Քննարկման ամփոփում․ «Ամենակեղտոտ քարոզարշավից» մինչև փաստերի ստուգում
2026 թվականի խորհրդարանական ընտրություններից հետո ապատեղեկատվության տարածումը, դրա ազդեցությունը հանրային ընկալումների վրա և հասարակության տեղեկատվական դիմակայունության բարձրացումը շարունակում են մնալ Հայաստանի հասարակական-քաղաքական օրակարգի կարևորագույն հարցերից։
«Ապատեղեկատվությունից մինչև տեղեկատվական դիմակայունություն․ ի՞նչ դասեր քաղեցինք խորհրդարանական ընտրություններից» թեմայով քննարկում է անցկացվել Գյումրու «Երկխոսություն» մեդիա կենտրոնում։
Քննարկման բանախոսները՝ Խոսքի ազատության պաշտպանության կոմիտեի նախագահ Աշոտ Մելիքյանը, Factor TV-ի գործադիր տնօրեն Արևիկ Սահակյանը և Ժուռնալիստների «Ասպարեզ» ակումբի խորհրդի նախագահ Լևոն Բարսեղյանը, անդրադարձել են ընտրարշավի ընթացքում տեղեկատվական դաշտում արձանագրված միտումներին, ապատեղեկատվական ու մանիպուլյատիվ նարատիվներին, արհեստական բանականության կիրառմամբ պայմանավորված սպառնալիքներին, ինչպես նաև մեդիայի և քաղաքացիական հասարակության պատրաստվածությանը։
2026 թվականի ընտրարշավի առանձնահատկությունները․ «աննախադեպ կեղտոտ» քարոզարշավ և արտաքին տեղեկատվական ազդեցություն
Քննարկման մասնակիցների գնահատմամբ՝ 2026 թվականի Ազգային ժողովի ընտրություններն աչքի են ընկել տեղեկատվական դաշտի ծայրահեղ լարվածությամբ և բևեռացվածությամբ։ Ապատեղեկատվությունն ու մանիպուլյացիան ընտրարշավի ընթացքում գերիշխող դիրք են զբաղեցրել։
Աշոտ Մելիքյանի խոսքով՝ այս ընտրարշավն իր բնույթով առանձնահատուկ էր։
«Այս ԱԺ ընտրություններն իրենց քարոզարշավով առանձնահատուկ էին։ Ես կասեի՝ նորանկախ Հայաստանի պատմության մեջ ամենակեղտոտը։ Կարծես որևէ կարմիր գիծ չկար, բոլորն անցել էին։ Ապատեղեկատվությունը գերիշխող դիրքում էր, և, ցավոք, այն ուղղորդվում էր նաև դրսից՝ հիմնականում Ռուսաստանից։ Դա տեղեկատվական պատերազմ էր՝ հիբրիդային պատերազմի բոլոր բաղադրիչներով՝ տեղեկատվական, տնտեսական, քաղաքական և լոգիստիկ»,– նշել է նա։
Խոսքի ազատության պաշտպանության կոմիտեի եռամսյակային զեկույցի համաձայն՝ տեղական լրատվական դաշտի զգալի հատված, ինչպես նաև առանձին անհատներ ներգրավված են եղել նման տեղեկատվական արշավներում։
Միաժամանակ քննարկման ընթացքում նշվել է, որ ապատեղեկատվության բացասական ազդեցությունը որոշ չափով հնարավոր է եղել մեղմել փաստերի ստուգման հարթակների, որակյալ լրատվամիջոցների և լրագրողական հետաքննությունների ակտիվ աշխատանքի շնորհիվ։
Բանախոսների գնահատմամբ՝ քաղաքական դաշտում առկա սուր բևեռացվածությունը տեղափոխվել է նաև հասարակություն ու լրատվամիջոցներ, իսկ ներքին տեղեկատվական պատերազմի հիմնական տուժողը քաղաքացին է, որը հաճախ հայտնվում է իրարամերժ և մանիպուլյատիվ տեղեկությունների հոսքում։
Արհեստական բանականություն, դիփֆեյքեր և FIMI-ի սպառնալիքը
Քննարկման ընթացքում անդրադարձ է կատարվել նաև տեխնոլոգիական զարգացումներին, որոնք էականորեն փոխել են լրագրության և տեղեկատվական անվտանգության կանոնները։
2026 թվականի ընտրությունների ընթացքում լայնորեն կիրառվել են արհեստական բանականության գործիքներ, դիփֆեյքեր, ինչպես նաև օտարերկրյա տեղեկատվական մանիպուլյացիայի և միջամտության տեխնոլոգիաներ՝ FIMI՝ Foreign Information Manipulation and Interference։
Factor TV-ի գործադիր տնօրեն Արևիկ Սահակյանն ընդգծել է, որ նոր իրողության պայմաններում լրագրողի գլխավոր առավելությունը ոչ թե նյութն առավել արագ հրապարակելն է, այլ տեղեկությունն առավել արագ ստուգելու կարողությունը։
«Այսօր ձևավորվել է նոր իրողություն․ վաղվա առաջատար լրագրողը լինելու է նա, ով ոչ թե ավելի արագ է նյութ գրում, այլ նա, ով ավելի արագ կարող է ստուգել։ Ստուգման կարողությունների զարգացումը մեծագույն մարտահրավեր է, որովհետև ապատեղեկատվություն ստեղծելն անհամեմատ ավելի հեշտ և արագ է, քան այն փաստերով ստուգելն ու հերքելը»,– նշել է նա։
Արևիկ Սահակյանի խոսքով՝ Հայաստանում արձանագրված FIMI-ի ծավալները գերազանցել են նույնիսկ մեկ տարի առաջ Մոլդովայում գրանցված ցուցանիշները։ Արհեստական բանականությամբ ստեղծված բովանդակությունն այնքան որակյալ է եղել, որ որոշ դեպքերում նույնիսկ փորձագետներն ու լրագրողներն են դժվարացել տարբերակել կեղծիքը իրականությունից։
Որպես դրական փորձ նշվել է ընտրությունների ընթացքում մի շարք լրատվամիջոցների և փաստերի ստուգմամբ զբաղվող թիմերի համագործակցությունը։ Համատեղ աշխատանքի շնորհիվ նրանք կարողացել են առավել արագ արձագանքել ապատեղեկատվական ալիքներին և հանրությանը տրամադրել ստուգված տեղեկություն։
Ապատեղեկատվական նարատիվներ, մանիպուլյացիայի մեխանիզմներ և հանրային ընկալումներ
Քննարկման ընթացքում փորձագետները տարանջատել են բացահայտ սուտը և առավել նուրբ մանիպուլյացիան։
Որպես բացահայտ կամ «չոր» ստի օրինակներ նշվել են «այսինչ գյուղը տարհանում են» կամ «Էրդողանը համաձայնել է Հայաստանում 11 մզկիթ կառուցել» ձևակերպումները։ Նման կեղծ լուրերը սովորաբար երկար կյանք չեն ունենում և բաց աղբյուրների միջոցով հնարավոր է արագ հերքել դրանք՝ միաժամանակ հեղինակազրկելով տարածողներին։
Բանախոսների գնահատմամբ՝ առավել վտանգավոր է մանիպուլյացիան կամ տեղեկատվական ձեռնածությունը, երբ մեծ քանակությամբ ճշմարիտ տեղեկության մեջ ներարկվում են մի քանի կեղծ թեզեր։ Այդպիսի նյութերն ավելի արժանահավատ են թվում և կարող են երկարաժամկետ ազդեցություն ունենալ հանրային ընկալումների վրա։
Լևոն Բարսեղյանն ընդգծել է, որ փաստերի ստուգման հրապարակումները հաճախ անհամեմատ ավելի փոքր լսարան են հասնում, քան բուն կեղծ տեղեկությունը։
«Վիճակագրությունը ցույց է տալիս, որ կեղծ լուրը կարող է դիտել մեկ միլիոն մարդ, իսկ դրա ստուգումը՝ լավագույն դեպքում 100-150 հազարը։ Սա լուրջ մարտահրավեր է»,– նշել է նա։
Բարսեղյանն անդրադարձել է նաև քաղաքական պոպուլիզմի և ակնհայտ անիրատեսական խոստումների վտանգին։ Նրա խոսքով՝ քաղաքական գործիչները կարող են խոստանալ Գյումրիում կառուցել մեկ միլիարդ դոլարանոց «Դիսնեյլենդ», այն դեպքում, երբ քաղաքի բյուջեն մոտ 15 միլիոն դոլար է, խոսել Շուշին և Հադրութը վերադարձնելու մասին կամ «պողպատե մուրճով» սպառնալ հակառակորդներին։
Նման հայտարարությունները, անկախ դրանց իրատեսական կամ անիրատեսական լինելուց, դառնում են մեդիա արտադրանք և կարող են մոլորեցնել հանրությանը։
Լրագրողական էթիկա, ապագային վերաբերող պնդումներ և մեդիա դիլեմաներ
Քննարկման ընթացքում անդրադարձ է կատարվել նաև ապագային վերաբերող չստուգված պնդումների տարածմանը։ Որպես օրինակ քննարկվել է «300 հազար ադրբեջանցիներ բնակեցվելու են Հայաստանում» թեզը։
Աշոտ Մելիքյանի խոսքով՝ պաշտոնական հերքումից հետո նման վերնագրերով նյութերի շարունակական տարածումը կարող է խախտել լրագրողական էթիկայի սկզբունքները և նպաստել ատելության ու անհիմն վախերի տարածմանը։
Նա նշել է, որ լսարանի նկատմամբ չի կարելի անհարգալից վերաբերմունք ցուցաբերել կամ անհիմն վախեր գեներացնել՝ առանց բավարար փաստական հիմքի։
Արևիկ Սահակյանն իր հերթին ընդգծել է, որ նման դեպքերում լրատվամիջոցները բախվում են մասնագիտական բարդ դիլեմայի, քանի որ խոսքը վերաբերում է ապագային, իսկ հասարակությունն ունի նաև պաշտոնական մոլորեցնող տեղեկատվության ցավալի փորձ, այդ թվում՝ 44-օրյա պատերազմի ժամանակաշրջանից։
Factor TV-ն ընտրել է բաց հարցադրումների ձևաչափը՝ քարոզարշավի ընթացքում երկրի ղեկավարներից՝ Նիկոլ Փաշինյանից և Արարատ Միրզոյանից, ուղիղ եթերում պաշտոնական երաշխիքներ ստանալու նպատակով։
Սակայն, ըստ Սահակյանի, պաշտոնական պարզաբանումներից և երաշխիքներից հետո նույն թեզը որպես հաստատված փաստ շարունակաբար ներկայացնելն արդեն հստակ մանիպուլյացիա է։
Ի՞նչն աշխատեց, ի՞նչը պետք է փոխվի, և ի՞նչ քայլեր են անհրաժեշտ առաջիկա ՏԻՄ ընտրություններից առաջ
Քննարկման ընթացքում ներկայացվել են ապատեղեկատվության տարածումը կանխարգելելու, մեդիայի դիմակայունությունը բարձրացնելու և առաջիկա տեղական ինքնակառավարման մարմինների ընտրություններին նախապատրաստվելու հիմնական ուղղությունները։
Օրենսդրական կարգավորումներ
Քննարկման մասնակիցներն անդրադարձել են «Տեսալսողական մեդիայի մասին» օրենքում կատարված փոփոխություններին, որոնցով սահմանափակվել է ռուսական հեռուստաալիքներ տարածող որոշ դիստրիբյուտորների գործունեությունը։
Միաժամանակ նշվել է, որ մեդիա կազմակերպությունները պետք է հետևեն, որպեսզի նման կարգավորումները չօգտագործվեն տեղական ազատ լրատվամիջոցների գործունեությունը սահմանափակելու նպատակով։
Արտաքին ապատեղեկատվության չեզոքացում
Բանախոսների գնահատմամբ՝ Կրեմլի քաղաքականության հետևանքով նույնիսկ նախկինում ռուսամետ դիրքորոշում ունեցող հասարակական խմբերը սկսել են ավելի վերապահումով մոտենալ արտաքին աղբյուրներից ստացվող տեղեկություններին։
Քննարկման ընթացքում նշվել է, որ արտաքին ապատեղեկատվության դեմ պայքարը որոշ դեպքերում ավելի հեշտ է, քանի որ դրա աղբյուրը տեսանելի է։ Առավել բարդ է ներքին պառակտիչ բովանդակության դեմ պայքարը, որը տարածվում է տեղական դերակատարների միջոցով և կարող է ավելի վստահելի թվալ լսարանին։
Բաց տեղեկատվական համակարգի առավելությունը
Հայաստանի բաց տեղեկատվական դաշտը, ի տարբերություն փակ և խիստ վերահսկվող համակարգերի, հնարավորություն է տալիս մասնագիտացված փաստերի ստուգման հարթակներին բացահայտել կեղծիքները և հրապարակել ստուգված տեղեկություններ։
Քննարկման ընթացքում նշվել է, որ Հայաստանում գործող մի շարք մասնագիտացված փաստերի ստուգման թիմեր կարևոր դեր են խաղում ապատեղեկատվության բացահայտման և հանրային իրազեկման գործում։
Անհատական մեդիագրագիտության զարգացում
Աշոտ Մելիքյանը քաղաքացիներին հորդորել է վերապահումով մոտենալ «սենսացիոն» և «ցնցող» վերնագրերով հրապարակումներին, փնտրել տեղեկատվության սկզբնաղբյուրը և նույն տեղեկությունը ճշտել այլընտրանքային, վստահելի լրատվամիջոցների միջոցով։
Քննարկման մասնակիցների համոզմամբ՝ մեդիագրագիտությունը պետք է դառնա ոչ միայն կրթական ծրագրերի, այլև յուրաքանչյուր քաղաքացու առօրյա տեղեկատվական վարքագծի մաս։
Նախապատրաստում ՏԻՄ ընտրություններին
Առաջիկա ՏԻՄ ընտրություններից առաջ անհրաժեշտ է զարգացնել տեղական լրատվամիջոցների փաստերի ստուգման կարողությունները, խորացնել լրատվամիջոցների և քաղաքացիական հասարակության համագործակցությունը, ինչպես նաև բարձրացնել հանրության մեդիագրագիտության մակարդակը։
