Նորություններ

Քննարկվել են «Տեսալսողական մեդիայի մասին» օրենքում առաջարկվող փոփոխությունները

ՀՀ տեղեկատվական անվտանգությունը պատշաճ ապահովելու, քաղաքացիներին հասնող բացասական տեղեկատվությունը նվազեցնելու, ինչպես նաեւ տեսալսողական մեդիայի ոլորտում առկա իրավական կարգավորումները կամ բացերը լրացնելու եւ հավասար մրցակցային պայմաններ ապահովելու նպատակով Կառավարությունն առաջարկում է սահմանել նոր կարգավորումներ «Տեսալսողական մեդիայի մասին» օրենքում: Այս մասին ասել է ՀՀ բարձր տեխնոլոգիական արդյունաբերության նախարար Մխիթար Հայրապետյանը:

«Մասնավորապես, երբ խոսում ենք տեսալսողական մեդիա հաղորդումների եւ տարատեսակ ծրագրերի մասին, մենք պետք է ընդգծենք, որ հանրային մուլտիպլեքսում առկա են մի քանի շերտեր: Դրանք այն 26 հեռուստաալիքներն են, որոնք ամբողջ հանրապետությունում ունեն 100 տոկոսանոց սփռում եւ անվճար են մեր քաղաքացիների համար»,- ընդգծել է զեկուցողը:

Ըստ նախարարի՝ օրենքում նախատեսվող նոր փոփոխություններով առաջարկվում է հանրային մուլտիպլեքսի համար գործող կարգավորումները տարածել նաեւ ցանցային օպերատորների տիրույթում հեռարձակվող հեռուստահաղորդումների եւ հեռուստածրագրերի վրա:

Մեկ այլ փոփոխությամբ Հեռուստատեսության եւ ռադիոյի հանձնաժողովը հնարավորություն կունենա սանկցիա կիրառել ցանցային օպերատորների նկատմամբ այն պարագայում, եթե արձանագրվեն առերեւույթ խախտումներ ՀՀ ներքաղաքական կյանքին միջամտելու տեսանկյունից: «Վարույթ հարուցվելու պարագայում ցանցային օպերատորը պետք է տվյալ հաղորդումն այլեւս չհեռարձակի մինչեւ այն պահը, երբ կայացված կլինի վերջնական որոշումը: Դա չիրականացնելու պարագայում պատասխանատվության ենթակա սուբյեկտ կհամարվի ցանցային օպերատորը»,- մանրամասնել է Մխիթար Հայրապետյանը:

Նախագծով նաեւ սահմանվել են ցանցային օպերատորին տրված լիցենզիայի կասեցման եւ դադարեցման հիմքերն ու դրանց կիրառման մեխանիզմները:

Նախարարի տեղեկացմամբ առաջարկվող բոլոր կարգավորումները վերցված են դեռեւս 2010 թվականից Եվրոպական միության համապատասխան տեսալսողական մեդիա ոլորտը կարգավորող դիրեկտիվներից:

Զեկուցողը պատասխանել է պատգամավորների հարցերին, որոնք վերաբերել են առաջարկվող փոփոխություններին ու որոշ ձեւակերպումներին:

Հարակից զեկուցող, ԱԺ գիտության, կրթության, մշակույթի, սփյուռքի, երիտասարդության եւ սպորտի հարցերի մշտական հանձնաժողովի նախագահի տեղակալ Թագուհի Ղազարյանի խոսքով նախագծով ՀՌՀ-ի վրա հավելյալ մշտադիտարկում իրականացնելու պարտավորություն է դրվում: Պատգամավորը բարձրաձայնել է գլխադասային հանձնաժողովի տված դրական եզրակացությունը եւ կոչ արել կողմ քվեարկել նախաձեռնությանը:

Ելույթներում ընդդիմադիր «Հայաստան» խմբակցության պատգամավորներն իրենց դիտարկումներն ու մտահոգություններն են հայտնել առաջարկվող փոփոխությունների առնչությամբ:

ԱԺ փոխնախագահ Ռուբեն Ռուբինյանն էլ հակափաստարկներ է ներկայացրել ընդդիմադիր գործընկերների հնչեցրած տեսակետների վերաբերյալ: Պատգամավորի խոսքով օրենքով հնարավորություն կտրվի Հեռուստատեսության եւ ռադիոյի հանձնաժողովին՝ պաշտպանելու Հայաստանի Հանրապետությունն օտարերկրյա միջամտությունից:

Առաջին ընթերցմամբ ներկայացված նախաձեռնությունը քննարկվել է փետրվարի 11-ի ԱԺ նիստում:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

ԱԺ-ն ընդունեց 27 տարին լրացած ու պարտադիր զինվորական ծառայություն չանցած քաղաքացիներին առնչվող նախագիծը

86 կողմ, 0 դեմ, 5 ձեռնպահ ձայներով 2-րդ ընթերցմամբ և ամբողջությամբ Ազգային ժողովն ընդունել է պատգամավոր Հայկ Սարգսյանի նախագիծը:

Ըստ դրա՝ 27 տարին լրացած ու պարտադիր զինվորական ծառայություն չանցած քաղաքացիները կկարողանան վճարել ու ազատվել քրեական պատասխանատվությունից։

«Զինվորական ծառայության և զինծառայողի կարգավիճակի մասին» օրենքում լրացումներ և փոփոխություն կատարելու մասին» օրենքի փոփոխություններով՝ 27 տարին լրացած ու պարտադիր զինվորական ծառայություն չանցած քաղաքացիները հնարավորություն կունենան վերադառնալու հայրենիք, գումար վճարելու ու կատարելու ՀՀ-ի առջև ունեցած իրենց պարտքը։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Համայնքային գույքի վերադարձը՝ Գյումրու ավագանու օրակարգում

Գյումրու ավագանու հերթական նիստի օրակարգում ընդգրկված հարցերը վերաբերում էին համայնքային ենթակայության ՀՈԱԿ-ներին դրամական հատկացումներին, կոմունալ բաժնին նոր գույք տրամադրելուն, աղբահանությանն ու փողոցների բարեկարգման ծրագրերին, ինչպես նաև համայնքի գույքը քաղաքի հաշվեկշիռ վերադարձնելուն։

Օրակարգում առանձին կետով քննարկվել է պետական և համայնքային շահերի պաշտպանության նպատակով դատարաններ հայցեր ներկայացնելու և այդ գործընթացում փաստաբանական ծառայությունից օգտվելու նախագիծը։ Այդ հարցով Գյումրու քաղաքապետարանի իրավաբանական բաժնի պետի պաշտոնակատար Հրաչ Վարդանյանն առաջարկել է Հայաստանի Հանրապետության իրավասու դատարաններ ներկայացնել պետական–համայնքային պաշտպանության հայցեր՝ Գյումրի քաղաքին նախկինում պատկանած մի շարք անշարժ գույքերը համայնքին վերադարձնելու պահանջով։ Առաջարկվել է նաև համայնքի շահերի պաշտպանության համար օգտվել փաստաբանական ծառայությունից՝ սահմանելով մինչև 5 միլիոն ՀՀ դրամ առավելագույն գումար։ Սակայն, Գյումրու ավագանու «Քաղաքացիական պայմանագիր» խմբակցության անդամները դեմ են արտահայտվել փաստաբանական ծառայության համար 5 միլիոն դրամ հատկացնելու առաջարկին՝ փոխարենը առաջարկելով գործընթացն իրականացնել դատախազության միջոցով։

Խմբակցության քարտուղար Քնարիկ Հարությունյանը նշել է, որ եթե դատախազության ուսումնասիրության արդյունքում հանցակազմ բացահայտվի, պետությունն ինքն է շահագրգռված լինելու համայնքային գույքը վերադարձնել համայնքին։

Մինչդեռ «Մեր քաղաքը» դաշինքի ներկայացուցիչները մտահոգություն են հայտնել, որ հարցի նման զարգացումը կարող է վնասել քաղաքի գործարար համբավին։ Քննարկումների արդյունքում հարցը հանվել է օրակարգից, քանի որ անորոշություն են արձանագրել նաև մյուս խմբակցությունները։ Նիստի ավարտին ավագանին քննարկել է նաև թափառող շների կացարանի կառուցման հարցը։ Քաղաքապետարանը պատրաստակամություն է հայտնել այն կառուցել համայնքի միջոցներով, և առաջիկայում նախատեսվում է մրցույթի հայտարարում։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

ԱՄՆ փոխնախագահ Վենսը և տիկինը՝ Հայոց ցեղասպանության հուշահամալիրում

Էդիտա Գզոյանը Ջեյ Դի Վենսին և նրա տիկնոջը ուղեկցել է Հայոց ցեղասպանության հուշահամալիր՝ ներկայացնելով կառուցման պատմությունը:

