ԱԺ-ն ընդունեց տեսակապով դատական նիստերի անցկացման նախագիծը
Սարգսյանի ներկայացրած «ՀՀ քրեական դատավարության օրենսգրքում լրացումներ կատարելու մասին» և հարակից օրենքների փաթեթը։
Նախարարի խոսքով՝ նախաձեռնությամբ նախատեսվում է քրեական դատավարության և քրեակատարողական փուլերում, անհրաժեշտության դեպքում, դատական նիստերն անցկացնել նաև տեսակապի ձևաչափով։
Ընդունված փոփոխությունների համաձայն՝ ձերբակալված, կալանքի տակ գտնվող մեղադրյալները և ազատազրկված դատապարտյալները օրենքով սահմանված դեպքերում կարող են դատական նիստերին մասնակցել տեսակապի միջոցով՝ ինչպես քրեական դատավարության, այնպես էլ պատժի կատարման փուլում։ Տեսակապը կարող է կիրառվել ինչպես մեղադրյալի միջնորդությամբ, այնպես էլ դատարանի նախաձեռնությամբ՝ օրենքով նախատեսված հիմքերի առկայության դեպքում։
Տեսակապի կիրառումը հնարավոր կլինի հասարակական կարգի, առողջության, դատավարության մասնակիցների իրավունքների և անվտանգության պաշտպանության, հանցագործությունների կանխման, ինչպես նաև դատական քննությունը ողջամիտ ժամկետում կազմակերպելու նպատակով։
Օրենքով նախատեսվում է նաև ապահովել պաշտպանի և պաշտպանյալի միջև հաղորդակցության գաղտնիությունը, դատավարության մասնակիցների իրավունքների պաշտպանությունը և անհրաժեշտ տեխնիկական պայմանները։
«Հաշվի առնելով այս ինստիտուտի վերաբերյալ Եվրոպական դատարանի վճիռներն ու այլ երկրների փորձը, ինչպես նաև պահպանելով միջազգային բոլոր չափանիշները՝ նախատեսել ենք տեսակապով դատական նիստերի անցկացման հնարավորություն։ Միաժամանակ սահմանվել են բոլոր այն իրավաչափ պայմանները, որոնք կերաշխավորեն կողմերի իրավունքների պաշտպանությունն ու համաչափությունը»,- նշել է Արփինե Սարգսյանը։
Նրա խոսքով՝ առաջինից երկրորդ ընթերցման ընթացքում փաթեթում ներառվել է նաև «Ձերբակալված և կալանավորված անձանց պահելու մասին» օրենքում լրացում կատարելու նախագիծը, քանի որ նոր կարգավորումները վերաբերում են ազատությունից զրկված բոլոր անձանց։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Ընտրական իրավունքի սահմանափակման նախագծերը պետք է հանրային քննարկման առարկա դառնան
ՄԻՊՄարդու իրավունքների պաշտպանը անդրադարձել է ընտրելու և հանրաքվեին մասնակցելու իրավունքի սահմանափակմանն առնչվող օրենսդրական նախաձեռնություններին՝ նշելով, որ մարդու իրավունքների պաշտպանության ոլորտում գործող մի շարք դերակատարներ մտահոգություններ ունեն առաջարկվող կարգավորումների՝ ՀՀ Սահմանադրությանը համապատասխանության վերաբերյալ։
Պաշտպանի տարածած հաղորդագրության համաձայն՝ թեև միջազգային փաստաթղթերով պետություններին վերապահված է ընտրական և հանրաքվեի իրավունքի շրջանակը սահմանելու որոշակի հայեցողություն, այնուամենայնիվ, առաջարկվող փոփոխությունները կարող են ունենալ մարդու իրավունքների պաշտպանության համակարգի վրա ազդեցություն։
«Նկատի ունենալով, որ իրավունքների սահմանափակմանն առնչվող ցանկացած նախաձեռնություն ազդեցություն է ունենում մարդու իրավունքների ընդհանուր համակարգի տեսանկյունից՝ Մարդու իրավունքների պաշտպանը կարևորում է, որպեսզի նախագծերի առնչությամբ իրականացվեն հանրային քննարկումներ շահագրգիռ դերակատարների մասնակցությամբ»,– նշված է հաղորդագրությունում։
Հիշեցնենք, որ ներկայում քննարկման փուլում են Ընտրական օրենսգրքում և «Հանրաքվեի մասին» սահմանադրական օրենքում փոփոխությունների նախագծերը։ Դրանցով առաջարկվում է ընտրելու և հանրաքվեին մասնակցելու իրավունքը պայմանավորել Հայաստանում փաստացի բնակվելու պահանջով։