Հատկապես կարևոր է համայնքներում աշխատող լրագրողների դերը, քանի որ նրանք հաճախ առաջինն են արձագանքում տեղական նշանակության լուրերին, ճանաչում են համայնքի հիմնական դերակատարներին և կարող են արագ ստուգել տարածվող պնդումների իսկությունը։
Քննարկման մասնակիցների համոզմամբ՝ ապատեղեկատվության դեմ պայքարը չի կարող սահմանափակվել միայն կեղծ տեղեկությունների հերքմամբ։ Անհրաժեշտ է ձևավորել կանխարգելման, արագ արձագանքման և հանրային կրթության ամբողջական համակարգ, որպեսզի ապատեղեկատվությունը չձևավորի հանրային օրակարգը և չազդի քաղաքացիների տեղեկացված ընտրության վրա։
© dialoguemc.am Freedom of speech & Pluralism
Հեռ. ՝ +37498 691-690; Էլ. Փոստ ՝ dialoguemediacenter@gmail.com
📢 «Ապատեղեկատվությունը ծաղկում է այնտեղ, որտեղ անորոշությունները շատ են»․ Արթուր Պապյան
«Ապատեղեկատվությունը ծաղկում է այնտեղ, որտեղ անորոշությունները շատ են»․ Արթուր Պապյան
Ի՞նչ մանիպուլյատիվ նարատիվներ են տարածվել ընտրությունների ընթացքում։
Ինչպե՞ս են դրանք ազդել ընտրողների վարքագծի վրա։
Ի՞նչ սպասել առաջիկա ՏԻՄ ընտրություններին։
Ինչպե՞ս կարող են համայնքային լրագրողները կանխարգելել ապատեղեկատվությունը։
YouTube 🔴
ENG
📢 “Disinformation flourishes where uncertainty is high,” says Artur Papyan.
🗳️ What manipulative narratives circulated during the elections?
📲 How did they influence voter behavior?
🏘️ What narratives may emerge during the upcoming local elections?
🎙️ How can local journalists help prevent disinformation?
▶️ Watch YouTube 🔴 https://youtu.be/EvdKpq9pLiY.
#DialoguePodcast #DialogueMediaCenter #Disinformation #MediaLiteracy
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
ՄԻՊ-ն աշխատանքային այցով Շիրակի մարզում էր
Շիրակի մարզպետ Դավիթ Առուշանյանը մարզպետի տեղակալ Ալբերտ Այվազյանի հետ ընդունել է աշխատանքային այցով Շիրակի մարզում գտնվող Մարդու իրավունքների պաշտպան Անահիտ Մանասյանին։
Այցն իրականացվել է Մարդու իրավունքների պաշտպանի նախաձեռնած «Օրն իրավունքների պաշտպանության առաջնագծում» նախագծի շրջանակում։
Հանդիպմանը մասնակցել է նաև նախագծում ընդգրկված Շիրակի մարզի Առափի բնակավայրի բնակիչ Սուսաննա Փանոսյանը, որն այս տարի ավարտել է դպրոցը և նախատեսում է ուսումը շարունակել բարձրագույն ուսումնական հաստատությունում։ Աշխատանքային այցի ընթացքում նա ուղեկցել է Մարդու իրավունքների պաշտպանին և ծանոթացել մարդու իրավունքների պաշտպանության ոլորտում իրականացվող աշխատանքներին։
Հանդիպման ընթացքում քննարկվել են Շիրակի մարզում մարդու իրավունքների պաշտպանությանն առնչվող մի շարք հարցեր։
Շիրակի մարզպետ Դավիթ Առուշանյանը կարևորել է Մարդու իրավունքների պաշտպանի գրասենյակի հետ համագործակցությունը՝ նշելով, որ նման հանդիպումները հնարավորություն են տալիս տեղում քննարկել բնակիչներին հուզող խնդիրները և գտնել դրանց լուծման ուղիները։
Սուսաննա Փանոսյանը մարզպետին հարցեր է ուղղել Առափի բնակավայրի ներհամայնքային ճանապարհի անբարեկարգ վիճակի վերաբերյալ՝ ընդգծելով, որ այն հատկապես դժվարացնում է հաշմանդամություն ունեցող անձանց տեղաշարժը։
Նա հետաքրքրվել է նաև գյուղական բնակավայրերում երիտասարդների զբաղվածության հնարավորություններով և հարցրել, թե մարզպետի պաշտոնավարման ընթացքում որն է եղել ամենադժվար հաղթահարելի խնդիրը։
