Նորություններ

Լրագրողական կազմակերպությունների հայտարարությունը Antifake-ի ներկայացուցիչների կալանավորման առնչությամբ

Լրագրողական կազմակերպությունները համատեղ հայտարարություն են տարածել Antifake-ի ներկայացուցիչների կալանավորման առնչությամբ՝  ԱԱԾ-ի լայնածավալ գործողությունները որակելով որպես իշխանությունների կողմից կիրառված անհամաչափ ուժ և բիրտ ճնշում ընդդիմադիր մեդիայի նկատմամբ։

«Երեկ՝ նոյեմբերի 13-ին, ԱԱԾ աշխատակիցները ձերբակալել են AntiFake.am կայքի «Իմնեմնիմի» փոդքասթի համահեղինակներ և վարողներ Վազգեն Սաղաթելյանին և Նարեկ Սամսոնյանին։ Ավելի ուշ նրանք դատարանի որոշմամբ երկու ամսով կալանավորվել են։ Պատճառը նոյեմբերի 7-ին ՀՀ երրորդ նախագահ Սերժ Սարգսյանի հետ հարցազրույցին հաջորդած՝ նշյալ փոդքասթի երկու թողարկումներում Սաղաթելյանի և Սամսոնյանի հնչեցրած հայհոյանքն ու վիրավորանքներն են վարչապետ Նիկոլ Փաշինյանի, ԱԺ նախագահ Ալեն Սիմոնյանի և իշխանության այլ ներկայացուցիչների հասցեին։

Հետապնդումը նախաձեռնվել է Ալեն Սիմոնյանի հաղորդման հիման վրա։ Ըստ Քննչական կոմիտեի՝ գործ է հարուցվել Քրեական օրենսգրքի 297-րդ հոդվածի 2-րդ մասի 1-ին և 3-րդ կետերով (խուլիգանությունը, որը կատարվել է մի խումբ անձանց կողմից տեղեկատվական կամ հաղորդակցական տեխնոլոգիաներն օգտագործելով):

Նույն օրը ԱԱԾ-ն խուզարկություն է իրականացրել AntiFake.am կայքի գրասենյակում, առգրավել է խմբագրության տեխնիկան, ապա՝ ձերբակալել լրագրող Դավիթ Ֆիդանյանին՝ արդարադատությանը խոչընդոտելու պատճառաբանությամբ։ Այսօր արդեն՝ նոյեմբերի 14-ին, իրավապահները ձերբակալել են նաև AntiFake.am-ի աշխատակից Իշխան Խոսրովյանին, որը մի քանի ժամ անց ազատ է արձակվել։

Մենք՝ ներքոստորագրյալ լրագրողական կազմակերպություններս, անթույլատրելի ենք համարում իշխանությունների կողմից այս անհամաչափ ուժի և բիրտ ճնշումների կիրառումը, որն արտահայտվել է ԱԱԾ-ի ներգրավմամբ ցուցադրական գործողություններով, բուն խնդրի հետ ուղիղ կապ չունեցող՝ AntiFake.am-ի այլ աշխատակիցների ձերբակալմամբ և խմբագրության ողջ տեխնիկայի առգրավմամբ, ինչը հանգեցրել է ընդդիմադիր հարթակի գործունեության խաթարման։ Այս գործողությունները դատապարտելի են և հարիր չեն ժողովրդավարությանը ձգտող պետությանը։

Միևնույն ժամանակ, սկզբունքորեն անընդունելի ենք համարում և դատապարտում ենք հայհոյախոսությունն ու վիրավորանքը հանրային տիրույթում, մասնավորապես՝ սոցիալական ցանցերում և լրատվամիջոցներում։ Վերջին տարիներին լայնորեն տարածված արատավոր այդ երևույթը, որը հաճախ անպատիժ է մնում, էլ ավելի է խորացնում հասարակության պառակտվածությունն ու բևեռացումը, սերմանում անհանդուրժողականություն և սանձարձակություն։ Անկասկած, հայհոյանքն ու վիրավորանքը, ատելության խոսքն ու սպառնալիքները պետք է ստանան իրավական գնահատական։ Դրանք անհամատեղելի են հասարակության հետ հաղորդակցվելու տարրական նորմերի հետ։

Հաշվի առնելով վերոհիշյալ իրադարձությունների հանրային լայն արձագանքը՝ պահանջում ենք․ իրավապահ մարմիններից՝ զերծ մնալ ընտրողական մոտեցումից վիրավորանքների և հայհոյախոսության համար անձանց պատասխանատվության ենթարկելիս, իսկ տվյալ գործի քննությունն իրականացնել համակողմանի և օբյեկտիվ՝ պարբերաբար տեղեկացնելով հասարակությանը դրա ընթացքի և արդյունքների մասին, իշխանություններից, քաղաքական բոլոր ուժերից, այդ թվում՝ դրանց հետ ասոցացվող լրատվամիջոցներից, հանրային խոսքում զերծ մնալ պարկեշտության սահմանները հատող բառապաշարից և հայհոյախոսությունից, հանրային հետաքրքրություն ներկայացնող թեմաները քննարկելիս դրսևորել առավել հանդուրժողականություն և զսպվածություն։

ԽՈՍՔԻ ԱԶԱՏՈՒԹՅԱՆ ՊԱՇՏՊԱՆՈՒԹՅԱՆ ԿՈՄԻՏԵ

ԵՐԵՎԱՆԻ ՄԱՄՈՒԼԻ ԱԿՈՒՄԲ

ՄԵԴԻԱ ՆԱԽԱՁԵՌՆՈՒԹՅՈՒՆՆԵՐԻ ԿԵՆՏՐՈՆ

ԼՐԱԳՐՈՂՆԵՐԻ «ԱՍՊԱՐԵԶ» ԱԿՈՒՄԲ

ԲԱԶՄԱԿՈՂՄԱՆԻ ՏԵՂԵԿԱՏՎՈՒԹՅԱՆ ԻՆՍՏԻՏՈՒՏ

– ՀԱՅԱՍՏԱՆ ՀԱՆՐԱՅԻՆ ԼՐԱԳՐՈՒԹՅԱՆ ԱԿՈՒՄԲ

«ԼՐԱԳՐՈՂՆԵՐ ՀԱՆՈՒՆ ԱՊԱԳԱՅԻ» ՀԿ

«ԼՐԱԳՐՈՂՆԵՐ ՀԱՆՈՒՆ ՄԱՐԴՈՒ ԻՐԱՎՈՒՆՔՆԵՐԻ» ՀԿ»,- ասված է հաղորդագրությունում։

Հիշեցնենք՝ նախօրեին դիմակավորված ԱԱԾ-ականները մտել են «Իմնեմնիմի» փոդքասթի վարողներ Նարեկ Սամսոնյանի և Վազգեն Սաղաթելյանի բնակարաններ։ Խուզարկություն իրականացնելուց հետո նրանց ձերբակալել են, ավելի ուշ՝ կալանավորել։ Հանցագործության վերաբերյալ հաղորդումը ներկայացրել է Ազգային ժողովի նախագահ Ալեն Սիմոնյանը «Իմնեմնիմի»-ի նոյեմբերի 8-ի փոդքասթից հետո։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Հրապարակվեց Ջուլիետա Ղուկասյանին դաժանաբար ծեծելով սպանության հասցնելու մեջ մեղադրվող զինծառայող Անդրեյ Ռազգիլդեևի դատավճիռը

Շիրակի մարզի ընդհանուր իրավասության դատարանը՝ դատավոր Արտյոմ Ավետիսյանի նախագահությամբ այսօր հրապարակեց դեռ 7 տարի առաջ՝ 2018 թվականի դեկտեմբերի 2-ին, Գյումրու Սլաբոդկա թաղամասում գյումրեցի հավաքարար, 57-ամյա Ջուլիետա Ղուկասյանին վաղ առավոտյան աշխատանքի գնալու ճանապարհին դաժանաբար ծեծելով սպանության հասցնելու մեջ մեղադրվող զինծառայող Անդրեյ Ռազգիլդեևի դատավճիռը։ Մեղադրանքում գրված էր․«102-րդ ռազմաբազայի զինծառայող Անդրեյ Ռազգիլդեևը 2018 թվականի դեկտեմբերի 2-ին` ժամը 07:00-ի սահմաններում, գտնվելով ալկոհոլի ազդեցության տակ, հետապնդել է Գյումրի քաղաքի Մայակովսկի փողոցից դեպի Շահումյան փողոց քայլող Ջուլիետա Ստյոպայի Ղուկասյանին։

Վերջինս, խուսափելով Անդրեյ Ռազգիլդեևից, փոխել է ուղղությունը և քայլել նույն փողոցի 28-րդ և 30-րդ հասցեներում գտնվող սեփական տների ուղղությամբ։ Սակայն, Անդրեյ Ռազգիլդեևը, հասնելով նրա հետևից, դիտավորությամբ բազմաթիվ հարվածներ է հասցրել գլխին և մարմնի տարբեր մասերին՝ պատճառելով մարմնական վնասվածքներ և անզգուշությամբ առաջացնելով Ջուլիետա Ղուկասյանի մահը: Կինը մարմնական վնասվածքներով տեղափոխվել է «Գյումրի բժշկական կենտրոն», որտեղ էլ նույն օրը` ժամը 11:30-ին, մահացել է»:

Դատարանի որոշմամբ ռուս զինծառայողը դատապարտվեց ազատազրկման 7 տարի 6 ամիս ժամկետով։ Ջուլիետա Ղուկասյանի ընտանիքը նաև քաղհայց էր ներկայացրել դատարան, պահանջելով 1 մլն 800 հազար դրամ, որով պետք է Ջուլիետա Ղուկասյանի գերեզմանը կառուցվի․ քաղհայցը դատարանը բավարարեց ամբողջությամբ։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Միքայել Աջապահյանի պաշտպանները բողոքարկել են առաջին ատյանի դատարանի դատավճիռը

Միքայել արքեպիսկոպոս Աջապահյանի պաշտպանները բողոքարկել են առաջին ատյանի դատարանի դատավճիռը՝ պահանջելով այն բեկանել և նրան ճանաչել անմեղ։ «Գերաշնորհ Տ. Միքայել արքեպիսկոպոս Աջապահյանի պաշտպանների կողմից այսօր՝ 13.11.2025 թվականին, ներկայացվել է վերաքննիչ բողոք Առաջին ատյանի դատարանի դատավոր Արմինե Մելիքսեթյանի 03.10.2025թ. դատավճռի դեմ (դատավճիռը պաշտպանները ստացել են 15.10.2025թ.):

Պաշտպանները խնդրել են ամբողջությամբ բեկանել դատավճիռը և կայացնել նոր դատական ակտ՝ ճանաչել և հռչակել Գերաշնորհ Միքայել (Գևորգ) Արտաշեսի Աջապահյանի անմեղությունը»,- ասված է հաղորդագրությունում:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Քվորում չլինելու պատճառով Գյումրու ավագանու նիստը չկայացավ

Ավագանու 33 անդամներից ներկա էին 16-ը։ Բացակայում էին ՔՊ խմբակցության բոլոր անդամները։ Բացակա էին նաև ընդդիմադիր ուժերից մեկի՝ « Մեր քաղաքը» խմբակցության ավագանու անդամ Նարեկ Միրզոյանը և օրերս մանդատ ստացած, սակայն ներկայում զանգվածային անկարգություններին մասնակցելու կասկածանքով կալանքի տակ գտնվող Տիգրան Ավագյանը՝ Կոմունիստական կուսակցությունից։

Վերջինս, ինչպես տեղեկացրել է լրագրողների հետ զրուցում «Կոմունիստական կուսակցություն» խմբակցության քարտուղար Լուսինե Անանյանը, հրաժարվել է մանդատից, այն կփոխանցվի Վարդան Ղուկասյանի գլխավորած «Կոմունիստական կուսակցություն» խմբակցության ցուցակի հաջորդ համարին։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Ձերբակալվել է Էկոնոմիկայի նախկին նախարար Վահան Քերոբյանը

Հայաստանի էկոնոմիկայի նախկին նախարար Վահան Քերոբյանին մեղադրանք է առաջադրվել պաշտոնեական լիազորությունները չարաշահելու հոդվածով։ Ինչպես հաղորդում է «Արմենպրես»-ը, լրագրողների հետ զրույցում այս մասին հայտնել է Վահան Քերոբյանի փաստաբան Տիգրան Եգորյանը։

Նա տեղեկացրել է, որ Վահան Քերոբյանը փետրվարի 15-ին հարցաքննվել է Քննչական կոմիտեում, որից հետո նրան մեղադրանք է առաջադրվել։

