Գյումրին և Շիրակի մարզն ունեն զբոսաշրջության զարգացման մեծ ներուժ
Գյումրին և Շիրակի մարզն ունեն զբոսաշրջության զարգացման մեծ ներուժ Շիրակի մարզպետարանում քննարկվել են 2026–2030 թվականների զբոսաշրջության զարգացման ծրագրերն ու Գյումրու ենթակառուցվածքների բարելավման առաջիկա քայլերը։ Հանդիպմանը մասնակցել են մարզպետ Դավիթ Առուշանյանը, Զբոսաշրջության կոմիտեի նախագահ Լուսինե Գևորգյանը և ոլորտի ներկայացուցիչները։ Ներկայացվել են կլաստերային զարգացման ծրագրերը, որտեղ առաջնահերթ են պատմամշակութային, գաստրո և արկածային տուրիզմները։
Մարզպետը նշել է, որ Շիրակն ունի մեծ զբոսաշրջային ներուժ և կարող է դառնալ երկրի առաջատար ուղղություններից մեկը։ Քննարկվել են նաև ոլորտի խնդիրներն ու առաջարկները։ Պաշտոնյաները շրջայց են կատարել Գյումրիում՝ դիտարկելով ենթակառուցվածքային ծրագրերի հաջորդ փուլը։ Այցելել են Հաղթանակի զբոսայգի, կենտրոնական շուկա և Սևյանի մշակույթի նախկին պալատ։ Նշվել է, որ պատմամշակութային կառույցների վերականգնումը և ժամանակակից լուծումների ներդրումը կարող են էապես խթանել զբոսաշրջությունը։ Կողմերը պայմանավորվել են շարունակել համագործակցությունը։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
«Քաղաքացիական հասարակության դերը ՀՀ ԱԺ ընտրություններում»
«Քաղաքացիական հասարակության դերը ՀՀ ԱԺ ընտրություններում»
#ԱԺ2026 #Ընտրություններ #Հունիսի7
Հունիսի 7-ին՝ խորհրդարանական ընտրություններ Հայաստանում
Ինչպե՞ս է քաղաքացիական հասարակությունը ազդում ընտրությունների վրա 
Թափանցիկություն
Վստահություն
Արդար գործընթաց
Դիտեք ուղիղ՝
Բանախոսներ՝
Վիկտորյա Եղոյան – ընտրական փորձագետ-Իրավաբան
Լևոն Բարսեղյան – մեդիա փորձագետ
Վարդինե Գրիգորյան – քաղաքացիական հասարակության ներկայացուցիչ-դիտորդ
Համակարգող՝ Լուսինե Մովսիսյան
___________________________________________________
English below
The Role of Civil Society in Armenia’s Parliamentary Elections
June 7 – Parliamentary Elections in Armenia
How does civil society shape elections?
Transparency
Trust
Accountability
Watch live:
https://www.youtube.com/live/ZOzP-C0ot3g
Speakers:
Viktoria Yeghoyan – Election expert, lawyer
Levon Barseghyan – Media expert
Vardine Grigoryan – Civil society representative, observer
Moderator: Lusine Movsisyan
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Փոփոխություններ՝ Ղարաբաղից տեղահանվածների բնակարանային աջակցության ծրագրում
Կառավարությունը փոփոխություններ է կատարել Ղարաբաղից տեղահանված ընտանիքների բնակարանային ապահովման պետական աջակցության ծրագրում՝ նպատակ ունենալով խթանել նրանց սոցիալական և տնտեսական ներառումը և ապահովել Հայաստանում երկարաժամկետ բնակության պայմաններ։ Ըստ հիմնավորման՝ 2026 թվականի մարտի 23-ի դրությամբ ծրագրի հավաստագիր է ստացել 5181 ընտանիք, որոնցից 2304-ը արդեն իրացրել են այն։
Ծրագրի իրականացման ընթացքում ի հայտ են եկել մի շարք խնդիրներ։ Մասնավորապես՝ որոշ շահառուներ բնակարան ձեռք բերելու համար օգտվել են ոչ թե հիփոթեքային, այլ սպառողական վարկերից, ինչը գործող կարգավորմամբ չի համապատասխանել ծրագրի պահանջներին։ Կառավարության որոշմամբ առաջարկվում է բարձրացնել ծրագրի արդյունավետությունը և հստակեցնել աջակցության պայմանները։ Մասնավորապես՝ • մարզերում աջակցության չափը կկազմի ընտանիքի յուրաքանչյուր անդամի հաշվով 4 մլն դրամ, • Երևանում՝ 3 մլն դրամ (բացառությամբ հատուկ սահմանաչափով բնակավայրերի), • արդեն հավաստագիր իրացրած ընտանիքները կստանան հավելյալ փոխհատուցում՝ տարբերության չափով։
Նշվում է նաև, որ աջակցությունից կկարողանան օգտվել այն շահառուները, որոնք մինչև 2025 թվականի հուլիսի 1-ը բնակարան ձեռք բերելու համար ստացել են անշարժ գույքի գրավով սպառողական վարկ։ Եթե շահառուն ցանկանում է աջակցությունը ուղղել կահույքի կամ կենցաղային տեխնիկայի ձեռքբերմանը, գումարը կփոխանցվի անմիջապես վաճառողի բանկային հաշվին՝ համապատասխան փաստաթղթերի հիման վրա։ Միաժամանակ, ծրագրի շրջանակում ընտանիքի անդամ կհամարվեն նաև մինչև 2026 թվականի դեկտեմբերի 31-ը ծնված երեխաները՝ անկախ դիմում ներկայացնելու ժամկետից։
Որոշմամբ նախատեսվում է նաև պարզեցնել շահառու ճանաչվելու ընթացակարգը։ Եթե դիմումատուի տվյալները առկա են համապատասխան պետական բազաներում և հաստատվում է, որ նա մինչև տեղահանվելը առնվազն 12 ամիս ապրել, աշխատել կամ սովորել է Ղարաբաղում, ապա կարող է ճանաչվել շահառու՝ նույնիսկ փաստաթղթերի ամբողջական փաթեթի բացակայության դեպքում։ Բացի այդ, առաջարկվում է փոփոխություններ կատարել միջգերատեսչական հանձնաժողովի կազմում՝ դրա աշխատանքն առավել արդյունավետ կազմակերպելու նպատակով։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Կառավարությունը 2 մլրդ դրամ է հատկացրել մարզային ծրագրերին
Կառավարությունը այսօրվա նիստում 1 մլրդ 100 մլն դրամ է հատկացրել մարզպետների աշխատակազմերին՝ 2023–2025 թվականների սուբվենցիոն ծրագրերի համաֆինանսավորման համար։ Ինչպես նշել է ՏԿԵ նախարար Դավիթ Խուդաթյանը, նախատեսվում է աջակցել 11 համայնքների 11 ծրագրի իրականացմանը տարբեր մարզերում։
Նրա խոսքով՝ այս որոշմամբ 2026 թվականի պետական բյուջեից համաֆինանսավորվող սուբվենցիոն ծրագրերի ընդհանուր ծավալը կհասնի 3 մլրդ 57 մլն դրամի։ Վարչապետը ներկայացրել է տարբեր համայնքներում իրականացվող և ընթացքի մեջ գտնվող աշխատանքները, որոնք ներառում են արևային կայանների տեղադրում, բազմաբնակարան շենքերի տանիքների վերանորոգում, ճանապարհաշինություն, մանկապարտեզների կառուցում ու հիմնանորոգում, ոռոգման համակարգերի արդիականացում և այլ ենթակառուցվածքային ծրագրեր։
Մասնավորապես՝ Արագածոտնում տեղադրվում են արևային ֆոտովոլտային կայաններ, Արարատում և Տավուշում իրականացվում են ճանապարհաշինական ծրագրեր, Արմավիրում կառուցվել է խաղահրապարակ, Գեղարքունիքում և Սյունիքում ընթանում են կրթական ու բնակարանային ծրագրեր, Տավուշում արդիականացվում են ոռոգման համակարգերը և փոխարինվում վերելակներ։ Կառավարության մեկ այլ որոշմամբ ևս միջոցներ կհատկացվեն մարզերում առաջնահերթ լուծում պահանջող անհետաձգելի ծրագրերի իրականացման համար։ Այդ նպատակով ՀՀ տարածքային կառավարման և ենթակառուցվածքների նախարարություն-ին կտրամադրվի ավելի քան 1.3 մլրդ դրամ, որը կբաշխվի մարզպետների աշխատակազմերի միջև՝ ըստ ծրագրերի։
© dialoguemc.am Freedom of speech & Pluralism
Հեռ. ՝ +37498 691-690; Էլ. Փոստ ՝ dialoguemediacenter@gmail.com
Սահմանադրական դատարանի նորընտիր դատավոր Վլադիմիր Վարդանյանը երդվեց Ազգային ժողովում
Մեկնարկել է ԱԺ ութերորդ գումարման տասնմեկերորդ նստաշրջանի հերթական նիստը: ԱԺ նախագահի տեղակալ Ռուբեն Ռուբինյանը հայտնեց՝ Սահմանադրական դատարանի մասին սահմանադրական օրենքի 5-րդ հոդվածի համաձայն՝ Սահմանադրական դատարանի նորընտիր դատավորը ընտրություններից հետո Ազգային ժողովում երդվում է:
Երդման համար ձայնը տրվեց Վլադիմիր Վարդանյանին:
«Ազգային ժողովի մեծարգո փոխնախագահ, հարգելի գործընկերներ, սիրելի քաղաքացիներ, ընթերցում եմ Սահմանադրական դատարանի դատավորի երդման տեքստը:
Ստանձնելով Սահմանադրական դատարանի դատավորի պաշտոնը՝ ՀՀ ժողովրդի առջև երդվում եմ՝ ապահովել Սահմանադրության գերակայությունը, գործել անկախ և անաչառ, հավատարիմ մնալ Սահմանադրական դատարանի դատավորի բարձր կոչմանը:
Շնորհակալություն»,- երդվեց Վարդանյանը:
Հիշեցնենք, որ ՀՀ նախագահը Սահմանադրական դատարանի դատավորի պաշտոնի համար առաջարկել էր Վլադիմիր Վարդանյանի թեկնածությունը:
Վլադիմիր Վարդանյանը 2018-2026 թթ. եղել է «Քաղաքացիական պայմանագիր» կուսակցության անդամ, 2019-2021 թթ.՝ ԱԺ պատգամավոր («Իմ քայլը» կուսակցությունների դաշինքի համապետական ընտրական ցուցակ), ԱԺ պետական-իրավական հարցերի մշտական հանձնաժողովի նախագահ: 2021 թ. հունիսի 20-ին «Քաղաքացիական պայմանագիր» կուսակցության համապետական ընտրական ցուցակով ընտրվել է ԱԺ պատգամավոր:
Հիշեցնենք, որ քաղհասարակության ներկայացուցիչները կասկածի տակ են դնում ՍԴ նորընտիր դատավոր Վլադիմիր Վարդանյանի անկախությունն ու անաչառությունը:
Հարկ ենք համարում հիշեցնել, որ նույնօրինակ իրավիճակ է ստեղծվել նաև տարիներ առաջ՝ 2018թ․ Հրայր Թովմասյանի՝ Սահմանադրական դատարանի դատավոր, այնուհետև՝ նախագահ ընտրվելու գործընթացի հետ, որտեղ նույն քաղաքական անթաքույց փոխկապակցվածության հանգամանքը հիմք էր ծառայել այդ թվում վարչապետ Նիկոլ Փաշինյանի համար, ով այդ ժամանակ ընդդիմադիր խմբակցության պատգամավոր էր, այդ նշանակումը որակել որպես Ս․Սարգսյանի կողմից «գործուղում» Սահմանդրական դատարան:
© dialoguemc.am Freedom of speech & Pluralism
Հեռ. ՝ +37498 691-690; Էլ. Փոստ ՝ dialoguemediacenter@gmail.com
3-6 տարեկան երեխաները նախակրթարան հաճախելու հնարավորություն կստանան․ նախագիծը քննարկվում է ԱԺ-ում
ԿԳՄՍ նախարար Ժաննա Անդրեասյանը ԱԺ լիագումար նիստում առաջին ընթերցմամբ ներկայացրել է «Նախադպրոցական կրթության մասին» օրենքում և հարակից օրենքներում լրացումների և փոփոխությունների նախագիծը։
Առաջարկվող փոփոխություններով՝ նախակրթարանները կընդունեն 3-6 տարեկան երեխաների այն դեպքում, երբ գործող կարգավորմամբ նախակրթարան են հաճախում 5 տարեկանները։ Ժաննա Անդրեասյանն ընդգծել է, որ առաջարկվող փոփոխությունը կարևոր է հատկապես այն բնակավայրերի համար, որտեղ մանկապարտեզների մեծ հերթեր են գոյանում, և ոչ բոլոր երեխաներն են կարողանում ընդգրկվել նախադպրոցական կրթության համակարգում։ Առաջարկվող փոփոխությամբ՝ 4 տարեկան երեխաները նման բնակավայրերում նախակրթարաններ հաճախելու հնարավորություն կստանան, ինչը կնպաստի նրանց հետագա կրթական արդյունքի բարելավմանը։
«Նախադպրոցական կրթության հասանելիության մեծացումը Կառավարության ծրագրի կարևոր թիրախներից է։ Այս առումով բավական մեծ առաջընթաց ունենք․ 2017 թվականի համեմատ 17 տոկոսով ավելացել է 3-5 տարեկան երեխաների ընդգրկվածությունը համակարգում»,- ասել է նախարարը՝ ընդգծելով, որ Կառավարության 500 մանկապարտեզների կառուցման ծրագրի շրջանակում արդեն ավելի քան 300 մանկապարտեզում և նախակրթարանում ավարտվել են կառուցման և բարեկարգման աշխատանքները, և մինչև տարեվերջ կապահովվեն Կառավարության ծրագրով սահմանված թիրախային ցուցանիշները։
«Նախադպրոցական հաստատությունների կառուցման և նորոգման աշխատանքներին զուգահեռ կարիք ունենք լավարկելու իրավական ընթացակարգերը, որը հնարավորություն կտա ապահովել ավելի լայն ընդգրկվածություն՝ երեխաների նախադպրոցական կրթության կազմակերպման համար»,-ասել է Ժաննա Անդրեասյանը՝ հավելելով, որ առաջարկվող փոփոխություններն այդ նպատակին են միտված։
Նախարարը նաև նշել է, որ այն բնակավայրերում, որոմցում մանկապարտեզներ չկան, նախակրթարան կհաճախեն 3-6 տարեկանները, ինչը նույնպես կնպաստի համակարգում ընդգրկվածության ավելացմանը։
«Այս մոտեցումը հնարավորություն է տալիս ավելի ճկուն լինել և ապահովել փոքր թվով նախադպրոցական տարիքի երեխաներ ունեցող բնակավայերի նախադպրոցական կրթության հասանելիությունը։ Իրականացված պետական քաղաքականության արդյունքում մենք գրեթե բոլոր բնակավայրերում հասել ենք նախադպրոցական կրթության ապահովման։ Այս կարգավորումը ևս հնարավորություն կտա, որ այս համակարգի շահառու դառնան ավելի մեծ թվով երեխաներ»,- նշել է նա։
Օրենսդրական փոփոխության մյուս ուղղությունը վերաբերում է հավաստագրման գործընթացի միասնականացմանը կամ ստանդարտացմանը։ Ինչպես հայտնի է, նախադպրոցական, հանրակրթության, և միջին մասնագիտական կրթության համակարգերում հաստատությունների ղեկավարման համար պահանջվում է հավաստագիր, որը փաստում է՝ տվյալ անձն ունի բավարար գիտելիքներ հաստատության կառավարման համար։ Ներկայում տարբեր աստիճաններում հավաստագրման առանձին գործընթացներ են իրականացվում։ Առաջարկվում է սահմանել հավաստագրաման միասնական ստանդարտ ողջ համակարգի համար։
Նախագծի քննարկման ընթացքում ԿԳՄՍ նախարարը պատասխանել է նաև պատգամավորների հարցերին:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Մի շարք կազմակերպություններ դատապարտել են արցախցի կնոջն ուղղված Փաշինյանի հայտարարությունները
Մի շարք հասարակական կազմակերպություններ հանդես են եկել համատեղ հայտարարությամբ՝ դատապարտելով նախօրեին ՀՀ վարչապետի կողմից Արցախից բռնի տեղահանված կնոջն ուղղված խոսույթը։
Հայտարարությունը՝ ստորև.
«Մենք՝ ներքոստորագրյալ հասարակական կազմակերպություններս, անընդունելի ենք համարում եւ դատապարտում ենք 2026թ․ մարտի 22-ին ՀՀ վարչապետ Նիկոլ Փաշինյանի և Արցախից բռնի տեղահանված կնոջ միջև խոսակցության ընթացքում վարչապետի վարքագիծն ու խոսույթը, ինչը ոչ միայն հանրային պաշտոն զբաղեցնող անձի վարքագծի կանոնների խախտում է, այլև Արցախից բռնի տեղահանված հայ բնակչության նկատմամբ անհանդուրժողական և ատելության խոսք։
Մասնավորապես, 2026թ․ մարտի 22-ին Նիկոլ Փաշինյանը Երևանի մետրոպոլիտենում քարոզչարշավ իրականացնելու ընթացքում դիմել է իր երեխայի հետ երթևեկող կնոջը և երեխային, առաջարկել նվիրել Հայաստանի Հանրապետության քարտեզի պատկերով կրծքազարդ։ Կինը հրաժարվել է՝ նշելով, որ Արցախից են, ունեն այլ քարտեզ։ Խոսակցության ընթացքում Նիկոլ Փաշինյանը բարձրացրել է ձայնը, կնոջ հետ խոսել մատ թափ տալով։ Ավելին, կնոջ հորդորից հետո, որ ձայնը չբարձրացնի և մատ թափ տալով չխոսի՝ վարչապետը նշել է, որ կխոսի այդպես, հանդիմանել է, ասելով, թե Հայաստանի բյուջեից միլիոններ են ծախսվել Արցախում հայերին պահելու համար, և «Մյուս անգամ փախածներով չփորձեք ասել, որ ես Ղարաբաղ եմ տվել»։ Ավելին, տեսանյութում լսվում է, որ կինը հայտնում է, որ չի ցանկանում շարունակել խոսակցությունը և խնդրում է՝ իրեն ու իր երեխային չնկարահանել, սակայն ինչպես խոսակցությունը, այնպես էլ տեսանկարահանումը շարունակվել է։
Միջադեպին ներկա են եղել կառավարող ուժի այլ ներկայացուցիչներ, ինչպես նաև վարչապետի անվտանգության աշխատակիցներ։ Վարչապետը մշտապես հանդես է գալիս ի պաշտոնե, ինչն ընկալվում է որպես հանրային իշխանության հարկադրանքի մարմնավորում և այս վարքագիծը կարող է գնահատվել որպես կնոջ նկատամբ հոգեբանական բռնություն։
Առանձնահատուկ մտահոգիչ է, որ խոսակցությունը տեղի է ունեցել կնոջ երեխայի ներկայությամբ։ Երեխան ոչ միայն ականատես է դարձել մոր նկատմամբ նման վարքագծին, այլև անմիջականորեն ներգրավվել է քարոզչության մեջ, ինչն անընդունելի է, քանի որ ձևավորում է ապագա սերունդների ընկալումները ուժի, խոսքի որակի և հարաբերությունների մասին։
Սա նաև ազդակ է՝ ուղղված ողջ հասարակությանը, որը լեգիտիմացնում է բռնությունը և բևեռացումը, որը, ցավալիորեն, ընտրությունների նախաշեմին խորանալու միտում ունի։ Թեև վարչապետն ավելի ուշ ներողություն է խնդրել, նրա խոսույթը հասցրել է արցախցիների նկատմամբ ատելության և նրանց թիրախավորման հերթական ալիքի հանգեցնել, հատկապես սոցիալական ցանցերում։ Ավելին՝ ատելության խոսքի տարածմանը խթան է հանդիսացել «Քաղաքացիական պայմանագիր» կուսակցության հետ փոխկապակցված մեդիայի՝ civic.am-ի կողմից հրապարակված հոդվածը, որի նպատակն էր վարկաբեկել արցախցի կնոջը։
