Սև բերդի օտարման գործով նախաքննությունն ավարտվել է
ՀՀ քննչական կոմիտեի հատկապես կարևոր գործերի քննության գլխավոր վարչության ընդհանուր բնույթի և ընտրական հանցագործությունների քննության վարչությունում ավարտվել է ՀՀ ՊՆ նախկին նախարար Ս.Ս.-ի կողմից Գյումրի քաղաքի Սև բերդ ամրոցն օտարելու դեպքի առթիվ նախաձեռնված քրեական վարույթի նախաքննությունը:
Քրեական վարույթի նախաքննության ընթացքում առերևույթ փաստական տվյալներ են ձեռք բերվել այն մասին, որ ՀՀ պաշտպանության նախկին նախարար Ս.Ս.-ն 2005 թվականի մայիսի 11-ին անշարժ գույքի առուվաճառքի պայմանագրով, ուղղակի վաճառքով՝ 22 մլն 951 հզր 500 ՀՀ դրամով ֆիզիկական անձի է օտարել ՀՀ Կառավարության որոշումներից չբխող և դրանցով չնախատեսված հանրապետական նշանակության՝ պատմության և մշակույթի անշարժ հուշարձան հանդիսացող 626.45քմ մակերեսով Գյումրի քաղաքի Սև բերդ ամրոցը և դրա օգտագործման համար նախատեսված 0.7 հա հողամասը:
Նկարագրված գործողությունների արդյունքում էական վնաս է պատճառվել պետության օրինական շահերին՝ անզգուշությամբ առաջացնելով ծանր հետևանքներ, այն է՝ պետությունը կորցրել է հանրապետական նշանակության պատմամշակութային արժեքի նկատմամբ սեփականության իրավունքը և այն չի ընդգրկվել 2007 թվականի մարտի 15-ի թիվ 385-Ն ՀՀ պետական սեփականություն համարվող և օտարման ոչ ենթակա պատմության և մշակույթի անշարժ հուշարձանների պետական ցուցակը հաստատելու մասին ՀՀ կառավարության որոշման կից հավելվածներում։
Նախաքննության ընթացքում հսկող դատախազի որոշմամբ Ս.Ս.-ի նկատմամբ հարուցվել է հանրային քրեական հետապնդում՝ Քրեական օրենսգրքի 441-րդ հոդվածի 2-րդ մասի 5-րդ կետով (պաշտոնատար անձի կողմից իշխանական կամ ծառայողական լիազորությունները կամ դրանցով պայմանավորված ազդեցությունը չարաշահելը կամ լիազորություններն անցնելը, որն անզգուշությամբ առաջացրել է այլ ծանր հետևանք):
Քրեական վարույթը մեղադրական եզրակացությամբ ուղարկվել է հսկող դատախազին:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Ուշագրավ տվյալներ․ովքե՞ր են Գյումրիում օգտվում առողջապահության ապահովագրական համակարգից և ի՞նչ խնդիրներ կան
«Գյումրու երկխոսության մեդիա կենտրոնում» առողջապահական ոլորտի պատասխանատուների, բժշկական հաստատությունների ղեկավարների մասնակցությամբ քննարկվեց Հայաստանի Հանրապետությունում 2026 թվականի հունվարից ներդրված առողջապահության համընդհանուր ապահովագրության գործնական կիրառումը, ովքե՞ր են հիմնականում օգտվում, ո՞ր հիվանդությունների դեպքում են առավել շատ դիմում, ի՞նչ մարտահրավերներ ու բողոքներ կան։
Այս հարցերը պարզաբանեցին Շիրակի մարզպետի աշխատակազմի առողջապահության և սոցիալական հարցերի վարչության պետ Լեյլի Ասլանյանը, Գյումրի բժշկական կենտրոնի տնօրենի պաշտոնակատար Արմեն Խաչատրյանը, Գյումրու Գրիգոր Նարեկացու անվան պոլիկլինիկայի տնօրեն Աստղիկ Բեյբությանը և Էնրիկո Մատտեի անվան պոլիկլինիկայի տնօրեն Արթուր Մանուկյանը։
Բանախոսները շեշտեցին, որ սկզբում եղել են բավական մեծ դժվարություններ․ մեծ հերթեր են առաջացել ու մտավախություն է հնչել, թե ծրագիրը շարունակական բնույթ չի կրի, այժմ կարծես հունի մեջ են ընկել։
Շիրակի մարզպետի աշխատակազմի առողջապահության և սոցիալական հարցերի վարչության պետ Լեյլի Ասլանյանն ասաց․ «Բնականաբար ցանկացած նոր ներդրվող գործընթաց որոշակի հարցեր առաջացնում է, քանի որ գործնական աշխատանքում տարատեսակ հարցեր են առաջանում, և մենք բնականաբար փորձում ենք հստակեցնել և՛ առողջապահության նախարարության համապատասխան մասնագետների հետ և՛ ապահովագրական հիմնադրամի մասնագետների հետ»։
Գյումրի բժշկական կենտրոնի տնօրենի պաշտոնակատար Արմեն Խաչատրյանն էլ նշեց, որ ծրագրի ներդրման սկզբում եղել են որոշակի բարդություններ, ծրագրում մեծ թվով մարդիկ են ընդգրկված, որոնք անվճար օգտվում են առողջապահության անվճար սպասարկումից։ Սկզբում եղել են որոշակի հարցեր՝ մասնավորապես ո՞ր շրջանակն է օգտվելու, ովքե՞ր, խնդիր է եղել առողջապահության առաջնային օղակ-բուժհաստատության համագործակցության հետ կապված, սակայն վեց ամսվա ընթացքում ամենօրյա աշխատանքով աստիճանաբար լուծվել ու լուծվում են ընթացիկ խնդիրները։
Արմեն Խաչատրյանը խոսեց փաստերով․ «Մենք ունեցել ենք 32 հազարից ավելի ամբուլատոր դեպք, դրանք տարբեր հետազոտություններ, խորհրդատվություններ են, պետությունը փոխհատուցել է մոտ 300 միլիոն դրամ։
8 հազարից ավելի ստացիոնար դեպքեր ենք ունեցել, այսինքն՝ վիրահատություն, բուժում և այլն, և դրա դիմաց 1 միլիարդ ու կես գումար է հատկացվել։ Տեսեք՝ ինչ մեծ գումարի ու թվերի մասին ենք խոսում, այդքան մարդ են օգտվում, չեմ ասում 100 տոկոսով, բայց նախկինում այս հնարավորությունը չեն ունեցել, ընդ որում նաև սոցիալական խումբ ունեցող մարդիկ չեն ունեցել այս հնարավորությունը, օրինակ՝ 3-րդ խմբի հաշմանդամը չէր կարող օգտվել այս ամենից, ինչից հիմա է օգտվում։ Կարող եմ ասել՝ լավ թանկարժեք միջամտություններից իրենք օգտվել են։
Էնրիկո Մատտեի անվան պոլիկլինիկայի տնօրեն Արթուր Մանուկյանի կարծիքով էլ, քանի որ նոր գործընթաց էր, բնականաբար սկզբնական շրջանում աժիոտաժ, խառնաշփոթ պետք է լիներ։
«Սկզբնական շրջանում քաղաքացիների հոսքը շատ էր, պոլիկլինիկան աշխատում էր մեծ ծանրաբեռնվածությամբ ու ոչ միայն մեր պոլիկլինիկան, այլ քաղաքի մյուս պոլիկլինիկաները ևս։ Առաջին եռամսյակում բավական ծանրաբեռնված աշխատեցինք, որովհետև մարդկանց մոտ մեծ մտավախություն կար, թե ծրագիրը կավարտվի, ասում էին՝ քանի հասնում է, օգտվենք, հնարավոր է շարունակություն չունենա։
Հետո կամաց-կամաց գործընթացը մտավ հունի մեջ, բուժաշխատողներն էլ հասկացան՝ ինչ ձևով աշխատեն, ինչպես կանոնակարգեն, հերթերի կառավարումն ինչ ձևով անեն։Հիմա ազգաբնակչության մոտ էլ այդ շտապողականությունը, թե «անպայման պիտի օգտվենք, ինձ հասնում է», կամաց-կամաց վերացավ։Հասկանում են, որ ցանկացած հետազոտություն, ցանկացած խորհրդատվություն՝ լինի լաբորատոր կամ գործիքային հետազոտություն, պետք է ունենա հստակ բժշկական ցուցում», -ասաց Արթուր Մանուկյանը։
Նա ևս ամփոփեց կիսամյակը․ մոտ 30 հազար ազգաբնակչություն սպասարկող Էնրիկո Մատտեի անվան պոլիկլինիկան վեց ամիսների ընթացքում՝ հուվարի 1-ից մինչև հուլիսի 1-ն ընկած ժամանակահատվածում մոտ 47 հազար ապահովագրական դեպք է սպասարկել։ Իրենց են դիմել առաջնակի գանգատներով, ինչպես նաև թե՛ քրոնիկ և թե՛ դիսպանսերում հսկվող հիվանդներ, խորհրդատվություններ են կազմակերպվել ու պոլիկլինիկայի նեղ մասնագետների կողմից ուղեգրումներ են տրվել հիվանդներին, որոնցով նրանք վիրահատվել են կամ անցել են թանկարժեք հետազոտություններ, լաբորատոր գործիքային հետազոտություններ։
Այս պոլիկլինիկային ապահովագրության շրջանակում վեց ամսվա ընթացքում կառավարությունը 214 միլիոն դրամ է հատկացրել, երբ նախորդ տարիներին պոլիկլինիկայի ամբողջ բյուջեն այդքան չէր, եռակի անգամ քիչ էր։
Գյումրու Գրիգոր Նարեկացու անվան պոլիկլինիկայի տնօրեն Աստղիկ Բեյբությանն էլ նշեց, որ իրենց պոլիկլինիկայում տարվա կտրվածքով մոտ 43 հազար դեպք են սպասարկել։ Բնակիչները շատ հաճախ սխալ պատկերացում են ունեցել սպասարկման մասին, իրազեկված չեն եղել՝ որտեղից է սկսվելու գործընթացը։ Սկզբում դիմել են Գյումրի բժշկական կենտրոն, հետո պարզել, որ նախ պետք է դիմեին պոլիկլինիկա։ Իսկ այժմ, ըստ բանախոսի, հունի մեջ է ընկել, կարգավորվել է, կարողանում են բնականոն ընթացքով սպասարկել։
Հարց հնչեց՝ եթե քաղաքացին հիվանդանոց է տեղափոխվել շատպօգնության մեքենայով, ապա այս դեպքում նա առողջապահության ապահովագրմամբ է բուժում ստանալո՞ւ, խոսքն այն քաղաքացիների մասին է, որոնք օգտվում են առողջապահության համընդհանուր ապահովագրությունից։
Գյումրի բժշկական կնտրոնի փոխտնօրեն Արմեն Խաչատրյանը պարզաբանեց, որ այս թեման բազում անգամ արծարծվել է․ շտապօգնությամբ տեղափոխվելը մեծամասամբ ո՛չ նախկինում, ո՛չ էլ այժմ պետական պատվերի տակ չի ընկնում։ Ըստ բանախոսի, բացի ապահովագրությունից գործում է նաև «Էմերջենսի» ծրագիր, որը սպասարկում է հստակ աշխտորոշումներ։
Բանախոսը պարզաբանեց՝ ապահովագրություն ունենալու դեպքում բուժառուները նախևառաջ պետք է դիմեն առողջապահության առաջնային օղակին՝ իր ընտանեկան բժշկին, եթե վերջինս հետազոտեց ու զգաց, որ բուժառուն կարիք ունի որոշ հետազոտությունների կամ նեղ մասնագիտական խորհրդատվություների, նրան ուղեգրում է հիվանդանոց։ Իսկ ոչ աշխատանքային ժամի կամ ազատ օրերին շտապօգնության մեքենայով կամ առանց շտապօգնության մեքենայով հիվանդանոց տեղափոխված քաղաքացին եթե անհետաձգելի բուժօգնության կարիք ունի, ապա բացվում է «Էմերջենսի» քարտ, սպասարկվում է դրանով, իսկ աշխատանքային օրերին հիվանդանոցը այն ներկայացնում է ապահովագրությանը։
Լեյլի Ասլանյանը խոսեց բժշկական հաստատությունների ստացած ֆինանսական հոսքերի մասին։
«Ի՞նչ լայն հնարավորություն տվեց առողջապահության ապահովագրական հիմնադրամը ֆինանսական հոսքերի առումով, խոսքս առողջության առաջնային պահպանման օղակի մասին է, հնարավորություն ունեն ինչպես ֆիզիկական միջավայրը բարելավել, որը շատ կարևոր է այսօր, այնպես էլ բուժհաստատությունը հագեցնել լաբորատոր գործիքային հետազոտություններով և սարքավորումներով, որի շնորհիվ կկարողանան ավելի բարձր մակարդակով բուժծառայություններ մատուցել մեր ազգաբնակչությանը։
Մենք Շիրակի մարզպետ պարոն Առուշանյանի հետ ամփոփեցինք առաջին կիսամյակը, միայն առողջության առաջնային պահպանման օղակը ապահովագրության մասով ֆինանսավորվել էր 1 միլիարդ 6 հարյուր հազար դրամով։ Դա հնարավորություն է տալիս մեր բուժհաստատություններին հագեցնել իրենց արսենալը», -ասաց Լեյլի Ասլանյանը։
Իսկ որ տարիքային խումբը ու որ հիվանդությունների դեպքում են քաղաքացիներն առավել շատ դիմում առողջապահության ապահովագրումից օգտվելու համար։
Գյումրի բժշկական կենտրոնի պաշտոնակատար Արմեն Խաչատրյանը տեղեկացրեց՝ 65 տարեկանից բարձր տարիքային խումբն է առավել շատ դիմում իրենց։ Հիմնականում դիմում են կոնքազդրային հոդի էնդոպրոթեզավորման հարցով․ եթե նախկիունմ ամսական 2-3 հոգու էին վիրահատում, ապա այժմ շաբաթական՝ 5-6 հոգու։
Ակնաբուժական ծառայությունից օգտվողների թիվը ևս ավելացել է, կատարախտով տառապող տարեցները, որոնք նախկինում չեն կարողացել անվճար վիրահատվել, այժմ վիրահատվում են։ Սրտի իշեմիկ հիվանդություններ ունեցողները ևս հաճախակի են դիմում, մինչև ապահովագրության ներդրումը նրանք ստենդավորում և կորոնոգրաֆիա անցնելու հնարավորություն չունեին, հիմա ունեն։
«Այն ծառայությունները, որոնք անհասանելի էին նախկինում պետպատվերի շրջանակում, հիմա կարող են օգտվել»,-ասաց Արմեն Խաչատրյանը։
Էնրիկո Մատտեի անվան պոլիկլինիկայի տնօրեն Արթուր Մանուկյանն էլ, պատասխանելով այդ նույն հարցին, ասաց․ «Փորձեցինք վիճակագրություն դուրս բերել, մեր պոլիկլինիկայում կոնկրետ ապահովագրության շրջանակներում կան մարդիկ, որոնք այնպիսի վիրահատությունների են ենթարկվել, օրինակ՝ կարդիոսիմուլյատորի կամ կարդիովերտերի տեղադրում որոնք մինչև 4 միլիոնանոց արժողությամբ վիրահատություններ էին, նույնիսկ ունեինք հաշմանդամություն ունեցող անձինք, օրինակ՝3-րդ խմբի, որոնց համար ասյ վիրահատություններն անհասանելի էին, ապահովագրության շրջանակում կարողացան վիրահատվել»։
Այն, ըստ բանախոսների, ամբողջ աշխարհում ներդրված համակարգ է, բյուջեն ձևավորվում է ինպես պետաթյուն տրամադրած գումարով, այնպես էլ քաղաքացիների ապահովագրավճարներով, այնպես որ մտավախությունը, թե բյուջեն չի բավարարի, գումարը կսպառվի, ըստ նրանց, աբսուրդի ժանրից է։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Քննարկման ամփոփում․ առողջապահության համընդհանուր ապահովագրություն. հիմնական արդյունքներն ու խնդիրները
«Գյումրու երկխոսության մեդիա կենտրոնում» առողջապահության ոլորտի պատասխանատուների և բժշկական հաստատությունների ղեկավարների մասնակցությամբ քննարկվեց 2026 թվականի հունվարից Հայաստանում ներդրված առողջապահության համընդհանուր ապահովագրության գործնական կիրառումը։ Բանախոսներն անդրադարձան համակարգի առաջին վեց ամիսների արդյունքներին, առավել հաճախ օգտվող խմբերին, ֆինանսական ազդեցությանը, ինչպես նաև առկա խնդիրներին և մարտահրավերներին։