Նախագծի համաձայն՝ ընտրելու իրավունք ունենալու համար քաղաքացին վերջին երկու տարվա ընթացքում պետք է առնվազն 366 օր փաստացի բնակված լինի Հայաստանի Հանրապետությունում։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Գյումրիում այսօր մեկնարկեց 2026 թվականի ամառային զորակոչը
Ամենափրկիչ եկեղեցու հարակից տարածքից ծառայության ճանապարհվեցին այս տարվա ամառային առաջին նորակոչիկները։ Նրանց ճանապարհելու էին եկել Շիրակի մարզի ղեկավարությունը, զինվորական կոմիսարիատի ներկայացուցիչները, ինչպես նաև նորակոչիկների հարազատները։
Շիրակի մարզպետ Դավիթ Առուշանյանը շնորհավորել է ծառայության մեկնող երիտասարդներին՝ մաղթելով խաղաղ և անվտանգ ծառայություն, առողջություն, ամուր կամք ու բարեհաջող վերադարձ հայրենիք։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
🗳️ «Հետընտրական գործընթացներ. ընտրությունների արդյունքների վիճարկում»
2026 թվականի հունիսի 27-ին «Երկխոսություն» մեդիա կենտրոնում տեղի ունեցավ «Հետընտրական գործընթացներ. ընտրությունների արդյունքների վիճարկում» թեմայով հանրային քննարկումը։
Քննարկման ընթացքում մասնակիցներն անդրադարձան՝
ընտրությունների արդյունքների վիճարկման գործընթացին, Սահմանադրական դատարանում քննվող դիմումներին, արտերկրում բնակվող քաղաքացիների ընտրական իրավունքի սահմանափակման նախաձեռնությանը, գաղտնի ձայնագրությունների իրավական ուժին, ընտրակաշառքի վերաբերյալ հնարավոր իրավական պատասխանատվությանը, հետընտրական քաղաքական և իրավական զարգացումներին։
Բանախոսներ՝
Մարիամ Հովեյան – ընտրական գործընթացների փորձագետ Վիկտորյա Եղոյան – դիտորդական առաքելության իրավաբան, «Ժուռնալիստների Ասպարեզ» ակումբ Գայանե Գևորգյան – իրավապաշտպան
Լուսինե Մովսիսյան
Քննարկման ամբողջական տեսագրությունը՝
**ENG**
Post-Election Developments: Challenging the Election Results The discussion covered: challenges to the election results, cases pending before the Constitutional Court, the legislative initiative concerning voting rights of citizens living abroad, the legal implications of secret recordings, potential liability related to vote buying, key post-election political and legal developments. Speakers: Mariam Hoveyan – Electoral Processes Expert Victoria Yeghoyan – Legal Expert, Election Observation Mission, Asparez Journalists’ Club Gayane Gevorgyan – Human Rights Defender Lusine Movsisyan
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Արգելանք է դրվել Իշխան Սաղաթելյանի և նրա կնոջ գույքի տնօրինման վրա
ՀՀ քննչական կոմիտեում Հարկադիր կատարումն ապահովող ծառայությունից ստացված հաղորդման համաձայն՝ ՀՀ հակակոռուպցիոն դատարանի կողմից 2026 թվականի հունվարի 5-ին տրված կատարողական թերթով արգելվել է Ի.Ս.-ին և նրա կնոջը՝ իրենց պատկանող գույքերի տնօրինման հետ կապված որևէ գործողություն կատարել: Բացի այդ, դատարանի որոշմամբ 258 մլն 146 հզր 843 ՀՀ դրամի չափով պետք է արգելանք դնել Ի.Ս.-ին և Լ.Խ.-ին սեփականության իրավունքով պատկանող գույքերի վրա:
Հարուցված կատարողական վարույթի ընթացքում 2026 թվականի փետրվարի 2-ին Ի.Ս.-ն հրաժարվել է ներկայացնել «Գույքի, եկամուտների և գույքային իրավունքների, այդ թվում՝ պահանջի իրավունքների կազմի, քանակի և գտնվելու վայրի մասին հայտարարագիր»։