Դավիթ Առուշանյանի խոսքով՝ առավել բարդ են այն իրավիճակները, երբ քաղաքացին դիմում է խնդրով, որի ամբողջական լուծումը հնարավոր չէ ապահովել, հատկապես, երբ այն վերաբերում է մարդու կյանքին, առողջությանը կամ կենսական պայմաններին։
Հանդիպման ընթացքում անդրադարձ է կատարվել նաև հաշմանդամություն ունեցող անձանց իրավունքների իրացմանը, կրթության հասանելիությանը, հանրային տրանսպորտից օգտվելու հնարավորություններին և մատչելի միջավայրի ապահովմանը։
Շիրակի մարզպետն ու Մարդու իրավունքների պաշտպանը կարևորել են հաշմանդամություն ունեցող անձանց համար հավասար հնարավորությունների ստեղծումը և ոլորտում առկա խնդիրների լուծմանն ուղղված համագործակցությունը։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Նարեկ Կարապետյանի առանձնատանը խուզարկություններ են իրականացվում. ՔԿ
Նարեկ Կարապետյանի առանձնատանը խուզարկություններ են իրականացվում։ Այդ մասին «Լուրերին» հայտնում են Քննչական կոմիտեից։
Նախընտրական հավաքներին մասնակցելու համար մարդկանց նյութապես շահագրգռելու և փողերի լվացման քրեական վարույթի շրջանակում կատարվում են քննչական գործողություններ։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Վոլգոգրադի մարզը ենթարկվել է ԱԹՍ-ների զանգվածային հարձակման․ հրդեհվել է Wildberries-ի պահեստը, տներ են վնասվել
Վոլգոգրադի Wildberries-ի պահեստներից մեկում հրդեհ է բռնկվել, հայտնել է ընկերության մամուլի ծառայությունը։
«Հրշեջ խմբերը դեպքի վայրում են։ Նախնական տվյալներով` վիրավորներ չկան»,- հայտնել է ընկերությունը իր Telegram ալիքում հրապարակված գրառման մեջ։
Ընկերությունը հավելել է, որ պատվերները ստացվում և առաքվում են այլ կետերում։
Ուրբաթ առավոտյան Վոլգոգրադի մարզը ենթարկվել է անօդաչու թռչող սարքերի զանգվածային հարձակման։ Նահանգապետ Անդրեյ Բոչարովի խոսքով՝ հինգ մարդ վիրավորվել և հոսպիտալացվել է։ Վնասվել է երկու տուն, իսկ վառելիքաէներգետիկ ոլորտի արդյունաբերական օբյեկտում հրդեհ է բռնկվել։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Ամասիա համայնքին է վերադարձվել ապօրինի օտարված 5 հա արոտավայրը
Դատախազական ներգործության արդյունքում՝ Շիրակի մարզի Ամասիա համայնքին է վերադարձվել համայնքային սեփականություն հանդիսացող 5,03766 հա մակերեսով արոտավայր:
Մասնավորապես՝ Շիրակի մարզի դատախազությունը, պետական (համայնքային) շահերի պաշտպանության լիազորության շրջանակներում, ուսումնասիրելով Քննչական կոմիտեում քննված քրեական վարույթով ձեռք բերված ապացույցները, համաձայն որոնց՝ Շիրակի մարզի Ամասիա համայնքի ղեկավար Ջ.Հ.-ն, խախտելով Հողային օրենսգրքի պահանջները, 2020 թվականի հոկտեմբերի 20-ին Ամասիա համայնքի Բանդիվան բնակավայրում գտնվող՝ 5,03766 հա մակերեսով գյուղատնտեսական նշանակության արոտավայրն օտարել է ֆիզիկական անձի, միջնորդագիր է հասցեագրել Ամասիա համայնքի ղեկավարին՝ պահանջելով միջոցներ ձեռնարկել նշված հողատարածքն Ամասիա համայնքին վերադարձնելու և դրա ապօրինի տիրապետումը դադարեցնելու ուղղությամբ:
Միջնորդագրի հիման վրա ձեռնարկված միջոցառումների արդյունքում, 2026 թվականի հուլիսի 30-ին Բանդիվան բնակավայրի 5,03766 հա մակերեսով գյուղատնտեսական նշանակության արոտավայրի նկատմամբ Կադաստրի կոմիտեում գրանցվել է Ամասիա համայնքի սեփականության իրավունքը։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Մելանյա Հարությունյանը կնշանակվի վարչապետի մամուլի քարտուղար, Նազելի Բաղդասարյանը կստանձնի պատգամավորի լիազորությունները
Վարչապետի մամուլի քարտուղարի պաշտոնում կնշանակվի Մելանյա Հարությունյանը։ Այդ մասին ճեպազրույցի ընթացքում հայտարարել է վարչապետ Նիկոլ Փաշինյանը։
Նա նշել է, որ Նազելի Բաղդասարյանն ավարտում է իր պաշտոնավարումը վարչապետի մամուլի քարտուղարի պաշտոնում, և շնորհակալություն է հայտնել նրան կատարած աշխատանքի համար։ Վարչապետը հույս է հայտնել, որ նոր մամուլի քարտուղարի հետ համագործակցությունը արդյունավետ կլինի, իսկ լրագրողների հետ հանդիպումների և քննարկումների գործող ձևաչափը կպահպանվի։
Նազելի Բաղդասարյանն իր հերթին Ֆեյսբուքի էջում հայտնել է, որ ավարտում է աշխատանքը վարչապետի մամուլի քարտուղարի պաշտոնում՝ Ազգային ժողովի պատգամավորի լիազորությունները ստանձնելու կապակցությամբ։
Նա նշել է, որ վերջին երեքուկես տարիներին աշխատել է վարչապետի աշխատակազմում և մամուլի քարտուղարի պատասխանատու պաշտոնը ստանձնել երկրի համար բարդ ժամանակահատվածում։ Ըստ Բաղդասարյանի՝ այդ ընթացքում փորձել է ապահովել հանրային հաղորդակցության, թափանցիկության և հաշվետվողականության անհրաժեշտ պայմանները, լինել հասանելի և նպաստել հանրության հետ արդյունավետ հաղորդակցությանը։
Նազելի Բաղդասարյանը շնորհակալություն է հայտնել վարչապետ Նիկոլ Փաշինյանին՝ վստահության, համատեղ աշխատանքի, ձեռք բերած փորձի և ընձեռված հնարավորության համար։ Նա նաև շնորհակալություն է հայտնել պետական կառավարման մարմինների գործընկերներին, մամուլի քարտուղարներին, խոսնակներին, ինչպես նաև վարչապետի աշխատակազմի համապատասխան ստորաբաժանումների և Հանրային կապերի ու տեղեկատվության կենտրոնի աշխատակիցներին։
Բաղդասարյանն առանձնահատուկ շնորհակալություն է հայտնել լրագրողներին և զանգվածային լրատվության միջոցների ներկայացուցիչներին՝ ընդգծելով նրանց դերը հանրության իրազեկման և պետական կառույցների գործունեության լուսաբանման գործում։
Նա նաև տեղեկացրել է, որ «Քաղաքացիական պայմանագիր» կուսակցության վարչության որոշմամբ ընտրվել է Ազգային ժողովի Աշխատանքի և բարեկեցության հարցերի մշտական հանձնաժողովի նախագահի թեկնածու։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
ՀՀ–ՌԴ հարաբերությունները չպետք է լինեն բացառիկ, բայց պետք է պահպանվեն․ Փաշինյան
Հայաստանը որոշել է ընդլայնել իր արտաքին քաղաքական գործընկերների շրջանակը և ունենալ այլընտրանքներ։ Այդ մասին ճեպազրույցի ընթացքում հայտարարել է վարչապետ Նիկոլ Փաշինյանը՝ պատասխանելով հայ-ռուսական հարաբերությունների և Հայաստանի քաղաքական կողմնորոշման վերաբերյալ հարցին։
Վարչապետի խոսքով՝ նախկինում Հայաստանը չուներ այնքան լայն գործընկերային հնարավորություններ, որքան այսօր։ Նա նշել է, որ Հայաստանը ռազմավարական հարաբերությունների վերաբերյալ փաստաթղթեր է ստորագրել Չինաստանի, Միացյալ Նահանգների, Մեծ Բրիտանիայի, Նիդերլանդների, Ֆրանսիայի և այլ պետությունների հետ։
Ըստ Փաշինյանի՝ Ռուսաստանը կարող է խնդիր տեսնել Հայաստանի՝ այլ գործընկերների հետ հարաբերություններ զարգացնելու քաղաքականության մեջ, քանի որ այդ մոտեցման հիմքում հաճախ առկա է հարաբերությունների բացառիկության ակնկալիքը։
Նա ընդգծել է, որ Հայաստանը չի ընդունում այն մոտեցումը, ըստ որի՝ հարաբերությունները կամ պետք է լինեն բացառիկ, կամ ընդհանրապես չպետք է լինեն։
«Մենք ասում ենք՝ հարաբերությունները բացառիկ չեն, բայց հարաբերություններ պետք է լինեն։ Սա լեգիտիմ դիրքորոշում է»,- նշել է վարչապետը։
Անդրադառնալով այն դիտարկմանը, թե Հայաստանը կարող էր Ռուսաստանին առիթ տալ կասկածելու իր գործընկերային հուսալիությանը՝ Փաշինյանը հարց է բարձրացրել, թե ինչու Հավաքական անվտանգության պայմանագրի կազմակերպությունը չի կատարել իր գործառույթները 2020 և 2022 թվականներին, երբ Հայաստանը, ըստ նրա, հավատարիմ էր իր ստանձնած պարտավորություններին։
Վարչապետը հիշատակել է նաև Լեռնային Ղարաբաղում ռուս խաղաղապահների գործունեությունը՝ նշելով, որ նրանք նույնպես չեն կատարել իրենց գործառույթները։
Փաշինյանի խոսքով՝ սխալ է մշտապես ելնել այն կանխավարկածից, որ հարաբերություններում առաջացած խնդիրների համար պարտադիր Հայաստանը պետք է մեղավոր լինի։ Նա անդրադարձել է նաև Բելառուսի նախագահի՝ Հայաստանի վերաբերյալ նախկին հայտարարությանը՝ անընդունելի համարելով ինքնիշխան պետության մասին նման ձևակերպումները։
Վարչապետը հայտարարել է, որ Հայաստանն այսօր անհրաժեշտ և կարևոր գործընկեր է Չինաստանի, ԱՄՆ-ի, Եվրոպական միության, Իրանի, Վրաստանի, Ֆրանսիայի, Գերմանիայի, Լեհաստանի, Մեծ Բրիտանիայի և այլ երկրների համար, ինչպես այդ պետություններն են կարևոր Հայաստանի համար։
Անդրադառնալով Եվրասիական տնտեսական միության չորս երկրների ղեկավարների՝ մայիսի 29-ի հայտարարությանը՝ Փաշինյանը նշել է, որ հարգանքով է վերաբերվում Հայաստանում ԵՄ անդամակցության հարցով հանրաքվե անցկացնելու գաղափարին նրանց ցուցաբերած աջակցությանը, սակայն այս պահին հանրաքվեի առարկան դեռևս գոյություն չունի։
Նրա խոսքով՝ նման հարցով հանրաքվե անցկացնելու համար Հայաստանը պետք է առնվազն ԵՄ անդամակցության հայտ ներկայացրած լինի։ Առավել տրամաբանական կլինի հանրաքվեն կազմակերպել այն դեպքում, երբ Հայաստանը ստանա անդամության թեկնածուի կարգավիճակ, կամ այդ հարցը պաշտոնապես ներառվի օրակարգում։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Ֆեյսբուքում խուլիգանություն կատարելու վերաբերյալ քրեական վարույթի նախաքննությունն ավարտվել է
ՀՀ քննչական կոմիտեի Լոռու մարզային քննչական վարչությունում ավարտվել է Ֆեյսբուքում խուլիգանություն կատարելու դեպքի առթիվ նախաձեռնված քրեական վարույթի նախաքննությունը:
Մասնավորապես՝ 2026 թվականի մայիսի 9-ին Ա.Օ.-ն ֆեյսբուքյան իր էջում խուլիգանություն կատարելու ուղղակի դիտավորությամբ, տեղեկատվական տեխնոլոգիաներն օգտագործելով՝ 61-ամյա Հ.Մ.-ի քաղաքական հայացքներով պայմանավորված՝ «Քաղաքացիական պայմանագիր» կուսակցությանը սատարելու դրդապատճառով, վերջինիս լուսանկարը տեղադրելով, անպարկեշտ արտահայտություններ պարունակող տեսանյութ է հրապարակել՝ այդ կերպ բարոյական նորմերի նկատմամբ բացահայտ արհամարհական վերաբերմունք ցուցաբերելով:
Ա.Օ.-ի նկատմամբ հսկող դատախազի որոշմամբ հարուցվել է հանրային քրեական հետապնդում՝ տեղեկատվական կամ հաղորդակցական տեխնոլոգիաներն օգտագործելով խուլիգանություն կատարելու համար:
Քրեական վարույթը մեղադրական եզրակացությամբ ուղարկվել է հսկող դատախազին՝ այն հաստատելու և քննության առնելու համար դատարան ուղարկելու միջնորդությամբ:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
📢«Ապատեղեկատվությունից մինչև տեղեկատվական դիմակայունություն․ ի՞նչ դասեր քաղեցինք խորհրդարանական ընտրություններից»
«Ապատեղեկատվությունից մինչև տեղեկատվական դիմակայունություն․ ի՞նչ դասեր քաղեցինք խորհրդարանական ընտրություններից»
2026 թվականի խորհրդարանական ընտրություններից հետո ապատեղեկատվության տարածումը, դրա ազդեցությունը հանրային ընկալումների վրա և հասարակության տեղեկատվական դիմակայունության բարձրացումը շարունակում են մնալ կարևորագույն խնդիրներ։
Քննարկումը ամբողջական ՝
YouTube 
Ի՞նչ հիմնական դասեր քաղեցինք խորհրդարանական ընտրություններից՝ ապատեղեկատվության տեսանկյունից։
Որքանո՞վ էին մեդիան և քաղաքացիական հասարակությունը պատրաստ այդ մարտահրավերին։
Որո՞նք էին ամենավտանգավոր ապատեղեկատվական նարատիվները, և արդյո՞ք դրանք շարունակում են շրջանառվել հետընտրական շրջանում։
Ի՞նչ գործիքակազմ ունեն այսօր մեդիան և քաղաքացիական հասարակությունը ապատեղեկատվության դեմ պայքարելու համար։
Ի՞նչն աշխատեց, և ի՞նչը պետք է փոխվի։
Ինչպե՞ս բարձրացնել հասարակության տեղեկատվական դիմակայունությունը սոցիալական ցանցերի և արհեստական բանականությամբ ստեղծվող բովանդակության պայմաններում։
Ի՞նչ քայլեր պետք է ձեռնարկել առաջիկա ընտրական գործընթացներից, այդ թվում՝ ՏԻՄ ընտրություններից առաջ, որպեսզի ապատեղեկատվությունը չձևավորի հանրային օրակարգը։
Բանախոսներ՝
Աշոտ Մելիքյան — Խոսքի ազատության պաշտպանության կոմիտեի նախագահ
Արևիկ Սահակյան — Factor TV-ի նախագահ
Լևոն Բարսեղյան — Ժուռնալիստների «Ասպարեզ» ակումբի խորհրդի նախագահ
«Երկխոսություն» մեդիա կենտրոն
Միացե՛ք քննարկմանը՝ ընտրական գործընթացներում ապատեղեկատվության ազդեցության, մեդիայի և քաղաքացիական հասարակության դերակատարության, ինչպես նաև տեղեկատվական դիմակայունության բարձրացման հնարավորությունների մասին խոսելու համար։
#DialogueMediaCenter #Disinformation #InformationResilience #MediaLiteracy #FactChecking #Elections2026 #Democracy #CivilSociety #Media #ArtificialIntelligence #Gyumri #Armenia
— — — — — — —
**ENG**
**From Disinformation to Information Resilience: What Lessons Did We Learn from the Parliamentary Elections?**
Following the 2026 parliamentary elections, the spread of disinformation, its influence on public perceptions, and the need to strengthen society’s information resilience remain major concerns.
**The discussion will address:**
What key lessons did we learn from the parliamentary elections from the perspective of disinformation?
How prepared were the media and civil society to respond to this challenge?
What were the most dangerous disinformation narratives, and are they still circulating during the post-election period?
What tools do the media and civil society currently have to counter disinformation?
What worked, and what needs to change?
How can society’s information resilience be strengthened in the age of social media and AI-generated content?
What steps should be taken before upcoming electoral processes, including local elections, to prevent disinformation from shaping the public agenda?
**Speakers:**
**Arevik Sahakyan** — President of Factor TV
**Levon Barseghyan** — Chair of the Board of the Asparez Journalists’ Club
**Ashot Melikyan** — President of the Committee to Protect Freedom of Expression
**Dialogue Media Center**
Join the discussion on the impact of disinformation on electoral processes, the role of the media and civil society, and the ways to strengthen information resilience.
#DialogueMediaCenter #Disinformation #InformationResilience #MediaLiteracy #FactChecking #Elections2026 #Democracy #CivilSociety #Media #ArtificialIntelligence #Gyumri #Armenia
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com