, որ ընտրությունների անցկացման գաղափարը «օդում կախված» էր, և քաղաքական ուժերը արդեն նախապատրաստված էին դրանց։ Դա է պատճառը, որ այդ ընտրություններին ավելի շատ ուժեր մասնակցեցին, քան 2018 թվականին։

Հատկանշական է, որ այս տարվա ընտրական գործընթացներն արտացոլում են հայկական քաղաքական իրականության՝ տարիներ ի վեր արմատավորված մի քանի յուրահատկություններ, որոնք այլևս դարձել են այդ իրականության կենսակերպն ու անբաժանելի մասը։ Այս տեսանկյունից, առաջին հերթին, պետք է մատնանշել քաղաքական դաշինքների ձևավորման հարցը։ Արդեն ավանդույթ է դարձել, որ ընտրություններից ամիսներ առաջ քաղաքական դաշտի տարբեր բևեռներում ընթանում են բուռն քննարկումներ ու խոսակցություններ հնարավոր դաշինքների, ուժերի միավորման և միասնական ճակատով ընտրություններին մասնակցելու մասին։

Միտումը պարզ ու հասկանալի է՝ համախմբել եղած ներուժը, չփոշիացնել ռեսուրսներն ու ընտրողների ձայները։ Նաեւ արդեն ավանդույթ է, որ այդ փորձերը մեծամասամբ մատնվում են անհաջողության․ բանակցությունները ձախողվում են, հնարավոր համաձայնությունները չեն ստացվում, միավորումներ չեն ձևավորվում։ Ընթացիկ քաղաքական գործընթացներում ևս չխախտվեց այս տխուր ավանդույթը։ Ընդ որում՝ չհաջողվեց լայն և ուժեղ դաշինքներ ձևավորել քաղաքական դաշտի գրեթե բոլոր հատվածներում՝ ոչ իշխանական ու ընդդիմադիր, ոչ, այսպես ասած, ռուսամետ ու արևմտամետ, ոչ էլ աջ, ձախ ու կենտրոնական դաշտերում։

Ինչպես նշել էինք, ԿԸՀ-ում առաջադրման փաստաթղթեր ներկայացրած 19 ուժերից ընդամենը երկուսն են դաշինք, սակայն… Սակայն դրանք, մեծ հաշվով ու դասական իմաստով, դաշինք էլ չի կարելի համարել։ Դրանցից մեկը ՀՀ երկրորդ նախագահ Ռոբերտ Քոչարյանի գլխավորած «Հայաստան» դաշինքն է, որը կազմված է Հայ Յեղափոխական Դաշնակցությունից և լայն հանրությանը գրեթե անհայտ «Առաջ» կուսակցությունից։

Այստեղ դրսևորվում է հայաստանյան քաղաքական իրականության մեկ այլ առանձնահատկություն։ Քաղաքական դաշտում տարիներ առաջ լայն դերակատարություն ունեցած ու երբեմնի կայուն ընտրազանգված ապահովող կուսակցությունը՝ ՀՅԴ-ն, արդեն երկրորդ անգամ ընտրություններին մասնակցում է ոչ իր, այսպես ասած, դեմքով ու առաջնորդով, այլ Ռ. Քոչարյանի գլխավորությամբ ու հովանու ներքո։ Այս երևույթը ևս հայաստանյան քաղաքական դաշտի չկայացվածության ու անկատարության դրսևորում ու ապացույց է։ Նույն այս երևույթի օրինակ է ՀՀ երրորդ նախագահ Սերժ Սարգսյանի գլխավորած ՀՀԿ-ի պատմությունը։ Սերժ Սարգսյանն հայտարարել է, որ ՀՀԿ-ն չի մասնակցելու ընտրություններին։

Հիշենք, որ խոսքը վերաբերում է մի կուսակցության, որը տարիներ շարունակ եղել կամ համարվել է հայաստանյան քաղաքական դաշտի ամենահիմնական ու հզոր ուժը, սակայն, կորցնելով իշխանությունը, այլևս հնարավորություն չունի անգամ հաղթահարելու Ազգային ժողով անցնելու նվազագույն շեմը։ Փակագծի մեջ ասենք, որ, չնայած Սերժ Սարգսյանն հայտարարել է ընտրություններին չմասնակցելու մասին, սակայն անուղղակիորեն ՀՀԿ-ն ու նրա առանձին անդամներ ներգրավված են ընտրական գործընթացներում։ Այս և նախընտրական ու քաղաքական դաշտի խայտաբղետ պատկերին կանդրադառնանք հաջորդ հրապարակումներում։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Ընտրական տեղամասի փոփոխություն՝ մինչև մայիսի 26-ը

Միգրացիայի և քաղաքացիության ծառայությունը տեղեկացնում է, որ ՀՀ քաղաքացիներն արդեն կարող են դիմում ներկայացնել՝ ըստ հաշվառման վայրի ընտրողների ցուցակից հանվելու և ըստ գտնվելու կամ նախընտրած վայրի մատչելի ընտրական տեղամասի ընտրողների ցուցակում ավելացվելու, ինչպես նաև ըստ գտնվելու վայրի ընտրական տեղամասի ընտրողների ցուցակում ընդգրկվելու մասին։

ՀՀ կենտրոնական ընտրական հանձնաժողովի 27.03.2025թ. թիվ 11-Ն որոշմամբ սահմանվել են ըստ հաշվառման վայրի ընտրողների ցուցակից հանվելու և ըստ գտնվելու կամ նախընտրած վայրի ընտրական տեղամասի ընտրողների ցուցակում ավելացվելու, ըստ գտնվելու վայրի ընտրական տեղամասի ընտրողների ցուցակում ընդգրկվելու վերաբերյալ ծանուցման ձևերը և կարգը, ինչպես նաև ըստ հաշվառման վայրի ընտրողների ցուցակից ժամանակավորապես դուրս գալու, ընտրողների ցուցակում ժամանակավորապես ընդգրկվելու մասին դիմումների ձևը և էլեկտրոնային եղանակով դիմումներ ներկայացնելու կարգը։

Դիմումները հնարավոր է ներկայացնել ինչպես էլեկտրոնային, այնպես էլ թղթային եղանակով։ Էլեկտրոնային դիմումները պետք է ապահովված լինեն էլեկտրոնային թվային ստորագրությամբ։

Այլ անձի անունից դիմում ներկայացնելու դեպքում դիմումատուն պարտավոր է ներկայացնել նոտարական վավերացմամբ հաստատված լիազորագիր։

Տեղաշարժման (հենաշարժական) դժվարություններ ունեցող անձի անունից դիմում ներկայացնելու դեպքում դիմումատուն պարտավոր է ներկայացնել նոտարական վավերացմամբ հաստատված լիազորագիր։

Հաշմանդամության հիմքով տեղաշարժման (հենաշարժական) դժվարություններ ունեցող անձանց էլեկտրոնային դիմումները կարող են ապահովվել ստորագրության՝ դիմողի համար ընդունելի ցանկացած եղանակով, իսկ տեղաշարժման (հենաշարժական) դժվարություններ ունեցող այլ անձանց էլեկտրոնային դիմումներն ապահովվում են էլեկտրոնային թվային ստորագրությամբ։

Հաշմանդամության հիմքով տեղաշարժման (հենաշարժական) դժվարություններ ունեցող անձանց՝ էլեկտրոնային թվային ստորագրությամբ չապահովված էլեկտրոնային դիմումներին կից ներկայացվում է նաև անձի հաշմանդամություն ունենալը հաստատող փաստաթուղթը կամ դրա պատճենը։

Հիշեցնենք, որ դիմումը պետք է ներկայացնել լիազոր մարմին՝ ՆԳՆ միգրացիայի և քաղաքացիության ծառայություն, քվեարկության օրվանից ոչ ուշ, քան 12 օր առաջ՝ մինչև ժամը 14:00-ն, այսինքն՝ մինչև մայիսի 26-ը։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Հայաստան–Ադրբեջան սահմանազատում․ Աղվերանում տեղի ունեցավ 13-րդ հանդիպումը

Գոհունակությամբ նշվել է, որ հանձնաժողովների 13-րդ հանդիպումը կրկին կայանում է կողմերից մեկի տարածքում՝ Հայաստանի Հանրապետությունում՝ Աղվերանում:

Հանդիպման ընթացքում կողմերը մանրամասն մտքեր են փոխանակել սահմանազատման միջոցառումների հետ կապված կազմակերպչական և տեխնիկական հարցերի շուրջ:

Կողմերը համաձայնեցրել և փոխանակել են սահմանազատման աշխատանքների իրականացման կարգի վերաբերյալ հետևյալ ուղեցույցների նախագծերի տեքստերը.

«Հայաստանի Հանրապետության և Ադրբեջանի Հանրապետության միջև պետական սահմանի սահմանազատման ընթացքում սահմանազատման փորձագիտական խմբերի աշխատանքի կարգի մասին ուղեցույց»,

«Հայաստանի Հանրապետության և Ադրբեջանի Հանրապետության միջև պետական սահմանի սահմանազատման քարտեզի ստեղծման կարգի մասին ուղեցույց»,

«Հայաստանի Հանրապետության և Ադրբեջանի Հանրապետության միջև պետական սահմանի սահմանազատման փաստաթղթերի ձևակերպման և հրատարակման կարգի մասին ուղեցույց»:

Կողմերը համաձայնության են եկել դիմել իրենց կառավարություններին՝ ուղեցույցների համապատասխան հաստատման համար։

Հայաստանի Հանրապետության փոխվարչապետ Մհեր Գրիգորյանը և Ադրբեջանի Հանրապետության փոխվարչապետ Շահին Մուստաֆաևն առանձին մտքեր են փոխանակել փոխադարձ հետաքրքրություն ներկայացնող հարցերի շուրջ:

Նշվել է, որ դեպի Հայաստանի Հանրապետություն բեռների տարանցումն Ադրբեջանի Հանրապետության տարածքով հաջողությամբ իրականացվում է և ներկայումս շարունակվում է։

Գոհունակությամբ նշվել է, որ Ադրբեջանն իրականացնում է նավթամթերքի մատակարարում դեպի Հայաստան, ինչը վկայում է երկու երկրների միջև առևտրատնտեսական կապերի ձևավորման մասին։

Տեղի է ունեցել նաև կողմերի գործարար շրջանակների ներկայացուցիչների մասնակցությամբ քննարկում առևտրատնտեսական համագործակցության զարգացմանը, ապրանքների և ծառայությունների փոխադարձ մատակարարումներին, ինչպես նաև տարանցիկ փոխադրումներին վերաբերող հարցերի շուրջ։

Հատուկ ընդգծվել է, որ ձեռք բերված արդյունքները հնարավոր են դարձել Հայաստանի Հանրապետության վարչապետ Նիկոլ Փաշինյանի և Ադրբեջանի Հանրապետության նախագահ Իլհամ Ալիևի քաղաքական կամքի շնորհիվ:

Հանդիպման արդյունքներով ստորագրվել է համապատասխան արձանագրություն:

Կողմերը պայմանավորվել են աշխատանքային կարգով համաձայնեցնել Ադրբեջանի Հանրապետությունում հաջորդ հանդիպման անցկացման ամսաթիվը:

 https://www.mfa.am/hy/press-releases/2026/04/29/Arm-Az/13912

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

124 գույք՝ պետությանը, գործերը՝ աճել են 23,8%-ով

Գլխավոր դատախազ Աննա Վարդապետյանը, «Ազգային ժողովի կանոնակարգ» սահմանադրական օրենքի համաձայն, այսօր ՀՀ Ազգային ժողովի պետական-իրավական հարցերի մշտական հանձնաժողովին է ներկայացրել Հայաստանի Հանրապետության դատախազության 2025 թվականի գործունեության մասին հաղորդումը, որը 2026 թվականի մարտի 31-ին ուղարկվել է ՀՀ Ազգային ժողով և հրապարակվել Դատախազության պաշտոնական կայքէջում:

Աննա Վարդապետյանը, մասնավորապես, նշել է. «Չորրորդ տարին է, որ պատիվ ունեմ Ձեզ ներկայացնելու Հայաստանի Հանրապետության դատախազության գործունեության տարեկան հաղորդումը:

Նախքան Հաղորդման մանրամասներին անդրադառնալը՝ մի քանի ամփոփ տվյալներ ներկայացնեմ 2025 թվականին կատարված աշխատանքներից:

Մասնավորապես՝

• 2025 թվականի ընթացքում Դատախազության բացառիկ՝ պետական և համայնքային շահերի պաշտպանության լիազորության շրջանակներում կայացված դատական ակտերով, ինչպես նաև դատախազական ներգործության միջոցների կիրառման արդյունքում Հայաստանի Հանրապետության և համայնքների սեփականությանը կամ տիրապետմանն է վերադարձվել, նախնական գնահատմամբ, շուրջ 66 միլիարդ 934 միլիոն դրամ շուկայականին մոտարկված կադաստրային արժեքով 124 գույք, այդ թվում՝ մանկապարտեզներ, մշակույթի տուն, մարզադաշտ, բնության հուշարձան, պուրակներ, հողատարածքներ:
• 2025 թվականին օրինական ուժի մեջ է մտել ապօրինի ծագում ունեցող գույքի բռնագանձման գործով առաջին վճիռը: Այս վճռի հիման վրա՝ Հայաստանի Հանրապետության սեփականության իրավունքն է գրանցվել Երևան քաղաքի Վարդանանց փողոցում գտնվող 1 բնակարանի և Կոտայքի մարզի Առինջ համայնքում գտնվող 1 բնակելի տան նկատմամբ, որոնց ընդհանուր միջին շուկայական արժեքը կազմում է 300 միլիոն 650 հազար դրամ (շուրջ 750 հազար ԱՄՆ դոլար): Բացի այդ, Վերականգնված միջոցների միասնական հաշվին փոխանցվել է շուրջ 21 միլիոն դրամ: Երկրորդ վճիռն, ինչպես գիտեք, ուժի մեջ մտավ բոլորովին վերջերս՝ 2026 թվականի ապրիլի 15-ին: Օրինական ուժի մեջ մտած դատավճռով հօգուտ Հայաստանի Հանրապետության, Աբովյան համայնքի նախկին ղեկավար Կարապետ Մուրադի Գուլոյանից և նրա կնոջից՝ Ռոզա Գագիկի Ծառուկյանից՝ որպես ապօրինի ծագում ունեցող գույքեր, ենթակա են բռնագանձման՝

1. Կոտայքի մարզի Առինջ գյուղի Պ. Սևակ թաղամասի 14-րդ փողոցի թիվ 8 հասցեի անշարժ գույքի՝ ապօրինի ճանաչված մասը՝ անշարժ գույքի շուրջ 90%-ը.
2. Կոտայքի մարզի Ծաղկաձոր համայնքի Տանձաղբյուր փողոցի 29/2 հողամասն՝ ամբողջությամբ.
3. «ԱԿԲԱ ԲԱՆԿ» ԲԲ ընկերության 2.000 հատ բաժնետոմս.
4. 2021 թվականին «Բելգլաս» ՍՊԸ-ին տրամադրված 294 հազար 900 ԱՄՆ դոլար փոխառության չվերադարձված մասի՝ 264 հազար ԱՄՆ դոլարի պահանջի իրավունքը:

Վերոնշյալից բացի, Կարապետ Մուրադի Գուլոյանից հօգուտ Հայաստանի Հանրապետության բռնագանձման է ենթակա նաև՝

1. 934 հազար դրամ՝ որպես «ԷԼԵԿՏՐԱՄՈՆՏԱԺ» ԲԲ ընկերության` 2019 թվականին ձեռք բերված 267 բաժնետոմսերի արժեք.
2. 1 միլիարդ 227 միլիոն 490 հազար դրամ՝ որպես Կարապետ Գուլոյանի օրինական եկամուտներով չհիմնավորվող ծախս, որն ունի ապօրինի ծագում, 2007-2022 թվականների ընթացքում փոխանցվել է բարեխիղճ ձեռքբերողի կամ հնարավոր չէ նույնականացնել և բռնագանձել.
3. 58 միլիոն 120 հազար դրամ՝ որպես ապօրինի եկամտի մնացորդ, որը հանդիսանում է ապօրինի ծագում ունեցող գույքերի վերափոխման կամ օգտագործման արդյունքում առաջացած գումար։

Նախաքննության ժամկետների նվազման՝ վերջին տարիներին արձանագրված միտումը պահպանվել է նաև 2025 թվականին. ավարտված քրեական վարույթների կեսից ավելին՝ 53,4%-ը, քննվել է մինչև 2 ամիս ժամկետում, ինչը 2024 թվականի համապատասխան ցուցանիշը գերազանցում է 11,3%-ով:

Վերջին 8 տարիների միջինացված ցուցանիշների հետ համեմատությամբ՝ 2025 թվականին 2,5%-ով նվազել է կալանքը որպես խափանման միջոց ընտրելու՝ դատարան ներկայացված միջնորդությունների տեսակարար կշիռը՝ մեղադրյալների ընդհանուր թվի համեմատությամբ:

2025 թվականին ավարտվել է 3495-ով կամ 9,2%-ով ավելի քրեական վարույթ, քան 2024 թվականին, այդ թվում` հաստատված մեղադրական եզրակացությամբ դատարան է հանձնվել 2807-ով կամ 23,8%-ով ավելի քրեական վարույթ:

Քրեական վարույթներով, գործարկման օրվանից (2024 թվականի դեկտեմբերի 5) մինչև 2025 թվականի դեկտեմբերի 31-ն ընկած ժամանակահատվածում Վերականգնված միջոցների միասնական հաշվին և Հարկ վճարողի միասնական հաշվին վճարվել է ընդհանուր 39 միլիարդ 895 միլիոն 845 հազար դրամ»:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Վարդապետյան․ 53,4% գործ՝ 2 ամսում, միլիարդների վերականգնում

2025 թվականին ավարտվել է 41.553 քրեական վարույթ (2024 թվականին՝ 38.058), այդ թվում՝ 14.608-ը՝ 16.194 անձի վերաբերյալ մեղադրական եզրակացությամբ, ուղարկվել է դատարան (2024 թվականին՝ 11.801 քրեական վարույթ՝ 13.179 անձի վերաբերյալ), 61-ը՝ բժշկական բնույթի հարկադրական միջոցներ կիրառելու միջնորդությամբ ուղարկվել է դատարան (2024 թվականին՝ 45), 26.884-ը կարճվել է (2024 թվականին՝ 26.212), որոնցից 16.416-ը՝ (2024 թվականին՝ 17.813) Քրեական դատավարության օրենսգրքի 13-րդ հոդվածի 1-ին մասի 1-ին կետով նախատեսված հիմքով: Այս մասին այսօր ՀՀ Ազգային ժողովում հայտարարել է ՀՀ գլխավոր դատախազ Աննա Վարդապետյանը և տեղեկացրել, որ 2025 թվականին դատարան ուղարկված քրեական վարույթների թիվը գերազանցում է 2024 թվականի ցուցանիշը 2823-ով կամ 23,8%-ով:

Հիշեցնենք, որ ՀՀ գլխավոր դատախազ Աննա Վարդապետյանը, «Ազգային ժողովի կանոնակարգ» սահմանադրական օրենքի համաձայն, այսօր ՀՀ Ազգային ժողովի պետական-իրավական հարցերի մշտական հանձնաժողովին է ներկայացրել Հայաստանի Հանրապետության դատախազության 2025 թվականի գործունեության մասին հաղորդումը, որը 2026 թվականի մարտի 31-ին ուղարկվել է ՀՀ Ազգային ժողով և հրապարակվել Դատախազության պաշտոնական կայքէջում:

Ըստ Աննա Վարդապետյանի՝ 2025 թվականի ընթացքում ավարտված քրեական վարույթների 53,4%-ը (2024 թվականին՝ 42,1%) քննվել է մինչև 2 ամիս, 17,1%-ը (2024 թվականին՝ 21,5%)՝ մինչև 4 ամիս, 10%-ը (2024 թվականին՝ 15%)՝ մինչև 6 ամիս, 10,5%-ը (2024 թվականին՝ 11,9%)՝ մինչև 1 տարի, 9%-ը (2024 թվականին՝ 9,5%)՝ 1 տարուց ավելի ժամկետում: «Այսպիսով, 2025 թվականին ավարտվել է 3495-ով կամ 9,2%-ով ավելի քրեական վարույթ, քան 2024 թվականին, այդ թվում` մեղադրական եզրակացությամբ դատարան է ուղարկվել 2807-ով կամ 23,8%-ով ավելի քրեական վարույթ»,- ընդգծել է ՀՀ գլխավոր դատախազը:

Գլխավոր դատախազի խոսքով՝ նախաքննության ժամկետների նվազման՝ վերջին տարիներին արձանագրված միտումը պահպանվել է նաև 2025 թվականի ընթացքում: Մասնավորապես՝ 2025 թվականի 6 ամսից ավելի է տևել քննված քրեական վարույթների 19,5%-ի նախաքննությունը, որը 2023 թվականի համապատասխան ցուցանիշից պակաս է 4%-ով, իսկ 2024 թվականի ցուցանիշից՝ 1,9%-ով: Ընդ որում, 2025 թվականին ավարտված քրեական վարույթների կեսից ավելին՝ 53,4%-ը քննվել է մինչև 2 ամիս ժամկետում, ինչը 2024 թվականի համապատասխան ցուցանիշը գերազանցում է 11,3%-ով:

Գլխավոր դատախազ Աննա Վարդապետյանի տեղեկացմամբ, քրեական վարույթներով, գործարկման օրվանից՝ 2024 թվականի դեկտեմբերի 5-ից մինչև 2025 թվականի դեկտեմբերի 31-ը Վերականգնված միջոցների միասնական հաշվին փոխանցվել է 21.458.058.668 դրամ: Հարկ վճարողի միասնական հաշվին վճարվել է 18.437.786.846 դրամ: Այսպիսով, Վերականգնված միջոցների միասնական հաշվին և Հարկ վճարողի միասնական հաշվին վճարվել է ընդհանուր 39.895.845.514 դրամ:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

93 մլն դրամի փողերի լվացում և թմրանյութի իրացում․ 3 գործի նախաքննությունն ավարտվել է