Ջեյ Դի Վենսը ծաղկեպսակ է դրել Հայոց ցեղասպանության զոհերի հիշատակը հավերժացնող հուշակոթողին, այնուհետև հյուրերը ծաղիկներ են դրել անմար կրակի մոտ և մեկ րոպե լռությամբ հարգել Հայոց ցեղասպանության անմեղ զոհերի հիշատակը:

Էդիտա Գզոյանը պատմել է նաև Հուշապատի մասին, որի հետնամասում հատուկ խորշերի մեջ ամփոփված են 19-րդ դարավերջին և 20-րդ դարասկզբին թուրքական կառավարության իրագործած հայերի զանգվածային կոտորածների և ցեղասպանության դեմ իրենց բողոքի ձայնը բարձրացրած օտարազգի մի շարք հասարակական, քաղաքական գործիչների, մտավորականների և միսիոներների գերեզմաններից վերցված հողով լի փոքր սափորները: Հենրի Մորգենթաուի և Կլարա Բարտոնի հայանպաստ գործունեության մասին պատմելով՝ նա շեշտել է, որ նրանց կատարած աշխատանքի շնորհիվ ամերիկյան հասարակությունը քաջածանոթ էր Օսմանյան կայսրությունում տեղի ունեցող հայերի կոտորածներին, և որ ԱՄՆ-ի կողմից Հայոց ցեղասպանության ճանաչումը նաև հարգանքի տուրք էր այդ մարդկանց հիշատակին:

Նա անդրադարձ է կատարել նաև Ծիծեռնակաբերդի տարածքում անցյալ դարավերջին Ադրբեջանի Սումգայիթ, Կիրովաբադ (Գանձակ), Բաքու քաղաքներում ադրբեջանական կառավարության կազմակերպած կոտորածներին զոհ գնացած հայերի հիշատակին տեղադրված երեք խաչքարերի և Արցախյան գոյամարտի տարիներին Հուշապատի դիմացի հատվածում հուղարկավորված հինգ ազատամարտիկների պատմություններին՝ շեշտելով կապը տեղի ունեցածի և Հայոց ցեղասպանության միջև:

Այցի ավարտին ԱՄՆ փոխնախագահը գրառում է կատարել Հայոց ցեղասպանության թանգարանի Պատվավոր հյուրերի հուշամատյանում, նշելով՝ «Կորցրած կյանքերի հանդեպ խորին հարգանքի հիշատակով մենք պատվում ենք հայ ժողովրդի տոկունությունն ու անսասան ոգին։ Թող Ամերիկան և Հայաստանը միասին ձգտեն խաղաղության և փոխըմբռնման ապագայի»:

Հայաստանում կսկսի աշխատել YouTube-ի դրամայնացումը (մոնետիզացիան)

YouTube ընկերությունը պաշտոնապես հայտարարել է հայկական շուկայում իր ներգրավվածության ընդլայնման, ինչպես նաև 2026թ գարնանից YouTube գործընկերային ծրագրի (YouTube Partner Program-YPP) մեկնարկի մասին, ինչի արդյունքում Հայաստանում գործող բովանդակություն ստեղծողներն այսուհետ հնարավորություն կունենան լիարժեք օգտվելու հարթակի դրամայնացման գործիքակազմից։

Այս զարգացումը ռազմավարական նշանակություն ունեցող քայլ է Հայաստանի թվային տնտեսության զարգացման և տեղական կոնտենտ արտադրողների համայնքի հզորացման, ինչպես նաև հայկական բովանդակության, մշակույթի և նորարարության գլոբալ տեսանելիության խթանման ուղղությամբ։

Ծրագրի մեկնարկը կնպաստի հայկական մշակույթի, նորարարության և մեդիա բովանդակության միջազգային ներկայացվածության բարձրացմանը։

YouTube-ի դրամայնացումը միայն բովանդակության ստեղծում չէ, այն թվային ձեռներեցության նոր հարթակ է, որը հայ ստեղծագործողներին հնարավորություն կտա իրենց տաղանդը վերածել կայուն բիզնեսի՝ ստեղծելով եկամուտներ և նոր աշխատատեղեր: Դրամայնացման գործիքների հասանելիությունը կնպաստի վստահելի և որակյալ բովանդակության աճին՝ ամրապնդելով հասարակական դիմակայունությունը ապատեղեկատվության դեմ՝ բազմազան և պրոֆեսիոնալ ձայների միջոցով:

ՀՀ բարձր տեխնոլոգիական արդյունաբերության նախարարությունը շարունակելու է համագործակցել համաշխարհային խոշոր գործընկերների հետ, որի արդյունքում հայ ստեղծագործողներն ու տեխնոլոգիական ընկերությունները լիարժեքորեն ինտեգրված կլինեն համաշխարհային թվային էկոհամակարգում։

Նախարարությունը վերահաստատում է իր պատրաստակամությունը՝ խորացնելու սերտ համագործակցությունը YouTube-ի,  համաշխարհային տեխնոլոգիական հսկաների և ամերիկյան գործընկերների հետ՝ ի նպաստ Հայաստանի տեխնոլոգիական առաջընթացի։

YouTube-ի պաշտոնական հայտարարությանը կարող եք ծանոթանալ հետևյալ հղումով՝ https://blog.youtube/new…/youtube-partner-program-armenia/։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

ՀՀ վարչապետը և ԱՄՆ փոխնախագահը՝ ռազմավարական գործընկերության շուրջ

Տեղի է ունեցել Հայաստանի Հանրապետության վարչապետ Նիկոլ Փաշինյանի և պաշտոնական այցով ՀՀ ժամանած Ամերիկայի Միացյալ Նահանգների փոխնախագահ Ջեյմս Դի Վենսի հանդիպումը։

ՀՀ վարչապետը և ԱՄՆ փոխնախագահը նախ ողջունել են երկու երկրների պատվիրակությունների անդամներին, այնուհետև տեղի է ունեցել Նիկոլ Փաշինյանի և Ջեյմս Դի Վենսի առանձնազրույցը։ Հաջորդիվ քննարկումները շարունակվել են ընդլայնված կազմերով։

Վարչապետ Փաշինյանն իր խոսքում նշել է․ <strong>«Հարգելի պարոն փոխնախագահ, ողջունում եմ Ձեզ և Ձեր գլխավորած պատվիրակությանը Հայաստանի Հանրապետությունում։</strong>

<strong>Ձեր այցը հիրավի պատմական է, որովհետև Դուք Միացյալ Նահանգների առաջին փոխնախագահն եք և Միացյալ Նահանգների ամենաբարձրաստիճան պաշտոնյան, ով երբևէ այցելում է Հայաստանի Հանրապետություն։ Եվ սա, կարծում եմ, որ ոչ միայն արարողակարգային նրբություն է, այլև արտահայտում է այն զարգացումները, որ վերջին տարիներին և հատկապես վերջին մեկ տարվա ընթացքում տեղի են ունենում Հայաստանի և Միացյալ Նահանգների հարաբերություններում։ Եվ ես ուզում եմ, այսօր առիթ ունեցա արդեն Ձեզ ասել, ընդգծել մեկ տարի առաջ Սպիտակ տանը Ձեզ հետ ունեցած իմ հանդիպումը, որը, ինչպես հետագան պիտի ցույց տար, շատ էական նշանակություն ունեցավ հետագա զարգացումների համար։</strong>

<strong>Ես ուզում եմ իմ շնորհակալությունն արտահայտել Միացյալ Նահանգների նախագահ պարոն Թրամփին և Ձեզ՝ նախորդ տարի օգոստոսին գագաթնաժողով կազմակերպելու համար, որի արդյունքում Հայաստանի և Ադրբեջանի միջև հաստատվեց խաղաղություն։ Օրեր առաջ մենք հանդիպում ունեցանք Ադրբեջանի նախագահի հետ Աբու Դաբիում, մեր տպավորությունն այն է, որ այդ խաղաղությունը, ինչպես կարելի է ասել, արդեն շատ մոտ ենք այն կետին, եթե արդեն չենք հատել այդ կետը, որը կարող ենք համարել անշրջելի։ Հիմա մեր հիմնական խնդիրն է խաղաղության գործընթացի և Վաշինգտոնի հռչակագրի կարևորագույն կետերից մեկը՝ TRIPP նախագիծը, իրականացնել՝ համաձայն այն շրջանակի, որը Հայաստանի արտաքին գործերի նախարարը և Միացյալ Նահանգների պետքարտուղարը հունվարի 14-ին ընդունեցին, այսինքն՝ երկու կառավարությունների միջև ընդունվեց։</strong>

<strong>Եվ մեր օրակարգը շատ հարուստ է, և կրկին ողջունում եմ Ձեզ, բարով եք եկել Հայաստանի Հանրապետություն։ Այսօր, իհարկե, մենք քննարկելու շատ բան ունենք և շատ կարևոր է, որ այդ քննարկումներն ամբողջությամբ դրական օրակարգ են, և այս դրական օրակարգն ամբողջությամբ արտահայտում է մեր հարաբերությունների ռազմավարական գործընկերության ընդգրկումը և իմաստը, շնորհակալ եմ»։</strong>

ԱՄՆ փոխնախագահ Ջեյմս Դի Վենսն իր հերթին նշել է․ – <strong>«Շնորհակալություն, պարոն վարչապետ, շնորհակալություն հավաքված պատվիրակությանը։ Դուք ունեք հոյակապ թիմ, մենք բոլոր հարցերը երկկողմ հանդիպման ժամանակ լուծեցինք, այնպես որ թիմերը կարիք չունեն աշխատելու։</strong>

<strong>Փոխանցում եմ մեր նախագահի ողջույնը Ձեր ազգին, Ձեր երկրին։ Վարչապետ Փաշինյանն իրոք եղել է գործընկեր, և շատ շնորհակալություն ենք հայտնում անձնական ընկերության և համագործակցության, գործընկերության համար։ Շատ բան կա քննարկելու, մեր հաջորդ իրադարձությանը, որ շուտով պետք է ունենանք, հայտարարություններ կանենք, այնպես որ չկրկնենք։ Ասեմ, որ սա շատ հիասքանչ երկիր է, շատ շնորհակալ եմ անձնական հյուրընկալության համար, ոչ մի միայն ինձ, այլ նաև իմ ընտանիքին։</strong>

<strong>Սա աշխարհի հնագույն քրիստոնյա ազգերից մեկն է, և ես շատ շնորհակալ եմ և՛ Ձեզ, և՛ Ձեր վարչակազմին։ Ես իրոք հավատացած եմ, որ Դուք հնարավորություն ունեք ոչ միայն պատմական, կայուն, անվերադարձ խաղաղություն հաստատել, բայց հիմա մի կետում ենք, որ Հայաստանը կդառնա որպես այս տարածաշրջանում տնտեսական զարգացման մի շատ լուրջ հենակետ, որը նաև Հայաստանի ժողովրդին կբերի բարգավաճում, ինչը որ նաև կփոխանցվի ԱՄՆ ժողովրդի վրա։ Շատ ուրախ եմ, ինձ համար պատիվ է առաջին փոխնախագահը լինելու, որը ժամանեց Հայաստան ժամանեց»։</strong>

Հաջորդիվ ՀՀ վարչապետին և ԱՄՆ փոխնախագահին են ներկայացվել TRIPP նախագծի իրականացման, Firebird ընկերության կողմից Հայաստանում արհեստական բանականության գործարան և տվյալների կենտրոն կառուցելու ծրագրի մանրամասները, ինչպես նաև Հայաստանի կողմից ԱՄՆ-ից ձեռք բերված «V-BAT» տեսակի անօդաչու թռչող սարքի հնարավորությունները։

<em><span class=”goog-text-highlight”>© progressgyumri.am Armenian News / Analyses:</span></em>

<em>Հեռ. ՝ +37498 691-690; Էլ. Փոստ ՝ progressgyumri@gmail.com</em>

ԱԺ ընտրությունը կլինի 2026 թվականի հունիսի 7-ին. ՀՀ նախագահի հրամանագիրը

ՀՀ նախագահ Վահագն Խաչատուրյանը հրամանագիր է ստորագրել Ազգային ժողովի հերթական ընտրությունը 2026 թվականի հունիսի 7-ին նշանակելու մասին: «Ղեկավարվելով Սահմանադրության 91-րդ հոդվածի 1-ին մասով և 93-րդ հոդվածով, հիմք ընդունելով «Հայաստանի Հանրապետության ընտրական օրենսգիրք» սահմանադրական օրենքի 103-րդ հոդվածի 2-րդ մասը.

1. Ազգային ժողովի հերթական ընտրությունը նշանակել 2026 թվականի հունիսի 7-ին:

2. Սույն հրամանագիրն ուժի մեջ է մտնում պաշտոնական հրապարակմանը հաջորդող օրվանից»,- նշված է հրամանագրում:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Միքայել արքեպիսկոպոսի կալանքը փոխարինվեց տնային կալանքով

Վերաքննիչ դատարանը հրապարակեց Միքայել արքեպիսկոպոս Աջապահյանի կալանքը վերացնելու փաստաբանների միջնորդության վերաբերյալ իր որոշումը, որով խափանման միջոց կալանքը փոխարինվեց տնային կալանքով և բացակայելու արգելքով։ Նախորդ նիստում պաշտպանական կողմը միջնորդություն էր ներկայացրել կալանքը վերացնելու վերաբերյալ՝ հաշվի առնելով արքեպիսկոպոսի վիճակը, նրա առաջիկա երկրորդ վիրահատությունը և վիրահատությունից հետո քրեակատարողական հիմնարկ վերադառնալու հետ կապված վտանգները։

Հիշեցնենք, որ Միքայել սրբազանը դատապարտվել է 2 տարվա ազատազրկման՝ իշխանությունը զավթելու հրապարակային կոչի համար։ Նա մեղադրվում է 2024 թվականի փետրվարի 3-ին, ապա 2025 թվականի հունիսի 21-ին, ԶԼՄ ներկայացուցիչների հետ հարցազրույցներում հրապարակայնորեն իշխանությունը զավթելու կոչ անելու մեջ։ Փաստաբաններն ու դատախազությունը դատական ակտը բողոքարկել են Վերաքննիչ դատարանում։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

ՀՀ ՏԿԵ փոխնախարարն ընդունել է Ղազախստանի պատվիրակությանը

ՀՀ տարածքային կառավարման և ենթակառուցվածքների նախարարի տեղակալ Արմեն Սիմոնյանն այսօր ընդունել է Հայաստանի Հանրապետությունում Ղազախստանի Հանրապետության արտակարգ և լիազոր դեսպան Բոլատ Իմանբաևի գլխավորած պատվիրակությանը։

Նախարարի տեղակալը ողջունել է հյուրերին և կարևորել երկու երկրների միջև խորացող գործընկերային կապերը։

Հանդիպման ընթացքում քննարկվել են երկու երկրների միջև ուղիղ չվերթերի վերականգնման և նոր ավիաընկերությունների հետ համագործակցության հնարավորություններին վերաբերող հարցեր։

Կողմերը քննարկել են երկկողմ հետաքրքրություն ներկայացնող այլ հարցեր ևս և պայմանավորվել շարունակել քննարկումները։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Արայիկ Հարությունյանը, Լևոն Մնացականյանը,Դավիթ Բաբայանը,Դավիթ Մանուկյանը,Դավիթ Իշխանյանը Բաքվի դատարանում դատապարտվեցին զմահ ազատազրկման

Արցախի նախկին նախագահ Արայիկ Հարությունյանը,  Ազգային ժողովի նախկին նախագահ Դավիթ Իշխանյանը,  Արցախի ՊՆ նախկին հրամանատար  Լևոն Մնացականյանը, ՊԲ հրամանատարի նախկին տեղակալ Դավիթ Մանուկյանն ու և նախկին արտգործնախարար Դավիթ Բաբայանը Բաքվի դատարանում դատապարտվեցին զմահ ազատազրկման։ Արցախի նախկին նախագահներ Արկադի Ղուկասյանն ու Բակո Սահակյանը դատապարտվեցին 20 տարվա ազատազրկման։ Ադրբեջանի օրնեսդրությունն արգելում է 65 տարին լրացած անձանց ցմահ ազատազարկել: Այս մասին հայտնում է ադրբեջանական APA  գործակալությունը։

Մեղադրյալներից Մադաթ Բաբայանը դատապարտվեց 19 տարվա ազատազրկման:

Նրանք 2023 թվականի սեպտեմբերից Ադրբեջանում գերության մեջ են։

Բռնապետական Բաքուն Արցախի ռազմաքաղական ղեկավարությանը մեղադրում է մի շարք ծանր հանցագործությունների մեջ՝ ռազմական հանցագործություններ, ահաբեկչութուն, մարդկության դեմ հանցագործություն և այլն։

2023 թվականի սեպտեմբերի 19-ի Ադրբեջանի ռազմական հարձակումից հետո գերեվարված 16 հայերի դեմ շինծու դատավարությունն ընթանում է առանց միջազգային ու անկախ դիտորդների, նրանց արգելված է ներա լինել դատավարությանը։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com