Ցավալիորեն, Հայաստանում հանրային պաշտոն զբաղեցնող անձանց, այդ թվում՝ վարչապետ Փաշինյանի և ՀՀ ԱԺ խոսնակ Ալեն Սիմոնյանի կողմից Արցախից բռնի տեղահանված հայերի նկատմամբ ատելության, թիրախավորող և վիրավորական խոսույթի նման դրսևորումները եզակի չեն։ Հաշվի առնելով այն հանգամանքը, որ հանրային իշխանության ներկայացուցիչների և հատկապես ղեկավար պաշտոն զբաղեցնող անձանց վարքագիծն ազդում է հասարակության տարբեր խմբերի վարքագծի վրա և տարածվում ոչ միայն սոցիալական ցանցերում, այլ նաև հանրային հարաբերությունների այլ մակարդակներում՝ նման վարքագիծը հատկապես անընդունելի և մտահոգիչ է, քանի որ հանգեցնում է հասարակության բևեռացման և համերաշխության բացառման ու բռնի տեղահանված բնակչության կրկնազոհայնացման։ Արցախից բռնի տեղահանված հայերի նկատմամբ անհանդուրժողականության և ատելության խոսքի երևույթը, հատկապես սոցիալական ցանցերում, լրջագույն խնդիր է, որի դեմ ոչ միայն արդյունավետ քայլեր չեն ձեռնարկվում, այլև հանրային իշխանության ներկայացուցիչների կողմից է նման խոսք ձևավորվում և քաջալերվում։
Հաշվի առնելով բռնի տեղահանված անձանց խոցելիությունը՝ հանրային իշխանության ներկայացուցիչները, հատկապես բարձրագույն պաշտոն զբաղեցնող անձինք, պարտավոր են հաղորդակցության ընթացքում դրսևորել առավելագույն զսպվածություն և հարգալից վերաբերմունք ու խոսք՝ ապահովելով մարդու արժանապատվության նկատմամբ հարգանքը։
Հիշեցնենք, որ ատելություն, խտրականություն, անհանդուրժողականություն կամ թշնամանք ներառող հրապարակային խոսքը կարող է պարունակել ընդհուպ քրեական հանցագործության տարրեր՝ կախված դիտավորությունից: Արցախի հայ բնակչությունը Ադրբեջանի կողմից ենթարկվել է էթնիկ զտման և բռնի տեղահանության, ինչը եղել է պետական նպատակային քաղաքականություն և իրականացվել է համապարփակ ռազմավարության հիման վրա՝ մաքրելու Լեռնային Ղարաբաղի տարածքը էթնիկ հայ բնակչությունից և պատմամշակութային ներկայությունից։ Այս քաղաքականությունն ուղեկցվել է Արցախի բնակիչների իրավունքների և ազատությունների տևական և լուրջ խախտումներով և ծանրագույն պատերազմական հանցագործություններով։ Արցախի բնակչության նկատմամբ շարունակական ահաբեկման քաղաքականությունը, երկարատև շրջափակումը և 2023թ․ սեպտեմբերի 19-ին ռազմական հարձակումը այս քաղաքականության գագաթնակետն են եղել՝ անհնարին դարձնելով Արցախի բնակչության անվտանգ և արժանապատիվ ապրելու հնարավորությունը և հանգեցնելով զանգվածային բռնի տեղահանության։
Խախտումները Արցախի տարածքում շարունակվում են՝ հայկական մշակութային և պատմական ներկայությունը ջնջելու տեսքով, ներառյալ՝ հայկական մշակութային հուշարձանների, եկեղեցիների, գերեզմանատների և բնակելի թաղամասերի պլանավորված կամ արդեն իրականացված ոչնչացումը։ Հաշվի առնելով վերոգրյալը՝ պահանջում ենք ՀՀ իշխանություններից և հատկապես վարչապետ Փաշինյանից՝
-Ձեռնպահ մնալ և բացառել ատելություն և անհանդուրժողականություն տարածող, խտրականություն և վիրավորանք պարունակող խոսույթի կիրառումից, այդ թվում՝ սոցիալական ցանցերով և փոխկապակցված լրատվամիջոցներով, ինչը հանգեցնում է ինչպես հասարակության բևեացվածության խորացման, այնպես էլ քաղաքական իրավիճակի հետագա լարվածության ուժգնացման,
-Պատասխանատվության ենթարկել Արցախից բռնի տեղահանված բնակչության նկատմամբ ատելության խոսք արտահայտող և տարածող անձանց, Հանրային խոսքում լինել զուսպ և պահպանել հանրային պաշտոն զբաղեցնող անձի էթիկայի և վարքագծի կանոնները,
-Հանրային պաշտոն զբաղեցնող անձանց և լրատվամիջոցներին՝ ապահովել իրենց սոցիալական ցանցերում ատելության խոսք պարունակող գրառումների և մեկնաբանությունների մոդերացիա, Եվ առհասարակ՝ երաշխավորել մարդու իրավունքների նկատմամբ հարգանքը և ապահովել իրավունքի գերակայության սկզբունքի իրականացումը Հայաստանի Հանրապետությունում, այդ թվում՝ անձնական կյանքի իրավունքի պաշտպանությունը»,- ասվում է հաղորդագրությունում։
Հայտարարությանը միացել են՝
Իրավունքների պաշտպանություն առանց սահմանների ՀԿ
«Արդարության նոր մշակույթ» ՀԿ
«Հայ առաջադեմ երիտասարդություն» ՀԿ
Հանրային լրագրության ակումբ ՀԿ
Երևանի մամուլի ակումբ
Բազմակողմանի տեղեկատվության ինստիտուտ
Ժողովրդավարության և անվտանգության տարածաշրջանային կենտրոն
«Համայնքային համախմբման և աջակցության կենտրոն» ՀԿ
«Հելսինկյան ասոցիացիա» ԻՀԿ
Հելսինկյան քաղաքացիական ասամբլեայի հայկական կոմիտե
Ժուռնալիստների «Ասպարեզ» ակումբ
Հանուն հավասար իրավունքների ՀԿ
Մեդիա նախաձեռնությունների կենտրոն
Էկոլուր տեղեկատվական ՀԿ
Թրանսփարենսի Ինթերնեշնլ հակակոռուպցիոն կենտրոն
Իրավունքի զարգացման և պաշտպանության հիմնադրամ
«Գյումրու առաջընթաց» ՔՀԶԿ ՀԿ
© dialoguemc.am Freedom of speech & Pluralism
Հեռ. ՝ +37498 691-690; Էլ. Փոստ ՝ dialoguemediacenter@gmail.com
Փոփոխություններ են կատարվել ԽՍՀՄ Խնայբանկում ունեցած ավանդների փոխհատուցման կարգում
ԽՍՀՄ Խնայբանկի ՀԽՍՀ հանրապետական բանկում մինչև 1993 թ․ հունիսի 10-ը ներդրված դրամական ավանդների դիմաց փոխհատուցում այսուհետ կարող են ստանալ նաև մինչև 1944 թ․ դեկտեմբերի 31-ը ներառյալ ծնված անձինք․ փոխհատուցումը կտրամադրվի անկանխիկ եղանակով։ Այդ մասին տեղեկանում ենք Աշխատանքի և սոցիալական հարցերի նախարարությունից։
Հիշեցնենք, որ ավանդատուն կարող է անձամբ (օրինական ներկայացուցչի կամ լիազորագրի հիման վրա գործող ներկայացուցչի միջոցով) դիմել Միասնական սոցիալական ծառայության իր հաշվառման վայրի տարածքային կենտրոն` ներկայացնելով՝
անձը հաստատող փաստաթուղթ կամ նույնականացման քարտ,
ավանդատուի հանրային ծառայությունների համարանիշը կամ սոցիալական ապահովության քարտը կամ հանրային ծառայությունների համարանիշ չունենալու մասին տեղեկանք,
ավանդատուի խնայողական գրքույկը (առկայության դեպքում),
տեղեկանք «ՎՏԲ-Հայաստան» փակ բաժնետիրական ընկերությունից՝ ավանդատուի բանկային հաշվի քարտում 1993 թվականի հունիսի 10-ի դրությամբ առկա տվյալների մասին,
ըստ անհրաժեշտության՝ այլ փաստաթղթեր։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Երկրաշարժ Մարտունի քաղաքից 8 կմ հարավ-արևելք
Մարտի 24-ին՝ տեղական ժամանակով ժամը 14:10-ին (Գրինվիչի ժամանակով՝ ժամը 10։10-ին) ՀՀ ՆԳՆ Սեյսմիկ պաշտպանության տարածքային ծառայության սեյսմոլոգիական ցանցի կողմից գրանցվել է հյուսիսային լայնության 40.08⁰ և արևելյան երկայնության 45⁰35⁰ աշխարհագրական կոորդինատներով Հայաստան՝ Մարտունի քաղաքից 8 կմ հարավ-արևելք, օջախի 10 կմ խորությամբ 2.7 մագնիտուդով երկրաշարժ։ Այս մասին տեղեկացնում են ՆԳՆ Փրկարար ծառայությունից:
Էպիկենտրոնային գոտում ստորգետնյա ցնցման ուժգնությունը կազմել է 3-4 բալ:
Երկրաշարժը զգացվել է՝ Գեղարքունիքի մարզի Զոլաքար և Մադինա գյուղերում՝ 2-3 բալ ուժգնությամբ:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com
Քրեական վարույթ՝ Վանաձորի սոցիալական ծառայության պաշտոնյայի նկատմամբ
ՀՀ հակակոռուպցիոն կոմիտեում քննված քրեական վարույթով իրականացված նախաքննությամբ պարզվել է, որ ՀՀ աշխատանքի և սոցիալական հարցերի նախարարության Միասնական սոցիալական ծառայության Վանաձորի տարածքային կենտրոնի պաշտոնատար անձը, օգտագործելով իր իշխանական և ծառայողական լիազորությունները, ապօրինի գործողությունների համար ստացել է կաշառք, ինչպես նաև կատարել պաշտոնեական կեղծիք և հափշտակություն: Այս մասին տեղեկացնում են Հակակոռուպցիոն կոմիտեից: «Մասնավորապես՝ նախաքննությամբ պարզվել է, որ նշված պաշտոնատար անձը Լոռու մարզի բնակչի կողմից նպաստ ստանալու գործընթացը չդադարեցնելու համար 2022 թվականին որպես կաշառք ստացել է նրա մեկ ամսվա նպաստի չափով գումար՝ դրա դիմաց չարձանագրելով վերջինիս կողմից ՍՊԸ-ում աշխատելու և խոշոր եղջերավոր անասուններ ունենալու հանգամանքները, ինչպես նաև կազմել և հաստատել է պաշտոնական շրջանառության ենթակա կեղծ արձանագրություն։
Նախաքննության ընթացքում բացահայտվել է նաև հիշյալ պաշտոնյայի կողմից նույն բնակավայրի մեկ այլ բնակչից կրկին մեկ ամսվա նպաստի գումարի չափով կաշառք ստանալու դեպք: Արդյունքում՝ Լոռու մարզի երկու բնակիչներ ստացել են ընդհանուր 786.000 ՀՀ դրամի չափով նպաստի գումար:
Միասնական սոցիալական ծառայության աշխատակցին մեղադրանք է ներկայացվել ՀՀ քրեական օրենսգրքի 435-րդ հոդվածի 2-րդ մասի 3-րդ կետով (2 դրվագ), 255-րդ հոդվածի 2-րդ մասի 2-րդ կետով (2 դրվագ) և 445-րդ հոդվածի 1-ին մասով (2 դրվագ): Նրա նկատմամբ որպես խափանման միջոց է կիրառվել կալանքը: Մեղադրանքներ են ներկայացվել նաև Լոռու մարզի 3 բնակիչներին:
Քրեական վարույթով նախաքննությունն ավարտվել է, և վարույթի նյութերը մեղադրական եզրակացությամբ ուղարկվել են ՀՀ հակակոռուպցիոն դատարան»,- ասվում է հաղորդագրությունում:
Ծանուցում. հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumri@gmail.com