Լրահոս

Այժմ այդ նույն գործողությունը տեղի է ունենում Կարս-Գյումրի երկաթգծի շուրջ. Միրզոյան

Խոսելով կապուղիների մասին՝ չենք կարող չխոսել նաև Հայաստանի և Թուրքիայի միջև փակ սահմանի և այդ սահմանի հնարավոր բացման մասին, և գոյություն ունեցող ենթակառուցվածքների վերագործարկման մասին: Այդ մասին Ազգային ժողովում 2025 թվականի պետբյուջեի քննարկման ժամանակ ասաց ՀՀ ԱԳ նախարար Արարատ Միրզոյանը:

«Ուրախությամբ պետք է նշեմ, որ ինչպես նախկինում ավտոմեքենաների սովորական ճանապարհների շուրջ, անցակետի և անցակետի շուրջ գոյություն ունեցող ենթակառուցվածքների գնահատման գործողություն է տեղի ունեցել մեր և Թուրքիայի կողմից միասնաբար և համատեղ, այժմ այդ նույն գործողությունը տեղի է ունենում Կարս-Գյումրի երկաթգծի շուրջ, և այդ երկաթգծով սահմանային անցակետի հետ կապված ենթակառուցվածքների համատեքստում»,- ասաց նա:

Թուրքիայի մասով երկխոսությունը, ըստ ԱԳ նախարարի, դինամիկ է: Նպատակը երկխոսության դիվանագիտական հարաբերությունների հաստատումն է և սահմանի բացումը, կապուղիների վերագործարկումը:

«Մեր առաջնային գործընկերներն են, իհարկե, մեր մյուս երկու հարևանները՝ Վրաստանը և Իրանը, ում հետ հարաբերությունները շարունակելու ենք խորացնել»,- ասաց նա:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Ատեստավորված զինծառայողները ստանում են 123 հազարից մինչև 470 հազար դրամ հավելավճար. Պապիկյան

ՀՀ պաշտպանության նախարարության կողմից իրականացվող՝ Հայաստանի Հանրապետության պետական բյուջեի 5 ծրագրով 2025-ի համար նախատեսվում է հատկացնել 664 միլիարդ 653 միլիոն 454 հազար դրամ: Այս մասին խորհրդարանում 2025 թվականի պետական բյուջեի մասին օրենքի նախագծի քննարկման ժամանակ հայտնեց ՀՀ պաշտպանության նախարար Սուրեն Պապիկյանը:

Նախարարի խոսքով՝ ՀՀ արհեստավարժ հիմունքներով ԶՈՒ երկարաժամկետ զարգացման ապահովման նպատակով իրականացվող բարեփոխումների գործընթացի առանցքային ուղղություններն առնչվում են պաշտպանության պլանավորման ընթացակարգերի, զինված ուժերի կառավարման համակարգի, կազմ-կառուցվածքի, անձնակազմի կառավարման կատարելագործմանը, սպառազինության, ռազմական տեխնիկայի միջոցներով համալրվածությանը, սոցիալական ապահովմանը և այլն:

Պապիկյանը, ներկայացնելով կատարած աշխատանքները, հայտնեց՝ ՀՀ ԶՈՒ-ում արմատական, համակարգային բարեփոխումների իրականացման հիմնական ուղենիշների սահմանման նպատակով մշակվել և Անվտանգության խորհրդի որոշմամբ հավանության է արժանացել բանակի կերպափոխման հայեցակարգը, որն արդեն հրապարակվել է ՊՆ պաշտոնական կայքէջում:

Նախարարը տեղեկացրեց՝ հայեցակարգը բաղկացած է հետևյալ բաժիններից՝ անցում արհեստավարժ բանակին, ԶՈՒ կազմակերպական և հաստիքային կառուցվածքի բարելավում, զորահավաքային պատրաստության և զորահավաքի մեխանիզմների կատարելագործում, ռազմական կրթության և գիտության զարգացում, ԶՈՒ բարոյահոգեբանական պատրաստության մակարդակի բարձրացում, զինծառայողների և նրանց ընտանիքների սոցիալական պաշտպանության և զինվորական գրավչության բարձրացում, առողջ և հավասարակշիռ ռազմաքաղաքացիական հարաբերությունների ձևավորում, մարդու իրավունքների պաշտպանության կատարելագործում, զինված ուժերի կարգապահության մակարդակի բարելավում:

Պապիկյանն ընդգծեց՝ մեզ համար առանցքային է մնում կիրթ և բանիմաց կադրերով համալրելու քաղաքականությունը, և վերջին երկու տարում իրականացվել են մի շարք ծրագրեր, որի արդյունքում առաջիկա տարիներին մեր ԶՈՒ շարքերը կսկսեն համալրել ավելի մեծ թվով սպաներ և կրթական ավելի բարձր մակարդակով կադրեր:

«Դրա համար ներդրվել է 2022-2023 ուսումնական տարվանից ընդունված և ավարտելուց հետո սպայական պաշտոնների նշանակված զինծառայողների համար Երևան քաղաքում վերանորոգված 3 սենյականոց ծառայողական բնակարան հատկացնելու մասին ԱԺ-ի ընդունած օրենքը»,- ասաց նախարարը:

Ռազմաուսումնական հաստատությունների կուրսանտների համար սահմանվել է վարձատրության նոր համակարգ՝ կախված կուրսանտի առաջադիմությունից և կուրսից, որի արդյունքում վարձատրությունն աճել է 3-10 անգամ՝ 15 հազարից մինչև 175 հազար դրամ:

«Արդյունքում՝ 4-րդ կուրսի ուսանողը կարող է ստանալ 175 հազար դրամ ամսական բավարարում: Խոսքն ուսանողի մասին է»,- տեղեկացրեց պաշտպանության նախարարը:

Պապիկյանը հիշեցրեց՝ ներդրվել է նաև շարքային կազմի պարտադիր զինվորական ծառայությունից պայմանագրային զինծառայության անցման նոր կարգ՝ «Պաշտպան հայրենյաց» ծրագիրը:

«Այսօր հասել ենք նրան, որ «Պաշտպան հայրենյաց» ծրագրով մեծաքանակ երիտասարդներ դառնում են մեր պրոֆեսիոնալ բանակի մասնիկը: Մենք հասել ենք նրան, որ շահագրգռվածության մակարդակն այնքան է բարձրացել, որ մարդիկ փորձում են միջնորդություններով իրենց տարբեր խնդիրներ ունեցող զինվոր զավակներին այս կարևոր ծրագրից օգտվելու հնարավորության հասնել»,- ընդգծեց նախարարը:

Նրա խոսքով՝ չափազանց կարևոր է, որ պրոֆեսիոնալ բանակի զինծառայողները ստանան նորմալ բավարարում:

Պատասխանելով ընդդիմադիր գործընկերների մեղադրանքներին, թե զինվորականների աշխատավարձերը չեն բարձրանում, դրանք որակեց «բացարձակ սուտ»:

«Աշխատավարձը բարձրացվել է, ավելին, ատեստավորված զինծառայողները ստանում են 123 հազար դրամ հավելավճարից մինչև 470 հազար հավելավճար: Այն ատեստավորման համակարգը, որի մասին խոսում եմ, որը մինչ այսօր քննադատվում է ձեր կողմից, մեկը կամք չի ունենում քաղաքական՝ ասելու, թե լավ բան է արվում»,- ասաց Սուրեն Պապիկյանը:

 © progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Ակնկալում ենք, որ հարկերն այս տարի կկազմեն 2 տրիլիոն 455 միլիարդ դրամ. Վահե Հովհաննիսյան

Ակնկալում ենք, որ հարկերն այս տարի կկազմեն 2 տրիլիոն 455 միլիարդ դրամ, իսկ հարկեր-ՀՆԱ-ն կբարելավվի շուրջ 0,2 տոկոսային կետով: Այդ մասին Ազգային ժողովի՝ նոյեմբերի 12-ի նիստին ասաց ՀՀ ֆինանսների նախարար Վահե Հովհաննիսյանը՝ ներկայացնելով 2025 թվականի պետական բյուջեի օրենքի նախագիծը:

«2025-ի հարկային վարչարարության ջանքերի և օրենսդրության փոփոխությունների արդյունքում ակնկալվում է ևս 0,7 տոկոսային կետով բարելավվում, ինչի արդյունքում հարկեր-ՀՆԱ հարաբերակցությունը կհասնի 25 տոկոսի»,- տեղեկացրեց նախարարը:

Խոսելով 2025 թվականի պետբյուջեի նախագծի հիմքում դրված մոտեցումների մասին՝ ֆինանսների նախարարը ներկայացրեց դրանք ըստ գերատեսչությունների:

Հովհաննիսյանը տեղեկացրեց՝ բարձր տեխնոլոգիական ոլորտին հատկացվող գումարը այս բյուջեով 2025 թվականին կավելանա համարյա 90 տոկոսով:

«Սա Հայաստանի՝ բարձր տեխնոլոգիական երկիր դառնալու մեր նպատակի իրագործման գործնական կարևոր քայլերից է»,- պարզաբանեց նախարարը:

Հովհաննիսյանը հիշեցրեց՝ ամենաէական ավելացումները նախատեսվել են ՀՀ պաշտպանությունը բարձրացնելու ուղղությամբ:

«Պաշտպանության նախարարության համար 2025-ին նախատեսվում է 664,7 միլիարդ դրամ, որը 2024-ի հաստատված բյուջեի համեմատ ավելի է 110 միլիարդ դրամով: Շարունակվելու են ՀՀ զինված ուժերի պահպանման, տեխնիկական հագեցվածության ապահովման և բանակի մարտունակության ու կենսապահովման պահանջների բավարարման ծախսերը: Կարողությունների բարձրացման շրջանակում նախատեսվում է նաև վերապատրաստումներ իրականացնել արտերկրի ռազմական ուսումնական հաստատություններում և ակադեմիաներում»,- պարզաբանեց նախարարը:

Նրա խոսքով՝ եթե մեկ նախադասությամբ ձևակերպենք 2025 թվականի բյուջեն՝ «մենք բարձրացնում ենք ՀՀ անվտանգությունը, որպեսզի կառուցենք դպրոցներ և շեշտակի բարելավենք կրթական համակարգը»:

Հովհաննիսյանը խոստովանեց՝ այս բյուջեով բազմաթիվ կարևոր հարցեր դեռևս մնում են չլուծված, կան սոցիալական բազմաթիվ խնդիրներ, տնտեսական արտադրողականությունը և կառուցվածքը դեռևս գոհացուցիչ չեն, վթարային շենքերում բնակվող քաղաքացիների խնդիրները մնում են ամբողջությամբ չլուծված, սակայն ընդգծեց՝ հնարավոր չէ բոլոր հարցերը լուծել միանգամից, սակայն հայաստանցիները պետք է վստահ լինեն, որ կառավարող ուժը տեղյակ է բոլոր խնդիրներից և ջանք չի խնայում դրանց լուծման համար:

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com 

Ապօրինի ձեռնարկատիրություն՝ Շիրակի մարզում

Նոյեմբերի 8-ին ՔՈԳՎ Շիրակի մարզային վարչությունում օպերատիվ տեղեկություններ էին ստացվել, որ Ախուրյան բնակավայրի Ջրաշինարարների բանավանի բնակիչ 59–ամյա տղամարդը, առանց համապատասխան թույլտվության, տանը պատրաստում, ակցիզավորում և իրացնում է տարբեր մակնշումներով օղի և կոնյակ: Օպերատիվ տեղեկությունը ստուգելու նպատակով ՔՈԳՎ Շիրակի մարզային վարչության ծառայողներն այցելել են նշված հասցե: 59-ամյա տղամարդու տանը՝ խմիչքների պատրաստման համար նախատեսված սենյակում, հայտնաբերվել են մեծ քանակությամբ տարբեր մակնշումներով օղու և կոնյակի շշալցված և դատարկ տարաներ, արկղեր, խմիչք պատրաստելու համար նախատեսված հարմարանքներ և գործիքներ, կեղծ ակցիզային դրոշմանիշեր և այլն: Տանտերը հայտնել է, որ առանց համապատասխան թույլտվության զբաղվում է հիշյալ արտադրատեսակների պատրաստմամբ և իրացմամբ:
Կազմված փաստաթղթերն ուղարկվել են Շիրակի մարզային քննչական վարչություն:

Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Տաքսու վարորդը մահակով խփել է 68-ամյա տղամարդու գլխին՝ պատճառելով մահ. նա ձերբակալվել է

ՆԳՆ ոստիկանությունից տեղեկացնում են, որ նոյեմբերի 10-ին՝ ժամը 20.20-ին, համայնքային ոստիկանության Շենգավիթի բաժին հաղորդում է ստացվել, որ շտապօգնության խումբը կանչով մեկնել է Աերացիա թաղամասի սուպերմարկետներից մեկի մոտ, որտեղ ավտոկայանատեղիում հայտնաբերել է տղամարդու դի։

«Դիակի հայտնաբերման վերաբերյալ ահազանգ է ստացվել նաև պարեկային ծառայության կարգախմբից: Պարզվել է, որ մահացածը Արարատի մարզի Դվին գյուղի բնակիչ 68-ամյա Սահակ Շահենյանն է: Շենգավիթի քննչական բաժնում սպանության հատկանիշներով քրեական վարույթ է նախաձեռնվել: ՆԳՆ ՔՈԳՎ Երևան քաղաքի վարչության ու Շենգավիթի բաժնի ծառայողների ձեռնարկած օպերատիվ-հետախուզական միջոցառումների արդյունքում պարզվել է, որ ժամը 20.30-ի սահմաններում նշված սուպերմարկետի մոտ վիճաբանություն է եղել Արարատի մարզի Դարբնիկ գյուղի 56-ամյա բնակչի և Սահակ Շահենյանի միջև, որի ընթացքում 56-ամյա տղամարդը որպես տաքսի շահագործվող իր «Մերսեդես» մակնիշի մեքենայի բեռնախցիկից վերցրել է փայտե մահակն ու հարվածել Սահակ Շահենյանի գլխին՝ պատճառելով կյանքի հետ անհամատեղելի մարմնական վնասվածք։ Հետագա ձեռնարկած միջոցառումների արդյունքում 56-ամյա տղամարդը ժամը 23:40-ին Դարբնիկ գյուղում հայտնաբերվել, ձերբակալվել և, իր վարած «Մերսեդես» մակնիշի մեքենայով, տեղափոխվել է ՔՈԳՎ Երևան քաղաքի վարչություն: Մեքենան տեղափոխվել է Շենգավիթի բաժնի հատուկ պահպանվող տարածք:

Կազմված փաստաթղթերը փոխանցվել են Շենգավիթի քննչական բաժին:
Նախաքննությամբ դեպքի հանգամանքները պարզվում են»,- ասված է հաղորդագրության մեջ:

Նոյեմբերի 12-ին գումարվող ԱԺ հերթական նիստերի օրակարգի նախագծում ընդգրկվել է 26 հարց

Նոյեմբերի 11-ին տեղի է ունեցել Ազգային ժողովի խորհրդի նիստը: Այն վարել է ՀՀ ԱԺ նախագահ Ալեն Սիմոնյանը:

Քննարկվել և հաստատվել են ԱԺ ութերորդ գումարման ութերորդ նստաշրջանի օրակարգում լրացումներ կատարելու մասին և նոյեմբերի 12-ին գումարվող հերթական նիստերի օրակարգի նախագծերը:

Սահմանվել է հերթական նիստերի օրակարգային հարցերի քննարկման հաջորդականությունը:

Նոյեմբերի 12-ին գումարվող հերթական նիստերի օրակարգի նախագծում ընդգրկվել է 26 հարց:

Արթիկում շների դաժան սպանդ է իրականացվել. Մովսես Հարությունյան

Մայր Աթոռում կատարվեց միասնական աղոթք գերեվարված հայորդիների ազատության համար

Նոյեմբերի 10-ին Ն․Ս․Օ․Տ․Տ․ Գարեգին Երկրորդ Ծայրագույն Պատրիարք և Աﬔնայն Հայոց Կաթողիկոսի հանդիսապետությամբ Միածնաէջ Մայր Տաճարում մատուցվեց Սուրբ և Անմահ Պատարագ։ Պատարագիչն էր Արցախի թեմի առաջնորդ Գերաշնորհ Տ․ Վրթանես եպիսկոպոս Աբրահամյանը: Այս մասին հայտնում են Մայր Աթոռ Ս. Էջմիածնի տեղեկատվական համակարգից։

Սրբազան արարողությանը ներկա էին Արցախի նախագահ Սամվել Շահրամանյանը, ԱՀ իշխանության ներկայացուցիչներ, Բաքվի բանտում ապօրինի պահվող հայ պատանդների ու գերիների ընտանիքների անդամներ։

Սուրբ Պատարագի ավարտին, նախագահությամբ Վեհափառ Հայրապետի, կատարվեց միասնական աղոթք, որը Նորին Սրբության տնօրինությամբ նույն օրը տեղի կունենա նաև Հայաստանի և սփյուռքի թեմերի բոլոր եկեղեցիներում։

Այս առիթով Ամենայն Հայոց Կաթողիկոսն իր հայրապետական ուղերձը հղեց համայն հայ ժողովրդին։

Այնուհետև Հայոց Հովվապետը, Մայր Աթոռի միաբաններն ու ներկա հավատացյալ ժողովուրդը աղոթք վերառաքեցին առ Աստված բռնի տեղահանված արցախահայերի իրավունքների պաշտպանության, մասնավորապես գերեվարված հայորդիների ազատության համար։

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Կառավարության որդեգրած քաղաքականությունը նպատակ ունի զարգացնել գիտական ներուժը՝ դարձնելով այն միջազգայնորեն մրցունակ. ԿԳՄՍ նախարար

ԿԳՄՍ նախարար Ժաննա Անդրեասյանն ուղերձ է հղել Գիտության միջազգային օրվա կապակցությամբ։

«Գիտության ոլորտի ներկայացուցիչներ, սիրելի՛ գիտնականներ, հետազոտողներ, շնորհավորում եմ Գիտության միջազգային օրվա առթիվ։

Այսօր, երբ աշխարհը կանգնած է բազմաթիվ մարտահրավերների և ծավալվող անորոշության առջև, հանրային ակնկալիքը՝ գիտության միջոցով հարցերի պատասխաններ գտնելու, միայն աճում է։

Գիտելիքահեն տնտեսությունը, հանրային բոլոր ոլորտներում խելացի գործիքակազմերի ներդնումը, մեծաքանակ տվյալների վերլուծության կարիքն ըստ էության հետազոտական նվազագույն հմտությունների անհրաժեշտություն են դնում ոչ միայն գիտնականների, այլ նաև մասնագիտական ծառայությունների ոլորտում ներգրավված բազմաթիվ մարդկանց, կյանքի տարբեր իրավիճակներում հայտնվող քաղաքացիների համար։

ՀՀ կառավարության որդեգրած քաղաքականությունը՝ ուղղված գիտության ու կրթության ոլորտի բարեփոխումներին, նպատակ ունի զարգացնել գիտական ներուժը՝ դարձնելով այն միջազգայնորեն մրցունակ։

Ցանկանում եմ առանձնակի շեշտել թե՛ բնական, թե՛ հումանիտար և հասարակական գիտությունների զարգացման առաջնահերթությունը և մեկը մյուսին փոխլրացնելու կարևորությունը, որով պայմանավորված է պետության և հանրության իրական զարգացումը։ Ընդ որում՝ ցանկանում եմ ուրախությամբ շեշտել, որ Կառավարության ծրագրով 2021 թվականին գիտության ոլորտում նախանշած հիմնական թիրախներն արդեն իսկ իրականություն են և հնարավոր են դարձնում մտածել հաջորդ փուլի զարգացման ռազմավարության մասին։

Մասնավորապես՝ գիտության ոլորտում Կառավարության քաղաքականությունը մրցունակ է դարձրել ոլորտում գիտնականների աշխատավարձը՝ բարձրացնելով միայն բազային ֆինանսավորումը մինչև 300 տոկոսով, ներդնելով թեմատիկ ֆինանսավորման տարաբնույթ ձևաչափեր, նոր դրամաշնորհներ, որոնց շնորհիվ երիտասարդ գիտնականներն ու ասպիրանտները վերապատրաստվում են արտերկրի լավագույն գիտական կենտրոններում։

Հիմնվում են հեռավար լաբորատորիաներ՝ արտերկրի հեղինակավոր գիտնականների հետ համատեղ, արտերկրի գիտնականները, այդ թվում՝ Սփյուռքից, նաև տեղափոխվում են Հայաստան՝ տեղի հետազոտողների հետ գիտական աշխատանք իրականացնելու, նաև դասավանդելու։

Իրականացվում են տնտեսության համար կարևոր կիրառական բնույթի հետազոտություններ, երկրի պաշտպանունակությանն ուղղված գիտական աշխատանքներ, յուրաքանչյուր տարի ձեռք են բերվում արդիական բարձրարժեք գիտական սարքավորումներ՝ աննախադեպ ծավալներով, որոնք թույլ են տալիս մեր երկրում իրականացնել ամենաբարձր մակարդակի հետազոտական աշխատանք՝ միզազգայնորեն մրցունակ գիտական համայնք ձևավորելով։

Այս աշխատանքների շնորհիվ մենք արդեն երկու տարի շարունակ գրանցում ենք գիտության մեջ զբաղված հետազոտողների թվի աճ՝ կոտրելով նախորդ տարիների՝ գիտական աշխատանքով զբաղվածների թվի նվազման միտումը։ Ընդ որում՝ գիտությամբ զբաղվողների մեջ մեծ թիվ են կազմում երիտասարդ գիտնականները՝ ցույց տալով, որ գիտությամբ զբաղվելը մեզանում դառնում է մրցունակ ու հետաքրքիր կենսագիծ երիտասարդների համար։

Դրան են ուղղված նաև դպրոցականների շրջանում գիտությամբ զբաղվելու հեռանկարը խրախուսելու քայլերը․ 2021թվականից կազմակերպվում է Համադպրոցական գիտության փառատոնը, այս տարի առաջին անգամ իրականացվեց Գիտության շաբաթը՝ գործընկերների հետ համագործակցությամբ, դպրոցներում հիմնվող բնագիտական և տեղեկատվական նոր լաբորատորիաները գալու են խթանելու փորձարարական միտքն ու միջավայրը՝ ստեղծելով բարենպաստ պայմաններ հետազոտական աշխատանքի ընտրության համար։

Միաժամանակ տարաբնույթ ցուցանիշները վկայում են, որ գնալով ավելի ու ավելի մեծ գիտական արդյունք է ստեղծվում բուհերում, որը պետք է միայն խրախուսել՝ հնարավորինս ինտեգրելով բարձրագույն կրթությունն ու գիտությունը։ Կառավարության առաջնահերթ ծրագրերից համարվող Ակադեմիական քաղաքը դառնալու է բարձրագույն կրթության և հետազոտության համար անհրաժեշտ որակյալ միջավայր՝ ձևավորելով գիտությամբ զբաղվելու հրաշալի միջավայր։ Գիտության և բարձրագույն կրթության զարգացման օրակարգերի ինստիտուցիոնալ հենքն ապահովելու է հանրային քննարկման ներկայացված «Բարձրագույն կրթության և գիտության մասին» օրենքի նախագիծը։

Գիտության զարգացման շուրջ խոսակցության հերթական առիթը կունենանք գիտության զարգացման ռազմավարության շրջանակում, որը նախատեսում ենք մեկնարկել առաջիկայում։ Մենք ապրում ենք դժվար ժամանակներում, որտեղ առաջ գնալու նախապայմանը դժվար հարցերի մասին խոսելն ու դրանց պատասխանները փնտրելն է։ Գիտությունն է դժվար հարցերին պատասխանելու ամենաարդյունավետ ձևերից մեկը, որտեղ խիստ կարևոր է ազնվությունը, կասկածելու ունակությունն ու սխալներից սովորելու կարողությունը։

Մաղթում եմ մեր գիտնականներին, հետազոտողներին, գիտության ոլորտի բոլոր ներկայացուցիչներին մտքի ազատություն և ստեղծագործ ու արդյունավետ աշխատանք։

Շնորհավո՛ր Գիտության միջազգային օր»,- ասված է ուղերձում: