Նորություններ

Մարզում սեփական եկամուտները կատարվել են 89,3%֊ով

Սեփական եկամուտների հավաքագրում, քաղաքաշինական, սուբվենցիոն ծրագրերի ընթացք ու վերահսկողություն, գյուղատնտեսական, ՏԻՄ լիազորությունների շրջանակում արված աշխատանքներ, վարժական հավաքների կազմակերպմանն առնչվող հարցեր․ Շիրակի մարզպետ Դավիթ Առուշանյանի գլխավորությամբ այսօր տեղի է ունեցել Շիրակի մարզի խորհրդի հերթական նիստը։

Նիստի օրակարգային առաջին հարցը վերաբերվել է համայնքների բյուջեների սեփական եկամուտների 2025 թվականի առաջին կիսամյակի կատարմանը։ Ըստ մարզպետի աշխատակազմի ֆինանսական վարչության պետ Լիպարիտ Մարտիրոսյանի զեկույցի, հուլիսի 1-ի դրությամբ մարզում սեփական եկամուտները կատարվել են 89,3 %-ով։ Ամենացածրը անշարժ գույքի հարկն է հավաքագրվել, ամենաբարձրը կատարվել է տեղական տուրքը՝ 126.5 տոկոս։ ՀՀ պետական բյուջեով մարզի համայնքներին 2025-ի առաջին կիսամյակում նախատեսված 5 մլրդ 348 մլն դրամ «Դոտացիան» ամբողջությամբ ֆինանսավորվել է։ Մարզի համայնքներին բյուջեից 2025-ին «Կապիտալ սուբվենցիաներ համայնքներին» հոդվածով ՀՀ կառավարության 5 որոշումներով 13 ծրագրերի համար հատկացվել է 532 մլն 633 հազար դրամ։

«Համայնքների բնակիչների հետ անընդհատ աշխատանք է պետք տանել, որպեսզի գիտակցեն մի պարզ ճշմարտություն, որ համայնքներում տարված ցանկացած աշխատանք իրենց վճարած հարկերի շնորհիվ է լինելու։ Մենք հրաշագործներ չենք, այդ ամենն արվում է հարկերի հավաքագրման շնորհիվ։ Պետք է բնակիչներին ցույց տալ, որ այն գումարները, որ վճարում են, հետ է վերադառնում նորից իրենց և այդ պարագայում առավել հաճույքով կվճարեն։ Դպրոցների, մանկապարտեզների կառուցում, նորոգում, հիմնանորոգում, ճանապարհաշինություն՝ այն ծավալի աշխատանքները, որ այսօր մեր մարզում իրականացվում են՝ աննախադեպ է և վերջին տարիներին կրկնապատկվել է, մնում է մեր համայքնները ջանք չխնայեն այս առումով պարտականությունները պատշաճ կատարելու համար»,- ընդգծել է Շիրակի մարզպետը։

Օրակարգային հաջորդ հարցով քննարկվել են 2025-ին մարզում իրականացվելիք կապիտալ շինարարության ծրագրերի ընթացքին վերաբերող հարցեր։ Քաղաքաշինության, հողաշինության և եթակառուցվածքների կառավարման վարչության պետի պարտականությունները կատարող Էմիլ Պետրոսյանը զեկույցում նշել է, որ Հայաստանի տարածքային զարգացման հիմնադրամի պատվիրատվությամբ մարզում իրականացվում են Քեթիի, Բյուրակնի, Բավրայի, Հայրենյացի, Գետափի կրթահամալիրների, Սարատակի, Ամասիայի, Ջրափիի, Մայիսյանի, Շիրակավանի, Փոքր Մանթաշի միջնակարգ դպրոցների հիմքից կառուցման աշխատանքները։ Հիմնադրամի պատվիրատվությամբ ընթացքի մեջ են 9 դպրոցների վերանորոգման աշխատանքներ՝ ընդհանուր 2 մլրդ 18 մլն 634 հազար դրամ արժեքով։ 2025-ին կվերանորոգվեն ևս 18՝ Ազատանի, Աշոցքի, Արևշատի, Կառնուտի, Հառիճի, Հայկավանի, Լեռնակերտի, Նոր Կյանքի, Վահրամաբերդի Հ․ Մկրտչյանի անվան, Մուսայելյանի, Գյումրու թիվ 5, 7, 9, 19, 21, 30, 31 և 45 դպրոցները։ Մեկնարկել են Մարալիկ բնակավայրի 150 տեղ և Քարաբերդ բնակավայրի 50 տեղ հզորությամբ մանկապարտեզների կառուցման շինարարական աշխատանքները։

«Ծավալներով աննախադեպ շինարարական այս տարին մեզ համար կարևոր է վերահսկողության առումով, պետական հսկայական միջոցներ են ուղղվում մարզ՝ պետք է դրանց նպատակային օգտագործման համար բոլորիս ջանքերը միավորենք։ Շիրակի մարզպետի աշխատակազմը հետևողական է լինելու և պարտավորված է շինարարական աշխատանքների ընթացքին հետևելու։ Նորից շեշտեմ, որ Շիրակի մարզում արված ցանկացած շինարարություն մեր անմիջական վերահսկողության տակ է իրականացվելու անկախ նրանից, թե ում պատվիրատվությամբ է իրականացվելու։ Մեզ համար կարևորը որակով և ժամկետներում արված աշխատանքն է։ Եվս մեկ անգամ բոլոր շինարաներին խնդրում, հորդորում և պահանջում եմ լինել հետևողական։ Խոսելով տեխնիկական հսկողություն իրականացնողների մասին, ուզում եմ ասել, որ իրենց աշխատանքներում առկա են բացթողումներ, եթե իրենք աշխատանքները լիարժեք իրականացնեն այսօր՝ մարզպետի աշխատակազմի պատասխանատուները շինհրապարակներում չեն լինի, որպեսզի վերահսկեն աշխատանքները։ Քաղաքաշինական տեսչական մարմնին էլ կոչ եմ անում աշխատանքների ծավալներն ավելացել, քանի որ մարզում իրականացվող շինաշխատանքների ծավալները ևս կրկնապատկվել են։ Այն աշխատանքները, որոնք թերացումներով են լինելու, ավարտական ակտ չեն ստանալու, թե համայնքը, թե Կառավարությունը գումարները չեն տրամադրելու»,- նշել է Դավիթ Առուշանյանը։

2025-ին նախատեսված տնտեսական և սոցիալական ենթակառուցվածքների զարգացմանն ուղղված սուբվենցիոն ծրագրերի ընթացքի մասին օրակարգային հաջորդ հարցով հանդես է եկել զարգացման ծրագրերի մշակման և իրականացման բաժնի պետ Կարեն Բադիշյանը՝ նշելով, որ 2025-ին ներկայացվել է 38 ծրագիր՝ 132 ենթածրագրերով, որոնց ընդհանուր արժեքը կազմում է 11 մլրդ 959 մլն 530 հազար դրամ, Կառավարության համամասնությունը 56,6 տոկոս է։

«Սուբվենցիոն ծրագրերը պետության և համայնքի համատեղ ներդրումով իրականացվող են, այս աշխատանքներում ևս խիստ հետևողականություն եմ պահանջում բոլոր պատասխանատուներից, հետագա խնդիրներից խուսափելու համար պետք է այսօր լինել զգոն ու հոգացավ։ Որակի ու ժամկետների հարցում հանդուրժողականություն չի լինելու»,- հավաստել է Շիրակի մարզպետը։
Տարածքային կառավարման և տեղական ինքնակառավարման հարցերի վարչության պետ Արամ Անտոնյանն էլ անդրադարձել է տեղական ինքնակառավարման մարմինների լիազորություններին վերաբերող առանձին հարցերին և իրականացված աշխատանքներին՝ նշելով, որ ՀՀ տարածքային կառավարման և ենթակառուցվածների նախարարի հրամանով հաստատված 2025-ի աշխատանքային ծրագրին համապատասխան տարվա ընթացքում մարզի 3 համայնքներում նախատեսված է ՏԻՄ սեփական լիազորությունների իրականացման նկատմամբ իրավական հսկողություն (Ամասիա՝ 2-րդ եռամսյակ, Արթիկ՝ 3-րդ եռամսյակ, Գյումրի՝ 4-րդ եռամսյակ): Ուսումնասիրվելու են համայնքների տեղական ինքնակառավարման մարմինների լիազորությունների իրականացման օրինականությունն ու արդյունավետությունը, համայնքի ղեկավարի լիազորություններն՝ օրենսդրությամբ վերապահված բոլոր բնագավառներում:

