Yearly Archives:2026

Անչափահասների կողմից շորթման և սեքսուալ հարկադրանքի գործը՝ մեղադրական եզրակացությամբ դատարան

ՀՀ քննչական կոմիտեի Լոռու մարզային քննչական վարչությունում ավարտվել է անչափահասների կողմից մեկ այլ անչափահասի սեքսուալ բնույթի գործողություններին հարկադրելու, շանտաժի եղանակով զգալի չափերով շորթում կատարելու դեպքերի առթիվ նախաձեռնված քրեական վարույթի նախաքննությունը:

Նախաքննության ընթացքում առերևույթ փաստական տվյալներ են ձեռք բերվել այն մասին, որ անչափահասները 2025 թվականի մարտից մինչև հունիսն ընկած ժամանակահատվածում անչափահաս տուժողից շանտաժով՝ վերջինիս հետ ունեցած սեռական բնույթի գործողությունների մասին տեղեկություններ տարածելու սպառնալիքով, պահանջել են՝ ընդհանուր 60 հզր ՀՀ դրամ գումար:

Բացի այդ, նախաքննության ընթացքում կատարված մի շարք ապացուցողական գործողությունների արդյունքում պարզվել է, որ անչափահասները 16 տարին չլրացած տուժողին հարկադրել են սեքսուալ բնույթի գործողություններ կատարել:

Հաշվի առնելով, որ անչափահասներից մեկը հանցագործության սուբյեկտ չի հանդիսանում, այսինքն՝ չի հասել նշված հանցանքի համար քրեական պատասխանատվության ենթարկելու տարիքին, վերջինիս նկատմամբ որոշում է կայացվել Քրեական օրենսգրքի 199-րդ հոդվածի 3-րդ մասի 2-րդ կետով հանրային քրեական հետապնդում չհարուցելու վերաբերյալ:

Անչափահասներից մեկի նկատմամբ հարուցվել է հանրային քրեական հետապնդում՝ Քրեական օրենսգրքի 258-րդ հոդվածի 2-րդ մասի 5-րդ կետով (շորթումը), 199-րդ հոդվածի 3-րդ մասի 2-րդ կետով (սեքսուալ բնույթի գործողություններին հարկադրելը) և 195-րդ հոդվածի 2-րդ մասի 3-րդ կետով (ֆիզիկական ներգործությունը), իսկ մյուսի նկատմամբ՝ 258-րդ հոդվածի 2-րդ մասի 5-րդ կետով (շորթումը):

Նրանց նկատմամբ որպես այլընտրանքային խափանման միջոց կիրառվել է վարչական հսկողությունը, դաստիարակչական հսկողությունը և բացակայելու արգելքը:

Հանցանք ծնող պատճառները պարզելու նպատակով միջնորդագրեր են ներկայացվել համայնքի ղեկավարին և ՆԳՆ համայնքային ոստիկանության գլխավոր վարչության բաժնի պետին:

Քրեական վարույթը մեղադրական եզրակացությամբ ուղարկվել է հսկող դատախազին:

© progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Պետությունը կաջակցի 6 և ավելի երեխա ունեցող ընտանիքներին՝ բնակարան ձեռք բերելու համար

Այն հնարավորություն է տալու բազմազավակ ընտանիքներին Հայաստանի Հանրապետության մարզային բնակավայրերում ձեռք բերել բնակարան կամ կառուցել տուն 100 տոկոս սուբսիդավորմամբ։

 Ծրագրի պայմաններին բավարարող ընտանիքին յուրաքանչյուր անչափահաս երեխայի հաշվով տրամադրվելու է 4 մլն դրամ՝ հիփոթեքային վարկավորմամբ անշարժ գույք ձեռք բերելու կամ կառուցելու համար։ Ընդ որում, եթե ընտանիքը նախապատվությունը կտա գյուղական բնակավայրին, ապա այս դեպքում ընտանիքին կտրամադրվի հավելյալ 4 մլն դրամ, որը կարող է օգտագործվել հետևյալ ուղղություններով՝

