Հայաստանը դասվել է ազատ համացանց ունեցող երկրների շարքին․ Freedom House
Freedom House միջազգային իրավապաշտպան կազմակերպությունը հրապարակել է Ազատությունը համացանցում «Վստահության համար պայքարը առցանց տիրույթում» վերտառությամբ զեկույցը, որն ընդգծում է, որ 21-րդ դարի առողջ ժողովրդավարությունը չի կարող գործել առանց վստահելի առցանց միջավայրի, որտեղ գերիշխում է ազատ արտահայտման և բազմազան տեղեկատվության հասանելիությունը:
Այս տարի Հայաստանը կրկին դասվում է ազատ համացանց ունեցող երկրների շարքին: 2024 թ.-ի զեկույցում Հայաստանը ստացել է 74 միավոր: Անցյալ տարի, ըստ զեկույցի, Հայաստանը ստացել էր 72 միավոր: Զեկույցը ընդգրկում է 2023 թ. հունիսի 1-ից մինչ 2024 թ. մայիսի 31-ն ընկած ժամանակահատվածը: Հայաստանի միավորները բարելավվել են, քանի որ վերոնշյալ ժամանակահատվածում սոցիալական մեդիահարթակները և մարդու իրավունքների միջազգային չափանիշներով պաշտպանված բովանդակություն պարունակող կայքերը չեն արգելափակվել:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
Նիկոլ Փաշինյանն ընդունել է ՀՀ-ում հավատարմագրված ԵՄ անդամ պետությունների դեսպաններին
Հայաստանի Հանրապետության վարչապետ Նիկոլ Փաշինյանն ընդունել է Հայաստանում հավատարմագրված Եվրոպական միության անդամ պետությունների արտակարգ և լիազոր դեսպաններին՝ ԵՄ պատվիրակության ղեկավար, դեսպան Վասիլիս Մարագոսի գլխավորությամբ:
Ինչպես «Արմենպրես»-ը տեղեկանում է ՀՀ կառավարության տարածած հաղորդագրությունից, վարչապետը կարևորել է Հայաստան-ԵՄ բազմոլորտ համագործակցությունն ու ևս մեկ անգամ ընդգծել ՀՀ Կառավարության պատրաստակամությունը՝ խորացնելու և ընդլայնելու բազմաոլորտ հարաբերությունները եվրոպական գործընկերների հետ: Այս համատեքստում, Նիկոլ Փաշինյանը շեշտել է նախորդ տարվա հոկտեմբերին Գրանադայում Եվրոպական հանձնաժողովի նախագահ Ուրսուլա Ֆոն դեր Լայենի հետ համատեղ հայտարարությամբ, ինչպես նաև այս տարվա ապրիլին Բրյուսելում ՀՀ-ԵՄ-ԱՄՆ բարձր մակարդակի հանդիպման արդյունքներով ընդունված հայտարարությամբ ձեռք բերված պայմանավորվածությունների արդյունավետ և հետևողական իրականացման անհրաժեշտությունը:
Վասիլիս Մարագոսն անդրադարձել է վերոնշյալ հայտարարություններով նախատեսված քայլերի իրականացման ընթացքին ու ընդգծել ԵՄ շարունակական աջակցությունը՝ ՀՀ–ում ժողովրդավարական և տնտեսական ոլորտում բարեփոխումների առաջմղման գործում, այդ թվում՝ մասնավոր հատվածի կարողությունների զարգացման նպատակով: ԵՄ պատվիրակության ղեկավարը կարևորել է նաև վիզաների ազատականացման շուրջ Հայաստանի հետ երկխոսության մեկնարկը, ԵՄ խաղաղության հիմնադրամից Հայաստանին օժանդակություն ցուցաբերելու որոշումը:
Հաջորդիվ անդրադարձ է կատարվել Հայաստան-Ադրբեջան խաղաղության պայմանագրի շուրջ քննարկումներին: Նիկոլ Փաշինյանը շեշտել է հայկական կողմի հավատարմությունը խաղաղության օրակարգին և ընդգծել Հայաստանի պատրաստակամությունը՝ համաձայնեցված հոդվածների հիման վրա ստորագրելու պայմանագիրն ու շարունակելու հետագա քննարկումները մյուս հարցերի շուրջ:
Տարածաշրջանում խաղաղության և կայունության ապահովման համատեքստում զրուցակիցները կարևորել են ՀՀ-ում ԵՄ դիտորդական առաքելության արդյունավետ գործունեությունը:
Մտքեր են փոխանակվել տարածաշրջանային հաղորդակցության ուղիների ապաշրջափակման հնարավորությունների շուրջ: ԵՄ պատվիրակության ղեկավար Վասիլիս Մարագոսը հայտնել է ԵՄ աջակցությունը Հայաստանի ինքնիշխանությանն ու ՀՀ Կառավարության ներկայացրած «Խաղաղության խաչմերուկ» նախագծին:
Հանդիպման ընթացքում անդրադարձ է կատարվել նաև տարածաշրջանային նշանակության այլ հարցերի:
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
Համաշխարհային առևտրի կենտրոն Երևանը համագործակցության պայմանագիր է կնքել հեղինակավոր Colliers ընկերության հետ
ՀՀ Կառավարության և «Ռենշինի» համատեղ նախագիծը՝ Համաշխարհային առևտրի կենտրոն Երևանը հոկտեմբերի 16-ին համագործակցության պայմանագիր է կնքել հեղինակավոր Colliers ընկերության հետ։ Այդ մասին հայտնում են էկոնոմիկայի նախարարությունից:
Համաշխարհային առևտրի կենտրոն Երևանի կողմից պայմանագիրը ստորագրել է գործադիր տնօրեն և կառավարման խորհրդի նախագահ Արտաշես Տոնոյանը, իսկ Colliers, Middle East & India ընկերության կողմից՝ նախագահ և կառավարիչ-տնօրեն Սանկեյ Պրասադը: Պայմանագրի ստորագրման արարողությանը ներկա է եղել նաև ՀՀ էկոնոմիկայի նախարար Գևորգ Պապոյանը։
Համաշխարհային առևտրի կենտրոն Երևանի և Colliers-ի միջև այս նշանակալի համագործակցության շնորհիվ Հայաստանի ներդրումային և կոմերցիոն անշարժ գույքի ոլորտը նոր մոտեցումներ կունենա՝ կառուցապատման և քաղաքաշինական նախագծերի մշակման և կառավարման տեսանկյունից, ինչն էապես կանդրադառնա ոլորտի և տնտեսության զարգացման վրա։
«Ուրախ ենք, որ Հայաստանում իրականացվող այս խոշորամասշտաբ ծրագիրը հետաքրքրել է համաշխարհային առաջատար այս ընկերությանը։ Հայաստանի Կառավարությունը հետամուտ է լինելու, որ նաև Համաշխարհային առևտրի կենտրոն Երևան նախագծի միջոցով մեր երկիրը ներդրումների համար է՛լ ավելի գրավիչ և հետաքրքրական դառնա»,- նշել է ՀՀ էկոնոմիկայի նախարար Գևորգ Պապոյանը։
Համաշխարհային առևտրի կենտրոն Երևանը պետական-մասնավոր համագործակցությամբ ամենախոշոր նախագիծն է Հայաստանում, որն իրականացվում է Հայաստանի Հանրապետության կառավարության և «Ռենշին» քաղաքաշինական-ներդրումային ընկերության կողմից։ Այն առաջարկելու է նորագույն, բազմաֆունկցիոնալ անշարժ գույք՝ կոմերցիոն, գրասենյակային, հյուրանոցային տարածքներով, խանութներով և ցուցասրահներով։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
Իրավիճակը ԱԺ-ում լարվեց. Քննչական կոմիտեի ղեկավարն ու պատգամավոր Հովիկ Աղազարյանը վիճաբանեցին (տեսանյութ)
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
ՏՏ ոլորտի պետական աջակցության նախագիծը հանրային տիրույթում է. ԲՏԱ նախարարն ակնկալում է ակտիվ և կառուցողական քննարկումներ
Բարձր տեխնոլոգիական արդյունաբերության (ԲՏԱ) նախարար Մխիթար Հայրապետյանը կլոր-սեղանի շուրջ քննարկման ժամանակ ներկայացրեց ոլորտի պետական աջակցության նախագիծը։
«Արմենպրես»-ի հաղորդմամբ՝ քննարկումից առաջ լրագրողների հետ զրույցում ԲՏԱ նախարարը նշեց, որ իրենք հանդիպում են կազմակերպել տեխնոլոգիական համայնքի ներկայացուցիչների հետ՝ ներկայացնելու նախագծի էությունը, որի հիմքում կառավարությունն, ըստ էության, իր առջև դրել է չորս խնդիր։
«Նախ մենք նոր օրենսդրության ընդունմամբ խրախուսելու ենք վերազգային ընկերությունների մուտքը Հայաստան։ Երկրորդ հիմնասյունը կլինի նոր աշխատողների՝ դեպի տեխնոլոգիական ոլորտ ներգրավումը։ Երրորդ ուղղությունն արդեն իսկ ընկերություններում ներգրավված աշխատակիցների մասնագիտական կարողությունների բարձրացումն է։ Եվ չորրորդ ուղղությունը հետազոտությունների և մշակման ոլորտի խթանումն է մեր երկրում»,- ասաց Հայրապետյանը։
Նախարարի դիտարկմամբ՝ նախագծում գիտահետազոտական ոլորտային աշխատանքների մասը ոչ միայն վերաբերում է բարձր տեխնոլոգիաներին կամ տեղեկատվական տեխնոլոգիաների ոլորտին, այլ ամբողջ տնտեսությանը, ինչն, ըստ նրա, շատ կարևոր արձանագրում է։ Իսկ ինչ վերաբերում է բարձր տեխնոլոգիաների ոլորտի զարգացմանը, Հայրապետյանն ընդգծեց, որ այն ունի շատ պարզ հիմնավորում, որի համաձայն՝ բարձր տեխնոլոգիաների ոլորտի զարգացումը գալիս է իբրև շոգեքարշ ծառայելու ամբողջ տնտեսության զարգացմանը։
«Ինը ամիս շարունակ ԲՏԱ նախարարությունը ակտիվորեն համագործակցում է մասնավոր հատվածի տեխնոլոգիական համայնքի ընկերությունների ներկայացուցիչների հետ՝ համատեղ վերհանելով ոլորտում առկա խնդիրները, մարտահրավերները, նաև քննարկելով ոլորտի զարգացման իրական ներուժն ու հնարավորությունները։ Դրա արդյունքում կառավարությունն աշխատանքի իր մասնաբաժինը կատարել է և այսօր արդեն իսկ նախագծի տեսքով ներկայացնելու է տեխնոլոգիական հանրությանը՝ դրա հիման վրա հավելյալ կարծիքներ, դիրքորոշումներ հավաքագրելու և դրանք նաև Ազգային ժողովում հնչեցնելու նպատակով։ Չեմ բացառում, որ Ազգային ժողովի քննարկումների արդյունքում նախագիծը կենթարկվի փոփոխությունների, և այս համատեքստում կոնկրետ այսօրվա հանդիպումն ունի կարևոր նշանակություն»,- ասաց ԲՏԱ նախարարը։
Հայրապետյանը տեղեկացրեց, որ կառավարությունում նախագիծը երկար ու ձիգ քննարկվել է։ Ի սկզբանե ԲՏԱ նախարարության կողմից առաջարկվել է մինչև ռազմավարության ընդունումը գնալ ավելի պարզունակ լուծման ճանապարհով՝ ոլորտի համար սահմանելով համահարթ 10 տոկոս եկամտահարկ։ Կառավարությունում կայացած քննարկման արդյունքում կոնսենսուս չեղավ, հետևաբար որոշում կայացվեց գնալ այլ ուղղությամբ՝ սահմանել թիրախային խնդիրներն ու գնալ ներդրումների ճանապարհով՝ պայմանավորվելով, որ ռազմավարությունը ընդունելուց հետո հավելյալ քննարկվի նաև ռազմավարական հռչակվելիք ուղղությունների մեջ թիրախային հավելյալ ներդրումներ անելու հավանականությունը։
Դա կլինի 2025 թվականի կեսից, թե 2026 թվականի սկզբից, ցույց կտան առաջիկա ամիսները։ Նախագիծը դրվել է իրավական ակտերի նախագծերի հրապարակման միասնական կայքում։ Ազգային ժողով գնալուց առաջ նախարարությունն ակնկալում է նաև տեխնոլոգիական ամբողջ հանրույթի կարծիքները հավաքագրել։ Նախագիծն ուղարկվել է նաև Ազգային ժողով։
«Տեղեկացված ենք, որ կան տարբեր մոտեցումներ օրենսդիր մարմնի գործընկերների մոտ, ընդհուպ մինչև այնպիսի մոտեցում, որ ըստ էության և շատ կոնկրետ առաջարկով հանդես պիտի գան պատգամավորները, որպեսզի աջակցությունը լինի ոչ թե ընկերություններին, այլ աշխատակիցներին։ Սա ևս մոտեցում է, և մենք ակնկալում ենք լսել դրա հիմնավորումները, սակայն մեր մոտեցումը հետևյալն է։ Մենք առաջարկում ենք կարգավորումներ՝ օգնելու բիզնեսին, թողնելով նրա հայեցողությանը համապատասխան պետական աջակցության կամ ներդրման տնօրինումը։ Հավատում ենք, որ սա ամենաէֆեկտիվ ճանապարհն է, թեև դեռ ունենք անցնելու ճանապարհ։ Մոտեցումները տարբեր են, հետևաբար կազմակերպելով քննարկում՝ որոշել ենք ներկայացնել հիմնավորումները, թե ինչու է կառավարությունն, այնուամենայնիվ, որոշել գնալ այս ճանապարհով և լսել մասնագիտական կարծիքները, գնահատականներն ու առաջարկները»,- եզրափակեց ԲՏԱ նախարարը։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
Հայաստանն ու Ադրբեջանը համաձայնության հասնելու շեմին են. եկել է խաղաղություն հաստատելու ժամանակը. խաղաղության ժամանակը հիմա է. Ալեն Սիմոնյան
Հայաստանն ու Ադրբեջանը համաձայնության հասնելու շեմին են, Միջխորհրդարանական միության 149-րդ վեհաժողովի ընդհանուր քննարկումներում հայտարարել է Ազգային ժողովի նախագահ Ալեն Սիմոնյանը։
«Այն համատեքստում, երբ խաղաղ գործընթացը լրջորեն սկսվեց ամիսներ առաջ, Ադրբեջանը ցանկանում էր մեր համաձայնությունը միջազգայնորեն ճանաչված 5 կետի շուրջ: Ուրախ եմ տեղեկացնել, որ այսօր մենք համաձայնության ենք եկել 16 կետի շուրջ:
Տիկնա՛յք եւ պարոնա՛յք, կատարյալն այլեւս չպետք է լինի լավի թշնամին»,- ասել է նա։
Սիմոնյանի խոսքով՝ եկել է խաղաղություն հաստատելու ժամանակը. խաղաղության ժամանակը հիմա է:
«Մենք հրավիրում ենք Ադրբեջանին դրսեւորել քաղաքական կամք, օգտվել պահից եւ միանալ մեզ՝ հնարավորն իրականություն դարձնելու համար:
Հայաստանը պատրաստ է խաղաղության պայմանագիր կնքել թեկուզ այսօր»,- հավելել է ԱԺ նախագահը։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
ԵՄ վիզաների ազատականացումն ավելի հավանական կդարձնի Հայաստանի եվրոպական ինտեգրման գործընթացը
ԵՄ երկրների հետ վիզաների ազատականացման շուրջ բանակցությունների մեկնարկը՝ որպես կարևոր գործընթաց, միանշանակ կարելի է դրական քայլ համարել, և քանի որ արդեն առարկայական ու շոշափելի արդյունքների նախաձեռնման գործընթաց է սկսվել, դա նշանակում է, որ ՀՀ-ն որոշ չափանիշներով ավելի մոտ է դարձել Եվրամիությանը, ինչը հնարավոր է դարձնում վիզաների ազատականացման վերաբերյալ երկխոսությունն ավելի գործնական դարձնելը։
«Արմենպրես»-ի հետ զրույցում այդ կարծիքը հայտնեց քաղաքագետ Էմիլ Օրդուխանյանը՝ անդրադառնալով Հայաստանի քաղաքացիների համար ԵՄ վիզաների ազատականացման շուրջ երկխոսության մեկնարկին։
«Այդուհանդերձ, պետք է հասկանալ, թե ինչ ժամկետների մասին է խոսքը։ Այնունամենայնիվ, դա հնարավորություն կտա Հայաստանի քաղաքացիներին ունենալ հասանելիություն Եվրոպական երկրներ անարգել այցելելու առումով, հետևապես նաև փորձի փոխանակման, մշակույթի, տնտեսական համագործակցության տեսանկյունից ավելի կդյուրացնի գործընթացն ու ավելի հավանական կդարձնի հետագայում Հայաստանի եվրոպական ինտեգրման գործընթացը»,- ասաց Օրդուխանյանը։
Քաղաքագետը ուշադրություն դարձրեց նաև հնարավոր ռիսկերի վրա՝ ընդգծելով, որ եթե այդ ճանապարհով ունենանք արտագաղթի տեմպերի աճ, ապա դա կունենա բացասական ազդեցություն, իսկ եթե ամեն ինչ լինի վերահսկելի, այդ պարագայում կկարողանանք խոսել բացառապես օգուտների մասին, ինչը նաև մեր երկրին առհասարակ կբերի նոր հնարավորություններ։
«Եթե ունենք եվրոպական ինտեգրման նպատակ, և դա ռազմավարական շահ է, ապա այդ պարագայում վիզաների ազատականացումը, բնականաբար, մեր քաղաքացիներին թույլ տա Եվրոպան ավելի լավ ճանաչել, ոչ թե ունենալ լոկ հեռավար պատկերացում։ Այսինքն՝ դա ենթադրում է անմիջական շփումներ, ակտիվ համագործակցություն, ինչը հետագայում ավելի կհեշտացնի ինտեգրման գործընթացը»,- ասաց մեր զրուցակիցը։
Անդրադառնալով այն հարցին, թե հաշվի առնվու՞մ են արդյոք հնարավոր ռիսկերը, մասնավորապես՝ ՀՀ-ում իրականացվող բարեփոխումների հնարավոր ձախողումը, քաղաքագետը շեշտեց, որ հարցը գտնվում է փոխադարձ ազդեցությունների տիրույթում։
«Եթե Հայաստանը բավարարում է որոշակի չափանիշների, դա հնարավոր է դարձնում վիզաների ազատականացումը, իսկ եթե ինչ-որ պահի արձանագրվի որոշակի հետընթաց, ապա գործընթացը կարող է վերանայվել, ինչպես օրինակ Վրաստանի պարագայում, որտեղ ԵՄ-ի հետ առկա հարաբերություններում որոշ հարցեր ավելի սերտ փոխգործակցության առումով մտնում են վերանայման փուլ, նույնիսկ հարևան երկրի դեպքում խոսվում է վիզաների ազատականացման որոշումը վերանայելու մասին։ Հայաստանը պետք է ձգտի պահպանել, իսկ հետո՝ բարձրացնել այն նշաձողը, որին հասել է։ Միայն այդ պրագայում գործընթացը կդառնա իրատեսական։ Մեզ մոտ ռիսկերը քաղաքական գործընթացի մեջ վերահսկելի են։ Եթե մեր ժողովուրդը հավատարիմ է եվրոպական արժեքներին, մարդու իրավունքների պաշտպանությանն ու արևմտյան աշխարհի մնացյալ քաղաքակրթական սկզբունքներին, այդ դեպքում ներդաշնակ զարգացումը շարունակվում է, և այդ պայմաններում ռիսկերը չեզոքացվում են։ Հակառակ դեպքում գործընթացը կդանդաղի կամ առհասարակ բացասական արդյունքների դեպքում ամբողջությամբ կկասեցվի»,- մանրամասնեց Օրդուխանյանը։
Դիտարկելով ԵՄ-ի կողմից ՀՀ քաղաքացիների՝ քաղաքական ապաստան խնդրելու հայցերի մերժման խնդիրը՝ քաղաքագետը նշեց, որ ապաստանի հայցումը սովորաբար ընդունված է ավտոկրատական պետություններից քաղաքացիների արտահոսքի դեպքում, բայց եթե Հայաստանը պահպանի իր դեմոկրատական կերպը և շարունակի ընթանալ զարգացման ճանապարհով, բնականաբար, այն պատրվակով հայցերը, թե իբր երկրում կան բռնաճնշումներ, առկա է ավտորիտար վարչակազմ և քաղաքացիներն իրենց քաղաքական հայացքների համար ճնշվում են, արդեն չեն ունենա հիմնավոր փաստարկներ՝ եվրոպական երկրներում քաղաքական ապաստան հայցելու համար։
«Ապաստանի հայցերի զգալի մասի մերժումը վկայում է, որ Հայաստանը գնալով բարելավում է իր ժողովրդավարական ցուցանիշները, հետևապես թեկուզ արհեստական կամ կեղծ հիմքերով ապաստանի հայցումը հետագայում սոցիալական խնդիրների լուծման տեսանկյունից չի կարող ընդունվել որպես հավատարժան փաստարկ։ Ամեն ինչ տեղի է ունենում զուգահեռաբար։ Սա նաև ապօրինի արտագաղթի կանխման նախապես մշակված մեխանիզմ է, որը նաև հետագայում վերահսկելի է դարձնում այդ ռիսկը»,- նշեց քաղաքագետը։
Օրդուխանյանի դիտարկմամբ՝ նույնիսկ եթե վիզաների ազատականացումը դառնա իրականություն, այդ դեպքում կպահպանվեն որոշակի իրավակարգավորումներն ու սահմանափակումները։ Ըստ նրա՝ գործընթացը սկզբնական փուլում տեղի կունենա մասնակիորեն, և բոլորի համար հավասարապես չի ընթանա, ինչը թույլ կտա իրականացնել մոնիթորինգ և հասկանալ, թե ընդունված որոշումը որքանով է արդարացի և որքանով է արդյունավետ ՀՀ-ԵՄ հարաբերությունների զարգացման համատեքստում։
«Ականատես կլինենք քայլ առ քայլ արվող գործընթացի։ Ամեն ինչ միանգամից չի բացվի։ Բացառություն կարվի որոշակի կատեգորիաների համար։ Օրինակ՝ եթե մարդիկ ունեն տնտեսական գործունեություն ծավալելու հետ կապված կապեր, եթե գիտակրթական շրջանակների միջև կա փոխայցերի և փորձի փոխանակման անհրաժեշտություն, որպեսզի նրանց տեղաշարժը լինի ավելի հեշտ, նրանք եվրոպական երկրներ կմեկնեն առանց հավելյալ սահմանափակումների։ Հետագայում, եթե գործընթացն արձանագրի դրական արդյունքներ, Հայաստանի բոլոր քաղաքացիների համար վիզաները կազատականացվեն ամբողջությամբ»,- ասաց մեր զրուցակիցը։
Անդրադառնալով Հայաստանում մեկնարկած ստորագրահավաքին՝ ԵՄ-ին անդամակցելու գործընթաց սկսելու վերաբերյալ՝ Օրդուխանյանն ընդգծեց, որ այդ գործընթացը նույնպես դրական է, քանի որ դրանով զբաղվում են արտախորհրդարանական ուժերը, որոնք ունեն դեմոկրատական ձգտումներ, և հասարակության մեջ կա նաև այդ օրակարգի որոշակի պահանջ։
«Գործընթացը բավականին սահուն ընթանում է մինչ այս պահը, ինչը հնարավորություն է տալիս նաև գործնականում վերհանել տրամադրությունները հասարակության մեջ՝ որպես էմպիրիկ նյութ։ Հետագայում կառավարությունը կարող է հիմնվել այդ փաստական տվյալների վրա և իր հաշվարկների համատեքստում կատարել կոնկրետ քայլեր։ Այդ գործընթացի արդյունքում հնարավոր հանրաքվեն կարող է նաև առաջիկա խորհրդարանական ընտրություններում ուժերի հարաբերակցության իմաստով փոխել Ազգային ժողովի պատկերը։ Որքան շատ խորհրդարանում ունենանք դեմոկրատական ուժեր, այնքան շատ իրատեսական կդառնա նույն վիզաների ազատականացումը, հետևապես նաև Եվրոպայի հետ մերձեցման գործընթացը, և որպես վերջնարդյունք՝ նաև ինտեգրումը»,- եզրափակեց քաղաքագետը։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
Ռուբեն Սիմոնյանը AI Conf 2024 շրջանակում մասնակցել է ԱԲ թեմայով քննարկմանը
ՀՀ բարձր տեխնոլոգիական արդյունաբերության նախարարի տեղակալ Ռուբեն Սիմոնյանը՝ հոկտեմբերի 12-ին կայացած AI Conf 2024-ի ընթացքում, մասնակցել է «Արհեստական բանականությունը՝ կառավարությունում» թեմայով պանելային քննարկմանը։
Բանախոսների թվում են եղել ՀՀ էկոնոմիկայի նախարարի տեղակալ Սևակ Միքայելյանը, Հայաստանի տեղեկատվական համակարգերի գործակալության տնօրեն
Ներսես Երիցյանը։
Ռուբեն Սիմոնյանն՝ իր խոսքում անդրադառնալով Հայաստանում արհեստական բանականության (ԱԲ) ուղղությամբ աշխատող մասնագետների գործունեությանը և ԲՏԱ նախարարության կողմից այդ ներուժը արդյունավետ կիրառելու հնարավորություններին, ընդգծել է, որ մասնավոր ընկերությունների հետ արդեն իսկ նախաձեռնվել է հանդիպում:
«Մոտ 45 հայկական ընկերություններ կան, որոնք թվային լուծումների վրա են աշխատում և թվային լուծումներ են տրամադրում։ Նման հանդիպումների նպատակն է ներկայացնել, թե ինչ տեսլական ունենք, ուր ենք ուզում հասնել, որոնք են լինելու հաջորդ քայլերը և ունենալ հստակ պլան»,- ասել է նախարարի տեղակալը։
Սիմոնյանը նշել է, որ սկսված է բարձր տեխնոլոգիական արդյունաբերության ռազմավարական ծրագրերի մշակման գործընթացը, որի ավարտին կլինեն հստակ ծրագրեր ԱԲ և այլ հիմնական ուղղություններով։ Նախարարի տեղակալի խոսքով՝ յուրաքանչյուր տարի ՀՀ կառավարությունը և մի շարք միջազգային կազակերպություններ մեծ գումար են հատկացնում թվայնացման ուղղությունը զարգացնելու համար, որոնց արդյունավետ օգտագործումն անչափ կարևորված է։
Այնուհետև անդրադարձ է կատարվել ստարտափների զարգացմանն ուղղված նախարարության գործունեությանը։
«Բացի հիմնական նախաձեռնություններն ու ծրագրերն, այս տարի նախաձեռնեցինք և Հայաստան բերեցինք միջազգային հայտնի աքսելերատոր «Plug and Play»-ին, որը 26 շաբաթյա ծրագիր է իրականացնելու, 14 շաբաթյա մենթորություն։ Ծրագրին դիմող ստարտափներ կան, որոնց և՛ պրոդուկտը և՛ գաղափարը ԱԲ ուղղվածությամբ են»,- ասել է Ռուբեն Սիմոնյանը:
Նախարարի տեղակալը հիշեցրել է նաև, որ Ինժեներական քաղաքում տեղադրված գերհամակարգչի ռեսուրսն էլ անվճար տրամադրվել է ինստիտուտներին, ոլորտի մասնագետներին, և արդեն իսկ շուրջ 20 գիտահետազոտական աշխատանքներ իրականացվում են այդ համակարգչի միջոցով։ Ռուբեն Սիմոնյանն ընդգծել է՝ գերհամակարգչի օգտագործումը կնպաստի գիտելիքների ձեռքբերման, բարդ խնդիրներին նոր ինովացիոն լուծումներ տալուն և կստեղծի կարողությունների կապիտալ՝ Հայաստանը որպես առաջատար տեխնոլոգիական երկիր տեղորոշելու համար:
Քննարկման մյուս բանախոսը՝ Ներսես Երիցյանն, անդրադարձել է տվյալների պահպանման թեմային, գործակալության կողմից իրականացվող աշխատանքներին, կարևորել այդ ուղղությամբ համակարգված աշխատանքի անհրաժեշտությունը։
Սևակ Միքայելյանն էլ խոսել է Էկոնոմիկայի նախարարության կողմից մշակված այն քայլերի մասին, որոնք օգնում են բիզնեսին թվայնացնելու իրենց աշխատանքային գործընթացները։
Քննարկումը վարել է Krisp-ի համահիմնադիր և նախագահ, 10Web-ի համահիմնադիր և գործադիր տնօրեն, BigStory վենչուրային ֆոնդի համահիմնադիր Ատավազդ Մինասյանը։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com
Հայ բռնցքամարտիկները հաղթանակներ են տարել Եվրոպայի առաջնությունում․ Դավիթ Եգորյանը հաղթել է թուրք մրցակցին
Հայ բռնցքամարտիկները հերթական հաղթանակներն են տարել մինչև 22 տարեկանների Եվրոպայի առաջնությունում։
«71 կգ քաշային Նարեկ Զախարյանը պարտության է մատնել Սլովակիայի ներկայացուցիչ Լադիսլավ Հորվարտին։
Իսկ 54 կգ քաշային Դավիթ Եգորյանը տպավորիչ հաղթանակ է տոնել թուրք Չան Կայայի նկատմամբ»,- նշված է Հայաստանի բռնցքամարտի ֆեդերացիայի մամուլի ծառայության հաղորդագրությունում։
© progressgyumri.am Armenian News / Analyses:
Հեռ. ՝ +37498 691-690; Էլ. Փոստ ՝ progressgyumringo@gmail.com