Շահագործվեց Գյումրու ավտոմաքսատան առաջին հատվածը
Այսօր շահագործման հանձնվեց Գյումրու նոր ավտոմաքսատան առաջին հատվածը: Աշխատանքներն ամբողջությամբ դեռ ավարտված չեն, սակայն մաքսազերծման գործընթացի համար խնդիրներ չկան:
Առաջին օրն արդեն առաջին աշխատանքային ժամերին 100 մեքենա է մաքսազերծել: Այսօրվանից սկսած Գյումրի կգան նաեւ ավտոքարշակներով մեքենաները :
«Սահմանը հատած ավտոքարշակներով մեքենաները տեղափոխվելու են այս տարածք, բայց դեռ տեղ չեն հասել, ինձ թվում է վաղն առաջին ավտոքարշակն այստեղ կլինի: Ավտոքարշակներին ամբողջովին սպասարկելուն պատրաստ ենք, դրանք ձեւակերպող 12 տեսուչ կա Գյումրիում: Այն պահին, երբ հավելյալ գործառույթ կտեղափոխենք այստեղ , աշխատակիցների թիվն էլ կավելացնենք: Մենք կադրային ռեսուրսի առումով ամբողջովին պատրաստ ենք եւ ինչպես հայտարարել ենք, ամեն ինչ փորձելու ենք անել, որ բեռնարկղերով եկած մեքենաներն էլ կարողանանք այստեղ սպասարկել: Բեռնարկղերով սահմանը հատած մեքենաները միակն են, որ մնացել են այսօր Երեւանում: Այսինքն, այն պահից, երբ որ բեռնարկղերով մեքենաներն էլ կտեղափոխենք այստեղ , իսկ դա կլինի մոտ ապագայում, կարող ենք հայտարարել, որ արդեն մաքսազերծման գործընթացը տեղափոխեցինք Գյումրի»,-լրագրողների հետ զրույցում տեղեկացրեց ՊԵԿ նախագահի տեղակալ Շուշանիկ Ներսիսյանը:
Այն, որ տարածքոիմ մշտապես եւ երկար ձգվող հերթեր կան, ըստ Շուշանիկ Ներսիսյանի, բնական է: «Ասում ենք հերթեր են, բայց մենք ինչ ենք հասկանում հերթ ասելով: Այսօր մաքսատան աշխատանքային օրը սկսվելուն պես դռան մոտ արդեն կանգնած են լինում 300-ից 350 մեքենա: Եվ, եթե մենք ուզում ենք, ոչ այդ 350 մեքենան 15 րոպեում սպասարկվի, ուրեմն ժամը 09:00-ին ՊԵԿ-ը պետք է 350 ձեւակերպող տեսուչ ունենա, ինչն այս կարճ ժամկետի համար արդարացված չէ»,-պարզաբանեց Ներսիսյանը:
Մինչեւ ժամը 18:00-ն Գյումրի մտած բոլոր մեքենաները սպասարկվում են հենց նույն օրը: Բանկերի մասնաճյուղերի հետ ձեռք է բերվել պայմանավորվածություն, որպեսզի մի փոքր երկար աշխատեն, որպեսզի ժամը 18:00-ին մեքենայի մաքսազերծման փաստաթղթերն իր ձեռքում ունեցող վարորդը նաեւ վճարումները կարողանա կատարել եւ գնալ Գյումրիից:
Գյումրիում խոսակցություններ կան, որ մեքենայի հերթերը վաճառվում են: Շուշանիկ Ներսիսյանն ասաց արդեն որոշակի քայլեր ձեռնարկվել են: «Մենք էլ ենք տիրապետում նման տեղեկությունների, մեզ էլ են դրանք հասել, բայց այդ ամենը կատարվում է փողոցում, մաքսատան տարածքից դուրս: Մենք համագործակցում ենք ոստիկանության հետ, եթե չեմ սխալվում մի քանի քաղաքացի արդեն հրավիրվել է ոստիկանություն»:
Նորագավիթի մաքասատունը կգործի մինչեւ տերեվերջ: Այս պահին ՀՀ մաքսակետերում օրական 1000 ավտոմեքենա է սպասարկվում, քարշակներով մտնում է մոտ 250-ից 300 մեքենա, բեռնարկղերով մեքենաների թիվն օրական մոտ 200 է: Այդ ամբողջ ծավալն, ըստ ՊԵԿ նախագահի տեղակալի, առաջիկայում կսպասարկեն Գյումրիում:
Ա․ Մինասյան
©progressgyumri.am Armenian News/Analyses:
Tel: +37498 691-690; E-mail: progressgyumri@gmail.com ; progressgyumri@mail.ru
#Ասուլիս «Հնարավորություններ երիտասարդների համար»
#Youth #Opportunities
——————————————————————
📌Հանդիպումը նախատեսված է Բավարիայի Երիտասարդական Խորհրդի (BJR) և Նոր Սերունդ Մարդասիրական ՀԿ-ի (ՆՍՀԿ) շարունակական համագործակցության արդյունքում իրականցված և իրականացվելիք երիտասարդական ծրագրերի լուսաբանման համար։
Հանդիպման մանրամասներ․ 1․ BJR-ի մասին – 5 րոպե 2․ ՆՍՀԿ-ի մասին – 5 րոպե 3․ Համատեղ ծրագրերի մասին 4․ BJR-ի նպատակները երիտասարդների զարգացման գործում միջազգային հարթակում
5․ Փոքր դրամաշնորհների մասին ակնարկ 6․ Երիտասարդական փոխանակման ծրագրերը 7․ Հնարավորությունները երիտասարդների համար 8․ Հարց ու պատասխան
——————————————————————
Ուղիղ հեռարձակում 🔴
ℹ Բանախոսներ՝
➡ Գաբրիելլե Վայցման Բավարիայի Երիտասարդական Խորհրդի (BJR) գործադիր տնօրեն,
➡ Արման Սահակյան Նոր Սերունդ Մարդասիրական ՀԿ-ի գրասենյակի ղեկավար
🔗 Համակարգող՝ Լուսինե Մովսիսյան
«Շիրակի մարզի համայնքների սահմանների անճշտություններ»
#Shirak #Region #Borders
——————————————————————
📌Շիրակի մարզի համայնքներում ինչպիսի՞ սահմանային անճշտություններ կան, ինչու՞ են դրանք առկա եւ խնդրի լուծման ի՞նչ ճանապարհներ են մշակված։ Արդյո՞ք համայնքների խոշորացումն ունեցել է դերակատարում եւ ո՞ր համայնքներում է ներկա պահին խնդիրն առկա։
——————————————————————
Ուղիղ հեռարձակում 🔴
ℹԲանախոսներ՝
➡ Զորիկ Խաչատրյան ՇՄ հողաշինության եվ հողօգտագործման բաժին-հողային պետական տեսչության պետ
➡ Երվանդ Հակոբյան Անուշավան համայնքի ղեկավար
➡ Մերգել Ղարիբյան Արփի համայնքի ղեկավար
➡ Մխիթար Վարագյան Արթիկի համայնքապետ
🔗Արմենուհի Մինասյան
Հակաիշխանական ընդհանուր բեւեռ է ձեւավորվում
Հայաստանում կարծես թե հակաիշխանական կոնկրետ բեւեռ է ուրվագծվում։ Անցած մեկուկես տարում իշխանության դեմ քննադատությունների, հակաքարոզչության, տարբեր խնդիրներով լոկալ բողոքի ակցիաների, տարվող քաղաքականության դեմ պայքարի պակաս չի զգացվել։ Ինչքան էլ այդ ամենը եղել են տարանջատ, մասնակի, ցաքուցրիվ ու թույլ գործողություններ, որոնք հանրային ընկալում ու տարածում չեն ունեցել, սակայն դժվար չէ ենթադրել, որ դրանք որոշակիորեն ուղղորդվել կամ կառավարվել են նույն կենտրոնից, հնարավոր է նաեւ՝ կենտրոններից։
Այդ կենտրոնը կամ կենտրոններն առնչվում են ռոբերտքոչարյանական ու սերժսարգսյանական շրջանակներին, որոնք ինչքան էլ լինեն տարասեռ, իրար հետ ունենան որոշակի տարաձայնություններ, չպարզված խնդիրներ, քաղաքական տարբեր դիրքավորումներ ու նպատակներ, այնուամենայնիվ, ընդհանրություններ ունեն ու միասնական են մեկ հարցում՝ ակնհայտ թշնամական վերաբերմունք Հայաստանում տեղի ունեցած հեղափոխությանն ու դրա արդյունքում ձեւավորված իշխանությանը։
Այս վերջին օրերին կարծես փորձ է կատարվում հակաիշխանական տարանջատ գործողություններին ու պայքարի օջախներին հաղորդել միասնական պայքարի բնույթ՝ ինչպես կազմակերպչական, այնպես էլ գաղափարական առումով։
Մեկ գաղափարի՝ պահպանողականության ու ազգայինի դրոշի տակ են հավաքվել նախկին իշխանության ու դրանց հետ փոխկապակցված շրջանակները՝ քոչարյանականներ, Սերժ Սարգսյանի կողմնակից հանրապետականներ, դաշնակցականներ, որոնք լայն քարոզչություն են տանում, թե Հայաստանի իշխանությունը վարում է ապազգային, ազգային արժեքներին դեմ քաղաքականոււթյուն։
Նրանք նաեւ այն դավադրապաշտական միտքն են զարգացնում, թե իբր Հայաստանի իշխանությունն այդ՝ իրենց բնորոշմամբ «ապազգային» քաղաքականությունն իրականացնում է արեւմտյան որոշակի կենտրոնների հրահանգավորմամբ ու պարտադրմամբ, ձեռաց հետ էլ վերստին ասպարեզ են նետում հայկական հեղափոխության արեւմտյան կամ, այսպես ասած, «սորոսական» ծագման մասին թեզը, ինչը ոչ այլ ինչ է, քան անարգանք մեկուկես տարի առաջ փողոցներ դուրս եկած հարյուր հազարավոր հայ մարդկանց հասցեին։
Ըստ էության, նախկինները գտել են հայ հանրության համար շատ զգայուն թեմաներ ու ասելիք եւ փորձում են դրանց քողի տակ հարվածներ հասցնել իշխանությանն ու առաջ տանել իրենց պայքարը։
Այդ քողը նախկիններն օգտագործել են նաեւ իրենց իշխանության տարիներին եւ չեն խորշել հայրենասիրության, ազգասիրության, ազգային արժեքների պահպանման մասին կուրծք ծեծելով հանդերձ՝ թալանել երկիրը, կոռուպցիոն ցանցեր հյուսել, անօրինականություններ անել, ընտրություններ կեղծել, բանակի համար նախատեսված միջոցներ մսխել։ Այս շարքը կարելի է անվերջ շարունայկել։
Նախկինների այդ «հայրենասիրական» գործողություններին մեր հանրությունը շատ լավ ծանոթ է։ Եւ պատահական չէ, որ այսօր էլ հանրության մեծ մասը չի հավատում նրանց ազգասիրական կուրծքծեծոցներին ու պաթոսային հռետորաբանությանը, եթե անգամ նրանց ասելիքում կարող են լինել օբյեկտիվ ու դրական պահեր։
Օրինակ, այս օրերին դաշնակցականներն ու հանրապետականներն աղմկոււմ են կրթության, գիտության, մշակույթի ու սպորտի նախարարության հեղինակած օրենքի նախագծի ու դրա դրույթներից մեկի դեմ, որով նախատեսվում է բուհերի ոչ մասնագիտական բաժիններում հայոց լեզու, գրականություն եւ հայ ժողովրդի պատմություն առարկաները դարձնել ոչ պարտադիր եւ դրանց դասավանդման պահանջը վերապահել բուհերին։
Սա, անշուշտ, խիստ մասնագիտական հարց է ու վերաբերում է դպրոցական եւ բուհական համակարգերի կրթական ու ծրագրային իրողություններին ու որակին, որոնք տարիներ շարունակ եղել ու կան շատ ցածր մակարդակում։ Դաշնակցականների ընդդիմախոսներն հիշեցնում են, որ այդ «որակը» տվել են հենց դաշնակցական նախարարները, որոնք պատասխանատու են Հայաստանի դպրոցական ու բուհական համակարգերի՝ ներկայիս անմխիթար վիճակի համար։
Հիշատակելի է նաեւ, որ հայոց լեզվի, հայապահպանության դիրքերից հանդես եկող դաշնակցական նախարարի օրոք էր ժամանակին ծրագրավորվել օտարալեզու դպրոցների բացման նախաձեռնությունը, ռուսերենին հատուկ կարգավիճակ տալու նախագիծը, որոնք բնավ համահունչ չեն ազգային արժեքների գաղափարաբանությանը։ Էլ չասած՝ դաշնակցական ու հանրապետական նախարարների օրոք դպրոցներում ու բուհերում մեծ ծաղկում ապրած կոռուպցիային եւ այդ համակարգրի համատարած կուսակցականացման երեւույթներին, որոնք մեծ հարվածներ են հասցրել այս ոլորտներին։ Այսպիսի գործունեությունը եւս որեւէ ընդհանրություն չունի հայրենասիրության, ազգապահպանության ու ազգային արժեքների հետ։
Այս ամենով հանդերձ, պետք է նկատել, որ մի շարք խնդիրների շուրջ բարձրացված հանրային որոշակի դժգոհությունից ու բողոքի ցույցերից իշխանությունը պետք է ինչ-ինչ հետեւություններ անի ու դրանք հաշվի առնի կրթական ոլորտում բարեփոխումներ կատարելիս։
Հ. Կիրակոսյան
©progressgyumri.am Armenian News/Analyses: Tel: +37498 691-690; E-mail: progressgyumri@gmail.com ; progressgyumri@mail.ru
Գյումրու ավագանին հաստատեց 25 նախագիծ
Այսօր Գյումրու համայնքապետարանի վարչական կայացավ Գյումրի համայնքի ավագանու յոթերորդ նստաշրջանի երրորդ նիստը: Օրակարգ ընդգրկված 25 նախագիծն էլ ընդունվեց: «Հայկական Կարիտաս» բարեսիրական հասարակական կազմակերպությանը, որպես նվիրատվություն, հատկացվեց 1 մլն 200 հազար դրամ` 2019-2020 թվականների ձմռան ընթացքում համայնքի թվով 400 կարիքավոր ծերերի ջեռուցման կարիքները հոգալու նպատակով Դրամական օգնություն հատկացվեց նաեւ սոցիալապես անապահով պայմաններում ապրող Արցախյան պատերազմում (1991-1994թվականներին) զոհված՝ թվով 104 ազատամարտիկների ընտանիքի, յուրաքանչյուրին՝ 20 000 դրամ, զոհված (մահացած) թվով 173 զինծառայողների ընտանիքի, յուրաքանչյուրին՝ 20 000 դրամ, Արցախյան պատերազմի 1-ին կարգի հաշմանդամ թվով 15 ազատամարտիկի, յուրաքանչյուրին 15.000 դրամ, 2-րդ, 3-րդ կարգի հաշմանդամ՝ թվով 232 ազատամարտիկի, յուրաքանչյուրին 10 000 դրամ, Գյումրի քաղաքի Հայրենական Մեծ պատերազմի մասնակից՝ թվով 16 վետերանի՝ յուրաքանչյուրին 15 000 դրամ, 1956 թվականի հոկտեմբերին Հունգարիայի հեղաշրջման ճնշմանը մասնակից՝ թվով 5 (հինգ) վետերանի՝ յուրաքանչյուրին 15 000, Երկրապահ կամավորների միության անդամներ սոցիալապես անապահով՝ թվով 15 ազատամարտիկի, յուրաքանչյուրին 15 000 ՀՀ դրամ: Գյումրու համայնքապետարանի կողմից իրականացվելիք ամանորյա միջոցառումների կազմակերպման եւ անցկացման համար հատկացնել 7 միլիոն դրամ, Գյումրու Կրուպսկայա փողոցը անվանափոխեց Խաչիկ Դաշտենցի փողոց: Հաջորդ նիստը կայանալու է դեկտեմբերի 10-ին:
🔴
«Հայ եկեղեցու պատմություն»-ը կրթում է, թե` քարոզում
#Քննարկում «《Հայ եկեղեցու պատմություն》-ը կրթում է, թե` քարոզում»
——————————————————————
📌 “Հայ եկեղեցու պատմություն” առարկան դպրոցական ծրագրից հանելու թեման հանրային թեժ քննարկումների առիթ է դարձել: Եթե որոշ փորձագետներ կարծում են, որ առարկան պետք է դուրս գա հանրակրթական ծրագրից և դասավանդվի հայ ժողովրդի պատմություն առարկայի շրջանակում, ապա Մայր Աթոռում այդ տեսակետի հետ համաձայն չեն:
——————————————————————
Ուղիղ հեռարձակում
🔴
ℹԲանախոսներ`
➡ Տեր Փավստոս քահանա Սարգսյան- ՀԱԵ Շիրակի թեմի հոգևորական
➡ Հայկուհի Հովհաննիսյան – պատմաբան
➡ Աբրահամ Ավագյան – ՀԵՊ առարկայի դասավանդող
🔗Համակարգող` Մարինե Դերբինյան
Ինձ բացակա չդնեք. Լեռնուտում հարգել են զոհված զինվոր Նարեկ Հարությունյանի հիշատակը
Շիրակի մարզի Լեռնուտ համայնքի դպրոցում հարգանքի տուրք են մատուցել լեռնուտցի հերոս Նարեկ Հմայակի Հարությունյանի հիշատակին: Դպրոցի ռազմագիտության դասարանն անվանակոչել են 2017 թվականին մարտական դիրքում նահատակված զինվորի անունով: «Կտրված կարմիր ժապավենը կարմիր գծի նման կանցնի լեռնուտցի աշակերտների մտքի եւ սրտի միջով: Ներկաները վստահ են՝ Նարեկն այս քայլով մեկ անգամ եւս անմահացավ: Երբեմն մտածում եմ՝ արդյո՞ք տեղին է զոհված զինվորների ծնողների եւ հարազատների ներկայությամբ նման միջոցառումների անցկացումը: Արդյո՞ք ավելի չենք ցավեցնում, արդարացվա՞ծ է արդյոք մեր այս քայլերը: Բայց ես կարծում եմ որ այո, արդարացված է, քանի որ մեր այս տղաների, մեր հերոսների անձնազոհության հավերժական հուշարձաններ են պետք, միայն խաչքարեր չեն, որ մեզ պետք են: Մենք հենց այս ճանապարհով ենք մեր երեխաներին կրթելու ու պատմելու պատմական իրադարձությունների, իրենց կողքին ապրած հերոս տղաների մասին, նրանք պետք է այս պատին տեսնեն հուշամեդալն ու նկարները, պետք է հասկանան, թե ինչի համար է այս դասարանն իրենց համագյուղացու անունով կոչված: 
Սա արվում է այսօր դրսում խաղացող երեխայի համար, որը վաղը մեծանալու, զորակոչվելու է, սա արված է այս սար ու ձորի սիրուն անկյունում մարդկանց արարելու, աշխատելու հնարավորության համար: Նարեկը ծնվել է մի պարզ ընտանիքում, սովորել այս դասարանում, նստել նույն այս աշակերտական նստարանին, որին հիմա իրենք են նստում, բայց Նարեկն առավել է բոլորից, նա հերոս է, անմահ է, նա մեկն էր բոլորից, ով զոհվեց հունուն հայրենիք»,- դասարանի բացման ժամանակ ասաց Շիրակի մարզպետ Տիգրան Պետրոսյանը:
«Ուզեցինք, որ անպայման Նարեկի մասին փոքրերն իմանան, մեծերն էլ հիշեն, հենց դրա համար էլ ռազմագիտության դասարանն անվանակոչեցինք մեր հերոսի անունով, որ Նարեկն իր երկնային ներկայությամբ ոգեւորի մեր աշակերտներին, կրթի եւ ճիշտ ուղղությամբ առաջնորդի»,- ասաց Լեռնուտի դպրոցի տնօրենի պաշտոնակատար Աննա Մարտիրոսյանը:
Ռազմագիտութայն այդ փոքրիկ դասարանում դարակների եւ սեղանի վրա խնամով դրված էին Նարեկի տարբեր տարիների, զինվորական ծառայության ընթացքում արված լուսանկարները, զինվորական համազգեստը, աշակերտական տետրերը, օրագիրը, գրիչն ու անձնական այլ իրեր: Նարեկը հայրենասեր էր, մեծ ուրախությամբ եւ ոգեւորությամբ գնաց բանակ: Տղայի մասին անցյալ ժամանակով չի խոսում հայրը՝ Հմայակը: Ասում է, երբ զորակոչվեց Նարեկն ու տարան Արցախ, փորձել է միակ զավակին ավելի անվտանգ վայում ծառայելու ելքեր որոնել: Նարեկը թույլ չի տվել: «Ինքը կըսեր՝ ես անպայման բդի Ղարաբաղ ծառայեմ, բոլորը կարող են, ես չէ՞: Իմ միակ տղան էր, իմ հույսը: Ես ըսեցի՝ Նարեկ ջան, քեզի Ղարաբաղ չեմ թողնի, բայց ինքը դեմ եղավ: Ըսեց՝ պա ջան, ըդպես բան չենես, ես Ղարաբաղ բդի ծառայեմ»,- կարոտի արցունքներն ու անդառնալիության զգացողությունը փոքր-ինչ զսպելով պատմեց Նարեկի հայրը:Նարեկը զոհվել է 2017 թվականի ապրիլի 24-ին՝ Ասկերանի դիրքերից մեկում՝ թշնամու դիպուկահարի կրակոցից:
Արցախի նախագահ Բակո Սահակյանի հրամանագրով 2017 թվականին Լեռնային Ղարաբաղի Հանրապետության պետական սահմանը պաշտպանելիս ցուցաբերած արիության համար ԼՂՀ պաշտպանության բանակի Նարեկ Հարությունյանը հետմահու պարգեւատրվել է «Մարտական ծառայություն» մեդալով։
Ա․ Մինասյան
©progressgyumri.am Armenian News/Analyses:
Tel: +37498 691-690; E-mail: progressgyumri@gmail.com ; progressgyumri@mail.ru
Գյումրիում կայացավ ՀՀ եւ ՌԴ Միջխորհրդարանական հանձնաժողովի 32-րդ նիստը
Գյումրու Սեւ բերդ ամրոցում կայացավ ՀՀ ԱԺ եւ ՌԴ Դաշնային ժողովի միջեւ համագործակցության Միջխորհրդարանական հանձնաժողովի 32-րդ նիստը:Նիստին մասնակցում էին ՀՀ ԱԺ եւ ՌԴ Պետդումայի պատգամավորները, ԵՏՀ ներկայացուցիչները, ՀՀ եւ ՌԴ դիվանագիտական կորպուսի ներկայացուցիչները, Գյումրու քաղաքապետը: ՌԴ Դաշնային խորհրդի նախագահի տեղակալ Յուրի Վորոբյովն ասաց մեծ է Հայաստանի ունեցած ավանդը ԵՏՄ զարգացման և ամրապնդման գործում։
Ըստ նիստին մասնակից ԱԺ պատգամավոր Էդմոն Մարուքյանի, այս հանդիպումն անչափ կարեւոր է, քանի որ Հայաստանը բոլոր երկրների հետ չունի նման համագործակցություն:
Նիստի ընթացքում անդրադարձ եղավ նաեւ ՌԴ ռուսական բազայի առաջիկա ընդլայնմանը: Կա՞ն արդյոք անվտանգության երաշխիքներ: Վորոբյովը հարցի պատասխանը չուներ: Մարուքյանն ասաց, որտեղ զորք կա, այնտեղ խնդիր էլ կա, միջադեպ էլ:
Լրագրողները նաեւ չունեցան պատասխան ՌԴ-ի կողմից Ադրբեջանին զենք վաճառելու, դրա վտանգավորության եւ այլ հարցերի մասով: Սեղմ ու կարճ պատասխան ուներ ԱԺ փոխնախագահ Ալեն Սիմոնյանը:
ՀՀ ԱԺ եւ ՌԴ Դաշնային ժողովի միջեւ համագործակցության Միջխորհրդարանական հանձնաժողովի 32-րդ նիստում ի թիվս այլ հարցերի քննարկվեց նաեւ մինչ 2025թ. եվրասիական տնտեսական ինտեգրման զարգացման ռազմավարական ուղղությունների, ինչպես նաեւ Լարսում նոր անցակետի կառուցման հնարավորությունը:
Ա․Մինասյան
©progressgyumri.am Armenian News/Analyses:
Tel: +37498 691-690; E-mail: progressgyumri@gmail.com ; progressgyumri@mail.ru
#Քննարկում «Հանրային վստահությունը ՏԻՄ-երի հանդեպ»
📌ՏԻՄ-երի հանդեպ հանրային վստահությունը տեղական ինքնակառավարման արդյունավետության և ՏԻՄ աշխատանքներին հանրային մասնակցության գլխավոր գրավականներից է։ Ինչպիսի՞ն է այսօր ՏԻՄ-երի հանդեպ հանրային վստահությունը: Արդյո՞ք Գյումրիում ՏԻՄ-երը վայելում են բնակչության վստահությունը: Ինչպե՞ս է Գյումրու ավագանին ապահովում կապը բնակիչների հետ: Հիմնականում ի՞նչ խնդիրներով են բնակիչները գալիս համայնքապետարան եվ ի՞նչ սկզբունքով են առաջնորդվում ավագանու խմբակցությունները հարցերը քննարկելիս:
Ուղիղ հեռարձակում
🔴
ℹԲանախոսներ՝
➡ Արսեն Աբրահամյան – ՏԻՄ փորձագետ
➡ Արմենուհի Վարդանյան – Գյումրու ավագանու անդամ, «ԳԱԼԱ» խմբակցություն
➡ Ավետիս Առաքելյան – Գյումրու ավագանու անկախ անդամ
🔗Համակարգող` Մարինե Դերբինյան
Անցյալի ստվերների դեմ «կռիվ տալիս»
Հայաստանում տեղի ունեցած հեղափոխությունից մեկուկես տարի հետո էլ հանրապետության քաղաքական դաշտում որակական փոփոխություններ տեղի չեն ունեցել։ Նկատի ունենք ինչպես այդ դաշտի հիմնական դերակատարներին, այնպես էլ քաղաքական գործընթացների ու գործելակերպի այն ավանդույթները եւ այդ դերակատարների գործունեության բնույթը, որոնց, բացասական առումով, ականատես ենք եղել անցած տասնամյակներում։
Այսինքն՝ դեռեւս չեն ձեւավորվել հեղափոխության արժեքային էությանը եւ տրամաբանությանը համահունչ քաղաքական դաշտ, ուժեր, քաղաքական կանքին մասնակից ու գործընթացների վրա վճռորոշ ազդեցություն գործող ակտիվ կուսակցություններ։ Արդյունքում՝ չկա նոր ժամանակների պահանջներից բխող եւ հեղափոխության նպատակների իրագործմանը միտված քաղաքական օրակարգ։ Փոխարենը՝ առաջնային պլանում ու դիրքերում են նոր իշխանության եւ անցյալի ստվերների միջեւ պայքարը, կեղծ օրակարգերն ու թեմաները, որոնք չեն իջնում տարբեր հարթակներից ու հանրային քննարկումներից։
Նախորդ երկու իշխանությունների (Ռոբերտ Քոչարանի ու Սերժ Սարգսյանի) տարբեր շրջանակներ, որոնք իրականության մեջ պետք է լինեին լուսանցքում, իրենցով են արել ընդդիմադիր դաշտը՝ այն լցնելով եւ օգտագործելով բացառապես ապակառուցոական գործունեոթյամբ ու նպատակներով։ Հենց այս շրջանակներն են ապահովում քաղաքական գործընթացների ու պայքարի այն բացասական ավանդույթները, որոնք որեւէ ընդհանուր բան չունեն քաղաքակիրթ քաղաքականության, առավել եւս՝ կյանքի ժամանակակից պահանջների հետ։
Ինչքան էլ այդ ուժերն իրենց էությամբ ու նշանակությամբ լինեն լուսանցքային եւ հանրային տրամադրությունների վրա նվազագույն ազդեցություն գործեն, ամեն դեպքում նրանց հաջողվում է իրենց շուրջը որոշակի աղմուկ ստեղծել եւ տպավորություն թողնել, թե հենց իրենք են գործող իշխանությունների հիմնական մրցակիցը։ Ավելի ճիշտ՝ իրենց նպատակն է այդպիսին դառնալ եւ այդ դաշտից դուրս թողնել այլ դերակատարների։
Այս նպատակի համար այդ ոււժերն օգտագործում ու ծախսում են հսկայական միջոցներ՝ ֆինանսներ, մի քանի տասնյակ լրատվամիջոցներ, սոցիալական այլ գործիքներ՝ որպես գործիքակազմ կիրառելով իշխանության հանդեպ հայհոյանքը, ատելություն սերմանելը, դժգոհություններ առաջ բերելը, լարվածության օջախներ ստեղծելը, քաղաքացիական բախումներից խոսելը, անօրինական գործողությունների դիմելը, ապատեղեկատվություն տարածելը եւ այլն եւ այլն։
Իրենց այս գործելակերպով նախկինները նաեւ մեկ այլ խնդիր են լուծում. իրենց ակտիվությամբ հնարավորինս պահպանել սեփական դիրքերն ու ազդեցությունը պետական որոշ համակարգերի ո կառույցների վրա, նաեւ ինչ-որ կերպ ապահովագրել տարիների ընթացքում կուտակածը։ Հանցագործությունների բացահայտման ու քրեական գործերի հարուցման դեպքում էլ աղմուկ բարձրացնել իբր քաղաքական հետապնդումների մասին։ Անցած մեկուկես տարվա ընթացքում նման բազմաթիվ դեպքեր ու աղմոււկ-աղաղակի օրինակներ ունեցել ենք, որոնցով փորձել են գրավել միջազգային ուժերի ու մեր հանրության ուշադրությունը։
Այլ խնդիր է, թե այդ ամենն ինչքանով է համահունչ հանրային տրամադրոււթյուններին կամ ինչ ազդեցություն է թողնում հասարակության ընկալումների ու վերաբերմունքի վրա։ Ըստ ամենայնի կարելի է ասել, որ ազդեցությունը շատ փոքր է, եթե ոչ՝ զրոյական։
Կարելի է նաեւ ասել, որ այս վիճակը ինչ-որ տեղ ձեռնտու է իշխանությանը, քանի որ նման մրցակից ունենալը շատ շահեկան է եւ նրանցից որեւէ վտանգ սպասել չի կարելի, ինչ էլ որ անեն ու ասեն վերջիններս։ Ընդհակառակը՝ իրենց ապակառուցողական ոււ ապաքաղաքական գործունեությամբ, աավել եւս իրենց կառավարման տարիների հիշողություններով էլ ավելի են ուժեղացնում իշխանությանը ու հանրությանը համախմբում նրա շուրջ։
Սակայն այդ վիճակից տուժում է երկիրը, քանի որ քաղաքական կյանքը հայտնվում է հնի ու նորի անիմաստ ու ոչ մի տեղ չտանող շրջապտույտի մեջ, այդպես էլ չի հաջողվում հաղթահարել անցյալի բարքերն ու ստվերները, տեղի չի ունենում քաղաքական դաշտի առողջացում, պետության համար կարեւորություն ունեցող օրակարգերն ու թեմաները մնում են ստվերում։
Այստեղ մեղքի իր բաժինն ունի նաեւ իշխանությունը, որը ցուցաբերում է անվճականություն շատ հարցերի լուծման խնդրում, դանդաղում է բարեփոխոմների հարցում։
Քաղաքական փոփոխություններից ահագին ժամանակ է անցել, սակայն նոր-նոր են ձեռնարկել «Կուսակցությունների մասին» նոր օրենքի թեմայով քննարկումների կազմակերպումը, իսկ դատաիրավական բարեփոխումները մի քանի շրջադարձերից հետո հանգրվանել են նոր ձեւաչափի մեջ, խիստ անհրաժեշտ սահմանադրական բարեփոխումների ծիրն էլ չի երեւում։
Էլ չասած այն մասին, որ արդեն տեւական ժամանակ չի հաջողվոււմ լուծել Սահմանադրական դատարանի անհասկանալի իրավիճակը։
Հ. Կիրակոսյան
©progressgyumri.am Armenian News/Analyses: Tel: +37498 691-690; E-mail: progressgyumri@gmail.com ; progressgyumri@mail.ru