Քննարկմանը մասնակցում էին Շիրակի մարզպետի աշխատակազմի առողջապահության և սոցիալական հարցերի վարչության պետ Լեյլի Ասլանյանը, Գյումրի բժշկական կենտրոնի տնօրենի պաշտոնակատար Արմեն Խաչատրյանը, Գյումրու Գրիգոր Նարեկացու անվան պոլիկլինիկայի տնօրեն Աստղիկ Բեյբությանը և Էնրիկո Մատտեի անվան պոլիկլինիկայի տնօրեն Արթուր Մանուկյանը։
Սկզբնական դժվարությունները հաղթահարվել են
Բանախոսների գնահատմամբ՝ համակարգի ներդրման առաջին ամիսներին քաղաքացիների մեծ հոսքի պատճառով առաջացել էին հերթեր և կազմակերպչական խնդիրներ։ Շատերի մոտ նաև մտավախություն կար, որ ծրագիրը կարող է կարճաժամկետ լինել, ինչի հետևանքով մարդիկ շտապում էին հնարավորինս արագ օգտվել ծառայություններից։ Առաջին ամիսներին հերթերն ու խառնաշփոթը հաղթահարվել են:
Շիրակի մարզպետի աշխատակազմի առողջապահության և սոցիալական հարցերի վարչության պետ Լեյլի Ասլանյանի խոսքով՝ ցանկացած նոր համակարգի ներդրում անխուսափելիորեն առաջացնում է գործնական հարցեր, որոնք լուծվում են առողջապահության նախարարության և Առողջապահության ապահովագրության հիմնադրամի հետ ամենօրյա համագործակցության միջոցով։
Ավելի քան 32 հազար ամբուլատոր և 8 հազար ստացիոնար դեպք
Գյումրի բժշկական կենտրոնի տնօրենի պաշտոնակատար Արմեն Խաչատրյանի ներկայացմամբ՝ առաջին վեց ամիսների ընթացքում.
իրականացվել է ավելի քան 32 հազար ամբուլատոր սպասարկում, որոնց դիմաց պետությունը փոխհատուցել է մոտ 300 միլիոն դրամ,
գրանցվել է ավելի քան 8 հազար ստացիոնար բուժման դեպք, որոնց համար հատկացվել է շուրջ 1,5 միլիարդ դրամ։
Նրա խոսքով՝ համակարգի շնորհիվ բազմաթիվ քաղաքացիներ, այդ թվում՝ նախկինում պետպատվերից դուրս մնացած սոցիալական խմբերը, հնարավորություն են ստացել օգտվելու թանկարժեք բուժօգնությունից և վիրահատություններից։
47 հազար ապահովագրական դեպք՝ մեկ պոլիկլինիկայում
Էնրիկո Մատտեի անվան պոլիկլինիկայի տնօրեն Արթուր Մանուկյանը տեղեկացրեց, որ շուրջ 30 հազար բնակչություն սպասարկող պոլիկլինիկան վեց ամսվա ընթացքում սպասարկել է մոտ 47 հազար ապահովագրական դեպք։
Քաղաքացիներն օգտվել են ինչպես առաջնային բժշկական խորհրդատվություններից, այնպես էլ լաբորատոր, գործիքային հետազոտություններից, նեղ մասնագիտական խորհրդատվություններից և վիրահատությունների ուղեգրումներից։
Պոլիկլինիկան ապահովագրության շրջանակում վեց ամսում ստացել է 214 միլիոն դրամ, մինչդեռ նախորդ տարիներին ամբողջ տարվա բյուջեն այդքան չէր կազմել։
Գրիգոր Նարեկացու անվան պոլիկլինիկայում՝ շուրջ 43 հազար դեպք
Պոլիկլինիկայի տնօրեն Աստղիկ Բեյբությանի խոսքով՝ տարվա առաջին կիսամյակում սպասարկվել է մոտ 43 հազար դեպք։
Նա նշեց, որ սկզբնական շրջանում քաղաքացիները հաճախ տեղեկացված չէին, թե ապահովագրական գործընթացը սկսվում է ընտանեկան բժշկից և պոլիկլինիկայից, ինչի պատճառով անմիջապես դիմում էին հիվանդանոց։ Այժմ այդ գործընթացը կարգավորվել է։
Ինչպե՞ս է գործում շտապօգնության դեպքում
Քննարկման ընթացքում հնչեց հարց, թե արդյոք շտապօգնության մեքենայով հիվանդանոց տեղափոխված քաղաքացին ապահովագրության շրջանակում բուժում ստանում է։
Արմեն Խաչատրյանը պարզաբանեց, որ անհետաձգելի դեպքերում գործում է նաև «Էմերջենսի» ծրագիրը։ Եթե բուժառուն ունի ապահովագրություն, ապա աշխատանքային օրերին բուժհաստատությունը համապատասխան փաստաթղթերը ներկայացնում է ապահովագրական հիմնադրամին։
Ավելի մեծ ֆինանսական հնարավորություններ բուժհաստատությունների համար
Լեյլի Ասլանյանի խոսքով՝ առողջապահության համընդհանուր ապահովագրության ներդրումը զգալիորեն մեծացրել է բուժհաստատությունների ֆինանսական հնարավորությունները։
Նրա տեղեկացմամբ՝ միայն Շիրակի մարզի առողջության առաջնային պահպանման օղակը 2026 թվականի առաջին կիսամյակում ապահովագրության շրջանակում ֆինանսավորվել է 1 միլիարդ 600 միլիոն դրամով։ Այդ միջոցները հնարավորություն են տալիս բարելավել բուժհաստատությունների նյութատեխնիկական բազան, համալրել սարքավորումները և բարձրացնել մատուցվող ծառայությունների որակը։
Ովքե՞ր են առավել հաճախ օգտվում ապահովագրությունից
Արմեն Խաչատրյանի խոսքով՝ առավել ակտիվ օգտվողները 65 տարեկանից բարձր քաղաքացիներն են։
Ամենապահանջված ծառայություններից են.
կոնքազդրային հոդի էնդոպրոթեզավորում,
կատարակտի վիրահատություններ,
սրտի իշեմիկ հիվանդությունների բուժում,
ստենդավորում և կորոնոգրաֆիա։
Նրա խոսքով՝ նախկինում պետպատվերով անհասանելի բազմաթիվ ծառայություններ այժմ հասանելի են դարձել ապահովագրության շնորհիվ։
Արթուր Մանուկյանը հավելեց, որ իրենց պոլիկլինիկայի ուղեգրումներով իրականացվել են նաև մինչև 4 միլիոն դրամ արժողությամբ կարդիոսիմուլյատորի և կարդիովերտերի տեղադրման վիրահատություններ, որոնցից օգտվել են նաև 3-րդ խմբի հաշմանդամություն ունեցող քաղաքացիներ։
Քննարկման ավարտին բանախոսներն ընդգծեցին, որ առողջապահության համընդհանուր ապահովագրությունը երկարաժամկետ համակարգ է, որը գործում է աշխարհի բազմաթիվ երկրներում։ Նրանց խոսքով՝ համակարգի ֆինանսավորումը ձևավորվում է ինչպես պետական միջոցներից, այնպես էլ ապահովագրավճարներից, ուստի մտավախությունները, թե միջոցները կարող են սպառվել, հիմնավորված չեն։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Վարդան Ղուկասյանի կալանքը փոխարինվեց տնային կալանքով և 15 մլն դրամ գրավով
Հակակոռուպցիոն դատարանն այսօր քննեց Գյումրու քաղաքապետ Վարդան Ղուկասյանի նկատմամբ ընտրված խափանման միջոցի հարցը։
Հանրային մեղադրողը միջնորդել էր ևս երեք ամսով երկարաձգել Ղուկասյանի կալանքի ժամկետը՝ նշելով, որ վարույթի շրջանակում առաջիկայում կարող են նոր հանգամանքներ ի հայտ գալ։
Դատարանը, սակայն, որոշեց Վարդան Ղուկասյանի նկատմամբ կիրառված կալանքը փոխարինել տնային կալանքով՝ միաժամանակ սահմանելով 15 մլն դրամի չափով գրավ։
Հիշեցնենք, որ Հակակոռուպցիոն կոմիտեում քննվող քրեական վարույթի շրջանակում 2025 թվականի հոկտեմբերի 20-ին քննչական գործողություններ էին իրականացվել Գյումրու քաղաքապետարանում։ Դրանից հետո խոշոր չափերով կաշառք ստանալու և կաշառք տալու վերաբերյալ գործով կալանավորվել էին Գյումրու քաղաքապետ Վարդան Ղուկասյանը և քաղաքապետարանի գլխավոր ճարտարապետը։
Ըստ ներկայացված մեղադրանքի՝ Վարդան Ղուկասյանը, զբաղեցնելով Գյումրի համայնքի ղեկավարի պաշտոնը, համայնքի գլխավոր ճարտարապետի պաշտոնը զբաղեցրած Հենրիկ Գասպարյանի հետ Սևակ Գոմցյանի օգտին հովանավորչություն, թողտվություն և այլ ապօրինի գործողություններ կատարելու համար պահանջել է խոշոր չափերով՝ 4 մլն դրամ կաշառք։
Քննչական մարմնի տվյալներով՝ նա նաև մի խումբ պաշտոնատար անձանց հետ նախնական համաձայնությամբ կատարել է պաշտոնական կեղծիք։
Ավելի ուշ Վարդան Ղուկասյանին նոր մեղադրանք էր ներկայացվել նաև դատական նիստերից մեկի ավարտից հետո կատարած արտահայտությունների առնչությամբ։
Մեղադրանքի ապացուցման դեպքում նրան կարող է սպառնալ մինչև տասը տարվա ազատազրկում։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Բյուրեղավան համայնքում աղիքային վարակի դեպքեր են արձանագրվել
Բյուրեղավան համայնքում աղիքային վարակի դեպքեր են արձանագրվել: Հանրապետական շտապօգնության ծառայությունը գիշերվա ընթացքում ստացել է 15 կանչ, որից 6-ն ավարտվել է հոսպիտալացումով: Հիմնական աշխատնիշները` ինքնազգացողության վատացում, ջերմության բարձրացում, որովայնի շրջանում ցավ:
Հոսպիտալացվածների առողջական վիճակը բժիշկները գնահատում են միջին ծանրության: Ստանում են անհրաժեշտ բուժօգնություն:
Առողջապահության նախարարության «Հիվանդությունների վերահսկման և կանխարգելման ազգային կենտրոնի» մասնագետներն իրականացնում են անհրաժեշտ համաճարակաբանական ուսումնասիրությունները և հակահամաճարակային միջոցառումները։
Այս պահին կատարվում են դեպքերի համաճարակաբանական հետազոտություն, նմուշառում և լաբորատոր հետազոտություններ՝ հիվանդության հավանական աղբյուրը և փոխանցման գործոնները պարզելու նպատակով։
Լաբորատոր և համաճարակաբանական հետազոտությունների արդյունքների ամփոփումից հետո կտրամադրվի լրացուցիչ տեղեկատվություն աղիքային վարակի պատճառի վերաբերյալ։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
🏥 «Առողջության համընդհանուր ապահովագրությունը՝ գործնականում. ովքե՞ր և ինչպե՞ս են օգտվում»
Քննարկման ամբողջական տեսագրությունը՝
YouTube
Քննարկման ընթացքում անդրադառձել ենք
ովքե՞ր են ընդգրկվում համակարգում, ի՞նչ բժշկական ծառայություններ է ներառում ապահովագրական փաթեթը, ինչպե՞ս է գործում վճարման մեխանիզմը, ի՞նչ իրավունքներ և հնարավորություններ ունեն քաղաքացիները, որքանո՞վ են Շիրակի մարզի բուժհաստատությունները պատրաստ համակարգի լիարժեք իրականացմանը, ի՞նչ խնդիրների են բախվում առողջապահական հաստատությունները։
Բանախոսներ՝
Լեյլի Ասլանյան — ՀՀ Շիրակի մարզպետի աշխատակազմի առողջապահության և սոցիալական ոլորտի հարցերի վարչության պետ Արմեն Խաչատրյան — «Գյումրի» բժշկական կենտրոնի փոխտնօրեն Արթուր Մանուկյան — Էնրիկո Մատտեի անվան պոլիկլինիկայի տնօրեն Աստղիկ Բեյբության — Գյումրու Սուրբ Գրիգոր Նարեկացու անվան պոլիկլինիկայի տնօրեն
«Երկխոսություն» մեդիա կենտրոն
Միացե՛ք քննարկմանը՝ առողջության համընդհանուր ապահովագրության համակարգի գործարկման, քաղաքացիների իրավունքների և առողջապահական հաստատությունների պատրաստվածության մասին հստակ ու գործնական պատասխաններ ստանալու համար։
ENG
Universal Health Insurance in Practice: Who Is Covered and How Can They Benefit? The discussion will address: who is covered by the system, which medical services are included in the insurance package, how the payment mechanism works, what rights and opportunities citizens have, how prepared healthcare institutions in the Shirak region are for the full implementation of the system, what challenges healthcare institutions are currently facing. Speakers: Leyli Aslanyan — Head of the Health and Social Affairs Department of the Shirak Governor’s Office Armen Khachatryan — Deputy Director of Gyumri Medical Center Artur Manukyan — Director of the Enrico Mattei Polyclinic Astghik Beybutyan — Director of the Gyumri Saint Gregory of Narek Polyclinic Dialogue Media Center Join the discussion to learn more about the implementation of universal health insurance, citizens’ rights and opportunities, and the preparedness of healthcare institutions in the Shirak region.
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Գյումրու ավագանու նիստը կայացավ առանց «ՔՊ» խմբակցության մասնակցության
Գյումրու ավագանու նիստը մեկնարկեց առանց «Քաղաքացիական պայմանագիր» խմբակցության մասնակցության։ Խմբակցությունն ամբողջ կազմով բացակայում էր նիստից։ Սա արդեն երկրորդ դեպքն է, երբ «ՔՊ»-ականները բոյկոտում են ավագանու նիստը։
Այս անգամ, սակայն, անհրաժեշտ քվորումն ապահովվեց, և նիստին մասնակցող չորս խմբակցությունները հաստատեցին ավագանու նոր կանոնակարգը։
Նիստի օրակարգում ընդգրկված էր 37 հարց, այդ թվում սուբվենցիոն ծրագրի շրջանակում Գյումրու 48 փողոցների և մեկ հրապարակի վերանորոգման նպատակով կառավարությանը հայտ ներկայացնելու հարցը։
Նիստի ընթացքում «Մեր քաղաքը» խմբակցության ղեկավար Լիզա Գասպարյանը քաղաքապետի պաշտոնակատար Ավետիս Առաքելյանից հետաքրքրվեց քաղաքի փողոցներում դիտահորերի կափարիչների անհետացման խնդրով։
Նա նշեց, որ բաց դիտահորերի մոտ անվադողեր են տեղադրվում, որպեսզի անցորդներն ու վարորդները կարողանան նկատել վտանգը, սակայն այդ վիճակի պատճառով քաղաքը «մի տեսակ խրամատ է հիշեցնում»։
Ավետիս Առաքելյանը պատասխանեց, որ ավելի քան մեկ ամիս է՝ քաղաքում դիտահորերի կափարիչների համատարած գողություններ են արձանագրվում։ Նա նշեց, որ քաղաքային իշխանությունները համապատասխան գործողություններ են իրականացրել և բազմիցս նոր կափարիչներ տեղադրել։ Խնդրի վերաբերյալ գրություններ են ուղարկվել նաև իրավապահ մարմիններին՝ հորդորելով առավել աչալուրջ լինել և զբաղվել դեպքերի բացահայտմամբ։
Նրա խոսքով՝ կատարվողը պատահականություն չէ, այլ նպատակաուղղված և միտումնավոր գողություն, որի համար մեղավորները պետք է պատասխանատվության ենթարկվեն։ Քաղաքապետի պաշտոնակատարը նաև հույս հայտնեց, որ գողություն կատարողները կպատժվեն՝ հիշեցնելով «փոս փորողն ինքն է փոսն ընկնում» ասացվածքը։
Գյումրու քաղաքապետի առաջին տեղակալ, քաղաքապետի պաշտոնակատար Ավետիս Առաքելյանը, որը Վարդան Ղուկասյանի փեսան է, լրագրողների հետ ճեպազրույցի ընթացքում անդրադարձավ նաև պատգամավորական մանդատը ստանձնելու հնարավորությանը։ Նա նշեց, որ դեռ ժամանակ ունի որոշելու՝ վերցնելու է մանդատը, թե ոչ։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Մարտի 1-ի գործով ոստիկանության նախկին պետի վերաբերյալ վարույթը վերադարձվել է նախաքննության
