Yearly Archives:2024

2 բրոնզե մեդալ՝ Եվրոպայի ինֆորմատիկայի պատանեկան 8-րդ օլիմպիադայից

ՀՀ դպրոցականները 2 բրոնզե մեդալ են նվաճել Եվրոպայի Ինֆորմատիկայի պատանեկան 8-րդ օլիմպիադայում, որն օգոստոսի 16-22-ն անցկացվել է Մոլդովայի մայրաքաղաք Քիշնևում: Օլիմպիադային մասնակցել է 26 երկրի 98 աշակերտ։ Այս մասին տեղեկացնում են ԿԳՄՍՆ-ից:

Օլիմպիադայի անցկացման ձևաչափը համընկնում էր Ինֆորմատիկայի միջազգային օլիմպիադայի (IOI) ձևաչափին, որի ժամանակ մասնակիցները 2 մրցութային օրերում կատարում են 3-ական առաջադրանքներ, իսկ յուրաքանչյուր երկիր կարող էր ներկայացնել առավելագույնը 4 մասնակից։

Օլիմպիադային Հայաստանի թիմը ներկայացրել են Ա․ Շահինյանի անվան ֆիզմաթ հատուկ դպրոց 9-րդ դասարանի աշակերտներ Տիգրան Մացակյանը ու Վահագն Գյոզալյանը, ինչպես նաև Գյումրու Ֆոտոն վարժարանի 9-րդ դասարանի աշակերտ Արման Կիրակոսյանը և Քվանտ վարժարանի 8-րդ դասարանի աշակերտ Արեն Գրիգորյանը: Բրոնզե մեդալներ են նվաճել Տիգրան Մացակյանը և Արման Կիրակոսյանը, իսկ Վահագն Գյոզալյանն արժանացել է գովասանագրի:

Թիմը ղեկավարել են ԵՊՀ ուսանողներ Սամվել Անդրեասյանը և Սամվել Աբելյանը, իսկ ԵՊՀ դասախոս Արմեն Անդրեասյանն ընդգրկված էր EJOI-ի օլիմպիադայի կոմիտեի կազմում։

Հիշեցնենք, որ 2023 թ. Եվրոպայի ինֆորմատիկայի պատանեկան 7-րդ օլիմպիադան անցկացվել էր Վրաստանի Քութաիսի քաղաքում, որի ժամանակ Հայաստանի թիմը արժանացել էր 1-ական ոսկե, արծաթե և բրոնզե մեդալների։

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Բորելը կոչ է արել չեղարկել Ռուսաստանի ռազմական օբյեկտներին հարվածելու սահմանափակումները

ԵՄ արտաքին քաղաքականության հարցերով գերագույն հանձնակատար Ժոզեպ Բորելը կոչ է արել վերացնել Ռուսաստանի ռազմական օբյեկտների դեմ արևմտյան զինատեսակների կիրառման սահմանափակումները։ Այս մասին նա գրել է X սոցիալական ցանցի իր կայքում։

ԵՄ բարձրաստիճան պաշտոնյայի կարծիքով՝ այդ սահմանափակումների չեղարկումը՝ մի շարք կարևոր հետևանքներ կունենա: Դրանց թվում նա առանձնացրել է Ուկրաինայի ինքնապաշտպանության ուժեղացումը, հատկապես ենթակառուցվածքների ռմբակոծությունից պաշտպանվելու հարցում, ուկրաինացիների շրջանում կորուստների նվազեցումը, ինչպես նաև խաղաղությանն ուղղված ջանքերի խթանումը:

Պաշտոնական Կիևն արդեն տևական ժամանակ է՝ արևմտյան գործընկերներին խնդրում է թույլատրել նրանց կողմից փոխանցված հեռահար զենքերի կիրառումը ՌԴ տարածքում: Որոշ երկրներ, սակայն, կարծում են, որ դա զգալիորեն կսրի Ռուսաստանի հետ հարաբերությունները:

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Կառավարությունը կաջակցի ոչխարաբուծությամբ, այծաբուծությամբ, մեղվաբուծությամբ զբաղվողներին

Կառավարության օգոստոսի 22-ի նիստին հաստատվեցին ՀՀ էկոնոմիկայի նախարարության ներկայացրած՝ անասնաբուծության խթանման ծրագրերը: Այս մասով Կառավարության որոշումը բաղկացած է 3 ենթածրագրից: Առաջինը ոչխարաբուծության և այծաբուծության զարգացման 2024-2028 թթ. ծրագիրն է:

«Նախկինում նման ծրագիր եղել է՝ մինչև 2021 թվականը, որն ունեցել է 2 բաղադրիչ՝ կա՛մ ձեռքբերված կենդանիների վարկային տոկոսներն են սուբսիդավորվել, կա՛մ 23-27 տոկոսով տնտեսվարողներին արժեքի փոխհատուցում է տրվել:

Այս ծրագիրը բովանդակությամբ լավ է աշխատել, բայց ծավալները գոհացուցիչ չեն եղել: Դրա համար, որպեսզի ծավալները մեծացնենք, այս նախագծով առաջարկում ենք փոխհատուցման բաղադրիչը մեծացնել մինչև 50 տոկոս»,- ասաց էկոնոմիկայի նախարար Գևորգ Պապոյանը:

Ծրագրի իրականացման արդյունքում ակնկալվում է, որ կներկրվի համաշխարհային լավագույն ցեղերի 10 հազար գլուխ տոհմային կենդանի, որոնց գենոֆոնդը կօգտագործվի տեղական ցեղերի մթերատվության բարձրացման նպատակով:

«Արդյունքում ակնկալում ենք, որ տեղական ոչխարների պտղատվությունը կբարձրանա 20 տոկոսով, կենդանի զանգվածը՝ 15 կիլոգրամով, իսկ այծերի կենդանի զանգվածը կավելանա մինչև 7 կիլոգրամով: Ծրագրի ավարտին ներկրված կենդանիներից տարեկան կստացվի շուրջ 20 հազար գլուխ բարձրարժեք սերունդ, գրեթե 25 տոկոսով կավելանա ոչխարաբուծությունից և այծաբուծությունից ստացվող արտադրանքի ծավալը, կամ տարեկան ակնկալում ենք, որ կարտադրենք շուրջ 3,5 մլրդ դրամի հավելյալ արտադրանք:

Ծրագրի իրականացման համար պետական բյուջեից 2024-2028 թթ. անհրաժեշտ է հատկացնել մոտավորապես 1 մլրդ 951 մլն դրամ»,- ասաց նախարարը:

Վարչապետ Նիկոլ Փաշինյանը, անդրադառնալով առաջարկվող փոփոխությանը, պարզաբանեց. «Այսինքն՝ եթե 200 դոլարով կամ 100 հազար դրամով ձեռք է բերվել մանր եղջերավոր տոհմային սերտիֆիկացված անասուն, գլխաքանակ, ուրեմն գումարի 50 տոկոսը Կառավարությունը հետ է տալիս»:

Երկրորդ ծրագիրը մթերատվության բարձրացման փորձնական ծրագիրն է, որը կիրականացվի 4 մարզում՝ Գեղարքունիք, Սյունիք, Տավուշ և Արագածոտն:

«Սերմնավորման ծրագրի համար միջին գինը 15 հազար դրամ է: Մենք այս ծրագրով կփոխհատուցենք արժեքի 70 տոկոսը, բայց ոչ ավելի, քան 10 հազար դրամը: Եթե կստացվի 15 հազարից ներքև, ապա 10 հազարից քիչ կփոխհատուցենք 1 անասունի սերմնավորման համար»,- ասաց նախարարը և հավելեց՝ սերմնավորման արդյունքում ակնկալվում է, որ կովերի կաթնատվությունը կավելանա տարեկան մինչև 1100 կիլոգրամով՝ կազմելով 3600 կգ (այժմ 2300-2400 կիլոգրամ է), որի շնորհիվ տարեկան հավելյալ կարտադրվի 31 հազար տոննա կաթ, իսկ կենդանի զանգվածը 30 կիլոգրամով կավելանա, և դրա հետևանքով լրացուցիչ կարտադրվի հանրապետությունում 1000 տոննա միս կամ ծրագրի շնորհիվ երկրում լրացուցիչ կարտադրվի 8,2 մլրդ դրամ արժեքով բարձրորակ կաթ և միս»,- ասաց նա՝ նշելով, որ այս ծրագրի համար անհրաժեշտ է մոտ 220 մլն դրամ հատկացնել:

Մթերատվության բարձրացման փորձնական ծրագրի մասով Կառավարության անդամներն առաջարկեցին այլ մարզեր ևս դիտարկել:

Երրորդ ենթածրագիրը մեղվաբուծության զագացման փորձնական ծրագիրն է, որի շրջանակում ակնկալվում է ծախսերի 50 տոկոսի փոխհատուցում, սակայն 1 մեղվաընտանիքի համար՝ առավելագույնը 40 հազար դրամ:

«Ակնկալվում է, որ ազգաբնակչությունը 2 տարվա ընթացքում ձեռք կբերի լրացուցիչ 10 հազար մեղվաընտանիք, իսկ տարեկան հավելյալ կարտադրվի շուրջ 300 հազար կգ բարձրորակ մեղր»,- ասաց Պապոյանը՝ նշելով, որ ծրագրի համար 400 մլն դրամ է անհրաժեշտ, կօգտագործվեն սահմանամերձ բնակավայրերի կերահանդակներն ու անտառները:

Վարչապետն արձագանքեց՝ այս որոշմամբ անասնաբուծության հետ կապված տարբեր ծրագրերը կոնսոլիդացվում են գոնե մասամբ, քանի որ կան ծրագրեր, որոնք, այդուամենայնիվ, դուրս են մնում, օրինակ՝ խեցգետնագործության ծրագիրն ինտեգրված չէ:

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

«Եվրոպայում սպասում են մեզ»․ ստորագրահավաք ՀՀ-ն ԵՄ-ին անդամակցելու օրինագծի շուրջ

«Երբ հաջողենք ստորագրահավաքը իսկ հետո նաև հանրաքվեի իրականացումը, անհրաժեշտություն կա փոխելու հանրաքվե իրականացնելու մասին օրենքը, որը ոչ ժողովրդավար է և գրվել է նախորդ իշխանությունների օրոք»,- այս մասին Գյումրու ժուռնալիստների «Ասպարեզ» ակումբում հրավիրված մամուլի ասուլիս ժամանակ նշեց՝ «Հանրապետություն» կուսակցության նախագահ Արամ Սարգսյանը։ Նշենք, որ մամուլի ասուլիս հրավիրել էին «Իրավունքի Եվրոպա միավորում» ՀԿ նախագահ Լուսինե Հակոբյանը, «Հանրապետություն» կուսակցության նախագահ Արամ Սարգսյանը, «Հանուն Հանրապետության» կուսակցության նախագահ Արման Բաբաջանյանը եւ «Հայաստանի եվրոպական կուսակցության» նախագահ Տիգրան Խզմալյանը։

