Նորություններ

Ռուբեն Վարդանյանը բանտից բաց նամակ է հղել ՀՀ մարդու իրավունքների պաշտպան Անահիտ Մանասյանին

Ռուբեն Վարդանյանը բանտից բաց նամակ է հղել ՀՀ մարդու իրավունքների պաշտպան Անահիտ Մանասյանին՝ բարձրացնելով Ադրբեջանում պահվող հայ գերիների իրավունքների պաշտպանության հարցը։ Ուղերձը փոխանցվել է ընտանիքի հետ հեռախոսազրույցի ընթացքում։

Նամակում նա նշել է, որ հանդիպել է Ադրբեջանի օմբուդսմեն Սաբինա Ալիևայի հետ և քննարկել կենցաղային, բժշկական, իրավական և մարդասիրական խնդիրներ, որոնք վերաբերում են ինչպես իրեն, այնպես էլ մյուս հայ բանտարկյալներին։ Վարդանյանի խոսքով՝ հայ գերիները երկար ժամանակ պահվում են առանց ընտանիքների հետ հանդիպումների և անկախ մոնիթորինգի, այդ թվում՝ Կարմիր խաչի միջազգային կոմիտեի կողմից։

Նա նաև մտահոգություն է հայտնել, որ ՀՀ համապատասխան կառույցների կողմից բավարար նախաձեռնողականություն չի ցուցաբերվում։ Նա առաջարկել է դիտարկել Բաքու պաշտոնական պատվիրակության այց կազմակերպելու հնարավորությունը՝ ՄԻՊ-ի և գերիների հարազատների մասնակցությամբ։ Նրա խոսքով՝ նման այցը պետք է ունենա ինստիտուցիոնալ և հետևողական բնույթ։

Նամակում Վարդանյանը նաև հրապարակային պատասխան է ակնկալել երեք հարցի շուրջ՝ – նախատեսվո՞ւմ է արդյոք Բաքու պաշտոնական այց, – ինչպես է իրականացվելու համագործակցությունը Ադրբեջանի օմբուդսմենի հետ, – ինչ քայլեր են ձեռնարկվել հայ գերիների իրավունքների պաշտպանության ուղղությամբ։ Վարդանյանը շեշտել է, որ անհրաժեշտ է անհապաղ կիրառել բոլոր հնարավոր մարդասիրական և իրավական մեխանիզմները։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

ՆԱՏՕ-ն վերահաստատում է աջակցությունը Հայաստանին․ Փաշինյան–Համիլթոն հանդիպում

ՆԱՏՕ-ն կարևորում է Հայաստանի հետ գործընկերությունը․ Փաշինյան–Համիլթոն հանդիպում Վարչապետ Նիկոլ Փաշինյանը ընդունել է Կովկասում և Կենտրոնական Ասիայում ՆԱՏՕ-ի գլխավոր քարտուղարի հատուկ ներկայացուցիչ Քևին Համիլթոնին։ Վարչապետը շնորհավորել է Համիլթոնին պաշտոնը ստանձնելու կապակցությամբ և կարևորել Հայաստան–ՆԱՏՕ համագործակցությունն ու շարունակական երկխոսությունը՝ տարածաշրջանում անվտանգության և կայունության ամրապնդման տեսանկյունից։

Հանդիպման ընթացքում կողմերը քննարկել են Հայաստան–ՆԱՏՕ գործընկերության օրակարգին վերաբերող հարցեր՝ անդրադառնալով համագործակցության զարգացման հեռանկարներին և համատեղ ծրագրերի արդյունավետ իրականացմանը։ Նիկոլ Փաշինյանը ներկայացրել է Հայաստանում իրականացվող ժողովրդավարական բարեփոխումները՝ ընդգծելով միջազգային գործընկերների հետ համագործակցության կարևորությունը՝ ինստիտուցիոնալ կարողությունների զարգացման և երկրի դիմակայունության բարձրացման համար։

Զրուցակիցները մտքեր են փոխանակել նաև տարածաշրջանային անվտանգության, առկա մարտահրավերների և խաղաղության ապահովմանն ուղղված քայլերի շուրջ։ Քևին Համիլթոնը նշել է, որ ՆԱՏՕ-ն կարևորում է Հայաստանի հետ գործընկերությունը և պատրաստ է շարունակել համագործակցությունը փոխադարձ հետաքրքրություն ներկայացնող ոլորտներում։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Առաջիկա օրերին ջերմաստիճանը կբարձրանա. շրջանների զգալի մասում սպասվում են անձրև և ամպրոպ

Երևան քաղաքում ապրիլի 22-ի գիշերը, 23-25-ին կեսօրից հետո, 26-ին գիշերը և կեսօրից հետո սպասվում են անձրև և ամպրոպ, ամպրոպի ժամանակ՝ քամու ուժգնացում մինչև 16-19մ/վ արագությամբ։ Ապրիլի 22-ի ցերեկը, 23-25-ի գիշերային ժամերին սպասվում է առանց տեղումների եղանակ։

