Yearly Archives:2024

«Չխկալու, գրկախառնության», և այլ կանգառներ․ Ի՞նչ է սպասվում երիտասարդների միջազգային օրը Գյումրիում

Օգոստոսի 11-ին Գյումրիում կանգառների ձևաչափը երիտասարդական շնչով է հագենալու, խոստանում են   ԵՆԿ ՀԿ-ից։ Թվային գործիքների, միջմշակութային, ինքնախնամքի, անծիսթրես, էրազմուս+ երիտասարդություն և եվրոպական համերաշխության կորպուս (եհկ) ծրագրերի, հեծօների, չըխկալու, գրկախառնության և թատերական, կարճ ասած  «Երիտասարդների քաղաք» խորագրով թեմատիկ կանգառներ են սպասվում Գյումրիում։ Երիտասարդների միջազգային օրը հերթական անգամ մեծ շուքով կնշվի հանրապետության երկրորդ քաղաքում։ Նշենք, որ 1999 թվականի դեկտեմբերի 17-ին ՄԱԿ-ի Գլխավոր ասամբլեայի որոշմամբ օգոստոսի 12-ը հռչակվել է երիտասարդության միջազգային օր: Այն աշխարհում առաջին անգամ պաշտոնապես նշվել է 2000 թվականին, իսկ Գյումրիում` 2015 թվականին «Երիտասարդական նախաձեռնությունների կենտրոն» ՀԿ-ի կողմից: 

Հաշվի առնելով նախորդ տարիների ընթացքում երիտասարդների, պետական ու երիտասարդական տարբեր կազմակերպությունների կողմից դրական արձագանքները՝ ԵՆԿ ՀԿ-ն Երիտասարդության միջազգային օրվան նվիրված միջոցառումները դարձրել է ամենամյա և Գյումրիից զատ այն տոնվում է նաև Հայաստանի այլ մարզերում ու քաղաքներում։  Օգոստոսի 11-ին Գյումրիում, օգոստոսի 12-ին Գավառում՝ որպես ՀՀ երիտասարդական մայրաքաղաք, և օգոստոսի 13-ին Վաղարշապատում սա այս տարվա երիտասարդական տոնակատարության քարտեզն է։ 2024 թվականի օգոստոսի 11-ին «Երիտասարդական նախաձեռնությունների կենտրոն» ՀԿ-ն Գյումրու համայնքապետարանի, ՄԱԿ-ի Բնակչության հիմնադրամի, Յունիսեֆի հայաստանյան գրասենյակների, ՍԱԼՏՈ Արևելյան Եվրոպա և Կովկաս ռեսուրսային կենտրոնի, Հայաստանում Erasmus+ Երիտասարդություն և Եվրոպական Համերաշխության Կորպուս ծրագրերի տեղեկատվական կենտրոնի հետ համատեղ՝ հանդես է գալիս Գյումրիում մեծամասշտաբ միջոցառումների իրականացման նախաձեռնությամբ, որի մասին տեղեկացանք Գյումրու համայքնապետարանում  հրավիրված ասուլիսի ժամանակ։

Բանախոսներից՝ ԵՆԿ ՀԿ խորհրդի նախագահ Արթուր Նաջարյանը նշեց,- «հանրային իրազեկման արշավի ընթացքում կամավորները կշրջեն Գյումրի քաղաքի տարբեր թաղամասերում, բնակիչներին, երիտասարդներին տեղեկացնելու համար Երիտասարդության միջազգային օրվա մասին, կշնորհավորեն անցորդներին և կտեղեկացնեն սպասվելիք միջոցառումների մասին թռուցիկների, տեղեկատվական նյութերի տարածման միջոցով»:

Ասուլիսի բանախոսներից էին՝  ՄԱԿ-ի Բնակչության հիմնադրամի հայաստանյան գրասենյակի գործադիր ներկայացուցիչ Ծովինար Հարությունյանը, ՅՈՒՆԻՍԵՖ-ի հայաստանյան գրասենյակի երիտասարդական ծրագրերի ղեկավար Հասմիկ Ալեքսանյանը, Գյումրու համայնքապետարանի մշակույթի և երիտասարդության հարցերի բաժնի պետ Լիլիթ Թովմասյանը։ Վերջիններս տոնական օրվա կազմակերպչական գործում մեծ ներդրում ունեն։ Գործընկեր միջազգային ու համայնքային կառույցների ներկայացուցիչների խոսքով՝ օրակարգը ինքնանպատակ չէ, դրանք որոշվել են՝ Գյումրիում երիտասարդության շրջանում անցկացված առցանց հարցման արդյունքների համաձայն։

16:00 – 18:00 –ից Գյումրու Աբովյան փողոցում «Երիտասարդների քաղաք» խորագրով թեմատիկ կանգառներից բացի տեղադրված են լինելու  թեմատիկ կանգառներ (տաղավարներ), որոնցում միաժամանակ տեղի են ունենալու տարաբնույթ աշխատարան-գործողություններ։ Իսկ երիտասարդական շնչով հագեցած փողոցում,  ժամը 19։30-ից 22։00  օրը կամփոփեն «YereOne Project» բենդը,  «DJ MILL»-ի մասնակցությամբ։

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

«Այստեղ էի ոսկե մեդալի համար»․Արթուր Ալեքսանյանի բողոքարկման կմկիանա նաև ՀՀ կառավարությունը

Հայաստանն ամառային 33-րդ Օլիմպիական խաղերում դեռևս 2 արծաթե և 1 բրոնզե մեդալ է նվաճել:

2024 թվականի Օլիմպիական խաղերի եզրափակչում Ըմբշամարտի հավաքականի անդամ, օլիմպիական խաղերի ոսկե, արծաթե և բրոնզե մեդալակիր, աշխարհի քառակի և Եվրոպայի 7-ակի չեմպիոն Արթուր Ալեքսանյանը գոտեմարտել է ՕԽ բրոնզե մեդալակիր, աշխարհի ու Ասիայի չեմպիոն, Ասիական խաղերի հաղթող, իրանցի Մոհամադհադի Սարավիի հետ և 1:4 հաշվով զիջել է մրցակցին՝ արժանանալով արծաթե մեդալի։

Ալեքանյանը հույս ունի, որ թե՛ իր, թե՛ հավաքականի մյուս անդամների գոտեմարտերի վերաբերյալ արդար որոշումներ կկայացվեն։ Փարիզում լրագրողների հետ զրույցում ասել է մարզիկը՝ անդրադառնալով իր, Սլավիկ Գալստյանի և Արսեն Հարությունյանի վերաբերյալ մրցավարների կայացրած որոշումներին։

«Այստեղ ոսկե մեդալի համար էի եկել, բայց բոլորդ տեսաք, թե ինչ կատարվեց իմ գոտեմարտի ժամանակ: Զգացողություն է, որ մեր հավաքականի դեմ լարվածություն կա»,- ասել է Ալեքսանյանը։

Ալեքսանյանը անդրադարձավ նաև պարգևատրումից անմիջապես հետո իր քայլին, երբ դեռ հարթակին կանգնած հանեց արծաթե մեդալը։ Ինչպես ինքն է նշում դա բողոքի նշան էր։ Մարզիկի խոսքով՝ ըմբիշ Սլավիկ Գալստյանն էլ երեկ կայացած գոտեմարտում մաքուր հաղթանակ տարավ, մրցավարն արձանագրեց այդ հաղթանակը, հետո բողոքարկումներ եղան, որոշումը փոխվեց։

«Ու Սլավիկը, որ առնվազն արծաթն ուներ, էսօր մնաց առանց մեդալի»,- նշեց Ալեքսանյանը։

Նա հույս ունի, որ արդարությունը կվերականգնվի։ Իր գոտեմարտի համար արդեն իսկ բողոքարկում է ներկայացվել, սպասում են նոր որոշմանը։ Փարիզում Օլիմպիական խաղերի ընթացքին հետևող ԿԳՄՍ նախարարի տեղակալ Կարեն Գիլոյանն էլ նշել է, որ Կառավարությունը ևս կմիանա բողոքարկման գործընթացին: Հավելենք նաև, որ ՕԽ փոխչեմպիոն է դարձել նաև մարմնամարզիկ Արթուր Դավթյանը, իսկ բրոնզե մեդալ է նվաճել հունահռոմեական ոճի ըմբիշ Մալխաս Ամոյանը:

Օգոստոսի 8-ին խաղարկվեցին մեդալների հերթական հավաքածուները 2024 թվականի Փարիզի Օլիմպիական խաղերում։

Մրցաշարային աղյուսակի առաջատարն ԱՄՆ հավաքականն է. 30 ոսկե, 38 արծաթե և 35 բրոնզե մեդալ։ Մեդալների ընդհանուր քանակով ևս ԱՄՆ-ն զգալի առավելություն ունի`դրանց թիվը 103 է։

Մրցաշարային աղյուսակի երկրորդ տեղում Չինաստանն է, երրորդում` Ավստրալիան:

https://www.youtube.com/shorts/P96bjS905sg

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

«Զբոսաշրջությունը Գյումրիում զարգանո՞ւմ, թե՞ անկում է ապրում»

Գյումրիում կազմակերպվող մշակութային միջոցառումները որքանո՞վ են նպաստում քաղաքում զբոսաշրջային կյանքի ակտիվացմանը։

Մի քանի տարի է անցել Գյումրու զբոսաշրջային «բում» ասվածից, արդյո՞ք պահպանվում է նույն ցուցանիշը, թե՞ այնուամենայնիվ քաղաք ժամանած հյուրերի քանակը նվազել է։

Մասնավոր- կառավարություն- համայնք կապը ի՞նչ փուլում է և ի՞նչ ազդեցություն ունի մարզում տուրիստական հոսքի ապահովման հարցում:

Ուղիղ հեռարձակում  

—————————————

Բանախոսներ՝

Դավիթ Առուշանյան – Աժ պատգամավոր

Կարեն Բադիշյան – ՇՄ զարգացման ծրագրերի մշակման եվ իրականացման բաժնի պետ

Լիլիթ Թովմասյան – Գյումրու քաղաքապետարանի մշակույթի և երիտասարդության հարցերի բաժնի պետ

Վարդան Սրտաշյան – գործարար

Համակարգող՝ Հրաչ Սահակյան

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Տոնական տրամադրություն ու մարդաշատ փողոցներ․ «Ֆեստիվառ»-ից Գյումրու օր 2024

Դեռ հուլիսի 26-ից Գյումրին հյուրընկալում էր Հայաստանի և աշխարհի տարբեր անկյուններից ժամանած հյուրերին. «Ֆեստիվառ» զբոսաշրջային-երաժշտական փառատոնը, այսուհետև կդառնա ամենամյա Գյումրի էր բերել հազարավոր մարդկանց: Տոնական բարձր տրամադրությամբ, մշակութային հագեցած միջոցառումներով քաղաքը շարունակում է ընդունել իր հյուրերին արդեն «Գյումրու օր» տոնակատարությունների շրջանակներում: Ըստ պատասխանատուների, այս տոնակատարություններին մասնակցել է շուրջ 50․000 մարդ։ Հուլիսի 28-ին նշվեց Գյումրի քաղաքի օրը։ Տոնակատարությունների մեկնարկը տրվեց բերքահավաքով, որին մասնակցեցին տեղական, մարզային և գործադիր իշխանության ներկայացուցիչներ։ Քաղաքի տարբեր հատվածներից հավաքված բերքը տեղափոխվեց Հովհաննես Շիրազի հուշատուն-թանգարանի բակ՝ գյումրեցիներին ու քաղաք այցելած հյուրերին հյուրասիրելու համար։Ներկաներն ունկնդրեցին «Ֆոլկաստիկ» բենդին։ Անգամ հորդառատ անձրևը չխանգարեց ներկաներին վայելել ֆոլկ երաժշտությունը։ 

