Yearly Archives:2023

Շիրակի մարզային փրկարարական վարչության ճգնաժամային կառավարման կենտրոն դեկտեմբերի 29-ին, ժամը 10:45-ին ահազանգ է ստացվել, որ Գյումրի քաղաքի Բուլվարալին թաղամասից Մուշ թաղամաս տանող ճանապարհին՝ ֆուտբոլի ակադեմիայի հարևանությամբ, պատ է փլուզվել, փլատակների տակ քաղաքացի կա. անհրաժեշտ է փրկարարների օգնությունը։

Այս մասին հաղորդագրություն է տարածել ՀՀ ՆԳՆ փրկարար ծառայությունը։ Դեպքի վայր է մեկնել ՆԳՆ ՓԾ մարզային փրկարարական վարչության հրշեջ-փրկարարական ջոկատից մեկ մարտական հաշվարկ: Պարզվել է, որ փլուզվել է ֆուտբոլի ակադեմիայի հետնամասի պարսպից մոտ 25 մ հատված, քաղաքացի Ն․ Մ․-ն (ծնված 1955 թ.) հայտնվել է փլատակների տակ և տեղում մահացել: Փրկարարները սահմանազատել են տարածքը, փլատակներից դուրս բերել քաղաքացու դին և մոտեցրել դի տեղափոխող ավտոմեքենային։

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Շիրակի մարզպետ Մուշեղ Մուրադյանի գլխավորությամբ այսօր տեղի է ունեցել Շիրակի մարզի խորհրդի տարեվերջյան նիստը։ Մինչ օրակարգային հարցերին անցնելը՝ Շիրակի մարզպետը նշել է, որ 2023-ի դրական ու ամենասպասված լուրն իր համար եղել է Խծաբերդից գերեվարված շիրակցի տղաների վերադարձը, որը հնարավոր է դարձել ՀՀ կառավարության բանակցությունների արդյունքում։ Օրակարգային առաջին հարցն առնչվել է մարզի համայնքների բյուջեների սեփական եկամուտների 2023 թվականի կատարման արդյունքներին։ Ֆինանսական վարչության պետ Լիպարիտ Մարտիրոսյանի զեկույցի համաձայն, սեփական եկամուտները կատարվել են 95.4 տոկոսով, ամենաբարձրը պետական տուրքերն են գանձվել, ամենացածրը՝ անշարժ գույքի հարկը։ Նախորդ տարվա համեմատ 2023-ին սեփական եկամուտների պլանային շեմը բարձրացվել է՝ 38,2 տոկոսով, 2022-ի համեմատ փաստացի հավաքագրումների թիվն աճել է 39․3 տոկոսով։ 2023 թվականին մարզում փաստացի իրականացված սուբվենցիոն ծրագրերի և 2024 թվականի համար ներկայացված ամբողջական փաթեթների վերաբերյալ տեղեկատվություն ներկայացրել է զարգացման ծրագրերի մշակման և իրականացման բաժնի պետ Կարեն Բադիշյանը։ Շիրակի մարզում 2023 թվականին իրականացվել են 6 մլրդ 843 մլն 500 հազար դրամի սուբվենցիոն ծրագրեր, որից 53.6 տոկոսը կազմում է ՀՀ կառավարության ներդրումը, տեղեկացրել է Շիրակի մարզպետի աշխատակազմի զարգացման ծրագրերի մշակման և իրականացման բաժնի պետ Կարեն Բադիշյանը։ Սուբվենցիոն ծրագրերի շնորհիվ, վերջին տարիներին մարզի համայնքներում լուծվել են տարիների ընթացքում կուտակված խնդիրները։ Գյումրիում, ծրագրի արդյունքում, հիմնանորոգվել է 8185 մ երկարությամբ ճանապարհ, 700 շահառու օգտվել է «Բազմաբնակարան շենքերի ընդհանուր բաժնային սեփականության գույքի նորոգում, այդ թվում՝ էներգախնայող միջոցառումների կիրառում» սուբվենցիոն ծրագրից, որի շրջանակներում հիմնանորոգվել է 3 բազմաբնակարան շենքերի 16389 քմ մակերեսով տանիք։ Ձեռք է բերվել նաև 7 միավոր տեխնիկա և 200 գույք (նստարան և աղբաման), վերանորոգվել է 11 սոցիալական բնակարան, Ասլամազյան քույրերի պատկերասրահի փայտե պատշգամբը, Ստեփան Ալիխանյանի անվան տիկնիկային թատրոնի շենքը և տանիքը։

Ծրագրեր իրականացվել են նաև մարզի մյուս համայնքներում։ «2024 թվականի համար ՀՀ տարածքային կառավարման և ենթակառուցվածքների նախարարություն է ներկայացվել տնտեսական և սոցիալական ենթակառուցվածքների զարգացմանն ուղղված 36 սուբվենցիայի ամբողջական փաթեթ՝ 156 ենթածրագրերով։ Ծրագրերի ընդհանուր նախահաշվային գումարը կազմում է 9 մլրդ 96 մլն դրամ, պետական բյուջեից համաֆինանսավորման չափաբաժինը կազմում է 4 մլրդ 889 մլն դրամ՝ 53.8 տոկոս»,-նշել է Բադիշյանը: Քաղաքաշինության բնագավառում պետական բյուջեի միջոցներով և այլ ֆինանսական աղբյուրներով Շիրակի մարզում 2023 թվականին իրականացվել են շուրջ 19 միլիարդ 612 միլիոն դրամ գումարի շինարարական աշխատանքներ։ Այդ գումարի շրջանակներում իրականացվել են չորս բնակելի շենքերի, կրթական, մշակութային և մարզական օբյեկտների, միջպետական հանրապետական և մարզային տեղական նշանակության ավտոմոբիլային ճանապարհահատվածների, մասնավոր ներդնողների կողմից անհատական բնակելի և հասարակական շենքերի կառուցման հիմնանորոգման և վերանորոգման աշխատանքներ: 2022 թվականի համեմատությամբ ներդրումների ծավալն աճել է շուրջ 4 միլիարդ 412 միլիոն դրամով՝ 22,5 %-ով, տեղեկացրել է ՀՀ Շիրակի մարզպետի աշխատակազմի քաղաքաշինության, հողաշինության և ենթակառուցվածքների կառավարման վարչության պետ Խաչատուր Խնձրցյանը:

Անդրադառնալով ՀՀ Շիրակի մարզում ճանապարհաշինության ոլորտում իրականացված աշխատանքներին պատասխանատուն տեղեկացրեց, որ Հայաստանի Հանրապետության տարածքային կառավարման և ենթակառուցվածքների նախարարության պատվիրատվությամբ մարզում իրականացվել են ութ ճանապարհաշինական ծրագրեր, որից վեցը՝ 49.9 (7,5 կմ ավարտվել է) կմ երկարությամբ շուրջ 5.0 միլիարդ դրամ գումարի շրջանակներում գտնվում են ավարտական փուլում։ Եւս երկու ճանապարհաշինական ծրագրերի՝ 15.9 կմ երկարությամբ շուրջ 2.3 միլիարդ դրամ ավարտը նախատեսվել է 2024 թվականին: Հայաստանի տարածքային զարգացման հիմնադրամի պատվիրատվությամբ մարզում իրականացվում է վեց ճանապարհաշինական ծրագրեր՝ 7.6 կմ երկարությամբ շուրջ 2.8 միլիարդ դրամ գումարով։ Աշխատանքներն ընթացքի մեջ են: Շարունակվում է նաև Եվրոպական ներդրումային բանկի աջակցությամբ իրականացվող Հյուսիս-հարավ միջանցքի զարգացման վարկային ծրագիր՝ Տրանշ-3 Լանջիկ Գյումրի 23.0 կմ երկարությամբ միջպետական նշանակության ավտոմոբիլային ճանապարհի կառուցման աշխատանքները։ 2023 թվականին սկսվեց նաև «Ջրային ռեսուրսների համատեղված կառավարում Ախուրյան գետ, փուլ 1» ծրագրի շրջանակներում Կապսի ջրամբարի կառուցման աշխատանքները։ Շինարարական աշխատանքներն իրականացնում է չինական «Շանսի Քոնսթրաքշն Ինվեսթմենթ Գրուպ Կո» և «Շանսի Հայդրոլիկ Քոնսթրաքշն Ինջինիրինգ Բյուրո» համատեղ ձեռնարկությունը։ Ծրագրի շրջանակում վերաբնակեցվելու է Ջրաձոր գյուղն ամբողջությամբ։ ՀՀ Շիրակի մարզպետի միջնորդությամբ ՀՀ կառավարության որոշմամբ ՀՀ Շիրակի մարզպետի աշխատակազմին հատկացվել է 115 մլն 926 հազար դրամ գումար մարզի չորս դպրոցների շենքերի նորոգման ու ջեռուցման համակարգերի կառուցման աշխատանքներին: «2024 թվականին մարզի ութ բնակավայրերում՝ Սարատակ, Ամասիա, Ջրափի, Շիրակավան, Երազգավորս, Մայիսյան, Փոքր Մանթաշ և Սառնաղբյուր կսկսվեն նաև նոր դպրոցական շենքերի կառուցման աշխատանքները։ Հայաստանի տարածքային զարգացման հիմնադրամի կողմից ութ դպրոցական շենքերի կառուցման համար արդեն հայտարարվել են մրցույթներ, որոնք կայացել են 2023 թվականի դեկտեմբերի 22-ին և 26-ին»,-նշեց Խաչատուր Խնձրցյանը։