2008 թվականի մարտի 1-2-ին Երևան քաղաքում տեղի ունեցած իրադարձությունների վերաբերյալ նախաձեռնված քրեական վարույթի շրջանակում, դատախազը, սեփական նախաձեռնությամբ, 2026 թվականի ապրիլի 18-ին, հանրային քրեական հետապնդում է հարուցել ՀՀ ԿԱ ոստիկանության նախկին պետ Հ.Հ.-ի նկատմամբ՝ 18.04.2003 թվականին ընդունված Քրեական օրենսգրքի 38-309-րդ հոդվածի 2-րդ մասով (պաշտոնատար անձի կողմից պաշտոնեական լիազորություններն անցնելուն օժանդակելը, որը զուգորդվել է բռնություն, զենք կամ հատուկ միջոցներ գործադրելով) և 315-րդ հոդվածի 2-րդ մասով (պաշտոնեական անփութություն, որն անզգուշությամբ առաջացրել է մարդու մահ կամ այլ ծանր հետևանքներ):
Քրեական վարույթով պարզվել է, որ Հ.Հ.-ն, 2003 թվականից մինչև 2008 թվականի մայիսի 29-ը զբաղեցնելով ՀՀ Կառավարությանն առընթեր ոստիկանության պետի պաշտոնը, իրականացնելով ՀՀ ոստիկանության ընդհանուր ղեկավարումը, 2008 թվականի մարտի 1-ին անցնելով իր պաշտոնեական լիազորությունները, ՀՀ ոստիկանության այլ բարձրաստիճան պաշտոնատար անձանց հետ հանցակցությամբ կազմակերպել է ոստիկանության տարբեր ստորաբաժանումների կողմից բռնության և հատուկ միջոցների գործադրմամբ զուգորդված Երևան քաղաքի «Ազատության» հրապարակում նստացույց անող խաղաղ ցույցը ցրելը, ցուցարարներին հրապարակից բռնության գործադրմամբ հարկադրաբար հեռացնելը, ապա քաղաքի կենտրոնական հատվածներում նրանց կուտակումները, հնարավոր ցույցերն ու հավաքները բացառելը, որպիսի գործողություններով անձանց իրավունքներին և օրինական շահերին, ինչպես նաև հասարակության և պետության օրինական շահերին պատճառվել է էական վնաս:
Ոստիկանության պետի պաշտոնը զբաղեցրած Հ.Հ.-ին առաջադրված մյուս մեղադրանքի հիմքում դրված է այն հանգամանքը, որ Հ.Հ.-ն, որպես ոստիկանության պետական կառավարման մարմնի ղեկավար, պարտավոր լինելով սահմանված կարգով Հայաստանի Հանրապետության կառավարության քննարկմանը ներկայացնել ոստիկանության գործունեությանն ու աշխատանքի կազմակերպմանը վերաբերող նորմատիվ իրավական ակտերի նախագծեր և առաջարկություններ, այդ թվում՝ «Չերյոմուխա 7» արցունքաբեր և «Զարյա» լուսաձայնային և այլ հատուկ միջոցների կիրառման կարգը, չի կատարել այդ պարտականությունը:
Հաշվի առնելով, որ Հ.Հ.-ն 2019 թվականին մահացել է, նրա նկատմամբ հանրային քրեական հետապնդում հարուցելու մասին որոշումը հանձնվել է օրինական ներկայացուցչին՝ վերջինիս կնոջը:
Հ.Հ.-ի կինն առարկել է, որպեսզի մեղադրյալի մահվան հիմքով Հ.Հ.-ի նկատմամբ հանրային քրեական հետապնդումը դադարեցվի:
Հսկող դատախազի կողմից թիվ 62202608 քրեական վարույթից անջատված թիվ 62292726 քրեական վարույթի նյութերը վերադարձվել են վարույթ իրականացնող մարմնին՝ Հակակոռուպցիոն կոմիտեին՝ մեղադրական եզրակացությամբ նախաքննությունն ավարտելու ուղղությամբ միջոցներ ձեռնարկելու համար:
Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ Քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
«Ներառականությունը՝ մեդիայի, արվեստի և կրթության լեզվով»
Հայկական Կարիտասի «Նպաստել Հայաստանում բոլորի համար ներառական և համապատասխան որակյալ կրթության կայացմանը» ծրագրի շրջանակներում անցկացվեց երկօրյա դասընթաց՝ լրագրողների, դերասանների, ուսանողների և Շիրակի ՏՄԱԿ-ի աշխատակիցների մասնակցությամբ։
«Ներառականության զգայուն լուսաբանում, հանրային ընկալումների ձևավորում և խնդիրների վերհանում» թեմայով դասընթացը համախմբել էր շուրջ երեք տասնյակ մասնակիցների, ովքեր հնարավորություն ունեցան ծանոթանալու համընդհանուր դիզայնի սկզբունքներին, ուսումնասիրելու հաշմանդամություն և հատուկ կարիքներ ունեցող անձանց հետ հաղորդակցման զգայուն լեզուն, էթիկական մոտեցումները և ներառական հաղորդակցության հիմնական սկզբունքները։
Գործնական պարապմունքների և փորձառական վարժությունների միջոցով մասնակիցները հայտնվեցին տարբեր իրավիճակներում՝ փորձելով սեփական փորձառության միջոցով հասկանալ և հաղթահարել այն խոչընդոտները, որոնց ամեն օր բախվում են հաշմանդամություն ունեցող մարդիկ։ Դասընթացի ընթացքում կազմակերպվեցին իրավիճակային քննարկումներ, ինչպես նաև հանդիպումներ իրական պատմությունների և փորձառությունների կրող մարդկանց հետ, որոնց հետ մասնակիցները բաց և անկաշկանդ միջավայրում քննարկեցին հասարակության մեջ առկա կարծրատիպերը, նախապաշարմունքներն ու ներառման ճանապարհին առկա մարտահրավերները։
Դասընթացի երկրորդ օրը տարբեր մասնագիտական ոլորտներ ներկայացնող մասնակիցներից ձևավորված խառը թիմերը մշակեցին և ներկայացրին մեդիա և արվեստի ոլորտներում ներառականության խթանմանն ուղղված իրենց գաղափարներն ու նախաձեռնությունները։
Երկօրյա դասընթացի արդյունքում ստեղծվեցին ներառականության գաղափարը հանրայնացնող և տարածող տարբեր մեդիա և ստեղծագործական արտադրանքներ՝ պայուսակներ, ստիկերներ, դրոշմապիտակներ, օրացույցներ, հումորային ծաղրանկարներ, ինչպես նաև բեմադրվեց ներառական ֆորում-թատրոն։
Դասընթացի կարևոր արդյունքներից մեկը մասնակիցների միջև մասնագիտական կապերի ամրապնդումն ու հետագա համագործակցության հիմքերի ստեղծումն էր։ Մասնակիցները պայմանավորվեցին ձևավորել ներառականության ոլորտում գործող միջոլորտային համագործակցության ցանց, որը կհամախմբի մեդիայի, արվեստի, կրթության և հոգեկան առողջության ոլորտների ներկայացուցիչներին՝ համատեղ նախաձեռնությունների և հանրային իրազեկման գործողությունների իրականացման նպատակով։
Դասընթացի հիմնական նպատակներն էին՝
նպաստել ներառականության թեմայի զգայուն և պատասխանատու լուսաբանմանը,
ձևավորել ներառականության վերաբերյալ ավելի իրազեկ և դրական հանրային ընկալումներ,
բարձրացնել տարբեր մասնագիտական խմբերի կարողությունները հաշմանդամություն ունեցող անձանց իրավունքահեն ներկայացման և հաղորդակցության ոլորտում,
խթանել մեդիայի և արվեստի միջոցով հասարակական կարծրատիպերի հաղթահարումը,
ստեղծել մասնագիտական համագործակցության և փոխգործակցության կայուն ցանց՝ ներառականության օրակարգը համատեղ առաջ մղելու համար։
Ծրագիրը շարունակական բնույթ է կրում և ներառում է մի շարք խոշոր հանրային նախաձեռնություններ։ Դրանցից են ներառականության թեմայով սթրիթ արտի ստեղծումը հանրային տարածքում, ինչպես նաև համագործակցությունը դրամատիկական թատրոնի հետ՝ ներառականության թեմայով թատերական ներկայացման բեմադրման նպատակով։ Այս նախաձեռնությունները միտված են արվեստի և մշակույթի լեզվով նպաստելու հասարակական վերաբերմունքի փոփոխությանը, կարծրատիպերի հաղթահարմանը և ավելի ներառական համայնքների ձևավորմանը։
Ծրագիրը ֆինանսավորվում է Գերմանիայի Տնտեսական զարգացման և համագործակցության դաշնային նախարարության և Կարիտաս Գերմանիայի կողմից։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
🔎«Ապատեղեկատվության դեմ պայքարի և փաստահեն լրագրության մարտահրավերները»
📅 Հուլիսի 10-ին «Գյումրու առաջընթաց» ՔՀԶԿ ՀԿ-ում տեղի ունեցավ հանդիպում-քննարկում՝ կազմակերպված «Երևանից անդին․ փաստահեն մամուլ մարզային համայնքների համար» ծրագրի շրջանակում։
🤝 Ծրագիրը Դանիական New Democracy Fund-ի և **Երևանի մամուլի ակումբի** համատեղ նախաձեռնությունն է։ Այն նպատակ ունի զարգացնել մարզային լրատվամիջոցների և քաղաքացիական հասարակության ներկայացուցիչների կարողությունները, նվազեցնել ապատեղեկատվության նկատմամբ նրանց խոցելիությունը և տարածել փաստահեն լրագրության գործիքները։
http://facebook.com/reel/775332855642300/?s=single_unit
💬 Քննարկման ընթացքում անդրադարձ կատարվեց՝
🔹 Ազգային ժողովի ընտրությունների լուսաբանման արդյունքներին և հետևություններին,
🔹 հետընտրական Հայաստանում ձևավորված ապատեղեկատվական միջավայրին,
🔹 փաստահեն և մեդիագրագետ լրագրության սկզբունքներին,
🔹 ներմարզային համագործակցության հնարավորություններին։
📌 Ծրագրի նպատակներն ու հիմնական ուղղությունները ներկայացրեց Երևանի մամուլի ակումբի ծրագրերի տնօրեն Վիգեն Սարգսյանը։
🎙️ Բանախոսություններով հանդես եկան՝
▫️ Երևանի մամուլի ակումբի ծրագրի պատասխանատու Տաթևիկ Հովհաննիսյանը,
▫️ Երևանի մամուլի ակումբի նախագահ Արթուր Պապյանը,
▫️ Մեդիա նախաձեռնությունների կենտրոնի մեդիագրագիտության ծրագրի տնօրեն Անի Եղիազարյանը։
👥 Հանդիպմանը մասնակցում էին լրատվամիջոցների և հասարակական կազմակերպությունների ներկայացուցիչներ, լրագրողներ, ինչպես նաև Շիրակի մարզպետի աշխատակազմի հանրային կապերի պատասխանատուն։
#ՓաստահենԼրագրություն #Մեդիագրագիտություն #Ապատեղեկատվություն #Գյումրի #ԵրևանիՄամուլիԱկումբ #NewDemocracyFund
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com