Տեսանյութեր

Գյումրիում սպասվում է թեժ ընտրապայքար

Սեպտեմբերի 12-ին, ժամը 18-ին ավարտվեց Գյումրիում կայանալիք ՏԻՄ ընտրություններին մասնակցության հայտ ներկայացնելու գործընթացը: Այսպիսով, թիվ 31 ՏԸՀ-ում առաջադրվել է 10 քաղաքական ուժ` որից 3-ը դաշինք է, 7-ը կուսակցություն:

«Բալասանյան դաշինք» սոցիալական կուսակցությունը ներկայացրել է ավագանու 42 հոգանոց ցուցակ, որը գլխավորում է Վարդգես Սամսոնյանը: Կուսակցությունն առայժմ չի շտապում անելիքների մասին խոսել, առաջիկայում մտադիր է հանդես գալ մամլո ասուլիսով:

Իրենց ծրագրերի մասին բարձրաձայնելու և  առաջադրված թեկնածուների մասին մամլո ասուլիսի միջոցով են պատրաստվում խոսել նաև Հայաստանի Հանրապետական կուսակցության համամասնական ցուցակի ներկայացուցիչները: Առայժմ հայտնի է, որ ցուցակը գլխավորում է Արտյոմ Ղուկասյանը:

«Քաղաքացիական պայմանագիր» կուսակցությունը Գյումրիում առաջադրել է 40 հոգանոց համամասնական ցուցակ, որի առաջին հորիզոնականում Շիրակի մարզպետ Հովհաննես Հարությունյանն է:

Թե ինչ կարգախոսով կմասնակցի «Քաղաքացիական պայմանագիր»-ն այս ընտրություններին, դեռևս չեն շտապում բարձրաձայնել:

Իր թիմակիցների հետ,  17+5 բանաձևով է Գյումրու ՏԻՄ ընտրություններին մասնակցելու «Թասիբով» դաշինքը, որն առաջադրել է 22 հոգանոց համամասնական ընտրացուցակ:

Թե ինչու են դաշինքը Թասիբով անվանել , իր հետաքրքիր բացատրությունն ունի:

Դաշինքում ընդգրկված են ամենատարբեր մասնագիտության տեր մարդիկ, նշում է ցուցակի առաջատար Կարապետ Պողոսյանը, նրանք հիմնականում երիտասարդներ են:

Ռակ և «Ժառանգություն» կուսակցությունների միավորման արդյունքում ստեղծված  «Հայրաքաղաք»  դաշինքի 28 հոգանոց համամասնական ցուցակում էլ գերակշռողը երիտասարդներ են:

Գյումրիում դեռևս չունեն, բայց առաջիկայում  գրասենյակներ հիմնելու  և թիմ ձևավորելու մտադրություն ունի «Զարթոնք» ազգային քրիստոնեական կուսակցությունը: «Զարթոնք»-ը Գյումրիում առաջադրել է ավագանու  անդամության 41 թեկնածու, իսկ ցուցակի առաջատարը Վարդևան Հակոբյանն է: Վերջինս այսօր Գյումրիից բացակայում էր:

Կոմունիստական կուսակցությունը Գյումրիում թեև վաղուց է ինչ գրասենյակ ունի, բայց  առայժմ չի շտապում ակտիվ գործունեություն ծավալել,  նշում են, որ  այս կուսակցությանը մարդիկ նոր չէ որ պիտի ճանաչեն:

Դեռ նախորդ ընտրությունների ընթացքում Գյումրիում հիմնված «Արժանապատիվ ուղի» կուսակցության ցուցանակը դեռ պահպանված է, բայց կուսակցության առաջնորդ Հովհաննես Մարգարյանի հետ կապ հաստատել այսօր չհաջողվեց: Նա գլխավորում է կուսակցության  22 հոգանոց համամասնական ցուցակը:

«Գյումրին կռնա» նորաստեղծ դաշինքն այս ընտրություններին առաջադրվելով ավելի գլոբալ խնդիր է մտադիր լուծել, կարծում է, համամասնական ցուցակը գլխավորող Վարդան Սրտաշյանը: Երկրի առջև ծառացած խնդիրների լուծումն առաջարկվում է սկսել հենց Գյումրիից:

«Ապրելու երկիր» կուսակցությունն էլ է որոշել մասնակցել Գյումրու ՏԻՄ ընտրություններին և որպես քաղաքապետի թեկնածու առաջադրել Կարեն Մալխասյանին:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru

Անձնագրի վավերականության ժամկետը լրացած քաղաքացիները ՏԻՄ ընտրություններում չեն ընդգրկվի ցուցակներում

Այն անձինք, որոնց անձնագրի վավերականության ժամկետը լրացել է, առաջիկա ՏԻՄ ընտրությունների համար չեն ընդգրկվի ընտրական ցուցակներում: Այս մասին ասաց ԿԸՀ նախագահ Տիգրան Մուկուչյանը՝ անդրադառնալով «Հայաստան» խմբակցությունից Գեղամ Նազարյանի հարցին: Տիգրան Մուկուչյանի խոսքով՝ խնդիրն, ըստ էության, ավելի շատ ոչ թե վերաբերում է ցուցակների մաքրմանը, այլ՝ ցուցակների կազմման մեթոդաբանությանը: Այսօր ցուցակները կազմելու համար անհրաժեշտ է, որ անձը լինի ՀՀ քաղաքացի, ունենա հաշվառում ՀՀ-ում: «Վերջին փոփոխությունների համաձայն, որը կիրառվելու է այս ՏԻՄ ընտրություններում, բոլոր այն քաղաքացիները, որոնց անձնագրի վավերականության ժամկետը լրացել է, չեն ներգրավվի այդ ցուցակներում: Եթե տարբեր հիմքերով ցանկանում ենք սահմանափակել ընտրական ցուցակներում անձանց ընդգրկումը, հետևաբար, պետք է ուղղակիորեն փոխենք ցուցակների կազմման մեթոդաբանությունը: Այսօր սահմանադրական օրենքը սահմանել է որոշակի կարգ, թե ովքեր պետք է մտնեն այդ ցուցակներ, և այդ կարգին համապատասխան էլ ձևավորվում են ընտրական ցուցակները»,-ասել է Մուկուչյանը: Նա հավելել է, որ, սակայն, ընտրական օրենսդրությունը սահմանել է նաև բավականին լայն գործիքակազմ՝ այդ ամենը լիարժեք վերահսկելու, տեսնելու, մասնավորապես՝ ցուցակների՝ ըստ տեղամասերի հրապարակումը, դրանց՝ որոնման հնարավորությամբ մշտապես հրապարակված լինելը ԿԸՀ կայքում, ընտրություններից հետո ստորագրված ցուցակների հրապարակումը: ԿԸՀ նախագահը նշել է, որ եթե կորոշվի որևէ այլ մեթոդաբանությամբ կազմել այդ ցուցակները՝ լիազոր մարմինն այդ կերպ կկազմի, սակայն այսօրվա օրենսդրությունը դրանց վերահսկողությունը լիարժեք հնարավոր է դարձնում և ընդծել՝ այս ընտրությունների ժամանակ մի մասով լուծումն արդեն կլինի, սահմանված է, որ անվավեր անձնագրերով քաղաքացիների տվյալները չեն լինելու այդ ցուցակներում:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru

Մինչ օրս 6 քաղաքական ուժ է դիմել

Հոկտեմբերի 17-ին Գյումրիում կայանալիք ՏԻՄ ընտրություններին մասնակցության հայտ ներկայացնելու հարցում քաղաքական ուժերն ակտիվություն սկսեցին ցուցաբերել, սահմանված ժամկետի վերջին օրերին միայն: Այսօր թիվ 31 ՏԸՀ իր փաստաթղթերը ներկայացրեց Ռամկավար Ազատական և «Ժառանգություն» կուսակցությունների կողմից ստեղծված «Հայրաքաղաք» դաշինքը, որի համամասնական ցուցակը գլխավորում է Գյումրու ավագանու անդամ Լևոն Բարսեղյանը:

«Հայրաքաղաք» դաշինքն այս ընտրություններին է ներկայանում 28 հոգանոց համամասնական ցուցակով:

Նորաստեղծ դաշինքի համասնական ցուցակում հիմնականում երիտասարդներ են ընդգրկված, իսկ անվան հարցում երկար չեն մտածել:

Մինչև աշխատանքային օրվա ավարտը տարածքային հանձնաժողովին իր փաստաթղթերը հանձնել շտապեցին նաև Հայաստանի կոմունիստական կուսակցության անդամները: Նրանց 20 հոգանոց ցուցակը գլխավորում է  ՀԿԿ գյումրու քաղաքային կոմիտեի 2-րդ քարտուղար Կոնստանտին Ղավազյանը:

Այսօր առաջիկա ՏԻՄ ընտրություններին մասնակցելու հայտ էին ներկայացրել նաև «Զարթոնք» ազգային քրիստոնեական և «Արժանապատիվ ուղի» կուսակցությունները: Վերջինիս ցուցակը գլխավորում է նույն կուսակցության հիմնադիր Հովհաննես Մարգարյանը: Ընդհանուր հաշվով  մինչ օրս ընտրություններին մասնակցելու համար փաստաթղթեր է ներկայացրել  6 քաղաքական ուժ:

Տեխնիկական խնդիր առաջացավ նաև «Հայրաքաղաք» դաշինքի փաստաթղթերը ներկայացնելիս: Թիվ 31 ՏԸՀ-ը դաշինքից պահանջում էր ԿԸՀ ներկայացնել փաթեթի սքանավորված տարբերակը, մինչդեռ ինչպես պարզվեց կարիք կար ներկայացնել միայն համամասնական ցուցակի սքանավորված տարբերակները:

Մինչ օրս ընտրատարածքային հանձնաժողովին իր փաստաթղթերն է ներկայացրել նաև «Գյումրին կռնա» նորաստեղծ դաշինքը», որը նպատակ ունի հենց Գյումրիից սկսել Հայկական Երազի իրականացումը և Գյումրիում ամբողջացնել հոգևոր-արժեքային տաճարի կառուցումը:

Դաշինքի համամասնական ցուցակի առաջին հորիզոնականում Վարդան Սրտաշյանն է, բայց դաշինքի քաղաքապետի թեկնածուն Վարդան Գրիգորյանն է:

Ավելի վաղ ընտրատարածք էր դիմել նաև «Բալասանյան դաշինք» սոցիալական կուսակցությունը: Թեկնածուների առաջադրման համար վերջնաժամկետը սեպտեմբերի 12-ին, ժամը 18-ն է:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru

4 մլրդ դրամի ծրագիրը Գյումրիում չի ներառի պատմական շինությունների վերականգնում

Տուրիզմի զարգացման հեռանկարով Գյումրիում կշարունակվի Կումայրի պատմական միջուկի ենթակառուցվածքների հիմնանորոգումը: Հայաստանի զարգացման հիմնադրամի եւ Համաշխարհային բանկի ֆինանսավորմամբ առաջիկա 2 տարում նախատեսվում է ավելի քան 4 մլրդ դրամի աշխատանք կատարել հիմնականում Սլաբոդկա թաղամասում: Այս անգամ էլ նախապատվությունը կտրվի փողոցների շինարարությանը: Կապիտալ կնորոգվի 7 փողոց, նաեւ ամենափրկիչ եկեղեցուն հարակից պուրակը` շատրվաններով:
Գյումրիի պատմական միջավայրի վերականգնումն ընդգրկում է միայն ենթակառուցվածքները, առանց հիմնարար լուծում տալու քաղաքի ստորգետնյա դատարկությունների` քյարիզների վերակառուցման խնդրին: Դրանց քարտեզները չկան, մասնագետների ձեռքի տակ քյարիզների տեղակայման միայն մոտավոր պատկերն է, ինչը բավարար չէ եւ 30 տարի շարունակ սա լուրջ խնդիր է ստեղծում քաղաքի կառուցապատման գործում:
Շինաշխատանքների ժամանակ քյարիզ հայտնաբերելու դեպքում են այն միայն ներառում նախագծային ծրագրերում: Կապիտալ շինարարության այս մեծ ծրագիրը, ըստ Գյումրիի գլխավոր ճարտարապետի, թաղամասի ամբողջական վերականգնման խնդիր չի լուծի, պատմական նշանակության շենքերի ամրացումը շարունակում է պետական ծրագրերից դուրս մնալ:
Մոտ 1 դարյա պատմություն ունեցող Չերազի 19 շենքը դիմակայել է Գյումրիի բոլոր երկրաշարժերին: Փաստաթղթերով վթարայնության 3-րդ աստիճան ունի, բայց բնակիչները վստահ ասում են, որ տարեցտարի շենքի ամրությունն ավելի է պակասում: Կառույցի պատմական նշանակությունը գնահատողներն առայժմ միայն զբոսաշրջիկներն են:
Կումայրի պատմական տարածքում 88-ի երկրաշարժից վթարային մոտ 20 բազմաբնակարան շենք կա, որոնց վթարայնության աստիճանը գնալով աճում է: 30 տարում դրանց ամրացման հերթ այդպես էլ չհասավ, հիմա էլ խնդրի լուծումը բնակիչների ուսերին է դրվել:
Ըստ Գյումրիի գլխավոր ճարտարապետի, բնակարանների սեփականատերերին պետական մակարդակով աջակցելու ծրագիր երբեւէ չի էլ քննարկվել, պատմական շինությունների վերականգնումն ամբողջությամբ մասնավորի խնդիրն է համարվում: Ու եթե սեփականատերը միջոցներ չունի կառուցապատելու, ապա քանդված շինությունը տարիներով մնում է որպես ավերակ: Քաղաքի կենտրոնում նման շենքերը քիչ չեն: Օրինակը Գյումրիում հայտնի ֆաբրիկանտի շենքն է: 19-րդ դարի պատմական կառույցը 30 տարի քանդվում ու ավերվում էր:
Նոր սեփականատերն է այժմ շինարարություն սկսել, շինությունը կամ հյուրատուն կդառնա, կամ սպասարկման օբյեկտ: Ոչ հեռվում էլ Գյումրիի քաղաքապետարանի ենթակայության նախկին գրադարանի շենքն է, որտեղ հարդարման աշխատանքներից հետո հիմնվելու է քանդակագործ Ֆրիդ Սողոյանի թանգարան-ցուցասրահը: Ընդհանուր առմամբ, Սլաբոդկա թաղամասի կառուցապատման այս ծրագրից հետո վերակառուցված կլինի Կումայրի պատմական միջուկի ընդամենը 10 տոկոսը:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com; progressgyumri@mail.ru