1) անհատական բնակելի տան կառուցման դեպքում՝ համապատասխան հողամասի ձեռքբերում, կամ

2) գյուղատնտեսական նշանակության հողամասի ձեռքբերում։

 Ծրագրի հիմնական պայմաններն են՝

1) շահառու ընտանիքի բոլոր անդամները պետք է ունենան ՀՀ քաղաքացիություն,

2) ձեռք բերվող կամ կառուցվող բնակարանի կամ անհատական բնակելի տան բնակելի մակերեսը շահառու ընտանիքի յուրաքանչյուր անդամի հաշվով չպետք է պակաս լինի 10 քմ-ից,

3) բնակարանը կամ կառուցվող շենքից բնակարան գնելու իրավունքը կամ անհատական բնակելի տունը ձեռք է բերվում կամ կառուցվում է ՀՀ որևէ մարզային բնակավայրում,

4) շահառուն, գրանցված ամուսնության առկայության դեպքում նաև նրա ամուսինը, ծրագրին դիմելու օրվա դրությամբ պետք է ներկայացրած լինի նախորդ տարվա ընթացքում ստացված եկամուտների վերաբերյալ հայտարարագիրը, որում ներկայացված եկամուտների (հարկվող և չհարկվող) հանրագումարը չպետք է գերազանցի 10 մլն դրամը։

Ապրիլի 15-ից հին թղթադրամները դուրս կգան շրջանառությունից

2026 թ. ապրիլի 15-ից 2-րդ սերնդի թղթադրամները բնականոն մաշվածության արդյունքում դուրս կգան շրջանառությունից։ Այս մասին հիշեցնում է ՀՀ կենտրոնական բանկը։

«Ինչպես բազմիցս նշվել էր Կենտրոնական բանկի կողմից իր մամուլի հաղորդագրություններում և բացատրական տեսանյութերում, 2-րդ սերնդի թղթադրամները համարվում են օրինական վճարամիջոց մինչև 2026 թ. ապրիլի 15-ը, իսկ նշված օրվանից հետո քաղաքացիներն իրենց մոտ ունեցած «հին» թողարկման թղթադրամները կարող են անվճար և անժամկետ փոխանակել ՀՀ տարածքում գործող առևտրային բանկերում և Կենտրոնական բանկում՝ առանց սահմանափակումների:

Հավելենք, որ 2025 թ. ապրիլի 28-ի Կենտրոնական բանկի խորհրդի որոշման համաձայն՝ շրջանառությունից կհանվեն 2-րդ սերնդի հետևյալ ՀՀ թղթադրամները.

1999 թվականի թողարկման 500 դրամ (Ալեքսանդր Թամանյանի դիմապատկերով)

1999, 2001, 2011, 2015 թվականների թողարկման 1000 դրամ (Եղիշե Չարենցի դիմապատկերով)

1999, 2003, 2009, 2012 թվականների թողարկման 5000 դրամ (Հովհաննես Թումանյանի դիմապատկերով)

2003, 2006, 2008, 2012 թվականների թողարկման 10000 դրամ (Ավետիք Իսահակյանի դիմապատկերով)

1999, 2007, 2009, 2012 թվականների թողարկման 20000 դրամ (Մարտիրոս Սարյանի դիմապատկերով)

2-րդ սերնդի թղթադրամների շրջանառությունից դուրս գալու մասին տեսանյութը կարող եք դիտել այս հղումով։

 © progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Այս գիշեր մի ամբողջ քաղաքակրթություն կկործանվի. Թրամփ

Այս գիշեր մի ամբողջ քաղաքակրթություն կկործանվի, և այն այլևս երբեք չի կարող վերածնվել՝ Truth Social-ի իր էջում գրել է ԱՄՆ նախագահ Դոնալդ Թրամփը՝ անդրադառնալով Իրանի շուրջ ստեղծված իրավիճակին: «Ես չեմ ուզում, որ դա տեղի ունենա, բայց, հավանաբար, այդպես կլինի:

Այնուամենայնիվ, հիմա, երբ մենք ունենք ռեժիմի ամբողջական փոփոխություն, որտեղ գերակշռում են այլ, ավելի խելացի և պակաս արմատական մտքերը, գուցե ինչ-որ հեղափոխական և ուշագրավ բան տեղի ունենա, ով գիտի»,- նշել է Սպիտակ տան ղեկավարը: 47 տարի տևած կեղեքումը, կոռուպցիան և մահերը վերջապես կավարտվեն՝ նշել է Թրամփը:

 © progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

ԱԺ-ն առաջին ընթերցմամբ ընդունեց դաշինքների անվանումներում անձնանունների կիրառումն արգելելու նախագիծը

Ազգային ժողովն առաջին ընթերցմամբ ընդունեց Ընտրական օրենսգրքում փոփոխություններ նախատեսող օրինագիծը, որով առաջարկվում է արգելել կուսակցությունների դաշինքների անվանումներում անձնանունների կիրառումը։ Նախագծին կողմ է քվեարկել 66 պատգամավոր, դեմ՝ 16։

Նախագիծը խորհրդարանին ներկայացրել է «Քաղաքացիական պայմանագիր» խմբակցության պատգամավոր Արուսյակ Ջուլհակյանը՝ համահեղինակությամբ պատգամավոր Ալխաս Ղազարյանի։

Առաջարկվող փոփոխություններով սահմանվում է, որ կուսակցությունների դաշինքների անվանումները չեն կարող պարունակել անձնանուններ, ինչպես նաև պետական և տեղական ինքնակառավարման մարմինների անուններ կամ դրանց շփոթելու աստիճան նման ձևակերպումներ։ Բացի այդ, դաշինքների անվանումներում չեն կարող ներառվել նաև վիրավորական կամ զրպարտչական բնույթի բառեր կամ արտահայտություններ։ Նախագծով առաջարկվում է նաև սահմանել, որ Ազգային ժողովի և համայնքների ավագանիների համամասնական ընտրակարգով ընտրություններում քվեաթերթիկը կհամարվի անվավեր, եթե ծրարում, բացի քվեաթերթիկից, առկա է որևէ այլ իր։ Գործող կարգավորմամբ նման դեպքերում քվեաթերթիկը անվավեր չի ճանաչվում։

Օրենսդրական նախաձեռնությամբ նախատեսվում է նաև, որ ընտրատարածքային ընտրական հանձնաժողովի նախագահը քվեատուփից ծրարը հանելու և քվեաթերթիկը դուրս բերելու ընթացքում ձեռքում այլ իր չի կարող ունենալ։ 

Նախագծի քննարկման ընթացքում Ազգային ժողովի շենքի դիմաց բողոքի ակցիա էին անցկացնում «Ուժեղ Հայաստան» կուսակցության ներկայացուցիչները, որոնք օրերս հայտարարել էին խորհրդարանական առաջիկա ընտրություններին «Ուժեղ Հայաստան Սամվել Կարապետյանի հետ» դաշինքով մասնակցելու մասին։ Նրանք պնդում են, որ ընտրություններին ընդամենը երկու ամիս մնացած՝ նման փոփոխություններն անթույլատրելի են։ «Ուժեղ Հայաստան» կուսակցության ներկայացուցիչները նաև այն համարում են հակաժողովրդավարական։

Նախագծին դեմ են արտահայտվել նաև խորհրդարանական ընդդիմադիր «Հայաստան» և «Պատիվ ունեմ» խմբակցությունները՝ շեշտելով, որ ընտրություններից կարճ ժամանակ առաջ չի կարելի փոխել «խաղի կանոնները»։

Ի պատասխան քննադատություններին՝ Արուսյակ Ջուլհակյանը նշել է, որ Վենետիկի հանձնաժողովի առաջարկությամբ՝ ընտրություններից կարճ ժամանակ առաջ փոփոխություններ չպետք է արվեն ընտրակարգում, ընտրական հանձնաժողովների ձևավորման կարգում և ընտրատարածքների սահմաններում։ Նրա խոսքով՝ առաջարկվող փոփոխությունները այդ երեք կետերից որևէ մեկին չեն վերաբերում և կրում են տեխնիկական բնույթ։ Ջուլհակյանը նաև մանրամասնեց նախագծի բովանդակությունը՝ նշելով, որ այն ուղղված է տեխնիկական վրիպակի շտկմանը։ Նրա խոսքով՝ 2024 թվականի սեպտեմբերի 26-ին ներկայացված նախագծերի փաթեթով առաջարկվել էր փոփոխություն կատարել Ընտրական օրենսգրքի 81-րդ հոդվածի 2-րդ մասում՝ հանելով 2-րդ նախադասությունը։ Նպատակն էր վերացնել այն պահանջը, ըստ որի՝ կուսակցությունների դաշինքի անվանման մեջ պետք է նշվեն դաշինքի անդամ բոլոր կուսակցությունների անունները։

Սակայն առաջինից երկրորդ ընթերցում ընկած ժամանակահատվածում կատարված խմբագրական փոփոխությունների արդյունքում տեղի է ունեցել տեխնիկական վրիպակ․ «նախադասություն» բառի փոխարեն կիրառվել է «պարբերություն» եզրույթը։ Արդյունքում ստացվել է, որ ուժը կորցրած է ճանաչվել ոչ թե նախատեսված դրույթը՝ 81-րդ հոդվածի 2-րդ մասի 2-րդ նախադասությունը, այլ դրա երկրորդ պարբերությունը։

Պատգամավորը նշեց, որ այդ պարբերությամբ սահմանվում է՝ դաշինքի անվանումը չի կարող պարունակել անձնանուններ, պետական կամ տեղական ինքնակառավարման մարմինների անվանումներ կամ դրանց շփոթեցնող ձևեր, ինչպես նաև վիրավորական կամ զրպարտչական արտահայտություններ։ Միևնույն ժամանակ, օրենսգրքի 129-րդ հոդվածի 2-րդ մասով նույնաբովանդակ սահմանափակում է նախատեսված համայնքի ավագանու ընտրությունների համամասնական ընտրակարգով առաջադրվող թեկնածուների համար։ Նրա խոսքով՝ այդ դրույթները ներդրվել են միասնական հիմնավորմամբ, ուստի դրանց փոփոխությունը կպահանջեր համապատասխան փոփոխություններ նաև այլ հոդվածներում և հարակից իրավական ակտերում, ինչը չի իրականացվել։ Ջուլհակյանը ընդգծեց, որ նշված սահմանափակումները բովանդակային և սկզբունքային նշանակություն ունեն և համահունչ են «Կուսակցությունների մասին» սահմանադրական օրենքի պահանջներին։

Նրա խոսքով՝ քանի որ կուսակցությունների դաշինքները նույն քաղաքական սուբյեկտների համագործակցության ձև են, տրամաբանական է, որ նրանց անվանման նկատմամբ կիրառվեն նույնատիպ սահմանափակումներ։ Պատգամավորը նաև շեշտեց, որ նախագծով չի նախատեսվում վերացնել դաշինքների անվանման նկատմամբ գործող սահմանափակումները։ «Ընդհակառակը՝ նպատակ է հետապնդվել բացառապես տեխնիկական բնույթի վրիպակի շտկումը»,– նշեց նա։ Ըստ նրա՝ 81-րդ հոդվածի 2-րդ մասի 2-րդ պարբերության «ուժը կորցրած ճանաչումը» պետք է դիտարկել որպես տեխնիկական սխալ, որն անհրաժեշտ է շտկել օրենքով սահմանված կարգով։

 © progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

«Ֆանտազիա է»․ Քոչարյանը՝ Սարգսյանի նախաձեռնության մասին

ՀՀ ԱԺ Պաշտպանության և անվտանգության հարցերի մշտական հանձնաժողովի նախագահ Անդրանիկ Քոչարյանը լրագրողների հետ ճեպազրույցում անդրադարձել է ՔՊ խմբակցության պատգամավոր Հայկ Սարգսյանի հայտարարություններին՝ կապված «զինծառայությունից գումարով ազատվելու» օրինագծի շուրջ առաջացած տարաձայնությունների հետ։

«Հայկ Սարգսյանը սիրում է ֆանտազիային «զոռ տալ»»,- նշել է Քոչարյանը՝ արձագանքելով պատգամավորի այն պնդմանը, թե ինքը անձնական հավակնություններից ելնելով է դեմ քվեարկել նախագծին։ Քոչարյանի խոսքով՝ անընդունելի է այն մոտեցումը, ըստ որի հնարավոր է գումարով ազատվել զինծառայությունից։ «Ի՞նչն էր կարևոր՝ բանակից փողով ազատվե՞լը։ Բնականաբար պետք է դեմ լինեի նման մոտեցմանը»,- ընդգծել է նա՝ հավելելով, որ առաջին անգամ է հանդիպում դեպքի, երբ պատգամավորն իր իսկ նախաձեռնությանը դեմ է քվեարկում։

Ճեպազրույցի ընթացքում Անդրանիկ Քոչարյանը նաև անդրադարձել է ՀԱՊԿ-ից հնարավոր դուրս գալու վերաբերյալ հարցին՝ նշելով, որ այս հարցում որոշիչը պետք է լինի Հայաստանի շահը։ «Աշխարհը շատ անհանգիստ է։ Միայն ՀԱՊԿ-ի խնդիրը չէ։ Մեր երկրի շահը պետք է թելադրի մեր քայլերի հաջորդականությունը»,- ասել է նա։ Քոչարյանը հավելել է, որ ՀԱՊԿ-ի գործողությունները փորձ է արվել կապել Լեռնային Ղարաբաղի հետ, մինչդեռ, նրա խոսքով, Հայաստանի խնդիրները կապված են երկրի սահմաններում ստեղծված իրավիճակի հետ, երբ կազմակերպությունը չի կատարել իր պարտավորությունները։

 © progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Դատախազություն․ պահանջվում է բռնագանձել ավելի քան 20 գույք և 1 մլրդ դրամ

Հակակոռուպցիոն դատարանը վարույթ է ընդունել Գլխավոր դատախազության՝ ապօրինի ծագում ունեցող գույքի բռնագանձման վերաբերյալ հերթական հայցադիմումները, որոնք վերաբերում են ՀՀ նախկին վարչապետ, ՀՀ Ազգային ժողովի նախկին նախագահ Հովիկ Աբրահամյանի եղբորը և երկու փեսաներին:

Մասնավորապես՝

1. Գլխավոր դատախազության ապօրինի ծագում ունեցող գույքի բռնագանձման գործերով վարչությունը հայցերից մեկով պահանջում էՀՀ Ազգային ժողովի նախկին պատգամավոր Հենրիկ Արգամի Աբրահամյանից և նրան փոխկապակցված անձանցից հօգուտ Հայաստանի Հանրապետության բռնագանձել՝

• 13 անշարժ գույք, 12-ը՝ Արարատի մարզի Արտաշատ համայնքի Մխչյան բնակավայրում, 1-ը՝ Մասիս համայնքի Մարմարաշեն բնակավայրում.
• 5 տրանսպորտային միջոց.
• 2 իրավաբանական անձում մասնակցություն.
• շուրջ 270 միլիոն 840 հազար դրամ՝ որպես ապօրինի դրամական միջոցների մնացորդ:

2. Գլխավոր դատախազության ապօրինի ծագում ունեցող գույքի բռնագանձման գործերով վարչությունը մեկ այլ հայցով պահանջում է Երևան քաղաքի Շենգավիթ համայնքի դատախազի նախկին տեղակալ, ՀՀ պետական եկամուտների կոմիտեի վարչության նախկին պետ Վահան Զորիկի Մամիկոնյանից և նրան փոխկապակցված անձանցից հօգուտ Հայաստանի Հանրապետության բռնագանձել՝

• 8 անշարժ գույք, որից 3-ը՝ Արարատի մարզի Արտաշատ համայնքի Մխչյան բնակավայրում, 1-ը՝ Կոտայքի մարզի Ծաղկաձոր համայնքի Մարմարիկ գյուղում, 1-ը՝ Երևան քաղաքի Կենտրոն վարչական շրջանում, 3-ը՝ Արարատի մարզի Արտաշատ համայնքի Նշավան գյուղում.
• 446 միլիոն 691 հազար դրամ՝ որպես ապօրինի դրամական միջոցների մնացորդ.
• 86 միլիոն 413 հազար դրամ, որը չի հիմնավորվում անձի օրինական եկամուտներով, ունի ապօրինի ծագում, փոխանցվել է բարեխիղճ ձեռքբերողի կամ հնարավոր չէ նույնականացնել և բռնագանձել:

3. Գլխավոր դատախազության ապօրինի ծագում ունեցող գույքի բռնագանձման գործերով վարչությունը մեկ այլ հայցով պահանջում է ՀՀ պետական եկամուտների կոմիտեի մաքսային ծառայությունում բաժնի պետի, Արարատյան տարածաշրջանային մաքսատան պետի տեղակալի, ՀՀ ֆինանսների նախարարության «Զվարթնոց» մաքսատան պետի, ՀՀ կառավարությանն առընթեր պետական եկամուտների կոմիտեի աշխատակազմի Արևմտյան մաքսատուն-վարչության պետի պաշտոնները զբաղեցրած Վլադիմիր Ֆելիքսի Թամրազյանից և նրան փոխկապակցված անձանցից հօգուտ Հայաստանի Հանրապետության բռնագանձել՝

• 3 տրանսպորտային միջոց.
• 1 իրավաբանական անձում մասնակցություն.
• 303 միլիոն 918 հազար դրամ՝ որպես ապօրինի դրամական միջոցների մնացորդ և այլն:

Հիշեցնենք, որ Գլխավոր դատախազության ապօրինի ծագում ունեցող գույքի բռնագանձման գործերով վարչությունը 2023 թվականի մարտի 6-ին հայցադիմում է ներկայացրել Հակակոռուպցիոն դատարան՝ պահանջելով ՀՀ նախկին վարչապետ, ՀՀ Ազգային ժողովի նախկին նախագահ Հովիկ Աբրահամյանից և նրան փոխկապակցված անձանցից հօգուտ Հայաստանի Հանրապետության բռնագանձել՝

• 59 անշարժ գույք, որոնցից 15-ը գտնվում է Երևանում.
• 4 տրանսպորտային միջոց.
• 20 իրավաբանական անձանցում մասնակցություն.
• շուկայականից էականորեն ցածր արժեքով օտարված 9 գույքերի շուկայական արժեքը՝ 1 միլիարդ 628 միլիոն 277 հազար դրամի չափով.
• 8 ընկերություններին տրված փոխառություններից ծագող պահանջի իրավունք՝ 11 միլիոն 292 հազար 570 ԱՄՆ դոլարի չափով, 687 միլիոն դրամի չափով և 3 միլիոն 117 հազար եվրոյի չափով.
• Եվս 21 միլիարդ 202 միլիոն դրամ։

Հիշեցնենք նաև, որ 2025 թվականին դատախազն իրավասու դատարան է հանձնել ՀՀ նախկին վարչապետի և բարձրաստիճան այլ պաշտոններ զբաղեցրած Հովիկ Աբրահամյանի վերաբերյալ քրեական վարույթը:

Հովիկ Աբրահամյանը մեղադրվում է ձեռնարկատիրական գործունեությանն ապօրինի մասնակցելու, պաշտոնեական լիազորությունները չարաշահելու և անցնելու, հանցավոր ճանապարհով ձեռք բերված առանձնապես խոշոր չափերով գույքերն օրինականացնելու, այդ թվում՝

• պաշտոնեական լիազորություններն անցնելով ավազի արդյունահանմամբ զբաղվող առևտրային կազմակերպության բաժնեմասն իրեն փոխկապակցված անձանց փոխանցելու,
• ավազի արդյունահանման ոլորտում առևտրային գործունեություն իրականացնող կազմակերպությունների գործունեությանը մասնակցելու,
• իր կողմից հովանավորվող առևտրային գործունեության ընթացքում թույլ տրվող խախտումների կապակցությամբ միջոցներ չձեռնարկելու և ծանր հետևանքներ առաջացնելու,
• վերագրվող հանցավոր արարքների կատարման արդյունքում առաջացած ֆինանսական միջոցները շարժական ու անշարժ գույքի փոխակերպելու միջոցով օրինականացնելու մեջ:

 © progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

Ոստիկանության աշխատանքի գնահատումը՝ նոր չափանիշներով

ԱԺ պաշտպանության և անվտանգության հարցերի մշտական հանձնաժողովի ապրիլի 6-ի նիստում ՆԳ նախարար Արփինե Սարգսյանը ներկայացրել է ոստիկանության բարեփոխումների օրակարգի հերթական նախաձեռնությունը, որը վերաբերում է ծառայողների կատարողականի գնահատման նոր համակարգի ներդրմանը՝ հիմնված օբյեկտիվ և չափելի ցուցիչների վրա։

Նախաձեռնության նպատակն է ձևավորել արդյունավետության գնահատման այնպիսի մեխանիզմ, որի արդյունքներով ծառայողները կխրախուսվեն, կունենան առաջխաղացման հստակ հնարավորություն, ինչպես նաև կգործեն սահմանափակումներ՝ ցածր կատարողականի դեպքում։

Նախարարն ընդգծել է, որ կատարողականի գնահատման նոր համակարգը էական փոփոխություն կբերի գործող մոտեցումների համեմատ, որտեղ դեռ առկա են սուբյեկտիվ գնահատման տարրեր։ Առաջարկվող մոդելը հիմնված է կատարողականի հիմնական ցուցիչների (KPI) վրա՝ ապահովելով գնահատման թափանցիկություն, չափելիություն և արդարություն։ Յուրաքանչյուր տարի կատարողականը կգնահատվի ծառայողին վերապահված գործառույթների իրականացման արդյունավետությամբ, ինչպես նաև կստուգվի ֆիզիկական և կրակային պատրաստվածության մակարդակը։

Նախարարը կարևորել է, որ համակարգը գնահատում է ոչ թե պարզապես ծառայողի ակտիվությունը, այլ նրա արդյունավետությունը։ Եթե ծառայողի գրանցած արդյունքները դրական են, նա պետք է վստահ լինի, որ կարժանանա խրախուսանքի և կունենա առաջխաղացման հնարավորություն։ «Լավ ձևակերպված կատարողականի գնահատման համակարգը ոչ միայն չափում է ոստիկանության աշխատանքը, այլև ուղղորդում ու ձևավորում այն»,- նշել է նա։

Կատարողականի գնահատման և ատեստավորման համակարգերի միջև կստեղծվի ինստիտուցիոնալ կապ, ինչը թույլ կտա ապահովել հավասարակշռված մոտեցում և հաշվի առնել նաև նախորդ տարիների արդյունքները։ Այս մոտեցումը ծառայողին մշտապես կպահի մրցակցային միջավայրում։

Նոր համակարգը հնարավորություն կտա նաև կարճաժամկետ կտրվածքով մշտադիտարկել աշխատանքի արդյունավետությունը՝ ապահովելով տվյալահեն որոշումների կայացում։ Միաժամանակ այն կօգնի բացահայտել ծառայողների կրթական կարիքները, ինչը հիմք կդառնա թիրախային վերապատրաստման ծրագրերի մշակման համար։

Հանձնաժողովը դրական եզրակացություն է տվել նախաձեռնությանը՝ ընդգծելով, որ այն նոր բովանդակություն կհաղորդի կադրային քաղաքականությանը և կխթանի ծառայողների առաջխաղացման հնարավորությունները։

 © progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com

«Փողով բանակից ազատման» նախագիծը կրկին մերժվեց

ՀՀ Ազգային ժողովի Պաշտպանության և անվտանգության հարցերի մշտական հանձնաժողովում կրկին քննարկվել է ՔՊ խմբակցության պատգամավոր Հայկ Սարգսյանի՝ «զինծառայությունից գումարով ազատվելու» վերաբերյալ օրինագիծը, որը նախկինում, թեև ստացել էր կառավարության դրական եզրակացությունը, սակայն խորհրդարանում չէր ընդունվել։ Քննարկման ընթացքում Հայկ Սարգսյանը պնդել է, որ նախագծի մերժումը հանգեցնում է լուրջ հետևանքների՝ նշելով, որ զինծառայողների թիվը շարունակաբար նվազում է։ Նրա ներկայացմամբ՝ վերջին տարիներին աճել է հատկապես քաղաքացիությունից հրաժարվող երիտասարդ տղամարդկանց թիվը, ինչի արդյունքում բանակը կորցնում է զգալի զորակոչային ռեսուրս։

Պատգամավորը շեշտել է, որ եթե համապատասխան մեխանիզմներ չկիրառվեն, այս միտումը շարունակվելու է՝ առաջացնելով նոր խնդիրներ պաշտպանության համակարգում։ Սարգսյանը նաև նշել է, որ ծառայության բեռը անհավասար է բաշխված՝ ընդգծելով, որ այն հիմնականում ընկած է մարզերի բնակիչների վրա, մինչդեռ որոշ համայնքներում մեծ թվով երիտասարդներ չեն ներգրավվում ծառայության մեջ։ Նրա խոսքով՝ առաջարկվող նախագիծը կարող է կարգավորել այս իրավիճակը և նվազեցնել նման անհավասարությունները։ Միևնույն ժամանակ հանձնաժողովի նախագահ Անդրանիկ Քոչարյանը հիշեցրել է, որ օրինագծի մի շարք դրույթներ գնահատվել են հակասահմանադրական, և ընդգծել է, որ «փողով բանակից ազատվել չի կարող լինել»։ Քննարկման ընթացքում լարված իրավիճակ է ստեղծվել․ Հայկ Սարգսյանը փորձել է արձագանքել քննադատություններին, սակայն նրա և Անդրանիկ Քոչարյանի միջև վիճաբանություն է ծագել։ Պ

ատգամավորը պնդել է, որ նախագիծը մերժվել է ոչ թե իր, այլ խորհրդարանի կողմից, և նշել է, որ դրա վերաբերյալ պետք է հստակ պատասխանատվություն սահմանվի։ ՀՀ պաշտպանության նախարարի տեղակալ Արման Սարգսյանը հայտարարել է, որ այս պահին կառավարությունը նպատակահարմար չի համարում օրինագծի ընդունումը և առաջարկել է ձեռնպահ մնալ կողմ քվեարկելուց։ Իր ամփոփիչ ելույթում Հայկ Սարգսյանը դժգոհություն է հայտնել պատգամավորների դիրքորոշումից՝ ընդգծելով, որ նախագծի չընդունումը կարող է երկարաժամկետ բացասական ազդեցություն ունենալ բանակի համալրման վրա։ Վերջիվերջո հանձնաժողովի անդամների քվեարկությամբ օրինագիծը կրկին չի ընդունվել։

 © progressgyumri.am Armenian News / Analyses:

Հեռ. ՝ +37498 691-690; Էլ. Փոստ ՝ progressgyumri@gmail.com