ԵՄ-ից դեպի Հայաստան տարբեր դրական ազդակներից հետո հայաստանյան արտախորհրդարանական որոշ կուսակցություններ կառավարությանը այս տարվա հունիս ամսին կոչ արեցին առաջիկա ամիսների ընթացքում կազմակերպել հանրաքվե Եվրամիությանն անդամակցելու հարցով։ Երկար չձգելու համար առաջարկվել էր այս տարվա սեպտեմբեր ամիսը, որը կառավարության կողմից անպատասխան մնաց։ Այնուամենայնիվ ԵՄ-ին անդամակցելու հարցով Հայաստանի արտախորհրդարանական ուժերը ցանկանում են հանրաքվե իրականացնել ու այդ նպատակով իրազեկման գործընթացներ են սկսել հանրապետության տարբեր մարզերում։ Գյումրու ժուռնալիստների «Ասպարեզ» ակումբում ասուլիսի ժամանակ բանախոսները նշեցին՝ ըստ իրենց նախ պետք է ստորագրավաք իրականացնել, որը հանրաքվեի համար իրավական հիմք կդառնա իսկ վերջինս Եմ անդամակցության ճանապարհին իրավական և քաղաքական տեսանկյուններից ճիշտ մոտեցում են համարում, և քաղաքացիական նախաձեռնության կարգով խորհրդարան են ներկայացնելու նույն հարցով օրենսդրական նախագիծ։

«Այս գործընթացով պարզ կդառնա, թե մենք ինչպես ենք վերաբերվում մեր ապագային, դրանով էլ կերևա, թե եվրոպացիներն ինչպես կվերաբերվեն մեր մտադրություններին»,-նշեց «Հանուն Հանրապետության» կուսակցության նախագահ Արման Բաբաջանյանը։ Իսկ լրագրողների այն հարցին, թե քաղաքիցները ունեն մտավախություն՝ արդյո՞ք ԵՄ-ն Հայաստանին գրկաբաց կընդունի այս գործընթացն հաջողությամբ կատարելուց հետո․   «Իրավունքի Եվրոպա միավորում» ՀԿ նախագահ Լուսինե Հակոբյանը պատսխանեց՝ «Որպես ԵՄ-Հայաստան քաղհասարկության պլատֆորմի համակարգող՝ պատասխանը հիմնականում և հետևողականորեն այն է, որ պետք է դիմել, որպեսզի հասկանանք՝ արձագանքը դրական կլինի, թե բացասական։ Առանց դիմելու, առանց այդ քայլը կատարելու ոչ մի պատասխան չկա։ Նաև ուզում եմ անդրադարձ կատարել դարձյալ հնչող մտահոգություններին, թե սա պատեհ պահը չէ։ Այս գործընթացը սկսելու, ԵՄ անդամակցության մեկնարկը հռչակելու, նաև իշխանության վրա ճնշումներ գործադրելու ճիշտ պահը չէ, այդ դեպքում ուզում եմ հարց տալ՝ բա ե՞րբ է ճիշտ պահը, ո՞վ է երբևէ կարողանալու ասել՝ ե՞րբ է ճիշտ պահը»։

«Ճիշտ պահերը» թվարկելով  «Հայաստանի եվրոպական կուսակցության» նախագահ Տիգրան Խզմալյանն էլ հավելեց, որ 30 տարի շարունակ մեկը մյուսի հետևից կորցրել ենք դրանք և ԵՄ-ին անդամակցելու ճիշտ պահերը բաց ենք թողել։

Ի պատասխան հասարկության մտավախությունների՝ «Հանրապետություն» կուսակցության նախագահ Արամ Սարգսյանը կարծում է , որ Եվրոպայում սպասում են մեզ։ «Այնտեղ մեզ սպասում են, բայց սպասելով հանդերձ՝ ուզում են, որ մեր տնտեսությունն այդ չափանիշներին համապատասխանի, որպեսզի մեր տնտեսություն այդ չափանիշներին համապատասխանի, մենք պիտի հայտ ներկայացնենք, ասենք՝ այո, ուզում ենք ձեր ընտանիքի մասը դառնալ, որպեսզի իրենք էլ օգնեն մեզ, որ մեր տնտեսությունն այդ չափանիշներին համապատասխանի, որ դառնանք այդ ընտանիքի անդամության թեկնածու»,-նշեց նա։

Սարգսյանին կարծիքով, Ռուսաստանը Հայաստանին զենք չի տալու, և որ ՌԴ-ն Ադրբեջանի բարեկամն է, երեկ ողջ հայությունը տեսավ՝ Պուտինի, Իլհամ Ալիևի և նրա կնոջ փոխադարձ սիրո ցուցադրմամբ։ Նրա խոսքով ՝ ՌԴ-ի հետ շարունակելը մեզ ոչինչ չի տալու, մնացինք Ռուսաստանի հետ, կորցրեցինք Արցախը։ «Տարածաշրջանում դու պիտի լինես, հետո համագործակցես, երբ որ քո տնտեսություն՝ էներգետիկայով ու արդյունաբերությամբ, 90 տոկոս Ռուսաստանինն է, երբ որ քո սահմանները պաշտպանում է Ռուսաստանը, դու ՀԱՊԿ անդամ ես, ԵԱՏՄ անդամ ես, դու ո՞վ ես այդ տարածաշրջանում, քո հետ ինչո՞ւ պիտի խոսեն, կխոսեն Պուտինի հետ էլի, դու ո՞վ ես, դու ոչ մի բան ես էդտեղ»,– ասաց Սարգսյանը։

«Հայաստանի եվրոպական կուսակցության» նախագահ Տիգրան Խզմալյանի խոսքով  իրենք դիմում են ժողովրդի, որպեսզի հենց իրենց վերադառնա որոշում կայացնելու մենաշնորհը․ «Մեր գործընկերները պատրաստել են օրինագիծ, մենք ժողովրդի աջակցությունն ենք խնդրում։ Այն կոչվում է Եվրոպական միությանն անդամակցելու՝ ՀՀ մեկնարկի մասին օրինագիծ, մենք ժողովրդից խնդրելու ենք աջակցել Եվրամիությանն անդամակցելու նախաձեռնությանը»-ասաց նա։

Հիշեցնենք, որ ստորագրահավաքը նախատեսվում է իրականացնել սեպտեմբեր ամսին։ Եթե ՀՀ 50 հազար քաղաքացու ստորագրություն հավաքվի, ապա, համաձայն ՀՀ Սահմանադրության, հարցը կընդգրկվի Ազգային ժողովի օրակարգում։ Չընդունվելու դեպքում արդեն անհրաժեշտ կլինի 300 հազար ստորագրություն նախագիծը հանրաքվեի դնելու նպատակով։«Հանրապետություն» կուսակցության նախագահ Արամ Սարգսյանի խոսքով՝  ձեւավորվել է նախաձեռնող խումբ, անդամների թիվը հասնում է մոտ 50-ի։ Նախաձեռնող խումբն իր կազմից ընտրել է լիազոր ներկայացուցիչ՝ իրավապաշտպան Արտակ Զեյնալյանին, նա խմբի անունից հանդես է գալու Կենտրոնական ընտրական հանձնաժողվում։ Ստորագրահավաքից հետո լիազոր ներկայացուցիչը հանդես է գալու Ազգային ժողովի պետաիրավական հանձնաժողովում, ներկայացնելու է օրինագիծը, իսկ պետաիրավական հանձնաժողովի հաստատումից հետո ԱԺ-ի լիագումար նիստում ներկայացնելու է այդ օրինագիծը։

Լրագրողների այն հարցին, թե ի՞նչ է անելու նախաձեռնող խումբը նախատեսված 50 հազար քաղաքացու ստորագրությունը չհավաքելու դեպքում՝ Արամ Սարգսյանը պատասխանում է․ «Չի հավաքվի, չի ստորագրի, չենք փոխի ուղղությունը, ուրեմն այդ ժողովուրդը դա է ուզում, ուզում է ծայրագավառ դառնալ, մենք էլ կդառնանք փոքրամասնություն։ Մինչեւ հիմա ընդդիմություն ենք եղել, կշարունակենք ընդդիմություն լինել»։ 

Հավելենք, որ ԵՄ անդամակցության թեմայի մասին «Երկխոսություն մեդիա կենտրոնը» Գյումրիում հարցում էր իրականացրել, այս հարցում Գյումրեցիների կարծիքը իարարամերժ էր։ 

Հարցումը՝այստեղ

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Շառլ Ազնավուրի արձանը լուսավորվում է՝ երկրագիտական թանգարանը մնում խավարում․ ավագանու արտահերթ նիստ

Այսօր՝ օգոստոսի 15-ին Գյումրի համայնքի ավագանին արտահերթ նիստ էր գումարել, որին մասնակցում էր ավագանու 19 անդամ։ Նիստի օրակարգում ընդգրկված էր երեք հարց, որոնցից առաջինը՝ Գյումրի քաղաքի Ջիվանու փողոց N 74 հասցեի Շիրակի Երկրագիտական թանգարանի շենքը Գյումրի համայնքին նվիրաբերելուն էր վերաբերվում։ Նշենք, որ Գյումրիի նախկին վիրաբուժական հիվանդանոցի շենքը անվարձահատույց վարձակալության կտրվի Լոզանի հյուրընկալության դպրոց բացելու համար, բայց մինչ այդ  շենքը նախ պետք է համայնքապատկան դառնա։

Հիշեցնենք, որ 2018 թվականին կառավարության որոշմամբ վիրաբուժական հիվանդանոցի շենքը անհատույց, անժամկետ օգտագործման իրավունքով հանձնվել էր Շիրակի երկրագիտական թանգարանին, բայց մինչ օրս էլ թանգարանը շարունակում է գործել Մյասնիկյան փողոցի շենքերից մեկում, ցուցանմուշների տեղավորման խնդրով և շենքային անբավարար պայմաններով։ Այնուամենայնիվ ավագանին համաձայնություն տվեց նախկին հիվանդանոցի շենքը համայնքին նվիրաբելու որոշմանը։ Շենքը շվեցարական կողմին հանձնվելու է անվարձահատույց ու անժամկետ, բայց իրենք էլ պարտավորոված են լինելու քաղաքում ներդրումներ կատարելուն։

Հաջորդ հարցը՝ «Դաշինք՝ հանուն կայուն և կանաչ կառավարման» ծրագրի համաներդրման/համաֆինանսավորման նպատակով, դրամական միջոցներ հատկացնելուն էր վերաբերում։ Օրեր առաջ Գյումրին այս ծրագրի շրջանակներում ձեռք բերեց 5 էլեկտրական ավտոբուս։ Պարզվում է վերջիններս շահագործելու համար անհրաժեշտ է քաղաքի բյուջեից  բնապահպանական հարկ վճարել։ Այս հարցը ևս ավագանին հաստատեց։ Հաջորդ հարցը վերաբերում էր Գյումրի քաղաքի Անկախության հրապարակ 1 հասցեում գտնվող Հայաստանի գեղարվեստի պետական ակադեմիայի Գյումրու մասնաճյուղի շենքի և Ազնավուրի հրապապարակում գտնվող Շառլ Ազնավուրի արձանի ու կամարի գեղարվեստական լուսավորության աշխատանքներն իրականացնելու համար գումար հատկացնելու մասին:

Այս մասով տեղի ունեցած քննարկումից հետո քվերակության դրվեց հարցի մի հատվածը՝ Շառլ Ազնավուրի արձանի ու կամարի գեղարվեստական լուսավորության աշխատանքներն իրականացնելու մասը, որին ավագանին տվեց իր համաձայնությունը, իսկ Հայաստանի գեղարվեստի պետական ակադեմիայի Գյումրու մասնաճյուղի շենքի գեղարվեստական լուսավորությանն առնչվող հատվածը հանվեց քվեարկությունից:

Ավագանու անկախ անդամ Վարդևան Հակոբյանի խոսքով կան փողոցներ, որտեղ ընդհանրապես լույս չկա և անիմաստ է անկախության հրապարակում թերի լուսավորության համար տրամադրել բյուջեից զգալի գումար։ Նշենք, որ Շառլ Ազնավուրի արձանի ու հրասպարակի լուսավորության աշխատանքների համար կհատկացվի 10 մլն․ դրամ։

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com