2026 թվականի ապրիլի 28-ին Ի.Ս.-ն ներկայացրել է հայտարարագիր, որում ի թիվս այլի նշել է գույք, որը հանդիսանում է պարտադիր առգրավման ենթակա գույք: Տվյալ գույքի վրա դրվել է արգելանք:
Ստացված հաղորդման հիման վրա նախաձեռնվել է քրեական վարույթ՝ Քրեական օրենսգրքի 509-րդ հոդվածի 1-ին մասի 2-րդ կետի (արգելանքի տակ գտնվող գույքի նկատմամբ ապօրինի արարքը) հատկանիշներով:
Բացի այդ, քրեական վարույթի նախաքննության ընթացքում քննիչի կողմից ներկայացված հաղորդման հիման վրա նախաձեռնվել է ևս մեկ քրեական վարույթ՝ Քրեական օրենսգրքի 510-րդ հոդվածի 1-ին մասի (պարտապանի կողմից սեփականության իրավունքով իրեն պատկանող գույքի և գույքային իրավունքների կազմի, քանակի և գտնվելու վայրի մասին հայտարարագիր ներկայացնելուց խուսափելը) հատկանիշներով: Նշված քրեական վարույթները միացվել են:
2026 թվականի հունիսի 23-ին Ի.Ս.-ի բնակության վայրում, նրա կնոջը սեփականության իրավունքով պատկանող երկու տրանսպորտային միջոցներում կատարվել է խուզարկություն, որի ընթացքում հայտնաբերվել են արտարժույթի տեսքով դրամական միջոցներ և ոսկյա զարդեր:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Բացահայտվել են բարեգործության արգելքը խախտելու հերթական դեպքերը
ՀՀ հակակոռուպցիոն կոմիտեի և ՀՀ ազգային անվտանգության ծառայության կողմից իրականացված միջոցառումների հիման վրա Հակակոռուպցիոն կոմիտեում նախաձեռնված վարույթով փաստական տվյալներ են ստացվել այն մասին, որ «Հայաստան» կուսակցությունների դաշինքի պատգամավորի թեկնածունները նույն դաշինքի համակիրների և այլ անձանց հետ Ազգային ժողովի ընտրություններին հիշյալ դաշինքի օգտին քվեարկելու, ինչպես նաև ընտրակաշառքի դիմաց նշված դաշինքի օգտին քվեարկելու պատրաստակամ անձինք հավաքագրելու պայմանով Շիրակի մարզի մի շարք բնակիչների տվել են տարբեր չափերի ընտրակաշառք։
Դեպքի առթիվ ՀՀ հակակոռուպցիոն կոմիտեում նախաձեռնված քրեական վարույթով ձերբակալվել են մի շարք անձինք, կատարվել են խուզարկություններ և վարութային այլ գործողություններ։Մանրամասները՝ տեսանյութում ` http://facebook.com/reel/27424331473882811/?s=single_unit
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Քննարկվել են գերիների և անհայտ կորածների հարցերը
2026 թվականի հունիսի 22-ին ՀՀ ազգային անվտանգության ծառայության տնօրեն Ա. Սիմոնյանի գլխավորությամբ տեղի ունեցավ Գերիների, պատանդների և անհայտ կորած (գտնվելու վայրը անհայտ) անձանց հարցերով զբաղվող միջգերատեսչական հանձնաժողովի հերթական նիստը։ Այս մասին տեղեկացնում են ԱԱԾ-ից:
Հանձնաժողովի նախագահ՝ ՀՀ ազգային անվտանգության ծառայության տնօրեն Ա. Սիմոնյանը բացման խոսքում ներկայացրել է նախորդ նիստի ընթացքում արձանագրված հիմնական խնդիրների և դրանց լուծման ուղղությամբ իրականացված հանձնարարականների կատարման ընթացքը։ Անդրադարձ է կատարվել 2026 թվականի մայիսի 1-ից ուժի մեջ մտած «Ռազմական գործողությունների հետևանքով ստեղծված պայմաններում և հանգամանքներում անհայտ կորած անձանց մասին» ՀՀ օրենքի իրավակարգավորումներին՝ ընդգծելով դրանց կարևորությունը անհայտ կորած անձանց հարցերի համակարգային կարգավորման տեսանկյունից, ինչպես նաև օրենքի կիրարկմանն ուղղված կազմակերպչական միջոցառումներին։
