Հարավային Աֆրիկան ձյունով է ծածկվել. որոշ շրջանների համար հայտարարվել է նարնջագույն նախազգուշացում
Սեպտեմբերի 21-ին Հարավային Աֆրիկայում առատ ձյուն է տեղացել, ինչի հետևանքով երթևեկության խցանումներ է առաջացել Յոհանեսբուրգը Դուրբանին կապող N3 գլխավոր մայրուղում: Հարյուրավոր մեքենաներ են արգելափակվել:
Տեղ-տեղ ձյան ծածկույթի հաստությունը հասել է երկու մետրի, ինչն իրական փորձություն է եղել փրկարար ծառայությունների համար։
Հարավաֆրիկյան օդերեւութաբանական ծառայությունը ձյան տեղումներն անվանել է «բացառիկ իրադարձություն» և նախազգուշացրել հետագա տեղումների հնարավորության մասին։ Մի քանի շրջանների համար նարնջագույն նախազգուշացում է հայտարարվել:
Սպասվում է, որ ձյունառատ եղանակը կշարունակվի մի քանի օր։
Հեռ. ՝ +37498 691-690; Էլ. Փոստ ՝ progressgyumringo@gmail.com
Իրանում հանքի պայթյունի հետևանքով զոհերի թիվն ավելացել է. հայտարարվել է 3-օրյա սուգ
Հարավային Խորասանի Թաբաս քաղաքի ածխահանքում երեկ երեկոյան տեղական ժամանակով ժամը 21:00-ի սահմանում Madanjo ընկերության հանքավայրում տեղի է ունեցել մեթան գազի պայթյուն։ Պայթյունի պահին հանքում աշխատել է 69 մարդ:
Իրանական Mehr գործակալության տեղեկությամբ, Իրանի Հարավային Խորասան նահանգում 3-օրյա սուգ է հայտարարվել ածխահանքում գազի պայթյունի հետևանքով 52 հանքափորի զոհվելու կապակցությամբ։
Հեռ. ՝ +37498 691-690; Էլ. Փոստ ՝ progressgyumringo@gmail.com
Հայկական եռագույնով լուսավորվեց Հունաստանի Ալեքսանդրուպոլիսը
Հայկական եռագույնով լուսավորվեց Հունաստանի Ալեքսանդրուպոլիսը։ Այս մասին հայտնում են Հունաստանում ՀՀ դեսպանությունից։
«Արձագանքելով Հունաստանում Հայաստանի դեսպանությանը՝ Ալեքսանդրապոլիսի քաղաքապետարանը լուսավորվեց հայկական եռագույնով՝ ի նշանավորում Հայաստանի անկախության 33-րդ տարեդարձի և երկու ժողովուրդներին միավորող մշակութային ու պատմական ամուր կապերի»,- տեղեկացնում են դեսպանությունից։
Հեռ. ՝ +37498 691-690; Էլ. Փոստ ՝ progressgyumringo@gmail.com
Ֆրանսիայի նոր կառավարության կազմում հայազգի նախարարներ կան
Շաբաթ երեկոյան հրապարակվել է Ֆրանսիայի նոր կառավարության կազմը: 39 նախարարական նշանակում է եղել:
Այս մասին հայտնել են ֆրանսիական լրատվամիջոցները:
Ֆրանսիայի արտաքին գործերի նախարարության նոր ղեկավար է դարձել Ժան-Նոել Բարոն, ով նախկինում զբաղեցրել է եվրոպական հարցերով նախարար-պատվիրակի պաշտոնը, իսկ Ստեֆան Սեժուրնեն կզբաղեցնի Եվրահանձնակատարի պաշտոնը:
Սեբաստիան Լեկորնուն մնացել է պաշտպանության նախարարի պաշտոնում: Անտուան Արմանը դարձել է ֆինանսների նախարար:
«Ձախ»-երից միայն մեկ քաղաքական գործիչ է պաշտոն ստացել կառավարությունում՝ Դիդյե Միգոտը նշանակվել է արդարադատության նախարար։
Ֆրանսիայի նոր կառավարությունում ընդգրկված են երկու հայազգի նախարարներ: Աստրիդ Փանոսյան-Բուվեն նշանակվել է աշխատանքի և զբաղվածության, իսկ Գիյոմ Գասպարյանը՝ քաղաքացիական ծառայության, հանրային գործունեության պարզեցման և վերափոխման նախարար։
Հեռ. ՝ +37498 691-690; Էլ. Փոստ ՝ progressgyumringo@gmail.com
Ամեն օր Անկախության հանրաքվե է, և մեզնից յուրաքանչյուրն իր ընտրությունն անում է ամեն օր․ Նիկոլ Փաշինյանի ուղերձը
ՀՀ վարչապետ Նիկոլ Փաշինյանը շնորհավորական ուղերձ է հղել ՀՀ անկախության 33-րդ տարեդարձի առթիվ։ Դրանում ասված է․
«Սիրելի՛ ժողովուրդ,
Հայաստանի Հանրապետության սիրելի՛ քաղաքացիներ.
Սեպտեմբերի 21-ը Հայաստանի Հանրապետության Անկախության օրն է, և այսօր մենք նշում ենք Հայաստանի Հանրապետության անկախության 33-րդ տարեդարձը: 1991 թվականի այս օրը Հայաստանում տեղի ունեցավ Անկախության հանրաքվե, որի ընթացքում քաղաքացիներն ընտրական տեղամասեր էին գնում՝ պատասխանելու քվեաթերթիկի վրա գրված հետևյալ հարցին. «Համաձա՞յն եք, որ Հայաստանի Հանրապետությունը լինի անկախ, ժողովրդավարական պետություն ԽՍՀՄ կազմից դուրս»: Այն ժամանակ ընտրական իրավունք ունեցող քաղաքացիների 95 տոկոսը «Այո» պատասխանեց հարցին, և Հայաստանի Հանրապետությունը դարձավ անկախ պետություն:
Այդ օրվանից մեր երկիրն անցել է բազում փորձությունների միջով՝ պատերազմներ, հազարավոր զոհեր, շրջափակում, տնտեսական և քաղաքական ճգնաժամեր, արտագաղթ, որոնց հետևանքով մենք ավելի առարկայորեն հասկացանք, որ 1991-ին հանրաքվեի դրված հարցը պատասխանի կարիք ունի ամեն օր, և այդ հարցին մենք պետք է պատասխանենք ոչ միայն ընտրական տեղամասում քվեաթերթիկի վրա նշում անելով, այլև մեր վարքով, բարքով ու գործունեությամբ:
Հայաստանի Հանրապետության Կառավարության գործունեության առանցքն ու նպատակը 1991 թվականի հանրաքվեի դրված հարցին ամեն օր գործնականորեն «Այո» պատասխանելն է, և պիտի գոհունակությամբ արձանագրեմ, որ մեր երկրի անկախության մակարդակն օր օրի աճում է ժողովրդավարության, բալանսավորման և բալանսավորված արտաքին քաղաքականության շնորհիվ:
2018 թվականի Ժողովրդական, ոչ բռնի, թավշյա հեղափոխությունից ի վեր մեր բոլոր որոշումների ուղենիշը եղել է և շարունակում է մնալ անկախությունը, պետականությունը, ժողովրդավարությունը, այդ հասկացությունների կոնկրետացումը և առարկայացումը միջազգային կանոնների հիման վրա:
Այս գործընթացում թույլ ենք տվել սխալներ, ունեցել ենք ձախողումներ, բայց 2020 թվականին անկախության կորստի եզրին հասնելով՝ Իրական Հայաստանի ռազմավարությամբ ստացել ենք մեր պետության հարատևության տեսական թեզը գործնական ռելսերի վրա դնելու իրական հնարավորություն:
Սիրելի՛ ժողովուրդ,
Հայաստանի Հանրապետության սիրելի՛ քաղաքացիներ,
Երեկ էլ, այսօր էլ, վաղն էլ Անկախության հանրաքվե է: Ամեն օր Անկախության հանրաքվե է, և մեզնից յուրաքանչյուրն իր ընտրությունն անում է ամեն օր: Հանրաքվեի դրված հարցին ամեն օր պատասխանում է օրենքով սահմանված հարկերը վճարող (Այո) և հարկերը թաքցնող (Ոչ) յուրաքանչյուր ոք, ազնվորեն գործող (Այո) և կաշառք վերցնող (Ոչ) յուրաքանչյուր պաշտոնյա, աշխատող (Այո) և աշխատանքին քամահրանքով վերաբերվող (Ոչ) ամեն անհատ, օրենքը հարգող (Այո) և օրենքի խախտումն ինքնահաստատման միջոց համարող (Ոչ) ցանկացած մարդ:
Խոնարհվում եմ այն մարդկանց առաջ, ովքեր «Այո» են ասել և «Այո» են ասում Անկախության հանրաքվեում, սիրում եմ այդ մարդկանց և հպարտանում եմ նրանցով: Եվ ներողություն եմ խնդրում բոլոր այն ակնհայտ և հնարավոր սխալների համար, որ գործել ենք և, մեր մեջ ասած, դեռ կշարունակենք գործել, որովհետև մարդը սխալական է:
Կարևոր է ոչ մի րոպե, ոչ մի վայրկյան տեսադաշտից բաց չթողնել առանցքային նպատակը՝ Անկախությունը, պետականությունը, Հայաստանի Հանրապետությունը, որպես իր միջազգայնորեն ճանաչված 29 հազար 743 քառակուսի կիլոմետր տարածքում սեփական քաղաքացիների անվտանգությունը, ազատությունը, բարեկեցությունն ապահովելու հարթակ ու մեխանիզմ:
Փա՛ռք նահատակներին և կեցցե՛ Հայաստանի Հանրապետությունը:
Եվ կեցցե՛ն մեր երեխաները, որ ապրելու են Ազատ և Երջանիկ Հայաստանում:
Շնորհավորում եմ բոլորիս Հայաստանի Հանրապետության Անկախության տոնի առիթով»։
Հեռ. ՝ +37498 691-690; Էլ. Փոստ ՝ progressgyumringo@gmail.com
Սեպտեմբերի 20-ին Ջաջուռի մոտ ընտանիքի երեք անդամների մահվան պատճառ դարձած վթարի վարույթով մեղադրյալը ձերբակալվել է
Հեռ. ՝ +37498 691-690; Էլ. Փոստ ՝ progressgyumringo@gmail.com
Սպիտակ-Գյումրի ճանապարհին մեքենաներ են բախվել․ կան տուժածներ
Սեպտեմբերի 20-ին՝ ժամը 19։47-ին, Լոռու մարզային փրկարարական վարչության ճգնաժամային կառավարման կենտրոն ահազանգ է ստացվել, որ Սպիտակ-Գյումրի ավտոճանապարհին՝ Արևաշող գյուղի մոտակայքում, տեղի է ունեցել ՃՏՊ՝ կա արգելափակված քաղաքացի․ անհրաժեշտ է փրկարարների օգնությունը։
Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից երկու մարտական հաշվարկ։ Պարզվել է, որ բախվել են VAZ-2106 (վարորդ՝ Դ․ Ա․, ծնված 1992 թ․) և VAZ-2107 (վարորդ՝ Է․ Ա․, ծնված 1997 թ․) մակնիշների ավտոմեքենաները։
Փրկարարները VAZ-2106 մակնիշի ավտոմեքենայից դուրս են բերել ուղևոր Է․ Խ․-ին, վարորդ Դ․ Ա․-ին և մոտեցրել շտապօգնությանը, ովքեր հոսպիտալացվել, իսկ VAZ-2107 մակնիշի ավտոմեքենայի վարորդը պարեկային ծառայության ավտոմեքենայով՝ տեղափոխվել են բժշկական կենտրոն, որտեղ բժիշկները Է․ Ա-ի առողջական վիճակը գնահատել են բավարար, Է․ Խ․-ինը միջին ծանրության, իսկ Դ․ Ա․-ինը՝ ծանր։
Փրկարարները հոսանքազրկել են ավտոմեքենաները, սահմանազատել տարածքը և կատարել ավտոճանապարհի լվացման աշխատանքներ։
Հեռ. ՝ +37498 691-690; Էլ. Փոստ ՝ progressgyumringo@gmail.com
Ալեքսանդրա Գրիգորյանը նվաճեց Ծանրամարտի երիտասարդների աշխարհի առաջնության բրոնզե մեդալ
Եվրոպայի չեմպիոն Ալեքսանդրա Գրիգորյանը նվաճեց Իսպանիայում անցկացվող ծանրամարտի աշխարհի երիտասարդական առաջնության բրոնզե մեդալը 55 կգ քաշայինների երկամարտում՝ հավաքելով 191 կգ։
Պոկում վարժությունում Ալեքսանդրա Գրիգորյանը 81 կգ արդյունքով գրավեց 7-րդ տեղը, հրում վարժությունում նա նվաճեց փոքր արծաթե մեդալ՝ ցույց տալով 191 կգ արդյունք։
Չեմպիոնի կոչումը նվաճեց Չինական Տայպեյի ներկայացուցիչ Գուան-Լին Չենը՝ 217 կգ (98+119): Երկրորդ տեղը գրավեց կոլումբացի Խելեն Տորես Գոմեսը՝ 192 կգ (89+103)։
Հեռ. ՝ +37498 691-690; Էլ. Փոստ ՝ progressgyumringo@gmail.com
ԵՄ-ն կարող է ժամանակավոր կասեցնել Վրաստանի հետ ազատ վիզային ռեժիմը
Եվրամիությունը պատրաստ է արձագանքել Վրաստանում տեղի ունեցող զարգացումներին. եթե «Վրացական երազանքը» շարունակի ներկայիս քաղաքականությունը, ապա ԵՄ-ն կդիտարկի բոլոր տարբերակները, ներառյալ՝ վիզային ռեժիմի ազատականացման ժամանակավոր կասեցումը: Այդ մասին գրել է Politico պարբերականը՝ վկայակոչելով Եվրահանձնաժողովի խոսնակ Պետեր Ստանոյին:
«ԵՄ-Վրաստան վիզային ռեժիմի ազատականացման երկխոսության և գործողությունների համապատասխան ծրագրի շրջանակում Վրաստանը պարտավոր էր կատարել որոշակի չափանիշներ, այդ թվում՝ ապահովել մարդու հիմնարար իրավունքների պաշտպանությունը և խտրականության կանխարգելումը»,- պարբերականի փոխանցմամբ՝ ասել է Ստանոն:
Համաձայն 2017 թվականին ստորագրված վիզային ռեժիմի ազատականացման մասին համաձայնագրի՝ Վրաստանի քաղաքացիները կարող են տարվա մեջ մինչև երեք ամիս անցկացնել ԵՄ-ում՝ առանց վիզա ստանալու անհրաժեշտության:
Հեռ. ՝ +37498 691-690; Էլ. Փոստ ՝ progressgyumringo@gmail.com
Ինչու է ՀՀ-ում էլեկտրաէներգիայի 1 Կվտ գինն ավելի թանկ, քան տարածաշրջանի երկրներում. ՀԾԿՀ նախագահի պարզաբանումը
Ազգային ժողովում «Քաղաքացիական պայմանագիր» խմբակցության նախաձեռնած՝ էլեկտրաէներգիայի խնդիրների մասին աշխատանքային քննարկման ժամանակ պատգամավոր Սերգեյ Բագրատյանը թվարկեց տարածաշրջանի երկրների էլեկտրաէներգիայի 1 Կվտ գինը՝ դոլարով արտահայտված:
Ըստ այդմ՝ Իրան՝ 0,002 դոլար, Ղրղզստան՝ 0,013 դոլար, Ուզբեկստան՝ 0,023 դոլար, Ադրբեջան՝ 0,047 դոլար, Թուրքիա՝ 0,048 դոլար, Ղազախստան՝ 0,049 դոլար, ՌԴ՝ 0,059 դոլար, Ուկրաինա՝ 0,064 դոլար, Վրաստան՝ 0,074 դոլար, Հայաստան՝ 0,0113 դոլար: Պատգամավորը հետաքրքրվեց՝ այս բոլոր երկրների էլեկտրաէներգիայի 1 կիլովատի գինն ինչո՞ւ է ավելի էժան, քան Հայաստանում է:
«Այս բոլոր երկրների «մոնոպոլիաների» գինը ինչո՞ւ է Հայաստանի «մոնոպոլիայից» էժան»,- հետաքրքրվեց Բագրատյանը:
ՀԾԿՀ նախագահ Գարեգին Բաղրամյանը պարզաբանեց՝ եթե ուզում ենք մոնոպոլ դիրքը համեմատել տարածաշրջանի սակագների հետ, ուրեմն պետք է համեմատենք, թե մենք ինչ ենք սահմանել որպես բաշխման սակագին. «Որովհետև եթե մեր վերջնական սակագները՝ ՀԷՑ-ի համար սահմանված, ինչ-որ մեկի համար թանկ են թվում, ինքն արդեն ավելի ազատ է: Ցանկացած սպառող ազատ է՝ դուրս գալու շուկա և գտնելու էլեկտրաէներգիա:
Բայց որ մեր էլեկտրաէներգիան ավելի թանկ է ստացվում, դա ավելի խոր խնդիրներից է. դա նրանից է, որ տարածաշրջանի ենթակառուցվածքները դեռևս ամբողջապես բացված չեն: Մեր ազատ շուկան լիարժեք կգործի, երբ կունենանք հաստատուն կապ Վրաստանի հետ, կկարողանանք դուրս գալ ԵԱՏՄ շուկա, ԵՄ շուկա՝ Վրաստանով: Բայց երբ մենք դեռևս ունենք սահմանափակ ենթակառուցվածք Վրաստանի հետ, ընդամենը մոտ 100 Մվտ ենք առևտուր անում, բնականաբար, այդ ազատ շուկան իր ամբողջ էֆեկտը չի տալիս»:
ՀԾԿՀ նախագահը խոսեց նաև էլեկտրաէներգիայի ներկրման մասով քննարկված հնարավորությունների մասին, օրինակ, ուսումնասիրվել է ԵԱՏՄ շուկան, և պարզվել է, որ ղազախական շուկայում կարող են այնպիսի ամիսներ լինեն, որ հնարավոր լինի էլեկտրաէներգիա ներկրել:
«Այսինքն՝ եթե տարածաշրջանային շուկաները բացված լինեին, մենք ազատ շուկաների տված հնարավորությունները կօգտագործեինք»,- ասաց նա:
Հեռ. ՝ +37498 691-690; Էլ. Փոստ ՝ progressgyumringo@gmail.com