Նորություններ

ԱՄՆ նախագահ Ջո Բայդենը նամակ է հղել Նիկոլ Փաշինյանին

ԱՄՆ նախագահ Ջո Բայդենը նամակ է հղել Հայաստանի Հանրապետության վարչապետ Նիկոլ Փաշինյանին: Նամակում, մասնավորապես, նշված է.

«Հարգելի պարոն վարչապետ,

Ուրախ եմ տեսնել, որ Ձեր երկիրը և Ադրբեջանը կայուն առաջընթաց են գրանցել խաղաղության համաձայնագիրը վերջնական տեսքի բերելու ուղղությամբ, որը կկարգավորի ձեր երկու երկրների միջև հարաբերությունները:

Ես ուզում եմ Ձեզ վստահեցնել, որ Միացյալ Նահանգները պատրաստ է աջակցել կայուն և արժանապատիվ խաղաղության համաձայնագրին, որը վերջնականապես վերջ կդնի դարավոր հակամարտությանը։ Խաղաղության համաձայնագիրը, որը երաշխավորում է Հայաստանի միասնությունը, ինքնիշխանությունը և տարածքային ամբողջականությունը, ապահովություն և կայունություն կապահովի ոչ միայն հայ ժողովրդի համար: Այն կվերափոխի ողջ Հարավային Կովկասի տարածաշրջանը։

Ինչպես գիտեք, խաղաղության համաձայնագրի մնացած հոդվածների վերջնականացումը կպահանջի համառություն, հնարամտություն և փոխզիջում: Բայց հայրենասիրությունը քաղաքականությունից վեր դասելով՝ Դուք խիզախորեն և հետևողականորեն ընտրել եք խաղաղության ուղին, և ես Ձեզ քաջալերում եմ այս տարի վերջնական տեսքի բերել պայմանագիրը։

Իմ վարչակազմը պատրաստ է ձեռնարկել համարձակ նախաձեռնություններ, որոնք կօգնեն հարթել ճանապարհը դեպի խաղաղություն: Ես խնդրել եմ Եվրոպայի գծով գլխավոր տնօրեն Մայքլ Քարփենթերին տեղեկացնել Ձեզ որոշ քայլերի մասին, որոնք մենք կուզենայինք ձեռնարկել և ստանալ Ձեր կարծիքն Ադրբեջանի հետ քննարկումների վերաբերյալ:

Ինչպես անցյալ ամիս Նյու Յորքում ՄԱԿ-ի Գլխավոր վեհաժողովում հիշատակվեց, այժմ եկել է պահը վերահաստատելու հանձնառությունը Միավորված ազգերի կազմակերպության կանոնադրությանը և խաղաղության հիմնարար սկզբունքներին: Ավելի պայծառ ապագան հասանելի է, և ես անհամբեր սպասում եմ Ձեզ հետ աշխատանքին՝ այն բաց չթողնելու համար»:

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com  

Ախուրյան համայնքում պետություն-համայնք համատեղ ներդրմամբ մեկնարկել է սուբվենցիոն 7 ծրագիր

Շիրակի մարզի Ախուրյան համայնքում 2024 թվականին պետություն-համայնք համատեղ ներդրմամբ մեկնարկել է սուբվենցիոն 7 ծրագիր՝ 13 ենթածրագրով 1 մլրդ 439 մլն 169 հազար դրամ ընդհանուր արժողությամբ: ՀՀ Կառավարությունը հատկացնելու է գումարի 56,1 տոկոսը՝ 806 մլն 929 հազար դրամ։ Այս մասին հայտնում է Շիրակի մարզպետի աշխատակազմը:

Խմելու ջրամատակարարման, ինչպես նաև ջրահեռացման համակարգի կառուցում/նորոգում

• Մեկնարկվել է Մարմաշեն բնակավայրում խմելու ջրագծի հիմնանորոգման շինարարական աշխատանքները։

Բնակավայրի խմելու ջրագծի հիմնանորոգման ծրագրի նախահաշվային արժեքը կազմում է 314.7 մլն դրամ, ՀՀ կառավարության համամասնությունը կազմում է 70 տոկս, համայնքի կվճարի գումարի 30 տոկոսը:

Ծրագրից կօգտվի 1100 շահառու, հիմնանորոգվելու է 9630 մ երկարությամբ խմելու ջրագիծ։

Բնակավայրի փողոցների կառուցում/նորոգում, ասֆալտապատում (3 ծրագիր)

• Ախուրյան բնակավայրի Հ․Հովսեփյան, Հացիկ բնակավայրի 13-րդ, Այգաբաց բնակավայրի 2-րդ և 8-րդ փողոցների և Հովունի բնակավայրի Սբ. Աստվածածին տանող ճանապարհի շինարարական աշխատանքները ընթացքի մեջ են։

• Բնակավայրերի փողոցների ասֆալտապատման ծրագրի նախահաշվային արժեքը կազմում է 438.7 մլն դրամ, Կառավարությունը կտրամադրի գումարի 45 տոկոսը, համայնքի համամասնությունը 55 տոկոս է:

• Ծրագրի արդյունքում ասֆալտապատվելու է 3456 մ երկարությամբ ճանապարհ։

Բնակավայրերի գազիֆիկացում (2 ծրագիր)

• Աշխատանքներ են իրականացվում Ազատան, Փոքրաշեն, Կառնուտ, Բասեն, Հովիտ, Ջրառատ բնակավայրերում։

• Բնակավայրերի գազաֆիկացման և սնող գազատարի կառուցման ծրագրի նախահաշվային արժեքը կազմում է 565.3 մլն դրամ, Կառավարության համամասնությունը կազմում է 55 տոկոս, համայնքը կտրամադրի գումարի 45 տոկոսը:

• Ծրագրի արդյունքում կառուցվելու է 22.7 կմ գազատար:

Մեքենասարքավորումների և գույքի ձեռքբերում

• Ախուրյան, Երազգավորս, Բայանդուր բնակավայրերի համար տեղադրվելու են աղբամաններ և իրականացվելու է աղբահանության։

• Բնակավայրերում աղբահանության աշխատանքների կազմակերպման համար ձեռք բերված սարքավորումների նախահաշվային արժեքը կազմում է 120.5 մլն դրամ, Կառավարությունը կտրամադրի գումարի 65 տոկոսը, համայնքի համամասնությունը 35 է կազմում:

• Ծրագրի արդյունքում ձեռք է բերվել մեկ ճանապարհային բազմաֆունկցիոնալ մեքենա և 300 հատ նոր անվավոր աղբաման։

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com 

Ըմբիշ Հայկ Խլոյանը դարձավ աշխարհի չեմպիոն

Ալբանիայի մայրաքաղաք Տիրանայում ընթացող Մ23 տարեկանների ըմբշամարտի աշխարհի առաջնությունում ՀՀ հունահռոմեական ոճի ըմբշամարտի հավաքականի անդամ Հայկ Խլոյանն աշխարհի չեմպիոն է դարձել:

Խլոյանը հաղթել է բելառուս Աբուբակար Խասլախանովին:

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com 

«Բալասանյան դաշինքը» հրաժարվու՞մ է քաղաքի կառավարումից

Ըստ շրջանառվող լուրերի, «Բալասանյան դաշինքի» ավագանու ամբողջ կազմը մանդատները վայր են դրել.սա այսօր Գյումրիում ամենաքննարկվող թեման է, սակայն խմբակցությունից դեռ մեկնաբանություն չկա։ Քաղաքապետարանի մամուլի բաժնից ևս այս մասին որևէ մեկնաբանություն չեն տվել։ Մեզ հասած տեղեկություններով, ավագանիների մանդատները վայր դնելու մասին խոսում են նաև քաղաքապետարանի աշխատակիցների շրջանում։

Մենք կապ հաստատեցինք նաև մյուս խմբակցությունների ավագանիների հետ. պատասխաններն անորոշ են, իրենց խոսքով, նորության մասին լսել են, բայց հստակ ոչինչ ասել չեն կարող։ Նրանց խոսքով, տեղեկությունը կհաստատվի կամ կհերքվի վաղը, բայց գործընթաց կա։

Գյումրու համայնքապետարանի մամուլի բաժնի հետ կապ հաստատել չի ստացվում, զանգերը մնում են անպատասխան, իսկ դաշինքի պաշտոնական էջում որևէ մեկնաբանություն չկա։

Հիշեցնենք, որ Գյումրու ավագանու հոկտեմբերի 11-ի նիստին «Բալասանյան դաշինքի» չներկայանալը, ինչպես նաև այսօր տարածված տեղեկությունը, թե ավագանիները մանդատները վայր են դրել, կապում են Գյումրու նախկին քաղաքապետ Սամվել Բալասանյանի կրտսեր որդու՝ Խաչատուր Բալասանյանի ձերբակալության հետ։ 

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com 

ՌԴ քաղաքացիություն ստացած Լևոն Ջուլֆալակյանը կաշխատի Ռուսաստանի ըմբշամարտի ֆեդերացիայում

Հունահռոմեական ոճի հայ ըմբիշ, Եվրոպայի, աշխարհի և օլիմպիական չեմպիոն, Հայաստանի հավաքականի նախկին գլխավոր մարզիչ Լևոն Ջուլֆալակյանը կընդգրկվի Ռուսաստանի ըմբշամարտի ֆեդերացիայի (ՌԸՖ) համակարգում։

Այս մասին հայտնել է ՌԸՖ-ի նախագահ Միխայիլ Մամիաշվիլին։

«Լևոն Ջուլֆալակյանը մեր ժամանակակից սպորտի վառ ներկայացուցիչ է, նրա ողջ կյանքը կապված է միայն ըմբշամարտի հարթակում աշխատելու հետ, նրա հսկայական փորձը թույլ տվեց շատ դժվարին պայմաններում հասնել հաղթանակի Սեուլի Օլիմպիական խաղերում 1988 թվականին: Նա կլինի մեր կազմում, սա պարզ է և՛ որպես խորհրդատու, խորհրդական, և՛ որպես մեր ընկեր»,- ասել է Մամիաշվիլին։

Հիշեցնենք, որ, ՌԴ նախագահ Վլադիմիր Պուտինի հրամանագրով, Լևոն Ջուլֆալակյանը ստացել է Ռուսաստանի Դաշնության քաղաքացիություն։

Լևոն Ջուլֆալակյանը 60 տարեկան է, 1999-2019 թվականներին եղել է հունահռոմեական ոճի ըմբշամարտի Հայաստանի հավաքականի գլխավոր մարզիչը։ 2002 թվականից Հայաստանի ըմբշամարտի ֆեդերացիայի փոխնախագահն էր, իսկ 2003 թվականից՝ ՀԱՕԿ գործկոմի անդամ։

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Արթուր Գրիգորյանն ազատվել է վարչապետի օգնականի պաշտոնից

ՀՀ վարչապետ Նիկոլ Փաշինյանը որոշում է ստորագրել, ըստ որի՝  Արթուր Գրիգորյանն ազատվել է վարչապետի օգնականի պաշտոնից:

«Ղեկավարվելով «Հանրային ծառայության մասին» օրենքի 9-րդ հոդվածի 10-րդ մասով՝ Արթուր Գրիգորյանին ազատել վարչապետի օգնականի պաշտոնից»,- ասված է որոշման մեջ։

© progressgyumri.am  Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Բրյուսելում կայացել է ԵՄ-ՀՀ քաղհասարակության պլատֆորմի 5-րդ երկկողմ հանդիպումը

Հոկտեմբերի 15-ին Բրյուսելում տեղի է ունեցել ԵՄ-ՀՀ քաղհասարակության պլատֆորմի 5-րդ երկկողմ հանդիպումը, որին բացման խոսքով են հանդես եկել Պլատֆորմի համանախագահներ Լուսինե Հակոբյանը եւ Սիմո Տիայնենը։

Ողջույնի խոսքով է հանդես եկել նաև Եվրոպական տնտեսական եւ սոցիալական հանձնաժողովի արտաքին հարաբերությունների ստորաբաժանման նախագահ Դիմիտրիս Դիմիտրիադիսը։