Նիստի ընթացքում անդրադարձ է կատարվել տարբեր պետական մարմինների և շահագրգիռ կառույցների միջև աշխատանքների համակարգման հետ կապված հարցերին: Քննարկումների արդյունքում տրվել են համապատասխան հանձնարարականներ, սահմանվել են հետագա աշխատանքների կազմակերպման հիմնական ուղղությունները։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Հայկական ընտրություններն ու ծուռ հայելիների թագավորությունը
Հայաստանում հետընտրական կրքեր են, սակայն այդ կրքերը ոչ թե հրապարակներում ու փողոցներում են, այլ կուսակցական գրասենյակներում ու քարոզչական հարթակներում։
2018 թվականին նախորդող բոլոր համապետական ընտրություններում պատկերը բոլորովին այլ էր։ Կեղծված ընտությունների հենց հաջորդ օրը ժողովրդի մի զգալի հատված ինքնաբուխ դուրս էր գալիս փողոցներ եւ իր դժգոհությունն արտահայտում ընտրությունների արդյունքների հանդեպ՝ պահանջելով արդարություն։ Սա կարեւոր ցուցիչ է տեղի ունեցած ընտրությունների նկատմամբ հանրային ընկալման առումով։
Կենտրոնական ընտրական հանձնաժողովը՝ ամփոփելով ընտրությունների վերջնական արդյունքները, հրապարակել է խորհրդարան անցած քաղաքական ուժերի ցանկը եւ այդ ուժերի ստացած մանդատների քանակը։ Ըստ այդմ, խորհրդարան անցած երեք ուժերից <Քաղաքացիական պայմանագիր> կուսակցությունը նոր խորհրդարանում ունենում է 64, <Ուժեղ Հայաստանը>՝ 29-ը, <Հայաստան> դաշինքը՝ 12 մանդատ։
Այսպիսով, <Քաղաքացիական պայմանագիրը> իրավունք է ստանում ձեւավորել կառավարություն, խորհրդարանում ունենում է երեք հինգերորդ մանդատների քանակ, այսինքն՝ որակյալ մեծամասնություն, ինչը հնարավորություն է տալիս ընդունել սահմանադրական օրենքներ եւ ընտրել մի շարք հանգուցային պաշտոնյաների։ Սակայն իշխող կուսակցությանը չհաջողվեց ձեւավորել երկու երրորդի՝ սահմանադրական մեծամասնություն, այսինքն՝ ուժերի այս համամասնությամբ ՔՊ-ն ի զորու չէ փոփոխություններ կատարել Սահմանադրության մեջ։
Ընտրությունների նախնական արդյունքների հրապարակումից հետո կնճռոտ հարցը մնացել էր ԲՀԿ-ի՝ չորս տոկոսանոց անցողիկ շեմը հաղթահարելու խնդիրը։ <Բարգավաճ Հայաստանը> հույս ուներ մի քանի տեղամասերում վերահաշվարկների արդյունքում լրացնել պակասող մի քանի տասնյակ ձայները։ Այդպես էլ կլիներ, եթե առաջ չգար եւս երկու-երեք ընտրատեղամասերում վերահաշվարկներ իրականացնելու անհրաժեշտությունը։ Խոսքը վերաբերում է այն տեղամասերին, որտեղ քվեարկել էին զորամասերի զինվորները, ընդ որում, այդտեղ քվեարկությունը շարունակվել էր ժամը 20.00-ից հետո, ինչը օրենքի խախտում է։
Այդ խախտման մասին բարձրաձայնում էին հենց ընդդիմության՝ <Ուժեղ Հայաստանի>, <Հայաստան> դաշինքի եւ ԲՀԿ-ի ներկայացուցիչները, որոնք պահանջում էին անվավեր համարել այդ տեղամասերի արդյունքները։ Կենտրոնական ընտրական հանձնաժողովը ընդունեց ռուսամետ ընդդիմադիրների այդ պահանջը եւ անվավեր համարեց այդ տեղամասերի քվեարկության արդյունքները, ինչից հետո ընդդիմադիրներն արդեն սկսեցին դժգոհել այդ որոշումից՝ պահանջելով հիշյալ տեղամասերում նշանակել վերաքվերակություն։