Կարևորելով համայնքապետարանների հետ համագործակցված աշխատանքն ու բոլոր համայնքների կողմից լիազորությունների պատշաճ կլատարումը՝ Շիրակի մարզպետը նշել է․ «Ցավոք մեր համայնքի ղեկավարներից մեկն այստեղ չէ, հուսամ Գյումրու համայնքապետարանի աշխատակիցները հրապարակումներից կլսեն մեր հորդորները թե շնարարական աշխատանքների հետ կապված, թե վերահկսողության և ընդհանրապես, մեր համայնքապետարաններից ոչ մի բանով չի տարբերվում Գյումրու համայնքապետարանը և այդ նույն հորդորներն ու պահանջներն ունենք իրենցից։ Քաղաքացիների խնդիրներն, ինչպես նաև շինաշխատանքների որակին հետևելը մեզ համար առաջնային են, առաջնային է համայնքների հոգսերի օր առաջ թեթևացումը, կյանքի որակի փոփոխությունը՝ այս դիտանկյունով աշխատանք պահանջվելու է նաև բոլոր համայնքներից»։

Օրակարգային հաջորդ հարցն առնչվել է գյուղատնտեսական աշխատանքներին և ոռոգման կազմակերպման ընթացքին։ Գյուղատնտեսության և շրջակա միջավայրի պահպանության վարչության պետ Ռոման Համայակյանի զեկույցի համաձայն, 2025-ին մշակվել է 11 հազար 144 հա աշնանացան հացահատիկ, գարնանացանը կազմել է 22 հազար 837 հա։ «Բուսաբուծության աջակցության» ծրագրից օգտվելու համար համայնքապետարան են դիմել 1983 շահառուներ։ Համայնքների կողմից ներկայումս ընթանում է համատարած մոնիթորինգի իրականացման աշխատանքներ։ Մարզպետի աշխատակազմի աշխատանքային խմբի կողմից Արթիկ և Անի համայնքներում ավարտվել են ընտրանքային մոնիթորինգի աշխատանքները, դիտարկվել են 202 շահառուների ցանքատարածություններ։ Ընտրանքային մոնիթորինգի աշխատանքեր առաջիկայում կիրականացվեն նաև Ախուրյան, Աշոցք և Ամասիա համայնքներում։ Ոռոգման սեզոնի ընթացքում ջրի տրամադրման գործընթացն անխափան իրականացնելու նպատակով մարտ ամսից Շիրակի մայր ջրանցքով կատարվել է ջրի կուտակման աշխատանքներ Կառնուտի ջրամբարում։ Այս պահին մարզի ջրամբարներում առկա է բավականաչափ ջուր ոռոգման աշխատանքներն անխափան շարունակելու համար։

Մարզխորհրդի նիստի օրակարգային վերջին հարցն առնչվել է վարժական հավաքների կազմակերպմանն, ինչպես նաև 2025-ի ամառային զորակոչի ընթացքին։ Ըստ զորահավաքային նախապատրաստության բաժնի պետ Մուշեղ Մարգարյանի զեկույցի, 2025 թվականին մինչ օրս Հայաստանի Հանրապետությունում անցկացված վարժական հավաքների շրջանակում հայտարարված զորակոչերին՝ մարզին ներկայացված պահանջարկը կատարվել է 100 տոկոսով։ 2025 թվականի ամառային զորակոչն ընթացքի մեջ է և ավարտվելու է հուլիսի 30-ին:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

ՀԷՑ-ի պետականացմանն ուղղված օրինագիծն ընդունվեց

Ազգային ժողովը հուլիսի 3-ի նիստում, 65 կողմ, դեմ՝ 27 ձայնով ամբողջությամբ ընդունեց «Քաղաքացիական պայմանագիր» խմբակցության ներկայացրած օրենսդրական փաթեթը, որը փոփոխություններ է նախատեսում «Հանրային ծառայությունները կարգավորող մարմնի մասին» և «Էներգետիկայի մասին» օրենքներում։

Հարցի քննարկման ժամանակ հիմնական զեկուցող Վլադիմիր Վարդանյանը նշել էր, որ էներգետիկ անվտանգության տեսանկյունից սա նշանակում է երաշխավորել, որ էլեկտրաէներգիայի մատակարարումը չխոչընդոտվի, և սպառողները պաշտպանված լինեն նույնիսկ այն դեպքերում, երբ լիցենզավորված կազմակերպություններից որևիցե մեկում լուրջ խախտումներ արձանագրվեն:

Այս համատեքստում նախագծով պետությանը հնարավորություն է տրվում ունենալ արագ արձագանքման կառուցակարգեր, որպեսզի վտանգի բարձր հավանականության դեպքում գործադրվեն կանխարգելիչ միջոցներ:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

ԱԺ-ն առաջին ընթերցմամբ ընդունեց ՀԷՑ-ի պետականացմանը վերաբերող նախագիծը

ՀՀ Ազգային ժողովում քվեարկության դրվեց և առաջին ընթերցմամբ ընդունվեց ԱԺ «Քաղաքացիական պայմանագիր» խմբակցության ներկայացրած՝ ««Հանրային ծառայությունները կարգավորող մարմնի մասին» օրենքում լրացում կատարելու մասին» և ««Էներգետիկայի մասին» օրենքում լրացումներ և փոփոխություններ կատարելու մասին» օրենքների նախագծերի փաթեթն առաջին ընթերցմամբ ընդունելու մասին հարցը:

ՀՀ ԱԺ նախագահ Ալեն Սիմոնյանը հայտնեց՝ ՔՊ խմբակցության բացակայող պատգամավորներ Արթուր Հովհաննիսյանը, Մարիա Կարապետյանը, Լիլիթ Մինասյանը, Սարգիս Խանդանյանը, Արսեն Թորոսյանը թողել են կողմ քվեարկություններ: Կողմ քվեարկեց 65 պատգամավոր, դեմ՝ 30, ձեռնպահ՝ 0 պատգամավոր: Նշենք, որ իշխանությունները ՀԷՑ-ը պետականացնելու մտադրության մասին հայտարարեցին ռուսաստանաբնակ գործարար Սամվել Կարապետյանի կալանավորմանը զուգահեռ։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Մարդու իրավունքների պաշտպանը հանդես է եկել հայտարարությամբ

Պետական իշխանությունը բացառիկ կարևորություն ունի հասարակական կյանքը կանոնակարգելու հարցում։ Միևնույն ժամանակ, Հայ Առաքելական Եկեղեցին առանցքային դերակատարություն ունի բազմաթիվ քաղաքացիների խղճի և կրոնի ազատության իրավունքի իրացման տեսանկյունից։

Մարդու իրավունքների պաշտպանն ընդգծում է, որ թե՛ հասարակական կարգի պահպանումը, թե՛ կրոնական ազատությունների երաշխավորումը հնարավոր են բացառապես հանրային համերաշխության առկայության պայմաններում։ Ուստի, Պաշտպանը կոչ է անում ցուցաբերել առավելագույն զսպվածություն, առաջ եկած խնդիրները լուծել փոխադարձ հարգանքի, իրավունքի գերակայության արժեքների պահպանմամբ՝ հանրային համերաշխության և հանդուրժողականության առանցքային բնույթը նկատի ունենալով։

Միքայել Արքեպիսկոպոս Աջապահյանի նկատմամբ ձերբակալման որոշում է կայացվել

Հայաստանի Մայր աթոռ Սուրբ Էջմիածնի Վեհարանի մուտքի մոտ տևական ժամանակ լարված իրավիճակ էր։ Ազգային անվտանգության ծառայությունը մտել էր Վեհարան, փորձում էին ձերբակալել Միքայել Արքեպիսկոպոս Աջապահյանին։

Հիշեցնենք, հունիսի 26-ին իրավապահները հայտնել էին, որ Աջապահյանի նկատմամբ քրեական վարույթ է նախաձեռնվել «ռազմական հեղաշրջում անելու» հայտարարությունների համար՝ ՀՀ Քրեական օրենսգրքի 422-րդ հոդվածի 2-րդ մասով (իշխանությունը զավթելուն ուղղված հրապարակային կոչեր):

Այդ կապակցությամբ 2025թ. հունիսի 27-ին որոշում է կայացվել ազատության մեջ գտնվող մեղադրյալ Միքայել Արքեպիսկոպոս Աջապահյանի /Գևորգ Արտաշեսի Աջապահյան/ նկատմամբ կալանքը որպես խափանման միջոց կիրառելու նպատակով նրան ձերբակալելու մասին: Որոշման իրագործումը հանձնարարվել է ՀՀ ազգային անվտանգության ծառայությանը։ ՀՀ ազգային անվտանգության ծառայությունը բոլոր քաղաքացիներին հորդորել է զերծ մնալ իրավիճակը լարելուց, չխոչընդոտել իրավապահ մարմինների օրինական որոշումների իրագործմանը: Միքայել Արքեպիսկոպոս Աջապահյանին էլ կոչ է արել չթաքնվել իրավապահ մարմիններից և ներկայանալ իրեն սպասող Ազգային անվտանգության ծառայության օպերատիվ խմբին։

Աջապահյանը բազմաթիվ հոգևորականների և Գարեգին Բ-ի հետ Մայր Աթոռի բակում՝ հավաքված քաղաքացիներին ու լրատվամիջոցների ներկայացուցիչներին փոխանցել է, որ ինքը չի պատրաստվում թաքնվել: «Ես թաքնվող չեմ, ես չեմ թաքնվել, եկել են իմ հետևից, ես կգնամ, ես էս երկրի համար սպառնալիք չեմ»,- նշել է նա:

Ամենայն հայոց կաթողիկոս Գարեգին Բ-ն էլ հավելել է, որ Միքայել արքեպիսկոպոս Աջապահյանին փաստաբանի հետ կուղարկեն, որտեղ պետք է ներկայանա, իսկ ինքն ու մյուս հոգևորականները կգնան վեհարան՝ քննարկումների:

Այնուհետև իրավիճակը լարվել է. հոգևորականներից մի քանիսը հայտարարել են, որ չեն կարող հանգիստ հետևել կամ թույլ տալ, որ Աջապահյանին տանեն: Հրմշտոց է տեղի ունեցել իրավապահների և հոգևորականների միջև:

Շիրակի թեմի առաջնորդը փաստաբանի հետ միասին փորձել է դուրս գալ Մայր Աթոռի տարածքից, սակայն հնարավոր չի եղել։ Շիրակի թեմի առաջնորդ Միքայել արքեպիսկոպոս Աջապահյանի փաստաբանը նշել է, որ ըստ ընթացակարգի՝ վերջինս պետք է ներկայանա Քննչական կոմիտե:

ԱԱԾ ներկայացուցիչները հեռացել են Մայր Աթոռից առանց Շիրակի թեմի առաջնորդի։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Խուզարկել են Շիրակի թեմի առաջնորդարանի շենքը

Առավոտյան ժամը 8 անց կեսից իրավապահները քննչական գործողություններ էին իրականացրել Գյումրիում՝ Շիրակի թեմի առաջնորդարանում։ Ի աջակցություն Սրբազանի, առաջնորդարանի առջև հավաքվել էին մարդիկ, ակտիվիստներ։ Այստեղ էին նաև ԱԺ պատգամավոր Մհեր Մելքոնյանը, Գյումրու ավագանու «Հայաստանի Կոմկուս» և «Մայր Հայաստան» խմբակցությունների անդամներ, կրթության և մշակույթի ներկայացուցիչներ։

Ոստիկանների գործողությունները դրսում կանոնակարգում էր Ոստիկանության Շիրակի մարզային վարչության պետ Արսեն Ոսկանյանը՝ քաղաքացիական հագուստով։ Նա ոստիկանների հետ փորձեց մարդկանց առաջնորդարանի մայթից տեղափոխել ավելի հեռու վայր, սակայն չհաջողվեց։ Քաղաքացիները վիճաբանեցին, հրաժարվելով հեռանալ։

Առաջնորդարանի շենքի դիմացից բերման ենթարկվեց ակտիվիստ Մհեր Խաչատրյանը, ով հեռախոսով տեսալուսանկարահանում էր կատարում։

Արտաշես սարկավագ Աջապահյանը՝Միքայել Արքեպիսկոպոս Աջապահյանի եղբոր որդին, լրագրողներին հայտնեց, որ խուզարկության ժամանակ իրենք փորձել են ներս մտնել, բայց ոստիկանները հոգևորականներին թույլ չեն տվել՝ ասելով, որ իրենցից ներկայացուցիչ կա ներսում։ Բայց ներսում եղել են միայն հավաքարարն ու պահակը, ովքեր, ըստ սարկավագի, պատահական մարդիկ են։ Շիրակի թեմի առաջնորդարանում 2 ու կես ժամ տևած քննչական գործողություններից հետո, ՀՀ ազգային անվտանգության ծառայության աշխատակիցներն ու ոստիկանները հեռացան, իրենց հետ տանելով փաստաթղթերի 2 փաթեթ։ Խուզարկությանը ներկա չէր նաև փաստաբանը։ Փաստաբան Թամարա Յայլոյանի խոսքով, ինքը վաղ առավոտյան համապատասխան փաստաթղթերով 2 անգամ ներկայացել է առաջնորդարան, տեղեկացրել, որ լիազորված է ներկա գտնվել քննչական գործողություններին, բայց ուժային կառույցների ներկայացուցիչները նրան ներս չեն թողել։

Ըստ փաստաբան Յայլոյանի, քննչական գործողությունները ապօրինի են, քանի որ չի կատարվել օրենքի պահանջը և Շիրակի թեմի առաջնորդ Միքայել Արքեպիսկոպոս Աջապահյանի լիազոր ներկայացուցիչները խուզարկությունների ժամանակ ներկա չեն գտնվել։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com