Հանրապետության տարածքում ապրիլի 24-ի ցերեկը շրջանների զգալի մասում սպասվում են անձրև և ամպրոպ, առանձին հատվածներում՝ ինտենսիվ։

Ապրիլի 22-ի գիշերը, 23-ի ցերեկը, 24-ի գիշերը, 25-26-ին առանձին շրջաններում սպասվում է կարճատև անձրև և ամպրոպ։ Ապրիլի 22-ի ցերեկը, 23-ի գիշերը սպասվում է առանց տեղումների եղանակ։

Քամին՝ հարավարևմտյան` 2-5 մ/վ, ամպրոպի ժամանակ սպասվում է նաև քամու ուժգնացում 16-20մ/վ արագությամբ:

Օդի ջերմաստիճանն աստիճանաբար կբարձրանա ապրիլի 22-23-ի ցերեկային ժամերին՝ 4-6, ապրիլի 23-24-ի գիշերային ժամերին՝ 2-4 աստիճանով։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Արագածոտնում սննդի օբյեկտում հայտնաբերվել են կոպիտ սանիտարահիգիենիկ խախտումներ

Արագածոտնի մարզում գործող հանրային սննդի օբյեկտներից մեկում արձանագրվել են սննդամթերքի արտադրության հետ անհամատեղելի սանիտարահիգիենիկ խախտումներ։ ՀՀ սննդամթերքի անվտանգության տեսչական մարմնի Արագածոտնի մարզային կենտրոնի տեսուչները ստուգում են իրականացրել անհատ ձեռնարկատեր Կարեն Ղազարյանին պատկանող օբյեկտում (գ․ Մաստարա, 4-րդ փողոց, 23)։

Այս մասին տեղեկացնում են ՍԱՏՄ-ից։ Ստուգման ընթացքում, մասնավորապես, պարզվել է, որ՝ – սննդի օբյեկտը նախագծված և կառուցված չէ այնպես, որ ապահովվի պատշաճ մաքրություն, ախտահանում և հիգիենիկ աշխատանքային պայմաններ, – հատակներն ու պատերը չեն ունեցել հարթ մակերես և չեն պահվել նորոգ վիճակում, – պատերը պատրաստված չեն եղել անջրանցիկ և լվացվող նյութերից, – սննդամթերքի հետ շփվող աշխատանքային մակերեսները (սեղաններ և այլն) չեն պահվել պատշաճ վիճակում։

Տեսչական մարմնի ղեկավարի որոշմամբ՝ օբյեկտի արտադրական գործունեությունը կասեցվել է։ Տնտեսավարողին հանձնարարվել է վերացնել խախտումները՝ սահմանված ժամկետում համապատասխանեցնելով այն գործող նորմերին։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Փոփոխություններ՝ բուհերի ընդունելության կարգում

Կառավարությունը փոփոխություններ և լրացումներ է կատարել ՀՀ պետական և ոչ պետական բուհեր ընդունելության կարգում՝ բակալավրի, ինչպես նաև անընդհատ և ինտեգրացված կրթական ծրագրերի համար։ Որոշումը պայմանավորված է հանրակրթության պետական չափորոշիչի վերանայմամբ և կրթական ծրագրերի բովանդակության փոփոխություններով։

Հարմարեցումներ հատուկ կարիք ունեցող դիմորդների համար Ընդունելության կարգում նախատեսվել է, որ կրթության առանձնահատուկ պայմանների կարիք ունեցող դիմորդները կարող են դիմել ԳԹԿ՝ համապատասխան փաստաթղթերով՝ քննությունների ընթացքում խելամիտ հարմարեցումներ ստանալու համար (օրինակ՝ տեխնիկական միջոցներ, ժեստերի թարգմանիչ և այլն)։ Մինչև 2029-2030թթ․ ընդունելության կարգը չի փոխվի Առաջիկա երեք ուսումնական տարիներին ընդունելությունը կշարունակվի կազմակերպվել Արարատյան բակալավրիատի քննություններով։ 2029-2030 ուսումնական տարվանից ընդունելության գործընթացը կվերապահվի բուհերին։

«Շտեմարաններ» հասկացության փոփոխություն Քննությունների կազմակերպման հիմքում այլևս չեն լինելու «շտեմարանները»։ Փոխարենը կկիրառվի «ուսումնական նյութեր» ավելի լայն հասկացությունը՝ համապատասխանեցված նոր չափորոշիչներին։ Վերջնաժամկետի հստակեցում Առաջին փուլում դիմորդները կարող են փոփոխել կամ չեղարկել հայտը մինչև դեկտեմբերի 25-ը։ Փուլը կտևի դեկտեմբերի 15-25-ը։ Բացի այդ, կատարվել են մի շարք տեխնիկական փոփոխություններ։ Փոփոխությունները բխում են կրթության ոլորտի բարեփոխումների ռազմավարությունից։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