Սակայն այս անգամ ԿԸՀ-ն չընդունեց ընդդիմադիրների այդ պահանջը՝ դա պատճառաբանելով, թե <մասնակի վերաքվեարկության դեպքում առաջանում է հետեւյալ խնդիրը։ Հիմնական քվեարկությանը մասնակցած ընտրողները քվեարկել են այն պահին, երբ ընդհանուր արդյունքը հայտնի չէր։ Նրանք չգիտեին՝ ով է առաջատար, քանի ձայնի տարբերություն կա, որ ուժը կհաղթահարի շեմը կամ իրենց քվեն ինչ ազդեցություն կունենա վերջնական արդյունքի վրա։ Մինչդեռ վերաքվեարկության մասնակից ընտրողները քվեարկելու են արդեն այլ իրավիճակում․նրանց համար կարող է հայտնի լինել ընդհանուր պատկերը։ Այս պայմաններում ընտրողի կամքը կարող է ձեւավորվել ոչ թե իր սկզբնական քաղաքական նախապատվությամբ, ազատ կամարտահայտությամբ, այլ արդեն հայտնի արդյունքը խմբագրելու հաշվարկով։ Այս ռիսկը սովորաբար բնութագրվում է որպես տակտիկական քվեարկություն (tactical voting)>։
Ռուսամետ երեք ուժերը, եւս երեք կուսակցություններ (<Հայ ազգային կոնգրես>, <Լուսավոր Հայաստան>, <Ազգային-ժողովրդավարական բեւեռ>) ընդհանուր հայտարարությամբ չեն ընդունում ընտրությունների արդյունքները, հայտարարում են իշխանության կողմից ընտրություններն համատարած կեղծելու, տարատեսակ ընտրակեղծիքների մասին, անգամ այս տարվա ընտրություններն անվանում ամենախայտառակը հայաստանյան ընտրությունների պատմության մեջ։
Հանուն արդարության պետք է ասել, որ եթե ԲՀԿ-ի հետ կապված խնդրի պահով կարելի է ինչ-որ վիճահարույց դրվագներ նկատել, ապա ընտրությունների կեղծման առումով ընդդիմադիրները որեւէ հիմնավորված փաստարկ չեն բերում՝ սահմնափակվելով ընդհանուր ու վերացական հայտարարություններով։ (Հատկանշական է, որ հայաստանյան ընտրությունների մասին ընդդիմադիրները խոսում են հենց այն արտահայտություններով ու բնութագրումներով, որոնք հնչում են ռուսաստանյան շրջանակներից, կարծես այնտեղից ուղարկված ուղեցույցով)։
Այդ կուսակցություններից մի քանիսը դիմել են Սահմանադրական դատարան՝ վիճարկելով ընտրությունների արդյունքները։ <Ուժեղ Հայաստանի> առաջնորդ Սամվել Կարապետյանն էլ հայտարարել է հետընտրական կոալիցիա ձեւավորելու մասին։ Այս որոշումը ինչ-որ տեղ զարմանալի է այն առումով, որ ընդդիմությանը, ինչ-ինչ պատճառերով, ժամանակին չհաջողվեց ձեւավորել նախընտրական կոալիցիա, ինչի փորձերը մի քանի ձեւաչափերով ձեռնարկվել էին եւ այդ փորձերի հաջողության դեպքում կարող էին ավելի արդյունավետ լինել։
Այս ամենին զուգահեռ, իշխող <Քաղաքացիական պայմանագիր> կուսակցության ներկայացուցիչներն էլ հայտարարում են խորհրդարան անցած ուժերի ոչ լեգիտիմ լինելու մասին՝ նկատի ունենալով ռուսամետ երեք ուժերի կողմից բաժանված մեծածավալ ընտրակաշառքները, որոնց մասին ձայնագրությունները ամենօրյա ռեժիմով հրապարակում է Հակակոռուպցիոն կոմիտեն։
Հատկանշական է, որ այս օրերին իշխանությունը մի շարք օրինագծեր է քննարկում ընտրակաշառքի հետ կապված խնդիրները լուծելու ու դրանք արմատախիլ անելու ուղղությամբ։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Հակակոռուպցիոն կոմիտեն բացահայտել է ընտրակաշառք տալու, ստանալու հերթական դեպքերը
Կոմիտեի ծառայողների կողմից իրականացված միջոցառումների արդյունքում փաստական տվյալներ են ստացվել այն մասին, որ «Բարգավաճ Հայաստան» կուսակցության ներկայացուցիչները Ազգային ժողովի ընտրություններին իրենց կուսակցության օգտին քվեարկելու և աջակիցներ հավաքագրելու պայմանով Լոռու մարզի Սպիտակ համայնքի Գոգարան բնակավայրի և հարակից շրջանների մի շարք ընտրողների տվել են ընտրակաշառք։
Դեպքի առթիվ ՀՀ հակակոռուպցիոն կոմիտեում նախաձեռնվել է քրեական վարույթ, ձերբակալվել են մի շարք անձինք, կատարվել են վարութային գործողություններ։
Մանրամասները՝ տեսանյութում։ https://www.facebook.com/reel/1029175329594703
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com