«Նա հարցաքննվել է նույն գործով, որին ծանոթ եք՝ «Սիներջի» և «Հարմոնիա» ընկերությունների մրցութային պատմության վերաբերյալ գործով։ Մեղադրանք է առաջադրվել նաև պարոն Քերոբյանին։ Մեղադրանքը պարոն Քերոբյանը չի ընդունում։ Մենք գտնում ենք, որ այն հիմքերը, որոնք բերված են հետապնդման որոշման մեջ, և որոնք արտացոլված են դատարան ներկայացվող միջնորդության մեջ, բավականին թույլ են։ Այն հետևությունները և եզրահանգումները, որոնք բերված են, կարծում ենք, որ իրականությանը չեն համապատասխանում։ Մեր գնահատմամբ՝ դրանք հիմնականում ենթադրությունների մակարդակում են»,- մանրամասնել է Եգորյանը։

Փաստաբանը նշել է, որ նախաքննության գաղտնիությունից ելնելով, շատ մանրամասներ չի կարող հայտնել։

«Վահան Քերոբյանին մեղադրանք է առաջադրվել 441-րդ հոդվածի երկրորդ մասի 4-րդ կետով (պաշտոնական լիազորությունները չարաշահելը, անցնելը կամ օգտագործելը կամ աղդեցություն կիրառելը խմբի կազմում՝ շահադիտական նկատառումներով և նախնական համաձայնությամբ)»,- հայտարարել է Եգորյանը։

Փաստաբանը հավելել է, որ Վահան Քերոբյանին կալանավորելու միջնորդություն է ներկայացվել դատարան։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Վարդան Ղուկասյանը տեղափոխվել է «Սուրբ Գրիգոր Լուսավորիչ» բժշկական կենտրոն

Այսօր, ժամը 16։00-ի սահմաններում, կտրուկ վատացել է Գյումրու քաղաքապետ Վարդան Ղուկասյանի առողջական վիճակը, ով գտնվել է Երևանի «Կենտրոն» քրեակատարողական հիմնարկում։ Այս մասին հայտնել է Վարդան Ղուկասյանի փաստաբան Զարուհի Փոստանջյանը։ «Քրեակատարողական հիմնարկի անձնակազմը անմիջապես հրավիրել է շտապ բժշկական օգնություն, և Վարդան Ղուկասյանը տեղափոխվել է «Սուրբ Գրիգոր Լուսավորիչ» բժշկական կենտրոն։ Նախնական տվյալներով՝ այս պահին Վարդան Ղուկասյանը գտնվում է «Սուրբ Գրիգոր Լուսավորիչ» ԲԿ-ում։ Նրա առողջական վիճակի մանրամասները ճշտվում են։

Վարդան Ղուկասյանը կալանավայրում էր արդեն 18 օր, մինչ այդ վարույթն իրականացնող մարմինը և դատարանը տեղեկացված էին նրա առողջական խնդիրների մասին, սակայն այնուամենայնիվ որոշում էր կայացվել նրա կալանավորման վերաբերյալ։ Լրացուցիչ տեղեկատվություն Վարդան Ղուկասյանի առողջական վիճակի և հետագա գործողությունների մասին կտրամադրվի ըստ անհրաժեշտության»,- հավելել է փաստաբանը։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

ԵՄ-ն Հայաստանին է փոխանցել ՀՀ-ԵՄ վիզաների ազատականացման գործողությունների ծրագիրը

Նոյեմբերի 5-ին Հայաստան կատարած այցի ընթացում Եվրոպական հանձնաժողովի Միգրացիայի և ներքին գործերի գլխավոր տնօրենի տեղակալ Յոհաննես Լուխները Վիզաների ազատականացման շուրջ երկխոսության հարցերով հայկական կողմի բարձրաստիճան պաշտոնյա, ՀՀ ներքին գործերի նախարար Արփինե Սարգսյանին է հանձնել ՀՀ-ԵՄ վիզաների ազատականացման գործողությունների ծրագիրը։

Հանձնման արարողությունը տեղի է ունեցել ՀՀ փոխվարչապետ Մհեր Գրիգորյանի ներկայությամբ։

Վիզաների ազատականացման շուրջ երկխոսության հարցերով հայկական կողմի բարձրաստիճան պաշտոնյա, ՀՀ ներքին գործերի նախարար Արփինե Սարգսյանը, ստանալով փաստաթուղթը, նշել է, որ այն Հայաստանի և Եվրոպական Միության գործընկերության կարևոր փուլ է և արդեն ձևավորել է լայն հանրային ուշադրություն ու ակնկալիքներ։

Կողմերը գոհունակությամբ ընդգծել են այս ուղղությամբ մինչ օրս գրանցած առաջընթացը և փաստել, որ ԵՄ վիզաների ազատականացման գործողությունների ծրագրի պաշտոնական հանձնումը երկկողմ իրական ջանքերի ապացույցն է։

Վերահաստատվել է հայկական կողմի հանձնառությունը ծրագրով նախատեսված միջոցառումների իրականացմանը, որի վերջնարդյունքը ՀՀ քաղաքացիների համար Եվրոպական Միություն արժանապատիվ, անվտանգ և դյուրին ճամփորդության հնարավորությունների ապահովումն է։

Միջոցառումից հետո Լուխներն ու Սարգսյանը հանդես են եկել ասուլիսով և պատասխանել լրագրողների հարցերին։

ՀՀ-ԵՄ վիզաների ազատականացման գործողությունների ծրագիրը  https://mia.gov.am/2025/11/05/em-31/

_____________________________________

EU hands over the Visa Liberalization Action Plan to Armenia

On November 5, Johannes Luchner, the Deputy Director-General for Directorate-General for Migration and Home Affairs of the European Commission during his visit to Armenia officially handed over the EU-Armenia Visa Liberalization Action Plan to Arpine Sargsyan, and the Minister of Internal Affairs of the Republic of Armenia, and Senior Official for the Visa Liberalisation Dialogue on the Armenian side․

The handover ceremony was held in the presence of Mher Grigoryan, the Deputy Prime Minister of the Republic of Armenia.

Arpine Sargsyan, the Minister of Internal Affairs of the Republic of Armenia, and Senior Official for the Visa Liberalisation Dialogue on the Armenian side upon receiving the document, noted that it marks an important phase in the Armenia-EU partnership and had already generated significant public attention and expectations.The parties positively highlighted the progress achieved in this regard so far and noted that the official handover of the EU Visa Liberalization Action Plan is a testament to the joint efforts undertaken by both sides.

The commitment of the Armenian side to implement the measures outlined in the Action Plan was reaffirmed, with the ultimate purpose of ensuring dignified, safe and facilitated travel opportunities to the European Union for Armenian citizens.

Following the event, Luchner and Sargsyan held a press conference and answered the questions of the journalists.

EU-Armenia Visa Liberalization Action Plan  https://mia.gov.am/2025/11/05/em-31/

ՆԳՆ շրջիկ սպասարկման գրասենյակները ծառայություններ կմատուցեն Լոռու և Շիրակի մարզերում

ՆԳՆ սպասարկման գրասենյակները շարունակում են իրականացնել շրջիկ սպասարկում՝ քաղաքացիներին մատուցելով և՛ միգրացիայի և քաղաքացիության ծառայության, և՛ հաշվառման-քննական բաժինների ծառայություններ։

ՆԳ նախարարի հրամանի համաձայն՝ սեպտեմբերի 11-ին ծառայություններ կմատուցվեն․
 ժամը 11։30-16:00
Լոռու մարզի Ստեփանավան համայնքում՝ համայնքապետարանի հարևանությամբ,
ժամը 11:30-16:00
Շիրակի մարզի Ամասիա համայնքում՝ համայնքապետարանի հարևանությամբ։

Շրջիկ սպասարկման շրջանակում քաղաքացիները կարող են փոխանակել անձնագիրը, ստանալ ժամանակավոր պաշտպանության վկայական, տեղեկանքներ, իսկ տեղահանված անձինք ՀՀ քաղաքացիություն ստանալու համար կարող են տեղում դիմումներ ներկայացնել։

Վարորդական իրավունքի ու սեփականության վկայականների, հաշվառման վկայագրի փոխանակման կամ կորստի դեպքում քաղաքացիները մոտենալով շրջիկ գրասենյակ` կարող են նորը ստանալ, օգտվել նաև հաշվառման-քննական բաժինների կողմից մատուցվող այլ ծառայություններից։

Սեպտեմբերի 11-ին շրջիկ սպասարկման գրասենյակները կլինեն նաև Արարատի մարզի Արարատ և Արմավիրի մարզի Մեծամորի համայնքապետարանների հարևանությամբ՝ սեպտեմբերի 4-ին ընդունված դիմումների շրջանակներում փաստաթղթերը հանձնելու նպատակով։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Գյումրիում բացվեց հայ-շվեյցարական հյուրընկալության ակադեմիան

Ողջունելով և շնորհավորելով ներկաներին հայ-շվեյցարական հյուրընկալության ակադեմիայի բացման առիթով` Շիրակի մարզպետը նշել է, որ ակադեմիայի բացումը ևս մեկ քայլ է հայ-շվեյցարական հարաբերությունների ամրապնդման գործում։

«Հիանալի է, երբ այսպիսի իրադարձության ենք ներկա, երբ մեր գործընկերների հայացքը դեպի Գյումրի միայն զբոսաշրջությամբ չէ որ ուղղված է, այլև կրթությամբ։ Մենք պատրաստ ենք ջանք չխնայել, որ այս ծրագիրն իրականություն դառնա առավել մեծ մասշտաբներով, որ Լոզանի համալսարանի քարտեզում Գյումրին առանձնահատուկ տեղ ունենա։ Շատ ճիշտ որոշում է կայացվել ակադեմիան Գյումրիում բացելու, քանի որ Գյումրին հյուրասիրության, մշակույթի, արվեստի, հյուրընկալության կենտրոն է։ Վստահ եմ` մեր աշակերտները դասախոսներից կվերցնեն առավելագույնը, բայց նաև համոզված եմ, որ հետագայում Լոզանի համալսարանից եկածները Գյումրու հյուրընկալությունից բան կվերցնեն։ Մեզ համար պատիվ է այսքան հյուրեր ընդունել Գյումրիում և մեծ պատիվ է, որ Գյումրին աշխարհի քարտեզում ևս մեկ նշանակալից կետով է նշվել»,- ընդգծել է Շիրակի մարզպետը։

Հայ-շվեյցարական հյուրընկալության ակադեմիան` SAAH-ը հիմնվել է աշխարհի առաջատար հյուրընկալության կառավարման կրթական հաստատության՝ Լոզանի հյուրընկալության դպրոցի հետ համագործակցությամբ։

Ակադեմիան լիցենզավորված է աշխարհի թիվ մեկ հյուրընկալության կառավարման դպրոցի՝ VET by EHL-ի կողմից։ 18 տարին լրացած բոլոր անձինք՝ երիտասարդ կամ մեծահասակ, կարող են ստանալ շվեյցարական որակի մասնագիտական կրթություն Հայաստանում, ինչը նոր հեռանկարներ է բացում ինչպես տեղական, այնպես էլ միջազգային աշխատաշուկայում։ Ակադեմիան առաջարկում է ուսուցում երեք մասնագիտություններով՝ խոհարարական արվեստ, ռեստորանային սպասարկում, հյուրանոցային ադմինիստրացիա։

Յուրաքանչյուր մասնագիտական ուղի ներառում է հավաստագրման երեք մակարդակ՝ հիմնական (I), միջին (II) և առաջատար (III)։ Յուրաքանչյուր մակարդակի տևողությունը 6 ամիս է, աշխատանքի վրա հիմնված ուսուցման մոդելով՝ 3 ամիս ուսում + 3 ամիս գործնական աշխատանք: Ակադեմիայում դասավանդում են VET by EHL կողմից հավատարմագրված և վերապատրաստված առաջնակարգ մասնագետներ, ուսուցումը հնարավոր է լրիվ կամ մասնակի կրթաթոշակներով։

Հայ-շվեյցարական հյուրընկալության ակադեմիան տեղակայված է Գրանդ հոթել Ապրիկոտ Գյումրիում։ Հայ-շվեյցարական հյուրընկալության ակադեմիան հիմնադրվել է 2025 թվականին՝ բարերար Վահե Գաբրաշի և Հայկական բարեգործական ընդհանուր միության նախաձեռնությամբ։ Ակադեմիայի առաքելությունն է ապահովել միջազգային մակարդակի, գործնական հմտությունների վրա հիմնված հյուրընկալության կրթություն՝ համադրելով շվեյցարական գերազանցության փորձն ու Հայաստանի զարգացող ծառայությունների և զբոսաշրջության ոլորտների պահանջները։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com