ԿԸՀ-ն դիտորդական առաքելություն իրականացնող ևս 3 կազմակերպություն է հավատարմագրել

ՀՀ կենտրոնական ընտրական հանձաժողովը ապրիլի 18-ին արտահերթ նիստ է գումարել՝ ԿԸՀ դիմած դիտորդական առաքելություն իրականացնող երեք կազմակերպության դիմումների օրակարգով։

ԿԸՀ-ն ստացել է «Գյումրու առաջընթաց» քաղաքացիական հասարակության  զարգացման կենտրոն» հասարակական կազմակերպության դիմումը։ Հանձնաժողովն այն բավարարել է, և կազմակերպությանը գրանցել Ազգային ժողովի 2026 թվականի հունիսի 7-ի ընտրություններին դիտորդական առաքելություն իրականացնելու նպատակով։

ԿԸՀ-ն ստացել է «Երիտասարդական ակումբների դաշնություն» երիտասարդական հասարակական կազմակերպության դիմումը՝ ընտրություններին դիտորդական առաքելություն իրականացնելու նպատակով և այն բավարարել է։

ԿԸՀ-ն ստացել է նաև «Լուսաստղ» բարեգործական հասարակական  կազմակերպության դիմումը՝ դիտորդական առաքելություն իրականացնելու նպատակով և այն ևս բավարարել է։

Մինչ այս պահը ԿԸՀ-ն հավատարմագրել է նաև հետևյալ կազմակերպություններին՝ Անկախ դիտորդ հասարակական դաշինք, «Երիտասարդները հանուն փոփոխության» քաղաքացիական հասարակության զարգացման ՀԿ, «Ականատես» համատեղ դիտորդական առաքելություն, «Համայնքի երիտասարդներ» համայնքային զարգացման հասարակական կազմակերպություն, «Հայ առաջադեմ երիտասարդություն» ՀԿ։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

25 մլն դոլարի պայմանագիր՝ ԱԲ զարգացման համար Հայաստանում

ՀՀ բարձր տեխնոլոգիական արդյունաբերության նախարարության և Firebird AI ընկերության միջև ստորագրվել է բարձր արտադրողականությամբ հաշվողական ռեսուրսների ձեռքբերման պայմանագիր։

Պայմանագրով նախատեսվում է, որ պետությունը 5 տարի ժամկետով կգնի 25 մլն դոլար արժողությամբ հաշվողական հզորություններ։ Փաստաթուղթը ստորագրել են նախարարության գլխավոր քարտուղար Դավիթ Գասպարյանը և Firebird AI-ի հիմնադիր Ալեքսանդր Եսայանը։

ԲՏԱ նախարար Մխիթար Հայրապետյանի խոսքով՝ նախագիծը կնպաստի գիտության, նորարարության և առաջատար տեխնոլոգիաների զարգացմանը՝ ստեղծելով նոր հնարավորություններ Հայաստանի համար։ Նա նաև նշել է, որ ստեղծվող ռեսուրսները առաջնահերթ ծառայելու են տեղական էկոհամակարգին։

Ծրագրի շրջանակում նախատեսվում է նաև օգտագործել «Արհեստական բանականության վիրտուալ ինստիտուտ» (AIVI) հարթակը՝ ռեսուրսների հասանելիությունն ապահովելու համար։ Firebird AI-ի ղեկավար Ալեքսանդր Եսայանի խոսքով՝ նախաձեռնությունը միտված է Հայաստանի ԱԲ էկոհամակարգի ամրապնդմանը և նորարարական նախագծերի խթանմանը։ Պայմանագիրը գնահատվում է որպես կարևոր քայլ՝ երկրի տեխնոլոգիական կարողությունների զարգացման և գիտելիքահեն տնտեսության ձևավորման ուղղությամբ։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Կհստակեցվի կառուցապատման թույլտվությունների տրամադրման փուլային կարգը

Կառավարությունն ընդունել է որոշում՝ քաղաքաշինական վարչարարության համակարգում առկա կառուցվածքային, գործնական և իրավական խնդիրների լուծման նպատակով։

Փոփոխություններով նախատեսվում է հստակեցնել կառուցապատման նպատակով թույլտվությունների և այլ փաստաթղթերի տրամադրման փուլային կառուցվածքը, ինչպես նաև կիրառվող ընթացակարգերը։

Նախագծով առաջարկվում է նաև սահմանել բազմաբնակարան կամ բազմամասնաշենք քաղաքաշինական համալիրների համար վարչարարության հատուկ ռեժիմ։ Այն թույլ կտա առանձին շինարարական օբյեկտների կամ դրանց ինքնուրույն օգտագործման ենթակա հատվածների ավարտը փաստագրել և սահմանված պայմաններով թույլատրել դրանց միջանկյալ շահագործումը։

Բացի այդ, հստակեցվում են փուլային ավարտական ակտի և միջանկյալ շահագործման թույլտվության տրամադրման իրավական հիմքերը, պահանջվող փաստաթղթերը և կիրառման պայմանները։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com