Բարձր տրամադրությամբ և մշակութային հագեցած միջոցառումներով տոնը շարունակվեց Աբովյան ճեմափողոցում՝  արհեստի ու արվեստի տոնավաճառ, «Ամեն ժամանակի քաղաք» լուսանկարչական ցուցահանդես, տեղի պարային խմբերի ելույթներ։ Օրվա խորհրդով պայմանավորված՝ միջոցառումներ էին կազմակերպվել քաղաքի տարբեր մշակութային կառույցներում։ Հանրապետության առաջին թատրոնի՝ ներկայիս Թումո Գյումրիի բակում կայացավ Գյումրու պետական սիմֆոնիկ նվագախմբի համերգը։

«Այս տարի քաղաքն իր օրը տոնում է «Իմ սրտի քաղաք» խորագրով, և իրապես, մեզանից յուրաքանչյուրի սրտում Գյումրին իր ուրույն տեղն ունի իր յուրօրինակ դիմագծով, պատմությամբ, մշակույթով, բարբառով ու կենցաղով: Օր օրի կառուցվող ու շենացող քաղաքն այլևս այլ կերպ է ժպտում աշխարհին, և դա մեզ ավելի մեծ մղումով ստիպում է շարժվել առաջ:

Մենք շարունակելու ենք շենացնել ու զարգացնել Գյումրին, մենք շարունակելու ենք ձեռք ձեռքի տված բարեկարգել, նորոգել, մաքրել ու խնամել, ստեղծել ու ստեղծագործել այս քաղաքում, կյանքի կոչել և պատվով ավարտին հասցնել տասնյակ ծրագրեր: Քաղաքի շենացման գործում խիստ կարևոր է յուրաքանչյուրիս անձնական նվիրումը, սրտացավ ու հոգատար վերաբերմունքը քաղաքի ամեն մի քարին, ամեն մի ծառին ու թփին, ամեն մի անկյանը»,- նշեց Գյումրու համայնքապետ Վարդգես Սամսոնյանը։ Սամսոնյանի խոսքով, քաղաքի զարգացումը ուղիղ կապ ունի նաև աշխատատեղերի հետ, որոնց ստեղծման համար ջանք ու Եռանդ չի խնայվում։

«Գյումրու օր» տոնակատարության ամփոփիչ ակորդը տրվեց Աբովյան փողոցում, որտեղ ելույթ ունեցան «Բարբառ» փրոջեկտը, Գյումրու համայքապետարանի «Անի» փողային նվագախումբը, Գյումրու համայնքապետարանի «Դեղձանիկ» վոկալ-էստրադային համույթը, Գագիկ Մկոյանը, իսկ պարային ռիթմը վստահված էր DJ Jan-ին։

Քաղաք ժամանած հյուրերի խոսքով, երջանկանում են, երբ տեսնում են ծաղկող ու զարգացող Գյումրին։ Հավելենք, որ քաղաքի օր տոնակատարությունը կազմակերպելու համար, Գյումրու ավագանին հատկացրել է 9 մլն․ դրամ, պատասխանատուների խոսքով նախահաշիվը կազմել է մոտ 8 մլն դրամ։

 © progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Գյումրիում 3-րդ աստիճանի վթարային շենքերից համատիրությունները վճար են գանձում, բայց չեն սպասարկում

Գյումրիում համատիրություն-բնակիչ փոխադարձ անվստահությունը սրանում է հատկապես հին բնակֆոնդի շենքերի սպասարկման դեպքում։ Այս շենքերում խնդիրներն անթիվ են, համատիրությունների կատարած աշխատանքները՝ գրեթե անտեսանելի։

Հիմնովին նորոգման կարիք ունեն հատկապես վթարայնության 3-րդ եւ 4-րդ աստիճան ունեցող շենքերը։ Այս շենքերը թեեւ ենթակա են ամրացման, բայց անհասկանալի տրամաբանությամբ սպասարկումը հանձնված է համատիրություններին, որոնք չեն զլանում վթարային շենքերի բնակիչներից սպասարկման վճար գանձել։

Գյումրու Տեքստիլ թաղամասի Իսահակյան 9 շենքը կառուցվել է 1939 թվականին: Այս շենքում վերջին հետազննությունը կատարվել է 2006 թվականին: Արձանագրվել է, որ բնակելի շենքն ունի վթարայնության 3-րդ աստիճան:

Իսահակյան 9 շենքի նկուղները տարիներ շարունակ ջրածածկ են, վերին հարկի տներն էլ՝ կաթոցների ներքո։ Խոնավության հետեւանքով առաջին հարկերի մի քանի տներում տարիներ առաջ հատակներ էին փլուզվել, բնակիչներն հայտնվել էին նկուղներում։ Հիմա բնակիչների մի մասը շենքից հեռացել է։ Շենքի բնակիչները պատմում են, որ համատիրություն ունեն, որը թեեւ վթարային շենքը չի սպասարկում, բայց բնակիչներից սպասարկման վճար է գանձում։

Իսահակյան 9 շենքի բնակչուհի 82-ամյա Հռիփսիմե Նիկողոսյանն ասում է, որ ամեն ամիս պարտաճանաչ իրենց ընտանիքը համատիրությանը սպասարկման վճար է մուծում, սակայն վճարած գումարով շենքում որեւէ աշխատանք չի կատարվել։

Շենքի մյուս մուտքում է ապրում Նարինե Մաթեւոսյանը։ Մուտքի նկուղում 30 սմ բարձրության է հասնում ջուրը։ Նա է ջրի ճանապարհը բացել, որ այլ ուղղությամբ հոսի, ու բնակարանները չլցվի։ Խմելո°ւ ջուր է, թե° կոյուղաջուր. այդպես էլ չեն պարզել, որովհետեւ բնակիչների խնդրին արձագանքող չկա։

Նարինե Մաթևոսյանն ասում է, որ մինչև 2021 թվականը իրենք համատիրությանը վճարել են,  սակայն, տեսնելով, որ շենքում ոչինչ չի փոխվում, հրաժարվել են մուծել։

Շենքի բնակիչներից մեկն էլ, չցանկանալով ներկայանալ,  ասում է, որ իրենց նկուղը 30 տարի ջրով է պատված, բայց դա պատկան կառույցներից ոչ մեկին չի էլ մտահոգում։

«Ջուրը, երեւի, իրենցից ամոթով էր, տեսավ, որ ոչ մեկը իրեն ուշադրություն չի դարձնում, ինքն իրեն քաշվեց, վերացավ»,-կատակում է բնակիչը, հետո, վերհիշելով 10 տարի առաջ շենքում տեղի ունեցած փլուզումներն ու համատիրության անտարբեր վերաբերմունքը, ավելացնում է. «Շենքի վերին հարկից 12 խոշոր քար ընկավ, առաստաղի մի հատվածը բացվել էր։ Դիմեցի համատիրությանը, խնդրեցի, որ մի քանի թիթեղ տան, որ կարողանամ բացված մասերը փակել, կաթոցներ չլինեն։ Չտվեցին։ Ես էլ էլ չեմ մուծում։ 80 հազար դրամ ծախսեցի, ինքս թիթեղներ գնեցի ու վնասված տանիքը թիթեղապատեցի»։

Ըստ վթարային շենքի բնակիչների` անցած տարի իրենց խոստացել էին, որ շենքի կտուրները, նաեւ կոյուղատար ցանցը  պիտի փոխեն, որի վերաբերյալ համատիրության եւ համայնքապետարանի միջեւ համաձայնություն  էր լինելու: Արդյունքը, սակայն, դեռեւս չկա:

«Գյումրու առաջընթաց» քաղաքացիական հասարակության զարգացման կենտրոն» ՀԿ-ի հարցմանն ի պատասխան՝ Շիրակի մարզպետի տեղակալ Ալբերտ Այվազյանը տեղեկատվություն է տրամադրել Շիրակի մարզում առկա 3-րդ և 4-րդ աստիճանի վնասվածություն ունեցող բազմաբնակարան բնակելի շենքերի վերաբերյալ։

Շիրակի մարզում առկա 3-րդ և 4-րդ աստիճանի վնասվածություն ունեցող բազմաբնակարան բնակելի շենքերի վերաբերյալ

Շիրակի մարզում առկա է 3-րդ եւ 4-րդ աստիճանի վթարայնություն ունեցող ընդհանուր 114 շենք, որոնցից 92-ը գտնվում է Գյումրիում։ Վթարայնություն ունեցող ամենահին շենքերը քաղաքի կենտրոնում գտնվող Աբովյան 141-ը, Գորկի 30-ն ու Աճեմյան 26-ն են, որոնք կառուցվել են համապատասխանաբար՝ 1872, 1875 եւ 1895 թվականներին։

Վթարային շենքերի մի մասում վթարայնության հետազննությունը կատարվել է 2006, մյուսներում՝ 2007, որոշներում՝ 2009, 2015, 2017, 2019 եւ 2023 թվականներին։ 2023 թվականին մեկ շենքի վթարայնության հետազննություն է կատարվել՝ Գորկի 30։ Հետազննությունն իրականացնող Սեդրակ Մուրադյան անհատ ձեռներեցն արձանագրել է, որ այս բազմաբնակարան շենքն ունի վթարայնության 3-րդ աստիճան։

Ըստ մարզպետի տեղակալի` նախատեսվում է Գյումրի քաղաքի Տիգրան Մեծ թիվ 5 շենքի անբավարար տեխնիկական վիճակում գտնվող թվով 3 մուտքերի ուժեղացման-վերականգնման աշխատանքների կատարում:

Շիրակի մարզպետի խորհրդական, Գյումրու ավագանու «Քաղաքացիական պայմանագիր» խմբակցության անդամ Լիլիթ Մուրադյանի փոխանցմամբ` այդ շենքի ամրացման համար մեկ անգամ մրցույթ է հայտարարվել, սակայն մասնակցության հայտ ներկայացնող կազմակերպություն չի եղել, հիմա 2-րդ անգամ է մրցույթ հայտարարված։

Գյումրու ավագանու «Ապրելու երկիր» խմբակցության ղեկավար Կարեն Մալխասյանի խոսքով` կետային ու իրավիճակային են խնդիրների լուծումները բազմաբնակարան շենքերում, դրա համար էլ արդյունք չկա, այնինչ, համակարգային լուծումներ են պետք։

Ըստ ավագանու անդամի` պետք է գույքագրել շենքերում առկա խնդիրներն ու ծավալները եւ հետեւողականությամբ առաջ գնալ։ Եթե տարեկան 1-2 շենքում նորոգման լուրջ աշխատանքներ կատարվեն, ապա քաղաքացիները շահագրգիռ կլինեն, մյուս շենքերի բնակիչների մոտեցումն էլ կփոխվի համատիրությունների նկատմամբ։

«Եթե տարեկան կարողանայինք 2 շենք ամրացնել, ապա երկրաշարժին հաջորդած 36 տարիների ընթացքում արդեն 72 շենք ամրացված կլիներ Գյումրիում, իսկ մենք ունենք 92-ը»,-ասում է Կարեն Մալխասյանը։

Հեղինակ՝ Կարինե Կազարովա

#CivilSociety #CounterpartInternationalArmenia #NGOC #CSOs4Progress #NGOC4CSOs

Սույն հոդվածը հնարավոր է դարձել Ամերիկայի ժողովրդի առատաձեռն աջակցությամբ՝ ԱՄՆ Միջազգային զարգացման գործակալության (ԱՄՆ ՄԶԳ) միջոցով։ Բովանդակության համար պատասխանատվություն է կրում Քաունթերփարթ Ինթերնեշնլի ենթադրամաշնորհառու «Գյումրու առաջընթաց» քաղաքացիական հասարակության զարգացման կենտրոն» հասարակական կազմակերպությունը, և այն պարտադիր չէ, որ արտահայտի ԱՄՆ ՄԶԳ-ի, Միացյալ Նահանգների կառավարության և Քաունթերփարթ Ինթերնեշնլի տեսակետները։

 © progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com