Քաղաքապետարանը ցանկից հանել է միկրոավտոբուսային 22-րդ երթուղու մրցույթը
Անի Մկրտչյան asparez.am
Ինչպես արդեն տեղեկացրել էինք, մայիսի 20-ին Գյումրու ներքաղաքային ընդհանուր օգտագործման ավտոմոբիլային տրանսպորտով ուղեւորների կանոնավոր փոխադրումներն իրականացնող կազմակերպությունների ընտրության հերթական մրցույթն է կայանալու: Մրցույթ էր հայտարարված թիվ 9, 10 ավտոբուսների եւ թիվ 18, 22, 28, 33, 50 միկրոավտոբուսների համար: Այս մասին հայտարարությունն հրապարակված էր Գյումրու քաղաքապետարանի պաշտոնական կայքում: Սակայն այս հայտարարությունից մի քանի օր անց Գյումրու քաղաքապետարանն հրապարակել է մեկ այլ հայտարարություն այն մասին, որ կայանալիք մրցույթի հայտարարության ցանկից հանվել է 4-րդ կետով նախատեսված միկրոավտոբուսային թիվ 22 երթուղու համար կայանալիք մրցույթը՝ մինչեւ համապատասխան հարցի իրավական կարգավորումը:
Վերջին օրերին Գյումրիում այս երթուղու շահագործման վերաբերյալ մեծ աղմուկ բարձրացավ: Կատարվում էին որոշ ստուգումներ, իսկ վարորդները բողոքի ցույցի էին դուրս գալիս: Քաղաքապետարանն էլ հայտնում էր, որ երթուղին շահագործող «Սրընթաց ուղիներ» ՍՊԸ-ն, որը պատկանում է Գյումրու նախկին քաղաքապետի որդուն, կատարել է որոշ խախտումներ:
Ի դեպ, մեր` կայանալիք մրցույթի վերաբերյալ նախորդ հարցազրույցի ընթացքում քաղաքապետարանի տրանսպորտի բաժնի պետի ժ/պ Արամ Եղոյանն ասել էր, որ նշված երթուղիները թափուր են, դրանց թվում նաեւ թիվ 22 միկրոավտոբուսայինը:
Այս երթուղու գործունեությունը դադարեցված լինելու մասին, ըստ քաղաքապետարանի, կար քաղաքապետ Ս. Բալասանյանի որոշումը:
Անի Մկրտչյան asparez.am
Հանրային քննարկում 07.04.2014
Տեղեկատվություն
«Քաունթերփարթ ինտերնեշնլ Հայաստանի» եւ ԱՄՆ-ի Միջազգային Զարգացման Գործակալության ֆինանսավորվմամբ, «Գյումրու Առաջընթաց» Քացաքացիական Հասարակության Զարգացման Կենտրոն» ՀԿ-ն իրականացնում է «Քաղաքային տրանսպորտի կառավարման եւ սպասարկման որակի բարձրացում` հանուն ուղեւորների շահերի պաշտպանության» ծրագիրը: Այն նպատակաուղղված է քաղաքային տրանսպորտի թափանցիկ կառավարմանն ու սպասարկման որակի բարձրացմանը: Ծրագրի շրջանակներում ապրիլի 7-ին Ժուռնալիստների Ասպարեզ ակումբում անցկացվեց հանրային քննարկում, որին հրավիրված էին ՔՀԿ-ների, Գյումրու ՏԻՄ-ների ներկայացուցիչներ: Գյումրու ՏԻՄ-ներից ներկա էր միայն Ավագանու անդամ Լեւոն Բարսեղյանը: Քննարկմանը ներկայացվեցին Գյումրիում տրանսպորտի անբավարար վիճակը, առաջիկա անելիքները, մասնավորապես տրանսպորտի սպասարկման որակի, մասնավորապես երթուղիների սահմանված չվացուցակների, երեկոյան ու առավոտյան ժամերին անհրաժեշտ մեքենաքանակի առկայության, միկրոավտոբուսներով սահմանված նստատեղերից ավելի անձանց տեղափոխման վերաբերյալ, համատեղ մոնիտորինգի, բնակչության շրջանում հարցախույզների (wox-pop) անցկացում, հեռուստաքննարկում, կազմակերպության կայքում թեժ գծի ստեղծում, առաջարկությունների ու բողոքների գրառումներ, հարցումներ Ֆեյսբուք սոցիալական ցանցում, իրազեկող 12 ցուցատախտակների տեղադրում 12 կանգառներում, առաջարկություններ Գյումրու ՏԻՄ-ներին: Ելույթ ունեցան Ավագանու անդամ, Ժուռնալիստների Ասպարեզ ակումբի նախագահ Լեւոն Բարսեղյանը, Սախարովի անվան ՄԻՊ կենտրոնի Շիրակի մասնաճյուղի անդամ Արմեն Պետրոսյանը, «Երեխաների հասարակություն» մանկապատանեկան ձեռնարկումների աջակցության կենտրոն» ՀԿ նախագահ Արա Սուքիասյանը: Վերջինս ներկայացրեց իր դիտարկումները քաղաքային երթուղիների սպասարկման ցածր որակի վերաբերյալ՝ առաջարկելով՝
1.Ներքաղաքային երթուղիների կանոնավոր սպասարկումն ապահովելու համար քաղաքապետարանի տրանսպորտի բաժնի թափուր տեղը հավուր պատշաճի լրացնել: Ապա, արդեն նախապատրաստվող երթուղայինների մրցույթը նպատակաուղղված իրականացել, այսինքն երթուղայինների լիցենզավորման պահանջների մեջ կարեւորվի վարորդների քանակական հարաբերությունը. ամեն մի մեքենային` 3 վարորդ սկզբունքով, որով կպահպանվի օրինական աշխատանքային կարգը` օրական 8 աշխատանքային ժամով ռեժիմի ապահովմամբ: Երթուղիները կսպասարկվեն առավոտյան 07:30-15:30` 1-ին հերթափոխում, եւ 15:30-23:30` 2-րդ հերթափոխում:
2.Հայտնի դառնա երթուղին սպասարկող ընկերությունների գրասենյակների գտնվելու վայրը, հեռախոսահամարները, բուժաշխատողի ով լինելը:
3. Մեքենայի ուղեւորների սրահում մեծ տեսանելի տեղում եւ պատշաճ չափերով փակցված լինեն մեքենան սպասարկող բոլոր 3 վարորդների այցեքարտերը` լուսանկարներով:
5. Վարորդների տարիքը սահմանվի այնպես, որ երաշխավորվի պատշաճ սպասարկում ու աշխատանքային վստահելի փորձառություն:
6. Կանգառներում փակցվեն երթուղայինների մոտեցման ժամերը կամ գրաֆիկները
Որոշվեց վերոնշյալ առաջարկություններով հանդիպում ունենալ Գյումրու քաղաքապետի և տրանսպորտի բաժնի պետի հետ: Մասնակցել որպես դիտորդ մայիսի 20-ին ներքաղաքային տրանսպորտի թափուր երթուղիների (ավտոբուսների եւ միկրոավտոբուսների) շահագործման համար անցկացվող մրցույթին: Կազմակերպության ֆեյսբուքյան էջում՝ Progress of Gyumri, ներկայացնել դիտարկումներ, առաջարկություններ:
Ջահել ոստիկանը ուղևորների ներկայությամբ խփե՞լ է տարեց վարորդին (Տեսանյութ)
© 1998 – 2014 Առավոտ – Լուրեր Հայաստանից
Ինչպես տեղեկացրել ենք, այսօր մայրաքաղաքից Գյումրի ժամանած ճանապարհային ոստիկանության աշխատակիցները Գյումրու նախկին քաղաքապետ Վարդան Ղուկասյանի որդուն` Սպարտակին պատկանող թիվ 22 երթուղու միկրոավտոբուսների վարորդներին արգելել էին ուղևորափոխադրում իրականացնել` այն համարելով անօրինական: Տարեց վարորդներից մեկը Aravot.am-ին դժգոհեց, որ իր որդու հասակին մի ոստիկան ոչ միայն կանգնեցրել է իր վարած միկրոավտոբուսը, այլ ուղևորների ներկայությամբ հարվածել է իրեն: «Ես գործի եմ ելել, մարդ եմ տանում, մի ջահել ոստիկան` տղայիս հասակին, բարձրացավ գազել, նստելու տեղ չկար, ասեց` էլ մարդ չվերցնես, պիտի գազելը տանեմ պլաշադկա: Ես էլ չգիտեմ, որ նա ոստիկան է, ասեցի` ի՞նչղ չվերցնեմ, ես պլան պիտի կատարեմ, դարձավ ուղևորների ներկայությամբ ինձ խփեց: Ի՞նչ է ինքը ֆորմա ունի հագին, ուրեմն ինձ պիտի խփի՞, ուղևորները չթողեցին, թե չէ թևերս կոլորեր ու կտաներ: Բա էսքանից հետո մարդ էստեղ կապրի՞, կվերցնեմ ընտանիքիս ու Թուրքիա կգնամ»,- բողոքեց տարեց վարորդը: Մանրամասները ՝ տեսանյութում
Նունե ԱՐԵՎՇԱՏՅԱՆ
Ինչո ՞ւ է Սամվել Բալասանյանը Վարդան Ղուկասյանի որդուն զրկել երթուղուց (Տեսանյութ)
© 1998 – 2014 Առավոտ – Լուրեր Հայաստանից
Ինչպես տեղեկացրել ենք, այսօրվանից ճանապարհային ոստիկանությունը արգելել է Վարդան Ղուկասյանի որդուն` Սպարտակին պատկանող թիվ 22 երթուղու միկրոավտոբուսների աշխատանքը` այն համարելով անօրինական: Այդ պատճառով այսօր միկրոավտոբուսների վարորդները բողոքի էին դուրս եկել` փակելով Անի թաղամասի կենտրոնական փողոցները: Թե ինչո՞ւ է Գյումրու ներկայիս քաղաքապետը նախկին քաղաքապետի որդուն զրկում բավական եկամտաբեր երթուղուց, Գյումրու քաղաքապետարանի տրանսպորտի բաժնի գլխավոր մասնագետ Արտյոմ Սարգսյանը հետևյալ պարզաբանումը ներկայացրեց. «2013 թվականի հոկտեմբերի 30-ին մենք «Սրընթաց ուղիներ» ՍՊԸ-ից ստացել ենք գրություն՝ շարժակազմի 5 մեքենաների փոխարինման. մենք տվել ենք համապատասխան տեղեկանք՝ մեքենաների փոխարինման, որով նրանք պարտավորվածություն են ձեռք բերել տասնօրյա ժամկետում կատարել փոխարինում, այսինքն՝ պիտի հանձնեին հին մեքենաների դեղին պետհամարանիշները, ստանան նոր դեղին պետհամարանիշները, որը չեն կատարել: Տրանսպորտի բաժինը հայտնաբերել է այդ խախտումը, հրավիրել է համապատասխան հանձնաժողովի նիստ, կազմել է արձանագրություն , որի հիման վրա քաղաքապետը կայացրել է որոշում: Այսինքն՝ «Սրընթաց ուղիներ» ՍՊԸ-ն խախտել է կառավարության`թիվ 762 որոշման 65 և 66 կետերը: Մարտի 19-ից կասեցված է տվյալ երթուղու աշխատանքը»: Արտյոմ Սարգսյանը նաև ասաց, որ մայիսի 20-ին կկայանա մրցույթ, արդեն իսկ հայտարարված է մրցույթ տվյալ երթուղու համար: Քաղաքապետարանի պաշտոնյան ասաց, որ պատրաստ են այս երթուղու վարորդների հետ վաղը հանդիպել ու քննարկել նրանց հետագա աշխատանքի հարցը: Ըստ պաշտոնյայի, մրցույթով այս ՍՊԸ-ն 11 միկրոավտոբուս է շահել, սակայն ֆիքսվածից ավելի միկրոավտոբուս է մտցրել երթուղի: Բացի այդ, ըստ Արտյոմ Սարգսյանի, այս ընկերությունը մոտ 5-6 միլիոնի վնաս է տվել համայնքին՝ ոչ մի լումա չմուծելով քաղաքային բյուջե: Մանրամասները` տեսանյութում
22 համարի երթուղու աշխատանքը կասեցված է
TSAYG TVR
Ապրիլի 2-ից կասեցվել է թիվ 22 համարի երթուղին սպասարկող “Սրընթաց ուղիներ” ՍՊԸ գործունեությունը: Այս խնդիրը ներկա պահին վիճարկվում է դատական կարգով: Այսօր վաղ առավոտից 22 համարի երթուղային տաքսիների վարորդներին թույլ չի տրվել իրականացնել ուղևորափոխադրումներ, որոշ մեքենաներ տարվել են տուգանային հրապարակ: Կան նաև տույժի ենթարկված վարորդներ: Դիտեք տեսանյութը: Շարունակե՛ք հետևեք մեր լրահոսին առցանց և “Ազդարար” լրատվականի ուղիղ եթերում:
Նոյեմբերի 12-ի կայացավ Գյումրու Ավագանու այս տարվա նախավերջին նիստը
Նոյեմբերի 12-ի կայացավ Գյումրու Ավագանու այս տարվա նախավերջին նիստը, որի օրակարգում ընդգրկված էր 23 հիմնական եւ 3 լրացուցիչ հարց: Ավագանու քննարկմանն էր ներկայացվել ՀՀ ոստիկանության պետական պահպանության գլխավոր վարչության Շիրակի մարզային ստորաբաժանմանը համայնքի սեփականույթուն հանդիսացող՝ Պարույր Սեւակի 8 շենքի 1/1 հասցեում գտնվող 352.1 քմ տարածքը անհատույց տրամադրման, Համայնքային սեփականություն հանդիսացող «Պատվո բլուր» հուշահամալիրի տարածքում գործող եկեղեցու ջեռուցման նպատակով, գազաֆիկացման աշխատանքների համար ֆինանսական միջոցներ տրամադրելու, հողերի օտարման, աճուրդային գների սահմանման, Շիրակի մարզի «Պաթալոգոանատոմիական լաբորատորիա» եւ «Գյումրու բժշկական կենտրոն» ՓԲԸ-ների՝ շինթույլտվություն տալու համար նախատեսված տեղական տուրքը եւ տեղական վճարը համայքային բյուջեից վճարելու, համայնքային ենթակայության թվով 9 ՓԲԸ-ները համայնքային ոչ առեւտրային կազմակերպությունների վերակազմակերպելու, վերանվանելու, կանոնադրությունները, փոխանցման ակտերը եւ հաստիքացուցակները հաստատելու եւ տնօրենների թեկնածություններին համաձայնություն տալու, Գյումրու համայնքային ենթակայության տակ գտնվող թվով 4 մշակութային օջախների՝ Մհեր Մկրտչյանի, Ավետիք Իսահակյանի, Հովհաննես Շիրազի տուն-թանգարաներում եւ Ասլամազյան քույրերի պատկերասրահում հակահրդեհային եւ անվտանգության համակարգեր տեղադրելու, սոցիալապես անապահով թվով 159 անձանց դրամական օգնություն տալու եւ այլ հարցեր, որոնք ընդունվեցին ավագանու կողմից: Որոշվեց նաեւ Գյումրու օր ամենամյա տոնակատարությունը նշել հոկտեմբերի առաջին կիրակի օրը:
Գյումրին իր տոնն է նշել, պատվով, փառքով, երգ ու պարով
Գյումրու օր տոնակատարությունն իր մեծածավալ միջոցառումներով հետաքրքրել և փողոց էր դուրս բերել մեծին ու փոքրին, ահելին ու ջահելին: Այսօր բոլորը մեկ ամբողջություն են, մեկ տրամադրություն, մեկ տուն և մեկ տանիք: Գյումրեցիներից յուրաքանչյուրինն է տոնը, որին գյումրեցիներից, Գյումրու քաղաքապետից և Շիրակի մարզպետից բացի, ներկա էին երկրի վարչապետը, ՀՀ մշակույթի նախարարը, ԱԺ պատգամավորներ, շատ հյուրեր ինչպես հանրապետության տարբեր մարզերից, այնպես էլ արտերկրից: Գյումրու օր տոնակատարության շրջանակներում անցկացվեց Հացի փառատոն Գյումրու ժողովրդական ճարտարապետության և քաղաքային կենցաղի թանգարանի բակում: Ներկաներից յուրաքանչյուրը հնարավորություն ունեցավ տեղում թխվող թոնրի լավաշ, բոքոն ու գաթա համտեսել: Վարչապետ Տիգրան Սարգսյանն ու կառավարության մյուս ներկայացուցիչները գոհ էին ընդունելությունից էլ, հյուրասիրությունից էլ, գյումրեցու վերաբերմունքից էլ: Դիտեք տեսանյութը:
Ի՞նչ է հայտնաբերել «Գյումրու Առաջընթացը» քաղաքապետարանի աշխատանքում եւ ի՞նչ է առաջարկում
Շաբաթ օրը «Գյումրու Առաջընթաց» քաղաքացիական հասարակության զարգացման կենտրոն ՀԿ-ն ամփոփեց ու ներկայացրեց իր «Երկխոսություն` հանուն քաղաղաքացիական հասարակության զարգացման» ծրագրի շրջանակում կատարած աշխատանքների արդյունքները: Հաշվետվությունների հրապարակմանը թեեւ տեղեկացված եղել էին Գյումրու Ավագանու 5 անդամ, սակայն ներկա էր միայն Լեւոն Բարսեղյանը, իսկ քաղաքապետարանի աշխատակազմի միակ ներկայացուցիչը ծրագրերի եւ վերլուծության բաժնի պետի տեղակալ Մկրտիչ Ճարտարյանն էր:
Ծրագիրը, որը ֆինանսավորվել է «Քաունթերփարթ ինտերնեշնլ Հայաստանի» եւ ԱՄՆ-ի Միջազգային Զարգացման Գործակալության կողմից, Գյումրիում իրականացվել է մայիսից եւ շարունակվել մինչեւ հոկտեմբերի վերջ: Նպատակն է եղել բարձրացնել Գյումրու հասարակության տեղեկացվածության մակարդակը, ապահովել ՏԻՄ գործունեության թափանցիկ կառավարումն ու հրապարակայնությունը: Ծրագրի շրջանակում անցկացվել են ավագանու որոշումների, համայնքի բյուջեի, քառամյա զարգացման ծրագրի դիտարկում, վերլուծություն: Ստեղծվել է կազմակերպության կայքը` progressgyumri.am, որի օգնությամբ էլ իրականացվել է ավագանու 3 նիստերի ուղիղ հեռարձակում, կատարվել են հանրային քննարկում, հեռուսատաքննարկումներ, համայնքի բյուջեի հետազոտություն եւ այլն:
Ծրագրի փորձագետ Ղարիբ Հարությունյանը վերլուծությունների արդյունքում պարզել է, որ 2013թ-ի Գյումրու բյուջետային ուղերձը պարունակում է բավական մանրամասն տեղեկատվություն բյուջետային քաղաքականության հիմնական ուղղությունների վերաբերյալ, սակայն ուղերձում ներառված չեն գործող օրենսդրությամբ պահանջվող որոշակի տեղեկություններ:
Համայնքի 2013-ի բյուջեի եկամուտների հավաքագրման ցուցանիշների վերլուծությունները ցույց են տվել, որ ընդհանուր եկամուտների կատարողական ցուցանիշը 2013-ի առաջին կիսամյակի համար կազմել է 47, 6 տոկոս, որից վարչական բյուջեի եկամուտների գծով` 47,5 տոկոս, իսկ ֆոնդային բյուջեի գծով` 50 տոկոս: Ամենաբարձր կատարողական է ապահովվել շենքերի եւ շինությունների համար գույքահարկի գծով` 61 տոկոս, իսկ ամենացածրը` վարչական գանձումների գծով` 39,6 տոկոս: Համայնքի բյուջեի ընդահանուր ծախսերը 2012-ի նկատմամբ պլանավորվել են 0,06 տոկոսով ավելի, վարչական բյուջեի ծախսերը` 0,07 տոկոսով ավելի, իսկ ֆոնդային բյուջեի ծախսերը պլանավորվել են 0,07 տոկոսով պակաս:
Ընդհանուր առմամբ` 2012-ի հետ համանման ցուցանիշների համեմատական վերլուծությունները ցույց են տվել, որ ինչպես եկամտային, այնպես էլ ծախսային ցուցանիշների կառուցվածքի առումով առկա է որոշակի առաջընթաց, սակայն բյուջետային գործընթացի իրականացման վերաբերյալ ՀԿ-ն առաջարկությունների փաթեթ է ներկայացրել` իրականացնել նմանատիպ հետազոտությունների 2013-ի փաստացի տարեկան կատարողական ցուցանիշների հիման վրա, միջազգային փորձի ուսումնասիրության հիման վրա համայնքի բյուջեի վարչական եւ ֆոնդային մասերի օպտիմալ հարաբերակցություն վերլուծություն, արդյունավետ պլանավորում եւ այլն:
ՀԿ-ն առաջարկությունների փաթեթ է ներկայացրել նաեւ սոցիալապես անապահով անձանց դրամական օգնության տրամադրման չափորոշիչների վերաբերյալ: Կազմակերպությունն առաջարկել է սոցիալապես անապահովության գնահատման սանդղակ: Խնդիրն այն է, որ կազմակերպությունը մայիսից գրավոր հարցումներ է ուղարկել Գյումրու քաղաքապետարան` այդ հարցումների թվում նաեւ խնդրելով սոցիալապես անապահով խավին դրամական օգնությունների վճարված ցուցակների պատճեներն ու այդ անձանց տրամադրման չափորոշիչները, սակայն Գյումրու քաղաքապետարանը նամակներին պատասխանել է ոչ լիարժեք. տրամադրվել է միայն 2013թ-ի առաջին կիսամյակում սոցիալապես անապահով խավին տրամադրված գումարի չափը, չեն նշվել դրամական օգնության տրամադրման հստակ չափորոշիչները: Հանրային խորհրդի կազմում ընդգրկված ՀԿ-ների ուսումնասիրությունների արդյունքում պարզվել է, որ 14 քաղաքացիներ միաժամանակ դրամական աջակցություն են ստացել եւ Շիրակի մարզպետարանից, եւ Գյումրու քաղաքապետարանից:
ՀԿ-ն հղում է կատարել նաեւ «Ասպարեզ» օրաթերթում հրապարակված այն հետաքննություններին, որոնց արդյունքներում բացահայտվել էին, մասնավորապես, այն, որ քաղաքապետարանից դրամական աջակցություն են ստացել նաեւ քաղաքապետարանի աշխատակցիները, այդ թվում` քաղաքացիները օրաթերթի թղթակցին օգնություն ստանալու վերաբերյալ տվել են ոչ հստակ պատասխաներ: Եւ հաշվի առնելով, որ Գյումրու Ավագանու որոշումներով հաստատված օգնության տրամադրման հստակ չափորոշիչներ չկան, կազմակերպությունն ներկայացրել է սոցիալապես անապահովության գնահատման սանդղակ:
Առաջարկությունների փաթեթները, ինչպես նշեց ծրագրի ղեկավար Հասմիկ Մխիթարյանը, ներկայացնելու են Գյումրու քաղաքապետին ու Ավագանու անդամներին:
Հաշվետվության ընթացքում անդրադարձ կատարվեց նաեւ քաղաքապետարանի հաստիքացուցակներին, աշխատակիցների թվի եւ այլ հարցերի:
Անի Մկրտչյան
«ԵՐԿԽՈՍՈՒԹՅՈՒՆ՝ ՀԱՆՈՒՆ ՔԱՂԱՔԱՑԻԱԿԱՆ ՀԱՍԱՐԱԿՈՒԹՅԱՆ ԶԱՐԳԱՑՄԱՆ» ծրագրի շնորհանդես