Եվրասիական տնտեսական միության (ԵԱՏՄ) անդամ երկրների ղեկավարները դեկտեմբերի 25-ի գագաթնաժողովի արդյունքներով հաստատել են մինչև 2045 թվականն ընկած ժամանակաշրջանում միության հետագա զարգացման հռչակագիրը։ Այս մասին տեղեկացնում է ՏԱՍՍ գործակալությունը: Ինչպես նշել է ՌԴ նախագահ Վլադիմիր Պուտինը, ընդհանուր առմամբ տեղի է ունեցել մտքերի փոխանակում գործունեության կարևոր ասպեկտների շուրջ, նախանշվել են ինտեգրացիոն համագործակցության խորացման ռազմավարական հեռանկարները։

«Մասնավորապես, նեղ կազմով հանդիպմանը] քննարկվել է ԵԱՏՄ շրջանակներում մինչև 2030 թվականը և մինչև 2045 թվականն ընկած ժամանակաշրջանում տնտեսական գործընթացների հետագա զարգացման հռչակագրի ընդունման հարցը: Այս գաղափարը հավանության է արժանացել, Բարձրագույն խորհրդի բոլոր անդամները համաձայնվել են հաստատել հռչակագիրը: Համապատասխան որոշումը մենք կձևակերպենք մեր հանդիպման արդյունքներկով»,-ասել է Պուտինը՝ բացելով քննարկումն ընդլայնված կազմով։ Նա ընդգծել է, որ հռչակագիրը ծրագրային բնույթի նոր փաստաթուղթ է, որտեղ նախատեսված են առանցքային ճյուղերում համատեղ ջանքերի մեծացման քայլերը և սահմանված են փոխգործակցության լրացուցիչ ոլորտները, ինչպիսիք են կլիմայի օրակարգը, բժշկությունը, զբոսաշրջությունը և մի շարք այլ ոլորտներ։ Ռուսաստանի ղեկավարը հիշեցրել է ԵԱՏՄ-ի և Իրանի միջև ազատ առևտրի համաձայնագրի կնքումը։

Ռուսական կողմից փաստաթուղթը հաստատել է փոխվարչապետ Ալեքսեյ Օվերչուկը։ «Կարծում եմ սա շատ լավ քայլ է դեպի առաջ»,- ընդգծել է Պուտինը։ Ինչպես հաղորդում է Կրեմլի կայքը, բացի հռչակագրից, նիստի շրջանակներում ստորագրվել է ևս 21 փաստաթուղթ։ Դրանց թվում են արձանագրություններ, հրամաններ և որոշումներ, որոնք վերաբերում են համագործակցության հետագա զարգացմանը։ Բացի այդ, ղեկավարները հաստատել են ԵԱՏՄ Մաքսային օրենսգրքի պայմանագրում փոփոխությունները, 2024 թվականին ԵԱՏՄ-ի միջազգային գործունեության հիմնական ուղղությունները, միության երկրների 2024-2025 թվականների մակրոտնտեսական քաղաքականության հիմնական կողմնորոշիչները, ԵԱՏՄ 2022 թվականի բյուջեի կատարման հաշվետվության և 2024 թվականի բյուջեի մասին որոշումները և այլ հարցեր:

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Սեպտեմբերի 25-ին Ստեփանակերտի վառելիքի պահեստի պայթյունի հետևանքով զոհվել է 218 քաղաքացի, 120-ը՝ վիրավորվել, 21 քաղաքացի անհետ կորած է համարվում, հայտնել է Քննչական կոմիտեի խոսնակը։ «Արցախի այն բնակիչները, որոնք պայթյունի հետևանքով ունեն անհետ կորած անձ և դեռևս չեն դիմել վարույթ իրականացնող մարմնին, քննչական կոմիտեն հորդորում է դիմել՝ նույնականացում իրականացնելու համար»,- ասել է Գոռ Աբրահամյանը։ Նա նաև փոխանցել է, որ պայթյունի հետևանքով զոհված քաղաքացիներից 3-ի ինքնությունը դեռ չի պարզվել։ Ստեփանակերտ-Ասկերան ավտոճանապարհի հարակից տարածքում սեպտեմբերի 25-ին բենզինի պահեստում ուժեղ պայթյուն տեղի ունեցավ։ Այդ օրը Արցախից հայտնեցին, որ կան զոհեր, վիրավորների թիվն անցնում է 200-ը։ Արցախի նախկին պետնախարար Արտակ Բեգլարյանն էր խոսել ականատեսների հետ և նրանց հղում անելով նշում էր, որ կրակից մոտ 100 մարդ մոխրացել է։ Երեք օրում պայթյունից բոլոր տուժածները տեղափոխվեցին Հայաստան՝ հիմնականում ծանր, կայուն ծանր վիճակում։

Հ Հ ՔՆՆՉԱԿԱՆ ԿՈՄԻՏԵ

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

ՀՀ ՊՆ ռազմական ոստիկանությունը 2023 թվականի ընթացքում զորամասերում կատարած ամենօրյա պրոֆիլակտիկ աշխատանքների արդյունքում հայտնաբերել է սմարթֆոն տեսակի 4076 բջջային հեռախոս և արգելված այլ իրեր, ինչի հետևանքով մի շարք զինծառայողներ ՌՈ կարգապահական վաշտերում կրել են կարգապահական տույժեր։ Ռազմական ոստիկանությունը զինված ուժերում կարգապահության ամրապնդման, անվտանգության ապահովման համար ևս մեկ անգամ հորդորում է զինծառայողների ծնողներին, ընկերներին զերծ մնալ սմարթֆոն տեսակի բջջային հեռախոսներ կամ արգելված այլ իրեր զինծառայողներին փոխանցելուց, քանի որ հետամուտ է լինելու սմարթֆոն տեսակի հեռախոսների հայտնաբերմանը և զինված ուժերում դրանց օգտագործումը բացառելուն։ Հիշեցում. զինծառայողին թույլատրվում է ունենալ տեսագրման, ձայնագրման, լուսանկարահանման և ինտերնետ հասանելիություն չունեցող բջջային հեռախոս, որից կարող է օգտվել միայն օրվա կարգացուցակով նախատեսված ազատ ժամերին: Զինծառայողների շրջանում հայտնաբերված սմարթֆոն տեսակի հեռախոսները զինծառայողներին վերադարձվելու են սահմանված կարգով` ժամկետային զինվորական ծառայության ավարտից հետո:

Եվրոպական միության անդամ չհանդիսացող 11 երկրներ միացել են Եվրոպական խորհրդի՝ «Մագնիտսկու եվրոպական ցուցակը» մեկ տարով երկարաձգելու որոշմանը։ Դրանց թվում են նաև Հայաստանն ու Ադրբեջանը։ Այս մասին հայտարարել է եվրոպական դիվանագիտության ղեկավար Ժոզեպ Բորելը։ Խորհուրդը ևս 11 ամսով՝ մինչև 2024 թվականի դեկտեմբերի 8-ը երկարաձգել է գործող սահմանափակող միջոցները և փոփոխել սահմանափակող միջոցների ենթակա անձանց և կազմակերպությունների ցանկը։

«Դեկտեմբերի 4-ին ԵՄ խորհուրդը երկարաձգեց գործող արգելող միջոցները հաջորդ 12 ամիսների ընթացքում՝ մինչև 2024 թվականի դեկտեմբերի 8-ը և հստակեցրեց սահմանափակումների ենթակա անձանց և կազմակերպությունների ցանկը։ ԵՄ խորհրդի այս որոշմանը միացել են Հյուսիսային Մակեդոնիան, Չեռնոգորիան, Ալբանիան, Ուկրաինան, Մոլդովան և Բոսնիա և Հերցեգովինան, ինչպես նաև Եվրոպական ազատ առևտրի գոտու երկրները՝ Իսլանդիան, Լիխտենշտեյնը և Նորվեգիան, ինչպես նաև Հայաստանը և Ադրբեջանը »,- ասել է Բորելը: Այս հայտարարության հետ մեկտեղ, ԵՄ արտաքին քաղաքականության ծառայությունը հրապարակել է ևս երկուսը՝ գրեթե նույն տեքստով հայտարարություն ԵՄ անդամ չհանդիսացող երկրների՝ ԿԺԴՀ-ի դեմ պատժամիջոցների երկարաձգման և Մերձդնեստրի ղեկավարության դեմ պատժամիջոցների ընդլայնման վերաբերյալ ԵՄ խորհրդի որոշումներին միանալու մասին: Նույն երկրները, բացի Հայաստանից և Ադրբեջանից, գումարած Սերբիան և Վրաստանը, միացել են ԿԺԴՀ-ի դեմ պատժամիջոցներին։ Ադրբեջանը, Հայաստանը, Իսլանդիան և Սերբիան չեն միացել Մերձդնեստրի դեմ պատժամիջոցներին։

Նշենք, որ «Մագնիտսկու ակտ» օրենքը պատժամիջոցներ է նախատեսում ամբողջ աշխարհում կոռուպցիոներների և մարդու իրավունքները խախտողների դեմ, ինչպես նաև ԱՄՆ-ում նրանց սեփականության կալանավորում։ Ի թիվս այլոց, այս պատժամիջոցային ցուցակում ընդգրկված են Ռուսաստանի Դաշնության մի շարք բարձրաստիճան պաշտոնյաներ՝ Քրեակատարողական դաշնային ծառայության նախկին տնօրեն Ալեքսանդր Կալաշնիկովը, ՌԴ Քննչական կոմիտեի նախագահ Ալեքսանդր Բաստրիկինը, ՌԴ գլխավոր դատախազ Իգոր Կրասնովը և Ռուսական գվարդիայի տնօրեն Վիկտոր Զոլոտովը։ Ցուցակում ընդգրկված են վեց երկրներից անհատներ և կազմակերպություններ, այդ թվում՝ հյուսիսկորեացի երկու նախարարներ և դատախազներ, լիբիացի զինյալներ, Հարավային Սուդանից գեներալ և Էրիթրեայի պետական անվտանգության բյուրոն: Աշխարհում մարդու իրավունքների խախտումների համար ԵՄ պատժամիջոցների ցուցակը ստեղծվել է 2020 թվականի դեկտեմբերի 7-ին։ ԵՄ-ի մարդու իրավունքների գլոբալ պատժամիջոցների ռեժիմը, որը երբեմն նաև կոչվում է «Մագնիտսկու եվրոպական ակտ», Բրյուսելին թույլ է տալիս «դատապարտել անհատներին, կազմակերպություններին և մարմիններին, ներառյալ պետական և ոչ պետական դերակատարներին, որոնք պատասխանատու են, ներգրավված են կամ առնչություն ունեն մարդու իրավունքների լուրջ խախտումների և չարաշահումների հետ ամբողջ աշխարհում»:

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Ավարտվել է Գյումրու համայնքի նախկին ղեկավար Վարդան Ղուկասյանի կողմից պաշտոնեական կեղծիք կատարելու, պաշտոնեական լիազորությունները չարաշահելու միջոցով Գյումրի համայնքում գտնվող երկու տասնյակից ավել անշարժ գույք օտարելու դեպքերի առթիվ նախաձեռնված քրեական վարույթի նախաքննությունը։
«Արմենպրես»-ի փոխանցմամբ՝ ՀՀ քննչական կոմիտեի Շիրակի մարզային քննչական վարչությունում իրականացված բազմակողմանի քննությամբ ձեռք բերված փաստական տվյալներով հիմնավորվել է, որ Վ․ Ղուկասյանը, 1999թ․ նոյեմբերից մինչև 2012թ․ հոկտեմբերը հանդիսանալով Գյումրու քաղաքային համայնքի ղեկավար, մի շարք պաշտոնատար անձանց օժանդակությամբ, 2006-2011թթ․ ընթացքում ուղղակի վաճառքով կամ աճուրդով օտարել է ՀՀ հողային օրենսգրքի 60-րդ հոդվածով սահմանված՝ օտարման ոչ ենթակա՝ պետական կամ համայնքային սեփականություն հանդիսացող, տարբեր հասցեներում գտնվող 24 անշարժ գույք, այդ թվում՝ ընդհանուր օգտագործման կանաչ գոտի (զբոսայգի) հանդիսացող քաղաքային զբոսայգու հողամասեր՝ տվյալ ժամանակ գնահատված ընդհանուր 35.690.403 ՀՀ դրամ կադաստրային արժեքով։
Հիշյալ անշարժ գույքերն օտարվելուց հետո կեղծ բովանդակությամբ տեղեկանքներ են ներկայացվել ՀՀ ԿԱ անշարժ գույքի կադաստրի Շիրակի մարզային ստորաբաժանում, և դրանց հիման վրա հիշյալ անշարժ գույքերի նկատմամբ գրանցվել է տարբեր ՍՊԸ-ների և անձանց սեփականության իրավունքը։
Բացի այդ, ձևական առքուվաճառքի և անհատույց օգտագործման պայմանագրեր կնքելու, նվիրատվություններ կատարելու եղանակով օրինական ճանապարհով գույքի ձեռքբերման պատրանք ստեղծելու, այդ կերպ՝ իր կատարած հանցանքի համար պատասխանատվությունից խուսափելուն օժանդակելու հարցերի շուրջ նախնական համաձայնության գալով մի շարք անձանց, այդ թվում՝ եղբոր և որդու հետ, Գյումրի համայնքից հանցավոր եղանակով ստացված գույքի ծագման աղբյուրը խեղաթյուրելու, պատկանելիությունը թաքցնելու նպատակով, օրինականացրել է վերը նշված հանցավոր ճանապարհով ստացված անշարժ գույքերից 4-ը՝ 16.060.815 ՀՀ դրամ կադաստրային արժեքով:
Մասնավորապես, Վարդան Ղուկասյանի մտերիմների միջև կնքվել են անշարժ գույքն օտարելու վերաբերյալ ձևական առքուվաճառքի պայմանագրեր, որոնց հիմքով գույքերի նկատմամբ գրանցվել է նրանց սեփականության իրավունքը։ Այնուհետև հիշյալ գույքերն անհատույց օգտագործման նպատակով Վ.Ղուկասյանին հանձնելու վերաբերյալ կնքված պայմանագրերի հիմքով կատարվել է պետական գրանցում, իսկ դրանից հետո կնքված նվիրատվության պայմանագրերի համաձայն՝ գույքերը նվիրվել են Վ․ Ղուկասյանի որդուն կամ եղբորը։ Այդ հիմքով կատարվել են պետական գրանցումներ, տրամադրվել են վկայականներ։
Ձեռք բերված բավարար փաստերի հիման վրա Գյումրու համայնքի նախկին ղեկավար Վ․ Ղուկասյանին մեղադրանք է ներկայացվել՝ պաշտոնեական կեղծիք կատարելու (24 դրվագ), պաշտոնեական լիազորությունները չարաշահելու (26 դրվագ), հանցավոր ճանապարհով ստացված եկամուտներն օրինականացնելու (փողերի լվացում) (4 դրվագ) համար։ Վերջինիս եղբորը, որդուն և երկու մտերիմներին մեղադրանք է ներկայացվել հանցավոր ճանապարհով ստացված եկամուտներն օրինականացնելու (փողերի լվացում) համար։
Քրեական վարույթով համայնքապետարանի նախկին պաշտոնատար 5 անձանց նկատմամբ, ոչ արդարացնող՝ վաղեմությունն անցնելու հիմքերով քրեական հետապնդումները դադարեցվել են։
Նախաքննությունն ավարտվել է, քրեական վարույթի նյութերը, մեղադրական եզրակացությամբ, ուղարկվել են հսկող դատախազին՝ հաստատելու և դատարան ուղարկելու համար։
Արգելանքներ են կիրառվել առերևույթ հանցավոր ճանապարհով օտարված գույքերի վրա:
Վ․ Ղուկասյանի մտերիմներից մեկի նկատմամբ ՀՀ քրեական օրենսգրքի 190-րդ հոդվածի 3-րդ մասի 3-րդ կետով հարուցվել է հանրային քրեական հետապնդում, վերջինիս նկատմամբ հայտարարվել է հետախուզում և այդ հիմքով նախաքննությունը կասեցվել է։
Ծանուցում. հանցանքի համար մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով դատարանի` օրինական ուժի մեջ մտած դատավճռով:

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com