Հայաստանի եւ ԵՄ-ի միջեւ ստորագրված ՀԸԳՀ իրականացման ընթացքի գնահատականներով են հանդես եկել Եվրամիությունում ՀՀ առաքելության ղեկավար, Բելգիայի թագավորությունում ՀՀ արտակարգ եւ լիազոր դեսպան Տիգրան Բալայանը, Եվրոպայի արտաքին գործողությունների ծառայության Մոլդովայի, Վրաստանի, Բելառուսի, Հայաստանի եւ Ադրբեջանի հարցերով բաժնի ղեկավարի տեղակալ Ժյուլիեն Բուրտենբուրգը, Եվրոպական հանձնաժողովի հարեւանության քաղաքականության եւ ընդլայնման բանակցությունների հարցերով գլխավոր տնօրինության Հայաստանի, Ադրբեջանի, Բելառուսի եւ Արեւելյան գործընկերության հարցերոց բաժնի ղեկավարի տեղակալ Յուբեր Դյուուն։

Նիստին քննարկվել է նաեւ ժողովորդավարության, օրենքի գերակայության, կոռուպցիայի դեմ պայքարի եւ մարդու իրավունքների ոլորտում ՀԸԳՀ իրականացման ընթացքը, որի ժամանակ ելույթներ են ունեցել Հայաստանի իրավաբանների ասոցիացիայի ներկայացուցիչ Սյուզաննա Սողոմոնյանը, «Իրավունքների պաշտպանություն առանց սահմանների» ՀԿ ներկայացուցիչ Հասմիկ Հարությունյանը, «Ազատ քաղաքացի» ՀԿ նախագահ Հովսեփ Խուրշուդյանը։

Կապույտ տնտեսության եւ ջրային ռեսուրսների կայուն կառավարման հարցերով քննարկմանը ելույթ են ունեցել ԵՄ-ի կողմից «ԵՄ կապույտ համաձայնության կոչ» համընդհանուր առաջարկի հարցով զեկուցող, ՏՍՀԵԿ անդամ Ֆլորիան Մարինը:

Սոցիալական երկխոսության եւ ինստիտուցիոնալ զարգացման միջոցով ապագայի աշխատանքի ապահովման հարցով քննարկման ժամանակ ելույթ են ունեցել Հայաստանի արհմիությունների կոնֆեդերացիայի ներկայացուցիչ Աննա Բարիկյանը, Հայաստանի պետհիմնարկների, ՏԻՄ-երի և հանրային ծառայությունների աշխատողների ճյուղային հանրապետական արհմիության անդամ Արսեն Իգիթյանը:

ՀԸԳՀ իրականացման եւ Հայաստանի տնտեսության դիվերսիֆիկացիայի միջեւ կապի վերաբերյալ քննարկման ժամանակ ելույթ են ունեցել Հայաստանի Արդյունաբերողների եւ գործարարների միության նախագահ Ներսես Կարամանուկյանը, «Ազատ քաղաքացի» ՀԿ նախագահ Հովսեփ Խուրշուդյանը, Միջազգային առեւտրի պալատի Հայաստանի ազգային կոմիտեի գործադիր մարմնի անդամ, Առեւտրի եւ ներդրումների հարցերով հանձնաժողովի նախագահ Հայկ Մարգարյանը։

Նիստի արդյունքներով ընդունվել է նաեւ համատեղ հռչակագիր։

ԵՄ-ՀՀ քաղհասարակության պլատֆորմի 5-րդ համատեղ հանդիպման լուսանցքներում տեղի են ունեցել նաեւ հանդիպումներ Եվրոպական հանձնաժողովի Հարեւանության քաղաքականության եւ ընդլայնման բանակցությունների հարցերով գլխավոր տնօրինության Հայաստանի, Ադրբեջանի, Բելառուսի եւ Արեւելյան գործընկերության հարցերով բաժնի ղեկավար Դեյվիդ Քալլենի, Եվրախորհրդարանի պատգամավոր Պյետրաս Աուստրեվիչուսի խորհրդական Դովիլե Սուկիտեի, Եվրախորհրդրանի Հարավային Կովկասի հետ հարաբերությունների հարցով պատվիրակության փոխնախագահ Նատալի Լուազոյի հետ։

ԵՄ—Հայաստան քաղհասարակության Պլատֆորմը Հայաստանի եւ Եվրամիության միջև 2017-ին ստորագրված Համապարփակ եւ ընդլայնված գործընկերության համաձայնագրի (ՀԸԳՀ) շրջանակկներում ստեղծված մարմիններից մեկն է։ Այն հնարավորություն է տալիս երկու կողմերի քաղհասարակության կազմակերպություններին վերահսկել Համաձայնագրի իրականացման գործընթացն ու համապատասխան մարմիններին տրամադրել խորհրդատվություն։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Սահմանազատումը Տավուշից սկսվեց, որովհետև ամենաբարդ հատվածն էր. Մհեր Գրիգորյան

