ՏԿԵ նախարարը ՀՀ մարզպետների մասնակցությամբ խորհրդակցություն է անցկացրել
ՀՀ տարածքային կառավարման և ենթակառուցվածքների նախարարությունում նախարար Գնել Սանոսյանի գլխավորությամբ կայացել է ՀՀ մարզպետների մասնակցությամբ հերթական խորհրդակցությունը։
Նախ անդրադարձ է կատարվել ԱԺ պատգամավորների կողմից ներկայացված «Կենդանիների նկատմամբ պատասխանատու վերաբերմունքի մասին» օրենքի և հարակից օրենքների նախագծին, քննարկվել է համայնքներում թափառող շների հետ կապված խնդիրը։
Ապա օրակարգային հաջորդ հարցով քննարկվել է համայնքների եկամուտների հավաքագրման 9 ամիսների արդյունքները։ Ըստ այդ արդյունքների համայնքների կատարողականը 9 ամսվա պլանի համեմատ կազմել է 93,7 տոկոս։ Այս մասին տեղեկացնում են ՏԿԵ նախարարությունից։
Սեփական եկամուտների հավաքագրման տվյալներով առաջատար են Արմավիրի, Կոտայքի և Սյունիքի մարզերը։
Նախարարը հորդորել է ուշադրության կենտրոնում պահել համայնքների կողմից սեփական եկամուտների հավաքագրման գործընթացը՝ ապահովելով 2024 թվականի համար պլանավորված նշաձողը, ինչպես նաև ապահովել պետական բյուջեով մարզպետարանների համակարգմամբ իրականացվող սուբվենցիոն և հրատապ ծրագրերի կատարողականը:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
Վարչապետի գլխավորությամբ քննարկվել է 2024-2026 թթ. Ոստիկանության ոլորտի բարեփոխումների ռազմավարական ծրագրի նախագիծը
Վարչապետ Նիկոլ Փաշինյանի գլխավորությամբ տեղի է ունեցել խորհրդակցություն, որի ընթացքում քննարկվել է 2024-2026 թվականների Ոստիկանության ոլորտի բարեփոխումների ռազմավարական ծրագրի և դրանից բխող գործողությունների ծրագրի նախագիծը:
Նախ անդրադարձ է կատարվել նախորդ ռազմավարության արդյունքներին, որոնց թվում են՝ Ներքին գործերի նախարարության ստեղծումը, պարեկային ծառայության ներդնումը, օպերատիվ կառավարման կենտրոնի ստեղծումը, պարեկային ծառայության կադրերի պատրաստման ուղղությամբ իրականացված ծրագրերը և այլն: Զեկուցվել է, որ ռազմավարական ծրագրից բխող գործողությունների ծրագրով նախատեսվում է բարելավել ՆԳՆ կողմից մատուցվող հանրային ծառայությունների որակը, ոստիկանության կառավարման սխեման բերել ավարտական տեսքի, ներդնել մարդկային ռեսուրսների կառավարման ինստիտուցիոնալ նոր մոտեցում, իրականացնել ոստիկանության արտաքին նկարագրի, ենթակառուցվածքների, տեխնիկական հագեցվածության լավարկում և այլն: Միաժամանակ, վերը նշված ժամանակահատվածում նախատեսվում է գործարկել քրեական ոստիկանությունը, համայնքային ոստիկանությունը, ոստիկանության գվարդիան նոր կառուցվածքով և ֆունկցիոնալով, ձևավորել հանրապետական մեկ միասնական օպերատիվ կառավարման կենտրոն։
Հետևողական քայլեր են իրականացվելու կրթական միջավայրի բարելավման, ոստիկանության կադրային պատրաստման, մասնագիտական զարգացման, Պարեկային ծառայության զարգացման, ազատությունից զրկված անձանց իրավունքների երաշխավորման, վատ վերաբերմունքի կանխարգելման և այլ ուղղություններով:
Միաժամանակ, նշվել է, որ վերջին շրջանում անկախ կազմակերպությունների կողմից իրականացվել են սոցհարցումներ՝ պարզելու Ոստիկանության նկատմամբ հանրային վստահության մակարդակը: Մասնավորապես, ԵԱՀԿ-ի կողմից 2024 թ․ անցկացված հարցման արդյունքներով Ոստիկանության նկատմամբ հանրային վստահության մակարդակը կազմել է 72%, IRI-ի կողմից 2023-ին անցկացված հարցումներով՝ 58%, իսկ 2024 թ․՝ 62%:
Վարչապետ Փաշինյանը կարևորել է Ոստիկանության ոլորտի բարեփոխումների արդյունավետ իրականացումը՝ ընդգծելով հանրային վստահության մակարդակի բարձրացման ուղղությամբ հետևողական ու շարունակական քայլերի անհրաժեշտությունը:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
Էմմա Պողոսյանը հռչակվել է Եվրոպայի Մ20 ծանրամարտի առաջնության չեմպիոն
Հայաստանի ծանրամարտի կանանց ընտրանու անդամ Էմմա Պողոսյանը դարձավ Եվրոպայի մինչև 20 տարեկանների առաջնության ոսկե մեդալակիր:
Լեհաստանում ընթացքող Եվրոպայի Մ20 և Մ23 տարեկանների առաջնությունում պայքարի մեջ մտան 81 կգ քաշային պատանիները:
Հայաստանի հավաքականից այս քաշային կարգում ներկայացված էին երկուսը` Էմմա Պողոսյանը և Ալինա Սուքիասյանը:
Ալինա Սուքիասյանը պոկեց 93 կգ և հրեց 109 կգ: Երկամարտի 202 կգ արդյունքով նա միայն 6-րդն էր:
Էմմա Պողոսյանը հրում վարժությունում երեք հաջող մոտեցմամբ հաջորդաբար բարձրացրեց 95, 98, 100 կգ: Այս ձևում նա նվաճեց փոքր ոսկե մեդալ: Հրում վարժությունում Պողոսյանը մեկ մոտեցմամբ` բարձրացնելով 118 կգ նվաճեց այս վարժության ոսկե մեդալը: Երկամարտի 218 կգ արդյունքով նա նվաճեց Եվրոպայի մինչև 20 տարեկանների առաջնության ոսկե մեդալը:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
Կարեն Սարուխանյանը կառաջադրվի Գյումրիի քաղաքապետի թեկնածու
«Քաղաքացիական պայմանագիր» խմբակցության պատգամավոր Կարեն Սարուխանյանը խորհրդարանում ասել է, որ կուսակցությունն իրեն է առաջադրելու Գյումրիի քաղաքապետի թեկնածու: Նա համաձայն չէ, որ կուսակցությունն է ստիպել «Բալասանյան» դաշինքին հրաժարվել Գյումրիի քաղաքապետի պաշտոնից ու ավագանու մանդատներից:
Սարուխանյանը դա համարել է քաղաքական գործընթաց: Պատգամավորը նաև տեղեկացրել է, որ «Քաղաքացիական պայմանագիրը» Գյումրիում պատրաստվում է արտահերթ ընտրության:
Կարեն Սարուխանյան (ՀՀ ԱԺ «Քաղաքացիական պայմանագիր» խմբակցության պատգամավոր) – Այն համայնքներում, որտեղ որ «Քաղաքացիական պայմանագիր»-ն ունի տարածքային կազմակերպություններ, տարածքային կազմակերպությունների նախագահները դիտարկվում են որպես տվյալ համայնքներում ընտրություններում ցուցակը առաջնորդող անձնավորություններ: Գյումրիում, այո, ես եմ: Դա ընդհանուր դիրքորոշման մասով է: Մենք նաև հայտարարել ենք այդ մասին՝ այն կոնտեքստում, որ մենք պատրաստվում ենք արտահերթ ընտրությունների: Այսինքն՝ քանի որ ստեղծված իրավիճակում մենք ունենք հարցի հետագա երկու ընթացք, էսպես ասած, դրանցից մեկը ավագանու անդամների միջից նոր քաղաքապետ ընտրելն է, և հաջորդը արտահերթ ընտրություններն են, մենք քաղաքական մասով ընտրություն ենք կատարել, որ գնալու ենք արտահերթ ընտրությունների:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
743 մլն 734 հազար դրամ Գյումրու 29 փողոցների հիմնանորոգման համար. ՀՀ կառավարություն
809 մլն 495 հազար դրամը ՀՀ կառավարությունն այսօրվա որոշմամբ հատկացրել է Շիրակի մարզպետի աշխատակազմին՝ համայնքներում իրականացված 2 սուբվենցիոն ծրագրերի համաֆինանսավորման համար։
Գյումրի համայնքի թվով 29 փողոցների հիմնանորոգում /25 փողոցի ասֆալտապատում/ ծրագրի՝ ՀՀ կառավարության մասնաբաժինը կազմել է 743 մլն 734 հազար դրամ։
Արթիկ համայնքի Արթիկ, Արևշատ, Նահապետավան, Պեմզաշեն, Սարալանջ և Հառիճ բնակավայրերի ճանապարհների տուֆ քարով սալապատում /Արթիկ, Արևշատ, Նահապետավան, Պեմզաշեն/ ծրագրի համաֆինանսավորմանն էլ ուղղվել է 65 մլն 761 հազար դրամ։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
2024-ի հունվար-սեպտեմբերին Հայաստան է այցելել 1 միլիոն 721 հազար 245 զբոսաշրջիկ
ԵԱՏՄ անդամակցության տեսանկյունից 2024-ին մի շարք ոլորտներում արձանագրվել են դրական տեղաշարժեր: Վիճակագրական կոմիտեի տվյալների համաձայն՝ ՀՀ-ի առևտրաշրջանառությունը ԵԱՏՄ երկրների հետ 2024-ի հունվար-օգոստոս ամիսներին կազմել է 9 մլրդ 173 մլն դոլար, ինչը նախորդ տարվա նույն ժամանակահատվածի համեմատ աճել է երկու անգամ: Անցած տարի՝ այս նույն ժամանակահատվածում, 4 մլրդ 507 մլն դոլար էր: Այս մասին էկոնոմիկայի նախարար Գևորգ Պապոյանը տեղեկացրեց ԱԺ մշտական հանձնաժողովների համատեղ նիստում՝ անդրադառնալով 2024 թվականին ԵԱՏՄ-ին անդամակցության շրջանակներում տնտեսական ցուցանիշների մասով ամփոփ վերլուծությունը:
«2024-ի հունվար-օգոստոս ամիսներին արտահանումը Հայաստանից ԵԱՏՄ երկրներ կազմել է 2 մլրդ 52 դոլար, իսկ ներմուծումը կազմել է 7 մլրդ 121 միլիոն դոլար: ՀՀ առևտրաշրջանառությունը ԵԱՏՄ երկրների հետ, Վիճակագրական կոմիտեի տվյալների համաձայն, 2023-ին կազմել էր 8 մլրդ 252 մլն դոլար, ինչը նախորդ տարվա՝ 2022-ի համեմատ, աճել էր 55 տոկոսով: 2023-ին արտահանումն աճել էր 46 տոկոսով՝ կազմելով 3.7 միլիարդ դոլարից մի փոքր ավելի, իսկ ներմուծումը եղել է 4,5 միլիոն դոլարի շրջանակում»,- տեղեկացրեց Պապոյանը:
Ինչ վերաբերում է ներդրումներին, ապա 2024-ի հունվար-հունիսին ՀՀ տնտեսության իրական հատվածում ԵԱՏՄ երկրների կողմից օտարերկրա ներդրումների զուտ ներհոսքի ծավալը կազմել է 26.5 մլն դոլար, նույն ժամանակահատվածում ԵԱՏՄ երկրների կողմից օտարերկրա ուղղակի ներդրումների զուտ հոսքերի ծավալը կազմել է 22.5 մլն ԱՄՆ դոլար:
«2024-ի հունվար-սեպտեմբեր ամիսներին Հայաստան զբոսաշրջային այցելությունները կազմել են 1 միլիոն 721 հազար 245 մարդ, ինչը նվազել է շուրջ 7 տոկոսով 2023 թվականի հունվար-սեպտեմբերի համեմատ: Մասնավորապես ռուսաստանի զբոսաշրջիկների թվաքանակը կազմել է մոտավորապես 741 հազար, ինչը ընդհանուր այցելությունների մեջ կազմել է 43 տոկոս: Նախորդ տարի ընդհանուր այցելությունների մեջ Ռուսաստանի ներկայացուցիչների մասնաբաժինը 50 տոկոս է եղել»,- տեղեկացրեց նախարարը՝ նշելով, որ գրեթե բոլոր ուղղություններով Հայաստան զբոսաշրջիկների քանակն ավելացել է:
«Ցավոք սրտի, Ռուսաստանից նվազել է: Դա հանգեցրել է նրան, որ բոլոր ուղղությունների մասնաբաժինը մեծացել է: 2023-ին Հայաստան զբոսաշրջային այցելությունները կազմել են 2 մլն 316 հազար 666 մարդ, ինչը 2022-ի համեմատ 35 տոկոսով աճ էր կազմել»,- ընդգծեց Պապոյանը:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
Լեռնային Ղարաբաղից տեղահանված միայնակ տարեցների համար կստեղծվեն ավելի բարենպաստ պայմաններ՝ հիփոթեքային վարկ ձեռք բերելու համար
Գործադիրի որոշմամբ կկարգավորվեն Լեռնային Ղարաբաղից տեղահանված ընտանիքների, մասնավորապես՝ միայնակ տարեցների բնակարանային ապահովության խնդիրների լուծման հետ կապված հարաբերությունները։
Որոշմամբ առաջարկվում է սահմանել այնպիսի իրավակարգավորում, որը գործընկեր ֆինանսական կազմակերպություններին հնարավորություն կտա ծրագրի շրջանակում վարկավորել նաև միայնակ տարեցներին՝ հաշվի չառնելով վարկի գործողության ընթացքում վերջիններիս մահվան և ժառանգի բացակայության ռիսկը։
Առաջարկվող կարգավորմամբ, եթե շահառուն չունի ժառանգ, ապա նրա մահվան դեպքում աջակցության գումարի վճարումը կազմակերպությանը կշարունակվի մինչև վարկի ամբողջական մարումը։ Որոշման ընդունմամբ Լեռնային Ղարաբաղի առանձին շրջաններից տեղահանված ընտանիքների, մասնավորապես՝ միայնակ տարեցների համար կստեղծվեն ավելի բարենպաստ պայմաններ՝ հիփոթեքային վարկով բնակելի անշարժ գույք ձեռք բերելու կամ անհատական բնակելի տուն կառուցելու (կառուցապատումը շարունակելու) համար։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
Վարչապետի աշխատակազմին հատկացվող բյուջեն 2025-ին կնվազի 2,5 տոկոսով
Հայաստանի 2025 թվականի պետական բյուջեի նախագծով վարչապետի աշխատակազմին հատկացվող բյուջեն 2024-ի համեմատ կնվազի 2,5 տոկոսով՝ կկազմի 24 միլիարդ 365 միլիոն դրամ։ ԱԺ-ում «Հայաստանի Հանրապետության 2025 թվականի պետական բյուջեի մասին» ՀՀ օրենքի նախագծի քննարկման ժամանակ այս մասին ասաց ՀՀ ֆինանսների նախարար Վահե Հովհաննիսյանը։
«Ընդ որում՝ ընթացիկ ծախսերի համար նախատեսված է 20 միլիարդ դրամ, որը 4 տոկոսով ավելի քիչ է, քան 2024 թվականին, իսկ կապիտալ ծախսերի համար նախատեսված է 4 միլիարդ 180 միլիոն դրամ, որը 6 տոկոսով ավելի է, քան 2024 թվականին»,- նշեց Վահե Հովհաննիսյանը։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
Նարեկ Մկրտչյանը՝ ծանրամարտի Եվրոպայի Մ20 տարեկանների առաջնության հաղթող
Հայաստանի ծանրամարտի պատանեկան հավաքականի անդամ, 81 կգ քաշային Նարեկ Մկրտչյանը երկամարտի 341 կգ արդյունքով (150+191 կգ) ոսկե մեդալ է նվաճել Լեհաստանում ընթացող Մ20 տարեկանների Եվրոպայի առաջնությունում:
ԿԳՄՍՆ-ից տեղեկացնում են, որ պոկում վարժությունում Մկրտչյանը երեք հաջող մոտեցմամբ ցույց է տվել 150 կգ արդյունք և նվաճել վարժության փոքր բրոնզե մեդալը: Հրում վարժությունում հայ ծանրորդը դարձյալ հաջող է կատարել բոլոր մոտեցումներն ու 191 կգ արդյունքով արժանացել փոքր ոսկե մեդալին:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
ԿԸՀ նախագահի տեղակալը ԱԺ-ում ներկայացրել է 2025-ի բյուջեի հատկացումները
2025 թվականին պետական բյուջեի նախագծով ՀՀ Կենտրոնական ընտրական հանձնաժողովին` «Ընտրական գործընթացների համակարգում, կանոնակարգում և տեղեկատվության տրամադրում ծրագրի» համար հատկացվել է 492 միլիոն 744 հազար դրամ: ԿԸՀ-ի նախանշած հայտով ամբողջ ծրագրի համար ավելի վաղ ներկայացվել էր 551 միլիոն 875 հազար դրամ ցուցանիշը:
Ազգային ժողովի պետական-իրավական և ֆինանսավարկային ու բյուջետային հարցերի մշտական հանձնաժողովների համատեղ նիստում հոկտեմբերի 30-ին ներկայացրել է ԿԸՀ նախագահի տեղակալ Նունե Հովհաննիսյանը:
«Կենտրոնական ընտրական հանձնաժողովի գործունեության ապահովում և ընտրական ծրագրերի համակարգման, կազմակերպման, անցկացման, մոնիտորինգի ծառայություններ /ապարատի պահպանում/» միջոցառման իրականացման համար հատկացվել է 473 միլիոն 127 հազար դրամ (2023թ.-ին փաստացի ծախսերը կազմել է 455 միլիոն 969 հազար դրամ, 2024-ին հատկացումը` 494 միլիոն 541 հազար դրամ:
«Ընտրական հանձնաժողովների անդամների մասնագիտական դասընթացների կազմակերպում/Ուսուցում/» միջոցառման իրականացման համար հաստատվել է 19 միլիոն 617 հազար դրամ ցուցանիշը` չնայած ԿԸՀ-ի կողմից նախանշված է եղել, որ դասընթացների իրականացման համար հաշվարկվել է 58 միլիոն 851 հազար դրամ։
2023 թ. այս միջոցառման մասով հատկացումը կազմել է 58 միլիոն 851 հազար դրամ, այդ տարի դասընթացների փաստացի ծախսը կազմել է 81 միլիոն 220 հազար դրամ:
Իսկ 2024 թ. մասնագիտական դասընթացների կազմակերպման համար անհրաժեշտ հատկացումը կազմել է 19 միլիոն 617 հազար դրամ:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com