Նորություններ

«Ուժեղ Հայաստան» դաշինքի թեկնածուն չի հայտնել օտարերկրյա քաղաքացիության մասին

ՀՀ քննչական կոմիտեի Երևան քաղաքի քննչական վարչությունում ՀՀ ՆԳՆ ոստիկանությունից ստացված առերևույթ հանցանքի մասին հաղորդման համաձայն՝ 2026 թվականի հունիսի 7-ին ՀՀ ԱԺ հերթական ընտրություններում «Ուժեղ Հայաստան» դաշինքի առաջին համարով առաջադրված պատգամավորի թեկնածու Ն.Կ.-ն, նախազգուշացված լինելով կեղծ տեղեկություններ հայտնելու դեպքում օրենսդրությամբ սահմանված պատասխանատվության մասին, դիտավորությամբ թաքցրել է օտարերկրյա քաղաքացիություն ունենալու կամ ունեցած լինելու մասին տեղեկությունը, այն է՝ ՆԳՆ միգրացիայի և քաղաքացիության ծառայություն է ներկայացրել այլ պետության քաղաքացի չլինելու մասին բովանդակությամբ կեղծ դիմում՝ այդ կերպ թաքցնելով պաշտոնատար անձի կարգավիճակ ձեռք բերելուն խոչընդոտող՝ օտարերկրյա քաղաքացիություն ունենալու մասին տեղեկությունը:

Հաղորդման հիման վրա նախաձեռնվել է քրեական վարույթ՝ Քրեական օրենսգրքի 449-րդ հոդվածի 1-ին մասով (պաշտոնատար անձի կարգավիճակ ձեռք բերելուն կամ պահպանելուն խոչընդոտող տեղեկությունները թաքցնելը):

Կատարվում է նախաքննություն:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Ընտրություններում «կենացները թանկանում են»

Հայաստանի խորհրդարանական ընտրությունների նախընտրական քարոզարշավն հասել է իր միջնակետին, նաեւ՝ կիզակետին։ Ինչպես ասում են, օր օրի «կենացները թանկանում են», սակայն․․․ սակայն էժանանում են խոսքի արժեքը, միտքն ու գաղափարը։ Դրանք էժանացնում են  հենց իրենք՝ քաղաքական ուժերն ու գործիչները։

Եթե քարոզարշավի առաջին շաբաթվա ընթացքում մասնակից քաղաքական ուժերի ներկայացուցիչներն ընտրողների հետ հանդիպումների ժամանակ դրսեւորում էին համեմատաբար զուսպ վարք ու բառապաշար, քիչ թե շատ անդրադառնում  էին իրենց ծրագրերին, արտաքին ու ներքին քաղաքական, տնտեսական, սոցիալական հարցերի, իսկ միմյանց հասցեին հնչեցրած քննադատությունները  մեծամասամբ տեղավորվում էին նախընտրական պայքարի տրամաբանության մեջ, ապա հաջորդող օրերին կրքերը շիկացրին, անցան փողոցային բառապաշարի, փոխադարձ վիրավորանքների, անձնական պիտակավորումների։

Բանը հասավ անգամ իրար հասցեի հնչեցրած հայհոյանքների, սպառնալիքների, մինչեւ իսկ իրար սատկացնելու, խփել-սպանելու հայտարարությունների։ Մի խոսքով, «մարտեր առանց սահմանների»։

Այս իմաստով հատկապես «աչքի են ընկնում» ընտրություններին հաջողության հասնելու հնարավորություններ ունեցող, ինչպես ընդունված է ասել, հիմնական քաղաքական ուժերը։ Այսինքն՝ այն ուժերը, որոնք տարբեր սոցոլոգիական հարցումների համաձայն, առաջատար դիրքեր են գրավում եւ օբյեկտիվորեն առավել մեծ հավակնություններ ունեն խորհրդարանում որոշակի տեղեր զբաղեցնելու համար։

Խոսքը վերաբերում է, մասնավորապես, «Քաղաքացիական պայմանագիր», «Ուժեղ Հայաստան», «Բարգավաճ Հայաստան» կուսակցություններին ու «Հայաստան» դաշինքին եւ դրանց առաջնորդներին ու առանձին ներկայացուցիչների։ Քաղաքական մեկնաբանների դիտարկմամբ ու հանրային կարծիքի համաձայն, հենց այս ուժերն առավել մեծ հնարավորություններ ունեն խորհրդարանական աթոռներ ունենալու համար ու հենց այս ուժերի միջեւ է ընթանում հիմնական պայքարը։

Ընդհանրապես, հայաստանյան ընտրություններում մշտապես պակասել են գաղափարական, առարկայական պայքարն ու խոսքը, ինչն արդյունք է քաղաքական դաշտի անկատարության,  քաղաքական գործընթացների՝ շատ դեպքերում ապաքաղաքական բնույթի եւ ներքին դրդապատճառների բացակայության։ Այս ամենի արդյունքում, ընտրողներն էլ քիչ ուշադրություն են դարձնում քաղաքական ուժերի ծրագրերին ու առաջարկներին եւ առավել, այսպես ասած, տարվում են տեսարաններով։

Ներկայիս ընտրությունների տվյալ փուլում այս իրողություններն իրենց արտահայտությունն են գտնում առավել մեծ չափաքանակով ու գունեղ երանգներով։ Եւ որքան մոտենում է ընտրությունների օրը, այնքան այս երեւույթներն առավել սաստկանալու միտումներ են դրսեւորում։

Այս ամենին գումարվում են թշնամանքն ու ատելության խոսքը, ապատեղեկատվությունը, սուտ տեղեկություններով հանրության մեջ վախի մթնոլորտի սերմանումը, հասարակական պառակտվածությունը, որը կարող է հասնել  մի վտանգավոր սահմանի։

Ընտրական գործընթացներին հետեւող որոշ քաղաքական վերլուծաբաններ ու դիտորդներ կարծում են, որ այսպիսի մթնոլորտի հաստատումը շատ դեպքերում միտումնավոր է արվում, ընդ որում, արվում է քաղաքական տաբեր ճամբարներից՝ տարբեր դրդապատճառներով ու մղումներով։

Ըստ այդմ, իշխանությունը, օրինակ, այսպիսի քայլերով էժանացնում է ընտրական գործընթացները, որպեսզի հանրության մեջ առաջանան որոշակի հիասթափության տրամադրություններ, դրանց արդյունքում շատերը չգնան ընտրության, լինի քիչ մասնակցություն, որը ձեռնտու է առավել շատ ձայներ հավաքած քաղաքական ուժին, քանի որ գործող ընտրական համակարգի համաձայն, այդ ուժը ստանում է լրացուցիչ բոնուսներ։ Առավել շատ ձայներ հավաքող ուժ այս պահին դիտարկվում է հենց իշխանական կուսակցությունը։

Իսկ ահա ընդդիմադիր քաղաքական ուժերը, մասնավոապես, ռուսամետ դաշտում գործողները, իրենց գործողություններով նպատակ ունեն ստվեր գցել ընտրական գործընթացների վրա, որպեսզի հետագայում խոսեն ընտրությունների կեղծման, դրանց անօրինակության մասին, ինչը առավել մեծ հնարավորություններ կտա հետընտրական գործընթացներ կազմակերպելու ու իրականացնելու համար։

Այս իմաստով, թերեւս, պատահական չէ, որ Ռուսաստանի կիսապաշտոնական եւ ոչ պաշտոնական շրջանակներից արդեն իսկ հնչում են հայտարարություններ այն մասին, որ, եթե ընտրություններում հաղթի գործող իշխանությունը, այսինքն՝ Նիկոլ Փաշինյանը, ապա Ռուսաստանը պետք է չճանաչի ընտրությունների արդյունքները։

Իսկ ահա Ռուսաստանի պահով հատկանշական է, որ այս օրերին  հրապարակումներ եղան գաղտնազերված փաստաթղթերի մասին, որոնք բացահայտում են ՌՖ կողմից եվրոպական մի քանի երկրներում, այդ թվում՝ Հայաստանում, կեղծ դրոշի տակ իրականացված ու իրականացվելիք հատուկ օպերացիաների մասին՝ ապատեղեկատվություն տարածելու ու հասարակական պառակտվածություն առաջացնելու գործողությունների միտումով։

Այսինքն, խոսքը վերաբերում է հիբրիդային պատերազմի մասին, ինչի մասին օրեր առաջ Երեւանում հայտարարում ու զգուշացնում էին Եվրամիության ներկայացուցիչները եւ եվրոպական երկրների առաջնորդները։

Եթե վերը նշված կուսակցություններն իրականացնում են առավել մասսայական հանդիպումներ ընտրողների հետ, մյուս, սակավ հնարավորություններ ունեցող քաղաքական ուժերը, սահմանափակվում են փոքր հանդիպումներով ու իրենց ասելիքը սոցցանցային ձեւաչափով ներկայացնելու միջոցով։

Համլետ Կիրակոսյան

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Նախընտրական Հայաստան. քաղաքական ուժեր ու դեմքեր-3

«Ալյանս» առաջադիմական ցենտրիստական կուսակցությունը իրեն ներկայացնում է որպես կենտրոնամետ ուժ՝ սոցիալիստական ու լիբերալ համակարգերի արդյունավետ համադրման գաղափարական հենքի վրա։ Կուսակցության նախագահը Տիգրան Ուրիխանյանն է, որին, սակայն, ԿԸՀ-ն չի գրանցել որպես պատգամավորության թեկնածու՝ քաղաքացիության ու վերջին չորս տարում Հայաստանում բնակության մասին փաստաթղթերի հետ կապված խնդիրների պատճառաբանությամբ։

Այս գործիչը երկար ժամանակ եղել է «Բարգավաճ Հայաստան» կուսակցության երեւելի դեմքերից, մի քանի անգամ ընտրվել ԱԺ պատգամավոր։ 2015 թվականին դուրս է եկել ԲՀԿ-ից ու հիմնել «Ալյանսը»։ Սակայն, ամեն դեպքում, 2017 եւ 2018 թթ․ ԱԺ ընտրություններում պատգամավոր է դարձել հենց ԲՀԿ-ի ցուցակով։ 2020 -ին դուրս է եկել ԲՀԿ խմբակցությունից ու դարձել անկախ պատգամավոր, որից հետո քաղաքական ռեվերանսներ էր անում դեպի վարչապետ Նիկոլ Փաշինյանը՝ իրեն ներկայացնելով որպես վերջինիս գաղափարական դաշնակից։ Սակայն, թերեւս, ուշադրության չարժանալով Փաշինյանի կողմից, դիրքավորվել է վարչապետին կոշտ քննադատության ներկայացնող դաշտում, ընդ որում, ռուսամետ այն դաշտում, որը Հայաստանը դիտարկում է միութենական պետության կազմում, անգամ հայտարարել էր, որ պետք է մտնի Ռուսաստանի կազմ։

«Ժողովրդավարական համախմբում» կուսակցությունը իր գաղափարական հենք է համարում՝ քաղաքական հարթությունում՝ լիբերալիզմը, տնտեսական ոլորտում՝ սոցիալական մոտեցումը, մշակույթի ասպարեզում՝ պահպանողականությունը։ Կուսակցությունը հիմնվել է 2021 թվականին եւ հայտարարում է ուժեղ պետության, անկախ հայրենիքի ու ազատ անհատի մասին։ Նաեւ կարեւորում է ազգային ինքնության պահպանումն ու ազգային պետության կառուցումը։

Կուսակցության նախագահը եւ ընտրական ցուցակի առաջին համարը քաղաքագետ Սուրեն Պետրոսյանն է, որը եղել է «Տավուշը հանուն հայրենիքի» շարժման ակտիվ անդամներից։ Նա հայտարարում է, որ գործող ու նախկին իշխանությունները նույն համակարգն են եւ պետք է դուրս գալ այդ ծուղակից ու երկընտրանքից։

«Դեմոկրատիա, օրենք, կարգապահություն» (ԴՕԿ) կուսակցությունն ստեղծվել է 2024 թվականին։ Կուսակցության ղեկավարը Վարդան Ղուկասյանն է, որն ավելի հայտնի է Դոգ մականանով։ Նա մի քանի տարի հանդես էր գալիս որպես բլոգեր եւ տեսանյութերով անդրադառնում հայաստանյան մի շարք խնդիրների։ Նրա անձն ու տեսանյութերը ոչ միանշանակ վերաբերմունքի էր արժանանում հանրության մեջ՝ ոչ վայելուչ բառապաշարի պատճառով։ Վարդան Ղուկասյանն այժմ հետախուզման մեջ է եւ ԿԸՀ-ն չի գրանցել նրա թեկնածությունը ԱԺ ընտրություններում։ Չնայած սրան, կուսակցությունն հայտարարում է, որ թեեւ Վ․ Ղուկասյանը չկա ցուցակում, սակայն նա մնում է որպես իրենց վարչապետի թեկնածու։

Կուսակցությունը հայտարարում է, որ Հայաստանի ռազմավարական դաշնակիցը պետք է լինի այն պետությունը, որ հարգում է երկրի ինքնիշխանությունը, այլ ոչ թե Հայաստանը դիտում է որպես գաղութ, պրոեկտ ու ազդեցության գոտի։

«Քաղաքացիական պայմանագիր» կուսակցությունը ընտրություններին մասնակցում է «Տեր կանգնիր խաղաղությանը» կարգախոսով՝ նկատի ունենալով Ադրբեջանի հետ նախաստորագրված խաղաղության փաստաթուղթը, ինչպես նաեւ հարաբերությունների բարելավումը Թուրքիայի հետ։ Միաժամանակ կուսակցությունը առաջ է քաշել իրական Հայաստանի գաղափարը՝ նկատի ունենալով այն, որ պետք է պահպանել ու զարգացնել այն Հայաստանը, որն այսօր կա, զերծ մնալով կորսված հայրենիքը վերականգնելու ազգային-ռոմանտիկ գաղափարներից։

Արտաքին քաղաքականության ոլորտում ՔՊ-ն որդեգրել է հավասարակշռված եւ հավասարակշման ռազմավարությունը, որի առանցքային խնդիրը արտաքին հարաբերություններում անհամաչափություններ թույլ չտալն է, իսկ դրանց առկայության դեպքում ունենալ հավասարակշռման գործիքներ։

Հատկանշական է, որ արձանագրելով Եվրամիությանը անդամակցելուն ուղղված ծրագրերի իրականացման անհրաժեշտությունը, «Քաղաքացիական պայմանագիր» կուսակցությունը միաժամանակ հաստատում է, որ հնարավոր չէ անդամակցել եւ Եվրամիությանը, եւ ԵԱՏՄ-ին, ու հայտարարում է, թե պետք է շարունակել Եվրամիության չափանիշներին համապատասխան բարեփոխումներ իրականացումը այնքան ժամանակ, քանի դեռ դրանք չեն խանգարում ԵԱՏՄ անդամ մնալուն։ Իսկ երբ գա ընտրությունը կատարելու պահը, պետք է քաղաքական որոշում  կատարվի։

Կուսակցության նախընտրական ցուցակը գլխավորում են ՔՊ-ի ղեկավար կազմի ու Հայաստանի բարձրաստիճան պաշտոնյաներ՝ Նիկոլ Փաշինյան, Արարատ Միրզոյան, Անահիտ Ավանեսյան։ 

«Հայաստան» դաշինքը ընտրություններին մասնակցում է երկու կուսակցությունների միասնական ճակատով՝ Հայ Յեղափոխական Դաշնակցություն եւ «Առաջ» աջակենտրոն կուսակցություն։ Այս դաշինքը ստեղծվել է 2021 թվականին եւ նույն տարում մասնակցել խորհրդարանական արտահերթ ընտրություններին։ Այդ ժամանակ Ռոբերտ Քոչարյանի գլխավորած դաշինքը իշխող կուսակցության դեմ պայքարող հիմնական ընդդիմադիր ուժն էր։ Ընտրություններում այս ուժը հավաքել էր 21.09 տոկոս ձայն եւ ստացել 29 մանդատ։

Արտաքին քաղաքականության եւ անվտանգության ոլորտներում դաշինքը միտված է դեպի Ռուսաստանն ու վերջինիս կառույցները՝ ԱՊՀ, ԵԱՏՄ, ՀԱՊԿ։ Այս առումով դաշինքի ներկայացուցիչները կոշտ քննադատության են ենթարկում գործող իշխանությանը՝ հայտարարելով, որ վերջինս վատթարացրել է Ռուսասատանի հետ հարաբերությունները եւ անհրաժեշտություն կա ոչ միայն բարելավել այդ հարաբերությունները, այլեւ առավել խորացնել։ Ինչպես նկատելի է, «Հայաստան» դաշինքը ամենաընդգծված ռուսամետ ուժն է։

Այս ընտրություններում եւս դաշինքի նախընտրական ցուցակը գլխավորում է Ռոբերտ Քոչարյանը, երկրորդ համարը դաշնակցական Իշխան Սաղաթելյանն է։  

«Հանուն հանրապետության» կուսակցությունը հիմնադրվել է 2020 թվականին։ Կուսակցության ներկայացուցիչները 2018 թվականի հեղափոխությանը մասնակցած եւ դա ողջունած գործիչներ են։ Կուսակցության գաղափարախոսության հիմքում լիբերալիզմն ու եվրոպականությունն է, հանդես է գալիս կենտրոնամետ դաշտում։

Այս կուսակցությունը դիտարկվում է որպես «Քաղաքացիական պայմանագրին» դաշնակից ուժ, սակայն ի տարբերություն վերջինիս, կոշտ քննադատության է ենթարկում պուտինյան Ռուսաստանի՝ Հայաստանի նկատմամբ վարվող քաղաքականությունը եւ հայտարարում է նրա հետ դաշնակցային պայմանագիրը խզելու, ԵԱՏՄ-ից ու ՀԱՊԿ-ից դուրս գալու մասին։

Բնութագրական է, որ կուսակցության ներկայացուցիչներն հայտարարում են, թե իրենք այս ընտրություններում իշխանության գալու նպատակ չունեն, նաեւ չունեն վարչապետի թեկնածու, իսկ հիմնական նպատակը ընդդիմափոխությունն է։

«Հանուն հանրապետության» նախընտրական ցուցակը գլխավորում է կուսակցության նախագահ Արման Բաբաջանյանը, երկրորդ ու երրորդ տեղերում Ռուբեն Մեհրաբյանը եւ Լուսինե Զեյնալյանն են։

«Լուսավոր Հայաստան» կուսակցությունը հիմնվել է 2015 թվականին, մասնակցել է համապետական ու տեղական կառավարման մի քանի ընտրությունների։ 2017 թվականի խորհրդարանական ընտրություններին մասնակցել է «Ելք» դաշինքով՝ «Քաղաքացիական պայմանագիր» ու «Հանրապետություն» կուսակցությունների հետ եւ մուտք գործել խորհրդարան։ Կուսակցության նախագահ Էդմոն Մարուքյանը չմիացավ 2018 թվականի հեղափոխությանը՝ առաջարկելով երրորդ ճանապարհի գաղափարը։

• ի արտահերթ ընտրություններին «Լուսավոր Հայաստանը» մասնակցեց առանձին, հավաքեց ձայների 6․37 տոկոսը եւ 18 պատգամավորով մուտք գործեց խորհրդարան՝ իրեն հռչակելով ընդդիմադիր ուժ։ Իսկ ահա 2021 թվականի ընտրություններին չհաջողվեց հաղթահարել անցողիկ շեմը։

Այսօր Էդմոն Մարուքյանն ու կուսակցության մյուս ներկայացուցիչները խստորեն քննադատում են իշխանության վարած արտաքին ու ներքին քաղաքականությունը։ Լինելով, ընդհանուր առմամբ, արեւմտամետ գաղափարներով ուժ՝ այժմ ԼՀԿ-ն հանդես է գալիս ռուսամետ դիրքերից եւ անգամ պատրաստ է դաշինքի գնալ ռուսամետ կուսակցությունների հետ։

Համլետ Կիրակոսյան

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Շիրակի քրեական ոստիկանները թմրամիջոցի իրացման դեպք են բացահայտել

Իրացնելով օպերատիվ տեղեկությունը՝ քրեական ոստիկանները 28-ամյա երիտասարդին հայտնաբերել, թմրամիջոց ձեռք բերելու և օգտագործելու հիմնավոր կասկածանքով ձերբակալել և տեղափոխել են մարզային վարչություն։ Նրա անձնական խուզարկությամբ հայտնաբերվել է մարիխուանա տեսակի թմրամիջոցի նմանվող զանգվածով փաթեթ։ Բացատրական աշխատանքի արդյունքում երիտասարդը հայտնել է, որ թմրամիջոցը նույն օրն իրեն է իրացրել գյումրեցի 55-ամյա տղամարդը։

Նախաձեռնվել է քրեական վարույթ, որի շրջանակում կատարված խուզարկությամբ 55-ամյա տղամարդու բնակության հասցեում հայտնաբերվել է մարիխուանա թմրամիջոցի զանգվածով 8 փաթեթ՝ ընդհանուր 13,97 գրամ քաշով։

Ֆեյսբուքում խուլիգանություն կատարած անձի նկատմամբ հարուցվել է հանրային քրեական հետապնդում

ՀՀ քննչական կոմիտեի Լոռու մարզային քննչական վարչությունում նախաձեռնված քրեական վարույթի նախաքննության ընթացքում պարզվել է, որ 2026 թվականի մայիսի 9-ին Ա.Օ.-ն ֆեյսբուքյան իր էջում խուլիգանություն կատարելու ուղղակի դիտավորությամբ, տեղեկատվական տեխնոլոգիաներն օգտագործելով՝ 61-ամյա Հ.Մ.-ի քաղաքական հայացքներով պայմանավորված՝ «Քաղաքացիական պայմանագիր» կուսակցությանը սատարելու դրդապատճառով, վերջինիս լուսանկարը տեղադրելով, անպարկեշտ արտահայտություններ պարունակող տեսանյութ է հրապարակել՝ այդ կերպ բարոյական նորմերի նկատմամբ բացահայտ արհամարհական վերաբերմունք ցուցաբերելով:

Ա.Օ.-ի նկատմամբ հարուցվել է հանրային քրեական հետապնդում՝ Քրեական օրենսգրքի 297-րդ հոդվածի 2-րդ մասի 3-րդ կետով (խուլիգանությունը, որը կատարվել է տեղեկատվական կամ հաղորդակցական տեխնոլոգիաներն օգտագործելով):

Վերջինիս նկատմամբ որպես խափանման միջոց կիրառվել է տնային կալանքը:

Քրեական վարույթի նախաքննությունը շարունակվում է:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Նախընտրական Հայաստան. քաղաքական ուժեր ու դեմքեր-2

«Բարգավաճ Հայաստան» կուսակցությունը ընտրություններին մասնակցում է երկու այլ քաղաքական ուժերի հետ համատեղ («Մայր Հայաստան» եւ «Դեմոկրատական այլընտրանք»), սակայն ոչ դաշինքով, այլ ԲՀԿ-ի անվան տակ։ Սա հասկանալի է խորհրդարան մուտք գործելու անցողիկության շեմի համապատկերում․ կուսակցությունների համար այդ շեմը 4 տոկոսն է, դաշինքների համար՝ 8 տոկոսը։ Հիշենք, որ նախորդ ընտրություններում ԲՀԿ-ն չհաղթահարեց անցողիկ շեմը եւ իր հիմնադրման ու 2007 թվականին ընտրություններին հաջողությամբ մասնակցելուց ի վեր առաջին անգամ մուտք չգործեց խորհրդարան։

ԲՀԿ-ի ցուցակը գլխավորում է կուսակցության առաջնորդ Գագիկ Ծառուկյանը, երկրորդ համարը «Մայր Հայաստանի» ղեկավար Անդրանիկ Թեւանյանն է, որը եղել է Ռոբերտ Քոչարյանի վերջին տարիների քաղաքական թիմի հանգուցային գործիչներից մեկը։ «Դեմոկրատական այլընտրանք» կուսակցության ներկայացուցիչ Սուրեն Սուրենյանցը ցուցակի 8-րդ հորիզոնականում է։ Վերջինս իր քաղաքական գործունեության տարբեր փուլերում հանդես է եկել քաղաքական տարբեր նախաձեռնություններում եւ գաղափարական առումով քիչ աղերսներ ունի ԲՀԿ-ի հետ։

ԲՀԿ-ն ընտրություններին մասնակցում է 10 առաջարկ Հայաստանին ծրագրով, որտեղ անդրադարձ կա արտաքին քաղաքականությանն ու անվտանգությանը, տնտեսական, սոցիալական, կրթական ոլորտներին։ Անվտանգության առումով այս քաղաքական ուժը որպես հիմնական դաշնակիցներ դիտարկում է Ռուսաստանին ու Իրանին, իսկ Ադրբեջանի հետ խաղաղության հարցում առաջ քաշում երաշխավորների հարցը, դրանցում անպայման դիտարկելով Ռուսաստանին։ Պատահական չէ, որ ԲՀԿ-ն դիտարկվում է որպես ռուսամետ դաշտի քաղաքական միավոր։

«Ազգային-ժողովրդավարական բեւեռ» համահայկական կուսակցությունը հայաստանյան քաղաքական դաշտի այն ուժերից է, որին կարելի է դասել ոչ հին, ոչ էլ նոր քաղաքական կազմակերպությունների, այլ, այսպես ասած, միջին տարիքի կուսակցությունների շարքին։ Դա այդպես է, եթե հաշվի առնենք, որ այն քաղաքական դաշտում հանդես է եկել տարբեր ձեւաչափերով ու անվանումներով՝ «Սարդարապետ» ու «Համահայկական խորհրդարան» շարժումներ, «Սասնա Ծռեր» խմբավորում ու համանուն կուսակցություն։ Այս քաղաքական ուժը մասնակցել է վերջին երկու խորհրդարանական ընտրություններին (2018-ին՝ «Սասնա Ծռեր» անվանումով), սակայն երկու դեպքում էլ չի հաղթահարել անցողիկ շեմը։

ԱԺԲ-ն արտաքին քաղաքականության ոլորտում հանդես է գալիս որպես արեւմտամետ, մասնավորապես ամերիկամետ ուժ՝ առաջ քաշելով ԱՄՆ-ի հետ ռազմավարական համագործակցության գաղափարը։ Կուսակցության գաղափարախոսության մեջ նկատելի են ազգայնականության նշաններ, պատահական չէ, որ այն Հայաստանը դիտարկում է ոչ թե որպես Խորհրդային Հայաստանի, այլ 1918-1920 թթ․ առաջին հանրապետության իրավահաջորդ՝ համապատասխան սահմաններով։ Ցուցակի առաջին համարը Գեւորգ Կարապետյանն է, սակայն ԱԺԲ-ն որպես վարչապետի թեկնածու դիտարկում է Վարուժան Ավետիսյանին, որը բանտարկված է։  

«Քոչարի ազգային վերածննունդ եւ ազգի զարթոնք» (Քավազ) կուսակցությունը նորաստեղծ է եւ հանդես է գալիս մի ֆանտաստաիկ գաղափարով․ տարբեր երկրներից (հիմնականում Աֆրիկայից, Ֆիլիպիններից եւ այլն) հրավիրել մասնավոր բանակ (50000-80000 թվաքանակով) եւ ազատագրել Արցախն ու Նախիջեւանը։ Քաղաքական ուժը ընտրություններին մասնակցում է ազգային վերածննդի գաղափարներով՝ ազգային արժեքների պաշտպանություն, ազգային բանակի ու անվտանգության համակարգի ձեւավորում, ինքնիշխան պետության ամրապնդում։

Կուսակցության ցուցակի առաջին համարը Արտակ Սարգսյանն է, որը նախկինում գործունեություն է ծավալել Աֆրիկայի երկրներում։ Երկրորդ հորիզոնականում Հայաստանի Քաղաքագետների միության նախագահ Հմայակ Հովհաննիսյանն է, որը զգալի քաղաքական փորձառություն ունի, մի քանի անգամ եղել է պատգամավոր։  

«Հայ ազգային կոնգրեսը» եղել է հայաստանյան քաղաքական դաշտի գլխավոր դերակատարներից, որպես կուսակցություն հիմնադրվել է 2008 թվականի նախագահական ընտրություններից հետո, ՀՀՇ-ի՝ Հայաստանի առաջին իշխող կուսակցության հենքի վրա, առաջին նախագահ Լեւոն Տեր-Պետրոսյանի առաջնորդությամբ։ Հիմնադրումից հետո, մինչեւ 2017 թվականը, քաղաքական գործընթացների հիմնական մասնակիցներից էր, 2012 թվականի խորհրդարանական ընտրությունների արդյունքում անցել է Ազգային ժողով (ի դեպ, Նիկոլ Փաշինյանն առաջին անգամ պատգամավոր է դարձել հենց ՀԱԿ-ի կազմում)։ Հաջորդող խորհրդարանական ընտրություններին կուսակցությունը չի հաղթահարել անցողիկ շեմը։

Հայ ազգային կոնգրեսը թեեւ, այսպես ասած, զտարյուն ռուսամետ կուսակցություն չէ, բայց հանդես է գալիս Ռուսաստանի հետ ռազմավարական դաշնակցության օգտին, ոչ իրատեսական համարելով արեւմտյան-եվրոպական կողմնորոշումը։ ՀԱԿ առաջնորդ Լեւոն Տեր-Պետրոսյանը զգուշացնում է հետընտրական հնարավոր անցանկալի զարգացումներից։ Կուսակցության ցուցակը գլխավորում է ՀԱԿ փոխնախագահ Լեւոն Զուրաբյանը՝ քաղաքական դաշտի հնաբնակներից մեկը։

«Հանրապետություն» կուսակցությունը ընդգծված արեւմտամետ ուժ է։ Կուսակցության նախագահ Արամ Սարգսյանին համարում են Նիկոլ Փաշինյանին համախոհ գործիչ։ Արամ Սարրգսյանը 1999 թվականի հոկտեմբերի 27-ից հետո եղել է վարչապետ, սակայն այդ ժամանակի նախագահ Ռոբերտ Քոչարյանի հետ տարաձայնությունների հետեւանքով պաշտոնանկ է արվել եւ տարիներ շարունակ ընդդիմադիր տարբեր շարժումների կազմում պայքարել Ռոբերտ Քոչարյանի ու Սերժ Սարգսյանի իշխանության դեմ։

2018 թվականին Արամ Սարգսյանն ու իր գլխավորած կուսակցությունը մասնակցել են հեղափոխությանը, նախորդ խորհրդարանական ընտրություններում «Հանրապետությանը» շատ քիչ քվեներ են պակասել Ազգային ժողով մուտք գործելու համար։ Արամ Սարգսյանն հայտարարում է, որ շատ սեղմ ժամկետներում Հայաստանը պետք է դուրս գա Ռուսաստանի գլխավորությամբ ստեղծված կառույցներից եւ աշխատանքներ տանի Ֆրանսիայի ու ԱՄՆ-ի հետ դաշնակցային հարաբերություններ հաստատելու ուղղությամբ։

Քրիստոնեա-ժողովրդավարական կուսակցությունը իր հիմնական մոտեցումներով մոտ է «Հանրապետությանը»։ Կուսակցության նախագահ Լեւոն Շիրինյանը Ռուսաստանի թունդ քննադատներից է եւ, բնականաբար, հանդես է գալիս Արեւմուտքի հետ խորացված հարաբերություններ հաստատելու օգտին։ Նա նաեւ սուր քննադատության է ենթարկում Հայաստանում գործող եւ խորհրդարանական ընտրություններին մասնակցող  երեք ռուսամետ կուսակցություններին՝ հայտարարելով, որ դրանք ՌԴ նախագահ Վ․Պուտինի գործիքներն են Հայաստանում եւ տեղ չպետք է ունենան խորհրդարանում։ 

Համլետ Կիրակոսյան

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

🇦🇲🇺🇸 (NED) Ազգային ժողովրդավարության հիմնադրամի ներկայացուցիչ Բենջամին Շեֆներն այցելել է «Երկխոսություն» մեդիա կենտրոն

 «Գյումրու առաջընթաց» ՔՀԶԿ ՀԿ և «Երկխոսություն» մեդիա կենտրոն էր այցելել Ազգային ժողովրդավարության հիմնադրամի (NED) ներկայացուցիչ Բենջամին Շեֆները։

 Հանդիպման ընթացքում քննարկվել են մարզային անկախ մեդիայի և հանրային երկխոսության ոլորտում առկա հիմնական մարտահրավերները, ինչպես նաև մարզերում անկախ մեդիա հարթակների պահպանման, հանրային մասնակցության և մեդիա զարգացման կարևորությունը։

 Այցի շրջանակում Բենջամին Շեֆները ծանոթացել է «Գյումրու առաջընթաց» ՔՀԶԿ ՀԿ-ի գործունեությանը, «Երկխոսություն» մեդիա կենտրոնի տեխնիկական հնարավորություններին և իրականացվող մեդիա ձևաչափերին։

 Կազմակերպության ներկայացուցիչները ներկայացրել են նաև ընթացիկ ծրագրերն ու առաջիկա նախաձեռնությունները։

—

 NED representative Benjamin Schaefer visited the Dialogue Media Center

 Benjamin Schaefer, representative of the National Endowment for Democracy (NED), visited the “Progress of Gyumri” NGO and the Dialogue Media Center.

 During the meeting, the parties discussed the main challenges facing regional independent media and public dialogue, as well as the importance of preserving independent media platforms, strengthening public participation, and supporting media development in the regions.

 As part of the visit, Benjamin Schaefer got acquainted with the activities of the “Progress of Gyumri” NGO, the technical capabilities of the Dialogue Media Center, and its media production formats.

 The organization’s representatives also presented ongoing programs and upcoming initiatives.

Նախընտրական Հայաստան. քաղաքական ուժեր ու դեմքեր-1

Ազգային Ժողովի ընտրությունների նախընտրական քարոզարշավը բուռն ընթացքի մեջ է։

Ընտրություններին մասնակից քաղաքական ուժերը, իրենց հնարավորությունների սահմաններում, հանդիպում են ընտրողներին, ելույթների ու հարցազրույցների միջոցով ներկայացնում իրենց ծրագրերը, փորձում ընտրողներին համոզել իրենց լավագույն լիենելու ու ծրագրի առավելությունների մեջ։

Առաջադրված 19 քաղաքական ուժերը բազմազան են իրենց գաղափարական ուղղվածությամբ, ծրագրերի խայտաբղետությամբ, իրատեսական, ռոմանտիկ, անգամ ֆանտաստիկ դրույթներով ու մոտեցումներով։

Խայտաբղետ են նաեւ կուսակցությունների ու դաշինքների նախընտրական ցուցակները, դրանցում ընդգրկված անձինք։ Այդ ցուցակներում կան ինչպես քաղաքական գործունեության փորձ ունեցող գործիչներ, տարբեր ժամանակներում իշխանության մեջ եղած ու բարձր պաշտոններ ունեցած մարդիկ, այնպես էլ նոր-նոր քաղաքական գործունեության հայտ ներկայացրած մարդիկ։

Ռեֆորմիստների կուսակցության նախընտրական ցուցակը գլխավորում է Վաղարշակ Հարությունյանը։ Նա եղել է Վազգեն Սարգսյանի զինակիցը, զբաղեցրել պաշտպանության նախարարի պաշտոն, Նիկոլ Փաշինյանի վարչապետության սկզբում եղել վարչապետի խորհրդական՝ պաշտպանության գծով։ Ցուցակի երկրորդ հորիզոնականում Վահան Բաբայանն է, որը կուսակցության հիմնադիրն ու նախագահն է։ Նա ժամանակին «Բարգավաճ Հայաստան» կուսակցության կազմում եղել է Ազգային Ժողովի պատգամավոր։

Ռեֆորմիստները ներկայացրել են շատ կարճ ու ամփոփ ծրագիր՝ 7 նախընտրական դրույթներով։ Ծրագրի ուշագրավ կետերից են սահմանադրական փոփոխություններով երկրի ղեկավարի կառավարման ժամկետի սահմանափակումը մեկ ժամկետով եւ առողջապահությունն ու բարձրագույն կրթությունը անվճար դարձնելը։ 

«Բոլորին դեմ եմ» ժողովրդավարական կուսակցությունն այս ընտրությունների քաղաքական գունապնակի յուրահատուկ գույնն է՝ թե իր մասնակիցներով, թե ներկայացրած ծրագրով։ Ցուցակը գլխավորում է Սպարտակ Կյուրեղյանը, առաջին եռյակում է Նինա Կարապետյանցը, որը հայտնի հասարակական գործիչ է, իրավապաշտպան։ Ցուցակում ընդգրկված են հիմնականում երիտասարդ մարդիկ, որոնց մեծ մասը ակտիվորեն մասնակցել է 2018 թվականի ընտրություններին, ընդունել հեղափոխության գաղափարները, սակայն հիասթափվել դրանց իրականություն չդառնալուց։ Ըստ կուսակցության առաջնորդների, իրենց գաղափարախոսությունը ծնվել է առկա քաղաքական իրավիճակից, որտեղ քաղաքացիներին մշտապես պարտադրվում է երկընտրանք։ «Բոլորին դեմ եմ» կուսակցությունը ընտրություններին մասնակցում է մեկ նպատակով․ հաջող արդյունքի դեպքում իրականացնել սահմանադրական ու քաղաքական փոփոխություններ, 100 օր հետո հրաժարական տալ, կազմակերպել նոր ընտրություններ, որին իրենց վարչապետի թեկնածուն չի մասնակցելու, իսկ կուսակցությունը գնում է լուծարման։ 

«Ուժեղ Հայաստան» դաշինքը միավորել է երեք կուսակցություններ՝ ռուսաստանցի գործարար Սամվել Կարապետյանի՝ վերջերս հիմնադրած «Ուժեղ Հայաստան» քաղաքական ուժը, «Նոր դարաշրջան», «Միավորված հայեր»կուսակցությունները։ Ըստ էության, դաշինքի առաջնորդը Սամվել Կարապետյանն է, թեեւ նա չկա ցուցակում, քանի որ Սահմանադրությունն ու Ընտրական օրենսգիրքը թույլ չեն տալիս։ Չնայած սրան, դաշինքի ներկայացուցիչներն հայտարարում են, որ իրենց վարչապետի թեկնածուն հենց Սամվել Կարապետյանն է։ Ավելին, Սամվել Կարապետյանն էլ է հայտարարում, որ Հայաստանի հաջորդ վարչապետը ինքն է լինելու։

«Ուժեղ Հայաստանի» ցուցակի առաջին համարում Նարեկ Կարապետյանն է՝ Սամվել Կարապետյանի եղբոր որդին։ Նրա հայրը Կարեն Կարապետյանն ՝ ՀՀԿ երեւելի գործիչներից, որը Ռոբերտ Քոչարյանի ու Սերժ Սարգսյանի իշխանության շրջանում զբաղեցրել է բարձր ու հանգուցային պաշտոններ։ Ցուցակի երկրորդ համարը Արամ Վարդեւանյանն է, որը մարտի 1-ի գործով Ռոբերտ Քոչարյանի փաստաբանն է, 2021 թվականի խորհրդարանական ընտրություններին Քոչարյանի գլխավորած «Հայաստան» դաշինքի կազմում ընտրվել է ԱԺ պատգամավոր, սակայն մեկ տարի անց վայր է դրել մանդատը։ Դաշինքի կազմում կան մի շարք գործիչներ, որոնք այս կամ այն կերպ առանչություն են ունեցել Ռոբերտ Քոչարյանի ու Սերժ Սարգսյանի հետ։ 

«Ուժեղ Հայաստան»-ը իրեն ազդարարել է որպես աջ-կենտրոնամետ աշխարհայացք ունեցող ուժ, որի նպատակն է կառուցել ազգային-քրիստոնեական արժեքներով, ազատ, ուժեղ, արտահանող եւ տնտեսական հաշվարկվող առաջնորդվող Հայաստան։ Այն դիտարկվում է որպես ընդգծված ռուսամետ ուժ։

«Շնորհապետական» կուսակցությունը նոր քաղաքական ուժ է։ Կուսակցության առաջնորդն ու ցուցակի առաջին համարը Գուրգեն Սիմոնյանն է, որը մինչ այս քաղաքական գործընթացներում չի եղել, չի մասնակցել որեւէ ընտրության։ Ցուցակի երկրորդ հորիզոնականում քաղաքական փորձառություն ունեցող գործիչ է՝ Էդվարդ Անտինյանը, որը տարբեր ժամանակներում անդամակցել է տարբեր կուսակցությունների, մասնակցել ընտրությունների։ 

«Շնորհապետական» կուսակցությունը դեմ է նախկին եւ ներկա իշխանություններին ու նպատակ ունի ստեղծել այնպիսի կառավարություն, որի կազմում չեն լինի նախկին կառավարությունների անդամներ։ Ինչպես հայտարարում է կուսակցության ղեկավարը, իրենք ձեւավորելու են արժանիների կառավարություն։ «Շնորհապետականը» արեւմտամետ ուժ է՝ ժողովդավարության ու մարդու իրավունքների պաշտպանության գաղափարներով, կողմ է Հայաստանի անդամակցությանը Եվրամիությանը, սերտ հարաբերությունների հաստատմանը ԱՄՆ-ի հետ։ Բնականաբար, նաեւ հայտարարում է, որ եթե իրենք հաղթեն ընտրություններում, ապա Հայաստանը դուրս կբերեն Ռուսաստանի կողմից ստեղծված միջպետական բոլոր կառույցներից։

«Նոր ուժ» ռեֆորմիստական կուսակցությունը, ինչպես երեւում է անվանումից, քաղաքական նոր ուժ է, որը հիմնադրվել է 2024 թվականին՝ նպատակ ունենալով մասնակցել խորհրդարանական ընտրություններին։ Կուսակցության առաջնորդը Նիկոլ Փաշինյանի նախկին զինակից, ՔՊ անդամ, Երեւանի նախկին քաղաքապետ Հայկ Մարությանն է։ Ժամանակին նա տարաձայնություններ ունեցավ Փաշինյանի հետ, հրաժարական տվեց պաշտոնից եւ դուրս եկավ ՔՊ-ից։ Կուսակցության ցուցակում հիմնականում Հայկ Մարությանի համախոհներն են։

«Նոր ուժ»-ը իրեն հայտարարել է սոցիալ-դեմոկրատական ուժ, գաղափարապես մոտ է եվրոպական սոցիալ-դեմոկրատիային եւ պաշտպանում է արեւմտյան արժեքներ, կողմ է Եվրամիության եւ եվրոպական երկրների հետ ինտեգրման ծրագրերի խորացմանը, նաեւ պահպանելով բարեկամական հարաբերությունները Ռուսաստանի հետ։

«Միասնության թեւեր» կուսակցությունը եւս նորաստեղծ ուժ է, որի հիմնադիրն ու նախագահը Արման Թաթոյանն է, որը հանրությանը հայտնի գործիչ է, տարբեր ժամանակներում զբաղեցրել է բարձր պաշտոններ։ Նա առավել հանրային ճանաչում ստացավ Մարդու իրավունքների պաշտպանի պաշտոնում։ Ցուցակի երկրորդ հորիզոնականում Դավիթ Անանյանն է, որը Նիկոլ Փաշինյանի կառավարությունում զբաղեցրել է Պետեկամուտների կոմիտեի նախագահի պաշտոնը։ 

Ինչպես հայտարարում են կուսակցության ներկայացուցիչները, իրենց արժեքներն ու մոտեցումները հստակ են՝ արդարություն, խաղաղություն, իրավունքի գերակայություն, թափանցիկ պետություն եւ խելամիտ որոշումներ՝ պոպուլիզմի փոխարեն։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Գյումրիում հյուրընկալվել են ԵԱՀԿ/ԺՀՄԻԳ դիտորդական առաքելության ղեկավարն ու երկարաժամկետ դիտորդները

Գյումրի են այցելել ԵԱՀԿ/ԺՀՄԻԳ դիտորդական առաքելության ղեկավարն ու առաքելության երկարաժամկետ դիտորդները

«Գյումրու առաջընթաց» ՔՀԶԿ ՀԿ գրասենյակ են այցելել ԵԱՀԿ/ԺՀՄԻԳ դիտորդական առաքելության ղեկավար Յանեժ Լենարչիչը, ինչպես նաև առաքելության երկարաժամկետ դիտորդներ Օյվինդ Սեյմը, Յանա Բուրգերսը, քաղաքական վերլուծաբան Վլադիմիր Միսեևը և երկարաժամկետ դիտորդների թարգմանիչ Լուսինե Ալեքսանդրյանը։

Հանդիպման ընթացքում քննարկվել են Գյումրիում ընթացող նախընտրական գործընթացները, քաղաքական միջավայրի առանձնահատկությունները, հանրային տրամադրությունները, ինչպես նաև ընտրական գործընթացների վերահսկման և մեդիա լուսաբանման հետ կապված հիմնական մարտահրավերները։

«Գյումրու առաջընթաց» ՔՀԶԿ ՀԿ ներկայացուցիչները ներկայացրել են կազմակերպության գործունեությունը, առաջիկա ԱԺ ընտրություններին կարճաժամկետ դիտորդների առաքելության վերապատրաստման աշխատանքները, ինչպես նաև «Dialogue Media Center» մեդիա կենտրոնի դերը՝ որպես անկախ և բաց հանրային երկխոսության հարթակ։

Կողմերը կարևորել են անկախ դիտարկման, ազատ և բազմակարծիք մեդիա միջավայրի նշանակությունը՝ արդար, թափանցիկ և վստահելի ընտրական գործընթացների ապահովման գործում՝ ընդգծելով տեղական և միջազգային դերակատարների համագործակցության կարևորությունը ընտրությունների որակի բարձրացման հարցում։

Նշենք, որ ԵԱՀԿ Ժողովրդավարական հաստատությունների և մարդու իրավունքների գրասենյակը (ԵԱՀԿ/ԺՀՄԻԳ) հունիսի 7-ի խորհրդարանական ընտրությունների դիտարկման նպատակով Հայաստան է գործուղել դիտորդական առաքելություն։

Head of the OSCE/ODIHR Election Observation Mission and long-term observers visited Gyumri

Head of the OSCE/ODIHR Election Observation Mission, Janž Lenarčič, together with long-term observers Øyvind Seim and Jana Burgers, political analyst Vladimir Miseev, and interpreter Lusine Aleksandryan, visited the office of “Progress of Gyumri” CSDC NGO.

During the meeting, the participants discussed the ongoing pre-election developments in Gyumri, the specifics of the political environment, public sentiment, as well as key challenges related to election monitoring and media coverage.

Representatives of “Progress of Gyumri” CSDC NGO presented the organization’s activities, preparations for the training of short-term election observers for the upcoming parliamentary elections, as well as the role of the “Dialogue Media Center” as an independent and open platform for public dialogue.

The participants emphasized the importance of independent observation and a free, pluralistic media environment in ensuring fair, transparent, and credible electoral processes, highlighting the value of cooperation between local and international stakeholders in improving election quality.

It should be noted that the OSCE Office for Democratic Institutions and Human Rights (OSCE/ODIHR) has deployed an election observation mission to Armenia for the June 7 parliamentary elections.

#OSCE #ODIHR #Gyumri #Armenia #Elections2026 #DialogueMediaCenter

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Քրեական վարույթ՝ ԱԺ ընտրությունների ընթացքում ընտրակաշառք տալու կասկածանքով

ՀՀ հակակոռուպցիոն կոմիտեի ծառայողների կողմից իրականացված օպերատիվ հետախուզական միջոցառումների արդյունքում փաստական տվյալներ են ստացվել այն մասին, որ «Մեր ձևով» ազգային արժեքների պահպանության հասարակական կազմակերպության գրասենյակի ղեկավարը Ազգային ժողովի ընտրությունների ընթացքում «Ուժեղ Հայաստան» կուսակցության օգտին քվեարկելու պայմանով ընտրելու իրավունք ունեցող մի շարք քաղաքացիների տվել է ընտրակաշառք։

Բացի այդ, նույն անձը ԱԺ ընտրությունների նշանակման որոշումն ուժի մեջ մտնելու օրվանից մինչև ընտրությունների արդյունքների ամփոփումը, բարեգործության անվան տակ, ընտրող հանդիսացող Երևան քաղաքի բնակչին վիրահատության համար անհատույց տվել է գումար։

Դեպքի առթիվ Հակակոռուպցիոն կոմիտեում նախաձեռնվել է քրեական վարույթ, ձերբակալվել են մի շարք անձինք, կատարվել են խուզարկություններ և վարութային այլ գործողություններ։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com