«Սահմանազատում անելու համար հիմքեր կային»:

ԱԺ-ում Ադրբեջանի և Հայաստանի միջև պետական սահմանի սահմանազատման կանոնակարգը վավերացնելու մասին օրենքի նախագիծը ներկայացնելու ժամանակ հայտարարեց ՀՀ փոխվարչապետ Մհեր Գրիգորյանը՝ արձագանքելով «Հայաստան» խմբակցության պատգամավոր Լևոն Քոչարյանի այն դիտարկմանը, թե սահմանազատումը սկսվել է առանց իրավական հիմքերի:

«1976 թվականի Գլխավոր շտաբի քարտեզը ոչ միայն որպես քարտեզային փաստաթուղթ, այլև որպես հիմքեր լրիվ ամփոփ է, իրավական շղթան կառուցված է»,- ասաց Գրիգորյանը:

Վերջինիս խոսքով՝ սահմանազատման համար լրիվ վավեր հիմքեր են եղել.

«Խոսքը չի վերաբերում նրան, որ պետք է հատվածական սահմանազատում արվի, սահմանազատման աշխատանք պետք է արվի, բայց կանոնակարգում հստակ գրված է՝ վերջում պայմանագիր ստորագրելուց պայմանագրին կից պետք է լինի միասնական արձանագրություն-նկարագրություն, որը նկարագրում է Հայաստանի ու Ադրբեջանի ողջ սահմանը։ Ես չեմ բացառում՝ կան ռիսկեր, որ գործընթացը կխզվի կամ չի ավարտվի, բայց չկա ռիսկ, որ մի հատված կլինի իրավաբանորեն ձևակերպված որպես սահման, իսկ հետո պայմանագիր չի ստորագրվի, ու դա չի կլանվի»:

Իսկ թե ո՞ր հատվածում է լինելու հաջորդ սահմանազատումը՝ փոխվարչապետն ասաց, որ դրա վերաբերյալ նույնիսկ քննարկումներ դեռ չեն եղել։

«Մի սահմանում կա, որը կարծես թե ռեալ պայմանավորվածություն է՝ կոնսենսուսով պետք է որոշվի։ Կողմերից որևէ մեկը չի գալու ու ասի՝ եկեք շարունակենք այս հատվածում՝ ի տարբերություն Տավուշի, այդ հատվածն ամենաբարդն էր։ Ի վերջո, երկար քննարկումներից հետո ձեռք բերվեց կոնսենսուս, որ ամենաբարդ հատվածում սկսենք գործընթացը»,- հավելեց Գրիգորյանը։

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Հայաստանի խուլերի միավորման նախկին և ներկա նախագահները հափշտակել են խոշոր չափերով գումարներ. գործը դատարանում է

Դատախազը 2024 թվականի հոկտեմբերի 8-ին հաստատել է «Հայաստանի խուլերի միավորում» հասարակական կազմակերպության նախկին և ներկա նախագահների կողմից խարդախությամբ առանձնապես խոշոր չափերով գույքի հափշտակություն կատարելու, դրան օժանդակելու վերաբերյալ մեղադրական եզրակացությունը և վարույթի նյութերը հանձնել իրավասու դատարան:

Այս մասին տեղեկացնում են ՀՀ գլխավոր դատախազությունից:

«Քրեական վարույթի նախաքննությամբ պարզվել է, որ 2007-2009 թվականներին «Հայաստանի խուլերի միավորում» ՀԿ (այսուհետ՝ ՀԿ) նախագահի պաշտոնը զբաղեցրած Ա.Գ.-ն, 2008 թվականի հուլիսի 3-ին՝ որպես ֆիզիկական անձ, պայմանագիր է կնքել ինքն իր հետ՝ այսինքն նույն հասարակական կազմակերպության նախագահի հետ, և 1 տարի 6 ամիս ժամկետով անհատույց փոխառությամբ ՀԿ-ին է տրամադրել 32 մլն 700 հազար դրամ: Հետագայում Ա.Գ.-ն ամբողջությամբ ստացել է իր կողմից ՀԿ-ին փոխառությամբ տրված 32 մլն 700 հազար դրամը, ինչպես նաև հավելյալ՝ 15 մլն 300 հազար դրամ: Այնուհետև Ա.Գ.-ն, լինելով արդեն ՀԿ փոխնախագահ, ունենալով մտերիմ հարաբերություններ գործող նախագահ Մ.Հ.-ի հետ, թաքցրել է իր կողմից ՀԿ-ին փոխառությամբ տրված 32 մլն 700 հազար դրամը հետ ստացած լինելու հանգամանքը, և ՀԿ-ից գումարը բռնագանձելու նպատակով հայցադիմում է ներկայացրել դատարան:

«Հայաստանի խուլերի միավորում» ՀԿ նախագահ Մ.Հ.-ն, տեղյակ լինելով, որ Ա.Գ.-ին ամբողջությամբ վճարվել է ՀԿ-ին փոխառությամբ տրված 32 մլն 700 հազար դրամը, այդ հանգամանքը հաստատող հաշվապահական փաստաթղթերը քաղաքացիական գործի շրջանակում դատարան ներկայացնելու, հայցի դեմ առարկելու և կազմակերպության օրինական շահերը պաշտպանելու փոխարեն, 2020 թվականի նոյեմբերի 13-ին, նշված հայցի շրջանակներում, հաշտության գրավոր համաձայնություն է կնքել Ա.Գ.-ի հետ: Հաշտության համաձայնությամբ «Հայաստանի խուլերի միավորում» ՀԿ-ն ընդունել է Ա.Գ.-ի նկատմամբ 32 մլն 700 հազար դրամ պարտք ունենալու հանգամանքը և պարտավորվել նշված գումարը նրան վերադարձնել մինչև 2026 թվականը:

Ա.Գ.-ն, «Հայաստանի խուլերի միավորում» ՀԿ-ից իր բանկային հաշվեհամարին կատարված փոխանցումների միջոցով ստացել և խաբեության եղանակով հափշտակել է 32 մլն 700 հազար դրամից 15 մլն 870 հազար դրամը:

Դատախազը 2024 թվականի հուլիսի 22-ին հանրային քրեական հետապնդում է հարուցել «Հայաստանի խուլերի միավորում» հասարակական կազմակերպության նախկին նախագահ Ա.Գ.-ի և ներկա նախագահ Մ.Հ.-ի նկատմամբ՝ Քրեական օրենսգրքի 255-րդ հոդվածի 3-րդ մասի 3-րդ կետով (առանձնապես խոշոր չափերով խարդախություն) և 46-255-րդ հոդվածի 3-րդ մասի 3-րդ կետով (առանձնապես խոշոր չափերով խարդախության օժանդակություն):

Մ.Հ.-ի նկատմամբ որպես խափանման միջոց է ընտրված է պաշտոնավարման կասեցումը: Ա.Գ.-ի նկատմամբ ընտրված խափանման միջոցը վերացվել է առաջին ատյանի ընդհանուր իրավասության դատարանի կողմից (առաջիկայում դատախազի կողմից ներկայացվելու է վերաքննիչ բողոք)»,- ասված է հաղորդագրության մեջ:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumringo@gmail.com

Գյումրի-Երևան ճանապարհին բախվել են «Mercedes»-ը և «Opel»-ը. 9 տուժած կա, որից 5-ը երեխաներ են

Հոկտեմբերի 20-ին, ավտովթար է տեղի ունեցել Շիրակի մարզում։ Ժամը 15:15-ի սահմաններում Գյումրի-Երևան ավտոճանապարհի 8-րդ կմ հատվածում՝ Ազատան գյուղի վարչական տարածքում, դեռևս անհայտ հանգամանքներում, բախվել են «Mercedes» ու «Opel» մակնիշի ավտոմեքենաները:

Shamsyan.com-ի տեղեկություններով, վթարի հետևանքով 9 հոգի, որից 5-ը երեխաներ են, տարբեր աստիճանի մարմնական վնասվածքներով տեղափոխվել են հիվանդանոցներ։

Նախաձեռնվել է քրեական վարույթ, որտեղ էլ պարզում են վարորդների և վիրավորների ինքնությունը։