Նորություններ

Գյումրին իր տոնն է նշել, պատվով, փառքով, երգ ու պարով

Գյումրու օր տոնակատարությունն իր մեծածավալ միջոցառումներով հետաքրքրել և փողոց էր դուրս բերել մեծին ու փոքրին, ահելին ու ջահելին: Այսօր բոլորը մեկ ամբողջություն են, մեկ տրամադրություն, մեկ տուն և մեկ տանիք: Գյումրեցիներից յուրաքանչյուրինն է տոնը, որին գյումրեցիներից, Գյումրու քաղաքապետից և Շիրակի մարզպետից բացի, ներկա էին երկրի վարչապետը, ՀՀ մշակույթի նախարարը, ԱԺ պատգամավորներ, շատ հյուրեր ինչպես հանրապետության տարբեր մարզերից, այնպես էլ արտերկրից: Գյումրու օր տոնակատարության շրջանակներում անցկացվեց Հացի փառատոն Գյումրու ժողովրդական ճարտարապետության և քաղաքային կենցաղի թանգարանի բակում: Ներկաներից յուրաքանչյուրը հնարավորություն ունեցավ տեղում թխվող թոնրի լավաշ, բոքոն ու գաթա համտեսել: Վարչապետ Տիգրան Սարգսյանն ու կառավարության մյուս ներկայացուցիչները գոհ էին ընդունելությունից էլ, հյուրասիրությունից էլ, գյումրեցու վերաբերմունքից էլ: Դիտեք տեսանյութը:

Ի՞նչ է հայտնաբերել «Գյումրու Առաջընթացը» քաղաքապետարանի աշխատանքում եւ ի՞նչ է առաջարկում

Շաբաթ օրը «Գյումրու Առաջընթաց» քաղաքացիական հասարակության զարգացման կենտրոն ՀԿ-ն ամփոփեց ու ներկայացրեց իր «Երկխոսություն` հանուն քաղաղաքացիական հասարակության զարգացման» ծրագրի շրջանակում կատարած աշխատանքների արդյունքները: Հաշվետվությունների հրապարակմանը թեեւ տեղեկացված եղել էին Գյումրու Ավագանու 5 անդամ, սակայն ներկա էր միայն Լեւոն Բարսեղյանը, իսկ քաղաքապետարանի աշխատակազմի միակ ներկայացուցիչը ծրագրերի եւ վերլուծության բաժնի պետի տեղակալ Մկրտիչ Ճարտարյանն էր:

Ծրագիրը, որը ֆինանսավորվել է «Քաունթերփարթ ինտերնեշնլ Հայաստանի» եւ ԱՄՆ-ի Միջազգային Զարգացման Գործակալության կողմից, Գյումրիում իրականացվել է մայիսից եւ շարունակվել մինչեւ հոկտեմբերի վերջ: Նպատակն է եղել բարձրացնել Գյումրու հասարակության տեղեկացվածության մակարդակը, ապահովել ՏԻՄ գործունեության թափանցիկ կառավարումն ու հրապարակայնությունը: Ծրագրի շրջանակում անցկացվել են ավագանու որոշումների, համայնքի բյուջեի, քառամյա զարգացման ծրագրի դիտարկում, վերլուծություն: Ստեղծվել է կազմակերպության կայքը` progressgyumri.am, որի օգնությամբ էլ իրականացվել է ավագանու 3 նիստերի ուղիղ հեռարձակում, կատարվել են հանրային քննարկում, հեռուսատաքննարկումներ, համայնքի բյուջեի հետազոտություն եւ այլն:

Ծրագրի փորձագետ Ղարիբ Հարությունյանը վերլուծությունների արդյունքում պարզել է, որ 2013թ-ի Գյումրու բյուջետային ուղերձը պարունակում է բավական մանրամասն տեղեկատվություն բյուջետային քաղաքականության հիմնական ուղղությունների վերաբերյալ, սակայն ուղերձում ներառված չեն գործող օրենսդրությամբ պահանջվող որոշակի տեղեկություններ:

Համայնքի 2013-ի բյուջեի եկամուտների հավաքագրման ցուցանիշների վերլուծությունները ցույց են տվել, որ ընդհանուր եկամուտների կատարողական ցուցանիշը 2013-ի առաջին կիսամյակի համար կազմել է 47, 6 տոկոս, որից վարչական բյուջեի եկամուտների գծով` 47,5 տոկոս, իսկ ֆոնդային բյուջեի գծով` 50 տոկոս: Ամենաբարձր կատարողական է ապահովվել շենքերի եւ շինությունների համար գույքահարկի գծով` 61 տոկոս, իսկ ամենացածրը` վարչական գանձումների գծով` 39,6 տոկոս: Համայնքի բյուջեի ընդահանուր ծախսերը 2012-ի նկատմամբ պլանավորվել են 0,06 տոկոսով ավելի, վարչական բյուջեի ծախսերը` 0,07 տոկոսով ավելի, իսկ ֆոնդային բյուջեի ծախսերը պլանավորվել են 0,07 տոկոսով պակաս:

Ընդհանուր առմամբ` 2012-ի հետ համանման ցուցանիշների համեմատական վերլուծությունները ցույց են տվել, որ ինչպես եկամտային, այնպես էլ ծախսային ցուցանիշների կառուցվածքի առումով առկա է որոշակի առաջընթաց, սակայն բյուջետային գործընթացի իրականացման վերաբերյալ ՀԿ-ն առաջարկությունների փաթեթ է ներկայացրել` իրականացնել նմանատիպ հետազոտությունների 2013-ի փաստացի տարեկան կատարողական ցուցանիշների հիման վրա, միջազգային փորձի ուսումնասիրության հիման վրա համայնքի բյուջեի վարչական եւ ֆոնդային մասերի օպտիմալ հարաբերակցություն վերլուծություն, արդյունավետ պլանավորում եւ այլն:

ՀԿ-ն առաջարկությունների փաթեթ է ներկայացրել նաեւ սոցիալապես անապահով անձանց դրամական օգնության տրամադրման չափորոշիչների վերաբերյալ: Կազմակերպությունն առաջարկել է սոցիալապես անապահովության գնահատման սանդղակ: Խնդիրն այն է, որ կազմակերպությունը մայիսից գրավոր հարցումներ է ուղարկել Գյումրու քաղաքապետարան` այդ հարցումների թվում նաեւ խնդրելով սոցիալապես անապահով խավին դրամական օգնությունների վճարված ցուցակների պատճեներն ու այդ անձանց տրամադրման չափորոշիչները, սակայն Գյումրու քաղաքապետարանը նամակներին պատասխանել է ոչ լիարժեք. տրամադրվել է միայն 2013թ-ի առաջին կիսամյակում սոցիալապես անապահով խավին տրամադրված գումարի չափը, չեն նշվել դրամական օգնության տրամադրման հստակ չափորոշիչները: Հանրային խորհրդի կազմում ընդգրկված ՀԿ-ների ուսումնասիրությունների արդյունքում պարզվել է, որ 14 քաղաքացիներ միաժամանակ դրամական աջակցություն են ստացել եւ Շիրակի մարզպետարանից, եւ Գյումրու քաղաքապետարանից:

ՀԿ-ն հղում է կատարել նաեւ «Ասպարեզ» օրաթերթում հրապարակված այն հետաքննություններին, որոնց արդյունքներում բացահայտվել էին, մասնավորապես, այն, որ քաղաքապետարանից դրամական աջակցություն են ստացել նաեւ քաղաքապետարանի աշխատակցիները, այդ թվում` քաղաքացիները օրաթերթի թղթակցին օգնություն ստանալու վերաբերյալ տվել են ոչ հստակ պատասխաներ: Եւ հաշվի առնելով, որ Գյումրու Ավագանու որոշումներով հաստատված օգնության տրամադրման հստակ չափորոշիչներ չկան, կազմակերպությունն ներկայացրել է սոցիալապես անապահովության գնահատման սանդղակ:

Առաջարկությունների փաթեթները, ինչպես նշեց ծրագրի ղեկավար Հասմիկ Մխիթարյանը, ներկայացնելու են Գյումրու քաղաքապետին ու Ավագանու անդամներին:

Հաշվետվության ընթացքում անդրադարձ կատարվեց նաեւ քաղաքապետարանի հաստիքացուցակներին, աշխատակիցների թվի եւ այլ հարցերի:

Անի Մկրտչյան

«ԵՐԿԽՈՍՈՒԹՅՈՒՆ՝ ՀԱՆՈՒՆ ՔԱՂԱՔԱՑԻԱԿԱՆ ՀԱՍԱՐԱԿՈՒԹՅԱՆ ԶԱՐԳԱՑՄԱՆ» ծրագրի շնորհանդես

««ԳՅՈւՄՐՈւ ԱՌԱՋԸՆԹԱՑ» Քացաքացիական Հասարակության Զարգացման Կենտրոն» հասարակական կազմակերպության նախաձեռնությամբ, Քաունթերփարթ Ինտերնեշնլ Հայաստանի և ԱՄՆ Միջազգային Զարգացման Գործակալության ֆինանսական աջակցությամբ իրականացվեց «ԵՐԿԽՈՍՈՒԹՅՈՒՆ՝ ՀԱՆՈՒՆ ՔԱՂԱՔԱՑԻԱԿԱՆ ՀԱՍԱՐԱԿՈՒԹՅԱՆ ԶԱՐԳԱՑՄԱՆ» ծրագիրը, որի փակման շնորհանդեսին ներկայացվեցին ծրագրի, ավագանու որոշումների վերաբերյալ մոնիտորինգի, Գյումրի համայնքի 2013-2016թթ. քառամյա ծրագրի 1-ին կիսամյակի հետազոտության արդյունքները: <<ԵՐԿԽՈՍՈՒԹՅՈՒՆ՝ ՀԱՆՈՒՆ ՔԱՂԱՔԱՑԻԱԿԱՆ ՀԱՍԱՐԱԿՈՒԹՅԱՆ ԶԱՐԳԱՑՄԱՆ>> ծրագրի նպատակն է բարձրացնել Գյումրիի հասարակության տեղեկացվածության մակարդակը և նպատակաուղղված էր համայնքային խնդիրների ու որոշումների, Գյումրու ՏԻՄ գործունեության, համայնքի թափանցիկ կառավարման ու հրապարակայնության ապահովմանը: Այս մտահղացումն իրականացնելու համար, Գյումրի քաղաքի քաղաքացիական հասարակության ներկայացուցիչներից ընտրվեց 15 անդամից կազմված մոնիտորինգ իրականացնող հանրային խորհուրդ, որը բաղկացած էր քաղաքացիական հասարակության ներկայացուցիչներից: Համայնքային խնդիրների, ավագանու որոշումների, համայնքի զարգացման քառամյա ծրագրի, հաստատված ամենամյա բյուջեի վերաբերյալ կազմակերպվեցին 6 հանդիպում քննարկումներ, իրականացվեց մոնիտորինգ ավագանու սոցիալական ոլորտի որոշումների վերաբերյալ, Գյումրի համայնքի 2013թ. բյուջեի վերլուծություն: Ծրագրի բաղադրիչներից էր նաև ավագանու նիստերի թափանցիկության և տեղեկատվության մատչելիության ապահովումը կազմակերպության նորաստեղծ կայքէջում՝ ուղիղ հեռարձակմամբ: Ստեղծվեց՝

1. Կազմակերպության www.progressgyumri.am կայքէջը, որի միջոցով իրականացվեց Ավագանու 3 նիստերի`18.06.2013թ., 29.07.2013թ., 23.09.2013թ. և 1 հանրային քննարկման ուղիղ հեռարձակում (տեսագրություն) կայքէջում,

2. <<Ցայգ>> ՀԸ ուղիղ եթերում անցկացվեցին 6 հեռուստաքննարկումներ՝ Գյումրու ավագանու որոշումների և դրանց կատարողականության, սոցիալական օգնությունների տրամադրման կարգի, <<Գյումրին ԱՊՀ մշակութային մայրաքաղաք>> ծրագրի ֆինանսական և բովանդակային բաղադրիչների, Գյումրի քաղաքի քառամյա ծրագրի, բյուջեի, քաղաքաշինական խնդիրների մասին և ՔՀԿ-ների դերին համայնքային խնդիրների լուծման գործում, առաջարկվել այլընտրանքային լուծումներ

3. Պատրաստվեցին և հեռարձակվեցին Ավագանու 3 նիստերի, 3 կլոր սեղան քննարկումները լուսաբանող 6 ռեպորտաժներ, որոնք տեղադրվել են կայքում, տարածվել համացանցում՝ կազմակերպության աանվամբ, քաղաքացիական երկխոսության լսարան խմբերում: Ծրագրի տևողությունը 6 ամիս է (01.05.2013թ. – 31.10.2013թ.) :

Պաշտոնավարման մեկ տարին է ամփոփել Գյումրու քաղաքապետ Սամվել Բալասանյանը:

Պաշտոնավարման մեկ տարին է ամփոփել Գյումրու քաղաքապետ Սամվել Բալասանյանը: Անցնող մեկ տարում լուրջ և հսկա աշխատանքներ են իրականացվել գրեթե բոլոր ոլորտներում,-նշել է քաղաքապետն ու մանրամասնել, թե հատկապես ինչին է ուշադրություն դարձվել, ինչն է ենթարկվել փոփոխության ու, թե ինչպիսի նորամուծություններ են հասել Գյումրի: 2012 թվականի նույն այս ժամանակահատվածում, ըստ Սամվել Բալասանյանի, Գյումրու քաղաքապետարանն իրեն էր հանձնվել 1 մլրդ 58 մլն դրամի պարտքով, որի մեջ ներառնված էր անգամ կառույցի աշխատակիցների աշխատավարձը: Նախադպրոցական հիմնարկներն են վերակազմակերպվել մեկ միավորի, մշակութային միջոցառումներ են անցկացվել, գյումրեցի մարզիկները լուրջ հաջողություններ են ունեցել: Գյումրին արտաքին կապեր է հաստատել Պիտեշտի, Լեհաստանի, Բելոստոկի, Սիանի հետ: Որպես առաջին հաջողություն, Սամվել Բալասանյանն ընդգծում է ավագանու ինստիտուտի կայացումը: Մինչ օրս անցկացվել է օնլյան տարբերակով հեռարձակվող 11 նիստ, ընդունվել 157 որոշում, ձևավորվել է 4 մշտական հանձնաժողով: Մանրամասներին հետևեք տեսանյութում: